LABELE UZA PREZEPIU HANESAN INSTRUMENTU KONFLITU

Administrador munisipiu Dili, Gaspar da Silva Soares afirma, sidadaun hotu-hotu tenki valorija prezepiu hanesan fatin komemorasaun loron Nain Jesus moris ninian, laos uja fali prezepiu hanesan instrumentu atu hatudu hahalok ne’ebe la merese atu halo.

“Ita tenki valorija prezepiu hanesan fatin ida ne’ebe uja hodi komemora loron Nain Jesus moris nian, laos ita halo prizepiu sai hanesan instrumentu ou fatin ida para kria problema ninian,”Gaspar Soares ba JN-Diário wainhira halo sorumutu anual ho Ministeriu Administrasaun Estatal (MAE) iha Centro Convenções de Dili (CCD), Segunda (21/12).

Nia esplika, prizepiu kiik oan ne’ebe komunitariu sira halo ne’e primeiru ninia distansia ne’e tenki dook husi estrada metru nen (6), maibe realidade komunidade balun halo tuir ne’e tama mos ba parte seleksaun ninian.

Nia fundamenta mos katak, munisipiu Dili halo ona deklarasaun konjunta katak pelumenus distansia prizepiu ne’e tenki dook husi estrada metru 6, no tenki respeita mos prizepiu sira ne’e hanesan labele toka muzika rock ou muzika ne’ebe la relasaun ho loron natal no tinan foun ninian, e labele hemu tua iha prizepiu laran no labele dansa iha area prizepiu ninian.

“Atu prevene ne’e ita iha ona koordenasaun konjunta ida entre munisipiu inklui xefi suku sira, Polisia Nasional Timor Lorosa’e (PNTL) no veteranus sira, no apela ona ba sira katak sira sei monitorija prizepiu hirak ne’ebe estabelese ona iha kada bairu ne’e prense kriteriu ne’ebe maka mensiona ona ka lae,”nia dehan.

Nia informa, prosesu halo avaliasaun ne’e sei halao iha dia 26 Dezembru 2015 hodi defini prizepiu ida ne’ebe maka diak liu tuir orientasaun ne’ebe hatun husi nasional katak orsamentu ba primeiru lugar nian ho montante $ 2500, segundu lugar $ 2000, treseiru lugar $ 1500, no ne’ebe maka hetan harapan sei hetan $ 1000.

Entretantu tuir adjuntu administrador munisipiu Dili, Jeca Smith informa, nudar relijiaun Katoliku hotu-hotu tenki fo an tomak selebra loron natal ne’e ho domin no dame.

“Povu hotu-hotu tenki kontribui ba selebrasaun loron boot natal no tinan foun ne’ebe maka ita sei hasoru, tanba loron natal no tinan foun ne’e loron ida ne’ebe maka fo oportunidade mai ita atu hadame malu no simu malu nudar maun no alin,”tenik nia. ves

Suara Timor Lorosae

ADERE BA ASEAN IHA 2016, REKURSUS HUMANUS TL SEIDAUK SUFISIENTE

Rekursu humanus Timor Leste seidauk sufisiente wainhira Timor Leste adere ba membru Association of South East Asia Nation (ASEAN) iha tinan 2016.

Membru Parlamentu Nasional husi Bankada PD, Paulino Monteiro dehan, se TL adere ba ASEAN iha 2016, maka hela fulan deit ona, maibe husi aspeitu rekursu humanus seidauk sufisiente atu TL kompete ho membru ASEAN sira seluk.

“Hau hanoin TL atu konkore iha prosesu tama ASEAN ne’e maka, tekniku sira tenke hakas an, tamba hare ba realidade tekniku iha TL ne’e sei fraku tebes,” hateten Deputadu Paulino Monteiro ba jornalista sira iha PN, Segunda (21/12/2015).

Preprarasaun fizika TL nian iha rai laran, Paulino Monteiro hateten, foin maka bele atinji 30% , tanba ne’e, Governu tenke tetu didiak antes adere ba ASEAN iha tinan foun 2016.

Iha fatin hanesan Deputadu Bankada CNRT, Pedro da Costa hatutan katak,Timor Leste atu tama Asean maka tenke prepara an ho didiak no sosiadade sira mos tenke prontu, intermu rekursu umanus ho politika.

“Ita hotu tenke prontu, karik ita obriga deit Governu hodi tama Asean no ita la prepara an maka ema seluk sei domina iha merkadu, tamba tama ASEAN sei halo kompetisaun bo’ot iha area negosiu nian, no haree ba rekursu humanu iha rai laran hatudu katak, ita seidauk prepara an ho masimu atu tama asean,” hateten Pedro da Costa.

Nia mos haktuir liu tan katak, atu tama ASEAN iha tinan ida rua nia laran, maibe hare ba preparasaun TL nian foin maka 50% karik, tamba ne’e tenke iha politik diak, ba negosio no emprezariu sira mos labele depende deit ba projetu Governu nian, maibe oinsa atu uja osan rasik halo buat ruma iha rai laran, maka Governu sei selu fali iha loron ikus, no buat ki’ik sira ne’e presiza atu hadia liu liu iha kapasitasaun rekursu umanus.

Deputadu Manuel Salsinha husi bankada CNRT mos lia tun dehan, hakarak ou lakohi Timor Leste tenke tama duni ASEAN iha tinan rua tolu mai ne’e.

“Ita tama ona ASEAN maka bele hadia ita nia rai ne’e sai diak, liu liu iha area negosio nian, oinsa atu halo kompetisaun iha merkadu livre,”Dehan nia. Nes

Jornal Nacional

Jorge Serrano: 2016, GMN holding sei fo atensaun diak liu tan ba trabalhador sira

Presidente do Conselho da administracão Grupo Media Nacional (GMN-Holding), Jorge Serrano hatete, iha tinan 2016 mai, GMN holding sei tau atensaun diak liu tan ba trabalhadores, li-liu kria kondisaun ne’ebe diak iha servisu fatin, nune’e bele foti liu tan produtividade servisu lor-loron nian.

Antes atu taka tinan 2015, presidenti conselho GMN Holding nee realiza reniaun ho general manejer, direktores no manejer sira hotu, hodi haree fila fali planu no programa, dezafius no problema, atu bele hadia iha tinan oin mai.

“Hau koalia ona ho manejer hot-hotu katak, tinan oin ne’e atu tau liu atensaun maximu ba funsionariu sira. Tenki haree problema sira ne’ebe mosu, nune’e evita lori mai GMN-Holding,” dehan presidenti Conselho da Administracao GMN, Jorge Serrano ba ninia trabalhador tomak iha festa natal hamutuk iha edifisiu kompañia Marabia.Lda Taibesi, Tersa (22/12) liu ba.Nain ba GMN holding nee mos husu manejer sira, tau atensaun ba bem estar trabalhador sira iha kompanhia ida- idak, hodi kria ligasaun diak ho funsionariu hotu, inklui kria regras atu bele sistematiza rekursu humanus ne’ebe iha.

“Hadia imi nia komportamentu sira, uza sasan ho responsabilidade. Tenki iha hanoin katak, empreza ne’e nudar fatin ida ba ita hotu dedika an ba, ne’ebe tenki iha sentimentu sai nain hodi tau matan ba sasan hirak ne’e,”afirma Jorge Serrano.

Atual Presidente Confederasaun Empresarial Comunidade Paises Lingua Portugues (CE- CPLP) nee mos hatete tan, durante ne’e laiha problema seriu ho servisu, tanba komunikasaun diak. Nune’e espera ba tinan 2016 mai, komunikasaun sei sai diak liu tan entre general manejer, manejer ho trabalhadores, hodi evita problema uma laran sai ba liur.

Iha oportunidade ne’e, emprezariu Timoroan ne’e fo sai katak, iha empreza GMN-Holding partisipasaun feto kuaze pursentu 70, ne’ebe servisu ho kapasidade, dedikasaun no seriedade, basa feto atu sala ne’e tauk no moe, bainhira simu xamada atensaun.

“Ohin loron Grupu ne’e bo’ot tanba feto sira nia kontribuisaun liu-liu ba hau nia kaben ninia esforsu tomak mos,” dehan Jorge Serrano.

Empresario joven nee mos rekuñese katak, iha planu no programa ne’ebe trasa iha tinan 2014 ba tinan 2015, maibe la atinji 100%. Mesmu nune’e iha difikuldade barak ne’ebe ita liu no agora ita hamutuk konsolida hanoin, hodi implimenta komprimisiu sira ne’ebe halo ba rai doben TL. Nudar nain ba GMN holding, hodi rekuñese trabalhadores sira nia kontribuisaun ba empreza no hato’o ninia diskulpa ba trabalhador hotu ba desizaun ne’ebe nia foti iha tinan 2015 nebe karik la monu ba trabalhador ida idak ninia laran.

Iha parte seluk, Sekretaria estadu socio e económico de mulheres, Venderanda Lemos, rekuinese katak emprezariu timoroan ne’ebe fo servisu ba timor oan barak, liu-liu feto mak empreza GMN-Holding.

Tanba ne’e nia fo korajem ba trabalhadores katak, atu iha responsabilidade no tenki iha espiritu pertense ba empreza, hodi lori empreza ne’e ba oin.

“Servisu iha empreza ida, komunikasaun no espiritu de pertensia (rasa memimiliki) patrimonia institusaun ne’e importante. Tenki apresia ba saida mak dadauk ne’e ita iha ona katak, apresia ba profesionalismu ne’ebe ita ida-idak hala’o hela, nune’e ita ninia espiritu de pretense ba empreza ninian ne’e forte no lori servisu ba oin, basa empreza núdar uma mahon ba ita nia-an rasik, família no sosiedade tomak,”dehan Venderanda Lemos.

Nunee mos padre, Vigariu jeral diocese Dili, Pe. Juvito do Rego ne’ebe diriji refleksaun natal hamutuk katak, selebrasaun natal ne’e balun mai ho kontenti, balun triste, ne’e laos lakohi apresia ninia servisu ka profesionalismu, maibe ne’e hatudu katak lahatene selebra vida. Tempu ida ne’e ema hotu koko festeza ba maromak nia laran luak ne’ebé durante mai iha imi let núdar servidor ba iha empreza iha rai doben TL.

Amo Juvito dehan, profesionalismu hanesan vokasaun ida ne’ebé tenke no presiza tebes atu ita fó apresiasaun no agradese duni, nune’e ita bele haburas espiritu de pertense ba profesaun ne’e rasik.

Haree ba kontribuisaun empreza Grupo Media Nacional (GMN) nian nebe fo servisu ba timor oan lubuk boot ida, hanesan uma mahon ida ba trabalhadores hotu, tanba ne’e mak amo Juvito konsidera GMN – Grasa Maromak Nian ne’eb’e fó husi maromak ba empreza nain, tanba ne’e presiza duni trabalharores ninia konsitensia no seriedade hodi bele agradese no hatutan Nai Maromak ninia laran luak nee.

GMN Holding nudar sumrinha ba kompanhia, Marabia Lda, Novo Turismo, Grupo Media Nacional, Jornal Nacional Semanario no Jornal Nacional Diario, Grafika Nacional, Hotel Vila Verde, agensia LGX, GMN security no SNC. nty/ito

Jornal Nacional

MORAS LEPRA REDUS ONA

Koordenador ba Moras Lepra, servisu saude Munisipiu Dili, Manuel Vegas informa, servisu saude Munisipiu Dili iha tinan 2013 ho 2014 rejistu kazu moras lepra ho numeru ne’ebe aas, maibe iha tinan 2015 kazu moras lepra ne’e komesa redus ona.

“Relatoriu ba kazu moras lepra iha 2013 ami registu ema ne’ebe kona moras lepra hamutuk 50 pesoas , iha 2014 ami registu kazu lepra 49 depois iha 2015 kazu moras lepra ne’e tun ona ba 27 ne’e sinifika katak moras lepra iha ita nia rain ne’e komesa redus ona,”afirma Manuel Vegas ba JN- Diário iha nia servisu fatin Bairo Formosa Dili Kuarta (23/12/2015).

Nia haktuir, dadus ne’ebe rejistu barak liu mak iha Munisipiu Dili iha area Dom Aleixo, Vera Cruz, Atauro.

“Relatoriu ne’ebe relata mai iha ne’e husi Dom Aleixo mak numeru boot oituan mas ami verifika ne’e la’os ema ne’ebe origin iha Dili ne’e no iha fali partes Lahane nian mos iha so ema origin ida rua deit tuir fali mai Atauro iha suku Makadade ho Makili ne’e mak volume aas iha 2013 ho 2014 ne’ebe mak aas mas iha 2015 ne’e komesa redus ona,”esplika Manuel.

Nia dehan, moras Lepra mak hanesan moras ida ne’ebe mosu iha ema nia kulit hanesan hena mutin ne’ebe ho nia sinal la senti katar. Banhira kuu mos la senti moras no moras lepra ne’e nia kauza mai husi bakteria Lepra ne’ebe liga ho nivel edukasaun menus banhira laiha Higiene ba saude bele kona moras Lepra.

Tamba ne’e, Manuel dehan, atu halo prevensaun ba moras Lepra ne’ebe mosu iha rai laran mak Ministeriu Saude liu husi Saude Munisipiu Dili agora dadauk tama faze informasaun liu husi programa Saude familia.

“Ami nia planu estratejia agora dadauk la’o ne’e mak liu husi programa Saude familia. Iha programa ne’e Enfermeiru, Parteira no Mediku sira sei vizita uma kain ida-idak atu identifika kondisaun saude familia uma kain ida- idak nian atu fo informasaun ba komunidade sira atu nune’e bele redus moras Lepra iha ita nia rain,”dehan nia.

Nune’e mos nia husu ba komunidade hotu iha Timor laran tomak katak, karik ema ruma mak kona moras Lepra hanesan mosu iha kulit hanesan hena mutin ku ba lasenti moras hakbesik aan ba iha fasilidade saude atu hetan tratamentu tamba moras ne’e banhira la hala’o tratamentu bele halo ema hetan aleizadu.car

Jornal Nacional

CNE MAL GASTUS, DEPUTADU ANICETO LAIHA EVIDENSIA

Comissão Nacional das Eleições (CNE) desmente deklarasaun membru Parlamentu Nasional (PN) husi Bankada FRETILIN, Aniceto Guterres, ne’ebe dehan, CNE komete mal gastus no laiha disiplina ba ezekusaun orsamentu.

Liu husi konferensia imprensa iha CNE, Kuarta (23/12/2015), porta vos CNE Francisco de Vasconselos, desmente deklarasaun Deputadu Aniceto Guterres nian, ne’ebe CNE konsidera la fundamentu no la iha razaun tanba altura CNE ba halo audensia publiku kona ba orsamentu jeral do estadu 2015 iha komisaun A, Deputadu Aniceto la tama servisu, tanba ne’e nia la iha informasaun sobre ezekusaun orsamentu CNE nian.

Francisco de Vasconselos afirma katak, orsamentu CNE nian bazeia ba re-submisaun ne’ebe CNE submete ba DNO iha loron 30 Janeiru 2015, tanba ne’e kestaun nebe deputadu Aniceto hare liu ba free balance no la hare ba sub misaun nebe CNE submete.

“Deputadu Aniceto hatete katak depesa CNE nian hamutuk 1.060% ne’e mai hosi montante alokasaun $ 700 (dezpezas operasional) gastus 74,2163.45 ne’e kumpri pakote fiskal. Maibe realidade CNE iha fali re-submisaun ikus nebe submete ba DNO ho montante $65, 248.00 bazeia ba ajustamentu orsamentu pakote fiskal no pakote eleisaun,” esplika Francisco de Vasconselos.

Nia hatutan, ezekusaun CNE ba rubrika desprezas operasional liu deit 14% la hanesan ho deklarasaun Deptadu Aniceto temi. Exemplu alokasaun orsamentu tuir re-submisaun ikus nebe submete ba DNO $ 65,248.00 ejekuta $ 74,213.45. ne’e hatudu katak CNE ejekuta liu deit $ 8,965.45 ka 14%, laos 1,060 hanesan Deputadu Aniceto dahan.

Kona-ba viajen lokal Deputado hateten katak CNE nia ejekusaun hamutuk 18%. Tuir re-submisaun mk iha CNE so ejekuta deit 40% no 60% neʾe fila fali ba kofre Estadu.

Nia hatutan Ezemplu alokasaun orsamentu tuir re-submisaun ikus nebe submete ba DNO $ 384, 240.00 ejekuta $ 154 860. Ne’e hatudu katak CNE ejekuta deit 40%, laos 182% hanesan Deputadu dehan.

Relasiona ho rubrika viajen estranjeiru nian, Deputadu Aniceto hateten katak CNE ejekuta orsamentu ho US$ 380. Informasaun ne’e los tamba iha momentu neba CNE Organiza konferensia internasional ida hodi kolia kona-ba prosesu Eleitoral Desafiu no Oportunidade.

Nia hatutan konferensia internasional ne’e partisipa hosi partisipante internasional hamutuk 71 nebe mai hosi nasaun 21 husi kontinente 5. Aleinde ne’e komisariu sira mos halo viajen estranjeiru hodi halao estudus komparativos atu bele ganha esperiensia foun nune ikus mai bele melora sistema eleitoral. Nes

Jornal Nacional

BUS BALTIMOR MONU IHA FATUAHI, EMA 10 MATE, 37 GRAVE

Bus BALTIMOR ho sapa matrikula Polisia 32-670 diresaun Díli-Lospalos, Domingo (20/12) tuku 6:00 OTL monu iha Fatuahi, rejulta ema nain 10 mate no nain 37 ho kondisaun grave.

Kronolojia asidente trafiku hodi rezulta Bus monu ne’e, tamba sofer hanehan volante hodi hasai ahikose ba sunu sigaru, maibe derepente sofer ne’e hateke ba oin hodi hetan no hakfodak ba mikrolet diresaun Metinaro-Dili no nia silu volante ne’e arbiru deit ona ba liman karuk no Bus ne’e monu tun kedas ba rai naruk ho metru 95.

Bus ne’e baku fila los iha kruzamentu entre Fatuahi ho Akanuno nian, tanba sofer maka la kontrola a’an lakon konsentrasaun nune’e asidente mos mosu.

Iha oportunidade, Komandante Interinu PNTL Munisipiu Dili Euclides Belo, informa ba Jornalista sira katak, Bus ne’e baku fila iha Fatuahi, tamba sofer maka lakon kontrolu, signifika sofer maka sala. Tanba lori hela kareta ne’e maibe kontinua sunu sigaru, entaun hasoru Mikrolet iha oin konsentrasaun lakon hodi kareta ba monu iha rai naruk.

Nia esplika, pasajeirus ne’ebe mak sa’e iha Bus BALTIMOR diresaun Dili-Lospalos ne’e   hamutuk ema   45 nune’e ema nain 6 mate fatin, no 2 mate iha Hospital Nasional Guido Valadares (HNGV) ne’ebe kompostu husi mane 4 no feto 4. Nune’e mos 37 ho kondisaun grave.

Iha fatin hanesan, tekniku forensik Hospital Nasional Guido Valadares (HNGV) Frederico Loca, hatete, parte mortuariu bolu ona familia matebian rasik ida idak hodi hato’o atu sosa ropa ba fo hatais   mate isin nune’e iha lorokraik kareta funerariu bele tula ida idak ba ninia knua ka moris fatin.

Frederico Loca, hatutan, sira nia parte hein prosesu investigasaun husi polisia konaba asidente Bus monu ne’e.

Nune’e mos, Diretor Diresaun Nasional Dezenvolvimentu Sosial Ministeriu Solidaridade Sosial (MSS) Florencio Gonzaga, dehan parte MSS nian sei responsabiliza kaixaun matebian, no apoiu hahan ba kada matebian hodi ba serimonia prosesu funebre ninian.

Nia esklarese, apoiu ne’ebe mak MSS fo maka hanesan prepara kareta Funerariu hodi tula matebian ba ida idak nia fatin no mos apoiu hahan hodi tula diretamente husi MSS ba iha kada familia ou matebian nia uma.

Bus BALTIMOR hetan dezastre ne’e tan ba Daruak ona, tamba iha tinan kotuk hetan ona asidente alias baku fila iha Munisipiu Manatuto, nune’e patraun ema Lospalos ne’e fa’an tiha ona ba ema Laga maka sosa tiha, maibe Bus ne’e Laga oan lakohi troka nia naran no kontinua halai diresaun Dili-Lospalos. To’o ikus monu tun tan iha Fatuahi ne’e.

Tuir observasaun Jornalista JN-Diário iha terrenu nota katak, iha Hospital Nasional Guido Valadares (HNGV), familia bo’ot husi Munisipiu Lautém dadersan tuku: 6 ho balun OTL mai hein oan, alin, maun, primu, inan, no aman iha hospital refere hafoin rona Bus BALTIMOR monu iha fahtuahi.

Hafoin Ambulansia hodi pasajeirus ne’ebé monu iha asidente ne’e to’o iha HNGV, familia sira simu ho tanis, tristi tanba sira nia oan, maun, alin, primu, ferik, katuas, inan no aman lakon antes tama tinan foun 2016.

Tekniku Forensiku Mortuariu, Frederico Loca Aby ba Jornalista sira Guido Valadares (HNGV) Domingo (20/12/2015) hateten, Bus Baltimor halai Dili-Lospalos baku fila iha Fatu Ahi, suku Akanono, Postu Administrativu Hera ne’e, tanba ema dehan sala husi kondotor.

“Ami koalia tiha ona ho kareta funerariu MSS nain atu ajuda. Konfuzaun oitoan atu autopsia maibe husi tekniku ami la obriga ema ida autopsia kecuali (a não ser) mandato husi Prokurador ka Ministeriu Publiku servisu ho investigador maka ami foin hala’o autopsia,”dehan nia.

Entertantu Diretor DNDS, Ministeiu Solidariedade Sosial, Florencio Gonzaga haktuir, akontesimentu ne’e MSS nia parte fasilita apoiu Kareta Funerariu, Kaisaun nomos Aihan balun ba Familia mate bian sira.Tos/car

Jornal Nacional

XANANA-ALKATIRI LA’OS KOMANDO

Prezensa ativu eis Primeiru Ministru (PM), Kay Rala Xanana Gusmão ho Mari Alkatiri iha debates proposta Orsamentu Jeral Estadu (OJE) 2016, la’os atu komanda, maibe ajuda jerasaun foun sira prepara-an.

“Apresia teb-tebes diskusoens ida ne’e, diskusoens ne’ebe manas oitoan, la’os deit iha planaria, maibe mos komisaun eventaul. Hau hanesan doko ita oitoan, tanba dala ruma ita koalia fiar malu, mas hanesan jerasaun tuan hau hodi mos maun Mari Alkatiri, dala ruma imi hanoin katak ami tama iha laran ne’e atu hanesan fali komanda imi, tantu iha Governu no mos PN, mas ami nia intensaun la’os ida ne’e. Ami nia intensaun buka ajuda imi prepara an, dala ruma dehan partidu kiik ka bot, maibe ita uja partidu mos tenke buka dezenvolve nafatin, soseidade mos hanesan lae ita fahe malu iha momentu defisil ida,” hateten Ministru Planeamentu no Investimentu Estratejiku (MPE) hafoin aprovasaun OPJE 2016, Sesta kalan (18/12/2015).

Prezidente Partidu Congresu Nasional Rekonstrusaun Timorense (CNRT) ne’e mos hato’o parabens ba Primeiru Ministru, Rui Maria de Araujo, ne’ebe mak konsege lidera ona Governu ne’e ho didiak.

“Dr. Rui Araujo fou-foun kala nia sente dehan hela tinan ida ho balun nia atu halo lerek saida, mas hau mos parabens ona Primeiru Ministru komesa manan nia konfiansa, mais konfiansa ne’e hotu ami bele dehan katak so ami husi Governu kuandu kumpri didiak fo konfiansa diak liu ba nia. Konfiansa ne’e mos husi ita bot sira nia partisipasaun no konfiansa ne’e mos husi populasaun tomak, ita iha tempu ne’ebe diak teb-tebes intermus pozitivus no intermus risku, tanba ida ne’e hau husu ba ita hotu ne’ebe politikus, ita hotu buka nafatin hanoin ida deit, vizaun ida deit,” dehan Kayrala Xanana Gusmão.

Xanana mensiona katak, TL infrenta dadauk problema ho Australia. “Uluk ita lahakiduk, ohin husu para ita metin iha hanoin, metin iha hakarak, hahalok, koalia no metin iha saida mak ita hakarak ba rai ida ne’e. Hau husu deit iha diferensias ita koalia, iha opinioens ita temi, iha alternativas ita foti.”

“Demokrasia instrumentu, demokrasia la’os filme ida, demokrasia instrumentu ne’ebe ita uja atu bele hetan kbi’it bot liu atu halo saida mak ita hakarak halo ba ita nia rain ne’e, demokrasia seidauk rezolve problema ida, iha nasaun barak seidauk hetan moris diak, mais ita foin independensia tinan 13 mak ita ejiji demais, mais tenke realismu signifika tenke hare ba kondisoens ne’ebe iha atu la’o to’o iha ne’ebe, ita hotu bainhira bele halo ida ne’e, bainhira iha tinan 2016 reforsa ita nia unidade nasional, hau fiar no ita hotu fiar hamutuk ita nia rain ka ita nia povu sei manan, ita manan tiha ona independensia ita tenke manan soberania,” Xanana hateten.

Husu Timor oan hamutuk

Iha oportunidade, Ministru Planeamentu Investimentu Estraetjiku (MPIE), Kay Rala Xanana Gusmão, nudar jerasaun tuan, husu ba Timor oan hotu atu hamutuk hadia rai Timor Leste ba oin.

“Hau agrdese ita boot sira, mas jerasaun tuan husu ita hamutuk nafatin iha hanoin, hamutuk nafatin iha vizaun, hamutuk nafatin iha ita nia kompromisu ida deit hadia rai ida ne’e, fo vida ne’ebe diak liu ba ita nia povu,”Xanana Gusmão, iha Parlamentu Nasional (PN), Sesta (18/12), hafoin aprovasaun final global Orsamentu Jeral Estadu (OJE) 2016.

Maske nune’e Xanana dehan, iha momentu diak teb-tebes entermus de risku, husu atu politiku sira hamutuk, tantu Deputadu iha PN nomos membru Governu sira.

“Ita iha momentu diak teb-tebes ida, diak teb-tebes entermus pozitvus, diak teb-tebes entermu de risku. Tanba ne’e husu ita hotu ne’ebe politikus, ita boot sira nudar PN deputadu, ami nudar membrus do Governu, ita hotu buka tok nafatin hanoin ida deit ho vizaun ida deit,”afirma Xanana.

Eis PM Xanana apresia tebes ho diskusaun OJE 2016 nian   ne’e, maske manas oituan tanba dala ruma koalia ba malu karik   la fiar malu.

“Mas hanesan karik jerasaun tuan, permiti ha’u hodi iha politika nian ha’u bolu maun, idade ha’u bolu nia labarik sei kiik, ne’ebe Dotor Mari, ami bele dehan katak, dala ruma imi hanoin ami tama iha laran atu hanesan fali komanda imi, tantu iha Governu Como karik iha Parlamentu, mas lae. Ami nia intensaun la’os ida ne’e, intensaun buka ajuda imi prepara an,”tenik Xanana.

Tuir Xanan, dala ruma hasai liafuan dehan partidu boot, partidu kiik, maibe partidu mos buka dezenvolve an nafatin, sosiedade mos hanesan.

“Lae ita fahe malu iha momentu difisil ida, ha’u kuandu temi risku, ita infrenta dadauk problema ho Australia. Uluk ita la hakiduk, ohin husu para ita metin, metin iha hanoin, metin iha hakarak, metin iha hahalok, metin iha koalia, saida maka ita hakarak ba rai ida ne’e, ha’u husu deit iha diferensia ita koalia, iha opiniaun ita temi, iha alternativa ita foti, maibe ita nia rai, ita nia povu, antes kedas doque atu ajuda kedas aban ne’e nian moris diak, nia dehan soberania importante tebes ba ita nia rai, ha’u senti katak, ita hotu kompriende ona ba ida ne’e,”afirma Xanana.

Nia realsa katak, demokrasia instrumentu ne’ebe maka ema uza atu bele hetan kbiit boot liu hakarak halo ba rai ida ne’e.

“Demokrasia seidauk bele rezolve problema ida,   ita haree iha Europa, ita haree iha Amerika rasik, iha ne’e mos ha’u temi ona, mas iha Amerika rasik, ita temi rai kiik ita ba deit, Washington Nova Iorque,”tenik Xanana.

Parabens ba PM Rui

Nune’e mos, Ministru Planementu Investimentu Estratejiku Kay Rala Xanana Gusmão, fo parabens ba Primeiru Ministru (PM) Rui Maria de Araújo, tanba manan nia konfiansa.

“Ita bo’ot sira   hare iha   ne’e Dotor Rui Maria de Araújo, fo-foun nia sei senti   dehan,   iha tinan ida ho balun ou tinan rua nia atu halo lerek saida, mas ha’u mos fo ona parabens Primeiru Ministru hanesan manan nia konfiansa,”esplika Xanana Gusmão, iha Parlamentu Nasional (PN) Sesta (18/12).

Maibe konfiansa sira ne’e hotu, Xanana dehan, kuandu hosi Governu kumpri ho didiak.

“Ami fo konfiansa diak liu ba nia (Rui Maria de Araújo), konfiansa ne’e mos hosi ita boot sira ninia partisipasaun kuandu kritika, nia partisipasaun kuandu fo opiniaun no konfiansa ne’e mos hosi populasaun tomak,”dehan Xanana.mia/avi

Jornal Nacional

Teme ‘tuku’ meja, Mari Alkatiri isin makili

Plenaria Parlamentu Nasional (PN), Kinta horseik (17/12/2015), oin seluk uitoan tamba Deputadu Jorge da Conceição Teme, ‘tensaun’ hodi tuku meja no koalia ho lian maka’as kona-ba povu Oecusse ne’ebe maka haruka SMS ba nia hodi agradese ba maun boot Kay Rala Xanana Gusmão, tanba bele sosa aviaun ida ba Oecusse.

“Hau foin simu SMS husi komunidade Oecusse katak agradese ba maun bot Xanana Gusmão ho ninia inisiativa bele hola aviaun ba Oecusse. Tuir lolos aviaun ne’e ba interese nasional lai keta halo to’o Oecusse grupu oan ida deit mak utiliza aviaun ne’e,” hateten Deputadu Jorge Teme.

Rona tiha intervensaun Deputado Jorge Teme nian ne’e, Prezidente Zona Ekonomia Especial Sosial Merkadu (ZEESM) atual membru Bankada Parlamentar FRETILIN, Mari Alkatiri esklarese katak, aviaun ne’ebe mak sosa la’os ba povu Oecusse deit, maibe iha tempu besik sei ba to’o Munisipiu Bobonaro, Covalima no Manufahi, maibe tekniku sira presiza halo didiak inspesaun ba aeroportu sira nia kondisaun no tenke haree didiak pista Aeroporto nian.

“Hau rona Deputadu Jorge Teme koalia ne’e, hau nia isin atu makili ka atu halo nusa ka hau lahatene los. Aviaun hahu ona atu ba Maliana, Suai no Atauro semana ida ne’e, la’os Oecusse deit. Seidauk ba Manufahi, tanba sei ba halo inspesaun pista Manufahi nian, nune’e mos ba halo inspesaun pista Viqueque no Lautem para atu hahu ba fatin sira ne’e hotu. Baucau hau hanoin sei presija rehabilitasaun ba pista, se iha tan pista ba Manatuto bele ba Manatuto, Liquiça besik demais ne’ebe la ba. Aviaun ne’e sosa la’os para ba Oecusse deit,” afirma Sekretariu Jeral FRETILIN ne’e.

Alkatiri dehan, dala ruma Deputado Jorge Teme preokupa tanba nia mos Oecusse oan, importante maka Timor oan hotu servisu hamutuk para servisu Timor Leste tomak.

Biban ne’e membru Bankada FRETILIN, Manuel Gaspar da Silva realsa tan, momentu aviaun mai para iha aeroportu, Prezidente ZEESM, Mari Alkatiri esplika katak aviaun ne’e la’os deit ba Oecusse, maibe bele ba fatin sira ne’ebe mak nia bele ba, hanesan, Maliana, Suai, Manufahi no seluk-seluk tan.

Rona tiha intervensaun sira ne’e, Deputado Jorge Teme uza direitu hodi halo defeza ondra ho lian maka’as no tuku meza, katak, iha inisiu kuandu ema kontra aviaun ne’e iha Jornal nia mak koalia uluk iha PN.

“Hau hakarak dehan kuandu ema kontra aviaun ne’e hau mak defende iha PN ne’e, mais kuandu povu Oecusse koalia hau tenke hato’o, ida ne’e maka povu Oecusse lakohi, hau hato’o buat ne’ebe mak mai husi povu Oecusse, hau la inventa, sms iha ne’e,” afirma Jorge Teme.

Bainhira Deputadu Jorge Teme koalia maka’as hodi tuku meja, membru Bankada Parlamentar FRETILIN sira mos hambrik hodi tuku meja hasoru.

Situasaun iha plenaria kuaze minutu 2 manas no Prezidente PN, Vicente Guterres koko atu akalma, mais kontinua hakilar malu. Maibe, Vicente Guterres   konsege akalma no husu ba deputado sira atu tur iha fatin hodi halo votasaun ba orsamentu Ministeriu Finansas (MF) no dotasaun todo Governu nian, maibe Deputado Mari Alkatiri husu tempu atu klarifika asuntu balun hodi akalma situasaun.

“Hau lahatan ba ema ne’ebe halo reasaun ho emosaun, hau koalia deit katak deputado Jorge Teme nia Oecusse nia preukupa, hau la’os dehan nia laiha rajaun ka nia la simu sms husi Oecusse, hau la dehan buat ida ne’e, hau mos la ba Oecusse para atu halo povu Oecusse sai vitima, hau ba Oecusse para atu ajuda iha povu Oecusse nia vida ne’e maka hau hakarak hatete deit, hau la’os ema Oecusse, hau simu kna’ar ida ne’e hanesan misaun foun ida para atu kumpri ho konstituisaun Timor-Leste ninian, atu kaer Oecusse para sai zona ida rejiaun administrativa especial, la’os hau mak husu. Atu koalia povu Oecusse hau mos konhese diak povu Oecusse no hau serbisu ho povu hau la’o tama uma sai uma hau halo dialogu ho povu no familia tomak iha Oecusse,” dehan Alkatiri.

Segundu Vise Prezidenti PN, Aderito Hugu da Costa, dehan katak hakilar malu entre deputado sira iha plenaria, li-liu iha debate orsamentu ne’e normal, mas importante mak la bele baku malu.

Deputado Jorge Teme ho oin mean no hirus maka’as koalia hakilar no hateke mai Deputado bankada FRETILIN sira, nune’e mos deputado FRETILIN sira hamrik hasoru hodi hakilar hasoru Jorge Teme. Situasaun ne’e halo debate orsamentu iha plenaria suspende kuaze minutu lima nia laran, nune’e mos halo partispantes sira ne’ebe mak akompanha debate ne’e hakfodak no hamrik hodi asiste aktu ida ne’e. Mia

Jornal Nacional

MSS APOIA KAISAUN BA VITIMA BUS BALTIMOR

Ministeriu Solidariedade Sosial (MSS) fo apoiu ona kaisaun ho kareta funerario ba vitima bus Baltimor ne’ebe baku fila iha Fatuahi, Domingo dader (19/12/2015).

Ministra MSS, Isabel Guterres hatete, hahu dezastre ne’e akontese ekipa husi MSS mantein kedas ona iha Hospital Nasional Guido Valadares (HNGV) hodi atende vitima balun ne’ebe mak mate.

‘’Maluk sira ne’ebe mak mate ne’e ami apoia ona kaisaun no kareta funerario karik iha maluk veteranus entaun kaisaun mos veteranus nian,’’ dehan Isabel ba jornalista sira iha Centru Convesaun Dili, Segunda (21/12/2015).

Isabel hatete, kona ba orsamentu sira la apoiu, sira apoiu deit mak kaisaun ho kareta funerario ba vitima sira hodi tau mate isin iha kaisaun inklui tula mate isin ba ida-idak nia knua. Maibe, familia vitima barak mos hakarak hola rasik sira nia kaisaun.

Iha parte seluk deputado Eladio Faculto husi Bankada FRETILIN hatete, Governu tenki toma responsabiliza duni ba vitima sira, liu-liu ba Ministeriu Saude (MS) ho MSS, tanba MS mak tau matan ba vitima sira nia saude hodi bele rekopera no MSS mak responsabiliza apoiu kaisaun ho kareta funerario. Iha sidenti ne’e rezulta ema nain 9 mata no nain 37 grave.

Hasai regulamentu forte

Asidenti bis Baltimor diresaun Dili-Lospalos, ne’ebe baku fila iha Fatuahi, lori traumatismu boot ba familia no pasajeirus sira. nune’e mos reprezentante povu iha Parlamentu Nasional.

Ho asidenti ne’ebe rezulta ema nain 9 mate no nain 37 grave halo membru PN preokupa tebes, tanba ne’e husu ba Governu tenki hasai regulamentu ne’ebe mak forte hodi regula kondisaun kareta transporte publiku nian, inklui regula mos kareta nain ho kondotor sira.

Membru Bankada Parlamentar FRETILIN, Manuel Castro, hatete katak, Governu liu-liu Ministru Transporte no Komunikasoens (MOPT), tenki haree no hasai ona dekretu lei ruma atu bele regula transporte publiku.

“Kondutor kuandu lori kareta la bele fuma no la bele simu telephone, maibe ita haree iha Timor ne’e bai-bain, tanba ne’e ami husu Governu hasai dekretu katak kondutor labele fuma no labele simu telefone maibe fuma nafatin tenki fo sansaun,” dehan Manuel Castro ba Jornalista iha Parlamentu Nasional.

Reprezentante povu ne’e husu ba kareta nia nain sira tenki halo inspesaun kada fulan 6, kuandu la bele ona lalika halai. Nia hatutan, patraun ne’ebe mak nia kareta kondisaun ladiak halai nafatin tenki fo multa, tanba lori ema nia vida la’os lori fatuk no ai.

Manuel Castro dehan, kondutor sira ne’ebe mak tula pasajeiru tenki tuir kadeira la bele tabele no tur iha leten, bis ne’ebe mak iha kuandu lao kalan kondutor tenki troka malu atu ida lori loron no ida lori kalan.

Iha fatin hanesan, Deputada Bankada CNRT, Albina Marçal hatete, ema sira ne’ebe mak bolu bos ba transporte kada semana ou kada loron tenki hare kareta ninia kondisaun atu la bele prezuduka ema nia vida.

“Ema barak mate iha loron ida, distinu Maromak ninian, maibe kazu bis Baltimor nian ne’e ita la imazina, tanba ne’e patraun sira tenki hare kareta ninia kondisaun, ita bele halo negosiu mais tenki hare ema nia vida,” dehan Deputada Albina.

Deputada husi Municipiu Lautem ne’e dehan tenik, kondotur sira ne’ebe mak lori bis tenki atensaun. La bele dukur no la bele lanu, iha ona regras mais regras ne’ebe mak iha la kumpri tuir lolos bis ida tula pasajeiru masimu 26 no minumu 22 maibe informasaun neebe mak tula too kedas 45 ne’e la bele. nia/mia

Jornal Nacional

PRODUSAUN MINA MATAN KITAN MENUS

Mina matan Kitan, oras ne’e, produsaun komesa menus ona, tan ne’e kompania ne’ebe esplora mina ne’e hapara ona sira nia servisu.

Deputado Arao Noe de Jesus husi bankada CNRT hatete, mina matan Kitan ne’e nia produsaun menus duni ho folin mina ne’ebe tun, tan ne’e kompania sira hapara ka suspende tiha aktividade iha mina matan Kitan, maibe karik mina folin sae fali Governu sei loke fali tenderizaun foun ba kompania ne’ebe hakarak esplora fali mina matan Kitan ne’e.

‘’Agora mina matan Bayu Undan mak sei produs hela, Sunrise mak sei halo hela negosiasaun no mina matan seluk mak sei halo analisis, ita hein sei hetan tan mina matan balun hodi esplora ita nia mina no hatama reseitas domestika mai Timor Leste,’’ dehan deputado Arao ba jornalista sira iha Parlamentu Nasional, Segunda (21/12/2015).

Iha fatin hanesan deputado Jorge Teme husi bankada Frenti Mudansa hatete, mina atu maran ne’e hanesan alerta ida ba Timor oan sira hodi buka barak liu tan reseitas non petroliferu, laos depende deit ba mina hodi hetan reseitas, atu nune’ karik mina ne’e maran duni Timor iha ona esforsu buka reseita husi dalan seluk hanesan area turismu, agrikultura, indutria no seluk tan.

“Mina Kitan ne’e sei iha, nia produsaun mak menus, ita espera Governu sei bele hetan tan mina matan sira seluk hodi aumenta tan ita nia mina iha rai laran,’’ hateten Jorge Teme.

Antes ne’e Ministru Petroliu Rekursu Naturais (MPRN) Alfredo Pires hatete, mina Kitan nia produsaun tun duni no kompania ne’ebe esplora mina ne’e hapara tiha ka husu atu taka, maibe, pozisaun Autoridade Nasional Petroliu dehan sei iha U$ 7 to’o U$10 milheons baril, ne’ebe kompania balun hatama ona dokumentos atu esplora fali mina ne’e. nia

Jornal Nacional

Banku xinés fó empresta dolár milloens 50 ba Timor-Leste

Governu Timor-Leste asina ona kontratu hosi empréstimu konsensionál ho banku xinés EXIM ho valór dolár milloens 50 (euros milloens 45,7), tuir komunikadu ne’ebé fó sai horisehik hosi Ministériu Finansas. 

“Ho akordu ne’e Timor-Leste bele empresta ona osan ho valór dolár milloens 50 hodi harii no atualiza sistema drenajen iha Dili”, tuir komunikadu fó sai.

Empréstimu konsensionál ho termu substansiál ne’ebé jenerozu liu duke empréstimu merkadu nian ne’ebé hala’o liu hosi taxa juru kiik, maibé ninia períudu karénsia naruk ka kombina ho ne’e.

Tuir nota hosi Ministériu Finansas Timór, akordu ba empréstimu ne’e asina ona iha 18-dezembru hosi ministra Santina Cardoso nomós embaixadór Repúblika Populár Xina iha Timor-Leste, Liu Hongyang.

Santina Cardoso dehan no sita iha komunikadu ne’e katak “implementasaun ba projetu ne’e sei hadia duni dezenvolvimentu urbanu nomós kualidade moris iha sidade Dili”.

Liu Hongyang konsidera akordu ne’e “siknifika katak realsionamentu bilaterál sino-timorense hahú hosi amizade tradisionál, ba iha faze koperasaun pragmátika".

“Xina la’os mai atu ajuda, maibé serbisu hamutuk ho Timor-Leste hanesan mos parseiru dezenvolvimentu” ba timor-oan sira, hatutan tan embaixadór xinés.

Empréstimu ne’e ho taxa juru pursentu rua kada tinan, ho durasaun tinan 20 nomós ho períudu karénsia tinan lima, haktuir komunikadu.

Empréstimu ne’e ho subvensaun 27,76%, liu 25% hanesan baibain OCDE ezizi, hatutan tan iha dokumentu.

SAPO TL ho Lusa

Xina kritika UE tamba prolonga sansaun ekonómika kontra Rúsia

Xina kritika Uniaun Europeia (UE) iha horisehik tamba prolonga ba fulan neen sansaun ekonómika ne’ebé hamonu ba Rúsia, hosi sekuénsia funu separatista iha leste  Ukránia nian, ne’ebé dudu parte rua atu halo "diálogu polítiku". 

"Xina kontra  sansaun ka ameasa ba sansaun iha relasaun internasionál ", hatete
porta-voz ministério dos Negócios Estrangeiros Hong Lei, durante konferénsia  imprensa iha Pekim.

Konsellu  UE aprova iha segunda-feira ne’e trámite legál hodi fó dalan ba prolongamentu fulan neen sansaun ne’ebé hamonu ba Rúsia iha jullu  2014.

Medida ida ne’e bazeia ba  aplikasaun  akordu  paz  Minsk nian, ne’ebé asina iha kapitál Bielorrússia entre  ezekutivu hosi Kiev no  separatista sira pró-rusu nian, inklui moos sesar-fogu no  devolusaun  jestaun fronteira leste ba Kiev.

"Fiar katak iha diálogu polítiku ne’e hanesan forma úniku ida atu sai hosi krize ne’ebé agora infrenta hosi Ukránia", afirma Hong.

Porta-voz xinés ne’e apela ba parte hotu ne’ebé implika iha konflitu ne’e atu bele kumpre "ho didia’k" tuir akordu Minsk nian hodi bele "nafatin kompremetidu iha dezenvolvimentu no hadia’k  tan  relasaun sira ".

Sansaun ne’ebé fó hosi UE ba Rúsia iha jullu 2014, no hahú prolonga ba dahuluk  iha juñu liubá, ne’ebé maka  afeta  área defeza, kapitál merkadu  nian, limitasaun ba fa’an produtu ne’ebé uza iha lorloron nian no moos iha sensível teknolojia  sira.

SAPO TL ho Lusa 

Tribunál neozelandés fó luzverde konabá estradisaun Kim Dotcom ba iha EUA

Tribunál ida neozelandés nian deside ona iha ohin fundadór hosi  portál Megaupload, Kim Dotcom, no nain tolu seluk hosi nia eis-sósiu sira sei lori ba Estadus Unidus hodi hetan julgamentu tamba alegasaun  iha pirataria informátika.

Defeza hosi Dotcom analiza ona katak iha posibilidade atu hato’o rekursu kontra desizaun hosi juiz Nevin Dawson, ne’ebé konsidera katak iha indísiu razoável atu halo julgamentu, haktuir nia konta iha Twitter  nia advogadu ida norte-amerikanu nian, Ira Rothken.

Justisa norte-amerikana nian akuza Dotcom ho nia antigu sósiu sira Mathias Ortmann, Finn Batato no Bram van der Kolk ba krime 13 relasionadu ho pirataria informátika, krime organizadu no lavajen ba osan.

Prosesu  estradisaun adia ona dala sanulu dezde Dotcom no nia sósiu sira hetan detidu, iha janeiru 2012, iha Nova Zelândia, ne’ebé hala’o operasaun internasionál hosi FBI, hodi rezulta enseramentu portál Megaupload, halo konjelamentu konta no  halo apreensaun ba nia sasan hotu.

Estadus Unidus akuza portál partilla  fixeiru Megaupload ne’ebé kauza danu  iha propriedade intelektuál liu milaun dólar 500 ( milaun euro 380) no sira konsege hetan, ho forma ida kontra lei, ho nia reseita liu milaun dolar 175  ( milaun euro 132).

To’o agora, iha membru nain hitu hosi Megaupload ne’eb’e akuza hosi Estadus Unidus maibé foin kondena deit  programadór estóniu nian Andrus Nomm.

Programadór ne’e kondena prizaun tinan ida liu iha Estónia hafoin admite nia partisipasaun iha violasaun ba direitu  autór nian.

SAPO TL ho Lusa

Polísia antiteroista ka’er ona ema na’in rua Sydney

Durante operasaun antiterorista iha Sydney, ka’er ona ema na’in rua ne’ebé deskunfia halo planu ba atetandu iha baze navál, tuir polísia haktuir. 

Ema na’in rua hetan ka’er hafoin iha semana liu ba halo ona julgamentu ba ema na’in lima ne’ebé hakarak atu ataka prédiu governamentál.

Sei halo prosesu ba mane ida ho tinan 24 tanba hafalsu dokumentu hodi fasilita atentadu terorista ida, fó sai polísia.

Mane ida ho tinan 20 maka hetan riksu tanba kopera hamutuk “hodi prepara halo atake terorista”.

Hala’o operasaun hodi ka’er ema hirak ne’ebé tanba deskunfia ema balun envolve ba atividade terorista iha Austrália, selu organizasaun terorista nomós sira ne’ebé iha hela Irak no Síria.

Desde lansamentu ba operasaun ne’e iha tinan ida liu ba, halo ona julgamentu ba ema 11 tanba de’it hahalok terorismu.

SAPO TL ho Lusa 

Governo de Macau lança consulta pública sobre uso de sacos de plástico

Macau, China, 23 dez (Lusa) -- O Governo de Macau lançou hoje uma consulta pública sobre o uso de sacos de plástico, instando a população a manifestar-se designadamente sobre a cobrança de taxas na hora das compras em estabelecimentos comerciais.

O texto de consulta foi apresentado hoje pela Direção dos Serviços de Proteção Ambiental (DSPA) que incumbiu uma instituição de consultadoria profissional de realizar um estudo, segundo o qual, cada residente de Macau utiliza, diariamente e em média, 2,2 sacos de plástico, o que perfaz uma quantidade total anual de 450 milhões de sacos.

Após considerar a prática das regiões adjacentes, como interior da China e Taiwan (que permitem aos estabelecimentos comerciais definirem os próprios preços), a DSPA propõe que seja adotado o modelo da vizinha Hong Kong, ou seja, que se estabeleça um valor mínimo para a cobrança, sugerindo, em concreto, que a taxa por cada saco não seja inferior a uma pataca (0,11 euros).

O documento de consulta contempla um total de seis perguntas, que versam além da taxa, sobre o tipo de estabelecimentos comerciais a serem abrangidos, eventuais isenções, bem como sobre um regime regulador, que incluiria fiscalização e multas com um valor fixo.

A consulta pública, que arrancou hoje, termina a 05 de fevereiro.

Não existe em Macau qualquer fábrica de produção de sacos de plástico, pelo que o fornecimento depende da importação, nomeadamente da China, Vietname e Hong Kong.

DM // PJA

Tribunal tailandês confirma condenação de editora de 'site' por crime de lesa-majestade

Banguecoque, 23 dez (Lusa) -- O Supremo Tribunal de Justiça tailandês confirmou hoje a pena contra uma editora de um 'site' na sequência de comentários, publicados por utilizadores da Internet, considerados insultuosos para a monarquia, num caso que provocou críticas internacionais.

Chiranuch Premchaiporn, editora do popular portal de notícias Prachatai, foi inicialmente acusada por mais de 10 comentários de leitores publicados no 'site' em 2008.

Em maio de 2012, Chiranuch Premchaiporn foi declarada culpada por não ter retirado rapidamente os comentários colocados num fórum do "Prachatai" e condenada a oito meses de pena suspensa.

Num caso considerado simbólico na luta pela liberdade de expressão, Chiranuch Premchaiporn viu a sentença confirmada em novembro 2013 num tribunal de recurso e hoje pelo tribunal supremo tailandês.

"Estou desiludida com o veredito e penso que a interpretação da lei coloca a responsabilidade nos operadores dos serviços ('webmasters')", disse Chiranuch à AFP após a decisão.

A Tailândia tem uma das leis de lesa-majestade mais severas a nível mundial.

Para Sunai Phasuk, da Human Rights Watch, a condenação de Chiranuch "reforça o controlo da liberdade de expressão".

"Cada vez mais moderadores da Internet e 'webmasters' vão censurar as discussões sobre a monarquia, por receio de serem perseguidos pelos comentários publicados por outras pessoas", acrescentou, em declarações à AFP.

Na leitura da sentença na primeira instância, o gigante da Internet, Google, tinha qualificado a condenação de Chiranuch de "ameaça grave para o futuro da Internet" e a União Europeia manifestou preocupação com a liberdade de expressão no país.

O Prachatai, escrito nas línguas tailandesa e inglesa, é um dos raros portais de informação tailandeses a publicar artigos de fundo sobre a difamação da monarquia.

FV // JPS