Desizaun PR Ba EA, Haliis Ba Partidu

DILI - Impase politika lao durante fulan 6, laiha solusaun tanba nee Prezidente Republika (PR) foti desizaun hodi halai ba eleisaun antisipada (EA), ida nee opozisaun konsidera PR sadere liu ba partidu ida deit.

Kestaun nee hatoo husi Xefe Bankada Khunto Luis Roberto da Silva hatete, opozisaun nia haree desizan neebe PR fo sai iha dia 26 Janeiru ba eleisaun antisipada, tuir artigu 86 alinea F, desolve PN signifika VII governu monu, maske bazeia ba artigu nee bainhira PR foti desizaun ba EA nee laiha baze fundamental.

“Desizaun PR nee ami haree, larespeita artigu 106 neebe hakerek iha konstituisaun, nee ami haree PR halai ou sadere liu ba partidu ida, tanba haree ba tempu uluk, Taur ho Ramos nia tempu bainhira governu minoria fo maioria iha PN atu ukun,” katak Luis ba STL Segunda (29/01/2018) iha PN.

Haree ba desizaun PR nee, lafo ba segundu mais votadu maibe ba EA signifika PR haliis ba partidu, Luis hatete, iha artigu 106 hatete manan maioria absoluta i manan maioria iha PN hodi forma governu, maibe PR foti desizaun haksoit liu artigu 106, hodi ba EA.

Nia informa, maske desizaun PR nee sadere liu ba partidu ida, maibe Ami bankada Khunto nudar opozisaun sente kontente hodi ba EA, tanba nee demokrasia,, neebe fiar katak EA mai sei hetan votus aumenta.

Hatan ba kestaun nee Prezidente PN Aniceto Guterres hatete, opozisaun sira dehan desizaun PR sadere liu ba partidu ida, nee kompetensia PR nia desizaun, tanba nee nia parte lakohi komentariu i lakohi atu hatan kona ba kompetrensia PR nian, atu hatan ba ida nee so PR rasik mak bele hatan.

Guilhermina Franco | Suara Timor Lorosae

Deputadu/A Fulan 6 Laiha Direitu Ba PV

DILI - Deputadu/a sira halao knaar fulan 6 laiha direitu hetan Pensaun Vitalisia (PV), tanba tuir rejimentu katak atu hetan PV halao knaar durante fulan 45.

Informa Sekretariu Jeral Mateus Belo hatete, kona ba mandatu lejislatura iha lei hateten deputadu/a ou titular ida  iha direitu hetan Pensaun Vitalisia, maibe tenke dedika aan iha 45 meses (fulan 45), tanba nee laharee ba lejislatura, maibe ba sira fulan 6 deit sira laiha direitu atu hetan PV.

Tuir statutu ou rejimentu deputadu/a sira nian, bainhira halao knaar latoo  fulan 45, laiha diretu hetan PV, mezmu halao knaar too tinan 2 mos labele, maibe sira iha direitu para hetan re-integrasaun, neebe ba deputadu sira knaar ba fulan 6 nee iha direitu ba re-integrasaun,” katak Mateus ba Jornalista Segunda (29/01/2018) iha PN.

Nunee mos Deputadu husi Bankada Khunto Jose Agustinho da Silva hatete, realidade Politika neebe iha, haree katak durasaun tempu ba IV lejislatura lahanesan lejislatura anterior too tinan 5, tanba akontese inserteza politika fulan 6 nia laran, maibe laiha solusaun, tanba nee  Prezidente  Republika hola ona desizaun desolve PN. 

Guilhermina Franco | Suara Timor Lorosae

Eleitór Sira La Vota Livremente

DILI, (TATOLI) – Prezidente Komisaun Nasionál ba Eleisaun (CNE-sigla portugés), Alcino Barris, hateten eleitór sira sei la vota livremente tanba risku ne’e boot.

“Se vota ho online agora, balun eletrisidade iha no balun eletrisidade laiha, balun asesu internet to’o iha baze no balun la to’o entaun problema”, Alcino hato’o kestaun ne’e ba jornalista sira iha Palásiu Prezidente Nicolau Lobato, Bairru Pité, Dili, segunda ne’e.

Nia informa sé maka atu vota iha fatin ne’ebé nia (eleitór) hela, di’ak liu muda kartaun eleitorál tanba agora resensiamentu loke hela. Tanba ne’e, tuir nia, eleitór sira laiha razaun atu la vota tanba dook.

“Eleitór sira provizoriamente bele muda hela fatin. Hafoin eleisaun ramata, bele resensia hikas ba fatin orijin”, Eis Ministru Interiór iha Segundu Governu Konstitusionál ne’e haklaken.

Jornalista: Xisto Freitas | Editora: Rita Almeida

Imajen: Prezidente CNE, Alcino Barris (klaran). Imajen Xisto Freitas

FDD Konsulta TR Kona-ba Koligasaun

DILI, (TATOLI) – Frente Dezenvolvimentu Demokrátiku (FDD), ohin buka informasaun ba Tribunál Rekursu (TR) kona-ba rekezitu koligasaun hodi hasoru eleisaun antesipada.

Koligasaun ne’e kompostu hosi Partidu Unidade Dezenvolvimentu Demokrátiku (PUDD), Uniaun Demókratiku Timorense (UDT), Frente Mudansa (FM), Partidu Dezenvolvimentu Nasionál (PDN) no Partidu Repúblikanu (PR).

ʺOhin loron ami mai halo audénsia ho Prezidente Tribunál Rekursu ho objetivu atu mai husu informasaun atu bele rejistu ami nia koligasaun no ami hetan ona informasaun barakʺ, hateten Prezidente FDD, António De Sa Benevides, ba jornalista sira iha TR Kaikoli.

Durante konsultasaun, Tribunál Rekursu seidauk bele rejista partidu lima ne’e  nu’udar koligasaun tanba Prezidente Repúblika, Francisco Guterres Lú Olo, seidauk dekreta data ba eleisaun antesipada.

“Prezidente ho ninia ekipa haree dokumentu hirak ne’e no prontu simu maibé hein to’o Prezidente Repúblika, Francisco Guterres Lú Olo, dekreta data ba eleisaun antesipadaʺ, dehan.

Partidu koligasaun ne’e mós prepara ona lista kandidatura ba reprejentasaun iha Parlamentu Nasionál.

António Benevides afirma koligasaun ne’e akontese tanba iha ideolojia polítika hanesan hodi hasoru EA. ʺIda ne’e forsa alternativa no sai ezemplu ba partidu sira seluk katak ba Timor-Leste ita presiza servisu hamutukʺ, tenik.

FDD garante sei hetan votu to’o rihun atus ida resin iha EA tanba rezultadu eleisaun jerál 2017 partidu lima ne’e iha votante rihun 43.788.

Entretantu, rezultadu eleisaun tinan kotuk hatudu PUDD ho votu validu 15.887 (2,8%), UDT 11.255 (2,0%), FM 8.849 (1,6%), PR 3.951 (0,7%) no PDN 3.846 (0,7%). Totál votante partido lima ne’e hamutuk rihun 43.788.

Jornalista: Agapito dos Santos | Editora: Rita Almeida

Imajen: Prezidente FDD, António De Sa Benevides, bainhira hatan ba jornalista sira iha TR, Kaikoli, ohin. Foto Tatoli/Egas Cristovão