KORUPSAUN-KRIMINALIDADE FINANSEIRA, AMEASA BO’OT BA ESTADU

Prezidenti Repúblika (PR), Taur Matan Ruak hateten katak, korupsaun no kriminalidade finanseira iha Timor Leste (TL), sai ameasa bo’ot ba konsolidasaun Estadu.

“Korupsaun, krime organizadu no kriminalidade finanseira bele fó ameasa ne’ebé sériu ba konsolidasaun no afirmasaun Estadu sira nian, la’os de’it ba Timor Leste, maibé ba nasaun hot-hotu,” hateten Prokurador Jeral da Repúblika (PJR), José Ximenes lee PR Taur Matan Ruak nia diskursu iha aniversáriu Ministériu Públiku (MP) ba dala 16, ne’ebé realiza iha salaun Ministériu Negósius Estranjeirus i Kooperasaun Dili, Segunda (06/06).

Tanba ne’e, Taur Matan Ruak hatutan katak, aparellu justisa nian no instituisaun polisia sira tenke prepara-an di’ak liu tan atu bele hasoru krime sira ne’e, no Ministériu Públiku tenke preparadu di’ak liutan ba servisu ida ne’e.

Taur Matan Ruak dehan, ida ne’e esplika mós ba espesializasaun iha área kontas públikas no kontesiozu Estadu nian, ho liafuan seluk dehan katak, Ministériu Públiku no sistema justisa iha kapasidade atu defende interese patrimonial Estadu nian no reseita fiskal.

“Kriasaun ba Ministériu Públiku tinan 16 liu ba, hanesan momentu ida ne’ebé importante tebes ba prosesu harii Estadu de direitu iha TL”, katak Taur Matan Ruak.

Xefi Estadu ne’e esplika katak, aniversáriu MP sai hanesan momentu atu komemora no haksolok, la’os de’it ba sira ne’ebé servisu hela iha área justisa, maibé mós ba sidadaun hotu ne’ebé benefísiu husi respeitu ba direitus hhumanus iha TL no mós husi konstrusaun Estadu direitu TL.

“Dalan ne’ebé mak Timor Leste la’o ona iha prosesu hametin Ministériu Públiku, pozitivu tebes no merese nasaun nia atensaun”, hateten Taur Matan Ruak.

Xefi Estadu ne’e dehan tan, PJR konsege ona hametin nia-an tuir rekursus hhumanus ne’ebé nia iha, no hakat ona pasu hira tan ba oin hodi halo servisu internu sai espesializadu liu tan, atu nune’e bele hadi’ak inkeritu sira nia kualidade, i hadi’ak servisu ne’ebé mak nia presta ba sidadaun sira no halo justisa.

Taur Matan Ruak esplika katak, harii servisu espesializadu hirak iha PJR hodi luta hasoru korupsaun, krime organizadu no trata prosesu hirak ne’ebé relasiona ho familia no protesaun labarik, hanesan pasu ne’ebé mak foin hola no merese atu hahí sira.

Xefi Estadu ne’e esklarese, progresu sira ne’e, só bele sai posível, tanba halo ona reforsu ne’ebé signifikativu ba rekursu hhumanus, la’os de’it iha MP, maibé mós iha sistema justisa nia instituisaun seluk.

“Reforsu hirak ne’e, signifika katak, iha tinan hirak ikus ne’e, instituisaun sira hasa’e liutan sira nia esforsu atu fó kapasitasaun. Konsolidasaun no dezenvolvimentu ejiji ita kontinua hametin kualidade no hasa’e sentru formasaun jurídika nia kapasidade, atu prepara juiz sira, Ministériu Públiku nia majistradu sira, defensor públiku sira no traballador tékniku sira seluk iha área justisa,” katak Taur Matan Ruak.

Xefi Estadu ne’e dehan, liu husi hasa’e rekursus hhumanus no hametin organizasaun, PJR konsege ona hamenus númeru kazu ne’ebé pendenti.

Taur Matan Ruak afirma, hamenus númeru kazu pendenti no hasa’e investigasaun nia kualidade, bele kontribui ba justisa ida ne’ebé di’ak liu.

Xefi Estadu ne’e dehan, buat hirak ne’ebé mak MP konsege alkansa ona, hanesan konkista nasaun ne’e nian.

“Ha’u fiar katak, konkista hirak ne’e, hanesan razaun atu ita komemora iha aniversáriu ba dala 16 ne’e,” tenik Taur Matan Ruak.

Eis Jeneral ho fitun rua ne’e dehan, husi prioridade sira ne’e, ida ne’ebé importante liu mak, haluan asesu ba justisa ba territóriu tomak.

“Ita tenki halais prosesu harii área justisa nia estrutura sira iha Timor laran tomak. Ha’u rasik dehan bei-beik ona katak, ita nia rain presiza Ministériu Públiku iha Minisípiu hotu-hotu,” relata Xefi Estadu ne’e.

Taur Matan Ruak dehan, la’os de’it tanba MP nia prezensa, halo populasaun sira senti hakmatek, maibé mós tanba MP nia prezensa hanesan fatór importante ida hodi apoia polisia nasionál nia asaun.

Xefi Estadu ne’e dehan, TL tenke hakat ba oin ho urjente no determinasaun, hodi asegura majistradu MP sira nia prezensa iha Minisípiu hotu.

Maibé Taur Matan Ruak esplika, prezensa hirak ne’e, la’os de’it husi Ministériu Públiku atu bele hasa’e sidadaun sira nia asesu ba sistema justisa.

“Ita tenke planea no fó prioridade ba investimentu iha rekursus hhumanus, no fasilidade atu nune’e, Minisípiu hotu bele hetan tribunais, juizes, defensores públikus no ofisiais justisa,” nia afirma.

Nia afirma, prezensa husi instituisaun sira justisa nian, iha territóriu nasionál tomak, hanesan fatór forte ida atu hakbesik Estadu ba sidadaun sira.cos

Jornal Nacional

KII MOTIVA SETOR PRIVADU INVESTE IHA TL

Primeiru Ministru (PM), Rui Maria de Araújo, esplika, Konferensia   Internasional Investimentu (KII) ne’e bele motiva investimentu privadu sira husi rai liur atu bele investe iha Timor Leste (TL).

“Konferensia ida ne’e atu motiva potensia Timor Leste atu  bele hatudu  buat hirak ne’ebe Governu hato’o tiha ona atu bele permite investimentu setor privadu, ao mesmo tempo ema ne’ebe maka produz, hanesan agrikultura, nomos  downstream,”esplika PM Rui, liu husi diskursu bainhira abertura Konferensia Internasional  Investimentu ne’ebe organiza husi Tradelnvest TL iha Timor Plaza, Segunda (06/06).

PM Rui hatutan, reforma ekonomia fiskal atu melhora risku nesesariamente  ne’ebe iha hodi fahe esperiensia ba malu aberta para liga diak ho risku sira ne’e   nune’e liga diak  ho risku, maibe ao mesmo tempo progresu ekonomia ba povu Timor Leste.

“Ita presiza atu prezerva valor kapital, retornu kapital tuir espetativu merkadu nian,”tenik PM Rui.

Nune’e mos PM Rui haktuir, tinan 14 Timor Leste goza nia oportunidade, nune’e  bele hasai osan fundu petoliferu nian nune’e mos finansia politika sira ne’ebe bele hamoris investimentu  privadu, efikasia husi prosesu ida ne’e kuaze metade husi mortalidade infantil signifikativu nune’e  mos bele melhora instuisaun Estadu sira  nian seluk,  nune’e mos lori investidor  sira aselera mina no gas, telekomunikasoens no mos  fabrika.

PM Rui dehan, Governu Timor Leste konsiente katak, kapital setor privadu susar kompete iha merkadu  ida  ne’ebe maka emerjenti hanesan iha Timor Leste.

“Governu Timor Leste mos konsiente katak, kreximentu ekonomia sira sei la atinji sem investimentu privadu, Governu Timor Leste kompletamente konsiente katak,  susar ba kapital iha merkadu ida emerjenti hanesan Timor Leste, tanba  iha dezafiu bareira lubuk ida  importente   liu maka  retornu ne’ebe maka dala barak profesional   ne’ebe maka  tuir nivel  risku,”tenik PM Rui.

Nune’e mos, Diretor Ezekutivu Tradelnvest Timor Leste, Arcanjo da Silva hateten, primeiru konferensia investimentu  internasional ne’e  organiza la’os fasil.

“Ita presiza  iha kondisoens para halo konferensia investimentu ida. ita  hatene katak, desde 2006  ita iha Ajensia ida hanaran Tradelnvest Timor Leste iha altura ne’ebe foin implementa lei  formasaun investimentu externu  direitu altura  ne’eba kedas, maibe   ita la konsege halo konferensia investimentu internasional tanba la iha kondisoens. Primeiru tenki iha kondisoins  kona-ba promosaun investimentu  nomos rekursu humanus, net  working fasilidades  par abele organiza konferensia internasional investimentu ida,”hatutan Arcanjo da Silva.

“Ita halo deit siminario nasional koalia kona-ba promosaun  investimentu  nasional no investimentu dereitu  Estadu, depois to’o iha 2011 lei  investimentu rua ita muda sai lei investimentu dia deit, lei investimentu numeru 14 2011 para atu promove nafatin  investimentu mai ita nia rai nomos investimentu husi ita nia rai hodi buras atu dezenvolve ita nia ekonomia,”Arcanjo da Silva.

Nia relembra  katak,  iha tinan 2015 Gabinete Ministru Koordenador Asuntu Ekonomia  halo revizaun ba dekretu lei  ba ajensia  espesilizada investimentu  hodi  hamosu fali Tradelnvest  Timor Leste.

“Ita hanoin ohin loron  depois de tinan 14 ita hanoin  ita mos iha kondisoens ona atu bele halo konferensia investimentu internasional, maibe   ita mesak la iha esperiensia, entaun ami koopera ho Ajensia Informa, no Informa  ne’e ajensia ne’ebe  organiza eventu sira hanesan ne’e iha nasoens barak,  sira organiza iha Afrika, Europa, China nomos Asia Pasifika. Tanba  ne’e maka ami hanoin atu koopera ho sira  hodi halo primeira konferensia  Internasional  ida ne’e. Primeiru lugar tenki hala’o ho diak. segundu,  bele mos utuliza oportunidade ida para  atu aprende hodi  nune’e bele kapasita a’an  nomos ajensia relevantes   nomos institusaun publiku ba promosaun investimentu nasaun hodi ba oin Timor Leste bele organiza mesak,”Arcanjo da Silva.

Iha konferensia intermasional ne’e, nia dehan, fahe mos informasaun  kona-ba setor petroleu  no rekursu minerais, ne’e hanesan  iha area pilar primeiru  ba  dezenvovimentu nasaun nian.

Iha parte seluk, Koordenador Reforma Fiskal, Fernanda Borges, hateten, reforma fiskal  komisaun ne’ebe maka teknika  ne’ebe  Governu harii hodi ajuda  Ministerio hotu atu bele hetan reseitas domestika. Tanba reseitas domestika ne’e  la mai husi mina rai deit.

Fernanda Borges afirma, rai Timor ne’e iha potensia barak no  iha rikusoin atu  bele investidores sira mai investe  nune’e halo lukru selu impostu.

“To’o agora ita depende liu ba mina rai, ita iha rikusoin hanesan mina rai, turismu, no seluk tan, ne’ebe  iha buat barak maka ita seidauk explora  ho didiak atu Timor oan sir a bele hetan benefisiu hodi habelar  ita nia ekonomia, atu fo kreximentu ekonomia nune’e povu  bele hetan servisu no kaualidade moris  bele diak liu tan,”dehan Fernanda Borges.

Servisu  Komsaun  Reforma Fiskal nian, nia dehan, halo ona  reforma oi-oin, liu-liu iha Alfândega, nomos impostu.

“Alfandega ami halo atu autoriza sasan hot-hotu, surat la barak ona, ema ne’ebe maka hakarak importa sasan  bele halo ho  komputador deit, la presiza uza surat tahan barak hanesan ita halo,”dehan Ferenanda Borges.

Sertifika  investidores 184    

      

Nune’e mos, Diretor Ezekutivu Tradelnvest Timor Leste, Arcanjo da Silva hateten,  hahú tinan 2006 to’o   tinan 2016,  Tradelnvest Timor Leste  fo ona sertifikadu  ba investidoes  hamutuk 184.

“Ita hahú tinan 2006 to’o ohin loron  fo ona sertifikadu ba investidor  184 resin, tinan  ida ne’e 2016  iha VI Governu Konstituisional  nia okos  ita fo sertifikadu  investedor hat, foin  dadauk semana tolu ba ita fo sertifikadu ida ba  Tia Cement atu hari fabrika cement   iha Baucau, Stand Ford Medical sira hanesan disponibiliza prestasaun de servisu atendimentu  iha setor saude ninian, ita mos sertifika Kompanhia ida iha Atauro ne’ebe investe iha setor turimsu,”esplika Arcanjo da Silva ba jornalista  iha Timor Plaza, hafoin partisipa iha Konfrensia Internasional Investimentu Segunda (06/06).

“Akordu espesial  ita fo ba  Paradise,   ita mos fo mos Heineken  nomos  investedores Cement,”tenik  Arcanjo da Silva.avi

Jornal Nacional

ALKATIRI NIA FATIN IHA PN MAMUK

Sekretariu Jeral FRETILIN, Mari Bin Amude Alkatiri nia fatin iha Parlamentu Nasional (PN) to’o agora sei mamuk.

Bankada parlamentar FRETILIN seidauk disidi hodi halo substituisaun ba deputadu Mari Alkatiri, maske Alkatiri rasik asume hela kargu  Prezidente Zona Espesial Ekonomia Sosial Merkadu (ZEESM).

Vise Xefi Bankada FRETILIN, Deputadu Francisco Miranda Branco, hateten, to’o agora bankada FRETILIN seidauk foti desizaun hodi halo substitusaun temporaria, tanba ladun efikas ne’ebe fatin ne’e husik mamuk deit.

“Deputadu Mari Alkatiri nia fatin ami husik mamuk deit, tanba ami seidauk disidi hodi  halo substitusaun temporariu,” dehan Branco ba Jornalista sira iha uma fukun PN,  Segunda (06/06/2016).

Reprezentante povu ne’e hatutan tan katak, durante ne’e hare husi aspeitu efikasia no efisiente servisu nian, FRETILIN sei buka hodi priense ho substituisaun temporaria, Bankada FRETILIN seidauk hare nesesidade husi aspeitu efisensia no efikasia servisu hodi eleze ho substutuisaun temporaria.

Hatan kona ba Alkatiri tama parlamentu hein debate Orsamentu Jeral Estadu (OJE), Francisco Branco, hateten, momentu ne’ebe presiza hanesan debate lei ne’ebe importante atu debate no presiza Interpretasaun nivel Estadu nian brankada bolu hodi marka prejensa.

Iha fatin hanesan Prezidente Parlamentu Nasional, Aderito Hugo da Costa,  hatete, Bankada FFRETILIN esplika fila-fila ona no mos partidu esplika ona tan ne’e tenki hare referensia, tanba ne’e labele halo resposta ida ba ida.

“Ita boot sira (red-Media) hatete bankada FRETILIN nia pozisaun ne’ebe esplika fila-fila mais imi ladauk kaer referensia ne’ebe mak bankada FRETILIN halo kona ba pozisaun Deputadu Mari Alkatriri nian, imi nunka hakarak kaer,” dehan Aderito.

Atual deputado bankada CNRT ne’e hatutan tan,  media tenki kaer referensia molok dezenolve Opiniaun tuir mai, tan ne’e nia parte lakohi fo resposta kona ba deputadu Mari Alkatiri nian kuandu Media lakaer ba referensia ne’ebe mak bankada FRETILIN halo fila-fila.

“Pozisaun Deputadu Mari Alkatiri nian la’os buat foun, tanba esplikasaun fila-fila ona husi Parte bankada FRETILIN no parte Partidu nian,” dehan Hugo.

Nune mos Deputadu Bankada PD Paulino Monteiro, hatete, Pozisaun Deputadu Mari Alkatiri nian, nia parte lakohi fo komentariu, tanba partidu seluk nian desizaun no lakohi mete.

“Hau lakohi fo komentariu, tanba hau husi partidu demokratiku labele meta Partidu seluk,” dehan Paulino. mia

Jornal Nacional

PPN BAIXA LPV BA KOMISAUN EVENTUAL

Presidente Parlamentu Nasional (PN), Aderito Hugo da Costa, baixa ona Lei Pensaun Vitalis (LPV) ba iha komisaun eventual hodi halo diskusaun.

Kompozisaun ba komisaun eventual envolve Deputadus nain 11 atu estuda nia baze legal ba alterasaun lei pensaun vitalisia.

Deputadu Osorio Florindo husi bankada Fretilin ba jornalista hatete LPV baixa ona ba komisaun eventual maibe nia mekanismu komisaun eventual tenki reniaun hari strutura depois maka halo deskusaun, ida ne’e maka regra normal nian.

Nia hatutan, kona ba durasaun ne’e lolos depois de baixa Presidente Parlamentu tenke deside mais ohin Presidente Parlamentu la deside maibe normalmente komisaun eventual la dura klaeur, tarde liu maka fulan ida ou rua.

“Hau hanoin permeiru reniaun sei hili strutura, deside mos tempo ba diskusaun, maibe lolos ne’e Presidente nia kompetensia atu hatete komisaun nia servisu, ohin sei plenaria, aban, bairua hanesan ne’e bele diside ona nia strutura,”  informa Osorio Florindo iha PN, Segunda (06/06/2016).

Iha fatin hanesan Deputadu husi Bankada PD, Deputadu Paulino Monteiro hateten,  komisaun eventual simu ona servisu nebe meja PPN fo tun mai iha komisaun eventual nian atu halo preparasaun oinsa iha komisaun ne’e se maka sai responsabilidade masimu, xefi no nia strutura.

Kona ba durasaun tempo Deputadu ne’e hatete ida ne’e depende ba orsida komisaun sei enkontru lai hodi deside strutura atu debate. Nes

Jornal Nacional

KOMUNIDADE TENKI IHA KONSIENSIA SOE FOER IHA LIXU

Ekipa Fundasaun Haburas ho estudante husi Universidade da Paz (UNPAZ), Universidade Timor Lorosa’e (UNTL) hamutuk ho komunidade Bidau Santana horseik (6/6) hala’o atividade limpeza jeral iha Area Mota Bidau Santana.

Aktividade ne’e hala’o ho objektivu hasa’e komunidade hotu nia konsiensia hodi hatoman aan soe foer iha lixu fatin.

“Liu husi atividade ida ne’e atu fo hanoin ba komunidde sira bele iha konsiensia oinsa komunidade sira muda hahalok keta soe foer iha fatin publiku, hela fatin no mota laran,“ informa vice diretur Fundasaun Haburas Antonio Delima ba Jornalista sira hafoin  hala’o atividade limpeza jeral iha Bidau Santana, Segunda (6/6/16).

Maibe Antonio dehan tan, kuandu soe foer arbiru sei fo impaktu negativu ba ita nia saude liu-liu komunidade sira ne’ebe hela besik iha mota ninin. Basa foer sira ne’e mota lori ba tasi sei estraga kriasaun tasi nian.

 “Iha Dili ema barak seidauk iha konsensia atu soe foer iha lixu fatin, tanba ne’e mak ami mai fo hanoin ba sira para sira hatoman aan soe foer iha fatin lixu,” haktuir nia. Car

Jornal Nacional

NAI NAFATIN IHA FIEL NO HADOMI EMA HOTU

Padre Paróquia Sagrado Coração de Jesus Becora, Pe. Guilhermino da Silva, esplika iha nia homília, ba selebrasaun Jesus Futar Fuan Santu, nu’udar  komunidade Paróquia Becora nia mahein, ba dala 50 katak, hanesan bibi atan, Maromak nafatin iha fiel no hadomi ema hotu sem limitasaun.

“Mai haksolok ho ha’u, tamba ha’u hetán fali ona ha’u nia bibi ne’ebé lakon. Hanesan bibi atan, Maromak lahakarak ita la’o sala dalan no lakon, maski ita lakon, nia fiel nafatin buka ita no hetán fila fali ita, basa ninia domin hanesan nafatin ba ema diak no ba ema sala nain. Maromak hadomi sanulu resin sia i hadomi mós ida be lakon”,haklaken amu Guilhermino da silva, ba missa Domingo(05/06), Paróquia Becora SACORJES.

Pe. Guilhermino fundamenta katak, Maromak nia hadomi ne’e, ema ida labele kalkula, Maromak hadomi tebes ema hotu, hanesan Nia hadomi nia matan fuan rasik, basa ema hotu folin tebes ba Nia, no ema nu’udar Maromak nia imajem rasik.

“Domin ida ho sakrisika an ne’e, ita hetán duni iha Jesus nia an, domin ida ne’e simboliza mai ita ho nia fuan no laran, nia hamrik hodi hatudu ba nia fuan, atu ita hatene, atu ita koko no sente. Bibi ne’ebé lakon mak ita ema, dalaruma ita nega direta ka indireta Maromak nia domin iha ita  nia moris, ita husik hela de’it Maromak nia domin hodi monu ba sala no hakarak separa ita nia an husi Nai nia domin”,hatutan Pe. Guilhermino.

“Maluk sira ita selebra futar fuan Santu, ita komunidade Paróquia nia mahein, Paroquia Becora nu’udar ita nia uma, ita nia luhan, nia halibur ita hotu iha ne’e, Nia koñese ita ida-idak nia an, Nia hatene lolós se mak diak no se mak a’at, semak laran mós no semak laran foer. Selebrasaun ida ne’e ita halo nu’udar sinal ita nia respeitu no honra ba Nai Jesus ne’ebé hadomi ita, hanesan bibi atan ne’ebé hadomi ni bibi ne’ebé lakon”,reforsa Pe. Guilehrmino.

Pe. Pároco Becora ne’e reforsa, wainhira monu ba sala, ema iha tendénsia ida, hakarak halai husi Nai, no hasubar an tiha iha duut laran sala nian, tantu tamba moe ka tauk hasoru Maromak nia kastigu. Maibé, hahalok husi bibi atan ne’ebé hadomi nia bibi ne’e, bele hametin ema nia laran, fó korajem ba ema no motiva sira atu fila fali ba Nai nia luhan.

“Husi Nai nu’udar  bibi atan nia ezemplu, hein katak ita mós prontu, buka no hetán maluk sira ne’ebé sala no lakon hodi lori sira fila ba Nai nia liman, halo Nai hakuak sira nu’udar bibi atan ne’ebé hadomi nia bibi sira. Maluk sira, ita Maromak nia bibi au mesmu tempu ita mós bibi atan iha moris ne’e, tamba ne’e, mai ita hetene ita nia an, hala’o ita ida-idak nia knaar iha ita nia moris atu fó gloria, honra no respeitu nafatin ba Maromak nia domin mai ita ne’ebé boot tebes no rohan laek ne’e”,termina amu ne’e iha nia homilia.ias

Jornal Nacional

AKUZA HORTA AJUDA KILAT BA PAPUA, ASOSIASAUN HAK HUSU HATUDU PROVAS

Organizasaun sosiedade sivil husi Asosiasaun HAK husu ba observador politika Indonesia, Rhaman Sabo,n atu hatudu provas katak eis Prezidente Republika Timor-Leste no Laureadu Nobel da P:az 1996, José Ramos Horta, apoiu kilat ba iha Papua.

“Ami laiha faktu katak Ramos Horta hatama kilat ba iha Papua, karik sira iha faktu tenke hatudu, hatudu ba publiku Indonesia no mos Indonesia, katak kilat ne’e modelu oin nusa, hatama liu husi ne’ebe no se mak simu, no hamate ema hira ona, ne’e mak foin bele dehan lialos,” hateten Diretor Ezekutivu Asosiasaun HAK, Manuel Monteiro ba jornalista sira iha Farol, Dili, Sesta (03/06/2016).

“Los duni kuandu ita iha hanoin diak atu tulun ema ruma, ema seluk sempre hanoin negativu mak barak, realidade Indonesia rasik lakohi husi Papua atu ba ukun an,” Manuel Monteiro esplika tenik.

Bainhira husu katak, polemika ne’e bele afeta ba relasaun bilateral entre Timor-Leste no Indonesia, direktur ezekutivo, Manuel Monteiro, dehan se kuandu Indonesia iha faktu konserteza afeta, maibe kuandu laiha prova duni husu sira atu hamos naran, tanba Ramos Horta hanesan lider nasional Timor nian nune’e mos lider Internasional.

“Jose Ramos Horta hanesan lider nasional TL nian, tanba ne’e maka Governu liu husi Ministeriu negosio estranjeiro tenke husu ba Indonesia kona ba evidensia lolos, labele halo polemika depois hodi prejudika ita nia lider ida nia naran iha mundu internasional, tanba ita lahalo sira dun ita,” dehan Manuel Monteiro.

Obervador Politika Indonesia akuza Ramos Horta hatama kilat ba iha Papua, bainhira Ramos Horta ba vizita Papua, foin lalais ne’e. mia

Jornal Nacional

Labarik Nain 26 Hela Iha Uma Mahon

Labarik nain 26 mak agora dadaun hela iha Uma Mahon Miguel Magone, tanba komete krime no abandonadu husi sira familia.

Diretora Ezekutivu Forum Komunikasaun Joventude (FKJ) no Uma Mahon Miguel Magone, Madalena da R. Pinto Baptista, hateten labarik (komete krime) sira ne’e agoara sei hela iha uma mahon hodi hein sira nia kazu prosesa iha tribunal.

Labarik sira ne’e, nia hateten, vitima husi abuzu seksual, insestu, abuzu fiziku, abandona husi familia e balun suspeitu ba kazu krime ne’ebe sira komete. 

“Agora dadaun ami iha labarik nain 26 hela iha uma mahon, maioria labarik sira ne’ebe abandona husi familia,” Diretora Baptista hateten, iha nia knar fatin Balide, Dili. 

Nia informa, labarik sira ne’e referral husi Polisia Unidade ba Vulneravel (VPU), Komisaun Nasional Direitu Labarik (KNDL) no husi Ministerio Solidaridade Sosial (MSS).

Alende ne’e, nia parte mos preokupa ho situasaun ekonomia familia ne’ebe vulneravel tebes ne’ebe kauza ba numeru krime exploitasaun labarik iha rai laran aas. 

“Husi distritu inan-aman haruka sira mai eskola iha Dili hodi hela ho familia sira, maibe sira ne’e la eskola, halo fali servisu,” nia lamenta. 

  

Nia hatutan, FKJ mos servisu hamutuk ho kongregasaun madre sira atu tau matan ba labarik sira ne’ebe inan-aman laiha (mate) no abandona, tanba sira presiza atensaun no edukasaun. 

Iha parte seluk Membru Komisaun F (saude, edukasaun, kultura, veteranus no igualidade jeneru), Deputadu Virgilio da Costa Hornai, hateten tuir lei ema ne’ebe halo exploitasaun ba labarik hodi hetan lukru, ne’e krime. 

“Ne’e krime, ita nia estado tenke haree situasaun ida ne’e hodi fo protesaun ba ita nia labarik sira ne’e,” nia hateten. 

Nia mos sujere, presiza halo investigasuan ida klean kona ba kazu exploitasaun ba menoridade sira iha rai laran, tanba ne’e problema bo’ot ne’ebe agora dadaun labarik sira hasoru.

The Dili Weekly

ME Estabelese Sentru Edukasaun Ekivalensia Ba Jovens Drop Out

Ministerio Edukasaun (ME) estabelese Sentru Edukasaun Ekivalensia (SEE)  ba joven sira ne’ebe la remata escola, atu sira bele kompleta fali sira nia estudu iha terseiru siklu (nivel pre-sekundario).

Koordenador Ensino Rekorente postu administrative Veira Cruz, Luis Jose Oliveira dos Santos, hateten programa ne’e atu fo oportunidade ba jovens ne’ebe husik sira nia estudu iha edukasaun formal, sira bele kompleta fali iha ne’e.

“Fo oportunidade ba jovens ne’ebe lakonsege finalize sira nia estudu iha eskola formal,balun tanba forma uma kain no problema ekonomia,” nia hateten iha Sentru Formasaun Veira Cruz, Dili. 

Nia hateten, Konselho Ministru aprova no rekonese ona programa ne’e  hanesan mos ho eskola formal, tanba ne’e materia ne’ebe hanorin iha edukasuan ekivalensia hanesan mos ho iha eskola formal nivel terseiru siklu nian.

Kona ba profesores ne’ebe hanorin iha programa ida ne’e, nia hateten, Ministeriu Edukasaun halo rekrutamentu tuir disiplina walu (Portugues, Ingles, Siensia Eksata no Siensia Social) ne’ebe hanorin iha tersieru siklu.

Nia informa, estudantes edukasaun ekivalensia mos sei tuir ezame nasional hanesan mos ho estudantes iha edukasaun formal hodi hetan diploma. 

Nia informa, agora dadaun jovens nain 28 mak tuir hela edukasaun ekivalensia terseiru siklu, bainhira iha susesu sira sei estabelese tan ensino sekundario, tanba foinsa’e barak mos husik sira nia eskola iha ensino sekundario. 

Entretantu Jestor Programa Timor-Leste Coalition for Education (TLCE), Matias dos Santos, apresia ho politika ida ne’e, e espera la’os loke sentru ketak ba sira. 

“Lolos ne’e ita re-integra deit sira ba eskola formal, nune’e sira bele adapta e la’os loke fali eskola seluk,” nia hateten.                                                                                                                          

Maibe nia dehan, politika ida ne’e diak mas sei gasta osan bo’ot liu tan, tanba presiza infra-estrukturas foun, profesores no fasilidade atu halao programa ida ne’e. 

Nia mos, sujere atu implementa mos iha munisipio sira seluk hodi fo oportunidade ba ema hotu, tanba joven husik eskola la’os iha Dili deit maibe iha munisipio hotu.

             

Iha parte seluk Membru Komisaun F (saude, edukasaun, kultura, veteranus e igualidade jeneru), Deputado Leonel Marçal, hateten politika ida ne’e diak atu asegura ema hotu hetan edukasaun. 

“Politika diak, fasilita jovens ne’ebe husik sira nia eskola iha pre-primaria bele hetan fali diploma atu bele kontinua iha ensino sekundario, ba sira ne’ebe idade bo’ot ona bele tuir fali formasaun vokasional,”nia hateten. 

Nia mos, husu ba instituisaun implementador sira halo kontrolu ida rigorozu, nune’e diploma ne’ebe hasai ba duni ema ne’ebe merese, labele fasilita malu fali.

The Dili Weekly

Agrikultores 250 Mak Benefisia Ona Husi Projetu Avansa Agrikultura

Desde implementa projetu  Avansa Agrikultura, dadaun ne’e iha ona agrikultores nain 250 resin mak benefisia husi projetu ida ne’e ne’ebe funda no finansia husi  US Agency for Internasional Development (USAID).

Especialista Jestaun Projetu Avansa Agrikultura, Flavia A. da Silva, hateten husi benefisiariu 250 resin ne’e, nain 30 resin mak agora dadaun hala’o servisu ona no restu seidauk tanba sei tuir hela treinamentu.

“Sira nia produtus iha kedas supermerkadu hanesan Kmanek no Dili Mart prontu atu sosa,” da Silva hateten, iha Dili. 

Nia dehan, agrikultor sira komesa iha hanoin ona atu kuda produtus ne’ebe kualidade ne’ebe bele liga ba merkadu no kuda aihan ne’ebe iha nutrisaun e hahu hatene ona oinsa bele halo manajementu ba sira orsamentu, maske balun uja ba halo lia.

Projetu ne’e rasik, nia dehan, foin implementa iha munisipiu lima (Aileu, Ainaro, Bobonaro, Ermera no Dili), tanba munisipiu lima ne’e iha potensia rai ne’ebe diak e mos tanba pursentu kazu malnutrisaun sei aas iha fatin hirak ne’e.

Tanba ne’e, nia dehan, antes programa ne’e la’o, sira halo uluk treinamentu ba agrikultor sira, oinsa mak bele kuda aihan ne’ebe kualidade no aihan ne’ebe seguru hodi evita malnutrisaun.

Enkuantu Membru Komisaun D (ekonomia e dezenvolvementu), Jacinta Abucay, hateten programa ne’e diak tebes, maibe husu ba governu atu nafatin garantia nia kontinuasaun.

“Tanba sira link kedas ho merkadu, povu kuda loja nain sira mai sosa,”nia dehan.

Nia mos sujere, ba USAID atu halo MoU ida ho governu hodi garantia projetu ne’e nia kontinuasaun, tanba projetu ne’e iha duni benefisiu ba agrikultor sira.

The Dili Weekly

PN Aprova Ona Lei Protesaun Konsumedores

Parlamentu Nasional aprova ona esbosu lei protesaun ba konsumedores, hodi fo dalan ba sira atu hato’o keixa bainhira sasan ne’ebe sira sosa iha lojas ka merkadu laiha kualidade.

Membru Parlamentu (MP), Deputado Jorge da Conçeicão Teme, hateten esbosu lei ne’e inisia no elabora husi membru parlamentu sira, tanba 99% sasan ne’ebe iha Timor-Leste mai husi rai liur, entaun presiza iha lei ida kona ba ida ne’e.

“Lei ne’e importante tebes atu proteze direitu sidadaun nian ne’ebe hasai osan sosa sasan, bainhira iha problema, sira iha dirietu atu reklama ba fornesedor sira,” MP Teme hateten, iha parlamentu nasional. 

Nia informa liu tan, katak konsumedores iha direitu atu halo keixa hasoru fornesedores, bainhira sasan eletronika no seluk tan ne’ebe laiha kualidade, husu sira atu troka fila fali ou fo fila osan. 

Iha lei ne’e, nia hateten, koalia mos kona ba sansaun administrative no penal ne’ebe fornesedor sira sei hetan bainhira viola direitu konsumedores nian. 

Tanba ne’e, nia dehan, konsumedores tenke hato’o reklamasaun uluk ba iha fornesedor sira atu troka sasan, bainhira laiha responde lei fo dalan lori ba tribunal. 

Alende ne’e, nia mos husu ba governu, presiza halo sosializasaun ba lei ne’e, atu povu bele iha konesementu kona ba direitu no dever nudar konsumedores.

Nia dehan,lei ne’e submete ona ba iha Prezidente da Republika atu promulga e bele implementa. 

Iha parte seluk Luis Jose Oliveira do Santos hanesan konsumedor ida apresia ho inisiativa ida ne’e hodi proteje direitu konsumedores bainhira hasoru problema.

“Ita haree sasan barak mak expire tiha ona mas sira kontinua fa’an, ida ne’e fo impaktu ba ema nia saude, entaun lei ne’e importante tebes,” nia hateten. 

Nia mos husu ba instituisaun kompotente atu hatudu seriedade hodi implementa lei ne’e, tanba durante ne’e konsumedores barak mak sai vitima, maibe labele keixa tanba laiha baze legal.

The Dili Weekly

Sai Asuntus Prioridade Ba Nasaun Membrus CPLP

Iha IV enkontru ba nasaun membrus Comunidades Paises da Lingua Portuguesa (CPLP) ne’ebe hala’o foin lalais kona ba asuntu igualidade jeneru, maioria reprezentante (ministra no sekretariu estadu ba asuntu igualidade jeneru) sira konkorda fo prioridades ba asuntu hakbi’it feto iha vida ekonomia no politika.

Sekretaria Estado Apoiu Sosio Ekonomia Feto (SEM) Timor-Leste, Veneranda Lemos, hateten iha asuntu barak mak diskute iha IV Enkontru (Ministra Igualidade CPLP) ne’e,  kona ba area justisa nian, saude, edukasaun, seguransa no seluk tan, maibe koalia liu kona ba hakbi’it feto iha ekonomia no politika. 

Iha enkontru ne’e, nia dehan, nasaun membru ida-idak halo aprezentasaun ba planu asaun hodi diskute hamutuk no aprova planu asaun ida ba nasaun membru hotu atu implementa durante tinan rua (2016-2018). 

“Agora dadaun ne’e ita koalia deit oinsa hakbi’it feto iha ekonomia iha era globalizasaun no feto iha vida politika, oinsa hakbi’it feto sira atu kompete hahu husi baze to’o nasional,” nia hateten iha salaun enkontru Ministerio Negosio Estrangeirus (MNEK), Praia dos Quequiros, Dili. 

Iha ekontru ne’e, nia hateten, hasai mos deklarasaun ida hanaran “deklarasaun Dili” ne’ebe nasaun membru hotu asina hodi hato’o komprimisio hodi implementa planu asaun ne’ebe aprova ona. 

IV enkontru Ministra Igualidade CPLP tinan ne’e (2016) realize iha Timor –Leste ne’ebe hetan prezensa husi ministra no sekretario estado igualidade nasaun Protugal, Sao Tome Principe, Angola, Guine Bisau no Timor –Leste e nasaun hat mak la marka prezensa, hanesan Mozambique, Brazil, Cavo Verde no Guine Ecotorial. 

Iha parte seluk Sekretario Estado Sidadania no Igualidade Protugal, Catarina Marcelino, hateten enkontru ne’e importante tebes atu premite ministra no sekretario estadu sira tuur hamutuk hodi diskute planu asaun ba igualidade. 

“Importante atu ministra no sekretario estado igualidade sira tuur hamutuk diskute planu asaun ba tinan rua nian hodi hakbi’it feto sira,” nia hateten. 

Nia hatutan, importante tebes atu apoia feto sira halo negosio no fo atensaun ba saude reprodutivu hodi kombate mortalidade maternu infantile iha nasaun membru sira. 

Nia dehan, governu Portugal iha kooperasaun diak tebes ho Timor –Leste iha area edukasaun liu –liu loke eskola referensia, formasaun ba profesores no area saude iha saude seksual.

The Dili Weekly

Estudu konfirma aboríjen hanesan abitante dahuluk iha Austrália

Análiza  foun ida ba restu iha eskeletu “Homem do Mungo”, ne’ebé hela iha zona remota Austrália nian iha tinan 40.000 liubá, konfirma katak  aboríjene hanesan  primeiru abitante nasaun nian, tuir estudu ne’ebé fó sai iha ohin.

Estudu,ne’ebé fó sai iha revista sientífika PNAS ne’e, lahanesan investigasaun seluk iha 2001, ne’ebé hatudu katak  restu sira hosi  “Homem do Mungo”, hanesan antigu liu ne’ebé deskobre iha nasaun, maihosi  liñajen umanu ida diferente ne’ebé okupa Austrália molok aboríjen sira.

"Agora, ho teknolojia ida di’ak bele, repete buat ne’ebé maka estudu orijinál deskobre ona no ho nune’e bele  prova evidénsia ne’ebé  aboríjene sira laós primeiru australianu laiha fundamentu", informa  autór iha estudu ne’e, David Lambert, hosi Universidade Griffith,iha Austrália.

Iha estudu uluk, realiza hosi ekipa ida ne’ebé lidera hosi  Greg Adcock, Universidade Nacional Australiana, analiza ADN ba restu fósseil hosi  “Homem do Mungo”, kasadór-rekolektór ida ne’ebé moris iha rejiaun lagos Willandra nian, zona remota  ida iha oeste estadu Nova Gales Sul nian.

SAPO TL ho Lusa

Pelumenus nain tolu mate hosi inundasaun iha sul Austrália

Pelumenus ema nain tolu mate no seluk lakon iha Austrália tamba sekuénsia tempestade ne’ebé  rejista iha findesemana ne’e, informa ohin hosi imprensa lokál. 

Temporal ne’ebé  sente iha estadu Nova Gales Sul, ho nia kapitál maka Sydney, no Territóriu Kapitál Australianu, hasoru anin boot, udan boot no tasi boot, kauza destruisau iha uma, hatohar ai-sira no transborda mota no bee-lihun sira.

Autoridade sira  rekupera ona mane nain rua  iha Nova Gales Sul nian, ne’ebé to’o ohin dader mantein vigor nafatin alerta 21 ba inundasaun, ema rihun barak laiha eletrisidade no estrada barak labele liu, tuir estasaun lokál ABC.

Nain ida seluk  mate iha  Territóriu Kapitál Australianu, ne’ebé inklui Kamberra, no sei nafatin iha alerta oioin.

Reportadu ona ema nain rua ne’ebé lakon iha illa-estadu Tasmânia, ho avizu oioin tamba inundasaun no korta estrada besik  100.

SAPO TL ho Lusa

70% POVU TL MORIS HO VIDA AGRIKULTURA SUBSISTENSIA

Prezidenti Repúblika (PR), Taur Matan Ruak hateten katak, 70% povu Timor Leste (TL) moris ho vida agkultura subsisténsia.

“Nasaun ita nian foin ukun an tinan 14, maioria parte populasaun 70% moris iha agrikultor subsistensia,” dehan Taur Matan Ruak iha iha Quelicai foin lalais ne’e.

Tanba ne’e, Taur Matan Ruak dehan, iha Timor Leste Estadu haka’as an atu hanorin ema sira ne’ebé formadu, tenke hatene oinsa mak moris autonoma, ka moris mesak.

Taur Matan Ruak esplika, moris mesak ne’e signifika, ema tenke kreativu atu oinsa mak bele ajuda fali ema seluk.

“Kuandu hein Estadu ne’e imposivel, tanba ita iha 1.1 milaun habitantes, funsionáriu públiku inklui PNTL no F-FDTL hamutuk 40 mill de’it, entaun sira seluk ne’e ita atu ba tau iha ne’ebé,” relata Taur Matan Ruak.

Tanba Taur Matan Ruak dehan, atu hetan moris di’ak, povu Timor Leste tenke kreativu.

Xefe Estadu ne’e relata, filosofia povu iha nasaun seluk, li-liu nasaun Japaun mak, sira moris atu servisu, maibé povu Timor Leste nian kontratiu fali, servisu atu moris.

“Ita iha osan oit oan, ita deskansa lai, osan iha tiha oit oan mak ita ba servisu fali. Ita hetan tiha osan oit oan, ita ba halo lia mate no lia moris,” afirma Xefe Estadu ne’e.

Taur Matan Ruak dehan, kultura a’at povu Timor Leste nian ne’e mak, nunka atu fokus ba servisu, loron ida nia halo servisu oi-oin hanesan, haree karau, haree no fó han fahi, ba haree to’os, maibé ema iha nasaun seluk, servisu ne’e fokus ba ida, no nia rezultadu ne’e mós di’ak tebes.

Maibé Taur Matan Ruak dehan, nasaun sira ne’ebé mak dezenvolvidu tiha ona mós, sira nia desempregu se iha nafatin, satan Timor Leste ne’ebé foin ukun-an tinan 14.

“Ida ne’e dezafiu bo’ot ida ba ita nia nasaun, satan mais 50% populasaun abansu ba tinan 20,” katak Taur Matan Ruak.cos

Jornal Nacional

ALFREDO PIRES: PROJETU SIRA IMPAKTU BA AMBIENTE

Ministru Petroleu  Rekursu Minerais (MPRM), Alfredo Pires, hateten, kualker projetu ne’ebe maka halo iha Timor Leste (TL) ne’e sei fo ninia impaktu ba ambiente.

“Kualker projetu ne’ebe mak ita halo sei iha impaktu ba iha ambiente, dehan Alfredo ba Jornalista sira, bainhira partisipa asina akordu ba iha projetu Portu Tibar, iha Hotel Novo Turismo, Sesta (03/06).

Nia hatutan, karik atu halo projetu ruma presiza rai, ne’ebe iha rai leten ne’e iha ai entaun tenki tesi, ida ne’e mos fo impaktu ba ambiente. Tanba ne’e, presiza intende.

 “Se karik atu halo projetu ruma maka ema ruma hela iha fatin ne’e, ita tenki muda ida ne’e mos impaktu, entaun impaktu ne’e normal tebes ba iha projetu ida,” Alfredo  Pires kontinua hateten.

Nia dehan, saida maka Governu atu halo hodi jere impaktu hirak ne’e,  sekarik atu muda komunidade tenki iha prosesu ida para muda tuir lei ne’ebe mak vigor iha rai ne’e.

Tuir Alfredo Pires katak, kona-ba Supply  Base la iha problema, ida ne’e  impaktu kona-ba ambientais la iha.

“Ita koalia impaktu ambiental estudu nian ne’e liu-liu kona-ba Supply Base nian tinan hirak liu ba ne’e ita halo tiha ona prosesu tender depois komapañia Oli Parsa mak manan no kompañia halo tina ona estudus.  Depois ita intrega ba iha meiu ambienti hodi halo evaluasaun tempu naruk,” tenik Alfredo Pires. Avi

Jornal Nacional

HEIN TEMPU TL BELE TAMA ASEAN

Primeiru Ministru (PM), Rui Maria de Araújo, hateten, tuir dalan formal, Timor Leste (TL) bele tama ona  ba membru Association of South   East Asian Nation (ASEAN). Maibe hein tempu oitoan.

“Prosesu atu tama ba ASEAN ne’e hanesan ita hotu hatene ninia dalaln formal ne’e ita tuir hela ona, agora ita hein deit relatoriu avaliasaun kona-ba setores importante sira ne’e, oras ne’ebe iha hela sekretariu,”esplika  PM Rui ba jornalista iha   Aeroportu Internasional Nicolau Lobato, Dili, Sabadu (04/06), hafoin fila husi Malaysia hodi partisipa iha Forum Ekonomia Global ASEAN.

PMRui dehan, Sekretariadu  sei aprezenta ba reuniaun lider sira nian iha fulan Setembru  tinan 2016 ida ne’e,  sira sei imforma mai TL.

“Em termos prosesu tama ne’e ita kumpri hotu ona, agora uma questão de tempo bainhira maka atu tama,”tenik PM Rui.

PM Rui to’o iha Aeroportu Internasional Comoro Dili  ho aviaun Silk    Air mais ou menus tuku 2:00  meudia Oras Timor Leste akompaña husi Ministru Kordenador Estadu no Ministru Agrikultura Peskas, Estanislau da Silva no Vise Ministru Negosius Estranjeirus (MNEK)  Roberto Soares.

 “Atu imforma ba ita boot sira Xefia delegasaun TL nian Ministru Cordenador Ekonomikus  Estanislau da Silva ho ami partisipa iha Forum Ekonomiku Mundial  iha area ASEAN nian,”esplika PM Rui.

PM Rui hatutan, iha reunaiun tematiku lubuk bo’ot ida ho mos reuniaun plenaria maka partisipa reprezenta TL iha ne’eba kontribui ho ideias ruma ba tema sira ne’e. Ne’ebe maka diskuti liu-liu vizaun ASEAN nian ba oin no oinsa país membru sira bele kontrubui dezenvolvimentu ne’ebe maka diak liu iha ASEAN.

Xefi Governu Rui dehan , iha mos diskusaun lubuk bo’ot kona-ba mekanismu ne’ebe oras ne’e dadauk institisoens dezenvolvimentu iha mundu ninian halo.

Nune’e mos instituisoens   plan tropic   haree hela atu dezenvolve mekanismu  finansiamentu hodi implementa objetivu dezenvolvimentu sustentabel.

PM  Rui dehan tenikl,  iha diskusaun lubuk bo’ot ida ho praseiru sira komesa hala’o dadauk ona analiza no estudus nia rezultadu partilha ona ho pais dezenvolvimentu.

“Por ieemplu iha pais dezenvolvimentu ne’ebe la iha kapital sufisiente atu finansia infraestrutura ne’ebe bele apoia prosesu implementasaun objetivu dezenvolvimentu sustentavel nian. Hanesan kriasaun de impregus oinsa atu dinamiza ekonomia iha nasois sira ne’e, entaun parseiru dezenvolvimentu sira hare’e posibilidade atu servisu hamutuk ho setor privadu para bele atria investementu hirak ne’e.”PM Rui.

PM Rui akresenta katak, TL partisipa mos iha diskusaun ne’e hodi haree oinsa ba oin nian.

“Ita iha planu estratejiku dezenvolvimentu ida, ita oras ne’e alina hela ho objetivu dezenvolvimentu sustentabel ne’ebe mak Nasois Unidas aprova. Tinan hirak oin mai ita presija moveliza rekursu adisionais atu implementa projetu infrestrutura ne’ebe iha relasaun ho implementasaun ba iha objektivu dezenvolvimentu sustentabel,” PM Rui haklaken.

Tuir PM Rui, oras ne’e TL depende ba iha fundu minarai, depois mos depende ba iha imprestimu balun ne’ebe foti husi instituisoens dezenvolvimentu nian hanesan Banco Mundial no Banco Dezenvolvimento Asiatico. Maibe objetivu prinsipal oinsa hasa’e setor privadu nian atu investe iha infraestrutura iha pais nia laran.

Nune’e mos PM Rui dehan, manifeste husi sekretariadu forum ekonomiku mundial ninia atu apoia Governu Timor Leste  haree oinsa atu dudu prosesu ne’e ba oin.

Nia dehan, Para alen de  enkontru hirak ne’e iha ambitu Forum Ekonomiku Mundial nian, iha mos inkontru bilateral ho Primeiru Ministru Malaysia, Najib Razak, Primeiru Ministru Kambodia ho mos, Vise PM ninian Vise Primeiru-Ministru Vietname, Trinh Dinh Dung hodi koalia kona-ba ko’operasaun bilateral.

“Ita nia kooperasaun bilateral, no reforsa tan ita nia kooperasaun bilateral hodi hato’o agradesimentu ba buat sira ne’ebe halo tiha ona,”dehan PM Rui.avi

Jornal Nacional

GRUPU TIMOR FURAK HATUDU IDENTIDADE TL IHA ESTRAJEIRUS

“Ami  nia  objetivu  halibur   no  fó  mahon  ba  jovens  Timor  oan  sira  hodi  nune’e  jovens  sira  bele  sai  kreativu  hodi  hases  an  husi  atividade  konflitu, arte  marsiais, no  droga  atu  bele  aprende  sira  nia  kulturais  no  tradisionais  liu  husi  sira  nia  talenta”hatete  koordenador  grupu  Timor  Furak  Olivio  Evelides  dos  Santos ba  JNDiário  iha  Hotel  Novo  Turismu  Lecidere  Sesta  (3/6).

Koordenador  grupu  Timor  Furak  Olivio  Evelides  dos  Santos esplika,  grupu ne’ebe funda husi Anito Matos, Rui de Carvalho no Milena Verdial hari’I iha 2006  no  aprezenta  dansa  tradisionais no  kulturais Timor iha  eventu  jogu  Lizofonia  CPLP  nian  iha  Macau no iha  festival  internasional  iha França, Turki, China, Australia no  Indonesia.

Nia  hatutan, Timor  Furak  hanesan  grupu  dansa  tradisional  nian  ne’ebé  hala’o  husi  jovens  feto  no  mane  hodi  oferese  animasaun  liu  dansa  tradisional, kulturais no  modernu  balun  iha  serimonia  ne’ebé  realiza  husi  organizasaun  naun  govermentais, Governu  no  iha  eventu  internasional  balun.

Nia haktuir, aprenzentasaun  dansa  trasionais ,kulturais  no  modernu  ne’e  sira  hala’o  animasaun  hodi  tuir  nia  eskala , hanesan  iha  serimonia  simples  aprezentasaun  mós  ema  oituan, maibé  hanesan  iha  loron  restaurasaun  20  de  Maiu  ho  loron  proklamador  28  Novembru  ne’e  tenki  involve  ho  ema  barak.

Koordenador  grupu  Timor  Furak  ne’e  esplika, klean  liutan  katak, dansa  hirak  ne’ebé  mak  sira  hatudu  iha  festival  internasional  mak  dansa  tradisional  ne’ebé  mai  husi  husi  beiala  sira  nian original  no  dansa  kulturais  husi  munisipiu  13  hodi  halo  dansa  hirak  ne’e  sai  grografika  atu  dansa  ne’e  sai  furak  liutan.

Nu’udar  koordenador  grupu  Timor  Furak  ne’e  reafirma  grupu  Timor  Furak  ne’e, wanhira  ba  hala’o  atividade  animasaun  no  aprenzentasaun  dansa  kulturais  no  tradisionais  iha  eventu  karidade  ho  atividade  sosial  ho  gratuita, maibé  hanesan  aprezenta  iha  organizasaun  govermentais  bele  selu  $  300  to’o  500  USD.

aliende  grupu  Timor  Furak  ne’e  wanhira  hala’o  aprezentasaun  dansa  kulturais  iha  serimonia  hanesan  20  de  Maiu  ho  28  de  Novembru  ne’e  sira  bele  hetan  de’it  subsidiu, aihan,no  transporte. Tos

Jornal Nacional