GOVERNU SEIDAUK HILI EMA IDA HALO DIALOGU HO MAUK MORUK

PAULO REMEDIOS: “DEKLARASAUN SEKOMS LA LOS”

Advogadu, Paulino Gama ‘Mauk Moruk’ (MM), Paulo Remedios hatete, deklarasaun Sekretariu Estadu Komunikasaun Sosial (SEKOMS) Nelio Isaac nian kona ba Governu ho Prezidente Repúblika (PR), Taur Matan Ruak, seidauk hili ema ruma ka hili Laureado Nobel da Paz, José Ramos Horta, atu bele halo dialogu ho MM ne’e la los.

Tuir Paulo Remedios katak, Governu ho PR Taur halo tiha ona karta ida hodi nomeia premiadu Nobel da Paz José Ramos Horta atu halo dialogu ho MM.

“Governu hamutuk ho Prezidente Republika ka Prezidente hamutuk ho Governu hanesan deit, halo tiha ona karta ida atu nomeia premiu nobel da paz, José Ramos Horta atu halo negosiasaun ba dialogu. Ho ne’e reprezenta Governu, la’os Sekretariu Estadu, reprezenta Governu Primeiru Ministru mak reprezenta Governu, Primeiru Ministru atu halo reuniaun dala ida, ka dala 10 hamutuk ho Prezidente Repúblika ne’e la’os ha’u nia kompetensia ka ha’u mos la iha direitu atu kestiona dala hira mak sira koalia kona ba asuntu ida ne’e, kuandu PR hala’o diskusaun kona ba asuntu ne’e nia bolu ema ne’ebe mak nia hakarak koalia ne’e, la’os ha’u ka Sekretariu Estadu ba hotu iha ne’eba,” hatete Paulo Remedios ba JN-Diário, Kuarta (22/07), iha nia servisu fatin, Institutu Jurídiku Timor-Leste (IJTL), Metiaut, Dili, hodi responde SEKOMS Nelio Isaac nia deklarasaun katak, Governu seidauk hili ema ida atu halo dialogu ho MM. “Secretarios Estado Nelio Isaac nia deklarasaun ne’e lalos’’ dehan Remedios.

Paulo Remedios afirma, Sekretariu Estadu dehan Governu la iha koñesimentu, dala barak iha Governu nia kompetensia Primeiru Ministru halo desizaun ka halo enkontru ho bainaka ruma Sekretariu Estadu la hatene, tanba la hatene labele dehan karta ne’ebe Prezidenti hamutuk ho Governu hili eis Prezidente Repúblika (PR) José Ramos Horta hodi halo dialogu ho MM ne’e falsu, tanba Sekretariu Estadu la iha koñesimentu, nia la iha kompetensia no la iha direitu atu koalia kona ba asuntu ida ne’e.

“Prosesu Mauk Moruk, hanesan prosesu judisial ida ne’ebe iha segredu justisa, jornalista hotu hatene, palavra ne’e segredu justisa, portanto la iha interese kualker ema ka públiku atu halo komentariu ne’ebe la fasilita dialogu, la fasilita paz dezenvolvimentu nasional, PR ho reprezentante Governu, Primeiru Ministru hakarak halo negosiasaun, nomeia premiu nobel da paz halo dialogu, mesmo que ita la gosta maibe ita tenki apoiu inisiativa sira ne’e tanba hakarak iha paz no dame hodi lori dezenvolvimentu ba rai ida ne’e. la’os halo komentariu ne’ebe la fo benefisiu ba estabilidade,”hatete Advogadu Mauk Moruk nian ne’e.

Tuir Advogadu Paulo Remedios katak, karrta ne’ebe husi Prezidente Repúblika ba familia Mauk Moruk nian ne’e simu iha dia 15/07.

“Se la fiar konfirma ho Prezidente Repúblika ka Xefi Caza Sivil, la’os Sekretariu Estadu mak haruka karta ne’e mai. Kontiudu karta ne’e nomea fo mandatu ba primeiru nobel da paz atu halo dialogu, no karta ne’e fo koñesimentu ba familia Mauk Moruk, Cornelio Gama (L7),”dehan tan Paulo Remedios.

Karta ne’e, Paulo Remedios haktuir katak, reprezenta Prezidente Republika no Governu. Dala barak Paulo Remedios dehan, Primeiru Ministru koalia kona ba asuntu ida ne’e konfidensial ka segredu justisa.

“Se mak iha direitu atu koalia ida ne’e, Prezidente Republika, Primeiru Ministru, Tribunal, Ministeriu Publiku no advogadus, Sekretariu Estadu la iha kompetensia no direitu atu koalia kona ba ida ne’e tanba sa la pergunta ba asosiasaun estudante sira iha direitu atu koalia kona ba ida ne’e ka lae, sira la iha direitu. Apakah asuntu ne’e bele pergunta ba Ministru Agrikultura, liga ho asuntu ida ne’e ka lae, la iha ligasaun, ne’e dialogu justisa, se mak responsabiliza, Primeiru Ministru mak responsabiliza hamutuk ho Prezidente Repúblika,”dehan Paulo Remedios.

Paulo Remedios subliña katak, nia brani koalia hanesan ne’e tanba karta husi PR Taur ho Governu nian ne’e nia mos iha kopia ida.

“Hau haree tiha ona karta ne’e tanba ha’u iha kopia ida, ha’u lalika koalia barak porque ne’e segredu justisa iha negosiasoens, Prezidente Repúblika rasik, konfirma ba ekipa advogados, iha desizaun tiha ona, Sekretariu Estadu la iha koñesimentu labele involve nia naran, nia la iha koñesimentu ba ida ne’e la iha diretu atu koalia, nia haree hala’o knaar, servisu iha nia Sekretaria Estadu,”Paulo Remedios hatete.

“Hau nia area justisa, nia la’os area justisa, ne’ebe lalika koalia ida ne’e, lalika halo provokasaun notisia falsu, ne’e buatu deit, PR la’os ema atu halo buatus, PR rasik informa ha’u katak, ha’u ho Governu desidi tiha ona, ha’u fiar Prezidente Repúblika, Taur Matan Ruak nudar ita nia maun bo’ot, agora iha karta ida ne’e se mak asina, Aniceto Bertene Guro Neves, Xefi Casa Sivil Interinu, ne’e husi Palasiu Prezidente ka lae, data 15/07, agora nia dehan la iha, apakah Prezidente Republika bosok, ne’e original, maun Prezidente enkontru ho ha’u dehan, aban ha’u sei entrega karta ida ba o, na realidade entrega duni, Governu no Prezidente Republika, la dehan Sekretariu Estadu nia naran, ita hotu kolabora, ha’u prontu atu ajuda estabilidade ba prosesu ida ne’e,”dehan Paulo Remedios.

Angela Freitas Lamenta

Nune’e mos, Angela Freitas, hanesan Dirijente Politika ne’ebe hetan fiar iha prosesu negosiasaun hanesan mediador ao mesmo tempo nomeia husi parte familia hateten katak, nia lamenta ho deklarasaun SEKOMS Nelio Isaac ne’ebé dehan Prezidente Repúblika Taur Matan Ruak ho Governu seidauk hili ema ida atu halo dialogu ho MM.

“Ami simu ona surat husi Xefe do Estado Taur Matan Ruak ne’ebe hato’o ba familia sira katak nomeia ona Premiadu Nobel da Paz, José Ramos Horta atu sai reprezentante husi parte Governo nian no ha’u rasik (Angela Freitas) hanesan Dirjente Politika ne’ebe hetan fiar iha prosesu negosiasaun hanesan mediador ao mesmo tempo nomeia husi parte familia hanesan representante husi familia atu haree ba kestaun ne’e,”dehan Angela Freitas liu husi konferensia ba imprensa iha nia knaar Fatin Bairo Formosa, Dili, Kuarta (22/07).

“Tan ne’e hakarak husu ba identidade tomak liu liu husi parte Governu nian, tamba ami lamenta tebes ho deklarasaun husi parte Governo ne’ebe fo sai iha Jornal Nacional Diário husi señor Nelio Isaac katak seidauk iha nomeasaun husi parte Governo no Prezidente Republika kona ba dialogo ida ne’e,”dehan Angela Freitas.

Kona ba kestaun ne’e, nia dehan, prosesu dialogu ne’e tenke iha vontade diak husi parte Governo tamba husi parte Xefi Estadu iha ona vontade atu loke dialogu entre Governo nomos Prezidente husi grupu ilegais Konsellu Revolusan Maubere Mauk Moruk.

“Ha’u hanoin tempo to’o ona mai ita atu ida-idak rekoñese nia sala, ita labele politiza fila fali situasaun ne’e ba interese individu ka interese partidariu no grupo, tamba durante ita akompaña situasaun iha rai laran dala barak povu inocente, kbiit laek sira mak sai vítima ba prosesu politika ne’ebe inresponsabilidade, ita tenke hapara buat hirak ne’e no agora tenke buka oinsa para Timor oan sira hamutuk hodi haree dezenvolvimento nasaun ne’e nian,”haktuir Angela Freitas.

Atu asegura paz no estabilidade, Angela Freitas dehan, la’os mai deit husi forsa armadas ho polisia maibe mai duni husi sidadaun tomak. No mos tenki hakruk ba lei ne’ebé vigora iha rai ida ne’e. Tanba ne’e nia husu kontribusaun masimu husi entidade hotu liu-liu ukun nain sira.

“Ita koalia kona ba lei, ema hotu iha lei nia okos sem iha diskriminasaun, ita labele haree fali ema ida rua iha fali lei nia leten, ita hotu akompanha ita hotu sai vitima ba prosesu ida ne’e, ita lakohi tan jerasaun tuir mai atu lori tan todan ba hahalok iresponsabilidade husi politika sira ne’ebe buka politiza buat hirak ne’e ba sira nia interese,”Angela Freitas fo hanoin.

Angela Freitas, hanesan reprezentante familia husi Mauk Moruk prontu atu kopera, hanoin tempu to’o ona atu iha koperasaun entre Xefi Estadu no Governo. Maibe oras ne’e dadaun, Angela dehan, seidauk iha koordenasaun diak entre Xefi Estadu no Governo tamba ne’e mak mosu fallansu bo’ot iha komunikasaun liu liu iha media sira.

“Ami iha ne’e simu ona surat husi Prezidente Republika ne’ebe asinadu iha dia 15 de julho husi Chefe da Casa Civil Interino Aniceto Guro Berteni Neves. Ha’u rasik simu mos Prokurasaun legalmente husi MM sai hanesan reprezentante ofisialmente ba kualker dialogu ne’ebe atu hetan iha prosesu dialogu, iha ao mesmo tempo ha’u hetan Prokurasaun husi parte familia ne’ebe fo fiar tomak mai ha’u nudar reprezentante husi familia, tamba ne’e husu ba publiku atu respeita prosesu ida ne’e,” dehan Angela Freitas.

Hatan ba kestaun ne’e, iha loron hanesan, fatin Palasiu Governu, Sekretariu Estadu Komunikasaun Sosial (SEKOMS), Nelio Isaac hatete, oras ne’e Governu seidauk deside ema ida atu halo dialogu ho Mauk Moruk. Maibe Governu nia desizaun mak públiku hotu hatene katak, kontinua buka ema ne’ebe involve krime atu lori ba hasoru prosesu judisial.

“Se Prezidente mak haruka surat ba familia Mauk Moruk nian nomeia ema ruma ba halo dialogu ne’e, kompetensia Prezidente nian la’os Governu. Governu bazeia ba publikasaun JN-Diário Segunda 20/07, iha publikasaun katak, Governu hili Horta halo dialogu ho MM, Governu seidauk desidi ida, se familia sira mak simu duni karta ofisial ruma husi Prezidente Republika entaun husu ba Prezidente Repúblika, Governu so membantah (rezeita) deit iha jornal Diário, ne’e la’os Governu mak eskolha maibe Prezidente mak eskolha,”dehan Nelio Isaac.Des/Nes

Jornal Nacional

Fos Fohuk Povu Rasa Husu Govenu Muda Sistema Merenda

LOSPALOS - Povu iha suku Rasa, postu Administrativu Lospalos, Munisipiu Lautem husu governu atu muda programa merenda eskolar tamba fos nebe mak governu haruka too iha baze barak mak sai fohuk maibe kontinua tein hodi fo han ba estudante sira.

Tuir Xefi Rasa Suku Joaquim Rodrigues Lopes hatete Kondisaun eskola Aat, maske halo ona rekonstrukasuan maibe oras nee aat fali ona, husu ba governu atu hadia tuir posibilidade tamba edukasaun importante matenek laiha la bele dezemvolve Nasaun.

Merenda eskolar tama kondisaun ladiak, husu halo mudansa ba sistema Merenda eskolar tamba fos iha maibe rai kleur fulan 4 ou 5 mak tein hodi fo han labarik sira, se bele fo osan ba komonidade mak sosa hodi sosa,” dehan Joaquim liu husi Dialogu entre Povu ho Suku Rasa.

Nia hatete hare rasik ho matan fos nebe mak governu haruka 15% Aat nebe hakerek direta iha karon barak mak fos fuhuk maibe eskola tein fo han ba estudante sira maske kondisaun fos ladiak nebe sei fo saude ladiak ba estudante sira.

Iha fatin hanesan Prezidente Republika Taur Matan Ruak hatete proposta fos nebe dodok iha fatin-fatin hodi estadu nia naran husu deskupa ba povu no husu nafatin ba inan aman sira aru koopera ho diretur eskola sira hodi revolve problema nebe mak estudante sira hasoru liu-liu meranda eskolar. Informasaun kompletu iha STL Jornal no STL Web, edisaun Kinta (23/7/2015). Timotio Gusmao

Suara Timor Lorosae

Deskonfia Emprezariu Involve Droga, TDD Julga Afuk ho Nia kolega Nain 4

DILI - Tribunal Distrital Dili (TDD) realiza julgamentu ba kazu droga neebe maka Ministeriu Publiku notifika Venançio Tchon alias Afuk ho nia kolega sidadun Xina 2 nomos Timor oan nain rua hanesan arguidu ba kazu nee.

Liu husi audensia julgamentu tribunal lee sai akuzasaun husi Ministeriu Publiku katak, arguidu Venançio iha loron 7 Setembru 2014 iha meudia autoridade seguransa PNTL ho F-FDTL halo buska oras balun nia laran ba uma arguidu, tanba deskonfia halo trafiku droga. Droga neebe hetan ho modelu ampitamin, metafinamena no morfin. Enkuantu arguidu Ochelin autoridade seguransa halo kapturasaun tanba deskonfia lori droga tama mai Timor. No sira seluk tanba deskonfia konsume droga neebe mak fan husi arguidu sira neebe sosa droga husi rai estrangeiru.

Arguidu nain lima nee autoridade seguransa halo kapturasaun iha loron neebe la hanesan, maibe iha fulan Setembru nia laran. Kapturasaun husi autoridade seguransa iha (5/9/14) hodi kaptura ema Indonesia nain ida neebe mai atu foti droga neebe maka haruka husi nasaun seluk mai Dili.

Bainhira nia ho kareta liu husi diresaun Merkadu Lama nian autoridade seguransa tuir ho kareta hodi halo kapturasaun ba iha nia kareta hodi  prende modelu droga deskonfia sabu-sabu ho total kilo ida ho grama atus lima, lima nolu resin ualu neebe haruka husi Hongkong liu husi DHL. Suspeitu trafiku droga nee ho naran kompletu Iksan Darusman, husi sentral Java (Jawa Tengah nebe lori pasaporte Indonesia ho numeru A. 806 4094 nee tama mai iha Timor Leste atu foti droga sira neebe tama ona iha Timor Leste liu husi DHL hodi lori ba Jakarta.

Audensia nee preside husi juik kolektivu, Juisa Presidenti Zulmira Auxiliadora, Ana Paula Fonseca no juis estagiario. Reprejenta Ministeriu Publiku prokuradora Lidia Soares no arguidu sira hetan asistensia legal husi sira nia advogadu mak hanesan defensor publiku Marsal Mascarinhas, advogadu privadu Pedro Aparicio no advogadu privadu Jose Pedro Camoes. Informasaun kompletu iha STL Jornal no STL Web, edisaun Kinta (23/7/2015). Domingas Gomes

Suara Timor Lorosae

MPR-DPR RI Hasoru Defea Hodi Koalia Koperasaun Siguransa TL-RI

DILI - Majelis Permusyawaratan Rakyat (MPR) ho Dewan Perwakilan Rakyat (DPR) Republik Inonesia halo vijita mai Timor Leste, hodi hasoru malu ho Ministru Defeza koalia konaba Relasaun entre Timor Leste ho Indonesia.

Tuir Ministru Defeza Cirilo Cristovao katak, sorumotu nee importante tebes no foin ba dala uluk ekipa hosi instituisaun DPR ho MPR mai vijita TL, hodi koalia konaba situsaun siguransa entre F-FDTL ho TNI, oinsa atu hametin diak liu tan koperasaun entre rai rua.

Ita mos haruka ona membru balun ba tuir ona kursu iha Indonesia, tamba nee iha futuru mai sei fortalese tan koperasaun entre pais rua nee liu-liu area Defesa ho TNI, tamba ita hotu hatene katak Indonesia hanesan pais neebe vijinho, tan nee presiza koperasaun diak oinsa atu halo ezersisu hamotuk,” informa Ministru Defeza Cirilo ba Jornalista sira, Kuarta (22/07/2015) iha Kuartel Jeneral Fatuhada Dili.

Nia informa tan katak, liu hosi sorumotu nee parte Defesa mos husu ba MPR-DPR, atu hametin diak liu tan relasaun entre rai rua nee sai diak iha futuru, tamba akordu halo ona no oinsa atu ezersisu hamotuk no fo nafatin apoiu ba TL.

Iha fatin hanesan Ketua badan Pengajian MPR-DPR RI Dr. Bambang Sadono hateten, delegasaun hosi Indonesia mai hasoru malu ho Ministru Defesa Timor Leste, atu koalia liu konaba koperasaun entre rai rua no ba futuru saida maka sei halo hamotuk. Informasaun kompletu iha STL Jornal no STL Web, edisaun Kinta (23/7/2015). Madalena Horta/Sonia Fereira

Suara Timor Lorosae

Taur Husu Povu Partisipa Programa Imunizasaun Sarampu-Poliu

RASA - Prezidente Republika Taur Matan Ruak husu Povu iha Teritoriu Timor Laran tomak atu Partisipa iha Programa Imunizasaun Sarampu, inkliu Sensus poluasaun atu nune bele hadok Aan husi Moris no mos bele hatene povu ninia moris.

Nia hatete nutrisaun povu sira presia hatene ahin sira nebe mak diak atu halo isin diak, no ahi han nebe mak halo isin ladiak tamba nee presiza partisipa iha imunizasaun sarampu nebe mak oras nee ministeriu Saude Halao.

Hau Husu povu hotu atu Partisipa iha sensus, imunizasaun sarampu, atu oan sira isin diak no saudavel labele hetan moras,” dehan PR Taur liu husi Dialogu ho Povu suku Rasa, Kuarta (22/07/2015) iha Lospalos, Munisipiu Lautem.

Taur hateten Sensus Populasaun tinan 2015 mak fo governu atu iha koinesementu realistiku ida ba vida sidadaun no nasaun nian, aktividade nee espera katak ho aktividade ida nee laos primeiraves maibe ba oin nafatin.

Iha fatin hanesan Komonidade suku Rasa Carlos da Silva katak, nia parte Prontu atu Partisipa iha imuniasaun Sarampu, Sensus no aktividade sira seluk nebe maka governu no estadu halao iha suku laran. Informasaun kompletu iha STL Jornal no STL Web, edisaun Kinta (23/7/2015). Timotio Gusmao

Suara Timor Lorosae

Dezemvolve Nasaun, Taur Husu Povu Hametin Paz

LOSPALOS - Atu Dezemvolve nasaun, Timor oan hotu tenki hametin paz tamba paz mak sai xave ba prosesu dezemvolvimentu nasaun, tan nee Problema nebe maka mosu iha rai laran kiik no sei la fo impaktu ba Prosesu Dezemvolvimentu.

Tuir Prezidente Republika Taur Matan Ruak Katak Timor oan hotu inkliu Prezidente Republika hotu-hotu hatete Timor Leste ukun aan dala ida laos dala rua, tan nee Problema sira nebe mak iha sei la impede dalan Prosesu Dezemvolvimentu.

Ita hotu hatete timor Leste ukun Aan dala ida laos dala rua, Problema sira nebe pasa revista iha laga sei la impede ita iha dalan klaran tamba nee problema kiik, ita nia dezemvolvimentu sei kontinua lao ba oin,” Dehan Prezidente Taur liu husi Dialogu ho povu iha suku Rasa, Postu Administrativu Lospalos, Kuarta (22/07/2015).

Nia Hatete Timor oan hotu nia mehi mak hakarak oan no Bei oan  sira nia future diak, tan nee Pas sai Numeru ida iha nasuan Timor Leste, tan nee pas sai fator importante ba dezemvolveimentu tamba nee pas importante.

Taur hatete Suku nee ninia kontribusaun ba pas boot tebes, tamba hametin paz husi suku ba Postu Administrativu, Munisipiu too nasaun nee importante, tamba Nasaun Dezemvolve presiza Paz hodi halo dezemvolvimentu.

Iha fatin hanesan Xefi Suku Joaquim Rodrigues Lopes hatete kona ba Pas povu iha suku Rasa kontribui teb-tebes, tamba laiha problema nebe mak iha nunka mosu iha suku laran. Informasaun kompletu iha STL Jornal no STL Web, edisaun Kinta (23/7/2015). Timotio Gusmao

Suara Timor Lorosae

Kilat - Pistola Seidauk Foti Husi Mauk Moruk, Taur: Operasaun Konjunta Kontinua Lao

LOSPALOS - Prezidente Republika Taur Matan Ruak hatete Operasaun hasoru Prezidente Konseilu revolusionariu Maubere Paulino Gama alias Mauk Moruk, kontinua halao nafatin no sei lapara to kaptura Muak Moruk.

Taur hatete sira uza forsa kuandu sira koalia deit estadu mos sei koalia hasoru, maibe sira lori kilat nee estadu haruka forsa sira hodi buka tuir sira, membru F-FDTL ida kanek tan.

Kanek hamutuk ema nian hitu kilat ida ita foti fali ona, falta kilat ida, pistola ida seidauk, tamba nee operasaun sei kontinua, prezidente husu imi (Povu Red) atu kontribui no Pasensia ita hakarak rezolve problema ida nee,” dehan Taur liu husi Dialogu ho povu iha suku Rasa, Postu Administrativu Loslapos, Kuarta (22/07/2015).

 Nia hatete nasaun Timor Leste demokratiku ema hotu nebe hakarak ukun Timor tuir dalan nebe los, dalan nebe mak lei fo dalan, hari partidu, tuir eleisaun, povu fo fiar ukun ba maibe labele hadau malu deit iha liur.

Iha fatin hanesan Komunidade Suku Rasa, Duarte husu estadu atu rejolve problema nebe mak oras nee iha rai laran, tamba povu presiza moris hakmatek tamba problema nebe mak iha halo povu senti preokupa no tauk. Informasaun kompletu iha STL Jornal no STL Web, edisaun Kinta (23/7/2015). Timotio Gusmao

Suara Timor Lorosae

Pozisaun Governu, Laiha Dalan Dialogo Ba Mauk Moruk

DILI - Maske Prezidente Republika Taur Matan Ruak haruka ona karta ba eis Prezidente Jose Ramos Horta, atu lidera Dialogo ho Mauk Moruk, maibe Governu nia Pozisaun mantein laiha tan Dialogo ho Mauk Moruk.

Tuir Ministru Defeza Cirilo Cristovao katak, oparasaun nee sei la hapara bain hira seidauk kaer Paulino Gama alias Mauk Moruk, hodi lori mai responde nia aktu iha Justisa, tan nee operasaun sei la hapara.

Hau hanoin pozisaun Governu nian maka operasaun nee lao nafatin too lori ema nee mai hatan ba Tribunal, tamba nee dialogo kestaun ketak ida, no pozisaun Governu nian maka oparasaun lao nafatin no husu Mauk Moruk atu mai intrega aan hodi responde nia aktus iha Tribunal,” dehan Ministru Defeza Cirilo Cristovao ba Jornalista sira, Kuarta (22/07/2015) iha nia knar fatin Kuartel Jeneral Fatuhada Dili.

Nia informa liu tan katak, desizaun hosi Governu maka laiha tan dala atu halo Dialogo ho Paulino Gama-Mauk Moruk, no laiha ema ida atu reprezenta Mauk Moruk hodi halo Dialogo ho Ramos Horta, tamba tuir informasaun dehan Dialogo nee Mauk Moruk la marka prezensa no sei dirije nia familia maka atu reprezenta Mauk Moruk.

Iha parte seluk Komandante Jeral Polisia Nasional Timor Leste (PNTL) Komisariu Julio Hornay hatutan, Operasaun HANITA hodi kaptura Grupu illegal sira, sei laiha batas, kuandu ema hotu laiha koperasaun atu fo informasaun konaba Paraderu Mauk Moruk. Informasaun kompletu iha STL Jornal no STL Web, edisaun Kinta (23/7/2015). Madalena Horta/Sonia Fereira

Suara Timor Lorosae