Profesores Moe Hanorin Materia Saude Seksual Ba Estudantes

Ministerio Edukasaun integra ona asuntu saude seksual iha kurikulum national hodi hanorin estudantes iha esino, maibe seidauk hahu tanba profesores seidauk pronto no moe atu hanorin. 

Vise Ministra Edukasaun, Dulce de Jesus Soares hateten edukasaun seksual la’os disiplina ketak ida maibe komprensivu ne’ebe atu sensibiliza estudantes (feto no mane) kona ba igualidade jeneru, prevensaun isin rua sedu inklui moras hada’et sira liu husi relasaun seksual. 

“Ita iha ona kurikulum, maibe problema tanba profesores barak sente enkomodo no moe atu koalia kona ba sasan sira ne’e ba estudantes,” nia hateten iha konferensia national direitu saude seksual no reprodutivu ho tema “investe iha feto nia saude, investe ba Timor-Leste nia futuru”, iha Delta Nova, Dili.

Tuir nia, materia saude seksual ne’e sei hanorin hahu husi primeiru siklu ensino baziku to’o ensino sekundario, no sei hanorin tuir idade no nivel komprensaun estudantes nian. 

“Presiza hanorin edukasaun seksual ida ne’ebe komprensivu, katak  hanorin kona ba dezenvolvementu humanu, prevensaun moras, abilidade foti desizaun, protesaun no relasaun ne’ebe saudavel no pozitive,” nia hateten. 

Nia dehan, iha kurikulum ne’e akumula hotu informasaun kona ba saude reprodutivu, prevensaun ba isin rua sedu no tipu abuzus sira. 

Nia hatutan, iha materia saude seksual ne’e sei koalia kona ba diferensia seksu, jeneru, unidade organism humanu inklui promosaun saude, nune’e sira iha konesementu no komprende hodi foti desizaun ne’ebe diak no saudavel ba sira nia moris. 

Tanba bainhira estudante sira iha ona konesementu klean kona ba saude seksual, nia hateten kontribui ona ba iha redusaun taxa isin rua sedu, soe bebe, mortalidade inan ho oan no problema sosial seluk tan iha rai laran. 

Alende ne’e, nia hateten profesores mos la kreativu (maneira hanorin) atu oinsa mak atrai partisipasaun ativu estudante nian iha prosesu apredizajen inklui mos laiha abilidade atu transforma informasaun sira kona ba saude seksual ne’ebe klean ba alunus sira. 

Materia saude seksual enkaixa iha kurikulum eskolar nian iha tinan 2015 bainhira ministeriu halo revizaun (implementasaun) ba iha kurikulum nasional.

Iha parte seluk Diretora Fundasaun Alola, Alzira Reis hateten kultura mos sai hanesan obstaklu bo’ot ida ba ministerio atu implementa kurikulum foun ne’e, tanba sosiedade timor mai husi kultura ida ne’ebe koalia kona ba seksualidade ne’e segredu.

Maske nune’e, nia hateten Ministerio Edukasaun labele rende, kontinua esforsu halo aprosimasaun ba iha profesores sira, katak importante atu alunus sira iha konesementu.

“Tanba ida ne’e importante los ba iha labarik sira nia futuru,” nia hatutan.

Nia hatutan, asaun importante ne’ebe ministerio tenke halo mak halo sosializasaun ba iha inan-aman sira atu iha konesementu ba kurikulum, nune’e labele hamosu problema entre profesores no inan-aman. 

Iha parte seluk Vise Prezidente Grupo Feto Parlamentar, Deputada Albina Marçal hateten edukasaun mak save ba iha mudansa hotu liu –liu prevene isin rua no redus mortalidade inan ho oan iha Timor–Leste. 

“Importante tebes integra edukasaun seksual ba iha kurikulum ensino atu sensibiliza ba foinsa’e sira hodi hatene funsaun orgaun reprodutivu sira, ho ida ne’e ita prevene ona isin rua la ho hakarak,” nia hateten. 

Tanba tuir nia, kazu soe bebe ne’ebe akontese iha rai laran ne’e dalabarak kauza husi isin rua la ho hakarak no la preparadu atu sai inan no aman.

The Dili Weekly

Uniaun Europeia hakarak aselera programa apoiu foun ba Timor-Leste

Uniaun Europeia (UE) aprova iha kinta-feira ne’e programa apoiu ba Timor-Leste no sei aselera diálogu ho autoridade timoroan no parseiru sira, inklui Instituto Camões,ba ninia implementasaun, haktuir responsável europeu iha Díli.

"Horisehik duni [kinta-feira] iha Bruxelas Estadu-membru sira hosi UE aprova parte balun hosi programa ne’ebé destina baTimor-Leste. Ami agora servisu hela ho autoridade timoroan no ho Camões, hodi aselera lalais ninia  implementasaun", informa ba Lusa xefe delegasaun hosi Uniaun Europeia iha Timor-Leste, Alexandre Leitão.

Ho  " notísia di’ak" aprova ona tanba ne’e hahú enkontru ho parte timoroan atu "aselera identifikasaun ba projetu konkretu, media konkretu" no oinsa atu  adopta, nia  haktuir, iha marjen enkontru enserramentu Programa Justisa hosi Uniaun Europeia  ne’ebé  dezde 2012 fó apoiu ba setór ne’e iha Timor-Leste.

Programa ne’e- finansia hosi  Uniaun Europeia, hala’o programa luan liu iha  apoiu ba governasaun no materializadu ho kooperasaun ne’ebé  delega ba Instituto Camões -, vitál tebes ba ninia kriasaun no operasionalizasaun Câmara de Contas (CC) no Polícia Científica de Investigação Criminal (PCIC) timoroan.

Alexandre Leitão informa katak  objetivu maka dialogu no akordu nesesáriu sira ne’ebé bele assina "to’o finál tinan ne’e ka inísiu 2017" atu tinan tuir mai "bele hala’o servisu kontunua no  to’o hotu, parte boot liu hosi ninia durasaun".

Diploma ne’e responde duni ba preokupasaun ne’ebé hato’o iha ohin hosi juíza Maria Natércia Gusmão, Tribunál Rekursu nian.

"Iha  interrupsaun ida ba apoiu ne’ebé presta ba CC, sei akontese hahú iha  novembru, no maski iha  intensaun atu implementa programa foun ida iha kuadru Fundu Europeu ba Dezenvolvimento 11.º, lori inserteza boot relasiona ba  futuru CC nian", afirma juíza ne’e.

Alexandre Leitão insiste katak  ema ida sei ladada prosesu burokrátiku ne’e, tanba " programa ne’e funsiona ho di’ak no iha servisu ne’ebé la’o kapás tebes hosi  CC no  Polísia Sientífika Investigasaun Kriminál ne’ebé tenki kontinua nafatin".

Maski nune’e, iha fatin hanesan, vitál tebes atu parseiru no Estadu timoroan sira  aloka rekursu umanus no finanseiru  hodi programa ne’e  la’o rasik ho loloos tuir  forma ida sustentável no duradora no kontempla iha Orsamentu Estadu timoroan ho duradoura, nia hatete.

Programa Apoiu foun ba Governasaun Demokrátika Timor-Leste hosi Uniaun Europeia (UE), ne’ebé sei akontese  entre 2017 to’o  2022, bele to’o euro millaun  30, ho besik millaun  12 delega ba Instituto Camões.

Dadus hirak ne’e fó sai iha kinta-feira ne’e hosi Simon Le Grand, responsável kooperasaun  hosi delegasaun UE iha Timor-Leste, liuhosi semináriu iha  Díli.

Programa ne’e inklui euro millaun 15 sei fó diretamente ba Orsamento Estadu, ne’ebé  Governu timoroan  aloka, millaun liu 12 ba  kooperasaun ne’ebé  delega ba Instituto Camões no besik millaun tolu  ba despeza kontinjénsia.

Simon Le Grand esplika ba Lusa katak iha  prátika implika liu  duké duplika ho programa uluk, ne’ebé totál  besik millaun 10,5 iha  apoiu ne’ebé kanaliza hosi Camões no hosi  PNUD (Programa Nasoins Unidas ba Dezenvolvimentu), liu millaun  4 hosi  apoiu orsamentál ba Estadu.

SAPO TL ho Lusa 

Juíza hosi Tribunál Rekursu preokupa ho “krizi” finansa públika nian

Finansa Públika timor-oan nian hasoru hela krizi ne’ebé hamosu hosi reseita mina ne’ebé tuun no aumentu hosi despeza ne’ebé importante hodi hametin kapasidade hosi Kámara Kontas (CC) nian, dehan ohin juiza Tribunál Rekursu, Maria Natércia Gusmão. 

“Ami bele dehan katak finansa públika timor-oan nian hasoru krizi ne’ebé bele fó impaktu maka’as ba iha prosesu dezenvolvimentu ne’ebé la’o daudaun, hanesan ba iha ninia sustentabilidade”, dehan Maria Natércia Gusmão.

“Situasaun ida ne’ebé sai nu’udar asaun CC nian importante tebes, atu garante jestaun di’ak ba rekursu públiku”, nia dehan durante enkontru ida iha Dili hodi hakotu Programa Justisa Uniaun Europeia, ne’ebé desde 2012 apoia ona setór refere iha Timor-Leste, hanesan kria CC, ne’ebé hala’o ona funsaun durante tinan tolu.

Maria Natércia Gusmão hatudu ninia preokupasaun kona-ba interupsaun ne’ebé mosu iha programa ne’e, hahú fulan novembru no sei implementa mos kuadru apoiu europeiu foun, iha inisiu 2017.

“Kona-ba susesu hirak ne’ebé ami alkansa, hanesan rezultadu hosi esforsu no serbisu ema hotu nian iha CC, la’os de’it juis ho auditór sira, maibé mos hosi parseiru hirak ne’ebé envolve iha operasionalizasaun. Tanba ne’e maka ha’u preokupa bainhira programa ne’e remata”, dehan.

“Interupsaun ida mosu durante fó apoiu ba CC, ne’ebé sei hahú iha novembru, maski iha ona intensaun atu implementa programa foun ba iha kuadru 11.º Fundu Europeiu ba Dezenvolvimentu, hamosu inserteza bot, ba iha futuru CC nian”, nia hatutan.

Juiza ne’e dehan katak, bainhira lahetan apoiu hosi parseiru internasionál, maka lakonsege hetan rezultadu di’ak iha implementasaun no operasionalizasaun hosi Kámara Kontas, ne’ebé sai nu’udar instituisaun importante hosi “kontrolu ba finansas públika” no Polísia Sientífika.

Ko’alia kona-ba CC ne’e rasik, nia dehan kona-ba importánsia hosi apoiu Uniaun Europeia nomós instituisaun portugés hirak ne’ebé halo parte, inklui Instituto Camões, Tribunal de Contas, Ministériu Justisa ho Faculdade Letras Universidade Lisboa nian ne’ebé iha inisiu fó ona formasaun no kontinua fó ba auditór 30.

Desde hahú serbisu iha 2013, CC aprova ona relatóriu 12, sei halo hela auditoria hamutuk 20 resin, prosesu fiskalizasaun prénia barak hosi kontratu jeradór despeza no dívida públika, inklui relatóriu no pareser kona-ba konta jerál Estadu ne’ebé haruka ba Parlamentu Nasionál.

Auditór sira hatutan tan katak, sira kontinua simu formasaun iha Portugal no Sentru Formasaun Jurídika, iha Dili, desde sira asumi funsaun.

Nia mos haktuir hikas katak juis úniku tolu hosi Tribunál Rekursu “maka akumula funsaun hosi juis CC nian sira” no sira maka kontinua “lahó asisténsia téknika”, nu’udar aspetu ida ne’ebé sei bele abranje hosi programa europeu foun.

“Dezafiu hirak ne’ebé presija atuasaun efikas no efisiente hosi CC bot tebes. Ha’u bele dehan katak CC presija tan apoiu, atu nune’e bele asumi ninia kompeténsia totál ba iha kontrolu finanseira no jurisdisiál, hanesan instituisaun kontrolu bot ida”, dehan.

“Ami hakarak fó kontribuisaun ho forma konkretu hodi hadia transparénsia no responsabilizasaun nomós governasaun di’ak ba iha administrasaun públika timor-oan nian. Ami lakohi sai instituisaun ida ne’ebé ezisti de’it iha surat-tahan leten”, nia dehan tan.

Tuir Natércia Gusmão importante tebes atu garante independénsia no autonomia finanseira hosi instituisaun nian nomós autonomia téknika hosi rekursu umanu hothotu, hodi dehan katak, maski sei juventude/foun nomós frakeza, CC iha ona “reputasaun nasionál no internasionál independénsia no kompeténsia”, ne’ebé maka importante, hodi fó presaun ba iha kontas públika, hosi reseita mina ne’ebé tuun ba 27%, iha 2015 hosi reseita 2012 nian.

“Ami laiha dúvida katak aumentu hosi despeza públika no reseita hosi mina ne’ebé tuun nomós kresimentu hosi dívida públika nian hamosu presaun no inserteza ba iha futuru finansa públika timor-oan nian”, nia dehan.

SAPO TL ho Lusa 

Funsionáriu hosi parlamentu nasionál besik 90% maka tuir formasaun ba dalen portugés

Funsionáriu besik 90% hosi Parlamentu Nasionál, aumenta tan turma rua hosi deputadu sira, maka halo ona inskrisaun ba kursu dalen portugés foun hosi instituisaun nian, ne’ebé hahú ona iha fulan ne’e no sei to’o iha setembru 2017. 

Hanesan rezultadu hosi parseria entre Parlamentu Nasionál (PN) Timor-Leste ho Asembleia Repúblika (AR) Portugal, liu hosi Instituto Camões, maka kursu ne’e hala’o ona iha fulan ne’e, hodi envolve funsionáriu 112 ho estajiária neen, ne’ebé fahe ba turma hitu ho nivel lahanesan.

“Parlamentu Nasionál tenke uza beibeik lian portugés iha sira-ninia atividade lorloron, tanba produsaun, fiskalizasaun no análize lejislativa halo ho dalen portugés”, tuir PN fó sai iha komunikadu.

Alénde ba funsionáriu parlamentár, iha sesaun lejislativa dalima ne’e, sei aplika ba deputadu sira, ho númeru variável partisipante nian ne’ebé sei envolve profesór portugés rua, iha PN maka kontrata diretamente no ida seluk bazeia ba protokolu ho AR.

Kursu foun sei hahú hafoin 22 no 23-setembru, hala’o prova avaliasaun esterna ba Kursu Lian Portugés, atu nune’e bele hatene “evolusaun hosi kapasidade funsionáriu no xefia Parlamentu Nasionál sira nian, kona-ba lian portugés”.

Iha avaliasaun ne’ebé aplika ho prova oral (ko’alia) no hakerek, atu hodi aperfeisoa liu tan kompeténsia liguístika formandu nian ne’e, hala’o bazeia ba Memorandu Entendimentu entre PN ho Universidade Nasionál Timor Lorosa’e.

Iha avaliasaun ne’e, konta ho partisipasaun hosi funsionáriu 62 ho xefia, ne’ebé hetan selesaun hosi 113 hodi tuir Kursu Lian Portugés, durante sesaun lejislativa dahaat. Kursu kona-ba dalen portugés ne’e hala’o iha Parlamentu Nasionál, durante oráriu laborál/serbisu, atu nune’e fomandu sir abele halo parte.

Alénde fó kursu, profesór portugés sira mos apoia hodi halo revizaun ba testu ho dalen portugés, inklui komunikadu imprensa, kartas, atas ho relatóriu sira.

SAPO TL ho Lusa 

Lei Bandu Taka Dalan Ba Ema Sira Hela Iha Kotuk

METAGOU, (ANTIL) - Defensór Públiku, Sérgio Hornai hateten, lei bandu sira ne’ebé hela iha estrada oin taka dalan ba sira ne’ebé hela iha kotuk.

“Lei Kódigu Sivíl iha artigu balun ne’ebé espesífiku, ko’alia kona-ba direitu propriedade proíbe atu taka dalan ba ema seluk,” Sérgio ko’alia asuntu ne’e, hodi responde preokupasaun hosi komunidade Suku Metagou ho naran Lúcia Alves Correia dos Santos, kona-ba ema balun iha Suku Metagou taka dalan ba sira ne’ebé hela iha kotuk.

Nia dehan, ema ida-idak tenke respeitu ema seluk nia direitu. Tanba tuir lei, hateten, sidadaun sira iha dever maka barak liu duké direitu. “Tenke sensível ba buat sira ne’e, tanba ita nu’udar umanu,” Hornai hateten iha Suku Metagou, Postu Administrativu Bazartete, Munisípiu Liquiça, Sesta (21/10).

Sergio haktuir, iha Terra Santa, Raikotu, Dili, Eis Governadór Timor-Timur nia oan mane ho naran Pedro Carrascalao koko taka dalan ba populasaun sira ne’ebé hela iha nia uma kotuk, maibé ikus mai lakon iha Tribunál tanba hahalok ne’e kontra lei.

Iha biban ne’e, Prezidente Repúblika, taur Matan Ruak mós hateten lia ida ho Defensór Sérgio Hornai. ” Lei bandu ema sira ne’ebé hela iha estrada oin, atu labele taka dalan ba ema sira ne’ebé hela iha Kotuk, ” Taur dehan tan. (Jornalista: Xisto Freitas/Editor: Otelio Ote)

Foto: Defensór Públiku, Sérgio Hornai esplika hela lei ba komunidade Suku Metagou. Foto ANTIL/Xisto Freitas

Hahú Lansa, Projetu Reabilitasaun Estrada Dili – Manatutu – Baukau

Dili, (ANTIL) – Projetu reabilitasaun estrada nasionál númeru 1 ba Baukau-Manatuto, hahu ona lansamentu primeira pedra iha Monumentu Rotunda Manatuto Vila, Sesta (21/10).

Tuir Ministru Obras Públika no Telekomunikasaun (MOPTK), Gastão Sousa, Lansamentu ba projetu ne’e kompostu hosi pakote rua mak Estrada Dili ba Manatuto no hosi Manatuto ba Baukau.

Projetu rehabilitasaun estrada nasionál númeru 1 Dili-Manatuto-Baukau ne’e  finansia hosi Orsamentu Jerál Estadu (OJE) no fundu hosi Governu TL ne’ebé empresta hosi Governu Japaun, liu hosi Japan Internasionál Corporation Agency (JICA).

Projetu rehabilitasaun Estrada Dili-Manatuto ne’ebé define nu’udar pakote ida sei hahú hosi rotunda besik Hera iha sta. 7+660 no sei remata molok tama ba Ponte Laclo iha Manatuto ho estrada nia naruk hamutuk 48.74 km.

Empreja ne’ebé mak kaer obra ne’e mak Sinohidro Corporation Limited hosi Xina ho kustu obra hamutuk ($ 59,287,453.55) ou liu tokon limanulu resin sia Dolár Amerikanu.

Obra rehabilitasaun Dili-Manatuto hahú iha loron 30 fulan Jullu 2016 no sei remata iha 25 fulan Abril 2019. Nune’e mós obra rehabilitasaun estrada Manatuto-Baukau hahú iha 18  Agostu  2016, remata iha  14  Maiu  2019.

Tuir kontratu, rehabilitasaun estrada Dili-Manatuto ho Manatutu-Baukau lori tempu tinan tolu atu. Hafoin  remata rehabilitasaun,  sei iha tinan ida nu’udar  periodu defeitu (Defect Notification Period). Hafoin ne’e,  iha tan periodu manutensaun, hanaran Performance Based Maintanancedurante tinan rua nia laran.

Eventu ne’e organiza hosi Ministeriu Obras Públika no Telekomunikasaun (MOPTK), Ministru Planeamentu no Investimentu Estratéjiku, Kayrala Xanana Gusmão, marka mos prezensa Embaixadór Japaun ba TL, Eiji Yamamato,  ofisial governu sira no komunidade lokal sira.(Jornalista :Zezito Silva/Editor: Otelio Ote)

Foto: Serimónia lansamentu primeira pedra ba rehabilitasaun Estrada Dili-Manatutu-Baukau, Ministeriu obras públika no Telekomunikasaun (MOPTK), no atende hosi Embaixadór Japaun ba TL, Eiji Yamamato, MOPTK, Gastao Sousa, Ministru Planeamentu no Investimentu Estratéjiku, Kairala Xanana Gusmão, Embaixadór Timor-Leste, Hernani Coelho ofisiál governu sira, Manatutu, Sesta, (21/10)/ Foto ANTIL, Nazario Guterres

LEE LIU IHA ANTIL

Lei PV Halo Povu Kiik Kontinua Kiak

LUCULAI - Povu no Veteranus neebe iha area rural kontinua preukupa Pensaun Vitalisia ba politiku sira neebe kaer ukun tamba povu presiza dezenvolvimentu, maibe Prezidente Republika labele Obriga Orgaun Soberanu seluk hodi tuir povu no Prezidente nia hakarak.

Prezidenti Repúblika PR Taur Matan Ruak fo sai deklarasaun nee hodi reposnode Prekupasaun Veteranus Suku Luculai Postu Administrativu Liquica Kinta (20/10/2016) iha sede Suku Luculai neebe kestiona pensaun vitalisia ba ukun nain sira.

Parlamentu Nasional dadauk ne’ee diskuti makaas lei pensaun vitalsia atu haree alterasaun ba lei ida nee, atu halo alterasaun maibe ita nia nasaun demokrasia, ita labele obriga Parlamentu atu tuir Taur nia hanoin, ou veteran no povu nia nia hanoin,” dehan Taur.

Taur hatete preokupasaun kona ba lei Pensaun Vitalsia Laos veteranus sira mesak mak la konkorda laos Prezidente mesak, maibe ema barak iha Timor Leste mos la konkorda tanba nee koalia bebeik, no  koalia makas  liu tan iha tinan ida ne’e nia laran.

Liu husi Sesaun husu no hatan  Veteranu  Mario Gomes, husi Suku Lukulai konsidera Pensaun Vitalisia Estadu halo diskriminasaunn ba Veteranus iha Timor laran tomak, tanba sira hlao funu durante tinan 24, simu osan oituan. Informasaun kompletu iha STL Jornal no STL Web, edisaun Sabado (22/10/2016). Timotio Gusmao

Suara Timor Lorosae

Lei PV Halo Povu Kiik Kontinua Kiak

DILI - Lei Pensaun Vitalisia (LPV) kontinua sai ajenda problematiku iha sosiedade Timor Leste nia hanoin, liu-liu observador politika sira. No sira konsidera katak lei pensaun vitalisia nee halo kiak povu kiik sira.

Tuir Observador Politika-UNDIL, Francisco Mausoro dehan, povu Timor Leste nee kiak tiha ona I sira hakarak halo kiak liu tan. Tanba asesu ba direitu baziku hanesan edukasaun dehan livru gratuita maibe lagratuita inflasaun nee sae, ema sae kareta karun.

Agora kiak ka lakiak ita haree ba sistema, sistema nee halo ema kiak, sistema nee halo ema koruptu hanesan agora halo lei fo-an rasik nee halo sistema neebe mak korupsaun exemplu lei pensaun vitalisia,” dehan Mausoro ba STL iha peace coffe Caicoli-Dili, Sesta (21/10/2016).

Mausoro haktuir, lei pensaun vitalisia nee ema hotu prekupa no ema hotu konkorda atu haltera lei nee tanba lei nee atu halo kiak liu tan povu iha Timor Leste.

Iha sorin seluk, Observador Politika-UNTL, Camilio Ximenes Almeida dehan, lei pensaun vitalisia nee so habokur deit, ema politiku nain sira liu-liu sosiedade hanesan povu kiik sira lahetan benefisiu.

Nunee mos, Kandidatura xefe suku Lahane Oriental, Trindade Baptista dehan, lei pensaun vitalisia nee sai inimigu ba povu Timor Leste, tanba lein pensaun vitalisia nee bele halo kiak povu kiik sira iha Timor Leste. Informasaun kompletu iha STL Jornal no STL Web, edisaun Sabado (22/10/2016). Raimundo S. Fraga

Suara Timor Lorosae

Birokrasia Naruk Hamosu Subornu No Korupsaun

DILI – Governasaun diak iha Timor Leste, nakonu ho moras oin oin, hanesan iha atendimentu publika liu husi birokrasia neebe maka naruk ba populasaun sira hodi trata dokumentu ruma, nunee tendensia hodi hamosu sobornu no korupsaun.

Vise Komisaun A (PN) deputadau Arao Noe de Jesus Amaral hateten, lamentasaun barak katak iha atendimentu publika sei iha birokrasia naruk demais, depois lori tempu para trata dokumentu ida.

Tanba nee se se deit maka elitu iha eleisaun 2017, forma Governu tenke buka oinsa minimiza buat ida birokrasia nee, tanba birokrasia naruk atendimentu neebe kleur fo dala ba buat rua korupsaun ho sobornu.

Hau fo osan ruma para nia bele halo lalais oituan, hau nia dokumentu, laos tanba dehan ema nee maka hakarak, mais situasaun maka obriga, ema neebe intersante halo dokumentu neebe sai lalais para nia hodi halo buat rumA, kuandu lasai nia tenke fasilita buat ruma para sai, ida nee fo dalan ba ida neeba,” dehan deputadu Arao ba STL, iha PN, Dili, Sesta (21/10/2016).

Nia dehan, sistema birokrasia neebe iha nee fo dalan para atu iha buat ida subornu, tanba nee maka tenke muda sistema nee para halo menus birokrasi no atendimentu publiku nee tenke lori besik ba povu liu husi dalan dezentralizasaun.

Iha fatin hanesan membru PN husi bankada CNRT Domingos Carvalho de Araujo hateten hare xefi balu abandona sira nia servisu mos ladun tau atensaun ba iha sira nia membru sira, iha mos partikular husi kotuk. Informasaun kompletu iha STL Jornal no STL Web, edisaun Sabado (22/10/2016). Carme Ximenes

Suara Timor Lorosae

Taur Husu Favor ba Povu Haruka Oan ba Eskola

DARULETE – Povu Kiik nia oan labele iha kotuk ba prosesu dezenvolvimentu neebe lao iha rai laran, Prezidente Republika Taur Matan Ruak husu favor ba povu kbit laek atu haruka oan sira ba eskola.

Nia husu ba povu atu hamenus lia mate no lia moris hodi haruka oan sira ba eskola, kuandu povu kiik lakohi haruka oan ba eskola mak ema neebe kaer ukun nia oan mak sei ukun nafatin too oan no bei oan mos sira mak ukun hela deit.

Ita nia terus labele saugati, ital abele iha kotuk hela deit, hau husu favor haruka oan sira ba eskola tamba edukasaun sei muda ita nia oan sira nia vida,” dehan Tuar liu husi Dialogu Komonitaria ho povu Suku Darulete, Kinta (20/10/2016).

Iha fatin hanesan liu husi sesaun husu no hatan durante dialogu, Herqueles Joaquim da Luz  husu estadu atu harii sentru formasaun ba joventude sira iha suku Luculai.

Nune mos xefi aldeia Manupatia, Suku Darulete Luis dos Santos Soares husu ba Prezidente atu kria markadu tradisional iha suku tamba mini markadu balun neebe governu kria oras nee barak mak abandona. Informasaun kompletu iha STL Jornal no STL Web, edisaun Sabado (22/10/2016).Timotio Gusmao

Suara Timor Lorosae

LEE LIU IHA SUARA TIMOR LOROSAE