FERNANDA BORGES LIDERA REFORMA FISCAL

DILI - Governu fó fi’ar ba eis deputada nu’udar mos Prezidente Partidu Unidade Nasional (PUN), Fernanda Borges, lidera Komisaun Reforma Fiskal (KRF), ne’ebé tutela iha Ministériu Finansas (MF).

Tuir ajenda, KRF sei hala’o konsulta lubuk ida ho parte interesada xave sira to’o fulan Marsu 2016.

Tuir publikasaun iha portal Ministériu Finansas nian katak, hafoin fulan ruma hala’o tiha servisu preparatóriu lubuk ida ho tulun hosi  péritu nasional no internasional sira, KRF hahú aprezenta esbosu lei tributária no aduaneira to membru governu no parte interesada sira seluk hodi husu sira ninia komentáriu no feedback.

Péritu nivel altu iha área ida ne’e mai iha Timor-Leste hodi aprezenta sira ninia rekomendasaun no hodi klarifika asuntu no preokupasaun sira ne’ebé iha.

Tópiku sira ne’ebé diskute mesak oin-oin, hahú hosi  lei tributária, reforma administrasaun tributária, esbosu lei IVA, reforma impostu rendimentu, kódigu prosedimentu aduaneira no mós planu estratéjiku ba administrasaun tributária.

KRF sei halo konsulta ho Primeiru Ministru, Ministru xave sira, membru Parlamentu Nasional, Presidénsia Républika, representante hosi  Kámara Komérsiu, kompañia petrolífera, entidade kontabilístika, advogadu, ONG, konfisaun relijiosa, universidade, partidu polítiku, média no mós organizasaun internasional sira hanesan BDA, FMI, no Banku Mundial.

Reforma Fiskal, aleim de Reforma Jestaun Desenpeñu no Reforma Desenpeñu Orsamental, ninia objetivu prinsipal maka atu asegura sustentabilidade fiskal Timor-Leste nian iha médiu no longu prazu liu hosi  atinji balansu ida entre despeza no reseita Estadu nian.

Reforma Fiskal sei kontribui ba aumentu iha reseita naun-petrolífera, no iha tempu hanesan mós fó garantia nafatin ba kontinuasaun komitimentu Estadu nian ba ninia sidadaun sira.

 Atu halo ida ne’e, Reforma Fiskal sei hadi’ak  no fornese sistema Tributária no Aduaneira Timor-Leste nian ho lejislasaun lubuk ida efisiente, ne’ebé sei tulun Estadu hodi kolekta reseita nesesária sira hodi implementa no atinji Estadu ninia misaun no mós atu moderniza no konsolida administrasaun Tributária no Aduaneira Timor-Leste nian liuhosi modernizasaun sistema IT no hadi’ak  sistema no prosedimentu sira.(*)

Timor Post

TIMOR LESTE IHA ONA PRODUSAUN OXIGEN RASIK

DILI - Kompanha Suhurama Developer Timor Leste, komesa hala’o investimentu iha industria hodi fabrika oxijéniu nune’e bele distribui ba Óspital sira iha Timor Leste no uja ba privadu nian.

Setór privadu nu’udar ajensia importante ba dezenvolvementu nasaun, tanba ne’e atu muda ekonomia rai Timor sai buras liu tan, presija iha investimentu barak, tanba ne’e ba emprezariu nasionál, kompanha Suhurama Developer ne’ebé lidera hosi eis Sekretariu Estadu Komersiu Ricardo Nheu, hahú hala’o operasaun iha fabrika Oxijéniu.

Hosi fabrika ne’e ofisialmente inagura ona hosi VI Governu Konstitusional liu hosi Ministériu Komersiu Industria no Ambiente (MCIA), tanba hosi investimentu refere bele apoiu mós kria servisu ba timoroan sira ne’ebé mak iha kapasidade ba area refere.

Fabrika Oxijéniu refere lokalija iha Aldeia L:ebaulelo suku Tibar Postu Administrativu Bazartete Munisípiu Liquiça.

“Ita hein katak, Agora bele hala’o ona atendementu ba públiku, tanbá ami intensaun  produz Oxijéniu ne’e, hodi ba fornese ba Óspital sira no komunidade hotu iha rai ida ne’e, hakarak sosa am nia oxijéniu ne’e,” Diretór Kompanha Suhurama Developer, Ricardo Nheu dehan iha serimonia inagurasaun horsehik (10/2).

Kada loron empreza refere, produz oxijéniu tabun atus rua (200) no garantia presu baratu kompara ho oxijéniu sira ne’ebé mak importa hosi rai liur.

Iha fabrika ne’e, kompara empreza timoroan hamutuk na’in 20 hamutuk ho tékniku sira hosi China hodi halo produsaun ba okijéniu ne’e no tuir planu ba futuru kuandu iha mudansa ne’ebe mak diak ka ema hola barak ona, entaun kompania sei rekruta tan Timor oan bele to’o 100.

“Konabá kliente ami sei servisu hamutuk ho Ministériu Komerciu Industri, nune’e bele deskute ho Ministériu Saúde, nune’e iha óspital sira bele foti deit ona ami nia Oxijéniu iha kompanha ne’e,” Ricardo Nheu dehan.

Iha Fatin hanesn Ministru Comercio Industria e Ambiente, Costâncio Pinto, senti onrradu bo’ot prezensa iha fatin ne’e hodi lansa fabrika industria Oxijéniu.

 “Hanesan Ministru ne’ebé nia kna’ar haree ba iha area Industria nian senti kontenti tebes haree estabelesementu industria iha Timor Leste, industria ida ho kualidade no sira investe iha area ne’ebé mak nasaun ne’e presija tebes,” Ministru dehan.  

Nia iha konfiansa ba eis governante Ricardo Nheu iha investimentu area industria nu’udar pasu importante bele iha produtu ne’ebé mak ás no kualidade.

Tanba tuir realidade akontese iha semana ida liu ba kotuk, iha pasiente barak mate tanba deit oxijéniu menus iha óspital.

“Hosi ohin ba oin, Óspitais sira tantu Nasional to’o munisípiu no mós privadu sei la hakilar tan kona ba falta oxijéniu ba sidadaun sira. tanba ne’e MCIA sei hamutuk ho Ministériu Saúde ho akompanhamentu hosi Agênsia internasional relevantes hanesan UNDP no seluk tan, sei nfatin akompanha industria ne’e, hodi garante nia kualidade no tenki tuir duni estandarte internasionál ninian,” Constânçio dehan.

Tanba ne’e MCIA hameno hela ba Kompanha atu nune’e garante nafatin kualidade produtu oxijéniu, atu nune’e bele sai kompetetivu ho fabrika importasaun.

Nune mós Vice Ministru Edukasaun Ensino Superior, Abel da Costa Ximenes orgulhu ho fabrika Oxijéniu ne’ebé hari hosi kompania Suhurama Developer tanbá iha insitativa diak hodi loke industria  oxijénio, nune’e sai motivasaun hodi bele inspira empreza seluk atu investe.

“Ohin ha’u kolia ho Minsitru MCIA katak industria hanesan ne’e, iha vantazen ba edukasaun tanba primeiru, ami agora dezenvolve ona eskola tekniku vokasional, halo mudansa hosi eskola ensinu sekundariu jeral ba tekniku vokasional, tanba kuandu eskola sekundariu jeral barak ,ema hatene hakerek, le’e koalia mas la matenek servisu,” Abel dehan.

Portantu Administrador Postu Administrativu Bazartete, Munisipu Liquiça, Augostu Pereira de Araújo senti kontenti tebes ho fabrika oxijénio ne’ebe hari hosi kompañia Suhurama iha nia area tanba iha intesaun dezenvolvi nia suku, nune’e mós loke kampu servisu ba nia povu sira asesu.

“Nudar autoridade lokal,ha’u ho povu Tibar kontenti tebes, tanba bele ajuda ita nia Óspitais sira bainhira presija oxijéniu, Tanba ne’e komunidade iha Suku Tibar prontu kopera ho kompania hodi fó seguransa ba estabilizasaun hodi halo dezenvolviementu iha ne’e,” Ausguto dehan.(max)

Timor Post

Sosiadade Sivil Apoiu Xanana Lidera Negosiasaun Fronteira Martima

DILI – Sosiadade Sivil fo apoiu tomak ba eis gerileiru Xanana Gusmao, neebe mak VI Governu Konstitusional foti ona sai Xefi Delegasaun ba negosiasaun fronteira maritime, entre Timor Leste, Indonesia nomos Australia.

Tuir Diretor Asosiasaun HAK, Manuel Monteiro, ba STL liu husi telefone Kinta (11/2/2016) katak hanesan sosiadade Sivil fo apoiu tomak ba lideransa tuan sira, atu halo negosiasaun konaba fronteira martima.

Ami apoiu tanba importante liu mak intrese povu nian tanba determinasuan fronteira martima Timor Leste nian tenke klaru, tanba hanesan nasaun ida neebe mak indenpendente ita tenke hatene ita ninia fronteira martima, tanba nee ami suporta tebes lider sira hotu neebe mak inklui an iha negosiasaun nee,” dehan Manuel.

Nia hatutan alende nee husi sosiasade sivil mos sei la duvida konaba kapasidade lideransa sira hotu liu-liu ba lidernasa sira neebe sei determina fronteira tasi Timor, tanba nee husu ba Australia atu iha politika ida neebe mak diak atu tur hamutuk ho TL iha meja, hodi hahu fila fali negosiasaun fronteira maritime.

Nunee mos Diretor Fontil, Arsenio Pereira, hatete governu la hili sala ema no diak liu tan wainhira hili lideransa tuan sira, atu halo negosiasaun fronteira maritime foun ho Australia hodi bele fo vantazen ba povu no rai ida nee.

Entertantu, Inocencio Xavier, hanesan Peskijador husi NGO AJAR mos hatete stratejia governu nian nee diak tebes, tanba nee persija tebes ekipa ida neebe mak forte atu ajuda eis Primeiru Ministru Xanana Gusmao wainhira halo negosiasaun. Informasaun kompletu iha STL Jornal no STL Web, edisaun Sesta (12/2/2016). Thomas Sanches

Suara Timor Lorosae

Deskonfia Membru Governu Tiru Animal, Tenki Investiga Klean

DILI - Dekonfia membru Sestu governu neebe tiru povu nia Animal iha Liquisa, tenki Investiga klean atu nunee bele identifika lolos no labele generalize membru governu hotu hatudu hahalok hanesan tamba sira barak.

Tuir Vice Prezidente Parlamentu Nasional (PN) Aderito Hugo katak informasaun neebe mak fo sai mos latemi membru governu neebe tiru povu nia animal nia naran, tamba nee presiza halo investigasaun klean.

Membru governu neebe tiru povu nia Animal nee presiza investiga klean tamba membru governu iha nain 30 resin lahatene sese tan nee ita hein konseilu Ministru bele fo atensaun ba kestaun nee,” dehan Aderito ba Jornalista Kinta (12/02/2016) iha Parlamentu Nasional.

Nia hatete informasaun neebe mak deputadu balun fo sai nee la temi membru governu neebe mak tiru povu nia animal nia naran, maibe fo sai membru governu neebe hakarak kasa animal tan nee presiza investiga didiak.

Iha fatin hanesan Deputadu bankada CNRT Cesar Valente hatete komesa iha Jeneiru too agora povu nia karau lakon hela deit no iha Fevereiru karau 6 ona mak lakon no konsege hare karau rua mak kanek tamba tiru kanek.

Nunee mos deputadu bankada Fretilin Eladio Faculto hatete deskonfia membru governu neebe mak tiru povu nia animal tenki investiga didiak, kuandu lori kilat hodi tiru povu ninia karau atu han tamba naan iha uma la iha. Informasaun kompletu iha STL Jornal no STL Web, edisaun Sesta (12/2/2016). Timotio Gusmao

Suara Timor Lorosae

PM Rui: “Proposta Governu Konaba Lere Laos Demisaun”

DILI – Primeiru Ministru (PM), Rui Maria de Araujo, deklara katak proposta neebe mak governu haruka ba Prezidente Republika Taur Matan Ruak, konaba Maijor Jeneral Lere Anan TImur laos demisaun (hapara).

Deklarasaun nee fo sai husi PM Rui, ba jornalista sira iha Palacio Prezidensial Nicolao Lobato Aitarak laran Kinta (11/02/2016), wainhira remata halo inkontru ho Prezidente Republika.

Depois hau sei koalia konaba asuntu ida nee, governu nia proposta laos konaba demisaun maibe Senhor Prezidente Republika deside no ohin ami koalia ona no tenke lori fali ba Konsellu Ministru atu debate,” dehan PM Rui.

Nia hatutan governu sei fo responde neebe mak detailiu. Laos nee deit iha enkontru entre Xefi Governu nomos Xefi Estadu nee koalia konaba kondisaun saude Prezidente Tribunal Rekursu (TR), Guilermino da Silva, neebe mak too oras nee seidauk rekopera hodi afeita mos servisu juis sira.

Laos nee deit iha enkontru nee involve mos Prezidente Parlamentu Nasional, Vicente Guteres, maibe wainhira remata inkontru Prezidente Parlamentu rasik lakohi hasoru media hodi fo komentariu.

Enkontru entre Prezidente Parlamentu Nasional, Vicente Guteres, nomos Xefi Governu, Rui Maria de Araujo hamutuk ho Xefi Estadu, Taur Matan Ruak nee lao durante oras ida nia laran. Thomas Sanches

Suara Timor Lorosae

Nomeasaun Maijor Jeneral Foun, PN Hein Dokumentu Legal

DILI - Nemoeasaun Major Jeneral foun iha Institusaun Falintil Forsa Defeza Timor leste (F-FDTL) husi Prezidente Republika taur Matan Ruak, reprezentante povu iha uma fukun Parlamentu Nasional hein dokumentu legal husi Prezidensia.

Tuir Vice prezidente Komisaun B parlamentu Nasional Duarte Nunes katak Prezidente Deside proposta tenki husi governu kuandu la aseita tenki fo fila fali ba governu, proposta neebe mak iha tenki husi governu neebe  tuir lei.

Ami  iha knar atu hare ninia legalidade atu labele hasosu presidensia iha tempu ikus, ami sei hare no hein dokumentu legal ida husi Prezidensia hodi hare nomeasaun neebe mak iha tuir prosedementu no lei,” dehan Duarte ba Jornalista Kinta (12/02/2016) iha PN.

Nia hatete prosedimentu neebe mak iha tuir Lei Prezidentente iha kompetensia nomea proposta governu, signifika proposta tenki mai husi governu kuandu Prezidente lasimu tenki fo fila proposta ba governu hodi aprezenta proposta foun.

Hatan kona ba Transforma kargu ba jerasaun foun, Duarte hatete presiza halo distinsaun entre politika ho servisu military, tamba servisu militar labele halo teste tenki hare ba ida neebe fiar atu nunee labele hamosu problema iha loron ikus.

Iha fatin hanesan Vice Prezidente Parlamentu Nasional Aderito Hugo hatete Jeneral Lere Anan Timur Kompleta ona nia mandatu durante tinan hat, kuandu atu termina ninia mandatu Prezidente Republika mak tenki pronunsia ba re-estruturasaun.

Hatan kona ba Figura Filomeno Paixo Hugo hatete molok too nivel nee tuir kursu apropriadu, tan nee seleksaun internal neebe mak Prezidente Republika mos mai husi institusaun F-FDTL neebe hetene kareira ofisiais sira nian. Informasaun kompletu iha STL Jornal no STL Web, edisaun Sesta (12/2/2016). Timotio Gusmao

Suara Timor Lorosae

Filomeno Iha Kapasidade Lidera F-FDTL

DILI – Desijaun Prezidente Republika Taur Matan Ruak hodi nomeia Brigadeiru Jeneral Filomeno Paixao ba pozisaun Maior jeneral hetan apresaisaun nomos apoiu husi identidade tomak, tanba konsidera Fimomeno Paixao iha kapasidade diak atu lidera institusaun F-FDTL.

Tuir peskijador Organijasaun Non Govermental AJAR, Inocencio Xavier, ba STL liu husi telefone Kinta (11/2/2016) katak Filomeno Paixao iha kapasiade neebe mak diak, atu hatutan servisu hodi dezenvolve F-FDTL ho diak liu tan.

Filomeno Paixao ema neebe mak iha background edukasaun direitu no hanesan mos ema military kumprende diak konseitu direitu demokratiku, nomos komprende prosesu lejislasaun tomak tanba nee ami fiar katak ho kapasidade neebe mak iha nia sei dezenvolve diak liu tan institusaun F-FDTL hodi asegura RDTL nomos fo siguransa masimu ba povu tomak,” hatete Inocencio.

Nia hatutan nomeasaun neebe mak halo husi Prezidente Republika Taur Matan Ruak nee bajea ba lei neebe mak hakerek ona iha Konstitusaun Republika, tanba nee Prezidente Republika iha kompetensia tomak atu nomea se deit hodi troka Maijor Jeneral nia fatin, tanba nee hanesa sidadaun nomos sosiadade sivil sei la duvida ho desizaun Prezidente Republika nian.

Nunee mos ho membru komisaun A Parlamentu Nasional neebe trata asuntu konaba lei, Arao Noe de Jesus, mos hatete desijaun neebe mak foti husi Prezidented Republika nee desijaun ida neebe mak diak, tanba too ona tempu atu lideransa foin sae sira mak lidera.

Nunee mos Diretor Fontil, Arsenio Pereira, hatete tuir hirarkia wainhira Maijor Jeneral sai ou reforma hakarak ka lakohi Brigadeiru Jeneral tenke avansa, tanba nee atu lori institusaun F-FDTL ba oin ho diak liu tan maka persija halo koperasaun diak liu tan ho nasaun dezenvolvimentu military neebe mak avansadu. Informasaun kompletu iha STL Jornal no STL Web, edisaun Sesta (12/2/2016). Thomas Sanches

Suara Timor Lorosae

Iha fulan ne'e Díli simu reuniaun daruak hosi ministru sira Komérsiu CPLP nian no Fórum Ekonómiku

Iha fulan ne'e Timor-Leste simu reuniaun daruak hosi ministru sira Komérsiu no reuniaun dahuluk Fórum Ekonómiku Globál CPLP nian, inisiativu sira ne'ebé hakarak hametin dezenvolvimentu hosi lasu komersiál sira no emprezariál sira iha mundu luzófonu.

Hanoin "konseitu ida asaun estratéjiku no konseptuál" ba dezenvolvimentu hosi komérsiu no investimentu iha Komunidade Nasaun sira Lian Portugés nian (CPLP) hanesan pontu sentrál ida hosi reuniaun ministru sira nian ne'ebé sei hala'o entre loron 21 to'o 24 Fevereiru no nia programa aprezenta tiha ona iha loron-kinta ne'e.

Iha enkontru ne'e sei halo mós balansu ida hosi implementasaun ba medida sira ne'ebé hetan ona akordu iha reuniaun dahuluk, iha Luanda, iha fulan-Maiu 2012, halo parte iha esforsu sira hosi prezidénsia Timor-Leste nian ba CPLP hodi bele hetan bandeira hosi negósiu luzófonu sira nian iha mundu.

Dezenvolve pilár ekonómiku hosi relasaun luzófonu sira no CPLP nian ho rejiaun sira seluk, iha kazu ne'e, ba Ázia ho Pasífiku, hanesan prioridade hosi prezidénsia timoroan nian, ne'ebé hakarak hametin projetu negósiu sira nian, estimula área privadu, promove parseria no fasilita transferénsia hosi 'know-how' no teknolojia sira nian.

Objetivu ida maka hetan internasionalizasaun boot ida hosi empreza sira hosi CPLP nia, iha kazu Timor-Leste nian, halo mós ponte ida ba merkadu sira hosi Ázia no Pasífiku.

Iha kontestu ne'e mós maka hala'o, entre loron 25 no 27 Fevereiru, Fórum Ekonómiku Globál dahuluk CPLP nian ne'ebé, tuir organizadór sira, rejista ona partisipante atus resin hosi nasaun 20 resin.

Enkontru hosi delegasaun ministeriál sira hahú loron 21 Fevereiru ho reuniaun ida hosi pontu fokál sira ne'ebé sei analiza grau implementasaun hosi deklarasaun Luanda nian no sei analiza projetu hosi Planu Estratéjiku hosi Koperasaun Multilaterál iha área komérsiu nian (2016-2018).

Iha loron-segunda, 22 Fevereiru, sei hala'o siklu ida konferénsia nian ne'ebé sei analiza, entre aspetu oioin, impaktu hosi krizi finanseiru no presu petróleu ne'ebé tuun iha nasaun sira CPLP nian.

Insentivu sira ba área privadu, adezaun ba Organizasaun Mundiál Komérsiu nian (OMC), relasaun entre CPLP ho Ázia no dezenvolvimentu ekonómiku iha Timor-Leste tama mós iha ajenda.

Enkontru loron 23 Fevereiru sei analiza komérsiu internu no aspetu sira hanesan sertifikasaun no laboratóriu sira hosi teste no dezenvolvimentu agronegósiu nian.

Ikusmai, iha loron 24 Fevereiru, sei hala'o sesaun solene, ne'ebé sei aprova Deklarasaun Díli nian.

Hahú loron 25 Fevereiru sei hala'o Fórum Ekonómiku Globál, ho tema "CPLP no Globalizasaun", ne'ebé hakarak hametin lasu sira entre empreza no emprezáriu luzófonu sira no estuda oportunidade sira investimentu no negósiu nian iha Timor-Leste.

Enkontru apoia hosi CPLP, hosi Konfederasaun Emprezariál CPLP nian (CE-CPLP) no hosi Uniaun Esportadór sira CPLP nian (UE-CPLP) no sei permiti promove Timor-Leste hanesan "plataforma ba dezenvolvimentu".

Iha ajenda hosi Fóruma tama área lima: indústria petrolífera, gás no estrativu; agrikultura no agroindústria; tasi no peska, indústria manufatureira; turizmu no infraestrutura sira.

Iha debate sei ko'alia kestaun sira hanesan knaar CPLP nian hanesan bloku multirejionál, knaar hosi bloku ekonómiku sira iha ekonomia globál no "dezafiu no oportunidade sira hosi insersaun CPLP nian" iha bloku ekonómiku rejionál sira.

Enkontru iha Díli aposta iha formatu promosaun produtu sira nian, serbisu no negósiu sira, hosi kontaktu entre empreza sira (B2B) no hosi aprezentasaun ambiente negósiu sira nian no investimentu sira iha nasaun partisipante sira. Inklui Hatudu ida ba Produtu sira hosi nasaun oioin, promosaun hosi empreza nasionál sira no komérsiu lokál sira no fatin ida hosi paínel internasionál sira hodi debate integrasaun ekonómiku entre nasaun sira CPLP nian no Ázia-Pasífiku no importánsia jeoestratéjiku hosi Timor-Leste.

Enkontru sei iha sala temátiku sira tuir nasaun ida-idak no sei iha fatin ba enkontru emprezariál sira, ne'ebé ajenda antes ona, ne'ebé sei iha perfíl ba empreza ida-idak no ba sira nia nesesidade ida-idak.

SAPO TL ho Lusa