MC ho Protokolu Importante

Diretór Grupu Karimbala, Ogy Osman Sesta (28/08/2015) hateten, Master Cerimony (MC) ho protokolu importante ba foinsa’e sira atu apriende.

“Ita hatene katak MC ho protokolu ne’e importante teb-tebes. MC no Protokolu ne’e maka sei serbi bainaka,” dehan Ogy iha serimónia enserramentu ba atividade formasaun MC no protokolu ba formandus na’in 39 iha Hotel Luz Clarita, Dili, foin lalais ne’e.

Formasaun ne’ebé hala’o ne’e ho nia tema”Hasa’e Kapasidade sai aprezentadór ka Protokolu ne’ebé durasaun fulan ida (1). Ogy mós hatutan, antes atu sai MC presiza buat barak ne’ebé maka hanorin, hanesan oinsá atu simu ema ho hamnasa no oinsá simu ema ho fuan no laran. “Ida ne’e maka presiza hatene. Ne’e hanesan faze primeiru (dasar),” haktuir Ogy ne’ebé hanesan mós kantór ida.

Nia dehan, karik governu sei ajuda nafatin, antaun sira mós hakarak ajuda nafatin juventude sira ne’ebé maka hakarak no iha interesse atu sai protokolu.

Entretantu, Dietór Jerál Sekretaria Estadu Polítika Formasaun Professionál no Empregu (SEPFOPE), Jacinto Barros Gusmão, informa ema barak uluk hakarak tuir formasaun ida ne’e.  Tuir nia katak Timor-Leste hasoru problema boot iha MC no protokolu.

“Protokolu intermus oinsá atu simu bainaka. Oinsá ko’alia iha oin. Ida ne’e ita problema boot. Ne’ebe, ita boot sira maka hetan oportunidade primeiru tuir formasaun ida ne’e,” Dehan ditetór ba formandu sira.

Nia tenik katak, problema barak ita hasoru liu-liu iha protokolu no MC. Tan ne’e, SEPFOPE haree pessoál balun ne’ebé durante ne’e sai MC no protokolu hanesan Anito Matos, Ogy Osman, Victor, Jeca no mós matebian Bung Lele atu kaderiza sira hodi fahe sira nia esperiénsia ne’ebé maka sira iha ba joven sira ne’ebé maka tuir mai.

Aleinde ne’e, partisipante Maria Castro Galhos haktuir, sé la’os hetan ajuda hosi SEPFOPE, sira mós la hamri’ik nu’udar MC no protokolu. “Ne’e tanba ajuda hosi SEPFOPE maka ohin loron ami hotu-hotu bele hatudu ami nia án katak ami mós bele hamriik iha oin hodi ko’alia,” dehan Maria iha serimónia ne’e.

Ba futuru, nia haklaken, esperiénsia ne’ebé sira hetan sei implementa no prátika iha kualker seremónia ruma ne’ebé maka iha hanesan iha uma, serbisu fatin (kantor) no fatin sel-seluk tan. (Mj4)

Matadalan

Partidu Bloku Unidade Popular Prepara Ambulánsia Gratuita ba Populasaun

Partidu Bloku Unidade Popular iha tempu badak sei prepara ambulánsia gratuita ba populasaun tomak iha Timor-Leste. Ambulánsia refere hola hosi BUP atu fó asisténsia médiku ba populasaun sira durante oras rua nulu resin haat (24) nia laran.

Asisténsia ida ne’e nu’udar asisténsia sosiál ne’ebé bazeiadu ba trilojia BUP katak Humanizmu, Solidariedade no Justisa Sosiál.

 Liu-hosi seremónia inagurasaun Sede Nasionál BUP iha Eis Merkadu Lama Díli, Sesta (18/09/2015), BUP hahú daudaun ona fó asisténsia sosiál ba kbiit laek sira no difisiente sira ne’ebé hamahon án iha organizasaun sira hanesan AGAPAE, Ahisaun no Madre Dominicana Bidau Mota-Klaran. Asisténsia sosiál hamutuk kareta Anguna tolu ne’ebé BUP oferese ne’e kona-ba nesesidade báziku.

Prezidenti BUP, Cecílio Caminha Freitas dehan, BUP fiar katak kualker forsa polítika labele mosu de’it iha periodu eleisaun hodi buka de’it votus. BUP ho fiar tomak katak asaun konkretas durante tinan tomak maka sai pontu importante ne’ebé sei kontribui no sauda prosesu demokratizasaun.

“BUP mai la’os atu tuir de’it eleisaun maibé BUP mai atu kontribui hadi’a povu nia moris liu-hosi asaun sosiál ba kbiit laek sira,” nia informa.

Nia deklara katak hahú agora ba oin, BUP hanesan opozisaun parlamentár ka partidu polítika ne’ebé iha liur atu bele kanaliza maluk sira nia aspirasaun para bele hatama iha orsamentu jerál estadu. BUP sei la hakruuk ba partidu polítiku ida maibé hamriik ho ain rasik.

Kona-ba inagurasaun Sede Nasionál, Cecílio hateten, inagurasaun sede nasionál BUP la’os eventu seremoniál de’it maibé seremónia ida ne’e hakarak espresa ba ema hotu katak sira hahú harii instituisaun polítika ne’ebé iha kondisaun bázika atu hamriik hanesan forsa polítika ida nune’e kanaliza sira nia aspirasaun ba órgaun soberania sira.

Nia esplika katak  kualker forsa polítika ida tenki iha fatin ka mahon polítika ida, tenki iha kondisaun para bele halibur ninia lideransa tomak, halibur ninia militantes, simpatizantes no sai mós espasu fíziku ba ema tomak atu bele hasoru malu ko’alia kona-ba problema emerjénsia.

“Dala barak ita hasoru malu la ko’alia ba malu tanba laiha kanais no mahon ne’ebé akomodativu, liu-liu laiha sistema polítiku demokrátiku atu bele funsiona ho di’ak atu kanaliza ideia ho di’ak to’o rohan. Prosesu demokratizasaun ne’ebé di’ak tenki kria kondisaun ba sidadaun  hotu-hotu atu hetan dalan para espresa sira nia hanoin,” tenki eis deputadu bankada CNRT periodu 2007-2012 ne’e.

Iha seremónia inagurasaun Sede Nasionál ne’e, prezidenti BUP mós fó tomada de posse ba estrutura BUP hosi suku 24 iha Díli laran (la inklui Ataúro). (Ekipa Kobertura)

Matadalan

EMA IDA LA HAKARAK KABEN HO KULPA

A culpa nasceu solteira, viveu solteira e morreu solteira, porque ninguém quis casar-se com ela - Laiha ema ida maka hakarak atu kaben ho kulpa, hotu-hotu buka atu fase liman hosi kulpa.

“Sim! Ne’e ho sé no hosi ne’ebé?”

“Ne’e ho Jornalista Matadalan Online hosi Timor.”

“Wow! Ha’u kontenti tebes konversa ho jornalista timoroan.”

Diálogu entre Eis Lider Pro-autonomia Francisco “Chico Lopez” Xavier Lopes da Cruz ho jornalista Matadalan Online iha leten ne’e, akonetese liu-hosi telefone iha Kuarta  (09/09/2015).

Lia na’in no kompozitór múzika “Ita Timoroan” ne’e, hori kle’ur ba kle’ur la rona nia lian hananu. Nia mantein iha ninia prinsípiu, mate ka moris hamutuk luta atu Timor-Leste integra ho Indonézia. Wainhira, iha konsulta populár (30 Agustu 1999) povu Timor-Leste hili ninia distinu rasik ba ukun arsik-án, nia basa hirus matan hodi dehan: Lakon povu maka lakon no manán povu maka manán.

 Ba nia, pro-independénsia eh pro-autonomia  laiha ona razaun atu hamrik mesa-mesak ida-idak nian, iha nia fatin. Maibé, hotu-hotu sei la’o ba hasoru malu-haksolok ho malu, atu nune’e bele hamutuk hodi harii Timor-Leste foun ida, independente, tuir povu nia hakarak.

Nia mós independente hodi hamriik iha nia ain nia leten hodi moris kahor ho ema Indonézia. Oras ne’e, nia  hela iha Tanah Kusir Jakarta (Indonézia). Iha rai badin ne’eba, nia hatan jornalista Matadalan (MTD) nia pedidu hodi halo entrevista eskluzivu kona-ba istória passadu—istória moruk kona-ba polítika hadau Timor Lorosa’e nia estatutu. Ba jornalista Matadalan, Chico Lopez hananu: Naran fatin ida ha’u hela ba,  iha mundu-rai klaran, ha’u sei hananu nafatin knananuk ida ne’e: “Ha’u nia abut iha Timor-Lorosae! Ha’u nia fuan iha Timor-Díli”.

MTD: Hanesan timoroan, oinsá Ita Boot nia haree ba polítika Rekonsiliasaun entre Timor-Leste ho Indonézia? Rekonsiliasaun ida ne’e fó impkatu pozitivu ou fó benefisiu ba timoroan sira iha Indonézia inklui ita boot ka lae?

Chico Lopez: Tuir ha’u haree, maske la  ko’alia kona-ba Rekonsiliasaun, Timor-Leste ho Indonézia sira nia relasaun ba malu, di’ak loos ona. Nune’e, hanesan konsekuénsia lójika,  iha mós ambiente konduzivu ida ba timoroan sira iha Timor-Leste, eh iha Indonézia laran, atu bele hasee fali malu hanesan maun ho alin -bin ho feton, hodi bele la’o ba mai hanesan iha umalaran ida de’it, maibé nasaun keta-ketak.

Ha’u sai hosi Timor-Leste iha 1982. Tinan tolu-nulu resin tolu (33) liu ona. Ha’u haksolok bainhira haree Timor-Leste ho Indonézia di’ak ba malu. Maibé, ha’u haksolok liu-liu  bainhira haree timoroan sira hotu, iha ita nia rai-laran eh iha Indonézia,  hamutuk fali ho malu. Estudantes timoroan barak maka mai eskola iha Universidades barak  Indonézia nian. Di’ak tebes!

MTD: Rekonsiliasaun entre povu baibain la’o tiha ona. Oinsá ho rekonsiliasaun entre líder pro-independénsia no pro-autonimia? Defaktu la’o di’ak ka lae?

Chico Lopez: Bainhira ha’u hetan malu ho Amu Papa, João Paulo II, oras ne’e Santu tiha ona, iha Vatikanu, tinan 1997, ha’u husu ba nia oinsá timoroan sira atu halo Rekonsiliasaun ho malu. Amu Papa hatan: Atu iha rekonsiliasaun loloos, tuir sarani nian, imi sei haka’as-an – ho fuan ho laran – atu respeita malu, simu malu, perdua malu, hadomi malu. Nune’e, rekonsiliasaun moris kedas hosi imi nia fuan laran.

Tuir ha’u nia hanoin, entre líder sira laiha obstákulu boot ida atu halo Rekonsiliasaun ho malu. Molok Referendum,  halo tiha ona inkontru Rekonsiliasaun London; halo tiha ona AIETD (All Inclusive East Timorese Dialog), ho mós inkontru DARE I ho DARE II, iha Jakarta,  iha ne’ebé Amu José Alexandre Gusmão- Xanana– (iha tempu ne’ebá sei dadur hela)  ho Amu Dr. José Ramos-Horta, Amu Bispu Don Basílio ho Amu Bispu  Don Carlos Filipe Ximenes Belo, mai hotu ba inkontru ne’e.

Halo liu tiha Referendum iha ne’ebé povu rasik maka  hili atu ukun-rasik-an– Independénsia, líder sira  pro-independénsia eh pro-autonomia  laiha ona razaun atu hamrik mesa-mesak ida-idak nian, iha nia fatin,  maibé hotu-hotu sei la’o ba hasoru malu-haksolok ho malu, atu nune’e bele hamutuk hodi harii Timor-Leste foun ida, independente,  tuir povu nia hakarak, fó sai iha Referendum, iha ne’ebé ita hotu tama ba klaran.

MTD: Hanesan timoroan, loron ida ita boot sei fila hikas ba Timor hodi hakmatek iha ne’ebá?

Chico Lopez: Hanesan timoroan ida, hadomi Timor-Lorosa’e ho fuan ho laran, iha naran fatin ida ha’u hela ba,  iha mundu-rai klaran, ha’u sei hananu nafatin knananuk ida ne’e: “ha’u nia abut iha Timor-Lorosae! Ha’u nia fuan iha Timor-Díli”.

Poeta Luís de Camões dehan: “A Pátria dos fortes é todo o mundo”. Ema aswain sira nia Rai-Inan, maka mundu tomak. Ha’u hadomi Timor-Lorosa’e, ne’eduni, la’os de’it ha’u lori Timor-Lorosa’e iha ha’u nia fuan-laran, maibé  ha’u husik hela mós ha’u nia fuan iha Timor Lorosa’e nia laran.  Timor-Leste hetan di’ak, ha’u nia laran  haksolok! Timor-Leste tama  ba susar-laran, ha’u nia laran todan. Ha’u ba hela iha Timor-Leste eh hela iha naran fatin ida iha mundu-raiklaran, hanesan de’it. Ha’u nia fuan ho nia domin ba Timor-Lorosae maka determina buat hotu.

MTD: Iha akuzasaun mosu bar-barak katak violasaun direitus umanus ne’ebé akontese iha Timor hahú tinan 1975 to’o Pós Referendum 1999 ne’e, Ita Boot sira maka responsabiliza. Lojikamente, kazu hirak ne’e responsabilidade individuál ka  instituisaun? Ita boot nia komentáriu?

Chico Lopez: Malae nia lian dehan katak, “a culpa nasceu solteira, viveu solteira e morreu solteira, porque ninguém quis casar-se com ela”. Laiha ema ida maka hakarak atu kaben ho kulpa. Hotu-hotu buka atu fase liman hosi kulpa. Iha konflitu iha ita nia rai laran, timoroan ho timoroan oho malu, tropas Indonézia ho timoroan oho malu, ne’e duni tuir ha’u nia hanoin, la os de’it individuál, maibé instituisaun mós tama ba klaran.

Indonézia oras ne’e demokrátika ona, ne’eduni bele serbisu hamutuk ho Timor-Leste hodi buka hatene Lialoos kona-ba ne’e, tanba laiha buat ida maka bele halo ita nia laran susar liu hanesan Lialoos, bainhira ita sala, maibé laiha mós buat ida maka bele halo ita nia laran kmaan liu mós hanesan Lialoos, bainhira ita la sala eh simu ita nia salan.

MTD: Ami rona dehan Ita Boot sira simu ona Kondekorasaun ho naran SEROJA hosi Estadu Indonézia tanba Ita Boot sira Pejuang Timor-Timur. Karik ne’e loos? Oinsá ho ita boot nia sentimentu ba kondekorasaun ne’e?

Chico Lopez: Loos tebes. Ema timoroan barak maka simu Kondekorasaun SEROJA. Ha’u la simu Kondekorasaun SEROJA ne’e, hanesan mós  kondekorasaun seluk tan  Indonézia nian. Tanbasá? Polítika barak tama ba klaran!  Ha’u serbisu de’it tuir ha’u bele, ba povu Timor nia di’ak, ho  fiar metin iha Nai Maromak ne’ebé hatene buat hotu maka ha’u halo, di’ak eh sala. Parabéns ba sira ne’ebé simu kondekorasaun!

MTD: Oinsá ho Ita Boot nia kondisaun moris durante ne’e iha Indonézia?

Chico Lopez: Ha’u sai hosi Timor iha tinan  1982, hodi mai hela iha Jakarta. Tinan hitu nia laran sirbisu iha Komité Olahraga Nasional Indonesia, la tama ba polítika. Iha tinan 1989 maka ha’u sai fali konseleiru Prezidenti Indonézia nian; iha tinan 1994 ha’u sai Embaixadór Itinerante; iha tinan 2000 to’o 2009, ha’u sai Embaixadór iha Grecia ho Portugal.

Governu maka fó uma ida ha’u hela ba, to’o loron ohin, liu ona tinan 33. Oras ne’e ha’u pensaun ona. Ha’u nia oan sira maka tulun ha’u ho ha’u nia espoza, fula-fulan, hodi fó mós kareta Kijang ida, ha’u rasik maka kaer. Lor-loron ha’u ba missa dadersan, tuku lima ho balun, atu bele hakbesik liu tan án ba Nai Maromak.

Ami hela besik Rate (simiteriu) Tanah Kusir. Belun sira husu ba ha’u, tanbasá maka la’o lemorai ona, hela nafatin iha Tanah Kusir? Ha’u hatán ba sira: Ha’u hela iha Tanah Kusir, atu bainhira ha’u mate, la hakole ema,  lori kaixaun la’o dook ba rate;  hakat liu de’it dalan, tama ona ba Tanah Kusir Abadi, rohan laek, mundu seluk. (Anibal)

Matadalan

Diretór hosi Polísia Sientífiku timoroan nian demitidu tanba "iregularidade maka'as"

Diretór Nasionál hosi Polísia Sientífiku Investigasaun Kriminál (PCIC) timoroan nian hasai tiha ona hosi nia kargu tanba "iregularidade maka'as", haktuir hosi despaxu ida nebe asina iha semana ne'e hosi xefe Governu, Rui Maria de Araújo.

Hasai ona Hermenegildo Gonçalves da Cruz hosi nia kargu nebe okupa de'it durante fulan ualu hafoin nia simu tiha pose, nebe akontese iha loron 30 fulan-Janeiru iha serimónia ida iha Díli nebe marka ona tomada pose hosi efetivu dahuluk sira PCIC nian.

Iha despaxu nebe publika iha loron-sesta ne'e Rui Araújo esplika katak desizaun ne'e foti hafoin rona tiha "opiniaun hosi Konsellu Superiór PCIC nebe hasoru malu iha loron 09 Setembru" no hanoin ba "iregularidade maka'as nebe akontese no afeta dezempeñu hosi diretór nasionál nian no funsionamentu normál hosi PCIC nian".

Iha despaxu hanesan, Rui Araújo nomeia majistardu timoroan Vicente Fernandes e Brites hodi sai nu'udar diretór nasionál PCIC foun ho mandatu ba tinan rua.

Majistradu kaer, temporáriu no to'o nomeia fali diretór adjuntu foun ba diresaun Departamentu Sentrál ba Investiagsaun Kriminál nian.

Despaxu ne'e la hatete motivu sira hodi hasai diretór PCIC nebe iha nia loron simu pose nian rona ona Xanana Gusmão, nebe iha tempu ne'ebá hanesan primeiru-ministru, apela ba efetivu foun sira hosi parte polísia ne'e, hodi bele kumpri sira nia knaar ho responsabilidade.

"Tanba ne'e ohin imi tenki jura hodi fó onra ba imi nia instituisaun. Respeita lei sira Repúblika nian no serve imi nia Konstituisaun no iha imi nia hahalok loron-loron labele haluha povu Timor-Leste nian", Xanana afirma iha loron fó pose nian.

Harii formal iha fulan-Maiu tinan liubá ho apoiu hosi koperasaun portugés, PCIC mosu hanesan parte aas ida hosi polísia kriminál ho rejimi kareira espesiál iha dependénsia orgániku hosi Ministériu Justisa nian.

Fó pose ba ajente dahuluk sira hakotu ona prosesu ida nebe hahú iha tinan 2009 iha relasaun ho akordu koperasaun bilaterál entre Ministériu Justisa hosi nasaun rua ne'e.

Programa, nebe finansiadu hosi Uniaun Europeiu iha ámbitu hosi Programa Apoiu ba Governasaun nebe implementa ho apoiu hosi Camões - Instituto da Cooperação e da Língua, no iha parseiru sira hanesan Polísia Judisiáriu Portugal nian no Ministériu Justisa Timor-Leste nian.

Ekipa sira nebe harii iha investigadór-xefe na'in 10 no investigadór kriminál na'in 37 nebe hafoin fulan hitu halo formasaun iha Eskola PJ nian iha Portugal kumpri ona estájiu ida fulan 24 nian iha Timor-Leste.

Forma mós espesialista superiór na'in rua no espesialista na'in 19 iha Laboratóriu Polísia Sientífiku hosi Polísia Judisiáriu, entre sira iha espesialista na'in 16 iha análize ba sena sira krimi nian (rekolla no tratamentu ba vestíjiu biolójiku no la'ós biolójiku, hanesan kazu lofoskopia nian, no hili impresaun dijitál sira) no iha tokxikolojia (fulan tolu ho balun).

Médiku timoroan na'in rua simu mós, durante tinan ida, formasaun espesializadu iha siénsia forense iha Institutu Medisina Legál iha Coimbra.

SAPO TL ho Lusa – foto EPA@ António Amaral

Eskola Portugeza Díli bainhira loke ano letivo ho alunu barak

Ano letivo ho númeru alunu barak, besik 850 - 90% maka timoroan sira – ne’ebé hahú ohin iha Eskola Portugeza Ruy Cinatti iha Díli, ho aprezentasaun hosi ekipa diretiva foun no hetan hikas ho dosente 64.

Sentru referénsia iha ensinu eskolár iha Timor-Leste no sai hanesan polo prinsipál hosi dinamizasaun ensinu portugés iha país, eskola ne’e selu hosi Orsamentu Estadu portugés no diresiona, maioritariamente ba alunus timoroan sira.

Aspetu ne’ebé ohin fó sai hosi Manuel Gonçalves de Jesus, embaixadór Portugal iha Díli, katak nia fó boas vindas ba inan-aman sira, alunu no profesór sira, hodi fó hanoin katak eskola portugeza "la’ós eskola internasionál", timoroan sira bele eskola hosi kualkér nível ekonómiku.

Fó hanoin katak ida ne’e, sai hanesan sentru eskolár boot ne’ebé finansia hosi país seluk iha Díli, kobra ba alunus sira propina mensal ho de’it dólar amerikanu 15, ki’ik tebes duke dolar 1.500 ne’ebé maka kobra ba eskola internasionál sira iha Díli.

"Sai hanesan eskola ida ne’ebé halo parte hosi rede ida ne’ebé for a hosi Portugal sai hanesan primeiru objetivu simu oan nasionál portugés nian iha Timor, dezde inísiu akolla fundamentalmente nasionál timoroan nian", dehan diplomata.

"Ida ne’e hanesan kontribuisaun ida ne’ebé  la’ós de’it buka fó ba hanorin iha Timor. Ami hanorin iha lia-portugés, ho kurríkulu ida ne’ebé adapta ba espesifisidade lokál. La’ós eskola internasionál ida, la halo parte hosi rede públika timoroan nian, maibé kontribui ba kualifikasaun labarik sira no joven sira iha Timor-Leste", subliña.

Maski ida ne’e eskola kontinua hasoru difikuldade balun hosi rekoñesimentu hamutuk ho autoridade timoroan sira ho finalist sira hosi 12.º ano tanba labele simu iha Universidade Nacional de Timor Lorosa'e.

Balun ba to’o duni maibé tenke desidi sai hosi eskola portugeza iha final 11.º hodi tama ba iha ensinu públiku timoroan iha 12.º hanfoin ne’e maka bele asesu fasilita ba UNTL.

Acácio de Brito, ne’ebé simu posse iha fulan-agostu hanesan diretór eskola foun, hatete katak los duni  iha tinan ida ne’e ano letivo sai primeiru ne’ebé hala’o hafoin ratifika no promulga tiha akordu bilaterál entre Portugal no Timor-Leste ne’ebé abranje hodi kria eskola, buat ida ne’ebé bele fasilita asesu finalist sira ba 12.º.

"Dezafiu seluk maka" esplika kona-ba nesesidade atu halo tan esforsu ida hodi hadi’a nota iha ezame nasionál sira, no serbisu hodi aumenta kapasidade eskola ne’ebé, tinan ida ne’e, sai hanesan turma foun ida hosi pré-eskolár.

SAPO TL ho Lusa

CPLP hakarak atu ema na’in 5.000 "halai kontra hamlaha" iha finál fulan novembru iha Lisboa

Komunidade Nasaun Lia-Portugés (CPLP) horisehik aprezenta, iha Lisboa, kontornu 2.ª edisaun korrida "Hamutuk Kontra Hamlaha", ne’ebé halibur malu iha lorokraik /kalan iha loron 28 novembru, partisipante besik na’in 5.000.

Anúnsiu ne’e halo hosi sekretáriu ezekutivu CPLP nian, diplomata mosambikanu Murade Murargy, ne’ebé destaka inisiativa "nobre" relutante parseria nian ho Organizasaun Nasoins Unidas ba Alimentasaun no Agrikultura (FAO) no Câmara de Lisboa, sidade iha ne’ebé sei hala’o korrida.

Ho prezensa embaixadór na’in "sia", Murargy pedi-lhes que hahú halo esforsu hodi repete inisiativa no kampaña iha nasaun hirak ne’e.

Korrida daruak - dahuluk hala’o iha novembru 2014 - iha versaun rua, ida kamiñada ho kilómetru lima no ida seluk halai ho kilómetru 10, hahú no termina iha Praça do Comércio, no ho objetivu atu bele hetan fundu ba projetu iha Nasaun Afrikanu ho Lia-Ofisiál Portugés (PALOP), hein CPLP konseger hetan euro besik rihun 35.

Iha primeira korrida, ne’ebé hala’o iha Cascais, arredór Lisboa, organizasaun ne’e hamutuk besik partisipante 3.000 no konsege halibur osan euro rihun 20, ho apoiu patrosinadór sira nian, permite avansa ho finansiamentu hosi projetu rua, ida iha illa São Vicente, iha Kabuverde, no ida seluk iha rejiaun Cacheu, litoral norte Guiné-Bisau.

Projetu iha Kabuverde, ne’ebé envolve Asosiasaun hosi Amigos Natureza, ne’ebé liga ba promosaun dezenvolvimentu agropekuária familiár sustentávelu Vale da Ribeira da Vinha.

Iha Guiné-Bisau, projetu ne’ebé lidera hosi organizasaun não governamentál Asaun ba Dezenvolvimentu (AD) no envolve feto ki’ik-oan agrikultor sira iha lokalidade São Domingos no Bigene.

Iha parte ida ne’e, ohin dehan diretór Kooperasaun CPLP, Manuel Lapão, dehan katak nia hein katak iha projetu oin mai sei apoia – liu dalan 12 – bele iha São Tomé e Príncipe, fatin ne’ebé  Asosiasaun HELPO elabora ona proposta ida ne’ebé liga ba nutrisaun no saúde eskolár.

Iha aprezentasaun, Rui Marques, responsável hosi Intotum, empreza organizadora, indika katak kamiñada, ho kilometru lima, sei hahú hosi Prasa Komérsiu, tuir fali hosi Rossio, Restaurador no Marquês hosi Pombal no fila hikas, hosi perkursu hanesan, ba lokál ne’ebé sai.

Korrida ne’e ho estensaun kilometru 10, perkorre ho perkursu hanesan hosi kamiñada, maibé sei sejere hosi Avenida 24 Jullu to’o ba Avenida Infante Santo, fatin ne’ebé sei fila hikas ba Prasa Komérsiu nian.

Iha sábadu haat liubá ba data korrida nian, ne’ebé sei hahú iha tuku 17:00, CPLP disponibiliza tékniku barak ba partisipante sira atu bele treina.

Tuir Manuel Lapão, inskrisaun ba korrida hahú horisehik, liuhosi portál ofisiál kampaña nian - http://juntoscontraafome.cplp.org - no inskrisaun 500 dahuluk sei benefisia deskontu inisiál, selu euro lima na kamiñada no ualu ba korrida.

Hafoin ne’e, presu sa’e ba euro hitu no 10, respetivamente, prevee katak, iha semana rua ikus ne’e, inskrisaun sa’e para euro sia no 12.

SAPO TL ho Lusa

Embaixada Portugal nian iha Díli hakarak fasilita prosesu votasaun iha lejislativu portugés nian

Embaixada Portugal nian iha Díli halo daudaun diálogu ho Ministériu Negósiu Estranjeiru sira portugés nian no ho diresaun hosi Koreiu sira Timor-Leste hodi fasilita prosesu votasaun iha lejislativu, nebe hetan susar tanba atrazu iha koreiu sira.

Paulo Maia Silva, enkaregadu konsulár esplika ona iha loron-sesta ne'e ba ajénsia Lusa katak atu hadi'a "atrazu naruk" nebe akontese bainhira haruka postál sira hosi Timor-Leste no ba Timor-Leste, nebe bele halo emigrante portugés sira nebe resensiadu iha nasaun ne'e bele haruka, ho tempu, nia boletin votu ba eleisaun lejislativu portugés sira nian iha loron 04 fulan-Outubru oinmai.

Portugés sira nebe resensiadu iha Timor-Leste bele vota diretu iha Embaixada iha eleisaun prezidensiál ka europeiu sira, no tenki vota liuhosi koreiu ba eleisaun lejislativu sira.

Iha kazu ne'e, boletin sira ba emigrante resensiadu sira iha Timor-Leste haruka ona iha semana ida liubá no seidauk to'o iha Díli, nune'e susar tebes hodi garanti katak, hafoin prenxe tiha, bele to'o iha Portugal ho tempu.

Tanba ne'e, esplika hosi Maia Silva, embaixadór Portugal nian iha Díli, Manuel Gonçalves de Jesus, hato'o ba Ministériu Negósiu Estranjeiru (MNE) katak boletin sira hosi emigrante sira bele haruka liuhosi mala diplomátiku ba Lisboa.

Desizaun ne'e depende ba Komisaun Nasionál Eleisaun sira nian (CNE), tanba, esplika hosi Paulo Maia Silva, proposta hanesan nebe halo hosi nia postu konsulár dahuluk, iha Kinshasa, iha tinan sanulu liubá, la simu hosi autoridade eleitorál portugés nian.

Nia fó hanoin katak iha kazu ne'e emigrante tenki sira hodi bele foti boletin votu nian, laiha garantia katak haruka boletin prenxidu ba Portugal sei kumpri prazu nebe previstu.

Iha situasaun diferente maka ema portugés sira nebe iha Timor-Leste, maibé mantén sira nia resensiamentu eleitorál iha Portugal, tenki kumpri rekizitu sira nebe hatete iha lejislasaun eleitorál portugés nian.

Sidadaun portugés sira iha situasaun ne'e bele vota iha Seksaun Konsulár Embaixada nian entre loron sira 22 no 24 fulan-Setembru (iha horáriu entre tuku 08:30-12:00 no entre 14:00-17:30).

Tuir lei, tenki vota militár sira, ajente militarizadu sira no ema sivil sira nebe halo parte iha operasaun sira dame nian, koperasaun tékniko-militár ka ekiparadu, médiku, enfermeiru sira no sidadaun sira seluk nebe halo parte iha misaun humanitáriu sira no investigadór sira no bolseiru sira iha instituisaun universitáriu sira ka ekiparadu sira.

Bele vota mós estudante sira nebe inskritu iha instituisaun sira ensinu nian ka frekuenta programa sira interkámbiu no "kaben-na'in ka ekiparadu, parente sira, nebe hela ho eleitór sira nebe mensionadu iha artigu anteriór".

Lei determina katak bele vota mós "sidadaun eleitór seluk nebe, tanba razaun profisionál sira, hela iha Timor-Leste entre loron 22 no 24 fulan-Setembru to'o loron eleisaun nian (04 fulan-Outubru)", no nune'e labele "ezerse nia direitu normál votu nian".

SAPO TL ho Lusa – foto EPA@ Paulo Novais

Alkatiri: Tempu Ona Revizaun Lei Pensaun Vitalisia

DILI - Eis Primeiru Ministru Atual Sekretariu Jeral Partidu Fretilin konsidera too ona tempu atu halo revizaun ba lei pensaun vitalisia, tamba pensaun nee halo ema balun sai baruk ten.

Tuir Mari katak Pensaun Vitalisia too ona tempu atu halo revizaun maibe depende ba Parlamentu Nasional, maibe oras nee pozisaun klaru sei hatama prospota atu halo revizaun ba lei pensaun Vitalisia.

Pesaun vitalisia too ona tempu atu halo Revizaun, hau nia pozisaun klaru tamba nee iha ona proposta atu halo revizaun, balun foin tinan 40 hetan ona pesaun vitallisia, sai baruk ten lakohi halo ona servisu,” dehan Mari liu husi sesaun husu no hatan, durante konferensia esplikasaun objetivu lutu Nasional Sesta (19/09/2015) iha Salaun Diplomata Miniteriu Negosiu Estranjeiru Pantai Kelapa.

Nia hatete pensaun vitalisia halo ema balun ho idade sei produtivu maibe hetan ona pensaun sai baruk ten lakohi halo servisu, tan nee tampu ona atu halo revizaun lei nee tenki klaru obrigatoridade ema hotu-hotu atu servi nasaun ida nee.

Iha fatin ketak Eis Prezidente Republika Jose Ramos Horta katak atu redus Pensaun vitalisia kompetensia Parlamentu Nasional nian, no mos governu bele halo rekomendasaun maibe buat neebe mak fo tiha ona la bele hasai. Informasaun kompletu iha STL Jornal no STL Web, edisaun Sabado (19/9/2015). Timotio Gusmao

Suara Timor Lorosae

Tenke Fo Apoiu Tomak Ba Estadu Hodi Negosiu Fronteira Marítima

DILI –Timor Leste ho Indonesia iha ona konkordansia atu halo negosiasaun fronteira maritime, maibe ho Australia oras nee seidauk iha resposta ida neebe mak positive.

Tuir Diretor Organijasaun Non Govermental FONTIL, Arsenio Pereira, ba STL iha salaun CNE Kinta (17/09) husu ba povu tomak atu fo apoiu masimu ba governu no estadu, hodi halo negosiasaun fronteira maritime liu-liu ho Australia.

Hanesan sidadaun Timor oan ida hau hanoin ita hotu tenke fo apoiu ba ita nia estadu no governu hodi halo negosiasaun feronteira maritime liu-liu ho Australia tanba ida nee parte soberania nomos future TL nian tanba nee ami husu ba povu tomak inklui sosiadade sivil, media institusaun hotu atu kontinua fo apoiu nafatin ba estadu TL,” hatete Arsenio.

Nia hatutan durante nee sosiadade sivil TL servisu hamutuk ho sosiadade sivil iha Australia oinsa Sosiadade Sivil iha Australia mos akuza sira nia estadu rasik, hodi defende soberania Timor Leste liu hosi linha fronteira maritima tanba asuntu ida nee importante tebes.

Iha fatin ketak tuir Peskizador Lao Hamutuk, Juvinal Dias, hatete tuir sira nia hare governu Australia laiha direitu ba tasi Timor, tanba hare tuir lei internasional rikusoin neebe mak iha tasi laran nee partensia governu TL nian. Informasaun kompletu iha STL Jornal no STL Web, edisaun Sabado (19/9/2015). Thomas Sanches

Suara Timor Lorosae

Lideransa Timor Oan Luta Defende Rikusoin TL iha Tasi

DILI - Lideransa Timor oan oras nee hamutuk hodi luta, liu husi dalan politika no diplomasia hodi defende rikusoin Timor Leste nian iha tasi laran, liu husi negosiasaun fronteira maritime entre Timor Leste, Australia no mos Indonesia.

Tuir Eis Primeiru Ministru atual Sekretariu Jeral Partidu Fretilin Mari Alkatiri hatete Governu foun Australia nee foin mak tama seidauk iha sinal katak politika muda ona ba situasaun negosiasaun fronteira maritma.

Hau rasik hola parte iha konsellu konsultivu ba Tasi Timor ninian, ami halo reuniaun dala rua ou tolu ona, Ami prepara aan atu nasaun no estadu tomak hamutuk atu luta ba direitu ita nian iha tasi timor,” dehan Mari ba Jornalista, Sesta (18/09/2015) iha Salaun Diplomata Ministeriu Negosiu Estranjeiru Pantai Kelapa.

Nia hatete uluk halo negosiasaun balun halo kritika maibe agora hotu-hotu hamutuk no fo forsa hamutuk hodi luta, maibe luta laos kaer kilat luta ho lei no politika buat sira nee hotu hodi defente Timor oan nia rikusoin iha tasi laran.

Hatan Kona ba Australia ulun tos hodi halo negosiasaun fronteira Maritima Alaktiri Hatete “ita ema moris nee ohin ulun tos Aban bele ulun Mamar, nunee ita kontinua luta nafatin, Hau ema ida nebe mak sempre optimista hau iha prosesu libertasaun to agora laiha optimista hau mate tiha ona,”.

Iha fatin ketak Diretor Organijasaun Non Govermental Luta Hamutuk, Mericio Akara, hatete Timor Leste kontinua esforsu an, maibe Australia kontinua ulun toos maka prosesu negosiasaun sei lori tempu. Informasaun kompletu iha STL Jornal no STL Web, edisaun Sabado (19/9/2015). Timotio Gusmao

Suara Timor Lorosae

Governu Presiza Esplika Klean Kontiudu Lutu Nasional

DILI - Sestu governu Konstitusional presiza Esplika klean Kontiudu Lutu nasional ba publiku, tamba oras nee povu barak seidauk komprende programa governu nian ba lutu nasional.

Tuir Eis Prezidente Republika Jose Ramos Horta katak governu presiza halo reflesaun no rona Sosiedade sivil sira nia hanoin, lutu nasional tamba halo festa derepende koalia lutu nasional tan nee governu tenki esplika didiak ba publiku.

Hau hanesan lider maibe hau nia funsaun iha estadu remata ona, maibe hau kontinua apoiu nafatin governu maske hau mos iha duvida kona ba dezlutu nasional,” dehan Horta liu husi enkontru entre Governu ho Sosiedade Sivil konaba Dezlutu Nasional, Sesta (18/09/2015) iha Salaun Diplomata Ministeriu Negosiu Estranjeiru Pantai Kelapa.

Horta hatete konsege simu karta husi Primeiru Ministru Rui Maria de Araujo kona ba inisiativa dezlutu, respostas hodi hatete simu maibe duvidas oituan no husu konsultasaun ho sosiedade sivil, igraza no partidu politiku sira.

Iha fatin hanesan Eis Primeiru Ministru Atual Sekretariu Zeral Partidu Fretilin Mari Alkatiri hatete Balun konfundi ho Dezlutu nee sai fali amnestia, haluha justisa no haluha herois maibe  laiha tamba dezlutu atu hametin no  orgoilu ba heroi sira hodi haburas sira nia memoria. Informasaun kompletu iha STL Jornal no STL Web, edisaun Sabado (19/9/2015). Timotio Gusmao

Suara Timor Lorosae

Sidadaun Estranjeiru 58 Deporta Ba Indonésia

DILI - Sidadaun Estranjeiru nain 58 neebe maka Forsa Naval kaptura iha Metinaro, iha loron 28 Agostu liu ba, intrega ba PNTL atu halo prosesu, no sidadaun sira nee deporta ona ba Indonesia iha loron 17/09/2015 ho kondisaun diak no akompania hosi Polisia Maritima, intrega iha Nasaun vijinho.

Tuir Komandante Polisia Maritima Superentidente Lino Saldanha katak, sidadaun estranjeiru nain 58 neebe maka foin dadauk tama illegal mai batas TL, PNTL deporta ona ba sira nia knaar fatin, tamba tuir prosesu neebe maka iha, sira nee laos intrese maka atu tama mai TL, maibe sira tamba tasi bot maka balu tama fali mai iha baras TL.

Ami simu  karta hosi Tribunal atu haruka fila sidadaun sira nee, tamba nee maka horseik parte Indonesia nian, ba hamotuk ho sidadaun sira nee ita mos akompania hosi Atapupu Indonesia, hodi lori fila ema nain 58 nee ba sira nia fatin, no ita labele tahan ema nee kleur iha Timor tamba hare ba relasaun rai rua nee metin tebes, tan nee ita nia ema sira mos dala ruma tama ba ema nia area, maibe ema atende ho diak, tan nee maka ita mos halo atendementu diak ba nasaun bijinho nia ema sira nee,” dehan Lino ba Jornalista sira, Sesta (18/09/2015) iha Kuartel Jeral PNTL Caicoli, Dili.

Nia informa liu tan katak, TL tenke halo atendementu diak ba sidadaun sira nee atu nunee loron ruma Timor oan sira keta tama sala ba ema nia rai no ema kaer karik bele halo atendementu diak hanesan mos TL halo ona ba sira.

Iha fatin hanesan Komandante Servisu Investigasaun Kriminal (SIK) Superintendente Rodgerio Lay informa, sidadaun Estranjeiru nain 58 nee servisu Investigasaun Kriminal Intrega ona ba iha Ministeriu publiku. Informasaun kompletu iha STL Jornal no STL Web, edisaun Sabado (19/9/2015). Madalena Horta

Suara Timor Lorosae