HANOIN HIKAS PADRE LEÃO DA COSTA

Dom Carlos Filipe Ximenes Belo – Jornal Nacional, opiniaun

Hau rona daudaun notísia triste tebes hosi Timor. Katak Padre Leão da Costa, uluk há’u nia colaborador diak ida, mate iha loron 9 fulah jullu ne’e. Uluk knana’in hau hato’o sentidos pêsames ba Familia tomak iha Nítibe/Oe-Cusse/ Díli; hau hato’o mos sentidas condolências ba Diocese Dili no Clero diocesano.

Padre Leão amo lulik ida hosi rai doben Oe-Cusse: nia moris iha Lefi-Mano, Postu Administrativu Nítibe, iha loron 28 fulan maio tinan 1936. Nia aman naran Lázaro Sequeira, nia inan naran Cecília Sequeira. Labarik Leão sarani iha loron 25 fulan abril tinan 1946; padre José Calisto Guterres mak sarani. Padre ne’e, ema hosi Macau, no nia isin hakoi iha Artaúro.

Leão da Costa tama eskola iha Oe-Cusse (1946-1951); tuir mai, nia aman haruka nia ba eskola iha Dili, iha Missão Salesiana, Lahane (1951-1953); eskola mos iha Colégio Soibada (1953), no remata iha Pré-Seminariu, Dare (1954). Tanba nia hakarak sai amo lulik, foin sa’e Leão da Costa kontinua nia estudu iha Seminário de Nossa Senhora de Fátima, iha Dare, hahú tinan 1954 to’o tinan1958. Tuir mai, amo Bispo Dom Jaime Garcia Goulart haruka nia ba estuda Filosofia iha Seminário de São José, iha Macau. Remata tiha kursu filosfiku, nia kontinua kursu Teolojia nian, hopdi remata iha tinan 1966.I ha loron 25 abril 19966, nia simu Ordens menores. Iha fulan jullu 1966, na fila ba Timor. Iha Dili, nia simu ordenasaun hanesan Diákono no Amo lulik. Diákono Leão da Costa simu ordensaun sacerdotal iha Pro-Katedral Motael, iha loron 25 setembru 1996. Nia halo niania “Missa Nova”, iha Oe-Cusse. Iha loron kmanek ida ne’ebá, ami seminaristas sira hosi Dare mos tuir; ami halo viajem ba Pante Maksar ho ró-ahi Arbiru.

Padre Leão hala’o knaar oin oin iha Diocese Díli: Sai Director ba Externato de José no Prefeito Disciplina iha Colégio “Bispo Medeiros” iha Lahane (1966-1967); Vigário Cooperador, iha Missaun Maliana, no sai Prefeito Disciplina, iha Colégio “Infante de Sagres” (1967-1970); Encarregado ba Missaun Oe-Cusse (1970-1971).

Iha tinan 1971, amo Bispo Dom José Joaquim Ribeiro haruka nian ba estuda iha Roma, iha Universidade Gregoriana. Hasai tiha Licenciatura iha Teologia Dogmática,  padre Dr. Leão da Costa fila fali ba Timo, hodi kaer knar Director Externato nian iha Lahane, no ikus mai, tanba invasaun indonésia iha Balide. Serbisu seluk ne’ébé nia hala’o: Sai Presdiente DELSOS (1977); Presidente CARITAS/DELSOS Diocese Dili nian (1990-1995); Pároko Motael nian (1993-2000); Ecónomo/Procurador Diocese Dili nian (1990-1999); Secretário Eskola Katólika ka “Ketua Yayasan Santo Paulus” (tinan 2000).

Iha Estrutura Governo Diocese Dili nian, Padre Dr. Leão mos sai membru Conselho Presbiteral; Colégio dos Cosultores; membru Comissão Litúrgica. Hamutuk ho maluk, amo lulik diosezanu sira, nia harii organizasuan ida naran “UNANIMA”. Padre Dr. Leão da Costa, iha kualidade boot, hensan múziku; de facto, nia muzika mesak kapaz deit, ho “gaia” ka estilu Timor Loro Sa’e. Nia ema ida ke la ko’ali barak; serbisu makaas hodi eduka foin sa’é timor oan barak.

Diocese Díli no sarani Timor-Leste lakon bibi-atan diak ida. Ita harohan ba Na’i Maromak atu fó prémiu murak/osan-mean ba nia atan diak ida ne’e iha Lalehan.

Ami, ho aten berani, husu ba Autoridade Zona Económica Especial Oe-Cusse no Chefe Postu Administrativu Nítibe, bele karik, governu fo naran Padre Dr. Leão da Costa ba liurón ida iha niania rai, rai doben Nítibe.

Porto, 9 de julho de 2016

Dom Carlos Filipe Ximenes Belo

Parlamentu timoroan aplaude no kongratula Portugál

Parlamentu Nasionál timoroan aplauda iha ohin ba vitória Portugál  nian iha Kampeonatu Futeból Europeia 2016 nian, rekorda katak konkista ne’e hetan selebrasaun ho festa boot  iha dalan sira Timor-Leste nian.

"Hodi ha’u nia naran no Parlamentu hakarak hato’o  parabéns ba Estadu no povu portugés tamba selesaun nasionál maka sai vensedór ba kampeonatu Europeu", hato’o   prezidente parlamentu timoroan, Adérito Hugo da Costa.

"Povu Timor-Leste selebra ona vitória ne’e ho festa boot iha Díli no  restu nasaun nian. “ Muito Parabéns", nia afirma, iha arranke sesaun plenária ohin loron, hamosu basa liman hosi  deputadu no  públiku sira.

Adérito Hugo da Costa loke iha ohin ho ida ne’e ho debate no votasaun ba jeneralidade orsamentu retifikativu 2016, ne’ebé prevé iha aumentu ba despeza besik dólar millaun 391.

Debate ne’e hala’o ho prezensa maioria parte Governu nian, inklui primeiru-ministru, Rui Maria de Araújo, no ministru Planeamentu, Xanana Gusmão.

Xanana Gusmão hanesan moos ema ida iha  madrugada no dader  segunda-feira hamutuk halo  karavana ho  bandeira Portugál no Timor-Leste ne’ebé  perkorre iha dalan kapitál timor nian ho festeju oras barak ba konkista kampeonatu europeu hosi selesaun  futeból portugeza.

Iha ona petisaun ida ne’ebé sirkula atu husu delegasaun hosi selesaun portugeza vensedór futeból europeu nian mai Timor-Leste, nasaun ida ne’ebé moos selebra liu vitória ne’e.

SAPO TL ho Lusa

Alunu sira hosi eskola portugeza Dili halibur osan hodi bá vizita CERN hafoin prémiu

Eskola Portugueza Ruy Cinatti, iha Díli, hahú ona ho projetu angariasaun fundu, atu nune’e grupu alunu timor-oan ho portugés-oan sira ne’ebé manan prémiu hosi kompetisaun CERN, bele bá vizita sentru investigasaun europeu, tinan oin. 

Team Lorosae, forma hosi alunu neen, ekipa ida hosi 29 entre eskola 151 hosi nasaun 37 ne’ebé sei simu “louvur bot” iha edisaun hosi konkursu sinetífika Beamline, tinan ne’e nian ne’ebé promove hosi Centro Europeu de Física de Partículas (CERN).

Ekipa ne’ebé forma hosi portugés-oan, Carolina Viegas ho Tomás Inácio nomós timor-oan Amélia Luís, Elizabeth Cruz, Maria Cláudia Rodrigues no Maria José Sarmento, aprezenta ona proposta ida hodi uza feixe hodi halo terpéutiku, ba iha konkursu CERN nian.

Apelu ne’ebé fó sai iha semana ne’e, sei buka osan to’o besik dolár 13.200 (euros 11.900) atu nune’e grupu hosi alunu hirak ne’e bele bá Suisa, fulan abril tinan oin, hodi hatene klean liu tan kona-ba projetu investigasaun ne’ebé bot liu iha Europa.

"Alunu hosi Team Lorosae hakarak atu tebes atu vizita laboratóriu Fízika ne’ebé bot liu iha mundu no hakarak hetan oportunidade hodi esklarese aspetu oioin kona-ba sira-ninia proposta a", esplika karta apelu nian ida ne’ebé haruka ba ajénsia Lusa.

"Sira maka sei sai hanesan alunu timor-oan dahuluk ne’ebé rekoñese internasionalemente méritu sientífika kona-ba sira-ninia serbisu eskolár liu hosi instituisaun referénsia mundiál ba iha área Fízika hanesan CERN", hakerek profesora Ana Paula Silveiro, ne’ebé kordena projetu projetu hosi estudante sira ne’e nomós Acácio de Brito, diretór eskola.

Tanba ne’e maka, "ida ne’e sei sai hanesan justisa bot ida ba alunu sira hodi kontinua serbisu ne’ebé sira halo ona, konkretiza sira-ninia dezeju hodi bá vizita área esperimentál T9 nune’e mos hatene klean liu tan kona-ba serbisu ne’ebé CERN halo", haktuir iha testu.

"Rekoñesimentu ne’e hanesan investimentu ida ba futuru ema ida nian nomós parte profesionál hosi joven timor-oan sira ne’e nomós ba Timor-Leste ninia futuru ne’ebé presija estímulu iha área sientífika ba jerasaun foun sira.

Alénde ne’e, alunu hirak ne’e mos sei sai nu’udar ezemplu ba sira-ninia kolega iha eskola Timor-Leste laran tomak", dehan tan iha karta. Apelu ne’e hodi buka osan alénde ba iha ‘jéneru’ sira hanesan billete aviaun nomós alojamentu ba viajen, iha fulan abril 2017.

SAPO TL ho Lusa 

PM defende estratéjia investimentu ba iha infraestrutura bázika

Diversifikasaun hosi ekonomia timor-oan nian depende ba estratéjia hodi hametin infraesturura bázika, rekursu umanu nomós kompetitividade hosi ekonomia nasionál, ne’ebé ezizi barak liu ba iha investimentu públiku, tuir primeiru ministru Rui Maria de Araújo defende ohin. 

“Atu konkretiza esforsu transformasaun nomós diversifikasaun ekonomia nasionál ne’e, Timor-Leste presija atu investe nafatin ba iha infraestrutura bázika nomós ba iha kapitál umanu” dehan Rui Maria de Araújo.

Xefe Governu ne’ebé ko’alia durante diskursu abertura hosi debate orsamentu retifikativu ba tinan 2016, ho valór ne’ebé aprezenta hosi ezekutivu hamutuk dolár milloens 391, dehan katak Estadu tenke kontinua halo investimentu hodi hametin kapasidade nasionál.

Reforsu adisionál ida, ne’ebé hakarak foti osan barak hosi Fundu Petrolífera (FP) – bot liu Rendimentu Sustentável Estimadu (RSE) -, maibé hakarak hetan “barak liu fali” ba nasaun, maka tenke kria kondisaun di’ak hodi dada investimentu privadu.

Rui Araújo rdehan hikas katak investimentu públiku "buka balansu entre gastu ho retornu", hatene risku ne’ebé mosu ona hosi “fallansu, gasta osan arbiru no korupsaun”, hanesan buat ne’ebé xefe Governu hakarak atu minimiza.

Xefe Governu esplika katak pedidu retifikasaun orsamentál ho valór dolár milloens 390,7, maka ida ne’e sei lato’o ba tinan ne’e, tanba gastu barak liu fali, latuir envelope fiskál no iha dívida ne’ebé maka ezekutivu hakarak atu selu hotu (lunas).

Rui Araújo, dehan hosi aspetu hirak ne’ebé falla, tanba alterasaun hosi jestaun finanseira, inklui faktu katak Fundu Infraestrutura sai autónomu iha tinan ne’e, tanba permiti seleridade mka’as ba iha pagamentu.

"Ita presija montante adisionál hodi bele halo pagamentu no fó garantia ba empreza hirak ne’ebé ho orsamentu utioan atu kontinua hala’o nafatin obra ho kualidade, tuir prazu ne’ebé haktuir iha kontratu", dehan.

Pedidu adisionál hosi orsamentu ne’e, hodi aloka mos ba iha projetu bobot seluk. Fatia bot hosi gastu adisionál iha Orsamentu Estadu, aloka ba iha projetu infraestrutura tolu, Porto Tibar, Baze Fornesimentu Suai ho Projetu Hadia Infraestrutura Eskoamentu Dili.

Iha ninia diskursu, Rui Araújo haktuir hikas kona-ba dadus orsamentu balun ba tinan 2016, no insisti katak maski levantamentu adisionál hosi FP, maibé gastu ba oras ne’e daudaun hela ho rendimentu sustentável.

Ho konkretu nia dehan katak gastu hosi "mákina Estadu" ba tinan ne’e nian bele to’o dolár milloens 453,86 (hosi totál 29%), menus hosi RSE ne’ebé iha tinan ne’e ho dolár milloens 544,8, no ne’ebé sai mos hanesan reseita la’os petrolífera hamutuk milloens 171,4.

Ka FP petrolífera ba tinan ne’e, selu de’it ho dolár milloens 282,5 hosi despeza ne’ebé sai.

SAPO TL ho Lusa – Foto: gabineteprimeiruministru

PADRE LEÃO DA COSTA HAKOTU IIS

Amu Bispu Diocese Baucau Dom Basílio do Nascimento informa katak, Pe. Leão da Costa nia iis kotu iha sala ICU  Hospital Nasional Guido Valadares (HNGV), Sábadu (9/7)  tuku 10:40, dader (OTL), tamba  hetan  atakasaun  tensaun.

Dom Basílio esplika katak, Pe. Leão atakasaun tensaun derepenti iha  Sesta feira kalan no konsege lori kedas ba iha sala ICU-HNGV.

Bispu dehan, Uma  Kreda  haksolok, tamba na’in 3 sai Amu- lulik, maibé iha Pe. Leão da Costa ne’ebé  nu’udar  jerasaun  tuan  mós Maromak bolu hodi fila ba Aman Maromak nia  Kadunan  Santo.

“Ha’u hanoin katak, ida uma kreda nian ne’e mak ne’eduni  balun  tempu  atu  moris  no  mate  nune’e  mós  tempu  atu  sai  amu lulik  no  tempu  amu lulik  sira  mate  no  tempu  atu  hamlaha  no  tempu  atu  kabun de’it  ba  oin,”esplika Dom  Basílio do Nascimento ba sarani sira iha selebrasaun misa ordenasaun Sacerdotal Carmelitas iha Igreja Katedral, Sábadu (9/7/16).

Tantu oras ne’e, Pe. Leão  da  Costa nia isin mate iha Câmara  Exleciastica Lecidere no ohin (11/7) sei  halo  nia  misa  ikus  iha  igreja  Katedral,  molok  atu  lori  ba  iha  nia  fatin  ikus.

Iha  fatin  hanesan  bispu  Diocese Dili  Dom  Virgílio  do  Carmo  da  Silva dehan, Timor  lakon  nia  ema  ida, maske  sarani  Katólika  Timor  Leste  (TL) kontente  hodi  simu  amu  lulik  foun.

“Ita  kontente, tamba ita  simu  amu-lulik  foun, maibé  ita  mós  lakon ida  iha  ita  nia  leet,”tenik Dom Virgílio.tos

Jornal Nacional

Adjuntu Komisariu KAK Jose Neves Rezigna Aan

DILI - Adjuntu Komisariu Komisaun Anti Korupsaun (KAK) Jose Neves aprezenta Karta rezignasaun hodi fo tempu ba ema seluk halao servisu, tamba prepara atu kandidatu Aan ba Prezidente Republika tinan 2017.

Tuir Adjuntu Komisariu KAK Jose Neves katak, rajaun rezigna-Aan nudar komisariu KAK tamba servisu iha KAK tinan 6 resin, nunee fo fatin ba ema seluk hodi halo fali servisu.

Ofisialmente hau la servisu ona, maibe sei presiza publikasaun husi Jornal Republika ba hau nia rezignasaun nunee bele sai offisalmente,” dehan Jose ba STL, Segunda (11/07/2016) iha Salaun Sekretariu Estadu Joventude Desportu, Lecidere.

Nia hatete oras nee hatama ona karta rezignasaun nunee iha Jullu nia laran la halao ona knar hanesan adjuntu komisariu, maibe sei halo servisu voluntariu hodi hein entrega kargu no servisu ba adjuntu foun.

Hau rezina Aan tamba servisu tinan 6 ona nunee fo fatin ba ema seluk no mos hau atu kandidata Aan ba prezident republika iha 2017 nudar kandidatu indepente,” dehan Jose.

Hatan kona karik iha dez-entementu ho komisariu KAK Aderito Timan, Jose hatete servisu too tempu ida tenki para, nunee fo fali tempu ba ema seluk.

Iha fatin hanesan Komisariu KAK, Aderito Tilman hatete nia parte rekoinese simu ona karta pedidu rezignasaun husi Adjuntu komisariu KAK Jose neves no aseita pedidu rezignasaun. Informasaun kompletu iha STL Jornal no STL Web, edisaun Tersa (12/7/2016). Timotio Gusmao

Suara Timor Lorosae

Funsionariu Publiku Tenki Servi Povu hanesan Liurai

DILI - Funsionariu Publiku neebe servisu iha institusaun estadu tenki halao servisu hodi servisu povu hanesan liurai, nunee funsionariu nudar servidor tenki hatene aan.

Tuir Prezidente Komisaun Funsaun Publiku Faustinho Cardoso katak atu komemora loron nasional funsaun publiku, atu valoriza funsionariu publiku sira iha bens servisu hodi atende povu.

Funsionariu Publiku laos halo Aan hanesan liurai, ema neebe liurai mak povu, tan nee funsionariu nudar servidor tenki hatene nia aan nudar servidor,” dehan Faustinho ba Jornalista, Segunda (11/07/2016) iha Edifisiu Sekretariu Estadu Joventude Desportu, Lecidere.

Nia hatete funsaun publiku buka meus nunee funsionariu sira bele servi povu ho diak, Profesional no domin hodi bele alkansa objetivu estadu nian mak moris diak povu nian, tamba povu mak nain no liurai ba estadu.

Iha fatin katek Deputadu Bankada CNRT Agustinho Lay hatete funsionariu publiku nudar makina estadu, balun komesa halo servisu diak, maibe iha balun tenki hadia no kapasita sira iha prosesu atendementu nian. Informasaun kompletu iha STL Jornal no STL Web, edisaun Tersa (12/7/2016). Timotio Gusmão

Suara Timor Lorosae

Babo: “Eleisaun Suku Seidauk Klaru”

DILI - Too oras nee segundu alterasaun lei numeru 6/2009 konaba lei eleisaun autoridade komunitaria, Prezidente Republika (PR) seidauk halo promulgasaun, tan nee eleisaun Autoridade Komunitariu seidauk klaru.

Deklarasaun nee fo sai husi Ministru ESTATAL, Dionisio Babo ba jornalista sira wainhira remata partisipa atividade konsolidasaun partidu CNRT nian ho tema hametin no haburas Organizasaun Mulher Partidu (OMP) iha baze hodi simu no hakuak simpatizante partidu CNRT, iha Beto-Dili, Sabado (09/07/2016).

Se Prezidente da Republika lori tempu naruk ita tenke deskute fila fali, bele halo iha tinan ida nee, bele halo ka lae, depende ba nai ulun sira liu-liu governu ho Parlamentu no Prezidente da Republika” dehan Babo.

Nia haktuir, tuir estandar eleisaun suku, halo iha Outobru, maibe presiza haree lai nia prosesu. Tanba atu halo eleisaun Xefe Suku tenke tuir lei labele halo arbiru deit. Nia sublina, baze legal konaba eleisaun suku seidauk iha, tan nee Ministru STATAL sei labele fo sai uluk konaba montante alokasaun orsamentu ba eleisaun autoridade komunitariu.

Iha fatin ketak, Observador Politika-UNTL, Camilio Ximenes Almeida konsidera, durante nee Governu no orgaun eleitoral hanesan Comição Nacional Eleição no Secretariado Tecnico Administração Eleitoral (STAE) seidauk bele publika data eleisaun Xefe Suku nian. Informasaun kompletu iha STL Jornal no STL Web, edisaun Tersa (12/7/2016). Raimundo S. Fraga

Suara Timor Lorosae

Regulamentu Lafo Dalan Funsionariu Sai Asesor

DILI - Komisaun Funsaun Publika (KFP) nudar instituisaun Governu neebe hodi haree ba servisu ajente estadu iha nasaun ida. Hahu Timor Leste hetan ukun rasik-an too agora asesor nasional no internasional hamutuk 200 resin.

Tuir Ministru Administrasaun Estatal, Dionisio Babo katak, konaba funsionariu mak sai fali asesor nee, KFP mak bele koalia. Maibe tuir lolos funsionariu labele sai fali asesor tanba rejimentu lafo dalan.

Tuir lolos funsionariu labele sai fali asesor tanba rejimentu lafo dalan,” dehan Ministru Administrasaun Estatal, Dionisio Babo ba jornalista wainhira partisipa atividade konsolidasaun partidu CNRT ho tema hametin no haburas Organizasaun Mulher Partidu (OMP) iha baze hodi simu no hakuak simpatizante partidu CNRT, iha Beto-Dili, Sabado (09/07/2016).

Iha fatin ketak, Prezidente KFP Faustinho Cardoso hatete, oras nee Timor rejistu asesor Internasional no nasional hamutuk 200 resin ne’ebe maka serbisu iha instituisaun Estadu sira.

Faustinho Cardoso dehan, Se ema nee ses aan ona husi funsionariu publiku, prosesu atu tama hikas ba   iha funsaun publika tenki liu husi prosesu normal, katak tenki liu husi rekrutamentu karik ida ne’e iha depois nia kuandu eskollidu nia pasa iha prosesu ne’e maka foin maka intera fali ba iha funsaun publiku. Informasaun kompletu iha STL Jornal no STL Web, edisaun Tersa (12/7/2016). Raimundo S. Fraga

Suara Timor Lorosae

TL Sei Presiza Nafatin Asesor Internasional

DILI - Nasaun Timor Leste foin ukun aan tinan 14, tanba nee sei presiza nafatin asesor Internasional sira hodi halao servisu iha rai laran.

Deputadu bankada Fretilin Leonel Lisboa Marcal afirma, Timor Leste foin ukun aan tinan 14 seidauk bele halo buat ida, tanba nee sei presiza duni asesor Internasional hodi bele advise ou hanorin ema Timor oan neebe maka servisu iha Governu.

Ita nia nasaun nee foin ukun aan iha fase ida ikus liu ona, entaun Ita nia asesor Nasional sira nee sei dampingi husi asesor Internasional para bele hola esperensia husi sira, hodi bele halao servisu,” dehan deputadu Leonel ba STL, iha PN, Dili, Segunda (11/07/2016).

Nia dehan, laos Timor deit maka presiza asesor Internasional, iha nasaun barak nebe ukun aan kleur ona, maibe sira presiza nafatin asesor husi nasaun seluk ba sai asesor sira nia rai. Tanba nee Timor Leste foin ukun 14, labele hasai asesor Internasional sira hotu.

Iha fatin hanesan membru PN husi bankada PD, Virgilio Hornai afirma, se asesor Internasional neebe iha Ministeiru bar-barak, mais agora Ministeiru hirak nee mos sira nia nesesidade iha.

Entertantu deputadu husi bankada CNRT Arao Noe dehan, iha mundu nee asesor ema presiza nafatin, mesmu Amerika riku no matenek barak ona, tinan naruk ukun aan, mais asesor sira presiza nafatin. Informasaun kompletu iha STL Jornal no STL Web, edisaun Tersa (12/7/2016). Carme Ximenes

Suara Timor Lorosae

Asaltu Uma Arguidu Fo Sala Karau-Belak 1 Ba Ancelmo

DILI - Atu hamorin fali lezadu Ancelmo Suriano Exposto nia naran, para prosesu nee labele ba oin, lezadu husu arguidu nain 8 atu fo sala karau no belak mean ba nia, nunee nia sei dada fali kazu nee husi tribunal.

Liu husi sala audensia tribunal deklara, tanba krime nee ho natureza semi publiku lei fo dalan ba tribunal atu halo konsolidasaun ba parte rua. Sekarik lezadu prontu atu perdua no dada hikas fali kazu nee no husu indimizasaun ruma. Sekarik arguidu konkorda tribunal sei halo dezistensia keisa.

Hatan ba kestaun nee lezadu deklara, nia prontu atu dada hikas fali kazu nee no perdua arguidu sira, maibe arguidu sira tenke fo indimizasaun ba nia hanesan karau ida ho belak mean ida. Nunee arguidu sira mos konkorda, maibe fo tempu ba sira loron 10 hodi halo akordu ho lezadu.

Tuir akuzasaun husi Ministeriu Publiku katak, iha loron 21 Jullu 2014, tuku 17h00 lezadu Ancelmo Suriano Exposto ho sarani sira halo servisu iha kapela, maibe ema ladun barak nunee sarani ida husu ba lezadu tanba saida mak ema mai halo servisu iha kapela nee la barak, entaun lezadu responde dehan, ema hotu J2 no arguidu Sidonio rona no diskute malu ho nunee lezadu Ancelmo tanba temi grupu J2.

Iha loron 23 fulan Jullu 2014, tuku 12h00, arguidu Manekas Amor buka tuir Antonio  Martins, Sidonio Martins, Osorio Martins, Laurentino Soares, Zacarias dos Reis, Cipriano Martins no Felix Exposto sira ba iha lezadu Ancelmo nia uma tolok, ameasa ho tuda lezadu nia uma. Iha momentu nee arguidu Sidonio tuda lezadu Jose Valerio maibe la kona no kontinua ameasa atu hasai lezadu nia kakorok. Informasaun kompletu iha STL Jornal no STL Web, edisaun Tersa (12/7/2016). Gracilda Oliveira/Domingas Gomes

Suara Timor Lorosae