Xanana Gusmão sei lidera negosiasaun entre Austrália no Indonézia kona-ba fronteira

Ministru timoroan Xanana Gusmão sei  lidera ekipa hosi nasaun ba halo negosiasaun iha tratadu definisaun fronteira marítima permanente ho Austrália no Indonézia, haktuir Governu.

Desizaun ne’e foti hafoin   reuniaun kuarta-feira ne’e iha Konsellu Ministru, tuir  esplikasaun hosi ezekutivu iha komunikadu.

Hanesan"negosiadór prinsipál", Xanana Gusmão - eis-primeiru-ministru no eis-xefe Estadu no atuál ministru ba  Planeamentu no Investimentu Estratéjiku – maka  "responsável iha definisaun estratéjia negosiasaun iha Konsellu ba  Delimitasaun Definitiva iha  Fronteira Marítima".

Hosi kauza negosiasaun separada ho Indonézia no ho Austrália bele konklui definisaun fronteira marítima ho Timor-Leste.

Ho  Indonézia foin  konklui deit definisaun fronteira terrestre nian, prosesu ne’ebé kuaze atu termina ona, falta  deit pontu iha liña balun ne’ebé hafahe  iha klaran illa Timor nian.

Ba kazu hanesan fronteira marítima, iha tensaun liu maka ho Austrália, Díli mantein pozisaun ba defeza liña meridiana entre Timor-Leste no kontinente australianu.

Aspetu ne’e esensiál bazeia ba  prinsípiu, ne’ebé hatur ona iha  Lei Mar nian, parte boot liu hosi  rekursu petrolíferu no  gás naturál ne’ebé  agora iha  zona konjunta esplorasaun  nian iha tasi timoroan nian.

Iha agora ida ne’e sai kampaña boot  hosi apoiante Timor-Leste nian iha  Austrália   akuza Kamberra tamba lakohi halo negosiasaun, ba rekursu sira ne’ebé legalmente pretense ba timoroan nian.

Nasaun rua ne’e agora dadaun envolve iha prosesu arbitrajem tamba Timor-Leste kestiona legalidade hosi tratadu ne’ebé maka agora  vigora no, sustenta hela, negosiasaun labaele kontinua tamba  iha momentu ne’ebá Austrália halo espionajen iha Díli.

Asuntu ne’e  sai polémiku tebes tamba foin dadauk ne’e  Governu australianu lakohi fó fila passaporte hosi eis-espiaun ne’ebé maka atu sai sasin iha Tribunál Arbitrál iha Haia kona-ba sistema espionajen ne’ebé , hala’o hosi Kamberra, instala iha Palácio do Governu Timor-Leste nian iha 2004.

Espiaun australianu sira  lidera hosi sasin ne’e( koñesidu deit hanesan "testemuña K") aproveita  obra ba  rekonstrusaun iha eskritóriu Governu timoroan nian iha Díli, ne’ebé oferese hanesan kooperasaun umanitária Austrália nian, hodi  instala ekipamentu espionajen nian iha 2014.

Díli aprezenta keixa ba Tribunal Arbitral iha Haia, argumenta katak , tamba asaun hosi Governu australianu nian ne’e , tratadu ne’e ilegál.

Iha  prosesu ne’e, testemuñu "K"  konsideradu esensiál, maibé ema ne’e hetan  impedimentu atu sai hosi Austrália dezde 2012, bainhira  ajente ASIO nian (serviços secretos australianos) halo asaltu ida ba nia uma,no hadau dokumentu sira hotu, inklui nia passaporte.

Iha  inísiu fulan dezembru 2013, ajente sira ASIO nian moos halo asaltu ba iha  eskritóriu advogadu Timor-Leste nian Bernard Collaery, iha Kamberra, no hadau hotu  dokumentu sira ne’ebé pertense ba  Governu timoroan nian.

Iha  materiál sira inkluí  "detalle kona-ba  atividade espionajen hosi parte  Austrália nian ne’ebé iha  relasaun ho Timor-Leste, durante negosiasaun ba  Tratadu kona-ba Determinados Ajustes Marítimos iha tasi Timor (DAMMT)", haktuir  Governu timoroan.

SAPO TL ho Lusa 

Ministru Justisa timoroan nian destaka apoiu portugés ba Kámara Konta nasaun nian

Ministru Justisa timoroan nian destaka ona, iha loron-sesta ne'e, importánsia hosi apoiu Portugal nian ba justisa iha Timor-Leste, liuliu iha kriasaun ba Kámara Konta nian, importante hodi tulun hametin "kultura rigór nian iha jestaun rekursu públiku sira nian".

Kámara Konta hanesan entidade ida "fundamentál hodi hadi'a nafatin konfiansa iha asesu hosi ema sira, hosi ajente ekonómiku sira no hosi entidade públiku no privadu sira iha serbisu públiku timoroan nian", Ivo Valente hatete.

"Ami fiar katak hanesan hakat importante sira iha kontrolu no transparénsia hosi konta públiku sira", nia hatete no hatutan katak "esforsu, relasionadu ho projetu boot sira, eziji hosi atór sosiál sira empeñu maka'as, ho knaar pedagójiku forte, evita nune'e sala sira iha dezeñu no implementasaun hosi orsamentu sira".

Ba ministru, rekoñesimentu hosi Kámara Konta sira la reflete de'it iha nia atividade sira fiskalizasaun nian, maibé iha impaktu ne'ebé akontese iha entidade públiku sira seluk, ne'ebé evidensia "aumenta vontade hodi hametin koñesimentu kona-bá auditoria no fiskalizasaun hosi konta públiku sira nian".

Ivo Valente ko'alia iha semináriu ida kona-bá papel hosi kontrolu finanseiru hosi Kámara Konta, ne'ebé halo ona atividade durante tinan tolu. Entidade ne'e harii ona no dezenvolve hosi programa justisa nian hosi programa governasaun Uniaun Europeia nian ne'ebé halao hosi koperasaun delegadu iha Portugal liuhosi Institutu Camões.

Semináriu konklui ona siklu ida hosi formasaun auditór sira Kámara Konta nian no hosi entidade timoroan sira nian dominadu ho tema sira hosi auditoria operasionál no obra públiku sira nian no hosi fiskalizasaun préviu no hetan apoiu hosi konjénere sira hosi Portugal, Brazil ho Cabo Verde.

Manuel Gonçalves de Jesus, embaixadór Portugal nian iha Díli, subliña ona katak kontributu hosi programa justisa nian, iha tinan haat ikus ne'e, hanesan importante hodi harii no operasionalizasaun hosi Kámara Konta nian, "hodi zela ba responsabilizasaun finanseiru hosi konta públiku nian".

Nia hatete katak Kámara Konta ohin funsiona di'ak, halo ona nia knaar iha modalidade sira ba kontrolu finanseiru ne'ebé previstu iha lei, inklui fiskalizasaun ba ministériu oioin, ba orsamentu sira no ba projetu sira.

Partisipasaun hosi auditór no inspetór sira iha formasaun tékniku oioin ne'ebé akontese halo elementu sira hosi Kámara Konta "sai preparadu di'ak tebes" hodi hatán ba dezafiu sira ne'ebé aumenta, liuliu "tanba pezu hosi projetu boot sira investimentu nian iha Orsamentu Estadu nian iha tinan hirak tuirmai".

"Ne'e husu ba Kámara Konta ho nia auditór sira preparasaun ezijente ida, fó kapasidade ba sira hodi hala'o no kaer funsaun importante kontrolu nian", nia afirma no renova fali apoiu hosi Portugal iha área ne'e.

Sylvie Tabesse, embaixadora hosi UE nian iha Díli, destaka ona susesu ne'ebé hetan iha programa ne'ebé implementa ho apoiu hosi Portugal, hodi fó hanoin katak iha nasaun ruma Kámara Konta sira "hanesan instituisaun ne'ebé iha hodi hadi'a prestasaun serbisu sira ba administrasaun nian".

Nia hatete katak ohin loron efeitu pozitivu sira apoiu nian ne'ebé fó ba kapasitasaun hosi auditór timoroan sira hatudu ona iha papel fiskalizasaun nian ne'ebé akontese iha fulan hirak ikus ne'e.

Tanba ne'e, nia konsidera hanesan importante atu kontinua apoia área ne'e, mantén opsaun ne'ebé hala'o daudaun ba espesialista sira hosi serbisu públiku hosi nasaun sira seluk ne'ebé lori sira nia esperiénsia ba Timor-Leste.

Maria Natércia Gusmão, juíza konselleiru hosi Tribunál Rekursu, hodi substitui prezidente, auzente hosi Timor-Leste tanba motivu saúde nian, destaka ona importánsia "vitál" hosi Kámara Konta hodi garanti legalidade hosi gastu públiku nian.

Nia hatete katak instituisaun serve sidadaun sira no Estadu direitu garanti aplikasaun legál no responsável hosi rekursu públiku sira no hametin prosesu konstrusaun Estadu nian.

SAPO TL ho Lusa

Kámara Konta timoroan nian tenki konsidera sirkunstánsia sira hosi konstrusaun Estadu nian - ministru

Kámara Konta Timor-Leste nian tenki kumpri lei maibé labele ignora "sirkunstánsia sira" hosi konsolidasaun no konstrusaun Estadu nian, defende ona ministru timoroan ida iha loron-sesta ne'e.

"Governu senti satisfeitu tebes ho forma serbisu hosi Kámara Konta nian. Labele iha limitasaun sira iha momentu hala'o knaar nian maibé tenki hanoin ba kontestu, situasaun no sirkunstánsia atuál sira hosi konstrusaun Estadu nian", afirma hosi Dionísio Babo, ministru Estadu no Administrasaun Estatál no Kordenadór ba Asuntu sira Administrasaun Estadu no Justisa nian, ba Lusa.

Ba ministru, hanesan importante tebes atu sira nia interpretasaun sira halo "la'ós konsidera de'it ba aspetu legál maibé mós ba kestaun sira seluk ne'ebé kondisiona atuasaun hosi Estadu agora daudaun".

"Tuir Governu nia haree, dezenvolvimentu nasaun nian tenki kontinua no Kámara Konta nia knaar hanesan importante tebes iha aspetu ne'e. Supervizaun la'ós de'it préviu maibé bele mós hanesan simultáneu no susesivu", nia afirma ona.

"Iha faze dahuluk, no ha'u ko'alia ba faze dahuluk projetu sira nian, tenki hanoin sirkunstánsia sira. Ami hatene katak tenki respeita lei no norma sira maibé di'ak mós atu konsidera mós situasaun anteriór sira no momentu ne'ebé halo parte iha konstrusaun Estadu nian", nia hatete.

Babo ko'alia bainhira hakotu semináriu ida kona-bá knaar hosi Kámara Konta, ne'ebé halo ona atividade tinan tolu nia laran, ne'ebé iha nia kriasaun no dezenvolvimentu apoia hosi programa justisa nian hosi programa governasaun Uniaun Europeia nian ne'ebé halao hosi koperasaun delegadu iha Portugal liuhosi Institutu Camões.

"Ami empeñadu hodi observa prinsípiu governasaun di'ak no hanesan ezijénsia ida ne'ebé instituisaun superiór sira kontrolu nian tenki iha atensaun ba realidade, hodi dezenvolve kompeténsia sira hodi hatán di'ak ba dezafiu foun sira ne'ebé mosu, liuliu iha kampu preventivu", nia afirma ona iha nia intervensaun iha semináriu.

Maski prestasaun konta sira, rasionalizasaun hosi eskolla públiku no fiskalizasaun sai hanesan objetu sentrál sira ba serbisu Kámara Konta nian, sistema "tenki adekuadu ba realidade jeográfiku no kulturál" no atuál hodi "komplementa no rasional", nia afirma.

Membru sira hosi Governu hatudu laran la haksolok ho Kámara Konta, hodi konsidera katak avalia projetu sira, kontratu sira no desizaun sira ne'ebé foti iha pasadu hosi ezekutivu ho hanoin hosi lejislasaun foun sira ka posteriór hosi desizaun sira ne'e.

Laran la haksolok ne'e mosu relasionadu ho desizaun hosi Kámara Konta nian hodi la fó vistu antes ba kontratu boot liu nasaun nian, ho folin dolár millaun 720, asina ho súl-koreanu Hyundai Engineering & Construction, ba dezeñu no konstrusaun hosi Baze Apoiu iha Suai, projetu ne'ebé koñesidu ho naran Tasi Mane no konsidera hanesan importante na atividade sira esplorasaun mina nian iha Tasi Timór.

Governu aprezenta ona iha loron 11 Novembru rekursu ida ba Tribunál Rekursu maibé prosesu sei iha impase tanba instituisaun ne'e laiha juís sufisiente hodi bele konsidera.

Iha fulan-Novembru nia rohan, primeiru-ministru Rui Maria de Araújo hatete ba Lusa katak bainhira Tribunál Rekursu sei kleur hodi hatán no la kumpri prazu sira, Governu iha direitu hodi foti "desizaun polítiku sira".

"Lei hatete katak bainhira la kumpri prazu sira ne'e hatudu katak aprovasaun silensiozu. Ami nia preferénsia maka tuir dalan legál sira maibé laiha ida, no tanba ami iha faze konstrusaun Estadu nian, sei iha desizaun sira hosi órgaun polítiku sira", hatete hosi Rui Maria de Araújo.

Fonte sira hosi ezekutivu admiti ona katak ne'e bele halo atu Governu, alega ba interese nasional iha projetu, avansa ho kontratu ho desizaun ida hosi Konsellu Ministru sira nian.

Dionísio Babo, bainhira Lusa husu kona-bá posibilidade ne'e, hatete katak Governu hakarak hein desizaun hosi Rekursu no nia la avansa ho pormenór seluk.

SAPO TL ho Lusa

Rai-nakdoko iha Taiwan hamonu edifísiu 4

Pelumenus ema na’in 30 hetan tulun hafoin edifísiu haat monu iha Tainan, sidade iha Taiwan parte súl, ne’ebé doko hosi rai-nakdoko ohin ho magnitude 6,4, iha inísiu loron sábadu iha nasaun ne’ebá. 

Imajen sira iha televizaun no iha rede sosiál sira hatudu edifísiu ida ho andár hitu hali’is no responsável sira informa katak hala’o hela operasaun resgate iha edifísiu rua, maibé to’o oras ne’e la iha informasaun sai kona-ba vítima mortál.

"Edifísiu haat monu iha área sidade Tainan. Hala’o hela operasaun buka no salvamentu no La iha notísia kona-ba vítima sira", tenik portavós Ajénsia Nasionál Bombeiru nian, Lin Kuan-cheng ba ajénsia notisioza AFP.

Rai-nakdoko ne’e akontese iha profundidade kilómetru 10, besik tuku 20:00, loron-sesta iha Lisboa, iha kolómetru 39 ba nordeste Kaohsiung, sidade boot daruak iha illa ne’ebé iha portu importante ida.

Fofoun fó sai katak rai-nakdoko ne’e ho magnitude grau 6,7 iha eskala Richter, maibé autoridade sira korrije ba 6,4.

Taiwan besik iha plaka tektónika rua no akontese beibeik rai-nakdoko iha ne’ebá.
Iha fulan-juñu 2013, rai-nakdoko ho magnitude 6,3 akontese iha sentru illa nian no hamate ema na’in haaat no rai-halai jeneralizadu.

Iha setembru 1999 rai-nakdoko ho magnitude 7,6 hamate ema besik 2.400.

SAPO TL ho Lusa

Ekonomia Indonézia nian sa’e iha tinan 2015 ho ritmu ne’ebé neineik liu iha tinan neen ikus ne’e

Ekonomia Indonézia nian sa’e ho ritmu ne’ebé neineik liu iha tinan neen ikus ne’e iha tinan 2015 tanba nia esportasaun ba merkadu-xave sira hanesan Xina tun, haktuir dadus ofisiál mak fó sai horisehik.

Maiór ekonomia Sudeste Aziátiku nian iha tinan kotuk mak 4,79%, kresimentu ne’ebé ki’ik liu 5% ba dala uluk horikedas 2009, iha pontu aas liu hosi krize finanseira globál.

Maibé, aumentu uitoan iha trimestre ikus tinan kotuk nian boot liu ida ne’ebé prevee ona, no aumenta espetativa relasiona ho kresimentu ekonomia iha tinan 2016.

SAPO TL ho Lusa

Timor-Leste apoia konferénsia rekonsiliasaun iha Giné-Bisau ho euro rihun 225

Ohin Timor-Leste entrega donativu ho euro rihun 225 ba Giné-Bisau hodi nasaun ne’e organiza enkontru nasionál rekonsiliasaun nian, ne’ebé seidauk hatene loos bainhira, maibé iha ona komisaun organizadora ida mak simu pose horikedas fulan-maiu 2015.

"Ami hakarak tebes partisipa, kontribui ba rekonsiliasaun rai ne’e nian ne’ebé hanesan, timoroan, ami gosta tebes", refere Alberto Carlos, diretór Ajénsia Koperasaun Timor-Leste nian iha Giné-Bisau.

Dirijente ne’e ko’alia ohin iha serimónia entrega donativu nian mak hala’o iha sala komisaun organizadora ba enkontru rekonsiliasaun nian, iha edifísiu Assembleia Nacional Popular (ANP), iha Bisau.

"Futuru no moris-di’ak povu ne’e nian iha nia sidadaun sira-nia liman, ami fó apoiu de’it", nia hatutan.

Valór ne’ebé entrega ohin korresponde ho metade hosi fundu ne’ebé Timor-Leste promete iha meza doadór sira-nian ba Giné-Bisau mak realiza iha Bruxelas, iha fulan-marsu 2015.

Padre Domingos da Fonseca, ne’ebé prezide komisaun ho ema 32 mak sei servisu hodi prepara Konferénsia Nasionál, hahi importánsia hosi donativu ne’e.

"Ami sei realiza konferénsia ne’e atu Giné-Bisau tuir dalan rekonsiliasaun indispensável nian", nia hatutan.

Ajénsia Koperasaun Timor-Leste nian hari’i horikedas nasaun ne’e apoia hodi realiza eleisaun jerál gineense iha 2014.

Komisaun hodi organiza konferénsia rekonsiliasaun nian hari’i iha 2010, maibé nia servisu interrompe tanba golpe Estadu 2012, hodi retoma hikas iha 2015, maibé ho figura foun sira.

Entre sira ne’e iha akadémiku sira, dirijente sira hosi organizasaun sosiedade sivíl, deputadu sira, militár no jurista sira.

SAPO TL ho Lusa

SERVEZA ILEGÁL KONTENTOR 5 TAMA TL

Serveza ilegál ho naran crocodile beer kontentór lima (5) tama ona iha Timor Leste (TL) liu husi portu Dili, desde fulan Dezembru 2015, maibé infelizmente laiha kompañia ida mak responsabiliza.

Estrainu liu tan servisu alfándega mós la identifika no la hatene kompañia ne’ebé mak esporta serveza ne’e mai iha rai laran.

Serveza kontentór lima ne’e ema hotu lahatene tuir ninia destinasaun, entaun oras ne’e dadaun asegura ka rai hela iha armajen Bairo Pite Dili, hodi hein prosesu identifikasaun ba na’in ba serveza ne’e.

Diretur Nasionál Operasaun Alfândega, Julião Ximenes rekoñese katak, serveza Crocodile kontentor lima ne’e, tama iha portu Dili iha fulan Dezembru liu ba no halo ona inspesaun.

“Halo inspesaun duni iha Portu, depois lori hotu ba iha ne’ebá, mas nia tama ona iha sistema asikuda, sira hatama kontiner lima ne’e, hira mak sira selu, otomatikamente, sistema ne’e ko’a ona,” informa Julião Ximenes ba Jornalista sira iha nia kna’ar fatin Colmera Dili, Kinta (04/02).

Alénde ne’e, Xefi Departamentu Comfornidade, Lourenco Carvalho mós informa katak, kompañia ne’e hatama sira nia aplikasaun iha fulan Dezembru kedas atu halo armajen serveza ne’e.

“Maibé nia kondisaun ne’e, tenke tuir ho ita nia lei ne’ebé vigora tiha ona, sé nia kondisaun la favoravel, ami la fó autorizasaun,” informa Lourenco.

Maibé Lourenco dehan, sira labele fó informasaun detaillu kona-ba serveza ne’e, tanba seida’uk hetan autorizasaun husi Diretur Jerál Alfândega.

Alénde ne’e, Komandante Jeral Polisia Nasionál Timor Leste (PNTL), Komisáriu Júlio Hornay mós hateten katak, informasaun ne’e, PNTL hetan tiha ona no agora dada’uk polisia koko atu halo atuasaun.

“Kualker saida de’it mak tama iha Timor latuir lei ne’ebé mak iha ita atua. Ita hotu koopera malu ba informasaun ne’ebé mak lós,” dehan Júlio Hornay.

Júlio Hornay hatutan tan katak, komunidade balun mak hatudu iregularidade ka sasan ilegál ruma tama TL, tenke fó informasaun lalais ba polisia hodi polisia bele halo atuasaun.

Husi sorin seluk, ekipa Ministériu Komersiu no Industria halo kedas inspesaun ba iha armajen Xiñeza iha Hudi Laran hodi identifika serveza crocodilu ne’e.

Iha prosesu inspesaun ne’e ekipa MCIA mós identifika katak, serveza crocodilu, oras ne’e dadaun espailla ona iha komunidade nia leet, no fa’an ona iha loja ida iha Fatuhada.

Ekipa inspesaun mós identifika katak, iha serveza crocodilu ne’e, hakerek lian ingles hateten katak, produsaun serveza ne’e hetan ona autorizasaun husi Ministériu Komersiu no Industria.cos

Jornal Nacional

Atetude Soe Foer Arbiru, Hasoru Inundasaun

DILI - Atetude Sidadaun sira neebe mak hela iha kapital Dili seo foer arbiru la tau iha lixu fo impaktu bee susar buka dalan, nunee hamosu inundasaun iha fatin Barak sidade Dili inkliu mos valeta neebe kiik susar akumula bee ho volume boot.

Tuir Vice Prezidente Parlamentu Nasional Adriano Nacimento katak bazea ba estudu neebe mak peskizador balun halo kapital Dili hanesan tasu, tan nee sira fo alternativa atu kapital Dili muda fila fali tamba nee hamosu inundasaun.

Estudu neebe mak matenek nain balun hare Dili hanesan tasu, tan nee udan mai Caicoli no Aitarak laran sempre hamosu Inundasaun, ita nia tasi Aas liu rai maran, tan nee bee susar atu tama tasi laran, ho ita nia atetude neebe sei foer arbiru,” dehan Adriano ba STL, Sesta (05/02/2015) iha Parlamentu Nasional.

Nia hatete kestaun neebe mak iha natureza maibe bele hare teknolojia hodi bele rejolve, no mos tenki iha dezenu ida hodi nunee udan been bele liu tamba udan boot halo bee barak tasi tahan tamba tasi Aas liu rai maran.

Nunee mos deputadu Manuel Castro hatete udan iha Kapital Dili halo Inundasaun, tamba drainazen neebe maka kompainia sira halo klot liu, ho nunee halo bee atu liu ladiak, maske koalia dala barak too baruk. Informasaun kompletu iha STL Jornal no STL Web, edisaun Sabado (6/2/2016). Timotio Gusmao

Suara Timor Lorosae

PN Menus Fiskaliza Teknika Projetu Infrastrutura

DILI - reprezentante Povu iha uma fukun Parlamentu Nasional (PN) fiskalizasaun teknika ba Implementasaun Projetu neebe mak lao iha Timor Leste menus, tamba Fiskalizasaun durante nee maioria fiskaliza Politika.

Tuir Deputadu Bankada Partidu Demokratiku Virgilio Hornai katak kualidade projetu konstrusaun obras neebe mak lao no mos BOQ neebe mak lao Parlamentu fiskaliza entermus tekinu Parlamentu nian fiskalizasaun la toba iha neeba.

Fiskalizasaun teknika hau hanoin Parlamentu mos ladun too ba iha neba, agora halo fiskalizasaun politika deit hodi hare liu tan nee Parlamentu tenki iha kapasidade atu halo fiskalizasaun teknika ba kualidade Obra sira neebe mak lao ho dezeinu no BOQ,” dehan Virgilio ba STL, Sesta (05/02/2016) iha Parlamentu Nasional.

Nia hatete problema mak governu tau osan ba konstrukasaun obra liu-liu konstrukasaun Estrada no valeta maibe iha terenu supervizaun teknika husi Ministeriu sira mak la iha, tamba atu halo sertifikasaun ba kompaina ida nia projetu hotu hodi pagamentu tenki hare kualidade projetu.

Iha fatin hanesan Deputadu Leonel Marcal katak implemta projetu iha Kapital Dili sempre sai problema boot, liu-liu inundasaun neebe mak akontese iha Dili laran, maske iha rehabilitasaun ba drainazen mos Estrada halo rehabilitasaun maibe laiha rejultadu. Informasaun kompletu iha STL Jornal no STL Web, edisaun Sabado (6/2/2016). Timotio Gusmao

Suara Timor Lorosae

Setor Privadu Iha Munisipiu Sei Infrenta Problema

DILI - Setor privadu iha Munisipiu Manufahi sei infrenta problema barak maka hanesan, esprensia servisu atu kaer prozetu ruma no difikuldade ida maka finanseru.

Tuir Prezidente Camra Comersiu Industria Munisipiu Manufahi Abilio Cepeda katak, problema neebe maka setor privadu Munisipiu Manufahi enfrenta maka Kapasidade setor privadu sira nia atu kaer obra ruma nomos finanseru, tan nee CCI hanesan mahon ba Setor privadu sira, husu atu halo kordenasaun ho Ministeriu relevante sira.

Ami nia problema sira nee informa ona ba iha CCI, oinsa atu halo kordenasaun ho Ministeriu sira hodi tulun netik ami nia presiza sira nee, tamba durante nee ami setor privadu neebe iha Munisipu hotu-hotu infrenta problema boot iha baje, no ami nia membru CCI iha munispiu nee mos presiza kapasitasaun, atu nunee halo obra ruma karik ho kualidade, tan nee presiza finanseru hodi halo kapasitasaun,” informa Abilio, ba STL Sesta (05/02/2016) iha nia knar fatin CCI Akait.

Nia informa, setor privadu iha Manufahi nee barak tebes balun iha area konstrusaun, Koperativa no balun iha negosiu kiik, maibe sira nia atvidade atu lao diak maka presiza kapasitasaun no finanseru, no oinsa parte CCI soporta sira atu halo atividade hirak nee ho diak, no agora setor privadu iha Munispiu Manufahi sei hare liu ba pekenas imprezas.

Iha fatin hanesan Vise Presidenti CCI-TL Lautem Raimundo da Costa hatutan, problema kapasidade no Finanseru laos Munispiu Manufahi deit maka mesak infrenta, maibe kuaze munisipiu hotu-hotu hasoru hotu problema ida nee. Informasaun kompletu iha STL Jornal no STL Web, edisaun Sabado (6/2/2016). Madalena Horta

Suara Timor Lorosae

Oknum PNTL Defama Komite 12 Novembru Milisi, Eladio: MI Presiza Investiga

DILI - Ministeriu Interior presiza halo investigasaun ba oknum Polisia Nasional Timor Leste (PNTL), neebe mak defama komite 12 Novembru ho lia fuan milisia.

Membru Parlamentu Nasional husi bankada FRETILIN, Eladio Faculto husu Ministeiru Interior atu halo investigasaun ba oknum PNTL neebe mak halo deklarasaun, hodi hatete Komite 12 Novembru milisia.

Hau husu atu halo investigasaun ba oknum ida neebe mak halo deklarasaun ida hanesan nee, kuandu nia dehan milisia nia tenke hatudu faktus, se-se mak milisia iha Komite 12 Novembru,” dehan deputadu Eladio ba STL, iha PN, Dili, Sesta (05/02/2016).

Nia hatete, lalori asuwain sira nee ohin loron PNTL latau farda hanesan nee, tau farda nee atu respeita ba ema nia kontribuisaun, se iha invididu balu mak lakona malu nee problema particular, mais labele mensiona too bolu milisia.

Iha parte seluk Presidente comite 12 Novembru Grigoriu Saldanha iha Kompreza empreza hatete, Komite 12 Novembru la simu liafuan Milisia neebe insulta husi oknum policia, tamba liafuan nee hanesan mos uluk POLRI no TNI sira nia Kilat musan no tudik kroat sona Resistensia sira hotu nian fuan.

Nia hatete, PNTL maka hatudu exemplu ida nee liu husi lia fuan hirak neebe insulta malu, hatudu exemplu neebe maka ladiak no bele hamonu kredibilidade PNTL no povo larespetu ba instituisaun refere. Informasaun kompletu iha STL Jornal no STL Web, edisaun Sabado (6/2/2016). Carme Ximenes

Suara Timor Lorosae

MNE Hernani Sei Aranka ba Guinne Bissau

DILI - Ministru Negosiu Estranjeiru Hernani Coelho, iha loron 10 fulan nee sei aranka ba Guinne Bissau, hodi halao enkontru iha neeba.

Hau mai hato ba Presidente Republika Taur Matan Ruak katak,hau atu aranka ba Guene Bissau iha dia 10 fulan nee,hodi halo enkontru iha neeba,tamba ita hanesan responsabilidade kaer Presidente rotativas CPLP ninian,”dehan MNE Hernani ba jornalista sira hafoin remata enkontru ho PR Taur Matan Ruak, iha Palaciu PR Nicolau Lobato, Dili, Kinta (04/01/2016).

Nia hatete, iha rezulusaun servisu Estadu sira neebe mak iha pontu ida neebe mak preve mos katak TL presiza halo akompaniamentu situasaun iha Guine Bissau.

MNE Hernani hatete, aviaun ba Guinne Bissau susar, semana ida dala 2, hein katak sira to iha neeba loron 10 hodi prepara ba halo enkontru ho Primeiru Ministru, Presidente Republika, Xefe Maior Aramadas, Presidente Parlamentu ho lider politika sira nebe maka principal iha neeba.

Iha parte seluk membru Parlamentu Nasional husi bankada CNRT, Cristovao Barros hatete, Timor Leste neebe lidera CPLP, agora atu entrega fali ba Brasil, tamba nee liu husi sorumutu, oinsa para deside hodi fo fila fali Brasil atu hare fali servisu neebe durante nee Timor Leste lidera ida neebe maka hetan progresu. Informasaun kompletu iha STL Jornal no STL Web, edisaun Sabado (6/2/2016). Carme Ximenes

Suara Timor Lorosae