Longuinhos: Labele Jeneraliza Problema

DILI, (ANTIL) – Ministru Interior, Longuinhos Monteiro husu ba públiku atu labele jeneraliza problema sira ne’ebé komete hosi oknum membru Polísia Nasionál Timor-Leste (PNTL) no mós FALINTIL-Forsa Defeza Timor-Leste (F-FDTL).

“Forsa rua ne’e estadu nian. Estadu konsidera nia instrumentu sira hotu hanesan de’it, tantu iha instrumentu sívil, instrumentu militár”, Longuinhos ba jornalista sira hafoin partisipa reuniaun Konsellu Ministru iha Palasiu Governu, Tersa, (25/10).

Nia husu atu labele jeneraliza problema balun ne’ebé akontese, karik insidente ida mosu entre individus ne’e la’ós problema komandu ninian, estadu, estadu maior, komandu jerál, ou komandante mak halo maibé ne’e problema individu.

“Ser umanu,  ema bele iha problema maibé la’ós instituisaun mak iha problema, instituisaun rua nunka iha problema, desde estadu ne’e hamrik, ema mak halo problema”, afirma nia. (jornalista: Julia Chatarina; editora: Rita Almeida)

Foto: Ministru Interior, Longuinhos Monteiro. Foto Mídia Ministériu Interior

Eis Membru Governu Balun sei uza Telefone Estadu

DILI, (ANTIL) – Deputada hosi bankada Congresu Nasionál Rekonstrusaun Timor (CNRT), Fernanda Lay bolu atensaun ba Ministra Finansas, Santina Cardoso atu fó atensaun ba dividas governu iha Timor Telekom (TT) tanba, deputadu sira detekta iha irregularidade hanesan eis membru governu balun sei uza telefone estadu maske la-assume ona kargu.

“Eis ministru sira durante tinan 5 to’o 6 la-ministru ona maibé sei uza nafatin telefone ho roaming internasionál”, deputada levanta kestaun ne’e iha plenária ne’ebé realiza ho prejensa Ministra Finansas, foin lalais ne’e.

Deputada ne’e husu atu governu liuhosi ministériu finansas halo identifikasaun, nune’e bainhira governu selu tenke haketak asuntu privadu ho públiku nian. Atu nune’e, eis membru governu sira ne’e labele uza osan estadu ba sira nia nesesidade privadu.

Lay mós husu ba TT atu print out dokumentu relevante hodi fornese ba ministériu kona-ba uzu telefone ne’ebé eis membru governu sira ne’e halo hodi ministériu fasil halo selesaun ba gastu pesoá, nune’e gastu pessoál tenke selu ho osan rasik la’ós ho osan estadu nian.

“Selu mesmu que retroativu tenke selu rasik para labele hatodan orsamentu jerál estadu,” Fernanda Lay fó hanoin. Aproveita oportunidade, nia mós husu ezekusaun orsamentu terseiru trimestrál 2016 tenke entrega ba komisaun Parlamentu Nasionál antes diskute orsamentu jerál 2017. (jornalista: Manuel Pinto; editora: Rita Almeida)

Foto: 1 - Ilustrasaun konta dividas; 2 - Deputada bankada CNRT, Fernanda Lay

Portugés iha Timor-Leste hanesan “estratéjiku” nomós “elementu hosi soberania nasionál” - reitór

Aposta ba dalen portugés iha Timor-Leste hanesan “estratéjika” ida no presija esforsu ida ne’ebé koletivu, polítika ida ne’ebé “lolos, klaru no obetiva” hodi sai konsolida nu’udar elementu soberania nasionál nian, tuir reitór hosi UNTL, Francisco Miguel Martins dehan. 

“Aposta ba iha lian portugés ne’e hanesan estratéjika ida. La’os tanba de’it hanesan lian ofisiál, tuir lei haktuir. Ho de’it vontade no esforsu koletivu ida, maka bele iha polítika kona-ba lian ne’ebé lolos, klaru no objetivu, atu nune’e bele defende no konsolida soberanua hosi ita rain”, tenik Francisco Miguel Martins, reitór hosi Universidade Nasionál Timor Lorosa’e (UNTL).

Iha intervensaun hosi abertura ba Jornada Pedagójika UNTL ba dahuluk, reitór ne’e konsidera katak debate hirak ne’ebé sei hala’o semana ne’e hanesan “marku ba konsolidasaun UNTL nian, hanesan instituisaun ensinu superiór ne’ebé aposta ba iha produsaun no diseminasaun koñesimentu iha lian portugés”.

“Analiza no halo debate kona-ba esperiénsia no matenek kona-ba ensinu nomós aprendizajen lian portugés iha Timor-Leste maka sai nu’udar propózitu ida ne’ebé sei mobiliza interese la’os ba de’it ita-ninia komunidade akadémika, maibé mos ba komunidade hothotu, tanba halo parte hosi temátika ba konsolidasaun hosi ita-ninia identidade nasionál no ba iha ita-ninia dezenvolvimentu rasik, hanesan Estadi independente”, nia esplika liu tan.

Francisco Martins haktuir kona-ba saida maka nia dehan katak sai nu’udar “papel importante” hosi lian portugés, ba iha konstrusaun no sobrevivénsia tuir mai hosi (…) identidade nasionál timor-oan nian, tanba nu’udar “lian rezisénsia” no adota ona hosi lei hanesan lian ofisiál ida mos.

“Kontinua sai nu’udar elementu ida ne’ebé halo ami lahanesan ho nasaun seluk hosi rejiaun ne’e, halo ami sai úniku no halo ami afirma hanesan ne’e duni”, dehan.

“Maibé dalen portugés la’os de’it hanesan lian pasadu no prezenta nian. Nu’udar lian ba futuru, lian ida ne’ebé ami halo ami nakloke ba mundu”, nia hatutan, hodi dehan hikas katak lian “la’os hanesan instrumentu neutru ida”, maibé nu’udar “konstrusaun sosiál ne’ebé iha ligasaun ho karga efetiva no kulturál”.

Reitór ne’e esplika katak Jornada Pedagójika UNTL nian, bazeia ba pilár hirak ne’ebé defini ona hosi UNESCO (ajénsia Nasoins Unidas ba Edukasaun no Kultura) ba edukasaun iha sékulu XXI – “aprende halo” -, atu nune’e alunu sira bele dezenvolve sira-ninia kbi’it atu ko’alia ba iha “kontestu reál ida ba uzu dalen portugés”.

Nia dehan, jornada hirak ne’e mosu liu hosi esfosu entre alunu ho profesór portugés sira, Clara Amorim ho Susana Soares, hosi Sentru Lian Portuges UNTL nian, no sei ho tema oioin ba debate.

“Iha tempu hanesan, hakarak mos sai hanesan espasu aprendizajen prátika ida, atu alunu sira bele envolve ativamente ba iha ninia realizasaun, nomós divulgasaun hosi knar hirak ne’ebé halo, bazeia ba lisensiatura Ensinu Lian Portugés”, nia hatutan.

Linguístika, literatura, polítika kona-ba lian no difikuldade hosi hanorin dalen portugés iha Timor-Leste maka sai mos tema balun hosi debate Jornada Pedagójika, ne’ebé sei hala’o iha Fakuldade Edukasaun, Arte no Humanidade UNTL.

Sei iha mos debate kona-ba polítika lian ka papel feto Timór nian ba iha edukasaun.

SAPO TL ho Lusa 

Parlamentu aprova atu kontrata majistradu estranjeiru sira hafoin tinan rua haruka sai ema sira ne’e

Parlamentu horisehik aprova ho jeneralidade proposta lei ida hodi rekruta majistardu estranjeiru ba iha instánsia judisiál Timor-Leste, hafoin tinan rua haruka fila estranjeiru sira ne’ebé asumi funsaun refere iha teritóriu-laran. 

Proposta lei hosi “rejime tranzitóriu komun ba rekrutamentu juis, prokuradór ho defensór públiku” nian, aprova ona horisehik iha plenáriu, hafoin tinan rua no loron ida, parlamentu ne’e duni maka aprova hodi haruka fila majistradu estranjeiru hothotu ne’ebé iha Timor-Leste.

Espulzaun ne’ebé envolve mos portugés barak, kria ona problema ba iha relasaun bilaterál entre Portugal ho Timor-Leste nomós hala’o hikas revizaun ba protokolu koperasaun, atu majistradu sira lahala’o sira-ninia funsaun judisiál hanesan baibain.

Kazu ne’e kria polémika bot entre majistratura ho Governu Timór, ne’ebé iha loron ne’e duni aprova ona rezolusaun adisionál ida ba Parlamentu, hodi kria Komisaun ba Auditoria hosi Sistema Judisiál Timor-Leste, “ho objetivu halo auditoria téknika ne’ebé klean liu tan, kona-ba funsionamentu setór justisa nian”.

Horisehik, bankada bot rua hosi Parlamentu Nasionál Timor-Leste, CNRT ho Fretilin aprezenta ona diploma ida hodi kontrata hikas majistradu estranjeiru sira – ne’ebé sei analiza iha espesialidade -, ne’ebé “estabelese rejime tranzitória komun ba rekrutamentu juis, prokuradór, defensór públiku no tékniku sira ne’ebé la’os timor-oan rasik, atu bele asumi funsaun iha tribunál, inklui ba iha Kámara Kontas, Ministériu Públiku nomós ba Defensoria Públika, temporariamente”.

Testu ne’e rekoñese kona-ba frakeza hosi sistema judisiál timor-oan nian, tanba maski halo esforsu maka’as ba formasaun hothotu maibé “ladauk konsege rezolve problema juis nomós prokuradór sira nian ne’ebé iha, relasiona ho intensidade bot iha Tribunál Rekursu nomós Kámara Kontas”.

Lei foun ne’e, sei fó dalan atu kontrata majistardu “la’os timor-oan” ho tinan 35 resin no iha ona esperiénsia profisionál tinan 10, no durante períudu tranzitóriu, bele ho tinan tolu to’o tinan lima, inisialmente.

Kona-ba Kámara Kontas sei halo mos konkursu “urjente no estraordinária, hafoin loron 15 aplika lei, ba selesaun kandidatu, la’os nasionál” hodi asumi funsaun juis ba jurisdisaun kontas nian.

SAPO TL ho Lusa 

ZEESM Ezemplu Dezenvolvimentu Turístiku

DILI, (ANTIL) – Tuir Profesór, Carlos Beja husi Portugal katak, Zona Espesiál Ekonomia Merkadu Sosiál (ZEESM), Oecusse, ezemplu ordenamentu teritóriu no dezenvolvimentu turístiku Timor-Leste (TL) nian.

“Aeroportu, estrada, ponte no komunikasaun importante ba sirkulasaun ema, komunidade no turismu,” péritu turismu husi Portugal ne’e hato’o iha nia intervensaun kona-ba: “Tourism Development in Emerging Tourism Destination”, iha Sentru Konvensaun Dili, Segunda, (24/10).

Movimentasaun maritíma, kuidadus saúde, rede bee nian, saneamentu, enerjia no sistema foun sira, fluviál, alarga mós agrikultura importante iha servisu turizmu.

Envolve ekonómia merkadu sai hanesan mós primordiál kapasidade turístiku, interaksaun kulturál hanesan ezemplu di’ak.

Profesór Beja dehan, Timor-Leste liuhusi nia responsável sira, liuhusi nia povu ka komunidade sira sei iha mehi ba futuru turístiku, kuidadu seguru graduál ba dezenvolvimentu no kresimentu ho determinasaun ne’ebé mak hanesan.

Durante tinan barak nia laran luta iha foho ba independénsia, ne’e mak determinasaun husi povu no responsável timoroan sira nia luta ba rai ida ne’e.

Turizmu ne’e paz tanba, fa’an mehi nasaun ne’ebé furak nomós mehi sai kultura ne’ebé furak mós. Maske nune’e, tenke hala’o ho kuidadu, tan buat ruma ne’ebé dalaruma ita hakarak sai naroman nakfilak sai nakukun.

Oras ne’e dadaun ZEESM hala’o iha Oecusse bazeia ba konstituisaun Repúblika Demokrátika Timor-Leste (RDTL), artigu 5O (Desentralizasaun) alinea 2) katak Oecusse Ambenu no Atauro, sira hetan tratamentu administrativu no ekonómiku espesiál.ZEESM ne’e rasik lidera husi Ex-primeiru-Ministru, Mari Alkatiri. (jornalista: Rafy Belo; editora: Rita Almeida)

Foto: 1 - Monumentu Lifau; 2 - Carlos Beja

Estadu TL Kondekora Eis Prezidente Repúblika Portugal

DILI (ANTIL) - Estadu Timor-Leste (TL), liuhusi Prezidénsia Repúblika sei kondekora Eis Prezidente Repúblika Portugal na´in rua, Jorge Sampaio no Mário Soares ho medalla Grande Colar Órdem de Timor-Leste iha Portugál, semana ne´e, tanba figura rua ne´e uluk fó apoiu maka´as ba Timor-Leste nia autodeterminiasaun.

Aleinde ne´e, Xefe Estadu TL mós entrega medalla Órden Timor-Leste no medalla Insígnia Órdem Timor-Leste ba portugueza na’in-rua, Amerikanu na’in-ida no timoroan iha diaspora na’in-hitu, ne’ebé iha tempu okupasaun fó apoiu maka’as ba luta autodeterminasaun Timor-Leste nian.

Tuir komunikadu imprensa ne´ebé ANTIL asesu hosi Mídia Palásiu Prezidénsia Repúblika iha Kuarta (26/10), Xefe Estadu sei entrega medalla ne’e,  antes kontinua ba Brazíl hodi entrega Prezidénsia Komunidade Nasaun Lian Portugeza (CPLP) ba Brazíl.

Lista naran kompletu hosi entidade sira ne’ebé atu simu kondekorasaun hosi Xefe Estadu maka hanesan; medalla Grande Colar Órdem de Timor-Leste sei atribui ba figura rua maka Jorge Sampaio, eis Prezidente Repúblika Portugál (1996-2006) no Mário Soares, eis Prezidente Repúblika Portugál (1986-1996 ) no eis Primeiru Ministru (1976-1978, 1983-1986).

Medalla Órdem de Timor-Leste sei atribui ba ema na´in tolu maka hanesan Majór Jenerál Arnaldo José Ribeiro da Cruz (Portugés), Arnold S. Khoen (Amerikana) no Carlos Eduardo de Medeiros Gaspar (Portugés).

Entretantu, medalla Insígnia Órdem de Timor-Leste sei atribui ba timoroan na´in hitu (7) maka hanesan Carlos Henriques de Araújo Pereira Jerónimo (Títulu Póstumu), Prisca Lopes de Carvalho (Títulu Póstumu), Hélder Alberto Neves (Títulu Póstumu), Eugénio da Silva (Títulu Póstumu), Maurício Pereira (Títulu Póstumu), Francisco Pinto Boavida (Títulu Póstumu) no Inocência Filomena Ximenes Neves. (Jornalista: Xisto Freitas)

Foto: Eis Prezidente Repúblika Portugal, Jorge Sampaio (imajen karuk) kaer liman ho Xefe Estadu Taur Matan Ruak (loos) iha tempu liu-ba. Foto dok. Mídia Palásiu Prezidénsia Repúblika

Aban, Prezidente Repúblika Dezloka Ba Brazíl Entrega Prezidénsia Rotativa CPLP

DILI (ANTIL) - Prezidente Repúblika, Taur Matan Ruak, akompaña hosi Primeira Dama, Isabel da Costa Ferreira, sei dezloka ba Brazil iha Kinta (27/10) atu entrega Prezidénsia Rotativa  Komunidade País  sira ko’alia Lian Portugés (CPLP) ba Brazíl, hafoin Timor-Leste asume durante tinan 2 nia laran hosi 2014-2016.

Xefe Estadu Timor-Leste entrega formalmente Prezidénsia Rotativa CPLP nian ba Brazil atraves Simeira Xefe Estadu no Xefe Governu País CPLP nian ba dala XI ne’ebé sei hala’o iha Brazília, Kapitál Brazíl,  iha 31 Outubru 2016, tuir zona tempu Brazíl nian, ka loron 1 Novembru tuir zona tempu Timor-Leste nian.

Tuir komunikadu imprensa ne´ebé ANTIL asesu hosi Mídia Palásiu Prezidénsia Repúblika, Kuarta (26/10), katak, loloos Timor-Leste entrega ona Prezidénsia CPLP ba Brazíl iha Jullu liubá, maibé adianta to’o Outubru tinan ne’e tanba situasaun polítika iha Brazíl.

Entretantu, iha époka simeira Xefe Estadu no Xefe Governu ba dala XI nian ne’e, Xefe Estadu Timor-Leste sei enkontru kortezia mós ho Xefe Estadu no Xefe Governu hosi nasaun membru CPLP nian sira.

Tuir planu ne’ebé maka iha, Xefe Estadu ho komitiva tomak sei fila mai Timor-Leste iha 8 Novembru 2016. (Jornalista: Xisto Freitas/Editor: Otelio Ote)

Foto: Prezidente Repúblika, Taur Matan Ruak

TL Konsege Dinamiza Organizasaun CPLP

DILI, (ANTIL) – Primeiru Ministru, Rui Maria de Araújo hateten, durante tinan rua (2014 to’o 2015) Timor-Leste (TL) lidera Prezidénsia Rotativa Komunidade Nasaun Ko’alia Lian Portugéz (CPLP) konsege dinamiza organizasaun CPLP, la’ós de’it haree ba área língua Portugeza ninian, Kultura no Diplomasia maibé haree oinsá CPLP halo serbisu maka’as liu-tan iha área ekonómika.

“Hanesan referénsia ida ita-boot sira hatene katak ita organiza Forum Ekonómika CPLP ninian iha ne’e. Ita hein katak fórum ida ne’e membru CPLP sira seluk sei konkorda tinan-tinan halo nafatin iha Timor-Leste hanesan fórum ida lori emprendedores emprezáriu sira hosi CPLP ninian ho mós sira iha Ázia Sudeste Aziátiku no Ázia Pasífika ninian hasoru malu iha ne’e tanba, Timor-Leste iha fatin Estratéjiku hodi dinamiza liu-tan dezenvolvimentu ekonómiku,” PM ba jornalista sira iha Palásiu Prezidénsia Repúblika, Bairu-Pité, Kuarta (26/10), hafoin sorumutu ho Xefe Estadu, Taur Matan Ruak.

Tinan rua nia laran TL sai palku ba vizita internasionais no parseiru sira hosi CPLP mós vizita TL. “Ita bele hateten katak Timor-Leste ho nia Prezidénsia konsege implementa pursentu 90 hosi atividade sira hotu iha tinan rua liu-ba, ne’e hatudu katak Timor-Leste hahú gaña esperiénsia maka’as liu-tan oinsá TL sai uma na’in ba eventu boot sira tuir mai,” Rui informa.

Kona-ba sorumutu ho Prezidente Repúblika, nia informa, ko’alia kona-ba Prezidente nia viajen ba Brazil hodi entrega Prezidénsia Rotativa CPLP. Prezidente informa mós ba Governu kona-ba Konseitu Estratéjiku Defeza no Seguransa no bainhira Prezidente fila hikas mai sei hamutuk ho Governu deskuti Konseitu Estratéjiku Defeza no Seguransa.

“Ha’u mós informa ba Prezidente Repúblika kona-ba lala’ok Orsamentu Jerál Estadu ne’ebé hahú iha 26 Outubru iha ona audisoens ho Departementu Tékniku sira no komisoens ne’ebé iha Parlamentu,” Rui esklarese.

Nia hatutan, nia mós hato’o ba Prezidente kona-ba kestoens balun kooperasaun ita nian ho membru CPLP ninian katak bainhira Xefe Estadu hasoru malu ho nasaun sira ne’e bele mós reforsa liu-tan oinsá atu bele hametin liu-tan ita nia kooperasaun liu-liu iha áreas téknika ninian, ezemplu, iha área Edukasaun.

“Ita hatene katak ita nia eskola barak maka sei presiza profesór barak hosi Portugal, Cabo Verde no nasaun sira seluk tan. Entaun, iha kontestu ida ne’e informa mós ba Xefe Estadu para bainhira Xefe Estadu hasoru malu ho Xefe Estadu hosi nasaun sira CPLP karik ko’alia hodi reforsa kooperasaun,” Eis Ministru Saúde haklaken. (jornalista: Xisto Freitas; editora: Rita Almeida)

LEE LIU IHA ANTIL

Direitu ema nian iha Timor-Leste sei hetan Revizaun Periódiku Universal daruak hosi ONU

Ministru Justisa, Ivo Valente, sei xefia delegasaun Timor-Leste nian no sei hatán ba avaliasau hosi Siklu daruak ba mekanizmu Revizaun Periódiku Universal (RPU) hosi situasaun respeita Direitu Ema sira nian hosi ONU (CDH), iha Jenebra, Suisa, iha semana oinmai.

Nasaun ne'e sei submetidu ba dala rua hasoru revizaun ida ne'ebé sei avalia kumprimentu hosi Timor-Leste ba obrigasaun no kompromisu internasional sira ne'ebé asumi kona-ba direitu ema sira nian. Avaliasaun ikus halo ona iha fulan-Outubru tinan 2011.

Ezersísiu hosi Revizaun Periódiku Universal hala'o iha formatu diálogu interativu no nasaun "avaliadór" tolu Timor-Leste nian maka Áfrika-Súl, Xina ho Holanda.

RPU hanesan mekanizmu inovador ida no implika iha tinan haat ho balun nia laran Estadu-membru sira hamutuk 193 hosi ONU hala'o avaliasaun foun ida ba nia situasaun kona-ba direitu ema sira nian.

Revizaun ne'e analiza kumprimentu hosi obrigasaun no kompromisu internasional sira ne'ebé maka Estadu ida-idak asumi ona kona-ba direitu sira ema nian.

Prosesu hosi RPU bazeia iha dokumentu tolu: relatóriu ofisial ne'ebé haruka hosi Estadu ne'ebé maka hetan avaliasaun, relatóriu hosi Órgaun sira no mekanizmu hosi ONU ho informasaun sira kona-ba Estadu ne'e no kompilasaun ida ne'ebé ONU prepara hahú hosi kontributu sira ne'ebé maka haruka hosi sosiedade sivil.

Fonte: Portal do Governo de Timor-Leste - Foto@ Ajénsia Lusa

Kooperasaun iha CPLP difikulta tanba falta rekursu finanseiru

Falta rekursu finanseiru  difikulta konkretizasaun ba projetu kooperasaun hosi Komunidade Nasaun Lia-Portugés (CPLP) no organizasaun iha nafatin kompromisu atu diversifika fonte finansiamentu, haktuir ba Lusa hosi responsável ida. 

Estadu-membru sira CPLP nian sei hala’o, kuarta no kinta-feira, iha Brazília, reuniaun pontu  fokál kooperasaun  badala XXXIII, loron hirak molok simeira badala XI komunidade luzófona nian. 

Iha enkontru, nasaun sira sei debate projetu tuir mai,  informa ba Lusa diretór kooperasaun CPLP, Manuel Lapão.

"Momentu atuál hanesan  kontensaun balun hosi  Estadu sira kona-ba aprezentasaun inisiativa foun, tanba kompromisu finanseiru ne’ebé difísil tebes atu konkretiza", haktuir  responsável ne’e.

Tuir Manuel Lapão, "kontinua sai objetivu ida atu buka  fonte alternativa iha finansiamentu , hosi orijen privadu no estabelese parseria ho ajénsia internasionál ne’ebé iha rekursu liu CPLP".

Responsável ne’e afirma katak planu ne’e dependente ba  aprovasaun, iha simeira Brazília, vizaun estratéjika foun  organizasaun nian, ne’ebé  hatudu rumu  CPLP iha dékada oin mai.

Iha  reuniaun semana ne’e,nasaun sira sei diskute aprovasaun proposta foun tolu: faze daualu projetu kapasitasaun laboratóriu enjeñaria CPLP; faze daruak SKAN CPLP, mekanizmu kona-ba setór agroalimentar; no semana daruak juventude CPLP nian.

Reuniaun ne’e moos  permite atu verifika  pontu situasaun kona-ba servisu ne’ebé hala’o  iha  ámbitu  tinan  CPLP kontra Servisu Infantil, ne’ebé maka komemora durante iha 2016, aléinde permite haree fila fali asaun ne’ebé hala’o kona-ba  seguransa alimentar no nutrisaun, kampaña  "Hamutuk kontra Hamlaha", enerjia, governasaun  eletrónika no telekomunikasaun.

Iha  enserramentu  reuniaun pontu fokák nian, sei iha  palestra ida hosi  responsável Ministériu Relasaun Esteriór Brazil nian, ne’ebé  sei aprezenta esperiénsia brazileiru  kona-ba implementasaun Ajenda Dezenvolvimentu Sustentável ba 2030, ne’ebé define hosi Nasoins Unidas.

Objetivu ida, iha reuniaun pontu fokál nian tuir mai, ne’ebé sei hala’o iha fevereiru 2017 iha Lisboa, Estadu-membru sira  bele reflete kona-ba forma monitorizasaun  aplikasaun nian, iha kontestu nasionál, ba objetivu hirak  ne’ebé hanaran ajenda 2030.
c
Iha  área ne’e, Manuel Lapão konsidera katak Portugál no Brazil, maka iha "kapasidade liu no rekursu iha estratéjia ne’e", bele koloka dispozisaun nasaun sira seluk hodi kolabora iha servisu ne’e.

Iha  reuniaun ne’e moos sei diskute material foun ida: realizasaun kongressu dahuluk organizasaun sosiál CPLP nian, proposta hosi Brazil, bele  hala’o iha semestre dahuluk tinan oin mai.

Konferénsia xefe Estadu no Governu CPLP badala XI sei hala’o iha Brazília, loron 31 outubru no 01 novembru, no marka inísiu prezidénsia brazileira ba organizasaun.

SAPO TL ho Lusa

KAFÉ FOLIN 33 CENTAVOS, POVU KONSIDERA LIA TOLOK

Povu agrikultores iha Munisípiu Ermera hato’o sira-nia lamentasoens kona-ba folin Kafé ne’ebé mak durante kompañia  sira sosa, kada kilo ida presu 33 centavos, tanba  ne’e sira konsidera presu 33 centavos ne’e lia tolok ba sira.

“Ami povu maioria agrikultor Ermera  ne’e Kafé folin ne’e 33 centavos  ne’e ema tolok ami.  Ne’ebé ba ami laiha problema.  Ne’ebé señor Prmeiru Ministru no Ministru agradese ita bo’ot sira,      haree to’ok ba tanba povu ne’e sempre aprezenta buat ne’e ba ami Xefi Suku sira,”lamentasaun  ne’e hato’o  husi Xefi Suku Postu Administrativu Lete-Foho, Goulolo, João de Deus, liu husi sesaun husu no hatan,  iha seremonia lansamentu, reabilitasaun Kafé iha Suco Ducurai, Postu Administrativu Lete-Foho, Sesta (21/10.)

Hatan ba preokupasaun ne’e, Ministru Estadu Coordenador   dos Assunto   Economia  e Ministro Agricultura e Pescas, Estanislau da Silva, hatete, Kafé folin kilo ida 33 centavo ne’e diak  liu tan iha merkadu internasional.

“Ita nian  (Kafé) 33 sentavo  dehan insulta fali ema, ida ne’e lae. Ema la hatene saida mak  ita koalia.  Agora balun dehan  nusa mak Ministériu Agrikultura labele estabelese Kafé ninia folin? Se ami estabelese Kafé  folin  dollar 2 ho balun, entaun imi  povu agrikultor labele fan, entaun se mak atu hola,”hatete Estanislau da Silva.

Atu regula  kona-ba presu Kafé  iha nasaun Timor Leste  ne’e,   Estanislau da Silva hatete,  fulan  Dezembru  sei iha konferensia internasional ida  kona-ba  Kafé,  sei  halo ofisialmente lansamentu Asosiasaun Produtores  Kafé  iha Timor.

“Asosiasaun  Produtores Kafé  ne’e mak depois sei haree ba presu merkadu  internasional ninian mak depois estabelese numeru  presu Kafé,  la’os Ministériu Agrikultura,”hatete Estanislau da Silva.avi

Jornal Nacional

KIRSTY APRESIA FETO PARTISIPA MAKA’AS IHA VIDA POLITIKA

Fundadora Fundasaun  Alola,  Kristy  Sword  Gusmão orgullu no apresia hare, feto Timor Leste partisipa makas iha vida politika.

“Feto forte nasaun forte ida ne’e mak ami nia moto katak, wainhira ita nia maluk feto sira  forte  iha  area  ekonomia, saude, edukasaun  no  partisipa makas iha vida politika, nasaun  sei  diak, saudavel  no  forte,”dehan  prezidente  Fundasaun  Alola  nu’udar  mós  embaxadora  boavontade  edukasaun  Timor  Leste,  Kristy  Sword  Gusmão ba  JN-Diário  iha  Centru  Covenções  de  Dili  (CCD),  Segunda  (24/10), hafoin partisipa  serimonia  internasional  turismu  nian.

Wainhira rona feto nain 319 kandidata an ba  xefi suku, nia kontenti, basa feto barak komesa sente iha  kapasidade  no  fiar  an  kompete  ho  mane iha vida politika.

Mesmu iha progresu bo’ot iha nivel nasional, maibe Kristy  Sword  triste oituan, basa iha  nivel  suku  feto  oituan  de’it  mak  reprezenta  sira  nia  komunidade.

Maibe nia espera, iha  prosesu  eleisaun ba xefe suku  ninia,  feto  maluk  sira  sei  simu  fiar  husi  ninia  komunidade  atu  reprezenta  feto.  “Hau espra, feto maluk sira sei simu  fiar  husi  komunidade  atu  reprezenta   feto  no brani  atu  koalia  kona-bá  difikuldades  feto no labarik sira hasoru iha komunidade, inklui violensia domestika,”tenik nia.Tos

Jornal Nacional

Kazu Emilia, Governu la Tau Kanuru Tohar ba Aktividade Justisa

DILI - Kazu Eis Ministra Finansas Emilia Pirres no Eis Vice Ministra Saude Madalena Hanjam, Sestu governu Timor Leste liu husi Ministeriu Justisa sei la interven prosesu julgamentu iha tribunal.

Tuir Ministru Justisa Ivo Valente hatete hanesan Ejekutivu laiha direitu atu tau kanuru tohar ba aktividade neebe lao iha seitor justisa, Ministru Justisa labele fo komentariu neebe lao iha tribunal.

Ita respeita orgaun soberanu sira, hanesan ejekutivu labele hatama kanuru tohar iha seitor justisa mesmu ministru justisa labele fo komentariu aktividade neebe lao iha tribunal,” dehen Ivo ba Jornalista Tersa (25/10/2016) iha PN.

Nia hatete disizaun neebe mak lao iha tribunal mesmu ba kazu Emilia Pires nian ou kazu sira seluk, governu no ministru justisa labele komenta kazu sira neebe lao iha tribunal.

Iha fatin ketak Juiz Prosesu Jose Maria de Araujo hatete, antes nee pedidu mai husi arguida Emilia Pires sai ba estranjeiru hodi reprezenta estadu no governu ba iha eventu boot G7+ no termina ona katak atu entrega pasaporte iha loron (20/10) ba tribunal. Maibe too data neebe determina arguida la entrega.

Ho pedidu nee tribunal la konkorda hodi fo tan tempu ba arguida Emilia Pires loron lima hahu husi (25-31/10) Segunda semana oin tenki hatama ona pasaporte. Informasaun kompletu iha STL jornal no STL Web, edisaun Kuarta (26/10/2016). Timotio Gusmao

Suara Timor Lorosae

Arguidu Kalbuadi La Marka Prezensa, Tribunal adia Julgamentu

DILI - Tribunal Distrital Dili (TDD) adia fila fali julgamentu ba iha loron (02/12/2016) tamba arguidu Fransisco Kalbuadi Lay atual Ministru Turizmu Arte Kultura, la marka prezensa iha julgamentu nee.

Tuir Juiza Maria Solana katak tribunal manda ona karta notifikasaun ba iha Parlamentu Nasional (PN) atu halo suspensaun ba membru governu VI governu konstitusional nee. Kazu refere rejistu ho numeru prosesu 0026/16/PGGCC.

Nia hatutan, tribunal sei hadia fila fali julgamenu ba arguidu Fransisco Kalbuadi Lay atual Ministru Turizmu Arte Kultura no Eis Ministru Solidariedade Sosial, arguidu Jacinto Rigoberto. Tamba, Parlamentu Nasional seidauk hasai imunidade ba arguidu Fransisco Kalbuadi Lay hodi tuir julgamentu iha Tribunal Distrital Dili.

Tamba nee, tribunal insiste nafatin ba iha Parlamentu NasionaL atu hasai imunidade ba arguidu Fransisco Kalbuadi Lay hodi bele tuir julgamentu fila fali iha loron 02/12/2016 iha horas (09.30 OTL) dadersan.

Tuir observasaun STL, katak iha julgamentu nee arguidu Jacinto Rigoberto deit mak marka prezensa iha tribunal distrital Dili(TDD) maibe arguidu Fransisco Calbuadi Lay la marka prezensa tamba relasiona ho ninia imunidade.

Arguidu nain rua deskonfia komete kazu krime obstrusaun ba liberdade atu hili neebe previstu iha artigu 236 kodigu penal TL. Informasaun kompletu iha STL jornal no STL Web, edisaun Kuarta (26/10/2016). Domingas Piedade Freitas

Suara Timor Lorosae

PN Sei Halo Lei Ezije Artemarsiais Tenke Iha Estatutu

DILI – Reprezentante povu iha Uma Fukun Parlamentu Nasional (PN), sei halo lei ida ezije artimarsiais neebe ejiste iha rai laran tenke iha estatutu, atu nunee bele diskrimina aktividades neebe maka sira halo.

Deputadu bankada CNRT Arao Noe hateten, ho rezolusaun neebe uluk aprova ladun sufsiente para atu kontrola artemarsiais sira, tanba nee diak liu halo lei ida ezije artimarsias neebe iha nee tenke iha estatutu, atu nunee bele diskrimina aktividade saida maka sira halo.

Ho rezolusaun neebe uluk aprova ladun sufsiente para atu kontrola artemarsiais sira, tanba nee diak liu ita halo lei ida ezije artimarsias neebe iha nee tenke iha estatutu, depois estatu nee tenke aprova liu husi konferensia para bele diskrimina aktividades saida maka sira a atu halo, liu husi neeba maka ita bele kontrola,” dehan deputadu Arao ba jornalista sira iha PN, Dili, Tersa (25/10/2016).

Nia dehan, husi ida nee maka iha baze legal forte para atu bele kriminaliza sira, para aktividades neebe sira halo polisia kaer ba Tribunal iha baze legal.

Iha fatin hanesan membru PN husi komisaun B neebe trata asuntu Defesa no Seguransa Jacinto Viegas hateten, grupu artimarsias sira nee halo problema, polisia kaer lori ba Tribunal husik fali sira, tanba dehan laiha lei para atu bele kondena sira.

Entretantu Ministru Justisa Ivo Valente hateten entermus desizaun legal nia laiha kompetensia atu responde ba asuntu sira hanesan nee, sira nia pontu de vista saida maka estadu foti bazea ba espresaun maioria husi povu. Informasaun kompletu iha STL jornal no STL Web, edisaun Kuarta (26/10/2016). Carme Ximenes

Suara Timor Lorosae

Funsionariu Publiku Halo Koberansa Ilegal Kontra Lei

DILI – Deputadu bankada Frente Mudansa Jorge da Conceição Teme hateten, funsionariu publiku neebe halo atendementu ba povu maka iha motiva atu halo koberansa ilegal hetan buat ruma husi ema neebe maka nia atende nee kontra lei.

Karik iha porvas funsionariu publik halo atendimentu hanesan BI, sim, kartaun eleitoral, pasaporte no seluk tan, maka sira husu fali osan ka komprimisiu ruma modelu hanesan nee tenke hato keixa nee PDHJ no KAK para investiga ema nee, tanba nee klaru ke kontra ita nia lei,” dehan deputadu Jorge ba STL, iha PN, Dili, Tersa (25/10/2016).

Nia dehan, Kuandu iha duni dadaus presiza lori ba Tribunal, tanba nee lalos funsinariu publik. Wainhira sira tomada de pose sai servidor povu, sira nee iha ona salariu neebe mai husi povu nia osan, povu lahetan salariu hanesan sira.

Reprezentante povu nee afirma tan katak, kestaun sira nee mosu, tanba ema servisu iha jestaun no administrasaun publiku nakonu ho tentasaun. Kuandu ema neebe maka mentalidade fraku, nia bele iha tentasaun hodi bele husu osan ka ou buat sira neebe maka kontra regras.

Iha fatin hanesan deputadu bankada CNRT Cesar Valente hateten, dokumentu nasun nian ema hotu iha direitu atu hetan, agora oinsa organiza atendimentu neebe dignu ba sidadaun sira, lalika limitia oras nee.

Entretantu Ministru Justisa Ivo Valente hateten nia hakarak husu deskupa ba komunidade sira, tanba dala ruma sira mai barak, laiha kapasidade atu atende sira iha loron defisil, tanba fatin klot, makina imprimi kartaun nee depende mos ba lina internet. Informasaun kompletu iha STL jornal no STL Web, edisaun Kuarta (26/10/2016). Carme Ximenes

Suara Timor Lorosae