Oecusse, enklave timoroan nebe ohin nakohu ho rai-rahun, nebe labarik sira sei hatete loraik di'ak

Rai-rahun, mákina sira, kamiaun sira no rai-kuak hosi obra sira hanesan elementu dominante sira hosi kilómetru ualua entre Lifau, nebe iha tinan 500 liubá portugés dahuluk sira to'o iha Timor-Leste, no sentrál elétriku foun hosi Sakato, iha enklave Oecusse.

Rai-rahun, mákina sira, kamiaun sira no rai-kuak hosi obra sira hanesan elementu dominante sira hosi kilómetru ualua entre Lifau, nebe iha tinan 500 liubá portugés dahuluk sira to'o iha Timor-Leste, no sentrál elétriku foun hosi Sakato, iha enklave Oecusse.

Izoladu durante sékulu lima ikus ne'e no dalabarak ema haluha, durante okupasaun indonéziu no mós iha períudu independénsia nian, Oecusse iha loron ohin moris iha movimentu ida nebe nunka akontese.

Empreza sanulu resin serbisu iha rai laran, projeti barak maka halo daudaun iha tempu hanesan, númeru hosi ema estranjeiru sira aas liu duké tinan sira seluk - ema portugés sira de'it hamutuk na'in 50 resin - no kuantidade importante ida hosi Orsamentu Estadu nian haruka daudaun ba rejiaun.

Iha 2015, osan dolár millaun 90 resin, iha tinan oinmai sei haruka dolár millaun 200 resin, nebe hamutuk ho projetu hosi empreza privadu sira hanesan Interway, nebe kontratadu hodi harii klínika foun ida no hanesan empreza portugés dahuluk nebe rejistadu iha Oecusse.

Sei falta investimentu estranjeiru boot nebe promete tiha ona, maibé autoridade rejionál no nasionál sira insisti katak seidauk bele hanoin ne'e tanba seidauk iha infraestrutura báziku sira hosi rejiaun ida nebe, iha dékada barak nia laran, laiha investimentu ruma.

Agora zona tomak sai hanesan estaleiru boot ida, ho estrada foun sira, ponte sira, sentrál elétriku ida, hotél ida, projetu sira hosi irigasaun no estrutura administrativu foun sira, iha nível oioin nebe atu halo hotu.

Sentrál sei prontu iha semana sira tuirmai ne'e, monumentu foun iha Lifau sei demora fulan barak no hotél foun - nebe hahú iha tinan ida liubá - nebe seidauk harii aleinde pilár sira.

Estrada ho kilómetru resin maka halo iha tempu hanesan, ho valeta no paseiu sira, iha projetu sira iha agrikultura no infraestrutura saúde foun sira, no sira seluk tan. Buat hotu ho modelu sira nebe nunka akontese iha jestaun - iha fulan-Janeiru de'it maka Governu timoroan formaliza ona "transferénsia hosi kbiit sira no fó fali kompeténsia sira" hosi Governu sentrál ba Autoridade hosi Rejiaun Administrativu Espesiál hosi Oecusse Ambeno.

No harii mós dalan hodi hala'o projetu sira: obra boot sira hetan daudaun fiskalizasaun, barak liu halo hosi empreza portugés sira, nebe implika kritériu apertadu sira iha kualidade ezekusaun no modelu foun sira nebe sei aplika, ho posibilidade, ba obra boot sira nebe sei halo iha nasaun. Loja sira, uma sira, negósiu ki'ik sira nebe hatudu komunidade ida ho populasaun rihun 70 (iha kapitál besik rihun 10 resin) nakloka hafoin nonook ida nebe provoka hosi eskesimentu.

Ligasaun regulár sira liuhosi tasi (no hahú iha semana ne'e liuhosi ár) hatudu interese maka'as iha enklave, ho pasajeiru sira nebe aumenta no mós negósiu nebe aumenta hodi hatán ba pedidu sira nebe nunka akontese iha enklave.

Pedidu sira barak nune'e halo merkadu ki'ik la preparadu ba furakaun hosi obra sira, dalabarak senti nesesidade liuliu hosi produtu importante sira hanesan simenti ka materiál sira seluk konstrusaun nian.

Lori sasán hosi Díli karun tebes - kontentór ida nebe ho folin dolár 5.000 ba viajen hosi Europa to'o Díli bele kusta rihun 20 hosi de'it Díli to'o Oecusse - nune'e maka uza liu rekursu hosi fatin indonéziu nian.

Maski nune'e, Díli hanesan rekursu hosi hamosu negósiu foun sira - loke ona restaurante oioin, hanoin ona serbisu sira seluk no loke ona "filiál" ida hosi diskoteka úniku hosi Timor-Leste.

Maski ho buat sira ne'e, no ho rai-rahun nebe domina iha ár, iha mós karakterístika nebe Oecusse seidauk muda, hanesan importánsia hosi tasi ka burokrasia iha rai laran, ho fronteira rua timoroan nian no rua hosi parte indonéziu nian.

No ikusmai ha'u ko'alia kona-bá ema sira iha enklave, hanoin tempu antigu sira, nebe labarik ki'ik sira - no sira nebe ladún ki'ik - sei kumprimenta ema estranjeiru sira nebe liu hodi hakilar ba sira "bo tardi".

SAPO TL ho Lusa

PM timoroan vizita projetu hosi empreza portugés nian iha Oecusse

Primeiru-ministru timoroan vizita iha loron-sesta fatin nebe ekipa ida hosi empreza portugeza ida harii daudaun klínika espesiál dahuluk nebe iha funsaun oioin iha enklave Oecusse, nebe karik sei hahú funsaun iha fulan-Marsu 2016.

Rui Maria de Araújo, akompaña hosi responsável hosi autoridade rejionál hosi enklave Oecusse, Mari Alkatiri, vizita ona fatin ne'e hodi hakotu nia vizita iha semana ne'e iha Oecusse, no nia hatete progresu sira hosi projetu oioin nebe hala'o daudaun.

Dezeña hosi grupu Interway, klínika ne'e instala daudaun hosi ekipa ida ho elementu na'in 50 resin, nebe na'in 11 hanesan ema portugés, ho faze dahuluk previstu ba fulan ne'e nia rohan bainhira Oecusse simu selebrasaun sira tinan 500 bainhira ema portugés sira to'o iha Timor-Leste.

Klínika Espesiál Polivalente iha Oecusse, preparadu ba kama 24 no kuartu VIP neen, inklui unidade kompletu ida ho meiu diagnóstiku sira, aleinde área sira konsulta jerál nian, urjénsia sira, bloku operatóriu, sentrál oksijéniu nian, sala sira estabilizasaun nian no serbisu sira hosi konsulta externu hosi espesialidade oioin (radiolojia, ekografia no seluk tan).

Sei iha mós farmásia ida no laboratóriu kompletu ida hosi análize klíniku sira, ho teknolojia modernu, nebe sei inklui tratamentu hosi rezíduo sira no autonomia enerjétiku.

Hanesan projetu ida nebe aprovadu hosi Zona Espesiál Ekonomia Sosiál Merkadu nian (ZEESM) nebe relasionadu ho programa boot hosi investimentu públiku hosi Rejiaun Administrativu Espesiál Oecusse, Ambeno, no hosi Governu timoroan nian.

Tinan ne'e haruka ona ba rejiaun osan dolár millaun 90 resin, no hanoin ona millaun 200 resin ba tinan 2016, ho projetu estruturál oioin nebe hala'o daudaun, inklui sentral eletríku ida, estrada sira, aeroportu, ponte sira no projetu sira irigasaun nian, no sira seluk tan.

Fernando Figueiredo, sósiu-jerente hosi empreza Interway, responsável ba projetu, destaka ona ba xefe Governu timoroan, vontade hodi "hatán ba dezafiu" nebe fó hosi prezidente rejiaun nian, Mari Alkatiri, hodi aposta iha "diferensiasaun" no iha vontade hodi "harii kualidade moris ida nebe di'ak ba timoroan sira hotu, lahó exsepsaun".

"Iha projetu ne'e, iha loron 28 oinmai sei taka área hamutuk 1.300 metru kuadradu, koresponde ba faze dahuluk no sei hahú operasaun iha fulan-Marsu 2016 nia rohan", nia hatete.

Klínika ne'e instala daudaun iha fatin ida nebe sei sai hanesan "kampus saúde nian" previstu iha planu urbanu foun hosi Pante Makasar, kapitál hosi enklave Oecusse-Ambeno, nebe iha fulan hirak ikus ne'e iha movimentu maka'as, tanba projetu oioin nebe hala'o daudaun.

Dezde tama iha Timor-Leste, Interway hatama ona iha ekonomia lokál "besik millaun dolar ida", hatete hosi Fernando Figueiredo, hodi hatutan katak empreza "fiar iha projetu hosi ekonomia sosiál merkadu nian" nebe dezenvolve daudaun iha rejiaun.

Ho investimentu iha Timor-Leste, grupu Interway aumenta tan Estadu-membru ida hosi CPLP ba nia mundu emprezariál, hafoin projetu sira iha Angola, Brazil, Guiné Ekuatoriál, Mosambike no Portugal, nebe tau hamutuk mós projetu sira iha España no Emiradu Árabe Unidu.

Harii iha 2003 no ho sede iha Lisboa, grupu atua hanesan plataforma negósiu sira nebe foka iha dezenvolvimentu no implementasaun hosi projetu sira no buka oportunidade foun sira iha merkadu sira nebe iha daudaun dezenvolvimentu.

Interway TL hanesan empreza dahuluk hosi kapitál portugés nebe maka rejista iha Oecusse, nebe halo operasaun hosi kompañia portugés oioin, barak liu fiskaliza iha projetu infraestrutura boot sira.

Empreza hakarak investe fali nia rezultadu sira iha Timor-Leste iha 2016, iha projetu foun ida nebe hosi investimentu privadu tomak iha nasaun.

SAPO TL ho Lusa - Foto: Gabinete do Primeiro-Ministro

“Caravela” ho bronze ne’ebé halo iha Oliveira do Douro hanesan monumentu foun iha Lifau

“Caravela” ho bronze ho tonelada 8,5, ne’ebé halo iha Oliveira do Douro, Vila Nova de Gaia, hanesan elementu sentrál hosi monumentu foun ne’ebé marka portugés sira tama iha Timor-Leste, iha tinan 500 liubá, iha tasi Lifau nian.

Obra ne’e halo hosi Fundição Lage, enkarregada hosi Ministériu Turizmu timoroan no sei hala’o inaugurasaun iha loron 27 novembru, hatuur iha padraun nia sorin mak durante dékada, marka lokál ne’ebé primeiru portugés sira to’o iha Illa.

"Importante mai ami atu hanoin hikas katak portugés sira mak deskobre rai ne’e iha tinan 500 liubá. Ami prepara hela hodi selebra entrada portugés sira niian, liu-liu padre katóliku sira. Karik la’ós tanba deskobrimentu iha altura ne’ebá, ami la hatene agora ami iha ne’ebé ", hatete ba Lusa ministruTurizmu timoroan, Francisco Kalbuadi.

Kalbuadi, rekorda katak "tinan atus ona mak" “caravela” tama iha Timor, hatete katak obra halo ho liman "fó sentidu boot liu" ba projetu.

Agora falta konklui kompleksu balun monumentu nian, ne’ebé inklui pelumenus estrutura adisionál, dalan, zona bee nian no jardin sira.

"Ha’u sei hela iha ne’e to’o loron 28 novembru no ami sei tenta halo buat hotu (atu buat hotu prontu). Ha’u la dehan pursentu 100. Maibé ami tenta atu bele inaugura", nia hatutan.

Monumentu ne’e horisehik hetan vizita hosi primeiru-ministru timoroan, Rui Maria de Araújo no akompaña hosi responsável autoridade rejionál enklave Oekusi nian, Mari Alkatiri, menus hosi fulan ida molok inaugura.

Instala iha operasaun komplikada iha kinta-feira, “caravela” ne’e, ne’ebé akompaña hosi figura ualu ne’ebé mós ho bronze - navegadór, padre, porta-estandarte, mariñeiru na’in rua no timoroan na’in tolu - iha sírkulu ida nian klaran ne’ebé haleu monumentu foun ne’e, mak sei konstrusaun.

"Komponente hotu obra nian ho todan besik tonelada 10. Metade hosi “caravela” orijinál. “Caravela mesak de’it nia todan besik tonelada 8 ho balun,  no totál hotu besik tonelada 10. Ho komprimentu metru 13, ho altura metru 4,3 no luan besik metru 3,2", haktuir Fernando Lage, responsável fundisaun nian ba Lusa.

"Iha estrutura interiór ida no estrutura únika la’ós ho bronze mak lilin sira", tenik Lage, ne’ebé mai iha Timor hodi superviziona instalasaun ba “caravela”.

Iha deklarasaun ba Lusa, nia rekorda ideia iha monumentu nia kotuk, konsidera, sei sai atraente ba rejiaun.

"Hahú ho ideia hodi selebra portugés sira tama iha Timor-Leste. Hanoin hodi halo “caravela” ida ne’ebé konstroi ho bronze, maibé hanesan halo ho ai, konstroi “tábua” idak-idak no tuir fali monta kada pesa", nia esplika.

"Ita iha deskobridór, padre, porta-estandarte no timoroan sira ne’ebé simu sira. Ita hatene katak iha tinan 500 liubá la hanesan loloos ida ne’e maibé ita tenta halo furak uitoan. Tuir ha’unia hanoin konsege duni", nia hatutan.

Ne’e hanesan obra daruak Fundição Lage nian ba Timor-Leste, hafoin estátua Papa João Paulo II mak iha zona Tasi-tolu, iha oeste Dili nian.

"Ne’e nu’udár dezafiu boot ida tanba pesa ida ne’ebé, ha’u hanoin, iha mundu tomak la iha nein hanesan. Ha’u hanoin ba Timor-Leste sei sai hanesan pontu  atrasaun di’ak ida", nia hatete.

SAPO TL ho Lusa - Foto: Gabinete Primeiru-ministru

BUKA HATENE FRAKEZA, PM RUI VIZITA HNGV

Primeiru Ministru (PM) Rui Maria de Araújo, Tersa (3/11), hala’o vizita ba Hospital Nacional Guido Valadares (HNGV) hodi buka hatene frakeza saida maka servisu profesionais saúde sira enfrenta.

PM Rui vizita ba HNGV ne’e tanba lamentasaun no preokupasaun públiku nian durante ne’e fo sai katak, atendimentu profisionais saúde la profesional.

Vizita Xefi Governu Rui Maria de Araújo ba iha HNGV ne’e iha parte lorokraik, mais ou menus tuku 3:30 OTL, depois hala’o kedas enkontru ho Ministra Saúde, Maria do Ceo ho Diretor no Xefi Departementu HNGV sira iha sala Very Important Persons (VIP) HNGV kona-ba sa ida maka hospital refere infrenta.

PM Rui hateten, iha lamentasaun barak husi publiku kona-ba atendementu, iha mos lamentasaun kona-ba pofesioanis sira ne’ebe maka servisu iha HNGV. Kona-ba buat ne’ebe bolu subsiu de turnu, oras ekstraordinaria.

“Entaun ha’u husu ba Ministra Saude (MS) ho nia Vise MS atu tu’ur hamutuk ho Dirasaun HNGV hodi buka hatene problema saida? problema ne’e iha ne’ebe? hodi nune’e hamutuk bele rezolve,”esplika PM Rui Maria de Araújo ba Jornalista iha Palasiu Prezidensial, Kuarta (04/11).

Iha parte seluk, Ministra Saude Maria do Ceo hateten, problema esensial liu maka atendementu mediku iha hospital.

“Ita rona komunidade barak levanta kona-ba asuntu atendementu katak, enfermeira, mediku sira, asistente sira ladun amigavel, bahasa karik dehan, kasar deit, hakilar deit, entaun ida ne’e mos sai hanesan preokupasaun Primeiru Ministru (PM) Rui nian katak, ita koko oinsa atu hadia diak liu tan,”dehan Maria do Ceo.Durante enkontru ne’e, levanta mos kona-ba infraestrutura, lojistika hospital husi Diretor no Xefi Departementu HNGV sira.Avi

Jornal Nacional

ESTUDANTE GRAVIDA IHA DIREITU TUIR EZAME

Estudante feto oan sira ne’ebe maka ho kondisaun gravida (isin rua) iha direitu atu tuir izame nasional no lokal.

Prezidenti Komisaun F Parlamentu Nasional (PN) ba asuntu Edukasaun, Saude, Igualdade Jeneru, Desportu no Veteranus, Virgilio da Costa Hornai, dehan, buat ida direitu ba eskola ne’e nudar mos direitu baziku ema hotu-hotu nian, la haree ba nia kondisoens fazika.

“Uluk iha nivel universitariu, ema ne’ebe mak gravida mak bele tuir eskola, mas ba nivel sekundaria la bele. Ita tenke muda ona paradigma katak dereitu asesu ba edukasaun la hare ba ninia estatutu sosial katak nia klosan ka kazal no mos la hare ba nia idade,” dehan Prezidenti komisaun F, Virgilio Hornai ba Jornalista sira iha uma fukun PN, Kuarta (04/11/2015).

Membru PN husi Bankada Partidu Demokratiku (PD) ne’e hatutan tan, asesu ba edukasaun la hare ba ninia katuas ka ferik, kaben nain ka klosan, tanba ne’e maka estudante ne’ebe mak ho kondisaun gravida iha direitu partisipa ezame ka prosesu aprendijajen hanesan bai-bain ho estudante sira seluk.

“Hau simu informasoes barak husi alunus sira ne’ebe infrenta situasaun sira hanesan ne’e katak sira gravida depois professores hasai tiha sira husi eskola, ne’e la bele katak sira nia direitu eskola nafatin iha, maibe desizaun ne’e tenke mai husi sira, mas sosiedade sira nia hanoin ne’e oin seluk ona no halo estudante sira ne’e moe no lakohi ba eskola ona, ida ne’e tenke muda ona, tanba buat ida eskola ne’e la haree ba nia estatutu vida sivil nian,” Virgilio sublinha hikas.

Lei baziku Edukasaun heteten katak la halo eskluzividade ida, katak ema ne’ebe gravida ona la iha ona direito, maibe lei ne’e hateten katak obrigasaun Estadu ne’e atu provite eskola gratuita ida ba sidadaun hot-hotu iha fatin hotu ho ninia asesu ida igual.Deputado ne’e husu ba profesores sira atu respeita sidadaun sira nia dereitu ba asesu edukasaun hodi la haree husi ninia problema sosiais ne’ebe nia infrenta.

Foin lalais ne’e, estudante sekundaria sira ne’ebe mak ho kondisaun Gravida partisipa iha ezame nasional no mos lokal to’o remata. mia

Jornal Nacional

RAI NAKDOKO, PN ‘PANIKU’

Membru Parlamentu Nasional (PN), Kuarta (4/11/2015), halai husik hela plenaria, tanba paniku ho rai nakdoko. Komunidade Dili, horseik dader, rai nakadoko ho nia volume 4,5 no iha meudia tuku 13 liu mnunutu balun, akontese tan rai nakadoko ho nia volume 5,7. Rai nakadoko ne’e ninia fukun iha Ilha Alor, Provinsia Nausa Tengara Timur (NTT), Republika Indoensia.

Rai nakadoko iha meudia ne’e, desputadu sira debate namanas hela alterasaun lei divizaun administrativu teritoriu no atu halo votasaun ba final global proposta lei numeru no.24/III alterasaun dala uluk lei 11/2009 de 7 Outubro kona ba divizaun alternativa teritoriu.

Prezidenti Parlamentu Nasional, Vicente Guterres, klarifika katak, rai nakdoko ne’e rezulta kamera iha sala plenaria at, tan ne’e husu ba tekniku sira atu hadia iha parte loraik.

Iha fatin hanesan Deputadu Bankada Fretilin, Eladio Faculto hatete, akontesementu traumatiku ho rai nakdoko ne’e, tanba Timor-Leste la iha previzaun ba akontesementu sira ne’ebe mak iha hodi sustenta nasaun ba oin.

“Akotesimentu rai nakdoko ne’e ita la iha makina hodi halo previzaun kona ba akontesimentu ne’e atu ita sustenta ita nia Nasaun ba oin tan ne’e ita hetan defikuldades barak tanba ita la iha aparelu atu halo previzaun antes akontesementu,” dehan Eladio.

Liu tiha minutu balun nia laran deputadu sira konitnua fali plenaria hodi diskute no konsege altera ho votus afavor 40, kontra 0 no Abstensaun 4, nune’e parte lokraik deputadu sira sei kontinua halo diskusaun no votasaun projeitu rejulusaun no.25/III objetivu dezenvolvimentu sustentavel no aprovasaun jornal PN. mia

Jornal Nacional

PR TAUR-LERE DISKUTI SEGURANSA BA KOMEMORASAUN TINAN 500

Xefi Estadu Maior Jenerál das FALINTIL Forsa Defeza Timor-Leste (F-FDTL), Maijor Jeneral Lere Anan Timor, Kuarta (04/11) hasoru malu ho Prezidenti Repúblika (PR) Taur Matan Ruak, hodi diskuti konaba seguransa ba komemorasaun tinan 500 iha Oecussi, iha fulan ida ne’e.

“Ami ko’alia oituan kona-ba preparativu ba 28 Novembru ne’ebé que atu halo iha Oe-cusse,”informa Lere Anan Timor ba Jornalista sira iha Palácio Prezidensiál Aitarak Laran Dili, Kuarta (04/10).

Lere Anan Timur hatutan katak, kestaun seguransa ne’ebé mak foka liu iha sorumutu ne’e mak liu-liu seguransa iha fronteira, tanba komemorasaun tinan 500 evanjelizasaun tama iha Timor ne’ebé mak selebra iha Oecussi.

Maijor Jeneral Lere Anan Timor informa katak, iha nia sorumutu ho Xefi Estadu Taur Matan Ruak ne’e, ko’alia liu kona-ba seguransa iha fronteira.

Lere hatutan, husi instituisaun F-FDTL no Polisia Nasional Timor-Leste (PNTL) sei halo preparasaun masimu hodi kombate kazu krime sira iha fronteira.

“Ba seguransa nian, instituisaun rua ne’e sei koordena atu halo seguransa iha fronteira, para ita sente hakmatek kona-ba krime organizadu, kona-ba droga,”relata Lere Anan Timor.

Nia haktuir, instituisaun rua ne’e, sei esforsu-an atu fó seguransa iha área fronteira nian iha Oe-cusse, atu prevene krítikas husi nasaun seluk, tanba bainaka husi nasaun barak mak sei mai partisipa iha seremonia ne’e.

“Ita lakohi Indonesia krítika ita dehan katak ita mak ponte ba droga tama Indonesia no tama Australia ne’ebé ita tenki preokupa ba ida ne’e,” Lere Anan Timur dehan.

Durante enkontru ho Prezidenti Repúblika ko’alia mós kona-ba situasaun no bem estar forsa nian sobre servisu iha rai laran.

Iha okaziaun ne’e mós, Lere Anan Timor informa katak, Governu liu husi Ministeriu Defeza (MD) preve ona orsamentu hodi halo rehabilitasaun ba portu naval, tanba portu naval antes ne’e halo ona maibé laiha kualidade.

“Portu Hera ne’e ha’u hanoin sei di’ak ne’e mak ita nia ro iha hela ne’eba, ita nia Governu reve ona atu rehabilita ka halo portu foun,” informa Lere Anan Timor.cos

Jornal Nacional

KAZU DELTA, SASAN BARAK AHI HAN

Uma kain tolu ne’ebe hetan dezastre husi kazu ahi han uma iha Delta-Dili segunda kalan kuaze iha oras tuku 9.00OTL ne’e sasan barak maka aihan la konsege salva.

Almeida Nunes, nudar nain ba uma primeiru ne’ebe ahi han senti tristi ho akontesimentu ne’e, maibe nia parte agradese tan husi akontesimentu ne’e la rezulta ema kanek no mate maske sasan lubuk maka ahi han.

“Husi akontesimentu ne’e la konsege lori sai sasan hotu hanesan ropa, mina gajoel 11 ton, minarai 10 ton, jerador supa mina 5, jerador las listrik 4, osan iha armari laran $1000.000 no osan $5400 sei iha armari besi (brankas) ne’e i ate agora ami seiduak bele loke tanba sei hein ministerio kompetente sira mai iha oin mak hodi makina koa deit armari ne’e, maibe hau mos agradese tebes tanba ami familia uma kain tolu ne’e laiha ema ida ke kanek ou mate,”Almeida Nunes ba JN-Diario, iha ninia uma Delta-Dili, Kuarta (04/11) horseik.

Nia haktuir ahi han mos kareta kijan ida ne’ebe ahi han motuk trek no kareta mina nian konsege dudu sai maibe ahi mos han dunik iha kareta oin.

“Kareta kijan ida mak ami la konsege lori sai ne’ebe ahi han motuk tia, maibe trek ida ho kareta mina nian ida konsege lori sai, maibe ahi mos lakan tuir kedan ne’e dunik ahi han deit kareta oin ne’e no hetan ajuda mos husi bombeirus,”hatutan Almeida.

Husi akontesimentu ne’ebe refere nudar vitima la tau sala ba ema no lakohi deskonfia ema maka sunu, tanba nia dehan laiha faktus ba kzu askontesimentu ne’e.

“Ha’u lakoi duun ema arbiru selae ha’u mak sei hatan iha maromak nia oin, maibe ho akontesimentu ida ne’e ha’u hasae ba Maromak deit tanba Nia mak hatene liu. Kronologia husi akontesimentu ne’e ami mos la hatene tanba iha tiha foho, maibe oan sira konta katak sira la sunu lilin ou la tau ahi iha tempu ne’eba, maibe derepenti deit ahi mosu uluk iha tanki fase bikan,”espelika Almeida.

Maibe nia simu ho liman rua ho akontesimentu ne’e nudar dezafius ne’ebe maka nia hasoru iha moris, ne’e duni la ejiji Estadu atu selu.

“Husi akontesimentu ne’e ha’u la ejiji ba Governu atu selu ou fo fali sasan ne’ebe ahi han, tanba nudar ema moris sei buka sasan hirak ne’e, maibe konformi desizaun Governu nian,”tenik Almeida.

Nune’e mos Daniel Monis nudar vitima husi dezastre ne’e hateten, la konsege lori sai sasan husi uma laran, tanba ahi lakon bo’ot tebes.

“Kuaze sasan barak mak hau la konsege lori sai inklui sasan keos nian no osan ho montante $600,”dehan Daniel.

Iha fatin hanesan Maria Maia Monis (Patraun Joker) hatutan, sasan barak maka aihan, maibe Bombeirus to’o lalais hodi hamate ahi ne’ebe ahi ladun tama uma laran.

“Maibe sasan balun konsege ahi han hanesan Bis ida, makina fase ropa, televizaun, biliard, jelera no seluk seluk tan i ahi la konsege han to sasan loja nian maibe janela, arus, odamatan ahi han hotu,”hateten Maria.

Husi parte polisia no Ministerio Solidariedade Sosial (MSS) ba haree ona no MSS fo ona ajuda uitoan ba uma kain tolu ne’e hanesan fos, mina, supermi no lona. Ita

Jornal Nacional

IMI NIA SUSAR, HA’U NIA TERUS

 

Fasil atu hamnasa, bainhira mehi bele sai realidade, maibé difisil atu tanis, bainhira lakon oportunidade ba ksolok moris nian.

Fasil atu halo promesa, maibé difisil atu kumpri, i liman karuk difisil atu subar husi liman koanan, kuandu liman karuk tama ona ba bolsu karuk, maske laiha lian. Difisil atu subar oin iha naroman laran, maibé fasil atu koñese ema iha nakukun laran.

Situasaun ida ne’e mak akontese iha rai doben Timor Leste ne’e, tanba maske Governu troka dala hira ona ho promesa oi-oin husi ukun na’in sira, maibé povu sei kontinua moris iha kiak no mukit laran.

Ksolok nakonu ho triste husi povu hotu iha Suku 350 resin ne’ebé Prezidenti Repúblika, Taur Matan Ruak vizita ona, tanba sira sente katak, durante ne’e benefisiu husi ukun rasik-an ne’e, dolar iha ukun na’in sira nia hela fatin.

“Ha’u vizita ona suku barak iha Timor Leste (TL) ne’e, tanba ha’u hakarak rona imi nia terus no susar. Ha’u vizita atu agradese imi, ba buat hotu ne’ebé imi halo, hodi ohin loron Timor Leste bele sai nasaun independenti ida,” hatete Taur Matan Ruak ba povu hotu ne’ebé mai hobur hodi rona nia lian.

Maioria povu husi labarik, joven ferik no katuas, atu loron manas ou kalan bo’ot mós, sira la sente kolen hodi la’o do’ok husi sira nia hela fatin, atu ba haree Xefi Estadu ne’e nia oin no rona nia lian.

Laran ne’e dodok tebes, bainhira haree ferik no katuas sira ne’ebé mak la’o labele ona mós, sira dolar hodi mai toba hein Taur Matan Ruak iha fatin ne’ebé Xefe Estadu ne’e atu hela ba, hodi ida-ida hato’o ninia susar ho terus ba aman nasaun ne’e.

“Moris di’ak so mai lalais, sé ita badinas, ita hamutuk hodi luta kontra kiak no mukit. Ita tenki haree ekilibru ba dezenvolvimentu,” afirma Xefi Estadu ne’e.

Taur Matan Ruak hatutan, Timor Leste ne’e familia ida de’it, no Timor ne’e ema hot-hotu nian, la’os ema ida nian de’it.

Taur Matan Ruak kontinua anima nia reinu sira ne’ebé nunka kole hodi rona nia lian katak, ukun an ne’e, hanesan ponte ida hodi povu hakat husi mota sorin ba mota sorin, tanba povu seidauk hetan moris diak.

“Ameasa bo’ot ba nasaun la’os husi Liur, maibé iha ita nia uma laran rasik, hanesan deskontamentu sidadaun ninian ba dezemvolviementu ne’ebé mak la’o iha ita nia nasaun, Governu tenki buka dalan hodi rezolve problema nee,” relata Taur Matan Ruak.Cornelis Tapo

Jornal Nacional

ANIVERSARIU PROKLAMASAUN TL BA DALA 40, MAE FO INSTRUSAUN ADMINISTRASAUN DILI HADIA FATIN

Vise Ministru Administrasaun Estatal (MAE), Tomas Cabral, fo instrusaun ba Adminitrasaun Municipiu Dili hodi hadia fatin ba selebrasaun aniversariu Proklamasaun Independensia ba dala 40 (1975-2015) ne’ebe sei selebra mos iha Tasi-Tolu, Dili.

Tanba ne’e MAE hahu observa fatin no halao sorumutu ho administrasaun Dili ho objetivu atu fo asistensia ba Administrasaun Munisipiu Dili hodi halo preparasaun diak liu tan ba komemorasaun refere.

“Atividade sorumutu no vizita ida ne’e parte husi atividade Administrasaun Munisipiu Dili nian, tanba ita hatene katak Dili maka kapital Timor-Leste ninian, tanba ne’e maka Ministeriu Administrasaun Estatal (MAE) hanesan komisaun organijadora nasional iha papel ida atu mai fo extensia ba administrasaun Dili nune’e sira nia preparativus bele diak liu tan antes tama selebra aniversariu restaurasaun independensia 28 Novembru 2015 ba dala 40 iha Tasi Tolu,”Tomas Cabral ba jornalista sira iha Tasi-Tolu, Kuarta (04/11).

Komemorasaun ne’e halao iha sidade laran mais depois de administrador postu sira konvida komunidade kada postu administrativu 500, entaun ema rihun 2 administrasaun Dili la kobre tanba ne’e ministru Planeamentu Estratejiku (MPIE) fo ninia sujestaun para muda mai iha Tasi Tolu.

“Selebrasaun ne’e sei iha mos expozisaun hahu kedas dia 16 Novembru 2015 ne’ebe sei loke husi Primeiru Ministru Rui Maria de Araujo, e iha selebrasaun ne’e mos sei loke mos jogu futu manu, no sei realija mos serimonia kalan kultura,”afirma nia.

Hahu iha loron 9 to’o 14 sidade laran tomak se deit maka halo atividade ekonomiku iha sidade laran uja predi Estadu ou predi privadu sira no inklui mos povu tenki koordena hasae bandeira hahu kedas husi loron 16.

“Selebrasaun tinan 40 independensia no tinan 500 evanjelizasaun relijiaun katolika tama TL ne’e halo dala ida deit, ne’ebe husu ba seitor privadu no povu hotu-hotu sidade Dili atu partisipa ativu no kolabora oinsa fo susesu ba komemorasaun ida ne’e,”apela Tomas Cabral.

Espelika ni, iha Oe-Cusse ne’e ita halo selebrasaun nasional ninian, no autoridade ho ekipa husi komisaun organijadora nasional maka apoiu iha ne’eba, entaun iha ne’e iha mos komemorasaun iha nivel munisipiu 12, aumenta 61 postu administrativu.

Sub komisaun nasional fo apoiu Administrasaun Munisipiu Dili ne’e, tanba bainaka sira mai husi rai liur antes atu ba Oe-Cusse sira bele hetan divertimentu ruma husi preparasaun ne’ebe maka ita halo ona iha Dili. Tomas Cabral afirma mos karak fundus ne’ebe uja ba selebrasaun ne’ebe refere mai husi Orsamentu Jeral Estadu (OJE) ho valor 200 mill. ves

Jornal Nacional

MATE HANESAN KONTINUASAUN ODOMATAN MORIS NIAN

Diretor nasional apostuladu da orasaun, Padre Violanto da Costa Soares afirma, mate hanesan kontinuasaun odomatan ba moris rohan laek ninian, maibe ema ida-idak tenki moris tuir vida ida ne’ebe loloos hodi hetan moris ida ne’e.

“Moris tuir vida loloos maka maka moris tuir buat ne’ebe Maromak hakarak, ne’ebe moris tuir Maromak nia ilas ne’e ba, se o moris tuir Maromak nia hakarak lolos, entaun aban bainrua kuandu mate ne’e hanesan odomatan ida para hasoru vida moris rohan laek ninian,”Pe. Violanto Soares ba jornalista sira hafoin selebra missa loron finado iha Semiteriu Santa Cruz, Segunda (02/11) ne’e.

Liafuan São Francisco Assis ninian iha inu kantiku konaba natureza ho titulu lau dato sei, nia dehan lau dato seixa irmã vida, lau dato seixa adeus pela irmão vida, lau dato seixa pela irmão morte, ne’ebe dehan katak hahii Maromak ba feto moris nian ne’e, no hahii Maromak tanba mate ne’e, nune’e nia la haree mate ho moris ne’e iha diferensia, tanba mate hanesan kontinuasaun odomatan ne’ebe loke ba moris rohan laek ninian.

Nia hatutan, moris no mate ne’e laiha diferensia, tanba ba ema ne’ebe mak sei moris prepara an para abanbainrua mate karik hodi hetan fali moris foun iha reinu lalehan ninian.

“Entaun ho selebrasaun loron matebian ida ne’e hodi hanoin fila-fali katak matebian sira ne’ebe agora iha semiteriu Santa Cruz ne’e barak maka mate ho hahalok diak, ne’ebe ita reza ba sira atu vida moris ne’ebe maka uluk sira iha mundu ida ne’e sei bele kontinua fali ba vida seluk iha lalehan hamutuk ho Maromak,”tenik Pe. Violanto.

Nia hatutan mos katak, atu sira ne’ebe maka agora iha purgatoriu bele hetan perdua ba sala sira ne’ebe maka sira halo hodi ba lalehan, atu sira ne’ebe maka seidauk bele ba lalehan bele hakman sira sala ne’ebe maka sira halo durante sira sei moris iha mundu.

“Se ita la moris tuir vida ne’e didiak, aban bainrua la hetan vida moris rohan laek, moris tuir vida ne’e katak halo tuir Maromak nia hakarak hanesan Jesus hanorin ita katak, moris tuir ukun fuan iha konkretu moris loro-loron nian, no halo karidade hahuu husi iha familia durante sei moris,”nia sublinha.

Pe Violanto hateten, ita ne’ebe maka agora halo selebrasaun loron defuntus ne’e hamutuk ho sira ne’ebe maka agora iha lalehan no iha purgatoriu ne’e ita ida deit, tanba Maromak ida deit, ne’ebe liu husi missa ida ne’e atu hakman sira nia terus.

Selebrasaun loron ida ne’e signifika ita konsidera katak vida ne’e sei iha hela, no matebian sira ne’e kontinua hela vida maske ita la haree malu, maibe sira mos iha ne’eba ho vida ida. ves

Jornal Nacional