FRONTEIRAS PRESIZA KONDISAUN DIAK

Atu evita aktu ilegal no infiltrasaun husi fronteira maritima no fronteira terrestres, presiza tebes kria kondosoens ba forsa seguransa maritima ho fronteira trestres.

Lia hirak ne’e hato’o husi Xefi Estadu Maior Jeneral F-FDTL, Maijor Jeneral Lere Anan Timur, hodi responde jornalista sira iha Kuartel Jeral F-FDTL, Fatuhada, Dili, Kuarta (28/10/2015).

Lere afirma katak, forsa sira ne’ebe kolokadu iha fronteira tenke iha minimu kondisaun diak hodi bele fasilita sira servisu diak liu tan hodi kombate atividades ilegais ho krimi organizadu sira ne’ebe bele tama husi linha fronteira.

Nia hatutan, problemas barak maka sempre mosu iha fronteira tanba ne’e maka estadu presija hare no kria kondisaun ba iha area importante sira ne’e hodi bele asegura seguransa rai laran nian.

“Ita presija hametin diak liu tan ia nia areas importantes sira ne’e tanba kestaun interese nasional maka ita haree uluk iha area maritima ho fronteira nian ne’e,” hateten Lere Anan Timur.

Antes ne’e, Primeiru Ministru Rui Maria de Araujo mós foka ona kona ba kestaun seguransa nasional nian hodi bele hametin diak liu tan iha area importante ne’ebe maka sai hanesan odamatan ba krimi organizadu sira. Eus

Jornal Nacional

MALNUTRISAUN MAIORIA INAN ISIN RUA HO LABARIK

Koordenador ba Programa Nutrisaun Saude (KPNS) Servisu Saude Municipiu Dili, Francisco da Silva informa, malnutrisaun dala barak akontese ba inan isin rua no labarik sira maka numeru bo’ot liu.

Tuir peskiza husi South East Asian Minister of Education, Regional Center for Food and Nutrition (SEAMEO RECFON) iha tinan 2013 nian ne’e mal natrisaun ho numeru as, kompara tinan 2015 tun oituan, maske nune’e la fo sai numeru mal nutrisaun.

“Atividade ida ne’e ita halo desiminasaun konaba rejultadu peskiza nutrisaun 2013 ne’ebe maka SEAMEO RECFON halo tiha Timor-Leste inkui iha municipiu Dili, ne’ebe ninia rejultadu hatudu katak kuaze inan isin rua no oan sira iha TL ho kondisaun malnutrisaun, ”Franscisco da Silva ba JN-Diário hafoin aprejenta rejultadu peskiza malnutrisaun TL iha salaun enkontru munisipiu Dili, Matadouru Kuarta (28/10).

Relasiona rejultadu peskiza ne’e husu ba identidade hotu atu servisu maka’as hodi bele redus problema ne’ebe refere nune’e dadaun Ministeriu Saude suplementa ona aihan.

“Politika ministeriu saude estabelese ona suplementu ai han, ho ninia objetivu atu interven para labarik sira labele monu ba kauza malnutrisaun, tanba ita nia hahan iha uma kain ladun sufisiente ho ninia nutrisaun hanesan kalori no protein ladun sufisiente, entaun suplementu ida ne’e mai atu haforsa liu tan,”haktuir nia.

Hatutan nia, suplementa aihan Timor vita ne’e agora fabrika ona iha Railaco e sei implementa iha fulan Novembru tinan 2015 nia laran.

“Fabrika ne’e hodi halo suplementu ai han hanesan batar uut ne’ebe mistura ho nutriente balun, ne’ebe espesifiku foba ema ne’ebe.

malnutrisaun moderadu para atu labele monu ba malnutrisaun grave,”espelika nia.

Tanba n e’e tuir nia Ministeriu Agrikultura no Peskas (MAP) tenki hasae rendimentu liu-liu ba batar no forekeli para fabrika ne’e la’o nafatin.

Informa nia, aihan no Timor vita ne’e sei distribui ba sentru saude area Munisipiu Dili, hanesan ida naran planpisat ba labarik sira, no Timor vita ne’e ba inan isin rua ne’ebe malnutrisaun, ba oan sira fulan ida sira han planpisat falun 30 no inan fulan ida han Timor vita kilograma 6.

Tantu medidas ne’ebe maka parte saude sei fo mos formasaun konaba malnutrisaun ba komunidaes sira para hadok labarik sira husi moras.

“Husu ba inan sira kuandu labarik moras tenki mai konsulta hodi asesu ba mikronutriente hanesan vitamina A no almenajol, e tenki simu ai han suplementu husi sentru saude,”tenik nia.

Entretantu tuir Ofisial Dezenvolvimento Comunitaria (CDO), Postu Administrtivu Metinaro Franscisco Paul da Silva hateten, atividade ida ne’e hare’e liu malnutrisaun inan no oan nian.

“Entaun haree husi ne’e bele fo informasaun mai ami autoridade lokal sira konaba malnutrisaun, no hodi habelar tan informasaun ne’ebe as liu iha municipiu Dili,”akresenta nia.

Partisipa aprejenta rejultadu peskiza malnutrisaun ne’e kompostu husi, reprejenta sentru saude, reprezentante administrador postu administrative, xefi suku, no pesoal saude ne’ebe servisu konaba labarik nian iha Dili laran, nutrisionista ho parseiru ONG sira hanesan Healtnet inklui Alola Foundation. ves

Jornal Nacional

EMA 43 MORAS MAL NUTRISAUN IHA CSC – MAIORIA EMA KBIIT LAEK

Centro Saúde Comoro (CSC) husi fulan Janeiro to’o Junhu rejista ona moras malnutrisaun hamutuk ema 43.

“Malnutrisaun ne’eb ami rejista ne’e kona ba labarik, inan isin rua no inan fo susu tamba ita haree kazu malnutrisaun akontese liu-liu ba ema sira ne’eb kbiit laek no ita bele dehan katak rata- rata loron ida ema bele han US$ 5 maibe balun la’e han loron ida US$ 1 dolar deit tamba sira laiha osan atu hola aihan ne’ebe mak iha nutrisaun hanesan mantolun, naan ou modo tahan ruma atu han netik iha semana ida tamba sira laiha osan entaun bele akontese malnutrisaun liu liu ba ema sira ne’ebe kbiit laek,”informa Xefe CSC, Abel B. dos Santos, ba JN-Diário iha nia servisu fatin Kinta (29/10/2015).

Abel esplika, númeru moras malnutrisaun ne’ebe rejista iha CSC ne’e maioria husi Postu Administrativu Dom Aleixo, Munisípiu Dili.

“Númeru mal nutrisaun ne’e mai husi area Dom Aleixo populasaun sira ne’ebe hela partensia Kampu Alor, Bairo Pite, Fatuhada, Bebonuk, Aimutin no malnutrisaun barak mak Bairo Pite no Fatuhada,”dehan Abel.

Atu halo prevensaun ba moras malnutrisaun iha CSC mak fo tratamentu nomos fo promosaun.

Nune’e, Inan Julia Mendonca hateten, kazu malnutrisaun akontese ba labarik no inan isin rua sira ne’e tamba dala ruma ekomonia familia uma laran mak fraku.

“Ita koalia konaba moras malnutrisaun ne’e tamba ita haree povu Timor barak mak sei moris iha kiak nia laran ou inan – aman barak mak la servisu,”dehan Julia.car

Jornal Nacional

Enkontru entidade reguladór sira komunikasaun sosiál luzófona nian hala’o iha Kabuverde

Reprezentante sira hosi entidade reguladora sira komunikasaun sosiál lusofonia nian sei hala’o sorumutu iha semana oin, iha Praia, Kabuverde, iha enkontru mak sei marka entrada estrutura kabuverdiana mak foin kria nian ba plataforma entidade reguladora sira lia-portugés nian (PER).

IV Enkontru Plataforma Entidade Reguladora  Komunikasaun Sosiál hosi Nasaun no Territóriu Lia-Portugés nian (PER), ne’ebé sei hala’o hosi loron 02 to’o 06 novembru, sei halibur iha Kabuverde reprezentante sira hosi Portugál, Angola, Mosambike, Kabuverde, Giné-Bisau no Saun Tomé no Prínsipe.

Timor-Leste, ne’ebé oras ne’e detein prezidénsia rotativa plataforma nian, sei reprezenta hosi sekretáriu Estadu Komunikasaun Sosiál, Nélio Isaac Sarmento.

Brazil no Giné Ekuatoriál mak sei la marka prezensa.

Tuir diretór-jerál Komunikasaun Sosiál Kabuverde nian, Justino Miranda, enkontru ne’e ho lema "Dijitál no Lia-Portugés iha Globalizasaun" no maiór parte hosi reuniaun hirak ne’e sei la nakloke ba públiku, iha loron-kuarta mak iha sesaun aberta ba públiku.

Iha deklarasaun ba ajénsia Lusa, Justino Miranda, esplika katak durante enkontru sei apresia no vota entrada Autoridade Reguladora ba Komunikasaun Sosiál Kabuverde nian (ARC) hanesan membru plataforma nian.

Responsável ne’e adianta katak karaik entrada ARC nian hetan aseitasaun hosi membru sira seluk  sei propoin entidade ne’e hodi asume prezidénsia plataforma nian, mak iha tinan oin sei asume hosi Kabuverde.

ARC, simu pose iha fulan jullu no funsiona ba dala uluk iha Kabuverde, prezide hosi jornalista Arminda Barros.

Plataforma Entidade Reguladora sira Komunikasaun Sosiál hosi Nasaun no Territóriu Lia-Portugés nian (PER) konstitui iha loron 22 outubru 2009, iha Lisboa, ho objetivu atu halo sai fórum diskusaun, koperasaun no interkámbiu informasaun no investigasaun nian iha matéria sira relativa ho regulasaun komunikasaun sosiál nian.

Membru sira Plataforma nian hala’o sorumutu, tuir regra, iha tinan ida dala ida, no prezidénsia rotativa asume hosi nasaun organizadór hosi reuniaun anuál.

Hosi programa reuniaun nian, destaka sesaun públika, ajenda ba loron 04 novembru, ne’ebé sei hala’o meza redonda ida kona-ba "Regulasaun Komunikasaun Sosiál iha Kabuverde".

Sei debate mós tema sira mak hanesan papél meiu komunikasaun sosiál nian iha kresimentu lia-portugés nian iha Giné-Bisau ka média foun sira no direitu umanu, aprezentasaun kargu portavós Conselho Nacional de Comunicação Social de Angola nian.

Prezidente Entidade Reguladora para a Comunicação Social nian, Carlos Magno mak sei reprezenta Portugál iha enkontru ne’e.

SAPO TL ho Lusa