PARLAMENTU NACIONAL RDTL: VOTU VINGANSA VERSUS VOTU KONSIENSIA

Analiza kona-bá Sistema Polítika Governasaun iha Timor-Leste nu’udar Estadu de Direitu Demokrátiku

Evangelino de Jesus Fátima*, LCG - opiniaun

Loron diak ba belun Timor oan tomak, hau fiar katak iha momentu ne’e ita hotu iha kondisaun saudavel iha ita idak-idak nia lala’ok moris lor-loron kompara ho situasaun polítika real ne’ebe akontese iha tempu hirak liu ba, relasiona ho Sua Exelênsia Prezidente da Repúblika “Taur Matan Ruak” deside hodi veta Orsamentu Geral Estadu ne’ebe haktuir Prezidente da Repúblika nia hanoin polítika katak hosi tinan ba tinan, orsamentu ne’ebe Parlamentu Nacional sempre aprova ho votus unanimidade la reflekta nesesidade sidadaun Timor-Leste no laiha progresu ba prosesu dezenvolvimentu nasional iha seitor prioridade sira hanesan edukasaun, saude, agrikultura ho seitor relevante sira seluk. Desizaun sira seluk mak Prezidente da Repúblika mos seidauk promulga Alterasaun ba Lei Orgaun Administrasaun Eleitoral ne’ebe haruka direta ba Tribunal de Recurso ne’ebe ezerse hela kna’ar Supremu Tribunal de Justisa nian husu hodi hare konstitusionalidade ba alterasaun lei refere. Desizaun ida seluk mak Prezidente da Repúblika deside hodi halo ezonerasaun ba mandatu Chefe Estadu Maior General Falintil-Forsas Defeza Timor-Leste Komandante “Lere Anan Timur” ne’ebe termina ona ninia mandatu.

Hosi artigu ne’e autor hakarak análiza situasaun polítika iha rai laran tuir prespektiva personal, hodi hare’e kona-bá subordinasaun polítika hosi servisu entre orgaun soberanu estadu RDTL haktuir baze legal Konstituisaun RDTL. Iha artigu ne’e mos sei halo koorelasaun entere desizoens polítika Prezidente da Repúblika ne’ebe atribui mos mai hosi Konstituisaun RDTL ho artigu ida hosi Editorial Jornal Nacional Diário edisaun 09 Marsu 2016, ano 011-2610, publikasaun hosi GMN-Grupo Média Nacional). iha koluna editorial jornal ne’e haklaken kona-bá “Vingansa Vs Konsiensia” ne’ebe sita kona-bá aprovasaun vizita Sua Exelênsia Prezidente da Repúblika RDTL nia palnu atu halo vizita ofisial ba Japaun. Iha editorial ne’e analiza katak durante ne’e, votus polítiku hodi apoia viagem ofisial Xefe Estadu nian hosi Parlamentu Nacional sempre aprova ho situasaun a-favor ho termus unanimidade iha plenária Parlamentu Nacional. Maibe depois Xefe Estadu halo itervensaun ho ninia desizoens polítika balun ne’ebe membru Parlamentu Nacional sente soke, proposta ikus Xefe Estadu nian atu halo vizita ofisial ba nasaun Japaun, rezultadu plenária hatudu momo’os katak rejeita totalmente. 36 Deputadus mak fo votu abtensaun signifika katak la aseita viagem ofisial Xefe Estadu nian, Deputadu ne’ebe fo votus a-favor ho total hamutuk 12 no votus kontra 0. Haktuir métodu atribuisaun votus polítiku ba aprovasaun kualker asuntu estadu nian iha Parlamentu Nacional Deputadu ne’ebe partisipa iha Plenária tenke prienxe kourum ho partisipasaun 2/3 votus. Signifika katak Deputadu ne’ebe fo sira nia votus hodi halo aprovasaun ka bele pasa ho votus minimu 33 nu’udar votu maioria simples ne’ebe aprova no kualker desizaun estadu ne’ebe sira aprova bele aplika. Ida ne’e prosesu normal ne’ebe la’o hodi foti desizaun iha estadu ne’ebe opta sistema estadu de direitu demokrátiku hanesan Timor-Leste. Metodu ida seluk mak desizaun estadu ne’ebe liu hosi desizaun polítika orgaun lejislativa bele aprova ka pasa wainhira Deputadus 65 ne’e kompletu no aseita ka fo votus maiora ne’ebe hanaran votus “Unanimidade”. Desizaun ba aprovasaun viagem ofisial Chefe Estadu nian hosi parlamentu nasional nakfilak fali tamba kontra fali prinsipiu estadu de direitu demokrátiku nia lala’ok katak Deputadu sira laiha mak vota kontra, votus a-favor mak 12 no abstensaun mak 36. Ne’e tamba saida? Dalaruma análiza iha editorial Jornal Nacional Diáriu nia mak los katak Parlamentu Nacional nia membru Deputadu sira fo sira nia votu abstensaun 36 ne’e tamba vinga ho desizoens Xefe Estadu ne’ebe deputadu sira sente prejudika sira nia desizaun polítika hodi asegura sira nia mandatu no interse polítiku.

Hosi hau nia prespektiva halo análiza kona-bá situasaun polítika iha ita nia nasaun ne’ebe agora la’o dadaun, sai pergunta bo’ot ba ita hotu, tantu iha nivel lokal, nasional, rejional ka internasional. Pergunta fundamental mak ne’e; Nasaun RDTL ne’ebe iha Konstituisaun hateten dehan Estadu de Direitu Demokrátiku ne’e lo’os ka lae? hau nia hanoin mak ne’e; keta halo Timor-Leste opta sistema estadu de direitu demokrátiku ne’e sai hanesan kurtina deit hodi prienxe kritériu ba formulasaun ukun ne’ebe nia pr átika mai hosi “Teoria Trias Polítika” hosi matenek nain Montesquieu. Trias polítika nia hanorin hodi fahe ukun iha nasaun demokrátiku mak hafahe póder polítiku hosi orgaun soberanu sira hanesan póder Lejislativu, Ezekutivu no Judikativu. Modelu ukun ne’ebe mai hosi dezeña teória polítika Montesquieu nian haketak poder tolu ne’e nia lala’ok liu hosi Konstituisaun no Lei sira, iha nasaun demokrátiku. Kompara ho nasaun sira seluk, modelu fahe ukun iha Timor-Leste sei diak liu no kompletu tamba ita iha Orgaun Soberanu hamutuk 4 mak; Presidensia da Repúblika, Parlamentu Nacional, Governu no Tribunais. Ita hotu mos hatene katak modelu hosi typu ukun polítika ho forma saida deit tenke iha ninia frakeza, vatagem no dez-vantagem. Maibe, frakeza ka vantagem ho ninia dez-vantagem sira iha subordinasaun ukun nasaun demorkrátika nian sei la’o ho didiak wainhira komponentes ne’ebe sai makaer ukun iha estadu de direitu demokrátiku la’o tuir ka reflekta prinsípiu sira ne’ebe hatu’ur iha Konstituisaun no Lei sira.

Iha konseitu teoria trias polítika nia doutrina hanorin katak orgaun soberanu estadu nian hala’o sira nia kna’ar ho responsabilidade ketak-ketak ba ninia lalaok governasaun iha estadu ho nasaun nia laran. Ita hotu mos hatene katak nasaun ho estadu sira iha mundu tomak aplika konseitu trias polítika ba ninia lala’ok governasaun tomak. Razaun fundamental mak utiliza konseitu ne’e sai hanesan métodu hodi halo polítika ho demokrátikamente iha espreansa ba prátika ba lala’ok governasaun ne’ebe la kozu, governu bele hases’an hosi hahalok korupsaun hosi nia instituisaun idak-idak, no bele hamosu prátika “Kontrolu no Ekilíbriu”. Atu hateten deit katak, se desizoens Chefe Estadu nian no mensagem polítika ne’ebe Prezidente da Repúblika fosai iha Parlamentu Nacional iha tempu hirak liu ba, tuir autor nia análiza katak ne’e hanesan aplikasaun ba Supremu Lei ho Justisa iha Timor-Leste atu asegura direitu fundamental sidadaun sira nian iha nasaun demokrátiku. Maibe sai fali desafiu bo’ot ida wainhira Deputadu sira iha parlamentu Nacional sente ofendidu ho deklarasaun sira ne’ebe sai hosi mensagem Xefe Estadu nian. Ita mos kompriende katak situasaun iha Timor-Leste polítika mak la’o nune’e tamba ita nia Deputadu sira nian hanoin polítika mos klo’ot atu interpreta situasaun sira ne’e liga ho konseitu trias politika ne’ebe ita aplika iha ita nia lala’ok governasaun hosi funsionamentu orgaun soberanu sira. Análiza seluk atu dehan katak desizoens Prezidente da Repúblika nian iha lejitimidade liu kompara ho desizaun sira ne’ebe deputadu sira maioria foti iha parlamentu ho deit deklarasaun polítika ne’ebe lolo’os la vale no laiha valor hodi aplika ba iha lala’ok no sistema governasaun nian.

Hare’e tuir lejitimidade ba desizaun iha Parlamentu Nacional relasiona ho viagem Xefe Estadu nian atu desloka ba Japaun, sujere katak diak liu viagem refere husu ba Xefe Estadu ka Prezidente da Repúblika kansela deit tamba laiha lejitimidade. Hau aseita ho opiniaun iha Jornal Nacional Diáriu nian katak se viagem ofisial ne’e mak hala’o duni no sei laiha forsa atu halo desizaun ruma relasiona ho relasaun bilateral entre nasaun Timor-Leste ho Japaun tamba ho aprovasaun hosi Parlamentu Nacional ne’ebe hetan deit votus hamutuk 12 ne’e laiha lejitimidade ba Xefe Estadu atu hala’o viagem ofisial ne’e. Tamba ita hotu hatene katak wainhira iha lejitimidade ba aprovasaun iha Parlamentu Nasional se ho votus aprovasaun ne’e tama iha kuorum 2/3 hosi Deputadu Parlamentar nia membru hamutuk ema nain 65. Fo votus abstensaun hamutuk 36 ne’e signifika Deputadu sira iha Parlamentu Nacional gosta halo polítika no sai polítiku iha nasaun demokrátiku maibe la kompriende prosesu ho lala’ok iha estadu de direitu demokrátiku. Ne’e atu dehan deit situasaun nasaun mak iha krize nia laran ka, Timor-Leste mak krize duni ba Lideransa ka matenek nain atu sai polítiku mak krize ka ou Parlamentu Nacional mak hasoru krize ba halo desizaun polítika tamba la kompriende sasan no la hatu’ur asuntu sira ba polítika estadu nian iha idak-idak nia fatin.

Trias Polítika hanesan Airin Tolu Demokrásia ne’ebe ita mos adopta ninia lala’ok. Iha Timor-Leste ita iha airin demokrásia hamutuk 4 (Presidensia da Repúblika, Parlamentu Nacional, Guvernu no Tribunais). Tamba ne’e, hosi ninia aplikasaun tenke bazeia ba iha independensia polítika ba desizoens sira tenke asegura ho didiak, atu nune’e garantia póder konstitusional hosi orgaun idak-idak nia kompeténsia polítika ba desizoens kona-bá asuntu estadu nian. Maibe iha Timor-Leste, hosi parte seluk diferente tamba orgaun ezekutivu obriga fali desizoens sira hosi orgaun estadu seluk ho influensia atu halo tuir hakarak polítika “Polítical Will” hosi ema ne’ebe kaer ukun iha orgaun refere. Ezemplu konkreta maka desizoens Prezidente da Repúblika hodi veta OGE 2016, Parlamentu Nacional liu hosi ninia deklarasaun polítika Bancaria nian hodi keixa ba Tribunal de Recurso no temi fali tan desizau ne’e Inkonstitusional. Ida seluk mak Guvernu obriga Prezidente da Repúblika ho nia proposta ba nomeiasaun Chefe Estado Maior General Falintil-Forca Defesa Timor-Leste ne’ebe ninia mandatu ramata ona. Hanoin katak atu hare servisu hosi F-FDTL no PNTL ne’e kabe hotu ba kompetensia Guvernu nian. Guvernu tenke hatene katak aleinde hanesan Xefe Estadu, automatikamente desizaun exonerasaun ne’e kompetensia nu’udar “Komandante Supremu” ne’e indiskutivel tamba direitu Konstitusional Prezidente da Repúblika nia nu’udar Xefe Estadu iha nasaun Timor-Leste. Desizaun Tribunal de Recurso fo sai momo’os katak ne’e laos kompetensia sira nia atu deside tamba ne’e asuntu Polítika Konstitusional, mibe Premeiru Ministru sei hakarak rekore nafatin desizaun ne’e ba iha Tribunal. Se’e deiszaun ne’e hateten la’os kompetensia Tribunal atu deside ho razaun ne’e lao’os desizaun administrativu maibe tamba polítika konstitusional, entau Júiz sira iha Tribunal de recurso kompriende momo’os hela hosi aplikasaun trias polítika versaun Timor-Leste nian. Tamba ne’e sira la deklara katak desizaun Prezidente da repúblika nian mak los ka sala? ou proposta Guvernu nian mak los ka sala kona-ba ezonerasaun CEMG F-FDTL ne’e. Se’e rekore nafatin ba Tribunal de Recurso, Guvernu tenke hatene katak Júiz iha Tribunal de Recurso Timor-Leste nian iha deit ema nain tolu no sira nain tolu sei labele halo kontinuasaun deside asuntu ne’ebe hanesan. Desizaun ne’ebe sira bele foti mak desizaun ba Rekursu Estra-Ordinária ka kontinua deside atu halo Arquivo deit to’o Júiz foun nain tolu mai mak loke fila fali prosesu foun. Ita tenke iha seriedade katak Timor-Leste seidauk iha Supremu Tribunal de Justisa haktuir Konstituisaun nian haruka, ita foin mak estabelese Tribunal de Recurso.

Parlamentu Nacional nia opiniaun polítika hodi hasoru desizaun Xefe Estadu sai nu’udar “Konspirasaun Prospieridades” ba OGE 2016 nian. Konspirasaun Prospieridade hatuir obra “Pai Rico, Pai Pobre” hosi Robert Kiyosaki ne’ebe konsagra kona-bá oinsa halo kospirasaun polítika ne’ebe hakarak fo benefisiu ka prospieridade ba ukun nain sira nia’an deit. Prezeidente da Repúblika la kategoriza tama iha konseitu ida ne’e tamba úniku prezidente iha mundu ne’ebe veta OGE 2016 hosi tuir proposta guvernu ne’ebe hetan votus unanimidade molok submete ba iha Prezidente da Repúblika hodi halo promulgasaun. Deputadu sira kontra ida ne’e hanesan “Hasrahun” ne’ebe ahi han iha isinlolon tamba sira iha konspirasaun prospieridade hosi planu OGE 2016 ne’ebe sai polémiku. Razaun mak Deputadu barak mak hetan projeitu hosi Guvernu no orsamentu ne’e la promulga signifika la bele aplika. Entau sira nia problema mak sira sei bele hetan projeitu ka lae hosi guvernu? ida seluk mak Deputadu sira mos barak mak sai Makelar ka Bangkir ba investedor estranjeiru sira ne’ebe barak hala’o hela sira nia negosiu iha ita nia nasaun.

Teoria Polítika Kapsul iha Timor-Leste

Liga ho teoria polítika kapsul Timor-Leste nian hatudu momo’os katak oposizaun mos labele koalia barak no vota afavor deit ba polítika guvernu nian tamba sijtuasaun lejislasaun nia realidade agora iha Parlamentu Nasional laiha ona oposizaun tamba Partidu FRETILIN ne’ebe lolo’os afirma sira nia posizaun nu’udar oposizaun ne’ebe forte maibe la konsege tamba hola parte ona iha governasaun ne’ebe mai hosi akontesimentu remodelasaun ne’ebe halo iha inisiu tinan 2015 nia laran. Pior liu maka indikasaun ba Premeiru Ministru no Ministru Koordenador ne’ebe asume pasta Xave ba progresu dezenvolvimentu nasional nian entrega kedas ba iha Partidu FRETILIN.

Polítika guvernu hodi aloka orsamentu kuaze Miliaun atus ba atus ba Projeitu ZEEMS Oe-Cusse Ambeno ne’e kontinua hau temi nu’udar polítika kapsul hosi Eis Premeiru Munistu V Guvernu Konstitusional ne’ebe aplika ba Partidu FRETILIN atu labele sai nafati oposizaun ba desizaun governu nian. Tamba ne’e Guvernu Bloku Maioria Parlamentar, rezultadu eleisaun 2012, ho hanoin polítika totalmente konvida Partidu Oposizaun hola parte iha sira nia governasaun. Artigu kona-bá teoria polítika kapsul Timor-Leste nian autor públika tih ona iha Jornal Diáriu Timor Post edisaun fevereiru 2015 nian. Agora dadaun Guvernu kontinua aprezenta planu orsamentu iha OGE 2016 ba ZEEMS REAOA, hodi hatudu katak reseita aimoruk polítika ne’ebe eis Premeiru Ministru V Governu Konstitusional kahur ba posizaun polítika Partidu FRETILIN ne’ebe sira konsidera moras iha sira nia governasaun nu’udar reseita aimoruk polítika iha Timor-Leste ne’ebe kahur iha kapsul polítika ” Zona Espesial Ekonómia Sosial Merkadu Rejiaun Autónoma Oe-Cusse Ambeno”, ninia alokasaun orsamentu espésifiku iha OGE 2016 kontinua halo kurativu ba guvernu nia moras Partidu FRETILIN. Moras sintoma ne’e maka ida) Guvernu alerjia ho kritika polítika oposizaun Partidu FRETELIN nian ba póder ho ukun ne’ebe Guvernu Bloku Kooligasaun imfrenta. Daruak) Estratéjia polítika Partidu CNRT nian atu hamonu ka halo fraku Partidu FRETILIN nia posizaun polítika. Datoluk) Produz risku polítiku ba lideransa iha Partidu FRETILIN ne’ebe hetan lukru hosi ukun ne’ebe entrega deit no laiha lejitimidade tuir Konstituisaun RDTL. Dahat) Fasil ba Deputadu sira iha Parlamentu Nacional no Membru Guvernu sira iha Governasaun atu halo violasaun no fraude ba artigu sira Konstituisaun RDTL no Lei sira nia aplikasaun hodi fo benefisiu ba sira nia interese partidaria. Objektivu ikus liu maka Partidu ne’ebe ukun tenta halo konspirasaun polítika oinsa sira atu manan ukun iha eleisaun 2017 ka oinsa sira halo para hadau tiha ukun uza forsa polítika molok ka depois halo eleisaun geral 2017. Objektivu sira ne’e mak hatudu momo’os iha influensia polítika ba desizaun Tribunal nian, Deputadu sira iha Parlamentu Nacional kontra desizaun Prezidente da Repúblika, seluk mak Guvernu hakarak foti hotu kompetensia konstitusional Prezidente da Repúblika no seluk tan mak extende mandatu Lideransa Komunitária ne’ebe elije liu hosi Eleisaun ba Lideransa Komunitária.

Komparasaun Timor-Leste ho Nasaun Demokrásia sira seluk iha Mundu

Henry B. Mayo iha ninia artigu kona-bá “Introduction to Democratic Teory” halo sumariu balun relasiona ho valores ne’ebe hetan hosi demokrásia mak; a) solusiona konflitu interese ho dame haktuir regra institusionalidade nian, b) asegura implementasaun hosi mudansas ho dame iha sosiedade nia le’et ne’ebe afeita hela situasaun transformasaun estadu, c) halo ezonerasaun ne’ebe regular ba lideransa sira ka transformasaun hosi lideransa tuan ba lideransa foun sira, d) fo limitasoens ba utilizasaun violensia to’o iha nivel mínimu, e) garante ba akontesimentu diversidade ukun iha nasaun, f) eziste nafatin ba prosesu fundamental sira ne’ebe justu.

Referensia lala’ok governasaun hosi Inglatera nian bele sai hanesan ezemplu ba Timor-Leste tamba póder ezekutivu iha Governu nia liman ne’ebe lidera hosi Xefe Guvernu hanaran Premeiru Ministru ho nia Ministru sira. Liurai mak sai hanesan Xefe Estadu. Maibe iha Timor-Leste diferente tamba Prezidente da Rpúblika ne’ebe hili liu hosi eleisaun demokrátiku mak sai Xefe Estadu. Ne’e tamba Timor-Leste nia sistema governasaun ita bolu deha “Semi Presidensial” katak póder estadu nian balu fahe ba Xefe Estadu no póder estadu balun hela ho Governu. Ita nia Konstituisaun RDTL mak dehan nune’e. Diferente ho Inglaterrá tamba sira nia konstituisaun ne’e konvensional deit ka la haketek iha textu ruma, maibe sira aplika direta iha lei ho Dekretu no regulamentu sira ne’ebe regula kona-bá estadu nia lala’ok. Iha Inglaterrá mos kria Partidu Oposizaun hosi partidu ne’ebe lakon iha eleisaun. Oposizaun nia lideransa sira estabelese kedas komposizaun gabinete atu kontra guvernu ne’ebe kaer ukun. Ho razaun katak iha momentu ne’ebe paridu ne’ebe kaer hela ukun monu no sira sei troka kedas no foti kedas póder ba hala’o governasaun ninian. Kompara ho Timor-Leste nian diferente, iha Fevereiru 2015, Guvernu atual kaer ukun seidauk monu tan, Premeiru Ministru rasik mak hasai desizaun hodi halo remodelasaun ba estrutura governasaun nian. Depois entrega fali ba iha Partidu oposizaun mak hodi kontinua mandatu ukun iha governu (Bloku Guvernu Kooligasaun; 2012-2015), (Bloku Guvernu Laiha Naran: 2015-2017) mak halakon oposizaun iha Parlamentu Nacional. Ninia razaun fundamental ida deit tamba Governu ho Parlamentu hamutuk no laiha ona oposizaun ne’e mak fo implikasaun ba iha kontra desizaun estadu na’abe orgaun rua ne’e halo sai hanesan konspirasaun polítika ida katak iha eleisaun jeral 2017 sira bele manan maioria ka lae? iha parte seluk sira nunka konsiente ho fraude ]iha sira nia desizaun ba nasaun ne’ebe implik mos halo Timor-leste sai nasaun frazil iha mundu. A’at liu tan mak halo tiha ona sala mas sei kontinua halo polítika ne’ebe la justu hodi fo sai deklarasaun polítika ne’ebe laiha valor no la iha kualidade. Durante ne’e ita hare’e akontesimentu sira hanesan; Deputadu sira iha Parlamentu halo defeza ba sira nia’an katak vota la vota ne’e sira nia direitu nu’udar membru orgaun soberanu nian. Signifika katak sira iha priveliziu polítika durante hala’o sira nia mandatu. Kestaun ne’ebe profunda relasiona ho aprovasaun ba viagem ofisial Xefe Estadu nian ne’e la’os koalia kona-bá deputadu sira nia direitu iha ka laiha atu halo aprovasaun, maibe ita koalia kona-bá sentidu hosi estadu de direitu demokrátiku Timor-Leste ne’e. Tamba sa mak hau dehan hanesan ne’e tamba sira nia aprovasaun ho votus 12 ne’e la prienxe kuorum atu halo deiszaun estadu nian iha nivel orgaun lejislativu nian. Ne’e regras fundamental hosi demokrásia iha estadu de direitu demokrátiku nia lala’ok.

Atu halo konkluzaun deit ba artigu ne’e, maka autor hakarak hato’o opiniaun balun katak, se’e entidades kompetentes iha estadu no nasaun hanesan Parlamentu Nacional no Guvernu mak kontinua halo tratamentu asuntu estadu nian utiliza sentimentu vingansa no odiu polítiku deit mak iha dalan rua deit mak ita sei hasoru iha futuru. Ida) Timor-Leste sei kontinua la’o hanesan estadu ho nasaun ne’ebe frazil, Rua) Timor-Leste sei hasoru krize bo’ot ne’ebe sei akontese iha tempu oin mai molok tama 2017 ka konseitu ida hanaran “Coup de E’tat” mak sei mosu.

*Autor: Alumni Universidade Nacional Timor Lorosa’e (UNTL) Fakuldade Siencia Social e Política (FASPOL), Departementu Siência Governamentais, Graduadu ho Valor Komulativu Exellênte. Informasaun ba halo kontaktu, E-mail:boced_maliana@yahoo.com

Jornal Nacional, opinião

ESTUDANTE ENFERMAGEM ICS 34 HALO JURAMENTU

Enstudante enfermagem Semester V husi Instituto Ciencia da Saude (ICS) Eskola Graça de Deus nain 34 hala’o capping Day (Juramentu ) antes sira atu tun ba hala’o pratika iha Hospital no Klinika sira.

Iha seremonia juramentu ne’e manufaktur eskola Graca de deus Miguel Quintão iha nia diskursu hateten katak, wanhira estudante atu tun halao pratika iha Klinika ou Hospital sira tenke kumpri duni sira nia dever nudar estudante. no wanhira sira atu tun tenke remata sira nia teoria no pratikas iha laboratorium nomos sira tuir ezame kompetensia.

“Durante ne’e ami prepara sira atu tun ba kampun de treinu atu ba pratika iha klinika ou hospital sira tenke liu husi prosesu simu teoria por etapa no tuir pratika iha laboratorium nomos pratika iha klinika ou komunidade se wanhira sira laliu husi prosesu sira ne’e sira labele tuir ba iha atividade caping day to’o ba pratika iha klinika ne’ebe tuir ami nia hare estudante sira ne’ebe tuir capping day day ami hare sira prontu ona atu tun halo pratika duni “ Miguel Quintão hato’o lia hirak ne’e liu husi nia diskursu iha seremonia capping Day iha ICS Manumeta Raihun Dili Kuarta (16/3/2016).

Nune’e Miguel realsa tan estudante nain 34 agora atu tun ba iha kampo de trabalho sira prepara ona tanba husi institutu ne’e rasik haree husi sira nia prepara saun husi fatin laboratoriu ba to’o ezame kompetensia katak sira priense duni kriteria.

“Ha’u husu ba Parlamentu Nasional tanba ami instituto Cincia da saude (ICS) sei hein prosesu ida ne’ebe mak ami hein mak lisenciamentu ne’ebe mak husi membru Governu liu-liu ministeriu da edukasaun no ministeriu da saude maibe sira mos hola ona fatin halo avalizasaun sira haruka ema peritus sira mai halo ona avaliasaun iha ami nia institusaun ne’e maibe ami sei hein rezultado konaba lisenciamentu ida ne’e tanba ne’e membru parlamentu nudar aspirasaun komunidade sira nia iha uma fukun parlamentu nasional nune’e bele hato’o ba plenaria atu hare konaba problema nebe mak ami nia istitusaun hasoru su liu- liu konaba lisenciamentu nebe mak ami sei hei “ Miguel dehan.

Iha fatin hanesan Prezidente Comisaun F ne’ebe tra asuntu saude no edukasaun , Virgilio Hornai ne’ebe partisipa iha seremonia juramentu ne’e sente orgolhu tanba Instituto Ciencia da Saude (ICS ) fo nia kontribuisaun duni liu- liu oinsa mak forma professional saude liu- liu iha area enfermaria, parteira atu kontribui profesional saude iha Timor- Leste.

“Hau nia sentementu no orgolhu ba ita bot sira tanba iha realidade tereinu ita nininia populasaun ita ninia situasaun pais iha nesesidade atu ita bot sira kontribui duni liu – liu oinsa mak forma professional saude liu- liu iha area enfermaria , parteira nomos sira seluk seluk,”Virgilio esplika.

“Hanesan dezafiu bo’ot ida tanba primeiru ita iha osan maibe ita ninia profesional saude sira ne’ebe adekuadu halo atendementu iha kraik sei menus entaun hau hanoin ida ne’e parte kontribuisaun ida husi ita boot sira atu fo formasaun ba ema Timor oan sira,”dehan nia.

Entertantu Prezidente Fundasaun Graçã de Deus, Fransisco Carlos soares husu ba Governu liu- liu Ministeriu Saude ho Ministeriu Edukasaun ajuda fo lisensiamentu no akreditasaun ba Instituto Ciencia da Saude (ICS).car

Jornal Nacional

FETO TENKI LIVRE HUSI DISKRIMINASAUN

Diretora Fundasaun Alola Alzira Reis hateten katak, organizasaun feto hotu iha Timor Leste (TL), iha ona vizaun ka mehi ida ba oin katak, feto sira tenki livre husi diskriminasaun hotu-hotu.

“Ami iha vizaun ida katak, feto tenki livre husi diskriminasaun hot-hotu, ida ne’e maka ami nia vizaun, ne’ebé ami feto hotu-hotu nia mehi ba oin maka ne’e,” hatete Diretora Fundasaun Alola Alzira Reis ba JN-Diário iha nia knar fatin Mascarinhas-Dili, Kuarta, (16/3).

Alzira Reis afirma katak, polítika ne’e, iha organizasaun feto ida-idak iha ona nia polítika, oinsa atu to’o iha vizaun ne’ebá, atu nune’e feto sira labele moris iha diskriminasaun nia laran.

“Tanba ne’e, ami nia polítika ou motivasaun ida-idak, organizasaun defini atu to’o iha ne’ebá, ida ne’e ha’u sente importante tebes ba ita atu haree kona-ba asuntu ida ne’e,”esplika Alzira Reis.

Tuir Alzira Reis katak, kada organizasaun feto sira, ou individual sira ne’ebé iha misaun hakarak duni tau misaun, organizasaun ida-idak sai sira nia misaun moris nian, bele hakbesik-an ba iha ema individuál sira, sei sira hakarak kontribui.

Iha okaziaun ne’e, Alzira Reis informa katak, oras ne’e dadaun Rede Feto iha membru feto 24 resin, membru sira ne’e la’os servisu iha nasionál deit, maibé iha munisípiu sira hotu.

“Ami iha kongresu feto ne’ebé ami sempre halo, hodi involve feto maluk sira iha área rurál, oinsa atu hetan aspirasaun husi feto maluk sira iha área rurál, konaba kestaun saida maka sira hasoru iha iha área refere, atu bele mai hato’o mós iha ne’e,”tenik Alzira Reis.

Alzira Reis mós hatutan katak, Fundasaun Alola mós, halo ona plataforma de asaun ne’ebé maka entrega ba Governu, atu bele implementa rekomendasaun sira ne’e.

Iha parte seluk membru Rede Feto Timor Leste (RFTL) Laura Soares Abrantes salienta katak, feto hotu tenki iha prespetiva ida, luta ba igualdade jéneru, luta ba feto nia dignidade, no direitu.

“Ami apela nafatin ba ita hotu-hotu, liu-liu familia, familia maka lukru ki’ik oan sosiedade povu Timor Leste (TL) nian, kuandu familia ne’e forte, hanesan lema Alola Fundasaun nian ne’ebé dehan katak, “Feto Forte, Nasaun Forte”, tanba familia forte,”tenik nia.eni

Jornal Nacional

MOP ORIENTA DNTT TAU RISKA IHA ESTRADA

Director Nasional Transportes Terestes (DNTT), Natalino de Rosario hateten, DNTT simu orientasaun husi Ministerio Obras Públiku (MOP) hodi halo observasaun no termina fatin hodi marka sinais iha estrada klaran ou ninin ho objektivu hodi evita asidente trafiku.

“Ami simu orientasaun husi MOP hodi halo deit observasaun no orientasaun hodi termina fatin ne’ebe deit maka merese atu tau sinal ou riska mutin liu-liu iha dalan zebracros (Perempatan no Pertigaan-Red) hodi evita asidente maske iha ona sinais tranzitu seluk hanesan lampu merah, maibe persiza mós fasilidade estrada nian hanesan sinais mutin atu nune’e mikrolet no motorista hatene atu halai neneik kuandu iha zebracros,”hateten Natalino de Rosario ba JN-Diario hafoin partisipa iha Seminario Nasional Funsaun Públika nian, iha CCD Kuarta (16/03/2016).

Esklarese nia katak, marka sinais ne’e la’os iha estrada hotu-hotu, maibe bazeia deit ba estrada ne’ebe maka kona rehabilitasaun e marka ho kor oin rua.

“Sinais ne’ebe marka bazeia deit ba estrada ne’ebe kona rehabilitasaun hanesan Balide, Comoro no seluk-seluktan liu-liu iha fatin zebracros e iha kor oin rua ezemplu hanesan iha estrada two away (dua arah) marka ho kor kinor e one away (satu arah) marka ho kor mutin atu nune’e kareta no motor bele hatene ona liu husi sinal hirak ne’e hodi halai nei-neik,”dehan Natalino.

Alende ne’e kuandu finaliza ona maka DNTT sei halo sosializasaun ba mikrolet no motorista sira konaba funsaun husi marka ou riska hirak ne’e atu nune’e bele komprende didiak.

“Konaba kontratu ho kompañia ne’ebe,e orsamentu hira DNTT la hatene, tanba ne’e pakote ida husi rehabilitasaun estrada iha kapital Dili ne’e MOP maka hatene liu,”katak nia. Ita

Jornal Nacional

SÉ MAK DON VIRGILIO

Don Virgílio do Carmo da Silva, SDB, nudar bispu foun ba Dioseze Dili, nian moris iha loron 27 fulan Novembro 1967, iha Nunu Kroa-Venilale, hosi Diocese Baucau.

DILI - Bainhira nia remata estudu iha eskola Salesiana, Fatumaca, no tama kedas ba Sosiedade Salesiana Don  Bosco. Iha 1990 to’o 1998, hosi  nia kongregasaun haruka nia ba hala’o estudu filosofia no teologia iha Manila-Filipina. Hafoin iha loron 19 Marsu 1997, halo nia profissaun perpétua no iha loron 8 Dezembro 1998 simu ordenasaun Nai Lulik.

Fila fali mai Timor-Leste, Padre Virgílio do Carmo da Silva, SDB hala’o kna’ar Formador ba Aspirante sira iha Aspirantado Fatumaca hahú hosi 1999 to’o 2004. Hosi 2004 to’o 2005, nia sai nu’udar  Ecónomo ba Uma formação iha Venilale no vigário paroquial.

Hafoin iha 2005 to’o 2007,  nia konsege remata Lisensiatura iha Teologia Espiritual iha Universidade Pontifícia Salesiana, Roma-Italia, no iha 2007 to’o 2014 sai Mestre Noviço. Mai iha  2009 to’o 2014 sai hanesan Direitor Salesiano no Eskola Técnica Superior de Don Bosco iha Fatumaca.

Fulan Janeiro 2015, nia simu kna’ar nu’udar Provinsial Salesiano to’o loron ohin. Amu Virgílio hanesan mós membru Conselho Provinsial Salesiano no Conselho Presbiteral Diocese Baucau. Mandatu ne’e nia simu ba dala rua hodi hala’o kna’ar hanesan Vise Secretário Executivo iha Conselho ne’ebé hanesan.

Ho nomeasaun Papa Francisco nian, Amu Virgílio do Carmo da Silva sai nudar Bispo foun ba Diocese Dili. Portantu  oras ne’e dadauk Timor-Leste iha ona Amu Bispo hamutuk na’in ne’en (6) maka hanesan, matebian Bispo Martinho Lopes (Manatuto), Bispo Carlos Filipe Ximenes Belo (Baucau), Bispo Basílio  do Nascimento (Aileu), matebian Bispo Alberto Ricardo da Silva (Aileu) no Bispo Norberto do Amaral (Ainaro). Damas

Hallo.tl