Rekursu Cançio Sei Prosesu

DILI - Rekursu ba arguidu Joao Cançio sei iha prosesu nia laran, tanba juiz prosesu ba kazu nee kaer prosesu barak.

Tuir fontes konfirmadu iha Tribunal Rekursu hatete, rekursu arguidu Joao Cançio nian nee sei iha hela prosesu nia laran. Espera iha tinan oin mai TR bele fo sai ona nia rejultadu ba publiku. Laos deit ba kazu Cançio nian, maibe arguidu Domingos Caero nian mos sei iha prosesu nia laran.

Nia hatutan, prosesu sira hanesan nee lori tempu naruk. Alende prosesu sira hanesan nee iha mos rekursu seluk neebe juiz prosesu atu haree. Maibe laiha prazu ba rekursu neebe tama mai, tanba rekursu laos ba kazu rua tolu deit.

Prosesu neebe mak oras nee publiku hein hanesan arguidu Calisto Gonzaga nian mak tun ona, maibe TR sei haruka ba TDD hodi reapresia fila fali depois nee sei haruka fali mai TR.

Entretantu kazu seluk neebe mak publiku hein hanesan arguisu Joao Cançio no Domingos Caero nian sei iha prosesu nia laran. Informasaun kompletu iha STL Jornal no STL Web, edisaun Sabado (24/12/2016). Domingas Gomes

Suara Timor Lorosae

Setor Privadu Sei Dezenvolve Area Pekuaria

DILI – Seitor Privadu iha komitmentu boot atu dezenvolve area pekuaria, tanba nee husu ba Ministeriu Agrikultura, atu orienta didiak povu agrikutor sira hodi kuda duut ba karau, karik seitor privadu hola parte ba hakiak karau maka ninia ai han sei la susar.

Kestaun nee hastoo husi Prezidente Camara Comersiu Industria Timor Leste (CCI-TL) Oscar Lima ba jornalista kinta (22/12/2016) iha Timor Plaza.

Seitor Privadu maka sai save Inportante ba Nasaun, atu dezemvolve ekonomia rai laran, tanba nee seitor Prvadu planu ona  iha tina  oin mai setor privadu sei hola parte atu dezemvolve area Pekuaria iha rai laran, oinsa atu hakiak karau, maibe importante maka governu tenke dezenvolve didiak aihan karau nian,” dehan Oscar.

Nia mos informa, ekonomia TL laos depende deit ba Mina no gas, maibe setor privadu iha ona hanoin ida, oinsa atu dezemvolve seitor Produtivu sira, oinsa atu hakiak karau, importante maka ninia aihan nee tenke sufisiente.

Iha parte seluk Diretor Nasioanal Pekuaria Veterinaria, Antonino do Carmo mos hatutan, Governu liu husi Ministeriu Agrikultura halo ona negosiasaun ho universidade balun husi Indonesia, oinsa atu halo intervensaun ba Duut karau nian. Informasaun kompletu iha STL Jornal no STL Web, edisaun Sesta (23/12/2016). Madalena Horta

Suara Timor Lorosae

Hakarak Hato’o Keisa? Loke de’it Pajina Eletrónika KI

DILI: Konsellu Imprensa Timor-Leste hahú etapa foun ida hodi fasilita di’ak liu tan komunikasaun entre públiku ho sira. Meius ida ne’ebé KI halo mak kria pajina eletrónika www.conselhoimprensa.tl.

Aleinde atu fasilita komunikasaun, públiku bele aproveita pajina eletrónika ne’e hodi hato’o keisa ba KI relasiona ho serbisu media iha Timor-Leste.

"Ida ne’e atu fasilita KI halo konsulta públiku, tanba dala-ruma ho tempu ita labele hasoru malu maibé, ho (pajina eletrónika) ida ne’e, halo ita bele haree saida mak ita halo. Ida seluk mós oinsa bele fasilita hodi halo keisa. Karik iha sala ruma, la presiza lori keisa ba KI, maibé ho ida ne’e bele fasilita atu bele hato’o keisa,” deklara Prezidente KI, Virgilio da Silva, iha serimonia lansamentu pajina eletrónika no natal hamutuk iha hotel Ocean View, Pantai Kelapa, Kuarta (22/12).

Tuir nia, pajina eletronika ne’e hanesan espasu ida ne’ebé halo parte mós tuir Lei Konsellu Imprensa nia hodi uza halo relasaun ho públiku, liliu ba parseiru sira.

Tuir planu, nia dehan, iha ninia públikasaun iha pajina ofisial KI ne’e sei públika ho lian haat, lian Tetum, Portugues, Ingles no Indonezia.

Iha fatin hanesan, Komisariu KI, José Ximenes dehan, KI hahú husi zero maibé, komesa la’o neneik ona.

"Ho lansamentu pajina ida bele fasilita komunikasaun (entre) parseiru ho Konselu Imprensa no halo relasaun di’ak liu entre KI no públiku", dehan nia.

Iha lansamentu ne’e, KI konvida Defensor Públiku Jeral, Sergio Hornai hodi sai sasin. Aliende ne’e serimonia ne’e hetan partisipasaun husi reprezentante media imprime, radio, no televizaun. (*)

Pachar Malay, Olatimornews.com - Editór: Tellukoro

Foto: Prezidente Konsellu Imprensa, Virgilio da Silva, ofisialmente lansa pajina eletrónika KI, www.conselhoimprensa.tl, iha hotel Ocean View, Pantai Kelapa, Kuarta (22/12). (olatimornews FOTO: Pachar Malay)

Duterte hanaran "beik-teen" ba altu-komisáriu ONU ne’ebé atu halo investigasaun ba nia tanba omisídiu

Prezidente Filipina, Rodrigo Duterte, bolu  beik-teen ba altu-komisáriu ONU ba iha Direitus Umanus ne’ebé iha semana ne’e husu atu loke  investigasaun tanba omisídiu maka nia rasik dehan komete iha tinan 1980. 

Duterte garante iha semana kotuk katak ajuda polísia oho suspeitu na’in tolu, akuzadu halo  violasaun no asasíniu ba missionária australiana ida iha Davao, bainhira sei ukun sidade ne’e iha sul arkipélagu filipinu.

Ninia komentáriu ne’e umenta tan kontrovérsia ba dirijente sira, ne’ebé sai  alvu krítiku ba kampaña violentu kontra droga, hahú  dezde simu pose iha  juñu no  dezde iha ne’ebá kauza ona ema besik 6.100 maka mate.

Altu-komissáriu ONU ba Direitus Umanus, Zeid Ra'ad Al Husein, reaje iha  tersa-feira ne’e ba liafuan  Duterte nian, no afirma ba  autoridade judisiál Filipina nian atu loke investigasaun tanba omisídiu.

Pedidu altu-komissáriu provoka resposta  hosi Duterte, ne’ebé  nega ba pessoál ONU nian  iha direitu atu kritika nia.

"Sé maka fó  direitu ata boot  atu... lakoñese lei internasionál. Ami apoiu ONU ho ami nia kontribuisaun, estúpidu, no ha’u selu ita boot ho saláriu", hatete  Duterte iha eventu ho  voluntáriu kampaña antidroga, tuir  estasaun ABS-CBN.

"Ha’u labele koa’lia hanesan o nia  empregadu. Ha’u  Estadu-membru, Estadu soberanu ida, tanba ne’e nonook tamba ita boot matenek menus", nia hatutan.

Iha ninia krítika, Duterte informa moos katak altu-komissáriu "hanesan funsionáriu deit ba eskritóriu ida" finansia hosi "bolsu Estadu-membru sira".

"Ita boot laiha autoridade atu ... iha ne’ebá  hanesan o maka liurai, beik-teen!", afirma Duterte.

Duterte, ho tinan 71, manán eleisaun prezidensiál iha  09 fulan-maiu ho promesa atu hamoos Filipina hosi  narkotráfiku iha fulan neen, no hahú ninia mandatu úniku ba tinan neen iha 30 juñu.

Maski hetan krítika hosi  organizasaun sira hanesan ONU, no mate sira 6.100  iha kampaña kontra droga, Duterte mantéin apoiu maioritáriu entre filipinu sira ho (63%) liuhosi estudu foin lalais.

SAPO TL ho Lusa

AUTORIDADE XINA KAER FUNDADOR WEBSITE NEBE PUBLIKA VIOLASAUN DIREITUS HUMANUS

(salvioonline.com) – Fundador website 64tianwang.com, Huang Qi nebe mos hanesan ativista ba Direitus Humanus, nebe halo publikasaun ba violasaun Direitus Humanus, autoridade Xina kaer ho razaun katak nia hateten sai ba publiku segredu estadu nian.

Informasaun nee fo sai husi Amnistia Internacional iha kinta feira.

Huang Qi, dejenvolve website 64tianwang.com desde tinan 20 liu ba. Ninia notisia sira barak mak imprensa husi Xina la publika no hetan blokeiu iha nasaun laran.

Huand Qi nia website manan ona premiu oin oin. No iha fulan Novembru liu ba, Huang Qi nia website manan tan premiu “Reporter Sem Fronteiras” husi TV5 Monde Press Freedom.

Media AI haktuir katak, hafoin simu premiu nee, autoridade sira kaer kedas Huang Qi iha nia hela fatin, iha sidade Chengdu, kapital husi provinsia Sichuan.

Organizasaun Naun Govermental ba Defeza Direitus Humanus nian ida hatoo omuniadu katak razaun prinsipal husi Huang Qi nia detensaun mak “Hateten sai segredu Estadu nian ba estidade estranjeiru”.

Desde Xi Jinping hahu nia poder nudar Prezidenti Xina ia 2012, autoridade Xina halo ona detensaun ba advogadu sira nebe involve ia kazu direitu sivil nebe autoridade sira konsidera sensitivu, no mos bandu debate onine iha internet.

Antes nee, Huang Qi rasik tama ona prizaun dala rua. Ativista no fundador website 64tianwang.com nee ba dahuluk tama prizaun duranti tinan 5 tamba kazu ativizmu ONLINE iha tinan 2000.

Tuir mai iha tinan 2009 dala ida tan tama prizaun duranti tinan 3 tamba publika notisia kona ba konstrusaun eskola ho kualidade aat.

Lee mos iha Salvio Online

Feto Halo Abuzu Sexual Ba Jogador Futebol

PARSERIA TIMOR AGORA HO SALVIO ONLINE

Polisia Kaptura Sidadaun Indonezia na'in 12

DILI: Polisia Nasionál Timor-Leste (PNTL) Munisipiu Manufahi kaptura sidadaun Indonezia na'in 12, inklui labarik na’in 5, ne'ebé tama ilegal iha Timor-Leste.

Sidadaun Indonezia husi Kefa-NTT ne'e tama liu husi "laho dalan" iha fronteira rai-maran Munisipiu Kovalima iha 10 Dezembru tuku 4 madrugada, no PNTL Manufahi kaptura iha 20 Dezembru foin lalais.

Tuir informasaun, sidadaun Indonezia na'in 12 ne'e kompostu husi uma-kain tolu, tama ilegal ho intensaun atu vizita sira-nia familia iha Manufahi ne'ebé moras.

"Ami tama mai liu husi dalan illegal iha Suai, tanba Pai mak moras iha Same. Ami tama dalan illegal Polisia Fronteira sira iha Suai la hatene, to’o iha Same-Sesurai, mak Polisia iha ne’eba foin kaer ami,” dehan Domingos de Andrade, sidadaun Indonesia ne'ebé hetan kapturasaun ba olatimornews.com iha Polisia Migrasaun Kaicoli-Dili, Kinta (22/12).

Dominggos dehan, la’os foin primeira-vez ba nia liu husi dalan illegal. Maibé, dala rua ona.

"Hau mai liu husi dalan illegal ba dala rua ona, uluk liu iha tinan kotuk liu ba. Familia sira ne’eba (Kefa-TTU), babain mai Timor-Leste liu husi dalan illegal iha Suai," katak nia.

Domingos nudar Timor-oan ne'ebé ba hela iha Kefa dezde tinan 1999, no nia ho nia maluk sira seluk tama mai tanba nia familia balun moras.

"Ami mai atu haree familia sira iha Same, sira mak telefone dehan moras, entaun ami mai haree," katak nia.

Iha fatin hanesan, sidadaun Indonezia seluk ne'ebé lakohi públika nia identidade hatete, nia tama mai atu mai hela ona iha Timor-Leste.

“Ami na'in rua, ami tama mai lakohi fila ba ona. Ami hakarak eskola iha ne’e,” dehan joven ne'e.

Entertantu, jornalista sira tenta konfirma asuntu ne'e ba Komandante Polisia Migrasaun maibé, Komandante laiha fatin. (*)

Aquino Campos, Olatimornews.com - Editór: Tellukoro

Foto: SIdadaun Indonezia hirak ne'ebe Polisia Nasional Timor-Leste Munisipiu Manufahi kaptura tuur iha Edifisiu Polisia Migrasaun Dili, Kinta (22/12). (olatimornews FOTO: Aquino Campos)

Emilia Pires Estraga Justisa Rai Laran

DILI - Reprezentante povu iha Uma Fukun Parlamentu Nasional husi bankada Frente Mudansam Jorge da Conceicao Teme, konsideira arguida Emilia Pires estraga sistema justisa iha rai laran, tanba nia kaer pasaporte rua.

Arguida Emilia Pires estraga ita nia sistema justisa nee, tanba Timor oan maioria iha pasaporte rua nee, kuaze membru Governu no deputadu sira iha pasaporte rua, kuandu justisa deside maka nia kaer fali pasaporte seluk dehan hau laos Timor oan nee maka susar boot ,” dehan deputadu Jorge ba STL, iha PN, Dili, Kinta (22/12/2016).

Nia dehan, Konstitusaun fo duni dupla sidadania, maibe kumprimentus de justisa ema hotu tenke iha lei nee tenke hanesan. Tanba ida nee fo efeitu ladiak ba sistema justisa iha rai laran.Uluk Rogerio Lobato kumpri, Lucia Lobato kumpri nusa maka Emilia Pires labele, sira nain rua iha pasaporte Portugues hotu.

Reprezentante povu nee haktuir tan katak, nia lakoi kahur kanur tohar orsida ema dehan beik ten  laran moras, neebe  situasaun maka hanesan nee  sei iha ulun boot maun boot neebe ke uluk servisu hamutuk ho Emilia sira maka koinese malu.

Iha parte seluk Prezidente PARENTIL Flavio Pereira Lopes hateten, ema sira neebe dupla pasaporte, deskontente sira laiha domin ba dezenvolvimentu iha nasaun ida nee. Nia dehan Kontitusaun RDTL nee husi rezultadu eleisaun demokrasia maiyoritas neebe halo lei tuir sira nia gostu, nunka rona partidu neebe lakon iha eleisaun jeral.

Entertantu oservador politika Manuel da Costa husu ba Timor oan neebe maka dupla pasaporte, bainhira iha kazu ruma tama ona Tribunal labele halai sai husi Timor. Informasaun kompletu iha STL Jornal no STL Web, edisaun Sesta (23/12/2016). Carme Ximenes

Suara Timor Lorosae

Tribunal La Lori Tuir Notifikasaun Ba MP

DILI - Relasiona ho mandadu lori fila arguida Emilia mai TL, tribunal halo ona notifikasaun liu husi julgamentu nia laran. Neebe la presiza tan notifika, maibe sekuandu presiza despaisu ka karta notifikasaun ruma, Ministeriu Publiku bele mai foti iha seksaun krime tribunal nian.

Tuir Administrador Tribunal Distrital Dili, Juiz Duarte Tilman hatete, notifikasaun nee bele liu husi julgamentu laran. Tanba audensia julgamentu nee iha Ministeriu Publiku no Defesa, neebe kuandu tribunal hasai ona mandadu ba MP liu husi julgamentu laran nee notifika ona, la presija halo tan notifikasaun. Maibe sekuandu MP presija karta notifikasaun ruma, nee bele komunika ho seksaun krime tribunal nian hodi foti iha neeba. Laos tribunal mak atu lori tutuir fali ba MP lae.

Juiz nee hatutan, tribunal hasai ona mandadu ba Ministeriu Publiku liu husi julgamentu. Nee MP mak hanesan ezekutador hamutuk ho polisi Interpol bele lori fila Emilia mai Timor Leste.

Iha fatin hanesan juiz prosesu Jose Maria hatete, hanesan juis prosesu neebe hasai ona mandadu la presija atu halo tan notifikasaun. Hakarak atu hetan despaisu notifikasaun ruma, nee tenke komunika ho seksaun kriminal nian.

Sekuandu husi seksaun mak hasai nee tenke tuir strutura liga ba polisia tenke ba uluk lai komandu PNTL. Bainhira PNTL atu halo kapturasaun tenke hetan instrusaun husi Ministeriu Publiku, tanba MP mak hanesan ezekutador ba asaun criminal nian. Informasaun kompletu iha STL Jornal no STL Web, edisaun Sesta (23/12/2016). Domingas Gomes

Suara Timor Lorosae

31 Dezembru Loron Herois Sira Nia

DILI – Governu determina ona loron 31 Dezembru, hanesan loron herois nasional sira nia, needuni Timor Leste (TL) sei selebra loron herois naisonal iha dia 31 Dezembru agora ho osan rihun 140 resin.

Tiur Ministru Estradu Koordenador Assuntu Administrasaun Estadu no justisa no Ministru Administrasaun Estatal Dionisio Babo katak bazeia ba Primeiru Ministru nia despaisu numeru 4/2016, estabelese komisaun organizadora hodi halo atividade ba dias dos Herois Nasionais, neebe sei halo iha dia 31 dezembru ho falisimentu asuwain Saudozu Nicolau Lobato nia.

Atu preserde sermunia nee sira halo atividade loron 3 tuir malu, hahu husi dia 28, 29 too 30, dezembru, nee foin primeiraves, tanba mudansa husi lei, neduni atividade nee sira halo barak liu konsentra iha Munisipiu Dili, nee hanesan ba dala uluk, depois ba futuru maka sira organiza diak liu tan para abransa ba Munisipiu hotu-hotu,” hateten Babo, hafoin remata reniaun hodi realiza atividade loron Nasional Herois nia, iha, Ministeriu Estatal, kinta (22/12/2016).

Nia hatutan tan katak iha dia 28, 29 too 30 sei iha atividades hanesan dansa tradisional, kompitisaun depois loron halo atividade seluk para komemora duni loron importante ida nee. Tanba nee maka governu entrega mai iha Ministeriu Administrasaun Estatal, liu-liu Ministru Koordinador Asuntu Administrasaun Estatal e Ministru Justisa, hamutuk ho MSS ho sira seluk para depois halo atividade nee.

Iha fatin hanesan Sekertariu Estadu Joventude e Desportu Leovigildo Hornay hateten loron boot natal no tinan foun hanesan lorin reflesaun hodi hadia ema ida-idak nia aan. Informasaun kompletu iha STL Jornal no STL Web, edisaun Sesta (23/12/2016). Joao Anibal

Suara Timor Lorosae

BCTL-PGR Asina MoU Prevene Krime Brankamentu Kapitais

DILI - Banku Central Timor Leste (BCTL) ho Prokuradoria Geral da Republika (PGR) asina MoU hodi kontrola no prevene krime brankamentus kapitais, labele tama iha nasaun Timor Leste.

Tuir PGR Jose Ximenes katak, nasaun TL halo koperasaun nasaun lubuk ida hanesan CPLP ho nasaun Indonesia, liu husi unidade informasaun finanseira (UIF) iha 2014, asina akordu para institusaun rua nee iha koperasaun diak, bele servisu hamutuk kontrola no prevene krime brakamentu kapitais iha rai laran.

Ohin Banku Central Timor Leste ho PGR asina MoU hodi institusaun rua servisu diak, bele kontrola no prevene krime brankamentu kapitais iha rai laran,” dehan Jose ba jornalista Kinta (22/12/2016) iha knar fatin Kolmera.

Nia hatete, Institusaun finanseiru asumi papel importante tebes TL, presiza investigasaun krime neebe klean, iha ambitu investigasaun finanseira, maibe Iha rejime juridiku prevensaun nomos krime jeral seluk.

Iha fatin hanesan Diretora Ezekutiva Unidade informasaun brankamentus kapitais Banku Central Timor Leste Maria Jose Sarmento hatete, unidade informasaun finanseiru durante servisu hamutuk Ministeriu Publiku, hodi hare informasaun atu bele fasilita prosesu investigasaun. Informasaun kompletu iha STL Jornal no STL Web, edisaun Sesta (23/12/2016). Josefa dos Santos

Suara Timor Lorosae

FIFA Blacklist TL, Hornay: “Hau Konsidera Nee Rumoris”

DILI – FIFA ho IFC ameasa blacklist Timor Leste (TL) atu latuir kompetisaun iha rai liur, ba kestaun  nee Sekertariu Estadu Joventude e Desportu konsidera hanesan rumoris, tanba governu seidauk hetan karta ofisial ida husi FIFA ho AFC.

Lia hirak nee hatoo husi Sekertariu Estadu Joventude e Desportu Leovigildo Hornay, hafoin remata reuniaun hodi realiza atividade loron Nasional Herois, Ministeriu Estatal, Kinta (22/12/2016).

Ita atu hetan blacklist, ita atu hetan sansaun husi IFC ho FIFA, hau hanoin ida nee rumoris, tanba hau seidauk iha karta ofisial ida husi IFC, FIFA rasik nune mos Federasaun Futebool TL, tanba nee hau reintera hau nia hanoin no intensaun katak, hau sei halo reniaun ida ho Federsaun Futebool TL atu rona nune mos deskute konba dezenvolvimentu futebool iha Timor Leste,” hateten Hornay.

Iha parte seluk Koordenador Amantes Jose Carvalho, Eis jogador nee hateten, sansaun neebe FIFA fo ba TL nee relasiona ho falsifikasaun dokumentus ba jogador estranjeiru sira husi Brazileiru, neebe tinan hirak liu ba tama iha selesaun ekipa nasional.

Nunee mos Vice Prezidenti husi Klubu Carasae FC nee reafirma liu tan katak, Sansaun neebe mak oras nee espailha iha publiku neebe husi FIFA mak sei halao, otomatikamente Timor-Leste sei la partisipa kompetisaun Internasional durante Tinan Lima. Informasaun kompletu iha STL Jornal no STL Web, edisaun Sesta (23/12/2016). Joao Anibal

Suara Timor Lorosae

Mortalidade infantil iha Angola tuun hosi 115 ba 44 kada labarik rihun ne’ebé moris

Númeru labarik angolanu sira ne’ebé mate molok tinan lima 44 kada rihun resin ne’ebé moris, redusaun signifikativu ida kompara ba tinan lima ikus ne’e, bainhira kona-ba taxa iha 115 kada rihun ida.

Dadus konstam iha Inquérito de Indicadores Múltiplos de Saúde (IIMS), ne’ebé hala’o entre 2015 no 2016, hosi Institutu Nasional Estatístika Angola (INEA), iha kolaborasaun ho Ministéiru Saúde Angola, no assistensia hosi Banku Mundial, Organizasaun Mundial Saúde (OMS) no Fundu Nasoins Unidas ba Infánsia (UNICEF).

Rezultadus inkéritu, ne’ebé horisehik aprezenta, permite kalkula diretamente taxa mortalidade neonatal, , pós-neonatal, infantil, pós-infantil no infanto-juvenil, bazeia ba istoria moris.

Inkéritu hatudu katak entre 2011 no 2015 estima katak taxa mortalidade infantil (posibilidade mate durante tinan dahuluk moris nian) ka mate 44 kada labarik rihun ida ne’ebé moris no taxa mortalidade infatu-juvenil (posibilidade mate molok  kompleta tinan lima) iha mate 68 mate kada labarik rihun ida ne’ebé moris.

Ba mortalidade neonatal (probabilidade mate molok atinje fulan ida) estima iha 24 mate kada rihun ida ne’ebé moris, enkuantu mortalidade pós-neonatal (probabilidade mate entre fulan dahuluk no  molok kompleta tinan ida) estima iha 20 mate kada rihun ida  ne’ebé.

 “Kada labarik 1.000 sira ne’ebé kompleta nia moris tinan ida, 25 mate entre aniversáriu dahuluk no dalima (fulan 1-59)", hatutan dokument ne’e.

IIMS 2015-2016 iha objetivu atu fahe informasaun atualizadu sira kona-ba  situasaun ba mane, feto no labarik sira no posibilita ba estadu atuál indikadór-xave hirak, ne’ebé sei permite Angola avalia progesu alkansadu relasiona ba Objetivu Dezemvolvimentu Milénio no Planu nasional Dezemvolvimentu Sanitáriu 2012-2025.

 Iha komparasaun ho nasaun lima hosi Komunidade Dezemvolvimentu Afrika Austral (SADC) – Namíbia, Zámbia, Repúblika Demokrátika kongo, Lesoto no Mosambiké -, inkéritu hatudu katak Angola iha deit fatin daruak hosi  Namíbila.

SAPO TL ho Lusa

PR mosambikanu insisti ba iha dame hodi rezolve dezafiu ekonómika

Prezidente Mosambike, Filipe Nyusi, horisehik defende dame hanesan kondisaun hodi sai hosi dezafiu ekonómika ne’ebé Mosambiké hasoru, atu hasoru malu hikas ho lider Renamo, hanesan partidu opozisaun prinsipál.

Durante serimónia Natal no Tinan Foun, iha rezidensia ofisiál Prezidénsia mosambikanu, Filipe Nyusi dezafia mosambikanu oan sira, atu kontinua serbisu ba dame no unidade nasionál, atu nune’e bele kria estabilidade ekonomia no atrasaun ba iha investimentu estranjeiru.

"Povu Mosambike manan ona dezafiu boot, tanba hasoru ho konfiansa no determinasaun:, hatete xefe Estadu Mosambike, ne’ebé haree katak situasaun ekonomika sei hahú di’ak iha 2018, tanba iha ona kresimentu anual 7%, hafoin estimativu 4% iha 2016 no 5% iha 2017.

SAPO TL ho Lusa

Polísia australianu detein suspeitu na’in hitu ne’ebé planea atake sira iha Melbourne

Polísia australianu anunsia detensaun ba suspeitu na’in hitu ne’ebé halo planu ba atake série  ida ho bomba iha Melbourne, iha loron Natal.

Xefe polísia hosi Estadu Vitória, komissáriu Graham Ashton, hatete iha sesta-feira ne’e ba  jornalista sira katak  suspeitu na’in hitu maka sai inspirasaun iha grupu estremista Estadu Izlámiku no halo planea hela atake sira iha estasaun ferroviária Flinders Street, iha Prasa Federasaun no katedral Saun Palulo, iha Melbourne.

Graham Ashton hatete katak polísia tutuir hela suspeitu ne’e iha tempu barak, no prepara hela atu uza esplozivu no arma sira seluk.

Polísia moos konsidera katak konsege ona neutraliza ameasa ne’e.

SAPO TL ho Lusa