PR TAUR LAKOHI GOVERNU ATRAPALLA SERVISU RTTL – HARUKA ONA KARTA BA GOVERNU

Prezidenti Repúblika (PR), Taur Matan Ruak lakohi Governu atrapalla servisu jornalista sira nian iha Radio Televizaun Timor Leste (RTTL), tanba servisu jornalista nian la’os hanesan servisu bai-bain.

Relasiona no preokupasaun ida ne’e, PR Taur Matan Ruak haruka karta urjente ida ba Governu hodi buka solusaun lalais ba problema ne’ebé mak oras ne’e dada’uk jornalista sira iha RTTL hasoru.

“Sitausaun ida ne’e desestabilija no atrapalla sira (RTTL) nia servisu, i ne’e halo sira la fó sira nia enerjia 100%, pior liu ema sira ne’ebé tinan barak servisu ona no iha esperensia, tanba ita ko’alia kona-ba rekursus umanus, maibé ida ne’ebé iha ona esperensia, ita duni tiha, ita dada fali ema ne’ebé foun ita hanorin tiha, ita duni tan,” dehan PR Taur Matan Ruak.

Xefi Estadu ne’e afirma,  dalan diak ba funsionáriu sira iha RTTL tenki hetan solusaun ida ne’ebé mak bele motiva, inspira no fó korazen jornalista sira iha RTTL ne’e bele hala’o sira nia servisu ho diak.

 Presidenti Taur iha preokupasaun bo’ot ba situasaun ida ne’e, maibé nia enkoraja nafatin Governu para buka solusaun ida ba problema ida ne’e.

Taur Matan Ruak dehan, Governu iha Sekretáriu Estadu ida ne’ebé mak tau matan de’it ba servisu jornalista sira nian, li-liu RTTL.

 Iha sorin seluk Primeiru Ministru (PM) Rui Maria de Araújo rekuñese katak, nia simu duni karta ida husi Prezidenti Repúblika, mas konteudu karta ne’e, nia labele deskobre sai ba públiku.

“Ha’u konfirma de’it katak, iha karta duni, maibé nia konteudu la’os atu ko’alia iha públiku,” dehan PM Rui Maria de Araújo ba jornalista sira iha Palacio Prezidensia Aitarak Laran Dili, Kinta (01/09).

Xefi Governu ne’e hatutan, Prezidenti Repúblika haruka karta duni ba Governu hodi husu informasaun kona-ba prosesu tranzisaun iha RTTL nia laran halo nusa.

Rui Araújo dehan, karta ninia detaillas ne’e, nia labele ko’alia sai, maibé iha tempu badak Governu sei fó resposta ba Prezidenti Repúblika.cos

Jornal Nacional

PR TAUR-PM RUI DISKUTI SOLUSAUN KAZU PNTL-F-FDTL

Prezidenti Repúblika (PR), Taur Matan Ruak ho Primeiru Ministru (PM), Rui Maria de Araújo diskuti hodi buka solusaun ba problema membru Polisia Nasionál Timor Leste (PNTL) tiru membru FALINTIL Forsa Defeza Timor Leste (F-FDTL), iha Munisipiu Ainaro foin lalais ne’e.

PM Rui Araújo informa katak, iha sorumutu ho PR Taur Matan Ruak ne’e, sira ko’alia kona-ba kestaun seguransa no defeza ninian, relasionamentu entre F-FDTL ho PNTL.

“Ikus ne’e iha kestoens disiplinares lubuk ida ne’ebé mosu entre F-FDTL ho PNTL, entaun Prezidenti hato’o ninia hanoin, no Governu mós hato’o ninia hanoin, depois agora ba oin ita buka oinsa atu rezolve,” informa PM Rui Araújo ba jornalista sira iha Palacio Prezidensia Repúblika Aitarak Laran Dili, Kinta (01/09).

Xefi Governu ne’e hatutan, agora dada’uk Governu estuda hela pedidu husi Komando F-FDTL kona-ba atu estbelese ekipa ida atu halo analije ida ba instituisaun F-FDTL ho PNTL.

Eis Ministru Saúde ne’e relata, Governu haree kestaun ida ne’e, li-liu iha kontestu konseitu estratéjiku defeza i seguransa, ne’ebé oras ne’e dada’uk finalija hela.

“Iha konseitu ne’e nia laran mak ita define papel importante husi PNTL no F-FDTL, iha áreas determinadas. Wainhira konseitu ne’e aprova ona, depois mak ita haree oinsa atu halo analije hotu ne’ebé mak persija atu halo, depois dezenvolvimentu ho reforsu ba instituisaun rua ne’e ba tinan sanulu oin mai ne’e atu halo oinsa,” katak Rui Araújo.

Eis asesor Ministériu Finansa ne’e esklarese, agora dada’uk Governu aberta hela ba kestaun ida ne’e, maibé persija diskusaun detailadu liu tan atu haree, mas iha kestaun disiplinares ne’ebé mak persija atu rezolve dada’uk ona.cos

Jornal Nacional

SE MAK KONTROLA KILAT IHA POLISIA..?!

Jornal Nacional, editorial

Instituisaun Polisia Nasional Timor Leste (PNTL) iha semana ida ikus nee sai pontu atensaun publiku nian relasionadu ho akontesimentu membru Polisia ida tiru kanek membru F-FDTL ida iha Muncipio Ainaro.

Akontesimentu nee halo publiku senti paniku oituan, ho hanoin ida katak F-FDTL mos iha kilat iha liman nebe bele mosu konfrontus armas entre instituisaun rua nee. Maibe komando F-FDTL kontrola ninia membru tomak hodi la halo reajem kontra polisia.

Aktu nebe oknum polisia komete nee laos deit publiku mak kondena maibe komando Polisia rasik mos kondena tamba oknum polisia nee estraga imajen inistituisaun Polisia Nasiona Timor Lorosae perante povu Timor Leste.

Membru Polisia tiru membru F-FDTL nee choque ida ba instituisaun F-FDTL tamba hotu hotu iha aramas iha liman maibe F-FDTL iha sentidu estadu nebe boot, lakohi povu nee terus tan, nunee komando F-FDTL entrega prosesu tomak ba Ministeriu Publiku atu prosesa tuir lei nebe vigora iha rai doben ida nee.

  “Ita labele haree kazu ida ne’e, depois ita sobu buat hotu, maioria responsabilidade total, i bele ita dehan traisaun total mak ida ne’e, maibé kestaun ida ne’e Komandu F-FDTL konsidera kestaun ne’ebé ita bele rezolve ho ulun malirin, no Estadu ne’e tenki hamriik, tanba Estadu Timor Leste koñesidu iha mundu tomak,”  Filomeno Paixão.

Los duni senhor, ahi lakan laos atu rega tan minarai ba atu lakan makaas liu tan maibe oinsa atu hamate ahi nee hodi labele ahi nee sunu ita nia uma ka ema seluk ninia uma hodi hamosu despeza barak liu tan.

Agora dalan nebe instituisaun F-FDTL hola atu prosesa tuir lei, nee diak teb-tebes tamba aktu nebe membru polisia kometa nee aktu individual, laos orientasaun komando PNTL nian. Publiku labele kahor asaun individu ho asaun instituisaun, akontesimentu iha Ainaro nee puro asaun individu, laiha orientasaun komando PNTL tan nee responsabilidade individu membru polisia nee rasik.

Laiha duvida katak iha fulan hirak ikus nee membru polisia komete kazu krime barak teb-tebes. Polisia nudar instituisaun ida nebe garante lei no ordem ba sidadaun tomak mak viola fali lei ho ordem nee rasik.

Iha kazu balu nebe diario nee regista asaun membru polisia nian kontra membru F-FDTL no asaum membru polisia kontra sidadaun bai-bain. Membru Polisia atake membru F-FDTL ida iha Laulara, membru F-FDTL baku membru polisia iha Ainaro, membru Polisia tiru kanek membru F-FDTL iha Ainaro no membru polisia tiru mate sidadaun iha Muncipio Covalima no membru polisia baku jornalista wainhira halao aktividade jornalismo.

Akontesimentu sira nee laos atu sukit saida mak membru polisia sira komete maibe sai nudar pontu reflesaun atu nunee komando bele tau regras forte iha instituisaun laran atu nunee membru hotu – hotu obdese.

Iha instituisaun F-FDTL komando kontrola tomak armas nebe membru F-FDTL sira uza. Iha instituisaun Polisia se mak kontrola armas sira nee? membro polisia rekrutadu foin remata formasaun fulan tolu iha Akademia Polisia mos bele kaer ona pistola hodi pamer tun sae.

Iha krise 2006 polisia ninia kilat barak lakon, too ohin loron seidauk hetan. Iha tinan kotuk Membru Polisia balu lori kilat ba namora iha tasi ibun, kilat tau iha kareta laran ema naok, too ohin loron laiha informasaun hetan fali ona ka seidauk? Nunee mos membru polisia ida lori pistola ba uma ninia oan lahatene pistola brinkeru hodi tiru malu nebe ida mate.

Nee hatudu katak komando polisia ladun kontrola maximu ba kilat sira nebe fo ba membru sira uza. Pistola sira nee uza wainhira tempo servisu, laos uza ba tama sai festa, tara pistola hanesan koboy, lahatene se mak atu gava?

Ho akontesimentu nee komando polisia presiza regras regioruzu kontrola kilat sira nee, se lae akontesimentu iha Ainaro nee sei repete fila iha Municipio seluk nebe bele provoka konkatu armas boot liu tan tamba ema ida iha ninia batas kesabaran, F-FDTL mos iha batas kesabaran.*

DESKONFIA PNTL IHA GRUPU ORGANIZADU HO KILAT

Organização Não Governamental (ONG) Fundasaun Mahein (FM) nia monitorizasaun ba problema kontinua mosu husi atuasaun Polisia Nasional Timor Leste (PNTL), deskonfia iha grupu organizadu ne’ebé kompleta ho arma subar án iha instituisaun ninia laran.

“Relatóriu ne’e identifika ona problema lubuk ida nu’udar kauza no implika ba  atuasaun sira ne’e. Tamba formasaun unidade balu iha PNTL nia laran hanesan UEP ho nia sub-unidade sira forma hanesan grupu paramilitar ida no hakiak dadauk iha PNTL nia laran ho kilat ka arma sufistikadu liu kompara ho F-FDTL,” Diretor Ezekutivu FM, Nelson Belo, hateten liu husi karta komunikadu ne’ebe JN-Diário simu Kinta (01/09/2016).

Nia haktuir, atuasaun husi membru Polisia Nasional Timor-Leste (PNTL) nian foin lalais akontese iha Munisipiu Ainaro oknum PNTL tiru membru F-FDTL ida to’o kanek, insidente grave seluk oknum PNTL tiru mate komunidade munisipiu Covalima kondisaun moras mental, no akontese asaun fijiku hasoru membru F-FDTL no mos hasoru komunidade bai-bain iha fatin seluk halo ema hotu preokupa.

Nia esplika, PNTL adopta estratéjia no filozofia polisiamentu nia iha karakteristika polisia komunitaria no adopta doutrina polisiamentu VIP (Vizibilidade, Involvimentu no Profesionalismu).

“Dalaruma sira hanoin katak sira iha prevelejiu liu hanesan forsa polisia espesial ida no elite iha postura no organizasaun PNTL nian no hanesan mos pessoal ka grupu ida ne’ebe iha poder no forsa seguransa ida ne’ebe povu tenke tauk,”tenik nia.

Iha sorin seluk karta komunikadu ne’e reforsa liiutan katak, aplikasaun medida disiplinar ba membru PNTL ne’ebe involve iha kazu disiplinar ladun forte no rigorozu. Nune’e mos ba kazu ne’ebe nia natureza kriminal la ho seriu hodi prosesa tuir lei ne’ebe vigor.

“Impaktu husi ida ne’e motiva liu tan membru PNTL sira seluk hodi komete kazu ne’ebe hanesan. Dalaruma prosesu ba kazu sira ne’e la’o, maibe públiku ladun hatene, tamba PNTL rasik la iha mekanismu ida hodi fo sai medida sira ne’ebe PNTL aplika hasoru kazu sira disiplinar no kriminal,”afirma Nelson Belo.

Lolos ne’e kualker membru ne’ebe mak viola lei tenke ba hatan tribunal, sala saida deit laiha toleransia nu’udar konsekuensia, laiha lealdade no disiplina, hodi nune’e mak bele prevene asaun indisplina seluk iha setor seguransa nian.

“Regra rigorozu sira ne’e hotu, sei halo membru PNTL sira hala’o nia kna’ar ho kompetente, onestu ho lealdade ba instituisaun sai buras ho profesional,”esklarese nia.

FM fiar katak ho meus sira ne’e, sei iha disiplina ida ne’ebe rigorozu iha Timor-Leste tomak, sei iha benefisiu diak atu ita hetan balansu ba justisa ho disiplina hodi hasa’e profesionalismu iha institusaun polisia ho militar nian.

Nune’e, FM rekomenda ba Ministériu Interior ho Komandu Jeral PNTL persiza haree fila fali polítika deslokasaun/despozitivu sira BOP-PNTL, aplika responsabilidade rigorozu husi komandu ba nia membru sira ne’ebe involve krime. */Eus

Jornal Nacional

ANTÓNIO “55” HUSU BA MILITANTES, HAKAT BA SENTRU VOTASAUN HILI LIDERANSA FRETILIN

Iha Sábadu, dia 3 Setembru 2016, Partidu Históriku Frente Revolusionária Timor Leste Independenti (FRETILIN), realiza eleisaun direta hodi hili lideransa Partidu FRETILIN ba periodu 2017-2020.

Votasaun ba lideransa partidu nian ba periodu ne’e diferensia ho periodu hirak liu ba kotuk ne’ebé votasaun liu husi delegasaun ka kongresistas mak ba hili ninia lideransa.

Maibé votasaun ba lideransa ba partidu nian, iha periodu ne’e vota ba Pakote úniku, ne’e mak Francisco Guterres Lu’Olo ba Prezidenti partidu no Marí Alkatiri ba Sekretariu Jerál.

Nune’e mós sentru votasaun mós estabelese husi nasionál to’o iha baze, nune’e kuadrus no militantes hotu-hotu ida-idak mak sei ba fó ninia votus diretamente ba nia lideransa.

Kordenador Partidu FRETILIN husi Munisípiu Ermera, atual Deputadu iha Parlamentu, António dos Santos “55” husu ba militantes tomak FRETILIN nian, atu hakat ba sentru votasaun, iha 3 de Setembru para hili lideransa partidu nian para bele lidera partidu FRETILIN ne’e hodi hakat ba eleisaun jerál 2017.

“Ba votantes FRETILIN nian iha territóriu tomak, liu-liu ba Munisípiu Ermera, ha’u husu imi nia partisipasaun no kolaborasaun tomak atu hakat ba sentru votasaun ne’ebé besik imi, atu bele vota ba ita nia lideransa ba partidu FRETILIN. Tanba ida ne’e mak ita nia forsa Polítika Ermera nian mak ida ne’e atu bele hakat ba kompete iha eleisaun jeral 2017 mai. Tanba ne’e iha dia 3 de Setembru hotu-hotu hakat ba sentru votasaun atu vota ba ita nia lideransa”, António 55 deklara.

Iha kampaiña ba loron ikus Tersa feira, 30 de Agostu iha Tasi Tolu, kuadrus no militantes husi Ermera Gleno ne’ebé mak partisipa iha kampaiña ne’e kuaze ema 2000 liu ne’ebé, liu tiha tarjeitu ne’ebé mak komisaun organizadora ba eleisaun pakote úniku propoen.

“Desde horseik to’o ohin ne’e ami nia preparasaun hodi para mai tuir kampaiña loron ikus ne’e em vez de kareta 20 mas sai tiha fali kareta 38, ho motorizadas 200 i tal. Ne’ebé ema kuaze por volta de 2000 e tal hanesan ne’e mak agora dadaun ne’e mai tuir kampaiña”, informa António 55 ba Jornal Nacional Diário wainhira partisipa iha kampaiña loron ikus Kuarta feira (30/08) iha Tasi Tolu.

António 55 reforsa katak, ho forsa ne’ebé mak mai tuir kampaiña kuaze metas militantes FRETILIN iha Ermera nian mak mai tuir kampaiña. Tanba sira ne’ebé mak mai tuir kampaiña ne’e kuadrus deit, maibé seidauk sura ho militantes.

“Tanba ne’e ha’u bele dehan, forsa Polítika iha Ermera mós iha, nune’e bele preparadu ona atu hili lideransa Partidu FRETILIN nian, kamarada na’in rua (Lu-Olo ho Marí Alkatiri) atu lidera FRETILIN”, katak António 55.

António 55 mós fundamenta katak, ho forsa polítika FRETILIN nian ne’ebé oras ne’e dadaun iha ne’e mós sei sai hanesan sasukat ida FRETILI nian atu bele kompete fila fali ba iha eleisaun jerál 2017.

António 55 mós dehan katak, durante preparasaun ba kampaiña iha Díli infrenta difikuldades oituan ba finanseira tanba husi komisaun limita ba kareta 20 deit, maibé realidade kareta ne’ebé mak mai ne’e hamutuk 38, motorizadas 200 ital no ema ne’ebé mak mai ne’e kuaze 2000 i tal liu. Signifika liu tiha orsamentu ne’ebé mak ami prepara.

“Sira nia vontade mai tuir kampaiña ne’e ami nunka obrigda no ami nunka ba bolu, maibé ho sira nian konsensia rasik katak, sira ne’e ema FRETILIN. No ami avizu ba sira ne’ebé mak iha sidade Gleno laran deit, maibé wainhira ami atu mai, sira balun telefone mai dehan katak, ami foin mak iha dalan, no sira balun dehan mós foin to’o mai. Entaun realidade ohin ne’e, liu tiha fali tarjeitu ne’ebé mak komisaun limita. Ne’ebé ami labele bandu sira, tanba sira iha konsensia katak sira mós FRETILIN”, António 55 fundamenta.

Prezidenti Fiskalizasaun Munisípiu Ermera, kuadrus no militantes ne’ebé mak mai tuir kampaiña no sira ne’ebé mak la mai tuir kampaiña ne’e hatene ona katak, sira atu hili sira nia lideransa ne’ebé mak desde uluk to’o ohin loron kare metin no tane aas nafatin partidu FRETILIN hodi ba luta ba libertasaun Timor Leste (TL) ne’e.

“Tanba ne’e mak ha’u husu mós forsa ne’ebé mak agora iha ne’e, ne’e forsa polítika ida ne’ebé lori presaun ida ne’ebé atu hakat ba oin. Tanba ne’e ha’u husu katak presaun ida ne’e tenke lori nafatin hodi hatudu iha eleisaun ba lideransa pakote úniku iha dia 3 de Setembru hodi kamara Lu-Olo ba Prezidenti no kamarada Mari Alkatiri ba Sekretariu Jerál”, katak Alfredo Soares.

Entretantu, kampaiña ne’e halibur militantes FRETILIN nian mai husi Munisípiu Bobonaro, Ermera, Liquiça, Aileu no Dili rasik, inklui mos Postu Administrativu Atauro.

Partisipa iha kampaiña ne’e alénde Prezidenti Partidu FRETILIN, Francisco Guterres ‘L-Olo’ akompaiña mós ho nia espoza, Sekjer Mari Alkatiri ho nia espoza, membru CCF, Organizasaun Mulher Popular Timor (OPMT), atual Ministru Negosius Estranjeirus no Kooperasaun (MNEK), Hernani Coelho, atual Primeiru Ministru, Rui Maria de Araujo no militantes FRETILIN tomak husi munisípiu lima, kampaiña ne’e la’o ho susesu no hetan seguransa másimu husi PNTL no seguransa interna partidu nian.ixo

Jornal Nacional

MILITANTES FRETILIN HALO KARTAUN BA ELEISAUN

Durante  semana  ida  ho  balun  militantes  partidu  históriku  FRETILIN  hamutuk nain 108  mil resin  nadodon  iha  Comite  Central  da  FRETILIN  (CCF)  hodi  halo  kartaun  militantes  atu ba tuir eleisaun direta hodi hili lideransa Prezidente partidu FRETILIN Francisco  Guterres  Lu-Olo no  Sekretariu  Jeral  Mari  Alkatiri.

Responsavel  preparasaun  ekipa  formador  nasional  no  materias  ba  eleisaun  direta  partidu,  Carlito  da  Silva hatete,  militantes  FRETILIN  ne’ebé  mak  agora  dadauk  rejistu  hodi  halo  kartaun  militantes  hodi  prepara  ba  eleisaun  direta  iha  loron  3  Setembru  ho  total  108  mil  ital  mak  rejistu  tiha  ona  iha  data  baze  de  dadus.

Tuir  informasaun  iha  baze  de  dadus  ne’ebé  mak  ami  hetan  ne’e  108  Mil  ital  ona  ne’ebé  mak  iha  ami  nia  liman  ,maibé  agora  dadauk  hobur  mai  ne’e  mai  husi  fatin  hotu-hotu  hanesan  postu  administrativu  5  ne’ebé  mak  kompostu  husi  munisipiu  kapital  Dili, laran.Lá  inklui   munisipiu  12  no  regiaun  Autonomu  Ambeno  Oe-cusse.

Tuir  responsavel  preparasaun  ekipa  formasaun  nasional  no  materias  ba  eleisaun  direta  partidu  FRETILIN  nia  haree  kona-bá  preparasaun  eleisaun  direta  ba  lideransa  partidu  FRETILIN  nain  2  ne’e  hetan  reasaun  makas  tebes  husi  militantes  FRETILIN  nian ,tamba  iha  semana  ida  nia  laran  sede  CCF  nian  ne’e  nakonu  ho  militantes  sira  ne’ebé  mak  seidauk  iha  kartaun  militantes  halo  prosesu  priense  formulariu  atu  bele  hetan  kartaun  militantes  partidu  FRETILIN  nian.

Tamba  nu’udar  militantes  partisu  históriku  FRETILIN  tenki  halo  preparasaun  ba  eleisaun  direta  ne’ebé  sei  hala’o  iha  loron  3  hodi  hili  sira  nia  lideransa  interna  ba  Prezidente  no  Sekretariu  Jeral  partidu  históriku  FRETILIN  nian.

“Ami  nia  ekipa  husi  nasional  komisaun  preparasaun  ba  eleisaun  (KMPO) hatun  ona  ninia  ema  sira  ba  to’o  iha  sentru  votasaun  eleisaun  hotu-hotu  hodi  halo  superviziona  kona-bá  lalaok  eleisaun  liu-liu  disiplina  no  sira  seluk  tan  hodi  kontrola  didiak  atu  nune’e  sai  susesu  ba  partidu  históriku  FRETILIN  ida  ne’e”nia  hatete.

Nia  hatutan  tan  katak,  tuir  politiku  partidu  históriku  FRETILIN  nian  ba  eleisaun  direta  ne’e  sei  hala’o  iha  aldeia  ida-idak  hotu,  tamba  ne’e  iha  loron  3  fulan  Setembru  ne’e  militantes  sira  ne’ebé  mak  atu  ba  estasaun  votasaun  ida-idak   ne’e  sira  sei  lori  sira  nia  identidade  hanesan  kartaun  militantes  FRETILIN  no  lori  sira  nia  kartaun  ne’ebé  mak  sira  prosesu  hodi  hetan  ne’e.

Aliende  kartaun  original  ne’ebé  mak  sira  seidauk  hetan  ne’e, sira  tenki  lori  formulariu  ne’ebé  mak  sira  priense  ne’e  nune’e  mós  sé  wanhira  nia  militante  FRETILIN  duni  uluk  kedas  nia  inan aman  FRETILIN  seidak  iha  buat  2  ne’e, entaun  iha  estrutura  prepara  ona  kartaun  votante  ne’e  iha  sinal  ida  hodi  bele  identifika  katak, ema  ne’e  FRETILIN.

Objetivu  husi  eleisaun  direta  ba  lideransa  Prezidente  Partidu  históriku  FRETILIN  nain  2  hodi  FRETILIN   bele  kontrola  ninia  militantes  FRETILIN  ne’e  husi  bairus  no  aldeias  hotu-hotu  hodi  oinsa  FRETILIN   bele  organiza  an  hodi  prepara  an  ba  eleisaun  2017.Tos

Jornal Nacional

TIMOR FIRME HO KONSILIASAUN OBRIGATORIU

DILI - Primeiru Ministru (PM), Rui Maria de Araújo,  hatete, Timor-Leste kontinua fó fi’ar ba konsiliasaun obrigatóriu hodi rezolve problema fronteira marítima entre Timor-Leste no Austrália.

“Ita nia pozisaun katak komisaun ne’e legalmente konstituindu tuir tratadu ne’ebé iha, portantu iha kompeténsia atu rona kestoens ne’ebé relasionadu ho desputa ne’ebé iha entre Austrália ho Timor-Leste,” PM Rui informa ba jornalista sira iha Palásiu Prezidensiál, Bairo-Pite, Dili, Kinta, (01/09) hafoin hala’o enkontru ho Prezidente Repúblika (PR), Taur Matan Ruak.

PM Rui esplika, Timor-Leste nia pozisaun klaru, xefe negosiadór Xanana Gusmão lidera hela ekipa ida iha konsiliasaun obrigatóriu. Tanba Austrália lakohi halo negosiasaun ho Timor-Leste, tanba ne’e Timor-Leste rekore ba mekanizmu ne’ebé Konvensaun Internasionál ba direitu tasi nian (UNCLOS) preve ona hodi halo konsiliasaun.

Maibé dadauk ne’e Austrália argumenta katak, komisaun konsiliadór ne’e laiha juridisaun tanba ne’e komisaun mak sei rona argumentu hosi Austrália depois mak deside.

Antes ne’e Timor-Leste no Austrália deside ona para tuur hamutuk iha konsiliasaun obrigatóriu hodi deskuti kona-ba kazu fronteira marítima nian.

Tanba ne’e dadauk ne’e Konsiliadór na’in 2 hosi Austrália no na’in 2 hosi Timor-Leste inklui mós xefe konsiliadór ne’ebé hili hosi Sekretáriu Jerál Organizasaun Nasoens Unidas (ONU), Ban Ki Moon, hodi lidera konsiliasaun obrigatóriu ne’e.

Servisu konsilisasaun obrigatóriu ne’e to’o tinan ida hahú hosi fulan Jullu tinan ida ne’e to’o fulan Jullu tinan oin 2017, Komisaun Konsiliadór ne’e bele produs ona rezultadu sobre fronteira marítima entre Timor-Leste no Austrália.

Hato’o ba Ban Ki-moon

Entretantu Dosente Fakuldade Relasaun Internasional iha Universidade Nasional Timor Lorosa’e (UNTL) António  Freitas haktuir, iha prosesu konsiliasauin kompulsoria ne’ebé Timor Leste levanta ba iha ONU Austrália  diskorda ona katak la halo negosiasaun, entaun dalan úniku  ba Timor Leste mak tenke hato’o argurmentu sira ba Sekretáriu Jerál Nasones Unidas (ONU) Ban Ki-moon  hodi hola medidas.

“Prosesu tuir mai ita tenke iha estratejia seluk tan, estratejia seluk ne’ebé ita atu levanta mak ita tenke levanta ba iha Sekretáriu Jerál Nasones Unidas (ONU) Ban Ki-moon  atu forma nia ekipa reprejentante espesial  ba hodi sai mediador ba prosesu sira ne’e,” António Freitas ba Timor Post iha nia servisu fatin Kmapus Induk, Kaikoli, Kinta (01/09).

Depois ne’e mak ikus mai Timor Leste bele avansa ho arbitrajen, ne’ebé mak Timor Leste bele pasa hanesan kazu Filipina ho Xina, maske Xina halo auto defesa ba nia a’an katak deskorda, mas tribunal halo desizaun katak iha parte balu Xina tenke obedese ba tribunal arbitrajen.

Ne’ebé dalan úniku  mak tribunal arbitrajen mak bele halo desizaun sira ne’e atu bele kumpri, iha zona ida labele halo esplorasaun, iha zona ida ne’eba tenke independente.

Kazu Filipina ho Xina sai hanesan referensia ida ba Timor Leste atu bele ultrapasa hodi tuir dalan ida ne’e no Austrália  tenke obedese.

“Ha’u hanoin meius ida ne’e hanesan pre-liminariu ida, ne’ebé prosesu tuir mai sei iha etapa ha’at, ita sei pasa, tanba ne’e Timor Leste tenke iha auto defesa ba nia a’an,” hatete António.(dgx/gus)

Timor Post

HASAI CACUSAN IHA PENALTY, DIT HEIN PONTA LESTA IHA SEMI FINAL

Dili - Jogu meias finais entre ekipa Ponta Leste konrta ekipa Cacusan remata ho drama tensaun alta, no Vitoria pretense ba AS Ponta Leste.

Jogu nee tensaun sai manas bainhira ekipa rua remata ho rezultadu impatadu iha tempu normal antes avansa ba tempu extra.

Ekipa Cacusan, desde minutu inisiu domina bola lansa atakes barak no halo presaun maka’as ba ekipa adversáriu; rezultadu iha minute 35 jogador estranjeiru Cacusan nian Moises Nazaret produs Cacusan ninia golu dahuluk.

Maske AS Ponta Leste konsege responde no halo kontra atakes; nem resulta golu iha primeira parte no Cacusan lidera 1-0 to arbitu hokutu no tun ba deskansa.

Tama hikas kampu iha segunda parte, Ponta Leste mos lansa atakes; defeza no médiu fornese bola barak liu ba  ba oin. Iha minute 73, Ponta Leste ninia sorte mosu liu hosi penetrasaun ne’ebé halo hosi Jorge Alves hamosu golu dahuluk hosi Ponta Leste nian ne’e hodi imapata golu antes hosi ekipa adversáriu. 

Hosi presaun ba presaun, Ponta Leste hetan ninia ritmu no loke netik hamnasa oin midar ba adeptus sira iha minute 85 Jorge Alves loke tan segunda golu hodi anima stadium municipal Dili iha rai nakaras ne’e sai rame liu tan hosi adeptus ekipa rua.

Jogu kuaze atu remata Cacusan ninia ritmu latun no mantein disiplina, tuir loloo’s Cacusan derota ona iha tempu normál maibé jogadór Juvinal Cardoso konsege hamosu surpreza iha minute extra 90+4 produs segunda golu hosi Cacusan no tempu extra finalize ho impatadu 2-2.

Hakat ba extra time ekipa rua mantein jogu hanesan salva bola no fornese ba oin, kuaze atu hamosu golu iha grande area laran miabe sorte mk la sadere ba ekipa rua. No extra time minute 30 remata ekipa rua mantein 2-2.

Hakat ba suta Penalty, ezekutador As Ponta Leste Jorge Alves Felipe Leite, Lourenco Ximenes, no Duarte Lemo ho susesu ezkuta oportunidade.

Enkunantu Ekipa ezekutador hosi Cacusan bola dahuluk hosi jogador estranjeiru Moizes Nazareth konsege salva hosi guarda rede, bola hosi Salvador Leoneto konsege golu, tuir fali bola hosi Elvis hareawan la golu, no taka ho juvinal Cardoso maibe resultadu hatudu 4-2.

Total golu hosi jogu ne  maka 6-4 vitoria partense ba AS Ponta Leste no hakat ba hasoru ona DIT-FC iha semi final ne’ebé sei halao iha loron Domingo.

EKipa Ponta Leste-Aderito Fernandes, Agostu Soares, Candido Oliveira, Agostinho Silva, Ezaquel Fernandes,Jorge Alves, Felipe Leite, Nidio Neto, Joao Paulo, Sota Toko Naga, no Lourenco Ximenes. Supliente-Paulino Rosario, Duarte Lemos, Camilo Boavida, Alfredo Godinho, Marcelino Gumao, Yluianto Morais no Caetano Telmo. Treinador Eduardo Pereira.

 Ekip Cacusan-Leonel Da Costa, Hernan Clau Tilman, Marco bango, Moizes Nazaret, Elvis hareawan, Joel Mednho, Anotnio Ximenes, Zeremias Soares, Juvinal Boavida, Irineu Lopes, Jose Boavida. Supliente-Joanico Soares, Juvinal Cardoso, Natalino Borges, Jacson Batista, Demofilo Boavida, Salavdor Leoneto no Jose Santos, Treinador Celementino De Araujo.(ato/van)

Timor Post

Ministériu Saúde Foti Asaun Hasoru Virus Zika

Dili, (ANTIL) – Ministériu Saúde (MS) fo ona asaun hasoru virus Zika. Tanba ne’e, husu ba komunidade  iha terotoriu tomak atu iha konsiensia prevena án husi moras Zika, tanba bele fó perigu ba moris. Sinal husi moras ne’e hanesan mós moras Dengue.

‘’Moras Virus Zika nia sintomas hanesan  ho moras Dengue. Tanba ema ne’e mai ho isin manas, moras, matan mean no mós sei mosu ras iha kulit. Moras ne’e bele kona ema durante loron lima to’o hitu,”  Diretora Jerál Prestasaun Servisu MS, Odete da Silva Vieigas esplika ba ANTIL iha  MS Kaikoli,  Dili, Sesta (2/9).

Tuir Diretora, moras ne’e nia sintomas kuaze hanesan maibé durante ne’e hala’o ona teste iha laboratorium maibé moras ne’e negativu.

Minísteriu Saúde halo ona siensibilizasaun ba moras Zika Virus tanba moras ne’e reporte ona iha Singapura ho kazu 81 ne’e mak rejistadu. Antes ne’e, moras virus Zika mai hosi Amerika Latina.

”Minísteriu saúde nian oinsá atu bele hato’o informasaun ba sosiedade, atu hatene no prevene moras ne’e. Liuliu hemu aimoruk  hodi hatuun isin manas. La iha ona vasina espesifiku,” nia dehan tan.

Minístériu saúde hala’o abatisasi no fumigasaun iha fatin sira ne’ebé mak detetadu, atu hosi parte vizilánsia etimólojia bele identifika kazu.

Atu prevene moras ne’e, husu ba komunidade sira atu tau atensuan ba ambiente hodi moris saúdavel. (Jornalista : Zezito Silva/Editor: Otelio Ote)

Presiza Digitaliza Arkivu Krime Grave

DILI, (ANTIL) – Governu liu-hosi Ministru Estadu Koordenadór asuntu Administrasaun Estadu e Justisa no Ministru ba Administrasaun Estatál, Sesta, (2/9) iha Matadouro Dili, inagura arkivu nasionál ba krime grave no krime bai-bain ho esperansa ba futuru presiza digitalizasaun.

”Dokumentu sira ne’e presiza halo digitalizasaun, tanba aban bainrua presiza dokumentus sira ne’e iha formatu eletróniku”, Ministru Dionísio Babo Soares ba jornalista sira hafoin inagurasaun.

Hanesan reprejentante Xefi Governu iha inagurasaun ne’e, Babo rekoñese, falta ekipamentu hanesan armari ne’ebé di’ak hodi kompleta.

Ho falta sira ne’e, nia sei hato’o ba Primeiru Ministru hodi haree no tau iha konsiderasaun ba planu orsamentu 2017.

”Espasu fiskál ba tinan oin ladun barak, tanba atu tama ona iha prosesu eleisaun, serbisu efetivu kuandu la’o depois eleisaun no forma ona governu foun, mais ida ne’e presiza duni atu haree no tau atensaun”, katak nia.

Tanba, planu estratejiku dezenvolvimentu setór justisa nian iha komponente lima ne’ebé importante, ida mak infrastrutura teknolojia ba informasaun.

Arkivu ne’e importante atu rezerva sai referénsia no sai dokumentus hodi fó protesaun ba tempu naruk. (jornalista: Rita Almeida)

Foto: Ministru Estadu Koordenadór asuntu Administrasaun Estadu e Justisa no Ministru ba Administrasaun Estatál, Dionísio Babo Soares ko'alia ba jornalista sira iha Matadoru, Sesta, (2/9). Foto ANTIL/Rita Almeida

PROSESU DELIMITASAUN FM, LA FO IMPAKTU KOOPERASAUN TL-AUSTRALIA

Prosesu delimitasaun Fronteira Marítima (FM) entre Timor Leste no Australia, ne’ebé oras ne’e la’o namanas hela iha Holanda, la fo impaktu ba nasaun rua ninia kooperasaun bilateral.

“Ita nia relasaun ho Australia, uluk ita dehan kedas Australia mos retira fila-fali iha sira ninia intervensaun iha dia 29 Agostu ita bo’ot sira mos haree, kestaun fronteira marítima buat ketak ida, kestaun relasoens nasaun rua ne’e la’o nafatin normal,  laiha implikasaun ba ida ne’e, o que iha duni  ita labele hateten buat hotu rosas, não todos rosas,  mas em termos ninia prinsipiu  fundamental relassaun bilateral nasaun viziñu ne’e sei laiha impaktu,”esplika Ministru  Negosius Estranjeirus no Kooperasaun (MNEK), Hernani Coelho, ba jornalista iha edifisiu Ministeriu Finansas, Kuarta (31/08).

Kona-ba  aprezentasaun delimitasaun  FM  entre  nasaun Australia ho Timor Leste iha  Haya  Olanda ne’e? Hernani Coelho, dehan, diskusaun ba FM   ne’e halao ona bad ala rua,  primeira parte sira hasoru malu koalia prosedimentu ne’e halo oinsa? loke ou laloke,  se maka bele haree ou rona.Tanba  ne’e maka tempu  sira konkorda pelo menus fahe buat rua diferente, ida publiku, depois ida reseitu.

“Públiku  ne’e maka uluk ita akompaña  no haree,   agora  prosesu tuir mai kada rai ida aprezenta sira ninia pozisaun ho ninia argumentu, depois  sira aprezenta hotu tiha Komisariu sira tur hamutuk para halo analize ba pozisaun sira ne’e, depois bolu fali sira hodi koalia. Ne’ebé ha’u hanoin kuandu ita nia ekipa ba Haia,  Holanda fila mai sira sei fo detallu liu tan, tanba ida publiku, ita haree iha televizaun,  mais ou menus  buat ne’e la’o oinsa, depois ida ikus fali diskusaun interna ita la hatene,” dehan Hernani Coelho.

Alende ne’e iha aprezentasaun delimitasaun FM foin lalais  ne’e,   iha Haia, Holanda husi Estadu Timor Leste ninian  maka  Xefi negosiadador delimitasaun fronteira Marítima, Kay Rala Xanana Gusmão, akompaña Ministru Estadu Prezidensia Konsellu Minsitrus, Agio Pereira no Adjunta Elisabeth  Exposto.

Durante prosesu ne’e hala’o lidera husi Prezidente meza Taksoe-Jensen  no advogadu  husi Timor-Leste ninian ne’ebé maka Estadu fo kontratu,   professor  Voluchan Lowe no Michel Wood Koong.

Iha aprezentasaun Kay Rala Xanana Gusmão nian ba Tribunal Haia, Holanda, hatete katak, Timor-Leste sei la hakiduk atu koalia kona ba delimitasaun FM ho Australia, tanba ne’e direitu TL nian.

“Ami la hakiduk. Timor sei luta. Ami la mai hasu favor. Ami mai hodi husu ami nian direitu iha lei internasional,”dehan Xanana Gusmão iha Tribunal Arbitrajen, Haia, Holanda, Segunda (29/08/16).avi 

Jornal Nacional

Aderito: Ha’u ho Dr. Rui La Hetan Direitu Ex-Titular

DILI, (ANTIL) - Prezidenti Parlamentu Nasionál, Aderito Hugo fó sai katak, nia an ho primeiru ministru Rui Maria de Araujo sei la iha direitu ba ex-titular tanba titular sira nain rua nian la to’o fulan 42.

“Ha’u tenki dehan sai katak, Dr. Rui Maria de Araujo la goza direitu ex-titular, nune’e mós ha’u tanba ami rua hala’o titular ami nia la to’o fulan 42,” Prezidenti Aderito Hugo esplika ba estudante Universidade Nasionál Timor Lorosa’e foin lalais ne’e hodi hatan ba pergunta hosi estudante sira.

Nia hatutan katak, nia simu knaar hodi troka ex-Prezidenti Parlamentu Nasionál iha loron 5 de maio no sei to’o 30 Jullu 2017 ida ne’e lakompleta fulan 42.

Maibe nudar deputadu Aderito Hugo bele rekere nia pensaun nune’e mós Primeiru Ministru nudar ex-membru governu.

Tuir Aderito direitu hirak ne’e mós oras ne’e iha diskusaun nia laran relasional ho idea pensaun vitalisia ho opsaun rua ida, ilimina total, rua, reduz.

Nune’e nia resposta bele hetan iha loron 19 Setembru bainhira reprejentante sira halo diskusaun ba iha lei pensaun vitalisia ne’ebé oras ne’e sai polemika públiku.

Antes ne’e mós eis-Prezidente Repúblika nudar mós titulares, José Ramos Horta, konkorda atu halakon totál pensaun vitalisia no halakon mós pensaun ba eis titulares sira.

Nune’e mós Prezidenti da Repúblika Taur Matan Ruak no Jeneral Lere Anan Timur tanba sira konsidera la justu bainhira ema ida serbisu tinan 4 de’it maka hetan ona pensaun vitalisia iha vida tomak.  (Jornalista: Manuel Pinto / Editór : Gantry Meilana)

Foto: Prezidenti Parlamentu Nasional, Aderito Hugo da Costa

Suspeitu Kazu Ainaro Tama Prizaun Preventiva

DILI, (ANTIL) – Suspeitu oknum Polísia Nasionál Timor-Leste (PNTL) ne’ebé tiru kanek membru FALINTIL-Forsa Defeza Timor-Leste (F-FDTL), Lázaro José da Costa iha Munisípiu Ainaro foin lalais ne’e, tama ona prizaun preventiva.

“Ami simu tiha ona keixa kazu ida ne´e iha semana kotuk, primeiru interogatóriu hala’o ona iha Segunda (30/8). Arguidu ne’e agora tama tiha ona prizaun preventiva”, Prokuradór Jerál Repúblika, José Ximenes ba jornalista sira iha Palásiu Prezidénsia Repúblika, Bairu-Pité, Kinta (1/9), hafoin informa asuntu ne’e ba Xefe Estadu, Taur Matan Ruak.

Nia esplika, krime ne’ebé suspeitu komete ne’e kategoria omesídiu forma tentadu (percobaan pembunuhan).

“Agora ita kompleta investigasaun para depois bainhira investigasaun termina ona ita halo akuzaun haruka ba tribunál atu julga”, José esklarese.

Entretantu, vítima nia kondisaun oras ne´e rekopera hikas hafoin hetan operasaun hosi doutór espesialista sira iha HNGV (Hospital Nacional Guido Valadares). (jornalista: Xisto Freitas; editora: Rita Almeida)

Foto: Prokuradór Jerál Repúblika, José Ximenes

Prisiza Hadi’a Kondisaun Bainhira fó Poder ba Xefi Suku

DILI, (ANTIL) - Akadémiku Universidade Nasionál Timor Lorosa’e, Camilo Ximenes observa katak, antes delega kompeténsia ba xefi do suku sira presiza hadi’a uluk kondisaun tanba haree ba nivel edukasaun susar tebes atu implementa kompeténsia ne’ebé mak haktuir iha lei.

“Xefe suku sira mesak grau edukasaun primária. Tanba ne’e, presiza hadi’a lai kondisaun ne’e no estabelese kritériu hodi sai lider suku,” Camilo Ximenes fó hanoin ba ANTIL iha nia kna’ar fatin, Kampus UNTL, Kaikoli, Kinta (01/09)

Tuir Camilo, lei suku foun ne’e di’ak tanba fó kompeténsia. Maibé sira labele lidera konsellu  suku, tanba sira laiha kapasidade natoon.

Tuir loloos, Governu mantein ho lei 2009, kria kondisaun uluk mak haree posibilidade seluk.  Nune’e nasaun seluk labele dehan Timor-Leste kopia de’it. (jornalista : Manuel Pinto/Edtor: Otelio Ote)

Foto: Camilo Ximenes

TAÇA 12 DE NOVEMBRO 2016, KONTRA SLB, ASSALAM TENTA JOGU KUALIDADE

Taça 12 de Novembro 2016 étapa-IV, Assalam FC tenta hatudu jogu kualidade kontra nia adversariu AD. SLB (Associação Desportivo. Sportivo Laulara Benfica) mak sei hala’o jogu iha Estadíu Munisipal Dili, Sabadu (03/09/2016).

Relasiona ho ida ne’e, Kuarta (31/08/2016) entrevista jornalista liu husi rede media sociais (facebook) ho treinador treinador Assalam FC Simon Pablo Elissetche Corea iha entrevista liu husi media social (facebook) hateten, ekipa Assalam iha esperansa katak kompetisaun entre Assalam ho SLB ne’e sei lori tempu ne’ebé naruk, maibe ekipa Assalam sei hatudu agresivu hodi halo atake ne’ebé lalais núne’e ekipa Assalam sei utilija sira ninia forsa hodi taka dalan ba SLB ho stratejia ne’ebé mak iha.

Treinador ne’e rekonhese katak “bazeia ba taktika jogu, ekipa SLB diferensia tebes kompara ho ekipa seluk hanesan Karketu nian, tanba SLB nia ekipa jogadores estremu kuana no karuk iha tekniku ne’ebé lais, no sira halo transaksaun (supply-red) bola lais liu duke Karketu. Maibe ami (Assalam-red) iha esperansa bele manan iha pozisaun ne’ebé SLB sei halo, atu núne’e SLB labele manan iha kompetisaun ne’e,”promete Simon.

Simon hatutan tan,  SLB hanesan ekipa ida ne’ebé famozu iha Timor Leste tanba laos hetan deit Vitoria iha kompetisaun primeira divizaun  Liga Futebol Amadora nian, maibe hare husi parte jogu, ekipa SLB iha ekstrutura ne’ebé interesante tebes, sira nia defensivu mos rapidu tebes. Transaksaun bola lalais no kualidadade tekniku individu mos hanesan deit nomos joagadores sira iha disiplina jogu diak.

 “Tanba ne’e ami (Assalam-red) sei esforsu makás hodi kompete ho ekipa adversariu SLB, dalaruma difisil uitoan, maibe ami esforsu máximu hodi bele manan iha jogu ne’e. Maske iha line up ekipa SLB diak liu Assalam, maibe iha kompetisaun meius finais ne’e ami (Assalam) servisu ho komitementu no hamutuk nafatin atu bele hatudu kualidade jogu hanesan ho ekipa SLB,”afirma Simon. Enkuantu to’o nutisia ne’e públika ohin Kinta 01/08/2016, JNDiário seidauk halo konfirmasaun ho parte ekipa AD. SLB. Ito

Jornal Nacional

GOLU CRISTIAN, ‘TEBE SAI’ KARKETU DILI FC

Jogu kontinuasaun Taça 12 de Novembru ba etapa ha’at (IV) 2016, kompetisaun semana daha’at (IV) nian, ekipa Assalam FC tebe sai  ekipa matak malirin Karketu Dili FC ho score golu 1-0, iha jogu ne’ebé mak ekipa rua halao iha Estadiun Munisipal Dili, Domingo  (28/08/2016).

Tuir observasaun Jornalista JN-Díario nota katak iha jogu entre ekipa rua (Assalam FC-Karketu Dili FC) ne’ebé dirije husi arbitu Nivio Fernandes, iha jogu primeira parte ekipa rua hatudu jogu kualidade  hodi kontra atake ba malu, maibe la konsege hetan rezultadu, núne’e ekipa rua jogu durante minutu 45+1 remata, impata  0-0.

Hafoin deskansa 15 minutus, ekipa rua kontinua jogu ba segundu parte, ekipa Assalam  ho nia treinador, Simon Elissecthe (Chile)  ne’e, esforsu makás konsege “tebe sai” Karketu Dili FC  iha taça 12 Novembru 2016 ne’e.

Golu refere, produs husi abansadu, Cristian A. Gonzales (Chile) iha minutu 52 wainhira hetan bola passa husi nia kompatriota ho númeru jersey 12, Cristian simu no lori kedas ba area perigu Karketu nian, tanba ekipa defeza ladun kontrola ho diak, sei iha distansia  do’ok Cristian husik sutu ida husi ain-karuk, bola refere tama lós ba redi laran parte baliza husi liman kuana.

Golu  Cristian nian nee halo baliza Karketu bilan, tanba hafoin foti matan hateke bola iha ona redi laran, tanba ne’e Karketu obrigadu tenke simu derota nee.Ito

Jornal Nacional

Human Rights Watch apela ba G20 atu presiona Xina hodi respeita Direitus Umanus

Líder  sira hosi nasaun membru G20, ne’ebé sei halo reuniaun iha semana oin iha Xina, tenki  apela ba Governu xinés atu hakotu presaun "implakável" hasoru ativista xinés sira, defende organizasaun laós-governamentál Human Rights Watch (HRW). 

Liuhosi karta ne’ebé dirije ba líder ho ekonomia boot liu iha mundu, organizasaun defeza Direitus Umanus ne’e moos apela protestu kontra limitasaun ne’ebé  determina hosi Pekin ba partisipasaun grupu sosiedade sivil nian iha simeira G20.

"Desprezu hosi Xina ba ativista sira ne’e  evidente  liu hosi pressaun ne’ebé implementa iha territóriu no limitasaun ne’ebé  halo durante simeira G20", afirma liuhosi  komunikadu ne’ebé ohin fó sai hosi Sophie Richardson, diretora ba Xina hosi Human Rights Watch.

"Importante  maka  líder G20  hetan  atensaun, hosi jerál no privadu, kona-ba prátika abuzivu hosi Xina, ka atu fó sala ba malu  ba moe ne’ebé  hatudu ba ativista sira durante simeira ne’e", nia hatutan.

Organizasaun ne’e aponta esforsu xinés nian atu  hatauk sosiedade sivil, inklui manifestante antikorrupsaun ka ativista ba direitu traballadór sira, hetan ameasa no persegisaun, ka lei restritiva, hanesan lei foun ne’ebé  limite atuasaun organizasaun laós-governamentál nian.

Durante iha lideransa atuál Prezidente xinés, Xi Jinping, autoridade sira  haforsa kontrolu ba akadémiku, advogadu no jornalista sira.

Karta ne’e haruka ona ba Arjentina, Austrália, Kanadá, Uniaun Europeia, Fransa, Alemaña, Índia, Indonézia, Japaun, Méxiko, Koreia do Sul, Reinu Unidu no Estadus Unidus Amérika.

"Sé karik G20 hakarak sériu rona grupu sosiedade sivil, sira nia líder tenki vizita prizaun xinés, no laós sala konferénsia Hangzhou", haktuir Richardson.

"Permite ba Xina realiza eventu ne’e no lafó sai abuzu ne’ebé sei haruka ba Governu xinés – no ema sira iha Xina - mensajen ida ne’ebé kompletamente lalós", nia aponta.

Kontráriu fali hosi governu no opiniaun públiku iha nasaun riku liu ne’e, maka hakarak haforsa  importánsia liberdade polítika individual, autoridade  xinés sira defende " direitu ba dezenvolvimentu" sai " importante liu duké direitus umanus".

SAPO TL ho Lusa

Ka’er ona ema tolu ne’ebé planeia halo atentadu hosi Estadu Islámika nian iha Malázia

Polísia Malázia ka’er ona membru hosi grupu estremista Estadu Islámika nian ne’ebé deskunfia halo planu ba atentadu iha fatin ósiu, eskuadra polísia no ba iha tempu hindu hosi gruta Batu, tuir imprensa lokál fó sai. 

Sira na’in tolu koko atu halo atake ho bomba nomós kilat ahi horisehik kalan, bainhira ohin atu komemora loron nasionál malaiu nian, tuir informasaun hosi jornál The Star.

Unidade antiterorismuu polísia nian ka’er ema sira ne’e iha sábadu no segunda feira kalan iha Kuala Lumpur nomós iha estadu Selangor ho Pahang, sentru península malaia.

Xefe polísia, Khalid Abu Bakar, dehan katak ema sira ne’e simu orden hosi militante Estadu Islámika nian ida ho naran Mohamad Wanndy Mohamad Jedi, atu hafoin halo tiha atentadu maka foin bá Síria.

Polísia hetan ona granada K75, pistol no kilat musan ne’ebé lori hosi membru dahuluk, ho tinan 20 ne’ebé maka konsege hetan armamentu liu hosi intermediáriu ne’ebé maka autoridade sira buka.

Malázia kaptura ona estremista hamutuk 220 resin desde fevereiru 2013, no malaiu 132 maka halo kombate hosi parte Estadu Islámika nian iha Irak no Síria, tuir Ministériu Interiór fó sai.

SAPO TL ho Lusa 

Primeiru kazu detetadu hosi feto isin-rua iha Singapura

Autoridade sira Singapura nian konfirma kazu dahuluk infesaun Zika hosi feto ida ho isin-rua iha sidade-estadu, ne’ebé maka  númeru afetadu hosi  vírus  dezde findesemana ne’e sa’e ba 115, informa iha ohin hosi imprensa lokál.

Ministériu Saúde Singapura informa, iha kuarta-feira kalan, katak feto ne’e viziñu hosi mane ida ne’ebé infetadu hosi Zika. Feto isin-rua ne’e agora internadu iha ospitál, hodi akompaña dezenvolvimentu ba infesaun ne’e.

Ministériu ne’e moos konfirma kazu foun Zika 24, rua hosi sira ne’e rejista iha sai hosi distritu ne’ebé maka to’o  agora identifika ona infesaun hotu, tuir  televizaun Channel News Asia.

"Relasiona ba  tempu  ita prevé katak kazu Zika mosu tan iha fatin barak. Ita tenki servisu  hahú hosi prinsípiu katak  iha transmissaun hosi parte seluk Singapura nian no haluan tan servisu kontrolu to’o iha zona hirak ne’e", haktuir  ministru Gan Kim Yong.

Nasaun barak, inklui Estadus Unidus, Austrália, Koreia do Sul no Taiwan, emite ona alerta halo viajen ba Singapura, hafoin  deteta surtu Zika, iha sábadu.

Zika ne’e transmite hosi mosquito 'Aedes aegypti' no kauza sintoma hanesan ho dengue.

Vírus ne’e bele halo artrite króniku no liga ba formasaun iha fetos lanormál.

SAPO TL ho Lusa

Fó moris foun ba instrumentu hirak ne’ebé tuan ka antigu

Moris iha Sydney, Lauren Swan laran-monu ba instrumentu muzikál. Viola, ukelele, bateria, baixu, no buat hotu ne’ebé ho nota muzikál, dad ninia atensaun iha fraksaun segundu. 

Iha ezersísiu perfeitu hodi uza hikas no aproveita fali rekursu hirak ne’ebé iha, maka australiana ne’ebé iha jeitu atu pinta no ho sensibilidade ba kór, transforma instrument muzikál hirak ne’ebé tuan ba fali obra arte, liu hosi kór hirak ne’ebé furak. 

Estatua budas no animál balun mos sei pinta ho furak rihun ida nian no ho tonalidade, liu hosi serbisu ne’ebé baibain nia fahe iha ninia instagram, hanesan esplozaun ba kór no ho enerjia di’ak. 

SAPO TL - Foto: Salty Hippie