Horta: PN La Bele Mete Kampania Prezidensial

DILI - Eis Prezidente Republika Jose Ramos Horta husu Deputadu sira iha Parlamentu Nasional (PN) labele mete Kampania Prezidensial, tanba kandidatu sira iha kampania door to door maka koalia liafun Lorosae-Loromonu nee buat ida izoladu laos Politika fiskal.

Tuir Eis Prezidente Horta katak kandidatu lubuk ida los husi Munisipiu oi-oin, kandiatu Kalohan husi Munisipiu Liquica, Postu administrative Bazartete, Jose Luis Guterres kandidatu ida diak nia ema Munisipiu Viqueque, Lu-Olo mos Ema Viqueque, kandidatu ida tan Jose Neves nee ema Ermera, Angela Fereitas Ema Baucau, Amorin husi Lospalos, kandidatura sira kahur malu, nee duni lalika koalia konaba loromonu-lorosae.

Nee duni hau hanoin Deputadu sira konsentra ba sira nia serbisu Parlamentu nia, labele mete fali kampania prezidensial, tanba bisu-bisu nee akontese nee normal, se ema ruma ekipa susesu ruma maka koalia konba asuntu sira nee, nee buat ida izoladu, laos politika fiskal kandidatu nia ou PD nia tanba PD nee hetan votus barak los iha Lorosae, Mariano Sabino nee ema Lorosae, nee duni la lika kahur sasan sira nee ba mai, nune mos hari partidu laos lorosae-loromonu nia, maibe partidu nee partidu nasional, needuni nia laperokupa ho ida nee,” hateten Horta, ba Jornalista sira, hafoin remata Konfrensia imprensia konaba Tour de Timor, iha Timor Lodge, Kampung Baru, Kuarta (15/03/2017).

Sasin sira konfirma falla iha sistema fiskal timoroan iha julgamentu ba portugés na'in rua

Diretora jeral impostu timoroan nian konfirma iha loron-tersa ne'e falla sira hosi sistema rekolla ba reseita tributáriu ne'ebé mai hosi explorasaun petrolíferu ne'ebé permiti ona atu konsultor internasional ida lohi Estadu ho folin dolar millaun resin.

Mónica Rangel ko'alia iha sesaun daruak hosi julgamentu ba kaben-na'in portugés ne'ebé hetan akuzasaun ba brankeamentu kapital sira, na'ok, no halo dokumentu falsu ho alegadu konspirasaun hodi lohi Timor-Leste ho folin dolar rihun 860.

Tuir Ministériu Públiku (MP) timoroan, Tiago ho Fong Fong Guerra konserta desviu hosi fundu sira - ne'ebé mai hosi impostu sira ne'ebé kobra ba empreza petrolíferu sira - ho konsultor amerikanu Bobby Boyle.

Iha loron-tersa ne'e, hanesan akontese iha julgamentu loron 28 Fevereiru, sasin hatete fali katak la hatene ligasaun ruma entre kaben-na'in portugés ho Bobby Boyle, ho kuaze pergunta sira ne'ebé halo hosi Ministériu Públiku sentra iha konsultor amerikanu.

António da Conceição, sei kaer pasta ministru nian no hakarak sai Prezidente

António da Conceição explika katak sei suspende de'it nia atividade nu'udar ministru Edukasaun timoroan nian "to'o loron 18", bainhira hakotu kampaña ba prezidensial sira, maibé hatudu fiar katak sei sai nu'udar xefe Estadu foun.

Konviksaun ida, ne'ebé nia explika iha entrevista ba Lusa, katak haree nu'udar reprezentante hosi jerasaun foun ida "preparadu hodi kontinua mehi sira" hosi "fundador sira nasaun nain ne'ebé agora daudaun hahú tama iha tinan katuas-ferik nian".

"Hanesan importante hatudu mós ba jerasaun antigu katak jerasaun foun preparadu hodi kontinua mehi sira ne'ebé sira iha ba nasaun ne'e", nia hatete.

Hatudu konviktu iha pasajen ba volta daruak no afirma katak nia susesu sei sai hanesan susesu hosi líder istóriku sira, ne'ebé uluk nia tuir no, hafoin ne'e, nia rasik partisipa hamutuk ona liuhosi Partidu Demokrátiku (PD), "hodi harii nasaun" no iha viabilizasaun no formasaun Governu nian".

Diplomata timoroan kandidatu ba kargu adjuntu sekretáriu-jeral ONU nian

Governu timoroan apoiu ho dalan formal kandidatura hosi diplomata timoroan Sofia Borges, eis-embaixadora Timor-Leste nian iha ONU, ba kargu ida hodi sai sekretáriu-jeral, António Guterres, nia adjuntu, konfirma hosi fonte ezekutivu ba Lusa. 

Sofia Borges, ne'ebé uluk sai nu'udar embaixadora Timor-Leste nian iha ONU entre tinan 2010 no 2013 hanesan kandidata ida ba kargu adjuntu sekretáriu-jeral nian ba nasaun-illa sira no nasaun sira ne'ebé laiha tasi-ibun, hanesan kargu ida ne'ebé sei apoia portugés ne'ebé agora daudaun lidera ONU.

Apoiu ba Sofia Borges nia kandidatura - ne'ebé serbisu iha gabinete hosi prezidente Asembleia Jeral ONU nian hahú tinan 2016 - konfirma ona iha reuniaun loron-tersa ne'e hosi Konsellu Ministru sira iha Díli.

José Ramos-Horta, eis-Prezidente Repúblika, fó mós nia lian hodi apoia Sofia Borges tanba konsidera katak hanesan "kandidata ne'ebé di'ak tebes" ba kargu, tanba nia eskolla sei lori influénsia ba Timor-Leste.

"Ha'u fó apoiu tomak ba kandidatura ne'e no ha'u fiar katak laiha kandidata di'ak liu duké Sofia Borges. Hanesan kompetente iha nível kualifikasaun sira nian no sei laiha kandidatu barak ne'ebé bele rivaliza ho nia", nia hatete ba Lusa.

SAPO TL ho Lusa