UNTL komemora Loron ba Lian Portugés ho atividade oioin

Universidade Nasionál Timor Lorosa’e (UNTL) iha Díli aban ho sesta-feira sei komemora Loron ba Lian Portugés ho atividade oioin, inklui mos teatru ho konsertu.

Iha atividade loron rua ne’ebé UNTL halo, sei iha mos feira ba livru no resitasaun hosi poezia nasaun luzófona nian ne’ebé hato’o hosi estudante lisensiatura iha ensinu portugés no hosi ensinu biolojia maka sei aprezenta teatru “O Bilhete”, hosi Machado de Assis.

Tuir ajenda sei iha mos aprezentasaun ba dokumentáriu ida kona-ba José Bonifácio nomós livru “Sabores da Lusofonia”, hosi xefe Luis Simões, no sei bele koko hahan hosi nasaun lian portugés nian sira.

Desde segunda-feira hala’o ona atividade oioin iha Dili, inklui sinema, literatura, múzika no debate hodi komemora semana lian portugés to’o iha sesta-feira, hanesan inisiativa hosi serbisu kulturál Embaixada Portugal iha Timor-Leste.

Konsertu ida hosi múziku no improvizór portugés Charlie Mancini iha sede Fundasaun Oriente maka sai nu’udar inisiu hosi Loron ba Lian Portugés, iha segunda-feira liu ba, inklui sesaun rua hosi sinema-konsertu.

Ohin Escola Portuguesa Ruy Cinatti iha Díli halo lansamentu ba livru infantil " Lá em Ira Lalaro", ne’ebé konta ho prezensa hosi autora, Carolina Pinto, no sei lansa mos kampaña "Um mais Um", no bainhira sosa livru ida, sei oferese ba eskola sira Timor-Leste nian.

Serbisu kulturál hosi Embaixada Portugal sei halo mos aprezentasaun ba livru haleu hosi eskola munisípiu Viqueque, Baucau no Manatuto, no autora refere sei konta istoria infantile nomós hala’o semináriu ho ofisina hakerek no dezeñu.

Alunu hosi Escola Portuguesa nian mos sei hatudu teatru "Vento Norte", iha duni eskola refere, iha Hotel Novo Turismo Dili sei hala’o konsertu hosi Filipa Tavares "Os Poemas possíveis, Fados", ne’ebé fado refere hananu ho poezia hosi José Saramago.

Semana lian portugés nian sei hakotu ho semináriu ida kona-ba tema "Timor-Leste ho Portugal: Dezafiu no Estratéjia ba Lian Komun ida” ne’ebé sei konta mos ho prezensa hosi embaixadór Portugal, Manuel Gonçalves de Jesus, Brazil, José Dornell, no hosi ministru Edukasaun Timór, António da Conceição.

Iha semináriu ne’e sei analiza kestaun sira hanesan “Lian Portugés ho Tétum – Parseria Indentit’aria no Kriativa”, lian portugés iha Timór nomós “koerénsia polítika ho artikulasaun entre ajente koperasaun” ba material refere.

SAPO TL ho Lusa 

Presu sei estável iha Timor-Leste iha marsu

Sasán folin iha Timor-Leste sei la’o normál iha marsu, rejista sa’e oituan ba 0,1% kompara ho fulan kotuk no menus 1,6% iha termu omólogu (kompara ho marsu 2015 nian).

Karik esklui tiha presu iha habitasaun, monu oituan ba 0,5% iha tinan sira ikus ne’e, inflasaun anuál aas liu, to’o  1,8%, tuir  dadus ne’ebé fó sai iha ohin.

Dadus sira hosi  Diresaun Nasionál Estatístika Ministériu Finansa timoroan nian hatudu katak  presu iha marsu afeta liuhosi folin  álkool no tabaku ne’ebé sa’e ba 1,7%, maibé sasan sira seluk ninia folin sei nafatin.

Tuir  termu omólogu, hetan aumentu maka’as liu iha edukasaun (presu sa’e ba  6%), tuir álkool no tabako (sa’e ba 3,7%). Iha folin ne’ebé tuun maka’as maka transporte (-3,3%) no alimentasaun no bebida laós-alkoóliku (-2,7%).

SAPO TL ho Lusa

Governu Indonézia hetan ezijénsia hodi esklarese masakre sira tinan 1965 - VIDEO

Fundasaun ida husu ona atu governu Indonézia esklarese loloos ámbitu sira hosi masakre hasoru membru no simpatizante komunista sira ne'ebé akontese iha nasaun ne'e iha tinan 51 liubá, haktuir hosi media lokal iha loron-tersa ne'e.

Pedidu ne'e mosu hafoin entrega relatóriu ida kona-bá lokalizasaun hosi rate komun hamutuk 122 ho mate-isin hamutuk 13.900 resin.

Fatin sira ne'e "reprezenta de'it 2% hosi fatin sira ne'ebé namkari iha Indonézia tomak", hatete hosi Bedjo Untung, diretór hosi Yayasan Penelitian Korban Pembunuhan (YPKP), organizasaun dedikadu ba investigasaun hosi proibisaun iha tinan 1965-1966 hasoru militante no simpatizante sira hosi Partidu Komunista Indonézia (PKI), haktuir diáriu The Jakarta Post.

"Sira balun hakohi iha parke sira nia okos, ai-laran sira ka estrada pavimentadu sira, balun iha estrutura hosi sentru komersial ka kompleksu habitasaun sira nia okos", hatutan hosi reprezentante.

Fundasaun YPKP lokaliza ona rate komun hahú hosi entrevista sira ba vítima no sasin sira ne'ebé hahú iha tinan 2000 kona-bá klima proibisaun nian.

Proibisaun hasoru PKI halo ona ema rihun 500 resin mate, haktuir hosi informasaun sira ne'e.

Dokumentáriu koñesidu "The Act of Killing" (2012) ne'ebé halo hosi Joshua Oppenheimer, dedika ba kestaun ne'e, hatete katak iha ema millaun ida resin maka mate.

Fundasaun YPKP informa ona iha loron-segunda governu Indonézia kona-bá deskoberta foun ne'e.

"Agora laiha ona deskulpa hodi afirma katak laiha rate komun sira", hatete hosi Reza Muharam, membru hosi Tribunal Popular Internasional, hodi husu ba ezekutivu Jakarta nian hodi kolabora ho Komisaun Nasional ba Direitu Ema nian no ho Ministériu Públiku hodi oinsá fó sai lia-loos kona-bá krimi sira ne'e.

Iha loron 30 fulan-Setembru 1965, tropa sira hosi TNI (Forsa Armada sira Indonézia nian), oho jenerál na'in neen, iha "golpe" komunista ida ne'ebé nunka iha provasaun kompletu, no hafoin ne'e kaer poder.

Jeneral Suharto (1921-2008), líder hosi Komando Estratéjiku Ezérsitu nian (KOSTRAD), konsege ona kontrola rebeliaun no mantén Prezidente Sukarno iha fatin seguru iha tempu ne'ebá.

Iha fulan-Outubru 1965, Suharto sa'e nu'udar komandante ezérsitu indonéziu nian, no iha loron 11 fulan-Marsu 1966 Sukarno fó kbiit ezekutivu ba Suharto.

Partidu Komunista Indonézia lakon no nia militante no simpatizante sira hetan perseguisaun.

Hafoin kaer tiha kbiit, Suharto governa Indonézia ho ditadura hosi 1967 to'o tinan 1998.

Haree iha-ne'e trailer hosi "The Act of Killing" (2012) hosi Joshua Oppenheimer - VIDEO

SAPO TL ho Lusa – Foto: Wikipedia

GOVERNU SEI LA METE DIALOGU PR HO VETERANUS

Governu sei la hatama kanuru tohar ba dialogu entre  Prezidente Republika (PR) Taur Matan Ruak  ho  Veteranus  ativu  sira iha Falintil Forsa Defeza Timor Leste.

“Dialogu ne’e la’os ami maka konvoka, maibe Prezidente maka hakarak konvoka atu hasoru malu ho Veteranus ativu sira  iha forsa laran,”esplika Ministru Defeza Cirilo Cristovão ba jornalista iha Palasiu Governu Tersa (03/05).

Kona-ba fatin atu halo dialogu ne’e, Ministru Cirilo dehan, nia parte la hatene, ho razaun katak, Prezidensia Republika nian maka  sai  hanesan  Komisaun organizadora.

“Ha’u labele fo resposta  diologu ne’e atu halo iha ne’ebe? Maibe Prezidente maka konvoka atu halo dialogu ho  Veteranus ativu  iha forsa laran,”katak Cirilo Cistovão.

Nune’e mos Cirilo Cristovão dehan,  nia parte mos ladun hatene objetivu husi enkontru  entre PR Taur ho Veteranus sira ne’e.

“Kona-ba dialogu ne’e  ita  la  hatene nia material ne’e. Maibe Prezidente maka hakarak koalia ho Veteranus sira, dala ruma keta  iha dialogu ne’e maka aborda mos  kestoens sira  ne’e, maibe tema kona-ba topiku ne’e seidauk defini,”tenik Cirilo Cristovão.avi

Jornal Nacional

AUSTRALIA LOKE ODAMATAN NEGOSIASAUN BA FRONTEIRA MARÍTIMA

Hafoin Timor-Leste liu husi nia negosiador prinsipal aktual Ministru Planeamentu Investimentu Estratejiku, Kay Rala Xanana Gusmão, hatama problema disputa tasi Timor  nian iha organizasaun Nasoens Unidas, halo Australia mos nakloke an hodi nomeia ona sira nian ema nain rua hodi halo negosisaun ba fronteira tasi entre Timor-Leste ho Australia ne’e.

Ministru Negosiu Estranjeiru no Ko’operasaun (MNEK) Herani Coelho hateten,  se Australia maka nomeia ona nia ema nain rua ba negosisaun fronteira  kontra Timor Leste ida ne’e diak liu tan.

“Konsiliasaun kompulsoria hanesan ne’e, ita  hatama se Australia la hatama,  Sekretariu Jeral Nasoens Unidas  iha autoridade atu desidi ema ruma hodi reprezenta Australia,  tanba ne’e maka Australia maka desidi  nomeia nia a’an rasik diak liu tan hanesan  parte rua bele tur hamutuk  hodi koalia,”esplika MNEK Hernani Coelho ba jornalista  iha  Palasiu Governu Tersa (03/05).

Tuir hernain, asaun ne’ebe Australia foti ne’e foin maka faze inisial deit, sei iha tan proseu balun tuir mai kona-ba kompetensia komisaun ninian, depois rekomendasoens komisaun nian to’o prosesu final ne’ebe la’o hanesan, entre 12 to’o 18 mejes.

Kona-ba komunikasaun entre Governu Timor Leste  ho Australia ba  prosesu disputa fronteira maritima  ne’e rasik?  Hernani Coelho hatan,  Governu seidauk fo sai  ofisialmente prosesu hirak ne’e.

Nia hatutan,  prosesu ne’e nomal. Ne’ebe  parte  rua ida maka la aseita mos Sekretariu Jeral Nasoens Unidas  iha autoridade para nomeia ema ruma  atu reprezenta segunda parte kona-ba  ida ne’e nian.

“Emtermos de Governo, nestemomento seidauk iha  ita dehan tanggapan secara resmi ida kona-ba ida ne’e, ita iha portavoz Governu nian  depois maka sei koalia,”haklaken Hernani Coelho.

Rezolve fronteira tasi

Nune’e mos, Vise Ministru Negosius Estranjeirus no Kooperasaun (MNEK), Roberto Soares informa katak, agora dada’uk Australia nakloke an hodi nomeia ona nia ema na’in rua atu halo negosiasaun ho Estadu Timor Leste ba fronteira tasi (Marítima) Timor.

“Sira nomeia komisariu na’in rua para atu tu’ur iha compost reconciliation ninian. Konserteja Timor Leste simu ho ninia prespetiva positive iha kontestu bilateral ita nian, ita kontinua nafatin husik ba  komisariu sira ne’ebé mak husi parte Timor Leste no Australia nomea ona,” informa Roberto Soares ba jornalista sira iha Palasiu Prezidensial Aitarak Laran Dili, Tersa (03/05).

Roberto dehan, MNEK simu ona karta ida husi embaixada Australia hodi informa kona-ba prontidaun Australia nian kona-ba fronteira marítima.

Roberto hatutan, husik komisariu sira ne’e hala’o sira nia kna’ar, depois mak sira aprenta relatoriu kona-ba sira nia servisu.

“Husi nomeasaun ida ne’e, hatudu katak, iha sentidu boavontade di’ak atu bele tu’ur hamutuk, oinsa mak atu bele rezolve diferensias ne’ebé mak ita iha,” afirma nia.

Kona-ba bainhira mak atu nasaun rua ne’e tu’ur hamutuk hodi rezolve disputa ida ne’e, Roberto dehan husik ba lideransa sira husi Australia mak deside ho sira nia sabadoria no sira nia matenek, saida mak di’ak ba sira nia nasaun, atu bele aselera prosesu sorumutu ida ne’e, maibé ba Timor Leste mak iha tiha ona komitmentu nasionál atu kontinua nafatin ejiji hodi diskuti diferensas  ne’ebé mak nasaun rua ne’e iha.

Bainhira sira konklui sira nia servisu ne’e mak, husi ne’eba Australia ho Timor Leste haree oinsa mak atu avansa liutan, iha kontestu salva guarda ida-ida ninia intrese nasionál.

“Iha kazu Timor Leste nian, ita hotu hatene ona katak, luta ba soberania  ita nian ne’e, hanesan segunda luta ba ita nia independensia, tanba ne’e Timor Leste sei kontinua nafatin tau ninia esforsu no komitmentu tomak, ho apoiu popular ne’ebé mak ita iha husi públiku, i konserteja husi ita nia lideransa nasionál tomak, para loron ida ita bele asegura duni ita nia soberania ne’e,” katak Roberto Soares.avi/cos

Jornal Nacional

LORON MUNDIAL BA IMPRENSA, KNAAR JORNALISMU IMPORTANTE BA KONSTRUKSAUN ESTADU

Liu husi komemorasaun loron mundial ba imprensa ne’ebe monu iha  loron 3 Maiu 2016 horseik, Organizasaun Jornalista sira iha Timor Leste konsidera katak, knaar jornalismu importante tebes ba konstruksaun Estadu.

Nune’e iha komemorasaun ba loron ne’e mos, Timor-Leste Press Union (TLPU) ejije ba nain media sira hotu atu trata jornalistas sira ho dignu, tamba knaar jornalismu ne’e atu kontribui mos ba nasaun no Estadu nia diak iha aspetu hotu.

Iha oportunidade ne’e TLPU mos husu ba Estadu TL liu-liu Governu atu trata jornalista ninia vida ho dignu, liu-liu kria lei ruma hodi regulariza salariu minimu, tanba labele konsidera jornalista ne’e hanesan traballador bai-bain ida, tanba ho kondisaun ida hanesan ne’e maka durante ne’e kontribui ba inkapasidade no profesionalizmu jornalista ninian.

“Tanba durante ne’e ami observa katak iha prosesu defende liberdade imprensa jornalista TL ninian kondisaun sei mukit, em termus de bem estar hodi fo konsekuensia ba kualidade kontrolu sosial, nune’e nain ba media sira tenki trata jornalista ho dignu em termus de finansial no kapasitasaun atu eleva kapasidade jornalista halao funsaun jornalista tuir direitu no dever jornalista ninian, ne’ebe maka haktuir iha lei komunikasaun sosial konaba dever iha artigu 19, 20 no kodiku etika jornalista nian ne’ebe maka haktuir ona iha artigu 21,” Sekretariu Jeral TLPU, Manuel Pinto deklara asuntu refere liu husi konferensia ba imprensa ne’ebe realiza iha Peace Coffee-Dili, Tersa hodi komemora loron mundial imprensa ne’e.

Iha oportunidade ne’e TLPU husu mos ba ukun nain sira atu labele konsidera jornalista hanesan inimigu, maibe tenki konsidera jornalista ne’e hanesan parseiru ida.

“Ho haraik a’an ami organizasaun TLPU husu ba publiku liu-liu ukun nain sira atu labele konsidera jornalista nu’udar inimigu, maibe konsidera netik ami hanesan parseiru ida atu hametin demokrasia, nune’e karik iha sasidik ruma entre publiku ho jornalista tribunal laos solusaun, maibe tenki konsidera saida maka haktuir ona iha lei komunikasaun sosial katak Konsellu Imprensa (KI) sai fatin nudar mediasaun hodi buka solusaun antes ita hakat ba tribunal,”haklaken sekjer TLPU.

Manuel Pinto hatutan, TLPU observa iha TL garante ona liberdade imprensa no meus komunikasaun sosial, iha liberdade editorial, protesaun independensia, maibe seidauk rigor iha prosesu goza liberdade imprensa, tanba kestaun profesionalizmu no rekursu umanu maka sai nudar bareira ne’ebe maka jornalista tenki ultra pasa.

“Ami organizasaun TLPU husu ba Estadu TL tenki tau iha pratika knar Estadu ninian ba area komunikasaun sosial ne’ebe maka haktuir ona iha lei komunikasaun sosial espesialmente iha artigu 5, e tuir konstituisaun Republica Democratica de Timor Leste (RDTL) iha artigu 1 mos hateten, TL nudar Estadu direitu no demokratiku ne’ebe garante liberdade imprensa, no iha artigu 40 no 41 haktuir mos katak iha obrigasaun moral ida atu konsidera loron 3 Maiu hanesan loron importante ida tanba ita  nia rai mos ezisti liberdade imprensa,”tenik nia.

Entretantu Prezidente TLPU, Francisco Simões Belo hateten, liu husi konferensia imprensa ba komemorasaun liberdade imprensa ne’e TLPU kongratula no agradese jornalista TL tomak, ba erois sira ne’ebe fo ona vida ba independensia TL ninian, e apresia mos Estadu tanba garante ona liberdade imprensa iha TL.

“Kongratula ba jornalista sira iha TL, la haluha hato’o ami nia agradese bo’ot ba erois nasional sira  ne’ebe fo ona sira  nia  vida hodi nakfilak tiha rai ida ne’e sai ona nasaun,  no ami hato’o mos ami nia apresiasaun bo’ot no agradesimentu bo’ot ba fundador sira Estadu  no nasaun  ida ne’e, ne’ebe garante ona liberdade  imprensa hodi konsagra iha konstituisaun RDTL artigu 40-41,”afirma Francisco Simões Belo.

Estudante kari aifunan iha monumentu Sander Robert

Entretantu iha fatin la hanesan estudante Universidade Nasional Timor Lorosa’e (UNTL)husi departamentu Komunikasaun Sosial (KS) realiza marsa hahu husi kampus fakuldade Siensia Sosiais Caicoli to’o igreza Becora hodi tau aifunan ba monumentu martir jornalista Alemaña ne’ebe maka mate iha tempu rezistensia nian.

“Lolos ne’e atividade atu komemora loron liberdade imprensa mundial ne’e tinan-tinan UNTL liu husi departamentu Komunikasaun Sosial (KS) sempre halao, e ami iha area akademika sempre halo seminariu loron ida e depois halo marsa atu atu tau aifunan iha monumentu martir jornalista koñesidu ho naran Sander Robert Stones iha igreza Becora nia oin, ne’ebe maka mate iha tempu rezistensia ninian,”Vise departamentu KS-UNTL, Dominika Dwikori Sitaresmi.

Nia dehan,  atividade ne’ebe refere importante, tanba departamentu KS ne’e prepara estudante atu reforma sira sai jornalista no ema ne’ebe maka sei servisu iha media ho kualidade ne’ebe diak, nune’e loron ida ne’e sai loron ida ne’ebe espesial tebe-tebes mai estudante KS.

“Konaba kuantidade estudante ne’ebe maka sei partisipa iha marsa ne’e hau ladun hatene, maibe ba partisipasaun estudante iha seminariu komemorasaun loron liberdade imprensa ne’ebe maka realiza iha loron 2 Maiu ne’e kuaje partisipantes 250, nune’e parese total ida ne’e maka partisipa iha marsa refere,”dehan Dominika.

Realiza marsa no kari aifunan ne’e nia dehan, tanba iha nasaun balun jornalista barak maka sempre mate ba sira nia knaar, ho nune’e maka departamentu KS sei esforsu makaas atu luta kontra buat hirak ne’e, tanba kuandu jornalista ruma hakerek sala parte ne’ebe maka sai tarjetu ba notisia ne’e karik la satisfas tenki responde ho hakerek la’os buat hotu-hotu hakarak rezlve liu husi iha tribunal deit.

Entretantu tuir lider ekipa marsa estudante KS, Martinho Moniz hateten, atividade marsa no kari aifunan ida ne’e hanesan kontinuasaun programa seminariu liberdade imprensa iha loron 2 Maiu, nune’e marsa ida ne’e KS realiza hodi komemora loron mundial ba liberdade imprensa ninian.

“Nune’e agora (03/05) ita sei hala’o marsa ne’e hahu husi fakuldade Siensia Sosiais UNTL to’o ba monumentu Sander Robert Stones iha igreza Becora nia oin, tanba nia hanesan jornalista Alemaña ida ne’ebe maka mate iha momentu luta ba independensia TL ninian, nune’e marsa ida ne’e hanesan asaun solidariedade no sentimentu kondolensia ba jornalista sira ne’ebe maka mate ona,”Martinho dehan.

Nune’e mos, iha loron liberdade imprensa ne’e, Assosiasaun Jornalista Timor-Leste hala’o konferensia internasional atu koalia kona ba lalaok, progresu no dezafiu media nian iha mundu agora iha Hotel  JL  Vila  Fatuhada, Dili.

Tenke hadia kualidade notisia

Nune’e mos, Sekretariu  Estadu  Komunikasaun  Sosial  Nelio  Isaac  Sarmento husu media hadia kualidade  notisia.

“Estadu no Governu foti as tebes liberdade  imprensa, maibé  ami ejize mos kualidade  ho  responsabilidade,”hatete  Sekretariu  Estadu  Komunikasaun  Sosial  Nelio  Isaac  Sarmento bainhira loke seminariu ne’ebe organiza husi Asosiasaun Jornalista Timor Leste (AJTL) ho tema Freedom of the Press and The Challenging Journalistic of Timor Leste iha  salaun  Hotel  JL  Vila  Fatuhada,  Tersa  (3/5/16).

Nia  dehan, Estadu  ho  povu  ida  ne’e  moris  husi  konflitu  nune’e  presiza  atu  dinamika  oituan  ninia  pensamentu  katak, oinsa  nasaun  ne’e  bele  dura  no  naruk  ho  hanoin  ne’ebé  mak  bele  garante  demokrasia  liu  husi  servisu  liberdade  imprensa  ninia.

Tuir nia, media  sira  sai  faz  parte  husi  kontrolu  sosial  ninia  hodi  fó  ezemplu  diak  ba  komunidade  sira  nune’e  jornalista  sira  iha  obrigasaun  duni  atu  ejizi  ba  politika  nain  sira  atu  la’o  tuir  dalan. maibe jornalista tenki  respeita  dignidade sidadaun nian.

Nia haktuir, ema  hotu  uluk  hanoin  jornalista  ne’e  fatin  ida  ne’ebé  fasil  liu  atu  hetan  servisu, maibé  wanhira  hala’o , la  kualker  ema  atu  sai  jornalista hodi sai edukador  ba publiku.

Iha parte seluk, Presidente Konsellu Imprensa Virgilio da Silva Guterres dehan, KI sei garante liberdade espresaun liu-liu liberdade publika informasaun ne’ebe los.

Tantu membru International Federation for Jornalisme (IFJ) Jim Nolan sekunda, iha nasaun balun hanesan Thailandia ho Malaysia seidauk iha liberdade lolos.

Maibe iha Indonesia, Konsellu Imprensa hakas an garante liberdade espresaun no imprensa iha sira nia sosiadade.

Seminariu internasional ne’ebe realiza husi AJTL ne’e hodi komemora loron mundial liberdade imprensa.

Iha seminariu ne’e partisipa husi membru IFJ Jim Nalon, presidente KI Virgilio Guterres, membru SEAPA Wisnu T.Hanggoro no prezidente AJTL David Hugo, inkliu membru AJTL.

KI sei defende salariu jornalista

Prezidente konsellu Inprensa (KI) Virgilio Guterres afirma, KI sei koalia ho media nain konaba salariu ba jornalista.

“Ami sei koalia ho media nain atu hare salariu jornalista. Basa jornalista esforsu an hakerek nutisia ho kualidade, media nain mos tenki fo kompensasaun ne’ebe diak, tuir sira nia profesionalidade,”dehan Virgilio Guterres ba JN-Diario iha Hotel JL-Vila, Tersa (3/5/16).

Virgilio hatutan, tuir lei komunikasaun sosial sei iha  kriteria balun ne’ebe media sira tenke aplika molok atu rekruta  jornalista, hanesan rekruta tenke liu husi estajiu, aleinde estajiu liu tiha maka bele hetan kontratu servisu hanesan profesional. Se jornalista servisu profesional nia kompensasaun tenke selu tuir nia profesional.

Entretantu, kompara ho servisu Governu ne’ebe servisu ho profesional, dala barak akontese media nain ladun fo kompesensaun ne’ebe justu ba jornalista, entaun KI nia komitmentu oinsa atu koalia ho media nain sira bele haree kestaun ida ne’e.

Iha parte seluk, Sekretariu  Estadu  Komunikasaun  Sosial  Nelio  Isaac  Sarmento husu  ba  Konsellu  Imprensa  atu servisu  maka’as  hodi  fortifika  instituisaun ne’e hodi hetankonfiansa povu.

“Tenki  hahú  kedas  garante  fiar  atu  nune’e  ema  hotu  bele , tanba laos  hare  deit  ba  kualidade  informasaun  jornalista  nian, maibé  KI  mós  tenki  servisu  atu  fortifika  instituisaun  KI  ne’e  hodi  povu  bele  fiar  atu  lori  prosesu  jornalista  sira  nian  ba  iha  organizasaun,” dehan Sekretariu Estadu.

Nia dehan, iha  lei  komunikasaun  sosial  hateten, iha  buat  balun  bele  lori  ba  konsellu, no  mós  balun  ema  sente  katak, la  fiar  KI  no  hakarak  lori  kazu  ne’e  ba  tribunál  ne’e  lei  fó  dalan, tamba  ita  la  hatene  limita  ema  direitu  atu  asesu  ba  justisa, nune’e  ita  hotu  bele  hare  hodi  hadia.

Ho ida ne’e, Virgílio Guterres garante katak, hahú  nia  servisu  sei  buka  kordena  no  hetan  fiar  husi  media  nain  no  asosiasaun  media  sira  hodi  buka  dalan  hamutuk  ida  ne’ebé  diak  liu  atu  bele  garante  liberdade  ne’ebé  iha  liu-liu  liberdade  publiku  atu  hetan  informasaun  ne’ebé  los.

Nia mos husu ba  jornalista atu kontinua le’e  no  estuda  didiak  lei  komunikasaun  sosial, no  kódigu  étika  ba  jornalista  hodi  intrepeta  lolos, tamba  ne’e  sai  hanesan  material  ne’ebé  loro-loron  lori  tun  sa’e.

Governu kontinua garante direitu fundamental

Alen de ne’e, Primeiru Ministru (PM) Rui Maria de Araújo, Governu iha kompromisu  nafatin servisu hodi nafatin garante  direitu fundamental jornalista nian.

PM Rui hato’o lia hirak ne’e ba jornalista sira wainhira selebra loron mundial  imprensa Tersa (03/05) hamutuk ho jornalista  nasional no Internasional sira iha Palasiu Governu.

“Loron liberdade imprensa ninian hanesan  ita bo’ot sira hatene, mundu tomak selebra loron ida ne’e, tanba rezolusaun Nasoins Unidas nian ne’ebe maka hamosu  kona-ba liverdade imprensa, hodi Governu nia naran hakarak hato ba ita bo’ot sira kompremisiu Governu ninian atu nafatin servisu hodi nafatin garante direitu fundamental ida ne’e,”esplika PM Rui.

PM Rui hatutan, Timor Leste liu husi Konstituisaun,  iha  artigu 40 no artigu 41 koalia ona kona-ba direitu fundamentais sira ne’e, depois aprova tiha ona kode etika jornalista,  aprova tiha mos lei komunikasaun sosial.

Nune’e mos, PM Rui dehan, Konselhu Imprensa (KI) semana oin simu pose, tanba ne’e, mekanismu instituisionais lubuk ida ne’ebe Estadu liu husi  Govenu estabelese ona nafatin apoia direitu fundamental ida ne’e ba sidadaun hotu.

Iha loron liberdade imprensa ne’e, Governu dala ida tan reinteira  kompromisu atu nafatin servisu  para  garante liberdade esperasaun, liberdade imprensa, klaru nafatin   iha koridor ne’ebe lei defini tiha ona.

 “Ida ne’e maka  mensajen ba ita boot sira hotu, aproveita  mos lansa  korpu jornalista ne’ebe maka servisu ba Palasiu Governu, simbolikamente  intrega karta ne’e ba  ita bo’ot sira  para depois asesu iha Palasiu hodi nune’e  hetan kompromisu ida ne’ebe  Governu hato’o ba  ita bo’ot sira hetan asesu ba  informasaun bele rekolha  hodi nune’e bele desimina ba publiku,”tenik PM Rui.

Jornalista  ne’ebe maka simu kartaun asesu ba Palasiu Governu ne’e mai husi media imprensa nomos elektroniku sira ne’ebe ezisti iha Timor-Leste.ves/eti/tos/ avi

Jornal Nacional

CNRT MESAK PREZIDE MEJA PN

Parlamentu Nasional (PN), Kuarta ohin (04/05/2016), kontinua halo plenaria extraordinaria hodi halo eleisaun hili Prezidente PN foun no meja PN.

Xefi bankada FRETILIN, Aniceto Guterres, hateten, iha reuniaun lideres bankadas sira deside ona ajenda prinsipal ba loron Kuarta halo eleisaun ba meja PN.

“Hau hakarak hateten katak, la’o tuir rezimentu ne’ebe aprova tiha ona, rezimentu ne’e dehan prosesu ne’e tenke hahu ho distituisaun ba prezidente no vice prezidente sira no mos membru meja, hasai uluk tiha lai meja PN tuan maka tama ba eleisaun hodi hili prezidente Parlamentu foun hodi dirizi prosesu tuir mai, “ informa Xefi bankada FRETILIN ne’e ba Jornalista sira iha uma fukun PN, Tersa (03/05/2016).

Prosesu tuir mai atu hili vice PN no sira seluk, hahu plenaria prezidente PN tuan, Vicente Guterres mak sei dirizi.

Aniceto Guterres, dehan, bankada parlamentar FRETILIN hakru’uk ba orientasaun partidu nian, katak lapartisipa iha meja PN, pratikamente CNRT mesak mak prezide meja PN.

FRETILIN nia hare ba kompozisaun meja PN maioria asume husi bankada CNRT, ne’e laiha problema, tanba maioria simples bele akontese iha PN, kualker oras.

“Iha orsamentu jeral 2017 nian FRETILIN garante katak sei la vota kontra, hanesan durante ne’e FRETILIN hatudu tiha ona, FRETILIN sei garante estabilidade governativa  ne’e hatudu katak dezisaun ruma bele implika ba demisaun Governu nian FRETILIN sei evita,” garante Aniceto.

Iha fatin hanesan, Xefi bankada CNRT, Natalino dos Santos, realsa tan, liu husi enkontru lideres bankadas deside ona ajenda fiksu ba eleisaun Prezidente PN no meja PN.

“Prosesu kontinua nafatin to’o hetan ninia rezultadu, tan ne’e maka lideres bankads hala’o enkontru no deside ona atu halo eleisaun ba meja PN ho karater plenaria extraordinaria,” dehan Natalino dos Santos.

Ajenda iha PN ba Tersa (03/05/2016) la iha, tanba lideres bankadas sira enkontru hodi prepara ajenda ba eleisaun ba meja PN. Mia

Jornal Nacional

CNRT Konsidera Deklarasaun Pe. Martino La iha Fundamentu

DILI - Bankada CNRT iha Parlamentu Nasional (PN) Konsidera deklarasaun Pe. Martinho Gusmao la iha fundamentu tamba nee husu atu halo audensia ho Parlamentu, hodi buka tuir faktus mak koalia ba publiku.

Tuir Xefi bankada CNRT Natalino dos Santos hatete Pe.Martinho Gusmao Nudar padre maibe sai sidadaun dezafia no konvida atu debate publiku liu husi televizaun, atu nunee publiku hatene tamba iha demokrasia sempre lao nunee.

Ami uza Maioria Politika tenki uza maioria politika la signifika forsa maioria lasignifika uza ditadura, maioria komprova iha Parlamentu, fatin demokrasia, tan nee deklarasaun Padre Martino retotika deit no laiha fundamentu,” dehan Natalino ba STL Tersa (03/04/2016) iha PN.

Nia konsidera deklarasaun Pe.martinho sempre halo konfuzaun, retorika tamba publiku hatene Pe.Martinho ema neebe filozofia hasai teolizia, maibe ninia diskursu sira nee la iha fundamentu tan nee halo baraila situasaun deit.

Iha fatin Hanesan prezidente Partidu Demokratiku Adriano Nacimento lakohi fo komentariu ba ema nia komentariu, tamba nee PD simu ho hamnasa deit tamba PD atu tun no sae mos laiha problema.

Antes nee Pe.Martinho Gusmao hatete ema hotu la espera katak CNRT halo mudansa radikal uza votu Maioria atu halo traisaun ba minoria, nunee CNRT kria autoriter iha Timor leste, CNRT la koinese povu sei nesesita hakmatek. Informasaun kompletu iha STL Jornal no STL Web, edisaun Kuarta (4/5/2016). Timotio Gusmao

Suara Timor Lorosae

Australia Nasaun Boot, Lakohi Lakon Oin Iha Mundu Internasional

DILI - Membru Parlamentu Nasional husi bankada Frente Mudansa Jorge Teme hatete, Australia nasaun boot, neebe iha dignidade, tamba nee sira mos lakoi lakon oin iha mundu Internasional.

Hau hanoin Australia nasaun boot, neebe iha dignidade boot, i sira mos lakoi lakon sira nia oin iha for a Internasional ba lori kazu nee ba ONU,”dehan deputadu Teme ba jornalista sira iha PN, Dili, Kuarta (04/05/2016).

ONU tuir Deputadu Teme katak, organijasaun Internasional neebe fo balansu justisa los ba ema hotu-hotu, mesmu defisil atu Timor Leste alkansa nia problema.

ONU fasilita atu nasaun rua neebe iha konflitu bele tur hamutuk para buka solusaun, solusaun nee lafasil atu alkansa iha kultu praju, maibee pelumenus iha ona vontade, iha mos sinal positivu husi Australia atu bele tur hamutuk ho Timor Leste hahu koalia ona konaba fronteira maritima.

Iha fatin hanesan Xefi bankada PD, Maria Loudes Bessa hatete, Partidu Demokratiku fo apoia tomak no sira mos kontenti tamba Australia bele hola pasu ida hanesan nee, tamba Nasaoins Unidas halo prosesu nee obrigatoriu.

Entertantu Vise Ministru Negosiu Estranjeiru Roberto Soares hatete, Ministru Negosiu Estranjeiru simu komunikasaun offisial husi Embaixada Australia,  informa konaba prontidaun Australia hodi nomea sira nia komisariu rua para atu bele tur iha komisaun de konsiliasaun. Informasaun kompletu iha STL Jornal no STL Web, edisaun Kinta (5/5/2016). Carme Ximenes/Timotio Gusmao

Suara Timor Lorosae

Hetan Destroisaun, Vicente Direitu Hetan Eis Titular

DILI - Maske Repzentante povu iha uma fukun Parlamentu Nasional (PN) sei halo elisaun hodi destroi Prezidente Parlamentu Vicente Guterres, maibe iha direitu nafatin hodi hetan eis titular tamba lidera parlamentu liu ona fulan 42.

Deputadu Bankada Fretilin Osorio Florindo katak, tuir estatutu deputadu nian neebe tuan Prezidente Parlamentu Nasional iha direitu hetan eis titular, tamba asumi kargu nudar prezidente liu tiha ona fulan 42.

Prezidente Parlamentu Nasional Vicente Guterres nia iha direitu hetan eis titular tamba liu tiha ona fulan 42 asumi kargu hanesan Prezidente Parlmentu,“ Dehan Osorio ba STL Kuarta (04/05/2016) iha PN.

Hatan konaba Parlamentu halo destroisaun la fo impaktu, Osorio hatete distroisaun neebe mak halo laiha impaktu, tamba nia asimu kargu liu ona tinan 4 neebe estatutu hanesan eis titular sira seluk ou prezidente parlamentu anterior sira.

Iha fatin hanesan Xefi Bankada PD Maria Lurdes Besa hatete tuir lei se lasala Prezidente Parlamentu Nasional Vicente Guterres hetan eis titular, tamba nia kumpri ona lei neebe vigora atu hodi hetan eis titular.

Nune mos Deputadu Bankada Frente Mudansa Jorge Teme hatete atu hetan eis titular depende ba lei neebe mak vigora, tamba normalmente kaer kargu nudar prezidente liu ona fulan 42 iha direitu hetan eis titular. Informasaun kompletu iha STL Jornal no STL Web, edisaun Kinta (5/5/2016). Timotio Gusmão

Suara Timor Lorosae

Elisaun Prezidente Foun, PN Sei Distitui Vicente, Fretilin Promete La Vota Kontra OGE 2017

DILI - Lider bankada parlamentar hamutuk ho Meja desidi Plenaria extraordinaria hodi halo elisaun sei distitui uluk Prezidente Parlamentu Nasional ho estrutura, nunee tama elisaun ba Prezidente foun Meja Parlamentu Nasional.

Tuir Xefi Bankada CNRT Natalino dos Santos katak enkontru lider Bankada hamutuk ho Prezidente Parlamentu, desidi ona hodi halo plenaria extra-ordinaria atu hili Prezidente Parlamentu Nasional foun ho kompozisaun meza troka Prezidente PN Vicente Guterres.

Lider Bankada halo ona desizaun hodi halo plenaria extra ordinaria hodi halo elisaun ba Prezidente Parlamentu foun no meja Parlamentu foun, sei halo distitui uluk tamba renunsiu lakohi tan nee halo distitui,” dehan Natalino ba Jornalista, Tersa (03/04/2016) iha PN.

Nia hatete distituisaun neebe mak halo sei liu husi votasaun mak foin tama iha elisaun ba meja PN neebe kanditura mak hanesan Prezidente Parlamentu Nasional Aderito Hugo, Vice Prezidente Eduardo Bareto no Duarte Nunes, no Sekretaria meja mak Fernanda Lay no Vice Sekretaria Domingas da Silva no Angela Sarmento.

Remata elisaun Meja parlamentu Nasional foun deputadu sira sei halo diskusaun iha komisaun espesializada no mos kompozisaun meja foun sei halo aprovasaun ba lei meiu Ambiente, fo tomada de pose ba estrutura konsellu imprensa.

Iha fatin hanesan Xefi Bankada Fretilin Aniceto Guterres hatete Plenaria Extra-ordinaria neebe mak halao lao tuir rezimentu neebe mak Parlamentu aprova tiha ona, neebe hahu ho distutiusaun ba Prezidente Parlamentu ho Vice Prezidente sira. Informasaun kompletu iha STL Jornal no STL Web, edisaun Kuarta (4/5/2016). Timotio Gusmao

Suara Timor Lorosae

HAK Ho Familia Vitima Kondena Makas Oknum PNTL Tiru Joven

DILI - Asosiasaun HAK hamutuk ho familia vitima kondena makas oknum Polisia Nasional Timor Leste (PNTL) husi Munisipiu Liquica, neebe tiru joven nain rua hetan kanek todan, neduni sira husu Komandu PNTL suspende oknum Polisia nee no ejize ba Ministeru Publiku atu asleira lalais invistigasaun.

Tuir Koordenador Advokasia Asosiasaun HAK Honorio de Almeida katak akontesementu iha 19 April 2016 iha Munisipiu Liquica, neebe Polisia Tranzitu ida tiru joven nain rua,  too hetan kanek grave, akontesementu nee winhira joven sira fila husi seremonia enseramentu ba estudante estrasiariu sira husi Universidade balun iha Dili, altura neebe sira fila husi feta sira nain 6 hamutuk ho motor rua, sira too dalan klaran hetan polisia tranzitu nain 3 ho farda kompletu atu hapara sira viazen, maibe joven sira nee tauk halai entau  polisia tarnzitu ida ho ininisal AS nia foti pestola tiru kedas.

Vitima nain rua nee halo opersaun mos boot ida seluk la konsege halo opersaun, tamba turi Dotor Espesialista sira hateten katak se nia halo opersaun ba bala musan neebe iha vitima nia isin nee nia risku boot liu ba vitima nia vida, entau dotor sira deside la halo opersaun, husi bala nee iha nia isin atu nune la bele implika ba ninia kondisaun saude.

Tamba nee husi Asosiasaun HAK ho Familia vitima sira kondena makas aktus ida nee, tamba invove oknum polisia tranzitu ho inisia AS hodi tiru joven sira, tamba sira laos ema kriminozu, polisia tranzitu la iha direitu tiru hasoru sira se wainhira seidauk fo samada atensaun no sira la halo krimi boot ida, Polisia wainhira atua koandu joven sira nee halo perturba ordem publiku ruma ka sira kontra ordem tranzitu ruma, maibe la signifika katak tenki tiru, maibe tenki halo atuasaun tuir regras no lei neebe konsagra ona laos halo atusaun arbiru,” dehan Honorio.

Sira mos husu ba Ministeriru Publiku atu asleira invistigasaun, tamba aktus ida nee ba sira Asosaisaun HAK no familia vitima hanesan krime, no hahalok ida ne la edukativu, tuir lolos PNTL la bele uza atributu nasaun hodi hatauk nia povu.

Iha fatin hanesan Familia Vitima Costancio Pereira hateten Vitima nain rua neebe Polisia Tranzitu Munisipiu Liquica tiru kanek, hanesan Costodio de Olivera nee konsege halo operasaun  hasai ona bala musan neebe iha nia isin no ida seluk naran Simao la konsege, se halo opersaun perturba ninia vida, tamba nee la halo opersaun. Informasaun kompletu iha STL Jornal no STL Web, edisaun Kinta (5/5/2016). Joao Anibal

Suara Timor Lorosae