Gil da Costa Lidera Fali RTTL,ep

DILI, (TATOLI) - Sétimu Governu liuhosi reuniaun Konsellu Ministru Estraordináriu, ohin, Sesta (25/01) deside Gil da Costa nu’udar Prezidente Radio Televizaun Timor-Leste, Empreza Públika (RTTL,ep) ba períodu ida (tinan haat).

Sekretáriu Estadu Konsellu Ministru no Komunikasaun Sosiál, Matias Boavida esplika, Gil da Costa hili diretamente hosi Primeiru Ministru, Mari Alkatiri, hafoin halo observasaun ba kandidatu na’in tolu seluk ne’ebé propoin hosi sekretáriu Estadu Konsellu Ministru no Komunikasaun Sosiál.

“Konsellu ministru reúne no hili Gil da Costa atu hala’o knaar hanesan Prezidente rttl,ep ba períodu ida,” Matias Boavida informa iha Palásiu governu, hafoin partisipa reuniaun Konsellu Ministru.

Gil da Costa, figura ida ne’ebé tuir Matias Boavida nia hatene iha esperiénsia ba area komunikasaun sosiál.

“Nivel edukasaun mós iha area komunikasaun sosiál. Nia iha esperiénsia barak iha komunikasaun sosiál, hanesan media office, public officer too good government,” Sekretáriu Estadu ne’e relata, maibé nia la fó loloos bainhira mak eis mídia officer ne’e simu posse nu’udar Prezidente ba rttl,ep.

Entretantu, Milena Abrantes ne’ebé durante ne’e hala’o knaar nu’udar Prezidente rttl,ep tuir lei nia mandatu remata ona iha loron 28, Janeiru, 2018.

Jornalista: Agapito dos Santos | Editór: Manuel Pinto

Imajen; 1 - Sekretáriu Estadu Konsellu Ministru no Komunikasaun Sosiál, Matias Boavida

MT Sei Foti Medida Ba Prátika Prostituisaun Iha Airport Hotel

DILI, (TATOLI) – Ministru Turizmu, Manuel Vong, hatete tempu badak sei hola medida ba Airport Hotel ne’ebé lokaliza iha Raikotu tanba hala’o prátika prostituisaun iha fatin refere.

“Iha prátika prostituisaun mak iha ne’ebá, otél lahalo prátika kona-ba prostituisaun. Ita Timór tenke hatudu ita-nia dignidade, balun bá dehan katak oras rua de’it dólar 15 no ha’u husu tuir dólar 15 ne’e oinsá? Ne’e hotu tiha fila bá ona bá uma. Dólar 20 oras haat, ita hanoin ida ne’e labele”, katak Vong iha otél Novo Turismo, ohin, hafoin halo vizita ba otél sira.

Nune’e iha tempu badak sei hola medida ba otél ne’ebé haree husi nia edifísiu hanesan apartamentu ne’e ho na’in ba fatin refere husi Xina. Aleinde halo otél ka apartamentu iha instalasaun ne’e fa’an mós sasán ba konstrusaun uma nian nomós kioske.

“Hodi hapara ho buat sira ne’e. Hakarak fa’an ai, fa’an ai loos, hakarak halo otél halo otél loos. Ha’u sei koordena ho ministériu relevante atu revé filafali lisensa ne’ebé fó ona para bele asegura duni ita-nia kualidade service otél iha rai Timor-Leste ne’ebé ita hotu hadomi”.

Tuir observsaun ne’ebé halo katak Airport Hotel ne’e iha empregadu timoroan no haree ba fatin housekeeping ka serbisu limpeza nian iha sala ki’ik ne’ebé liga hamutuk de’it dapur no sintina sein iha parede.

Jornalista: Maria Auxiliadora | Editora: Rita Almeida

Foto Google

GMN TV | Jornal Nacional

GMN TV | Grupo Média Nacional

Prado Foun Hela De’it ho Mehi

DILI: Prezidente Repúblika, Francisco Guterres ‘Lú-Olo’ ofisialmente deklara hodi disolve Parlamentu Nasionál no hakat ba eleisaun antesipada.

Liu husi dekretu Prezidente Repúblika númeru 5/2018, 26 Janeiru, Xefe Estadu uza ninia kompeténsia tuir Konstituisaun RDTL Artigu 74 pontu 1 kona-ba “Prezidente Repúblika maka Xefe-Estadu, símbolu no garantia independénsia nasionál no unidade Estadu nian, no instituisaun demokrátika sira-nia funsionamentu regulár”.

Nune’e, halo mós konsultasaun ho partidu polítiku sira ne’ebé hetan reprezentasaun iha Parlamentu Nasionál tuir artigu 86 pontu f hodi disolve Parlamentu Nasionál.

Nune’e, bazeia ba deliberasaun Konsellu Estadu ho númeru 01/2018, 24 Janeiru, pronunsia situasaun polítika foun hodi halo hikas eleisaun antesipada.

Ho desizaun Xefe Estadu nian mehi deputadu foun na’in 65 ne’ebé vota afavór ona ba Prado foun hela mehi de’it. Tanba, la kleur tan povu sei hakat hikas ba urna hodi halo votasaun hili membru deputadu 65 foun.

Deputadu na’in 65 foun ne’e liu husi sira nia reprezentante sira husi Bankada FRETILIN, CNRT, PLP, PD no KHUNTO iha fuan Setembru 2017, ho “konxiencia” vota unanimidade ona ba karreta Prado foun.

Konsellu Administrativu Parlamentu Nasionál nian reprezenta husi kada bankada. Husi Partidu FRETILIN reprezenta husi deputadu Aurélio Freitas, CNRT Deputada Brígida Correia, PLP, Deputadu Mericio Akara, PD, Deputadu Manuel Carvalho no reprezentante husi bankada KHUNTO.

Iha prosesu diskusaun no votasaun ne’e pontu rua importante mak deputadu sira define. Kona-ba kontinuasaun alienasaun ba karreta Prado antigu.

Nune’e, karreta sira ne’ebé deputadu anteriór sira lori ona ba uma sei rekolla hotu, hafoin bele halo analiza hodi define ninia presu ne’ebé razoavel. Presu ne’ebé determina entre $12.000 to’o $20.000.

Pontu importante seluk ne’ebé aprova maka reprezentante bankada sira ne’e hotuhotu a favór ba sosa karreta foun.

Maski nune’e, planu deputadu sira nian atu sa’e Prado foun labele realiza. Orsamentu atu sosa karreta ne’e pendente hamutuk iha Orsamentu Jerál Estadu (OJE), ne’ebé labele diskute hafoin mosu impase polítika.

Nune’e, deputadu sira sente de’it kadeira mamar durante fulan, ne’ebé posivel sei aumenta fulan hirak tan ba oin to’o mosu lejizlasaun foun no imajinasaun atu uza Prado foun hela de’it ho mehi.  

Independente

Partidu Polítiku Hahú Prepara ba EA

DILI:  Partidu Polítiku sira hahú prepara aan ba eleisaun antesipada, hafoin Prezidente Repúblika Francisco Guterres ‘Lú-Olo’ deside eleisaun antesipada no disolve Parlamentu Nasionál.

Hafoin Prezidente Repúblika deside bazeia ba artigu 86 (Aline f) iha konstituisaun repúblika disolve Parlamentu Nasionál, Partidu FRETILIN no PD konvoka enkontru iha Komité Sentrál FRETILIN, Komoro-Dili hodi diskute estratéjia no preparasaun ba kampaña polítika hodi hetan konfiansa husi populasaun.

Bloku koligasaun Aliansa Maioria Parlamentár (AMP) hala’o enkontru iha rezidénsia Portavós AMP, Taur Matan Ruak hodi diskute preparasaun ba kampaña politika atu hasoru eleisaun.

Entretantu, Forum Dezenvolvimentu Demokrátika (FDD) kompostu husi partidu lima no Forum Dezenvolvimentu Nasionál (FDN) kompostu husi partidu sia mós hahú prepara aan atu halo kampaña polítika hodi hetan konfiansa povu iha eleisaun antesipada.

“Ami simu desizaun Prezidente Repúblika ida no ami prontu ba halo kampaña polítika, maibé hein Prezidente marka eleisaun ba sá fulan.  Agora ita halo konsolidasaun de’it,” Sekretáriu Jerál Partidu FRETILIN, Mari Alkatiri partisipa desizaun ikus Xefe iha Palasiu Prezidensiál - Bairru-Pité, Sesta (26/01).

Hataan ba FRETILIN ho PD sei Avansa ho Pakote ida ba EA, nia dehan, atu avansa ho pakote ida la lae?  ne’e laiha akordu ho Partidu Demokrátiku tan ne’e FRETILIN ho PD respeita malu.

“Ba Eleisaun Antesipada ne’e militante FRETILIN komesa preparadu hotu ona agora sira hein de’it atu tuir Eleisaun Antisipada,”dehan nia.

Prezidente Partidu Demokrátiku (PD), Mariano Assanami Sabino haktuir katak PD hateten, ukun ne’e povu nian, povu maka tenke ezerse fila fali nia funsaun atu bele vota ne’ebé prepara atu halo kampaña polítika hodi hasoru eleisaun antesipada.

“Ami atu kampaña ka la kampaña mós povu hatene no tetu ona saida maka Partidu Demokrátiku halo durante ne’e imi vota ba,” dehan nia.

Membru CPN-CNRT, Adérito Hugo hatete, CNRT preparadu atu re- organiza makina partidu nian hodi hasoru eleisaun antesipada.

“CNRT sei avansa ho aliadu rua hanesan PLP no KHUNTO, maibé sei deside iha nivel altu partidu tolu ne’e iha tempu badak,”dehan nia.

Xefe Bankada PLP, Fidelis Magalhães dehan, apoiu desizaun prezidente Repúblika no PLP prontu atu kompete iha eleisaun atesipada.

Nia dehan, AMP kontinua metin hodi hasoru eleisaun Atesipada.

“Ami sei deside atu bloku AMP kontinua hamutuk ba kampaña ka la’o ketak-ketak, maibé ami metin nafatin,” dehan nia.

Nia fiar katak povu sei kontinua fó konfiansa ba PLP atu aumenta nia kadeira hodi kaer ukun no dezenvolve TL.

Xefe Bankada KHUNTO, Luis Roberto afirma, Partidu KHUNTO mós apoiu desizaun Xefe Estadu ne’ebé prontu kompete iha eleisaun Atesipada.

“Ami prontu atu kompete tanba ami AMP sei hamutuk ba kampaña hodi tuir eleisaun antesipada,” nia afirma. 

Cristina Ximenes | Independente

PR deside ba eleisaun antesipada, Pe. Juvito: “Lalika protesta desizaun PR”

Prezidenti Repúlika, Francisco Guterres ‘Lú Olo’ iha Sesta (26/1/2018) mais ou menus tuku 10:00 OTL, hakotu empase polítika hodi hakat ba eleisaun antesipada.

Desizaun ne’e Xefi Estadu foti hafoin loron rua tui-tuir malu Kuarta-Kinta (23-24/01/2018) Prezidenti Repúblika rona opiniaun husi partidu polítiku sira ne’ebé hetan asentu iha parlamentu (FRETILIN, CNRT, LPLP, PD no KHUNTO) no mós rona opiniaun husi membru sira Konsellu Estadu nian.

Ho desizaun ne’ebé mak Xefi Estadu foti hodi fó fila ba atu dala ida tan ba tuir eleisaun ne’e (eleisaun antesipada) ne’e, Vigáriu Pastoral Diocese Díli, Pe Juvito Rego Araújo hateten, lalika kestiona desizaun Xefi Estadu ne’e, tanba tuir duni dalan demokrasia, no desizaun ne’e justu no honestu duni.

“Desizaun ne’e justu no honesta. Ne’ebé sé Prezidenti Repúblika haree katak sé instituisaun ida ne’e Parlamentu Nasionál labele, entaun disolve tiha para fó fila fali poder ne’e ba povu, tanba dehan demokrasia ne’e hanesan ne’e, povu mak fó poder ba nai ulun sira atu ukun, maibé kuandu ukun ladi’ak fó fila ba povu hodi hili fila fali,”hateten Pe. Juvito Rêgo Araújo ba jornalista sira iha Palásiu Prezidensiál Nicolau Lobato, Bairo-Pite Díli, hafoin partisipa mensajen Prezidenti Repúblika, Francisco Guterres Lú Olo nian konaba situasaun polítika atual iha rai laran.

Pe. Juvito reforsa katak, lalika protesta desizaun PR, tanba desizaun ne’e PR foti atu bele hakotu tiha inserteza polítika no espekulasaun oi-oin ne’ebé iha públiku.

“Ba ha’u desizaun ne’e laiha risku ida, kualker desizaun sempre iha nia risku, laiha desizaun ida ne’ebé laiha risku. Maibé Prezidenti Repúblika halo desizaun ida ne’e la’os toba hader mai halo de’it. Ne’e nia tetu tiha ona, konsulta ona ho ema barak, matenek boot polítika sira, lei na’in sira, konsulta tiha hotu ona mak halo desizaun ida ne’e. Tanba ne’e ema hotu bele simu desizaun Prezidenti Repúblika nian ho neon ho laran tomak hodi kontribui ba dezenvolvimentu nasaun nian,”hateten Pe Juvito.

Iha fatin hanesan, eis Prezidenti Parlamentu Nasional III Lejislatura, Adérito Hugo da Costa, nu’udar mós deputadu bankada CNRT hateten, desizaun ne’ebé PR anunsia ema barak mak durante ne’e hein hela atu bele rezolve impase polítika rai laran ne’ebé rezulta husi formasaun governu menoria iha tinan 2017.

“Sidadaun babain mós hein hela desizaun ida ne’e, inklui líder polítiku sira, hanesan maun boot Xanana, Taur Matan Ruak ho Naimori. Prezidenti Repúblika no fim tenki pronunsia para bele rezolve situasaun impasse polítika ne’ebé rezulta husi formasaun governu minoria husi eleisaun 2017 ne’e. Agora solusaun mak ne’e, fila ba partidu ida-idak, régras eleisaun parlamentar nian, lei sira ne’ebé vigora hela, bazeia ba sira ne’e. Prezidenti Repúblika sei dekreta detalla data atu hahú eleisaun bainhira tuir konstituisaun,”nia hateten.

Hatán karik eleisaun antesipada CNRT, PLP no KHUNTO sei avansa ho pakote ida de’it, Aderito Hugo dehan, sei desidi iha nível altu partidu nian iha tempu badak.

Nune’e mós deputadu bankada Partidu Libertasaun Popular (PLP), Fidelis Mangalhães hateten, desizaun PR nian ne’e sira previstu tiha ona ka adivinha antes ona katak desizaun sei sai hanesan ne’e (eleisaun antesipada).

“Desizaun ne’e ami previstu tiha ona, ami adivinha katak desizaun sei sai hanesan ne’e, sai hanesan ne’e. Entaun ita hotu lori fali ba povu i prepara-an di’ak liutan ba kampaiña para depois bele hetan fali konfiansa husi povu,” nia hateten.

Fidelis mós fiar katak, povu sei fó konfiansa ba PLP iha eleisaun antesipada, tanba durante PLP kaer metin ba valores demokratikus no konstituisaun RDTL.

“Povu sei la husik PLP. PLP sei uluk, hahú mós konsege hetan konfiansa husi povu, satan agora depois de polítika durante ne’e, hafoin kaer metin ba valores demokrátikus no konsitituisaun,”Fidelis hateten.

Nune’e atual Primeiru Ministru, Mari Alkatiri hateten, FRETILIN prepara halo kampaiña iha eleisaun antesipada, maibé sei hein lai PR marka data ba eleisaun. No agora dadaun partidu halo de’it konsolidasaun.

“Atu halo kampaiña ita sei hein lai Prezidenti Repúblika marka lai loron ka data ba eleisaun mak ita halo, agora ita halo konsolidasaun de’it,”hateten Alkatiri.

Alkatiri hateten, lalika preokupa ho osan ba eleisaun antesipada, tanba  iha osan ne’ebé poupa atu realiza.

“Ne’e ha’u tenki husu ba ema sira halo jestaun ba eleisaun mak ha’u bele koalia,”hateten Marí Alkatiri hodi responde ba montante orsamentu ne’ebé preve ba eleisaun antesipada.

Desizaun PR justu

Husi sorin seluk Pe. Martinho Gusmão, hateten katak, dezisaun ne’ebe maka Prezidente Repúblika (PR) Francisco Guterres Lú Olo, foti ne’e justu tanba tuir konstituisaun RDTL nune’e bele solusiona impasse polítika ne’ebe dadaun ne’e akontese iha rai laran.

“Prezidente Republika fo sai ona, dissolve Parlamentu Nasional ba eleisaun antesipada, ida ne’e ultima solusaun no jalan terakhir liu ona, tanba ne’e ita hotu-hotu tenki aseita ida ne’e. Ita hein partidus politikus sira lori solusaun ka ba fakar problema, sira lori be malirin ba povu ka lori be manas ba povu,” afirma Pe. Martinho Gusmão, ba GMN hafoin granda entrevista iha Estudiu GMN Bebora, Dili, Sesta Feira (26/01/2018). ías/Aes

GMN TV | Grupo Média Nacional

Prezidente CNE: Órgaun eleitoral timoroan sira sei hahú prepara ba antesipadu sira

Prezidente hosi Komisaun Nasional Eleisaun (CNE) timoroan nian afirma ona katak órgaun eleitoral sira sei hahú prepara ba eleisaun antesipadu sira, ne'ebé fó sai hosi xefe Estadu iha loron-sesta ne'e, ho destake ba resenseamentu.

"Ami iha oportunidade adisional ida hodi halo resenseamentu ba timoroan sira iha distritu sira. Ami la konklui rejistu tomak no ne'e bele hanesan oportunidade ida hodi kompleta prosesu ne'e", Alcino Barris hatete ba Lusa.

"Iha inísiu fulan-Fevereiru ami sei instala edukasaun síviku iha teritóriu tomak no iha diáspora hodi espalla di'ak dinámika tomak hosi situasaun no hosi prosesu eleisaun rasik", nia esplika.

Prezidente Repúblika Timor-Leste nian fó sai iha loron-sesta kona-ba anulasaun Parlamentu Nasional no konvokatóriu ba eleisaun antesipadu hanesan solusaun hodi rezolve problema polítika iha Timor-Leste.

Xefe Estadu seidauk marka loron ba votu parlamentar foun, no lei eleitoral esplika katak, iha kazu anulasaun Parlamentu Nasional nian, xefe Estadu "fiksa, tuir dekretu, loron eleisaun ba deputadu sira nian (...) ho antesedénsia mínimu loron 60".

"Iha órgaun rua hosi administrasaun eleitoral Estadu nian ne'ebé la funsiona de'it iha períudu sira eleisaun nian. Funsiona nafatin iha situasaun ruma", Baris esplika.

"PR foti ona desizaun hodi halo eleisaun antesipadu hanesan solusaun ba problema polítika ne'e. Agora ami tenki esforsa hodi asumi no hala'o ezijénsia ne'e", nia afirma.

Kona-ba kalendáriu, Baris hatete katak iha kondisaun atu votu bele hala'o iha inísiu fulan-Abril, kumpri períudu mínimu fulan rua nian, maibé Prezidente Repúblika "bele aumenta liu ba loron 60 hodi fó posibilidade tomak ba órgaun sira administrasaun eleitoral nian hodi prepara ho di'ak".

Konstituisaun hatete katak disolusaun "la prejudika subsisténsia hosi mandatu deputadu sira nian to'o reuniaun dahuluk hosi Parlamentu hafoin kedas eleisaun sira", no iha kazu disolusaun nian, Parlamentu eleitu "hahú lejislatura foun ne'ebé nia durasaun aas liu duké tempu nesesáriu hodi kompleta períudu ne'ebé koresponde ba sesaun lejislativu ne'ebé hala'o hela to'o loron eleisaun".

Durante períudu ne'ebé maka sobu parlamentu, funsiona Komisaun permanente hosi Parlamentu Nasional, ne'ebé prezidi hosi prezidente Parlamentu Nasional nian no kompostu hosi visi-prezidente sira no deputadu sira ne'ebé maka partidu sira hili, tuir ho reprezentatividade.

Governu atual agora sai hanesan ezekutivu ida jestaun nian to'o fó fali pose ba ezekutivu foun, no deputadu sira sei iha funsaun limitadu liu to'o fó fali pose ba deputadu foun sira.

SAPO TL ho Lusa

Líder timoroan sira felisita desizaun hosi Prezidente hodi konvola eleisaun antesipadu

Dirijente timoroan sira felisita ona, iha loron-sesta ne'e, desizaun hosi Prezidente Repúblika hodi anula Parlamentu Nasional no konvoka eleisaun antesipadu, hodi konsidera katak hanesan importante la adia tan rezolusaun ba problema polítika iha Timor-Leste.

Prezidente Repúblika timoroan fó sai iha loron-sesta ne'e anulasaun ba Parlamentu Nasional no konvokatóriu hosi eleisaun antesipadu hanesan solusaun hodi rezolve problema polítika iha Timor-Leste.

"Hanesan desizaun ida ne'ebé sei ajuda hodi rezolve problema sira, ha'u hanoin. Maibé ha'u hein katak sei hanesan desizaun ida ne'ebé sei loke dalan ba klima foun ida entendimentu nian", hatete hosi primeiru-ministru, Mari Alkatiri, ne'ebé hanesan mós sekretáriu-jeral hosi Frente Revolucionária do Timor-Leste Independente (Fretilin), ba Lusa.

"Laiha ema ida maka tenki governa mesak, no mós hakarak atu governa hasoru sentidu votu nian", hatete hosi Prezidente Francisco Guterres Lu-Olo hafoin rona tiha nia desizaun iha Palásiu Prezidensial.

Hatán kona-ba balun kestiona independénsia hosi xefe Estadu - ne'ebé hanesan mós prezidente hosi Fretilin -, Mari Alkatiri hatete katak krítiku sira hosi desizaun "iha konsiénsia katak iha blokeiu hodi hala'o poder polítiku sira".

Mariano Sabino, líder hosi Partidu Demokrátiku (PD, parseiru Fretilin nian iha Governu), felisita mós desizaun, hodi garanti katak ezekutivu sei governa hodi defende nasaun to'o votu no kritika sé maka haree demokrasia hanesan de'it kestaun númeriku ida.

"Hanesan situasaun susar ida ba Timor-Leste no ba Governu no ba ema timoroan tomak, maibé ema timoroan sira tenki hatán ba dezafiu", nia afirma.

"Bainhira iha insultu sira ba ema sira hanesan antidemokrátiku, bainhira uza demokrasia iha de'it parte numériku sira hanesan antidemokrátiku. Demokrasia la'ós de'it númeru sira, hanesan prinsípiu no atitude, hanesan kompromisu: kompromisu sira povu nian iha eleisaun kompromete ezisténsia hosi partidu no bainhira partidu nega kompromisu ne'e ba povu, partidu nia ezisténsia lakon", nia hatete.

Hosi parte opozisaun nian, partidu prinsipal sira hatete katak hein ona desizaun ne'e, Adérito Hugo da Costa, eis-prezidente Parlamentu Nasional nian no atual deputadu hosi Congresso Nacional da Reconstrução Timorense (CNRT) afirma katak partidu preparadu.

"Ha'u la senti deziludidu. Ami preparadu ba desizaun ruma, inklui eleisaun antesipadu", nia hatete ba Lusa maibé lakohi konfirma karik opozisaun sei konkore ho aliansa pré-eleitoral ida.

"Hafoin desizaun ne'e ami sei haree ami nia pozisaun hodi defini dalan oinsá maka ami partisipa iha eleisaun sira tuirmai. Mákina hosi partidu nian prontu, antes eleisaun sira, hafoin eleisaun sira, no kontinua organiza fali hodi partisipa iha eleisaun sira", nia hatete.

Fidelis Magalhães, líder hosi bankada Partidu Libertasaun Popular (PLP), hatete ona ba Lusa katak hein ona desizaun ne'e.

"Ami phanoin ona katak desizaun maka konvokasaun ba eleisaun antesipadu sira. Ami sei kontinua luta, defende prinsípiu ho valor demokrátiku sira no Konstituisaun. Ami prontu. Pelumenus iha desizaun dia hosi Prezidente", nia hatete ba Lusa.

Lere Anan Timur, komandante hosi Forsa Defeza Timor-Leste nian (F-FDTL), konsidera desizaun hosi xefe Estadu ne'e "matenek" hodi permiti rezolve problema ne'ebé maka akontese kleur ona.

"Ha'u hanoin hanesan desizaun di'ak ida. Desizaun matenek ida. Poder maka povu nian no bainhira líder dirijente sira nasaun nian la entende malu, entaun di'ak liu fila fali ba povu hodi sira desidi. Hanesan desizaun di'ak liu", nia afirma.

Líder hosi Konferénsia Episkopal Timoroan nian, bispu Basílio do Nascimento, felisita ona desizaun, ne'ebé nia konsidera hanesan "ladún xokante" ba populasaun.

"Ami ema timoroan sira iha kanek ne'ebé seidauk di'ak no hasai [governu] hosi ida ba fali ida seluk? Rona sentimentu sira hosi ema sira ha'u hanoin hanesan dalan ida ne'ebé ekilibradu liu no ladún moras", nia hatete ba Lusa.

Basílio do Nascimento, hatudu esperansa katak líder polítiku sira rona povu, rekoñese ona risku katak situasaun la hamosu motivasaun ba populasaun hodi partisipa iha asaun eleitoral.

Reasaun pozitivu sira mós mai hosi partidu ki'ik sira, ho Gilman dos Santos (Uniaun Demokrátiku Timoroan) konsidera katak "hanesan desizaun di'ak ida".

Ho tan partidu haat, nia esplika, UDT sei aprezenta ba votu iha koligasaun hosi partidu sira, Frente Dezenvolvimentu Demokrátiku.

"Ami sei serbisu no ami prontu hodi kompete iha eleisaun sira", nia hatete.

Oscar Lima, responsável hosi Kámara Komérsiu ho Indústria, felisita mós desizaun ne'ebé foti, hodi defende katak "labele demora liután".

"Ne'e hanesan desizaun ida ne'ebé tenki foti. Atu gosta ka la'e. Prezidente Repúblika tenki iha nia kompeténsia ho kapasidade pesoal hodi rezolve problema ne'ebé ami iha. Hanesan desizaun ida ne'ebé di'ak tanba fó fali ba povu hodi desidi", nia afirma.

SAPO TL ho Lusa