Timor-Leste simu ho ézitu turista ne’ebé barak ho kruzeiru australianu

Horisehik Timor-Leste pasa ho ézitu teste bo’ot ida iha setór turizmu, simu turista atus barak ho kruzeiru australianu Pacific Jewel ne’ebé, ba dala uluk, realiza tour iha zona ne’e.

Maski ho reseiu kona-ba kapasidade kapitál simu turista sira, loron dekore la ho insidentebo’ot ho ekipa Ministériu Turizmu nian no operadór privadu sira kolabora hodi organiza transporte, tours, atividade no vizita ba prinsipál lokál iha kapitál.

Tours organiza ba iha zona Ermera, hadi haree setór kafé nian, no Likisá no Maubara, hodi koñese edifísiu koloniál iha zona.

Maski iha tinan kotuk pasa ona hosi Díli ró kruzeiru balun, vizita australianu Pacific Jewel – ne’ebé tanba nia dimensaun tenki ankora iha baía Díli nian – hanesan teste dahuluk tipo ne’e nian (no ho dimensaun ne’e) iha setór turizmu timoroan.

Pasajeiru sira ne’ebé hili mai iha ne’e – maioria hosi sira besik 2.000 – tenki halo pré-inskritu iha tours ka hili pasiar livre, vizita zona ka loál sira ne’ebé rekomenda ka lokál espesífiku, emblemátiku ba Díli, ho semitériu Santa Cruz.

Jenny Lisha, hosi rejiaun australiana, Gold Coast, ida ne’ebé mós hili vizita Díli la ho tour, ho vizita "neneik" hodi fila ba uma hafoin iha Europa, iha ne’ebé nia-oan ho bei-oan sira hela.

"Ami fila neneik ba uma. Ami semo to’o iha Singapura no hafoin ne’e ami sa’e ró", hatete ba Lusa, destaka manas ne’ebé nia senti iha Díli no kuriozidade hodi bele vizita, ho kruzeiru, fatin ne’ebé ema ladun vizita.

"Hanesan buat ne’ebé mós ha’u hanoin. Wainhira ami mai halo tour, iha fatin hanesan ne’e, ne’ebé ema la mai barak. Ami rona ema ko’alia kona-ba Timor durante funu maibé hafoin independénsia. Di’ak tebes haree oinsá buat hotu la’o. Parese la’o ho di’ak", nia hatete, molok kontinua paseiu iha zona Farol, iha Díli.

Iha Portu Díli, iha ne’ebé pasajeiru sira to’o, táxi no mikrolete sira oferese negósiu ba turista sira ho destinu marka ona ka hakarak pasiar "oras rua" iha sidade.

Ryan, tripulante ida ne’ebé mós hili hamutuk ho kompañeiru tripulasaun balun la’o ho Mikrolet, transporte públiku timoroan.

"Ne’e fantástiku. Ema hotu ho entuziasmu tanba bele para iha ne’e, iha zona ne’ebé para normalmente. Molok ne’e nunka rona ema ko’alia kona-ba Timor-Leste. Ha’u la hatene liu buat ida kona-ba ne’e", nia esplika.

John, hosi Brisbane, iha nia vizita dahuluk mai Timor-Leste esplika katak molok ne’e la iha espetativa maibé ho kuriozidade tebes hodi vizita nasaun ne’ebé nia-amano hela durante 2ª Guerra Mundial.

"Ha’u hatene de’it katak ha’u nia-aman hela iha ne’e iha 2ª Guerra Mundial no soldadu sira barak la ko’alia kona-ba sá maka akontese iha 2ª Guerra Mundial", nia afirma, hafoin vizita Arkivu no Muzeu Rezisténsia Timoroan.

Fonte hosi P&O Cruises Australia esplika ba Lusa katak ema ladun uza parajen iha Díli – ne’ebé nia to’o besik 07:00 no iha ne’ebé sai besik tuku 10 hafoin ne’e - ba viajen, mós ladun uza, ne’ebé atualmente ró ne’e hala’o.

Maski iha baze normalmente iha Sydney, Pacific Jewell sai hosi Singapura iha loron 5 liu bá- ne’ebé sai hanesan alvu reparasaun no manutensaun - no atualmente iha viajen ne’ebé inklui parajen iha Indonézia (Semarang, Bali no Ilha Komodo), Timor-Leste no Papua Nova Guiné.

Ró, ne’ebé iha tripulasaun ema 730, no kuartu kuaze 840, karik sei to’o iha Brisbane, iha estadu australianu, Queensland, iha loron 21.

Dezeñu hosi italianu Renzo Piano no kapasidade ba pasajeiru 2.000 resin - hafoin reforma ne’ebé halo iha tinan hirak ikus ne’e -, ró ho tonelada rihun 70, konvés 11 no komprimentu ho metru 245.

Bordu iha spa bo’ot liu hosi frota P&O hotu, parke aventura ida, restaurante neen, bar ualu, diskoteka ida, pisina rua, biblioteka, kazinu no loja, no sira seluk tan.

Agora lori souvenirs hosi Timor-Leste, ne’ebé sosas hosi turista barak ne’ebé almosu iha Areia Branca, tasi-ibun ne’ebé famozu liu iha Díli, fatin ne’ebé instala merkadu pontuál hodi faan produtu lokál.

SAPO TL ho Lusa

GOVERNU APROVA ONA REGRA PLANEAMENTU EZEKUSAUN OJE

Governu liu husi Konsellu Ministru (KM), aprova ona dekreitu lei planeiamentu ezekusaun Orsamentu Jeral Estadu (OJE) hodi regula no hametin modalidades planeamentu ho ezekusaun.

“Konsellu Ministru halo aprovasaun altas kona-ba dekreitu lei planeiamentu orsamentasaun no nutrisaun avaliasaun, ne’ebé aprezenta husi Primeiru Ministru no Ministru Finansas. Dekreitu lei ne’e atu bele regula no hametin diak liutan ita nia modalidades planeamentu ho ezekusaun,” informa Sekertariu Estadu Konsellu Ministru, Avelino Coelho ba jornalista iha Palacio Governu, Kinta (11/6).

Nia haktuir, dekreitu lei orsamentasaun ne’e, koalia kona-ba oinsa mak atu halo planeiamentu, oinsa halo orsamentusaun no oinsa atu halo monitorizasaun i avaliasaun. Coelho dehan, mekanismu ida ne’e atu haree kona-ba, preparasaun orsamentu atu ba diskusaun no aprovasaun no monitorizasaun, wainhira orsamentu ne’e aprovadu ona.

Nia reafirma, enkontru konsellu ministru ne’e, deskuti kona-ba ajenda lubuk ida, li-liu kona-ba buat balu ne’ebé lahetan aprovasaun iha semana hira liu ba. Avelino Coelho haktuir, enkontru konsellu ministru mós akordu entre Timor Leste ho Uniaun Europeia, kona-ba ezensaun de vistus. Coelho esplika, ezensaun de vistus ne’e Uniaun Europeia fó loron 90 atu ema husi Estadus membrus Uniaun Europeia bele ai Timor Leste ho ezensaun de vistu ka la uza vistu, no Timor-oan sira ne’ebé hakarak ba nasaun membrus Uniaun Europeia mós la uza vistu.

Maibé Avelino Coelho dehan, ezensaun de vistu ne’e, la’os atu ba halo servisu ka eskola maibé hanesan turista ka pasiar durante loron 90.

“Ida ne’e aprezenta husi Ministru Negosiu Estranjeiru, maibé buat ne’e tanba akordu entre Estadus, entaun sei lori ba Parlamentu Nasional para ratifika,”katak Coelho.

Nia esklarese, iha sorumutu ne’e mós, Governu aprova ona dekreitu lei organika Ministériu Negosiu Estranjeiru nian.

“Proposta lei prosediamentu prosesaun indultus nian adiadu, se deskuti fali iha semana oin, nomós politika nasional kestaun de riskus nia mós adiadu,”tenik nia.

Proposta lei hirak ne’e, Coelho seidauk bele esplika ninia konteudu, tanba seidauk hetan aprovasaun husi Governu.cos

Jornal Nacional

PROJETU EDIFISIU CNE FINALIZA ONA – KFP SEI IHA PROBLEMA

Mega projetu konstrusaun Edefisiu foun Comisaun Nasional ba Eleisoens (CNE) ne’ebe ejekuta husi kompanhia ATRAMOR Sucsesso, finaliza ona no hein deit tempu atu inagura hodi entrega ba CNE.

Lia hirak ne’e hato’o husi Ministru Obras Publiku Transporte no Comunicações (MOPTC), Gastão de Sousa, hodi responde jornaslista hafoin hasoru malu ho Prezidenti Republika (PR), Taur Matan Ruak iha Palacio Presidente, Kinta (11/6/2015).

“Hau hakarak dehan katak kona ba edefisiu CNE nian hein atu inagurasaun deit. ita presiza tan maka sasan balun hanesna meja ho kadeira. Se sasan sira ne’e iha hotu ona, ita bele inagura ona,” hateten Gastão de Sousa.

Antes ne’e, Prezidenti CNE, Jose Belo, fo sasin katak, Edefisiu CNE nia kualidade diak tebes no hetan apresiasaun boot husi ema bar-barak.

“Ami haree rezultadu ohin loron kualidade tebes no ema barak mak apresia ho projetu konstrusaun uma demokrasia CNE nian ne’e. atu dehan deit katak, kompanhia ATRAMOR Sucsseso, nudar empreza Timor oan ofrese duni kaulidade servisu ida diak ba nia povu no nia nasaun liu husi obra edefisiu CNE nian ne’e,” afirma Jose Belo.

Jose Belo friza katak, projetu Edefisiu CNE ne’e tuir duni nia BoQ ho dezenhu, maske iha servisu balun ne’ebe mak ATRAMOR halo la tama iha BoQ, hanesan teraliz, moru no bee mos, tanba ne’e mak tenke iha adisional.

Durante ne’e ne’e publiku kontesta maka’as progresu konstrusaun edefisiu boot tolu iha Dili, ne’ebe mak ejekuta husi empreza Timor oan no atraza tebes.

Edefisiu tolu ne’e mak kompostu husi Edefisiu CNE ne’ebe ejekuta husi ATRAMOR Sucsesso, Edefisiu Ministeriu Justisa halo husi kompanha G&S Construction ho Edefisiu Komisaun Funsaun Publiku (KFP) ne’ebe mak ejekuta husi empreza TLIK.

Projetu Edefisiu Ministeriu Justisa (MJ) ejekuta husi kompanhia G&S Construction ho nia orsamentu US$ 4.3000,000. Projetu ne’e nia luan mais au menus 4.000 meteru kuadradu, ho nia orsamentu US$ 1070/metru.

Projetu Edefisiu Komisaun Funsaun Publiku (KFP) nian ne’ebe ejekuta husi komanhia TLIK nudar mos empreza Timor oan nian ho nia orsamentu US$ 3.600.000 ho nia luan mais au menus 2600 metrus kuadradus, ne’ebe nia folin US$ 1.300,00/metru kuadradu.

Edefisiu CNE ne’ebe mak ATRAMOR Sucsesso kaer nia orsamentu US$ 3.100.000 ho nia luan 580 meter kuadradu, ne’ebe kada metru nia orsamentu US$ 6.10,00.

Husi sorin seluk, Gastão de Sousa klairifka katak, nia parte sei bolu hiks empreza TLIK ne’ebe maka ejekuta projetu Komisaun Funsaun Publiku (KFP) atu haree didiak fali problema ne’ebe prezodika projetu ne’e la’o atrazadu.

“Kona ba edefisiu KFP ne’e sei iha kestaun ida ne’ebe ami sei rezolve internalmente, ne’e kestaun teknika,” hateten Gastão Sousa. mia

Jornal Nacional

REZULTADU TESTE DNA IHA INDIA-INDONESIA, LIDERANSA MSS DUN MALU

Kuaze tinan ida resin Governu haruka ruin saudozu sanulu resin rua (12) ba iha India no Indoensia hodi halo teste Deoxyribonucleic Acid (DNA) to’o agora laiha rezultadu.

Husi ruin saudozu 12 ne’e, hitu (7) ba Indonesia no lima (5) ba India ne’ebe mos nudar membru Comite Central FRETILIN.

Relasiona ho prosesu ne’e, bainhira JN-Diário konfirma Prezidenti Komisaun Homenajen, Virgilio Smith hatete, asuntu teste DNA ba saudozu nain 12 iha India no Indoensia ne’e laos nia kompetensia, maibe kompetensia diretur Laletek nian.

“Ita bo’ot sira ba hasoru Sr. Laletek tanba hau laiha kompetensia kona ba ida ne’e,”dehan Virgilio iha nia servisu fatin Kinta (11/6).

Ho nune’e Diario hakat ba Diretur Laletek nia fatin, maibe odamatan xavi metin maske oras servisu foin mak tuku 10:00 dader.

Liu husi via telefone Diretur Laletek hatete, nia parte labele koalia tanba nudar diretur bai-bain no ema ne’ebe kompetensia atu kolia mak Ministra Solidaridade Sosial, Isabel Guterres.

“Rejjultadu teste DNA husi India no Indoensia ne’e to’o tiha ona, maibe rejultadu ne’e los ou lalos, so Ministra mak bele koalia tanba se ami mak koalia dala ruma familia husi saudozo sira ne’e ladun fiar tanba ne’e hein Ministra mak kolia,” dehan Laletek.

Tantu Vice Ministru Miguel Manitelo hatete, nia ladun apar ho asuntu refere.

“Diak liu ita bo’ot sira ba hasoru Prezidenti Komisaun Homenajen tanba hau la apar ho prosesu ne’e, normalmente teste DNA ne’e hala’o husi Komisaun Homenajem, kuandu rejultadu iha ona mak sira lori mai aprezenta, tanba ne’e hau labele koalia,”tenik Manitelo.

Antes ne’e iha fulan Janeiro tinan 2015 liu ba Ministra Solidaridade Sosial, Isabel Guterres informa ba media katak, rejultadu teste DNA ba saudozo hirak ne’e to’o ona iha MSS no hein deit MSS hala’o konferensia da imprensa, maibe to’o agora seidauk iha konferensia da emprensa husi MSS rasik.

“Rezultadu teste DNA saudozu sira nian to’o tiha ona, maibe sidauk entgrega ba familia tanba molok atu intrega ba familia MSS tenki hala’o uluk lai konferensia da imprensa. Ita bo’ot sira hein deit depois ami konvida ita bo’ot sira hodi mai partisipa iha konferensia da imprensa ne’e,”dehan Ministra Isabel.Ola

Jornal Nacional

Enkontru Parseiru Dezenvolvimentu, TLDPM tenke dezenvolve estratejia ekonomiku

DILI - Enkontru Parseiru Dezenvolvimentu Timor Leste (TLDPM) ne’ebé foin loke iha sabadu (06/06) iha Sentru Konvensaun Dili laiha partisipasaun husi ministeriu kompetente. Fatin sorumutu ho parseiru sira husi nasaun amigo parseiru tasibalu ne’e, kadeira barak mak mamuk. TLDPM ne’e hetan atensaun seriu liu husi sosiedade sivil, tanba tuir sira nia observasaun forum TLDPM ne’e tinan-tinan hala’o maibe la hatudu rezultadu ne’ebé klaru ba povu Timor-Leste.

Liu husi Forum ONG Timor Leste, sosiedade sivil husu ba Governu TL no parseiru dezenvolvimentu  atu bele dezenvolve Estratéjia Ekonómiku ida ba Timor-Leste  atu nune’e bele hadia kualidade moris povu Timor Leste nian. “Ho oportunidade ida ne’e, ami hakarak foka sai ami nia rekomendasaun atu bele dezenvolve estratéjia ekonómiku ida ba Timor-Leste, ne’ebé ho maka’as ami husu ba Parseiru Dezenvolvimentu, hamutuk ho Governu Timor-Leste, atu suporta hodi bele hadi’ak kualidade moris ba povu Timor-Leste tomak, ohin no aban-bainrua nian,” dehan Reprezentante Sosiadade Sivil Ines Martins hato’o lia hirak ne’e iha enkontru parseiru dezenvolvimentu Timor Leste ne’ebe halao iha Centru Convensaun Dili (CDD) Sabadu (06/06) semana ne’e.

Nia dehan sosiedade sivíl sira iha Timor-Leste, FONGTIL apresia ba esforsu hosi Parseiru Dezenvolvimentu sira ne’ebé kontinua fó suporta ba nasaun ida ne’e, no sosiadade sivil espera katak tulun sira ne’e bele ajuda duni povu Timor-Leste. Durante ne’e tuir nia katak Parseiru Dezenvolvimentu barak mak konkorda ho sosiadade sivil nia observasaun no rekomendasaun sira katak dalan dezenvolvimentu ohin loron nian ne’e la sustentável. Infelizmente, normálmente rona ida ne’e iha konversa privadu ka lee iha  parseiru no Governu sira nia dokumentu internal nian, duke rona ka hare iha  Parseiru ho Governu sira nia deklarasaun iha públiku. 

“Ami enkoraja ita-boot sira atu lalika subar realidade moris ne’ebé ita-boot sira hare no hatene kona-ba diresaun polítika Timor-Leste nian, maibé sai nakloke no barani liu tan, hodi nune’e bele ajuda ami nia na’i-ulun sira atu bele responde ba ami nia preokupasaun no rekomendasaun sira. Timor-Leste enfrenta dezafiu barak atu bele hasees-an hosi dependensia ba esportasaun petróleu ne’ebé limitadu tebes, no ami presiza tulun hotu atu enfrenta dezafiu ida ne’e,”  katak nia .

Nia afirma katak Banku Mundial no Ministériu Finansas nia relatóriu konjunta kona ba Public Expenditure Review: Infrastructure ne’ebé publika iha fulan Marsu liuba, esplika katak Moras Olanda hamenus kresimentu ekonomia ba tempu naruk nian  maioria kona-ba kresimentu ekonomia ne’ebé hetan bele esplika hodi hasa’e despeza no investimentu Governu nian. Ho investimentu setór privadu nian ne’ebé la’o neineik tanba kresimentu iha setór sira ne’ebé la direitamente depende ba despeza governu nian maibé depende ba dezenvolvimentu infrastrutura sira ne’ebé eziste ona atu halo produsaun sei nafatin ki’ik. Dezde 2007, setór agrikultura nia produsaun totál tun ona. 

Maski relatóriu ida ne’e la ko’alia direitamente ka espesífiku hanesan esbosu anterior sira, sosiadade sivil hare katak hanoin ida ne’e hanesan mós ho preokupasaun sira ne’ebé organizasaun sosiedade sivíl sira foti dezde tinan hirak liu ba. Bainhira Timor-Leste failla atu dezenvolve nia ekonomia lokál ida ne’ebé bele prodús sasán sira ne’ebé bele kompete ho sasán importasaun nian, no mós fakar povu nia osan barak hodi investe ba projetu sira ne’ebé folin karun, kualidade fraku, no hare ba sei la fornese retornu ne’ebé signifikante.

Buat sira ne’e akontese tanba Timor-Leste prefere liu atu sadere nia moris ba rendimentu rentista  hosi mina-rai no gas, evita nesesidade atu hetan rendimentu alternativu ka la kuidadu hodi jere povu nia osan ho kuidadu. Impaktu ida ne’ebé boot liu hosi malisan rekursu  ida ne’e sei kona Timor-Leste maizumenus 2026, tinan lima hafoin kampu mina-rai Bayu-Undan, ne’ebé nia produsaun másimu nian iha 2012 ne’e sai maran tiha. “Sosiadade sivil komprende katak dala barak Governu lakohi atu hare ita-boot sira nia relatóriu sira ne’ebé foka sai duvida ka sujere mudansa ba iha sira nia desizaun, maibé ida ne’e la signifika katak ita boot sira atu labele hateten loloos no halo sensura ba realidade ne’ebé Timor-Leste enfrenta hela,” kestiona nia.

Tan ne’e sira  enkoraja Governu atu publika dokumentu sira ho pontualidade, loos no kompletu, Maski sosiadade sivil kontente katak Transparency Portal foin lalais ne’e hahú fali, maibé  ONG triste katak Governu prevene atu publika IMF nia relatóriu Article IV tinan kotuk, no mós Konta Nasional hosi 2013 seidauk publika no Governu hasai kategoria ‘time comparisons’ hosi Labor Force Survey. “Ami espera katak relatóriu sensu no Living Standards Survey sei publika ho lalais, kompletu no loos, atu fornese evidénsia hodi ajuda Governu atu bele halo polítika ida ne’ebé matenek no foo rezultadu di’ak,” katak nia.

Rendimentu mina no gas tun

Iha biban ne’e mos sira hateten katak Povu Timor-Leste moris iha nasaun ida, entre nasaun sira seluk ne’ebé depende maka’as ba esportasaun petróleu iha mundu. Iha 2014, 73% reseita estadu nian ne’e mai hosi fan petróleu no gas, no 20% seluk mai hosi retornu investimentu Fundu petrolíferu nian. Infelizmente Timor-Leste pasa ona nia rendimentu no produsaun másimu iha 2012. Durante 2014, Timor-Leste nia rendimentu hosi petróleu menus 40% kompara ho rendimentu ne’ebé TL hetan iha 2013, tanba rezerva petróleu no gas hosi kampu Bayu-Undan no Kitan hahú mihis ona no tanba presu mina-rai ne’ebé tun.

To’ ohin loron, liu 74% hosi rezerva kampu rua ne’e TL supa hotu ona, tanba tuir   Gráfika sira hatudu produsaun no reseita ida ne’ebé tun maka’as dezde 2012, no liña pontilhada verde hosi 2015 hatudu sai projeksaun reseita nian ne’ebé fahe hosi Ministériu Finansas iha sira nia workshop ba Jornadas Orcamentais iha semana rua liubá. Nia mos afirma tan katak daudauk ne’e, Governu halo esforsu ida ne’ebé maka’as atu harii infrastrutura petróleu nian iha kosta súl Timor-Leste nian ho esperansa katak indústria petróleu iha rai maran Timor-Leste nian ne’e bele sei estimula dezenvolvimentu kampu servisu no ekonomia nian.

Kada tinan, Orsamentu Jerál Estadu nian tinan-tinan aloka ona osan tokon barak ba projetu ida ne’e, no mós sei foti rai produtivu komunidade nian ba agrikultura nian. Maski nune’e, atu kompleta komponente sira hosi projetu ambisiozu ida ne’e, ita sei presiza investimentu osan billaun barak tan, no hare ba nia benefísiu la justifika nia kustu, risku no impaktu sosiu-ambiental nian. Timor-Leste dezeñu projetu Tasi Mane ida ne’e bazeia ba espetasaun katak petróleu no gas natural hosi kampu Greater Sunrise nian ne’ebé nia prosesamentu sei halo iha rai maran Timor-Leste nian.

Infelizmente, kompañia ho Governu Timor-Leste seidauk iha konkordansa oinsá atu dezenvolve kampu ne’e, no Australia lakohi atu diskute fronteira maritime ida ne’ebé permanente, nune’e kampu ne’e la hahú produsaun molok Fundu Petróliferu maran ona. Timor-Leste labele sadere nia ami nia futuru ba posibilidade deskobrimentu foun ba kampu mina-rai seluk, no Greater Sunrise, maski depois disputa ne’e rezolve ona, ne’ebé sei la fornese reseita natoon atu finansia ita nia rai doben ida ne’e, ne’ebé sei la’o hakat hela no dezenve hela. iha dékada ida oin mai, nasaun ida ne’e sei bele hasoru krize finansiál ida ne’ebé TL labele evita ona, sei la iha osan atu selu ba servisu báziku hanesan edukasaun, polísia, saúde, bee moos no estrada sira.

Ukun na’in sira, espesialmente sira ne’ebé servisu iha setór petróleu, fila-fila hateten katak kampu mina-rai rua ne’e sei la maran no hein hela atu hetan tan rezerva foun, maibé ita labele nega realidade ida ne’e ita hasoru hela. Timor-Leste iha ona urjénsia atu buka fontes servisu, ekonomia no rendimentu ida liu hosi husi dezenvolve setór ekonomia produtivu naun petróleu hanesan agrikultura, turizmu no indústria ki’ik. Nune’e, husi ohin ba oin, ita presiza duni mudansa ida ne'ebé radikál liu iha diresaun nasaun ne’e nian hodi prepara an atu ba hasoru tempu oin mai ne’ebé sei laiha rendimentu mina-rai.

Osan Mina-rai la to’o

Hosi 2003 to ohin loron, Timor-Leste konverte ona nia riku soin billaun $20 ne’ebé TL gasta ona billaun $6, no billaun ida tan sei gasta iha tinan 2015 nia rohan. Aleinde ne’e mós, TL hetan liu tokon $2.7 durante tinan sanulu hosi investimentu Fundu Petroleu iha ekidade no obligasaun internasional nian. Iha Marsu 2015 nia rohan, TL nia Fundu Petrolíferu nia saldu hamutuk billaun $16.82 kompara ho saldu billaun $16.58 iha Setembru 2014 nian ne’e aumentu de’it 1.4%, hodi hatudu ba TL katak ita labele ona atu depende ba investimentu Fundu Petrolíferu no reseita hosi kampu Bayu-Undan no Kitan nian.

Durante tinan hitu kotuk ne’e, Timor-Leste gasta ona billaun $6.6, ne’ebé billaun $5.7 ne’e finansia hosi Fundu Petróliferu. Maski eskalasaun orsamentu ne’ebé lalais hosi 2007-2012 la’o neineik, maibé despeza ne’ebé ezekuta durante 2014 sa’e 28% kompara ho tinan 2013, no despeza rekurrente nian sa’e 26%. Karik projetu sira ne’ebé dezeñu ona ka la’o hela daudauk ne’e implementa duni, orsamentu sei sa’e maka’as iha tinan sira oin mai, no ida ne’e sei sai at liu tan bainhira TL selu nia tusan. Karik gastu estadu ida ne’e nafatin la’o tuir lala’ok orsamentál nian ohin loron, Fundu petrolíferu sei automatikamente tun maka’as iha 2017, maski TL bele hetan kresimentu double digit ba rendimentu doméstiku anuál nian no Fundu ne’e sei hotu duni lalais tinan lima hafoin produsaun hosi Bayu-Undan remata iha 2020.

Maski ikus mai Greater Sunrise bele fó osan, provavelmente entre billaun $15-$20 durante tinan 20, maibé ida ne’e sei la natoon atu finansia Timor-Leste nia orsamentu estadu. Ita nia populasaun ne’ebé aumenta maka’as, ne’ebé sei presiza estadu atu gasta osan barak tan ba fornesimentu servisu sira ne’ebé ho kualidade di’ak. Aleinde ne’e, sei gasta osan barak tan mós atu funsiona no halo manutensaun ba infrastrutura fíziku sira ne’ebé TL harii ona. Iha fulan kotuk, Ministériu Finansas halo sira nia Jornadas Orçamentais atu deside envelope fiskál ba 2016 hamutuk ho billaun $1.3. Sosiadade Sivil apresia tebes ba pasu di’ak ida atu hamenus despeza estadu nian, maske ida ne’e sei difisil atu implementa lahó halo desizaun polítiku ida ne’ebé difisil mos. 

“Ami espera katak Parseiru Dezenvolvimentu sira bele ajuda Governu hodi hadi’ak liu tan jestaun finanseiru públiku nian atu nune’e, despeza estadu nian iha futuru bele efikás liu tan no mós tau valor ba despeza ne’ebé ita halo. Ami mós espera katak osan sira ne’ebé bele poupa tan liu hosi kansela tiha proposta projetu sira ne’ebé hafoin halo analiza ba kustu, benefísiu, risku no estudu viabilidade nian ne’ebé objetivu no kompletu, ne’ebé hetan katak laiha razaun ka la realistiku atu implementa, hodi nune’e bele aloka fali osan, rekursu umanus no espasu polítika ba programa ne’ebé fó rezultadu sira ne’ebé sustentável, ekitavel no realistiku mai ami nia populasaun,” dehan Ines. (BT)

Business Timor - Pedro

Investimentu setor produtivu, Prontu se governu kria kondisaun

DILI - Dada malu, enkoraja malu, dun fo sala ba malu entre parseiru dezenvolvimentu governu ho setor privadu kona-ba investimentu setor produtivu sei la’o nafatin. A Luta Continua! Iha parte ida governu enkoraja setor privadu atu diversifika sira nia bisnis husi dependensia ba projetu konstrusaun sivil hodi transforma ba investimentu setor produtivu ne’ebé sustentavel. Iha parte seluk setor privadu sira fo razaun katak sira seidauk bele halo investimentu tanba governu seidauk kria kondisaun ida diak atu fo apoiu setor privadu atu bele halo investimentu.

Kondisaun ida ne’ebé setor privadu ezije mak kestaun lei kona-ba rai ne’ebé ohin loron seidauk iha. Lei kona-ba rai ne’e importante no fo impaktu ba boot ba investimentu. Atu halo investimentu, setor privadu sira presiza kreditu osan iha banku. Banku sira lakohi fo kreditu ba setor privadu sira tanba kestaun lei rai nian seidauk iha para sai jaminan kreditu iha banku sira.

Diretora Jacinto Group Claricia Lay hateten durante ne’e setor privadu atu halo investimentu maibe iha lei balu sei fraku atu apoiu setor privadu halo investimentu liu-liu lei kona-ba rai no mos lei ba iha kreditu. “Governu tenke apoiu ami (ho) Lei konaba Rai  no mos apoiu rekomedasaun ba ami hodi bele hetan kreditu iha banku atu ami bele halo investimentu iha Timor-Leste. Wainhira Timor-Leste hetan indepedensia la’os emprezariu timoroan laiha sentimentu ba iha nasaun ida ne’e maibe ami iha sentimentu atu dezenvolve nasaun ida ne’e lao ba oin,” katak Claricia.

Tuir nia, durante ne’e sai problema boot ba emprezariu nasional atu halo investimentu iha Timor Leste mak problema laiha apoiu husi goveru rasik atu bele hakbiit setor privadu rai laran atu investe. Tan ne’e nia husu ba iha governu atu la kolia deit maibe importante tenke iha asaun ruma hodi bele hadia lei balu no mos bele apoiu mos setor privadu hodi bele halo investimentu. Iha fatin ketak Presidente Camara Comersio Industria Munisipiu Ermera  Luis Alves Tilman hatete kestaun hanesan. Setor privadu prontu atu investe iha area produktivu maibe  kestaun lei investimentu no mos lei rai. Iha Timor-Leste atu halo investimentu idea diak sei  problema  kona-ba rai. “Ami iha osan atu investe maibe governu rasik seidauk bele kria kondisaun diak ba ami setor privadu iha rai laran hanesan lei rai,” katak nia lia ida ho Claricia Lay. 

Tuir Luis, setor privadu atu halo investimentu tenke fokus ba iha modelu ne’ebe bele lori impaktu positivu ba iha Timor Leste nudar  nasaun ne’ebe soin kafe bele investe hodi bele limita kafe sira ne’ebe importa husi rai liur. Nia mos husu ba iha governu alende lei rai  kona mos ba iha setor siguransa hodi bele asegura seitor privadu iha rai laran hodi bele halo investimentu ne’ebe diak. Iha semana hirak liuba Primeiru Minsitru Rui Maria de Araujo, iha sorumutu meza redonda ho setor privadu sira husu atu diversifika sira nia negosiu ba setor produktivu iha Timor Leste.

Durante ne’e, tuir PM Rui, setor privadu seidauk hatudu kresimentu ida ne’ebe bele valoriza kresimentu ida ne’ebe bele eklibra preokupasaun governu nian durante tinan 13 nia laran TL hetan indepedensia. PM Rui enkoraja setor privadu sira atu akumula proveitu sira ne’ebé hetan husi projetu governu inklui konstrusaun sivil, depois hodi sira nia osan ne’e bele transforma an husi kontraktor ka empreteiru ne’ebé dependensia ba projetu governu sai fali emprendedor ka emprezariu loloos. Eis primeiru ministru, atual Ministru Planu Investimentu Estratejiku Kay Rala Xanana Gusmao hatete setor privadu sira balu laiha nasionalizmu bainhira kaer projetu konstrusaun. La hala’o projetu ho kualidade, buka manan proveitu barak liu.

Bainhira hetan proveitu ka lukru la’os hanoin rai osan hamutuk hodi haboot kompañia, balu goza osan ne’e hodi sosa kareta luxu folin karun no ba pasiar iha liur gasta osan ‘fakar’ hotu iha ema nia rai. Governu hakarak setor privadu nasional atu muda ona mentalidade tabele ba projetu governu hodi sai emprendedor (entrepreneur) iha setor produtivu hanesan area agrikultura, peska, no turismu. Iha parte seluk sei dilematiku ba setor privadu no mos governu rasik tanba kondisaun balu sei prejudika investimentu nasional.

Vise Presidente CCITL asuntu Infranstrutura, Joao Alves hatete  CCI-TL foin ezisti tinan 4 liuba halo esforsu tomak atu bele halo kordenasaun servisu bele orienta no eduka empreza sira atu bele ekilibra problema kona ba investimentu ninian. Importante governu rasik tenke kria kondisaun. Tuir nia, governu to’o oras ne’e seidauk kria kondisaun ba setor privadu atu bele halo investimentu.  Nia rekoñese iha setor kontrusaun sivil ne’e dependensia duni ba projetu governu,  ladun iha investimentu boot. Empreza sira organiza an ho kapasidade minimu, governu fo fiar ba empreza sira hala’o servisu. 

“Maibe se halai ba setor produtivu ita bele hatete katak kuandu empreza ida tama ona iha setor produktivu entaun nia tama ona iha tipu ida ne’ebe ho vida naruk tebe-tebes,” nia hatete. Iha obrigasaun CCI atu fo asistensia, fo apoiu  ba nia jestaun tenke komesa organiza an atu bele hamutuk ho setor privadu sira seluk nian atu bele nune’e iha sustentabilidade ba iha ninia negosiu. Joao Alves ba BT iha edifisiu CCI-TL, tersa Feira(02/06), hatete razaun ne’ebe setor privadu seidauk prontu atu halo investimentu ba iha produktividade, primeiru seidauk organiza an didiak, segundu laiha kapital no apoi ida liu-liu husi sitema kreditu.

Kreditu ne’e tenke ho jurus kompetetivu hodi bele asegura investimentu tanba setor privadu barak se karik hakarak atu halo investimentu  tenke asesu ba iha kreditu. Se asesu ba iha kreditu setor privadu  tenke iha jestaun  ne’ebe diak, bele fo fila fali kapital ne’ebe empresta. Hodi nune’e empreza bele moris tuir investimentu ne’ebe seitor privadu hakarak maibe durante ne’e laiha. “Iha intensaun banku balu hanoin atu fo kreditu maibe jurus ne’e la konsege bele taka fila fali gastu ne’ebe mak iha,  tan ne’e setor privadu sente katak  la sustentavel  tanba ne’e to’o oras ne’e setor privadu hare deit ba iha projetu governu,” João fo razaun.

Nia mos prekupa katak durante ne’e   projetu barak maibe projetu sira ne’e laos monu deit mai iha timoroan sira tanba projetu balu ho volume ki’ik mos monu ba emprezariu estranjeiru  hodi halo setor privadu nasional susar atu bele halo investimentu tanba failansu husi governu rasik. “Entaun oportunidade husi projetu sira ne’ebe setor privadu sira kaer ho sira nia profit ne’ebe hetan susar uituan para sira bele investe fila fali iha area sira seluk. Seidauk iha programa ida klaru didiak no seidauk eduka setor privadu atu halo nusa bele orienta fila fali nia negosiu iha parte kontruksaun sivil hodi halai fali ba iha setor produktivu ninian,” katak João.

Tuir nia katak  setor produtivu ne’e hanesan investimentu ida se governu organiza  didiak setor ne’e bele sustentavel. Kuandu setor ne’e sustentavel kria kampu traballu bele barak.  Nune’e iha tinan 10 ka 20 mai governu laiha depedensia loos deit ba iha rendimentu mai husi minarai no gas. Setor privadu hanesan parseiru governu ninian ho ninia kapasidade finanseira ho kapital ne’ebe iha bele halo nasaun ne’e sai sustentavel no bele dezenvolve lao ba oin.

Relasiona Xanana nia deklarasaun ne’ebe monta polisia nota hetan emprezariu balu iha kareta la halo investimentu, João Alves rekoñese maibe la’os hotu-hotu. Tuir nia katak iha filosofia ida katak kuandu riku laos hatudu kareta barak, iha sapatu barak, ne’e laos hatudu riku maibe hatudu gastu. “Hau rekoñese katak atu halo negosiu lao ba oin tenke iha disiplina tebe-tebes ba asset ne’ebe iha no asset neebe mak iha tenke produs fila fali osan. Se aset ne’ebe iha atu gasta deit osan entaun nen kualker  empreza ida iha nasaun ne’ebe deit la augenta ho modelidade ka sistema ida hanesan ne’e,” katak nia.

Nia dehan Xanana nia liafuan nudar dalan ida hodi hafanu setor privadu timoroan atu oinsa bele halo investimentu iha Timor Leste. Tuir la’os hotu-hotu ba liur ne’e atu gasta deit osan. Sira balu sai ba iha rai liur hodi buka parseiru, tuir enkontru no mos balu ba pasa ferias. “Timoroan ne’ebe que balun ba Jakarta, balun ba Surabaya no balun ba pasiar maibe barak ba atu bele buka sira nia parseria, barak mos ba halo kompras ba interese ida-idak ninian, balun hola sasan husi liur para halo nia uma, barak ba direitamente ba hare halo nusa se nia hakarak loke loja ruma sasan sira ne’e halo nusa hodi buka sira nia esperensia maibe mos barak mak ba pasiar para gasta osan,” katak nia.

Kona ba sistema management seitor privadu oras ne’e dadaun tuir nia aktak seitor privadu  barak   foin target los deit profit  husi  projektu ida  hodi hetan 10% no sidauk iha sistema ne’ebe mak diak hodi halo poupansa ba iha osan. “Ita halo poupansa la signifika katak ita karakten maibe halo poupansa ne’e atu bele hatene osan ne ebe sai ho objetivu no balun neebe mak hanesan Xanana kolia katak balun rai osan iha banku ne’e lakohi book maibe tanba emprezariu sidauk hare oportunidade diak saida mak hakarak halo, nia sidauk hare oportunidade diak sekarik nia hasai osan ne’e fo fila fali profit seluk ba nia iha ka laiha”, katak nia.

Nia informa katak oras ne’e setor privadu balu prontu ona atu halo investimentu maibe importante mak politika ne’ebe governu tenke halo siples liu hanesan povu kuda governu sosa, governu labele sosa tau iha armagen dodok tan ne’e tenke muda povu kuda governu faan ou governu tenke buka politika hotu hotu atu hare sekarik TL hakarak atu halo esportasaun kona ba produtu ruma. Tan ne’e nia husu governu tenke kria kondisaun antes hodi bele seitor privadu atu halo investimentu bele lao ba oin labele obriga seitor privadu rasik mak tenke kria kondisaun rasik hanesan esporta ba iha rai seluk governu mak tenke kria kordenasaun ho governu sira  husi nasaun ne’ebe mak hakarak atu TL halo  esportasaun.

To’o agora hau hare dadauk ne’e governu kria intensivos, kria kondisoens hodi nune’e seitor privadu produs barak liu tan tanba produsaun sira ne’e importante, sidauk kolia kona ba iha kualidade, agora ne’e kolia kona ba halo nusa seitor privadu bele sai produktivu kuandu seitor privadu hare ona katak merkadu ida ne;e diak entaun kolia kona ba kualidade produsaun ida ne’e importante, Politika ida ne’e importante no agora sidauk iha organizasaun diak ida iha parte agrikultura tereinu atu bele organiza agricultures sira dehan hodi transforma agrikultura tradisional ba iha sistema hidrolik (sistema mekanika) hodi labele iha depedensia nafatin husi rai liur,” dehan nia.

Iha biban ne’e mos Diretora Nemia Conntration Carminda Carlota hateten katak Seitor privadu pronto atu halo investimentu maibe durante ne’e governu rasik mak oho seitor privadu ho rajaun prosesu pagamentu rasik durante tinan barak nia laran sidauk halo pagamentu. Tan ne’e seitor privadu susar atu bele halo investimentu iha rai laran tanba bainhira atu halo investimentu tenke iha finanseiru hodi bele apoiu seitor privadu sir abele halo investimentu.

“hau hau hanoin ami seitor privadu investe ami la tauk so problema mak governu rasik selu deit osan ne’ebe durante ne’e ami halo projektu susar tebes no oinsa mak bele hakbit seitor privadu rai laran hodi bele halo investimentu”, prekupa nia. Tan ne’e nia husu ba iha governu tenke servisu hamutuk ho seitor privadu rai laran hodi bele halo investimentu iha seitor produktividade hodi bele kria kampu servisu ba iha dezempregu nomos bele hamenus importasaun mai iha rai laran,” katak nia . (BT)

Business Timor - Pedro

Lee mos:

Enkontru Parseiru Dezenvolvimentu, TLDPM tenke  dezenvolve estratejia ekonomiku

TP promove produtu tais liu hosi fashion

SEPFOPE entrega makina tijolu ba grupu juventude Aileu

GKFM sai vensedor premiu nutrisaun tinan 2015

MCIA Selebra loron 20 de Maiu ho Populasaun Ermera