“Nada é mais perigoso do que a
influência dos interesses privados
nos negócios públicos…”
(Jean-Jacques Rousseau)
Povu Timor-Leste presiza louva Ita-nia aman nasaun nian Presidente da República
Democrática de Timor-Leste ne’ebé maka foti desizaun eleisaun antesipada ho
brani tebes no halo tuir de’it ita-nia Konstituisaun haruka iha artigu 86
alínea F. Signifika katak Presidente da Republica foti desizaun disolve
Parlamentu Nasionál tanba iha krize institusionál ne’ebé la permite aprovasaun
Orsamentu Jerál Estadu ne’ebé Sétimu Governu Konstitusionál lori ba
aprezenta ba Parlamentu Nasionál hafoin rona tiha partidu polítiku sira-ne’ebé
iha asentu parlamentár no rona tiha Konsellu Estadu no Presidente Repúblika
disolve Parlamentu Nasionál liutiha fulan neen nia laran tuir artigu 100 númeru
1.
Rekizitu sira iha leten ne’e maka
Prezidente Repúblika halo tuir lori foti desizaun disolve Parlamentu Nasionál.
Se lae, Prezidente Repúblika la bele disolve Parlamentu Nasionál tanba bele iha
inezisténsia jurídika ba atu ne’e. Prezidente Repúblika iha independénsia
no liberdade tomak lori halo apresiasaun se iha duni krize institusionál ka lae
atu bele asegura normál funsionamentu ba instituisaun demokrátika. Tanba
Prezidente Repúblika, tuir artigu 74 númeru 1, maka garante regulár
funsionamentu ba instituisaun demokrátika. Tanba ne’e maka Prezidente Repúblika
bele disolve Parlamentu Nasionál “ quando se mostre necessário para assegurar o
normal funcionamento das instituições democráticas…”.
Ita bele iha interpretasaun oioin
ba atu Prezidente Repúblika nian ida-ne’e. Bele iha pro no bele iha kontra
nu’udar ita moris iha Estadu Direitu Demokrátiku. Ita hotu-hotu iha liberdade
no direitu lori halo interpretasaun. Iha situasaun sira hanesan ne’e balu sei
pro ba Prezidente Repúblika tanba ho hanoin katak koligasaun Fretilin-PD la
bele ona mantein Sétimu Governu Konstitusionál entaun dalan di’ak liu maka
eleisaun antesipada. Tanba lakohi atu fó hikas ba aliansa maioria parlamentár
atu ukun tanba la tuir Konstituisaun haruka. Balu fali bele kontra lori dehan
katak tuir loloos Prezidente Repúblika fó ukun ba aliansa maioria parlamentár
tanba bele iha garantia ba estabilidade governativa.
Hosi ha’u-nia perspetiva ho
hanoin nafatin katak dalan ne’ebé Prezidente Repúblika foti atu ba eleisaun
antesipada hanesan dalan ne’ebé di’ak tebes atu lori defende demokrasia no
Estadu Direitu Demokrátiku hanesan ha’u hakerek tiha ona iha artigu sira
uluk-uluk. Nu’udar akadémiku simples oan ida ha’u haksolok Prezidente Repúblika
moos temi katak ba eleisaun antesipada atu lori defende demokrasia no Estadu
Direitu Demokrátiku. Katak, parte ida, hanesan ita hotu konkorda katak podér
ukun ne’e iha povu nia liman bainhira polítiku-na’in sira la simu malu oinsá
forma governu ho idak-idak nia interese no hanoin entaun dalan di’ak liu maka
fó hikas ba povu maka deside iha eleisaun antesipada (ita lori haree took se
maka iha razaun nia maka sei hetan votu barak liu hanesan julgamentu ida hosi
povu) ne’e lori restaura ou hadi’ak hikas naksalak sira iha tempu uluk (hamonu
governu ou troka Primeiru-Ministru la tuir Konstituisaun) no hatuur supremasia
lei iha interese hotu-hotu nia leten lori la’o tuir de’it Konstituisaun haruka
no iha parte seluk buat ne’ebé maka Prezidente Repúblika deside ba eleisaun
antesipada lori kria hikas prátika konstitusionál ida-ne’ebé bele sai
presedente di’ak ba futuru República Democrática de Timor-Leste nia moris tomak
atu oinsá hatuur estadu ida-ne’e iha supremasia lei nia leten hanesan refleksu
hosi Estadu Direitu Demokrátiku ho kariz kultura jurídika-polítika osidentál
nian no Estadu liberál Osidente nian hanesan iha Inglaterra sira bazeia ba rule
of law, iha Fransa sira bazeia ba Estado de legalidade (État légal), iha
Alemanha sira bazeia ba Estado de Direito (Rechtsstaat). Hanesan Gomes
Canotilho dehan Estado de Direito Democrático nu’udar” uma ordem de domínio
legitimada pelo povo. A articulação do «direito» e do «poder» no Estado
constitucional significa, assim, que o poder do Estado deve organizar-se e
exercer-se em termos democráticos”.
Ita bele dehan katak regra jogu
demokrátiku iha ukun estadu modernu maka tuir de'it Konstituisaun haruka.
Polítiku-na'in sira buka rezolve problema hotu-hotu inklui formasaun governu
nian tenke tuir de'it dalan Konstituisaun nian hanesan ita hotu hanaran
Konstituisaun nu’udar lei inan ou nu’udar grundnorm hanesan liafuan hosi Kelsen.
Ne’e katak desizaun hotu-hotu no lala'ok hotu-hotu hosi ukun na’in sira la tuir
Konstituisaun ne’e ilegál no la bele iha efeitu jurídiku no moos la iha
vinkulasaun jurídika.
Iha kontestu formasaun governu
nian bainhira dalan la iha ona maka dalan di’ak liu maka eleisaun antesipada
atu evita moos abuso do poder hosi polítiku na’in sira ou hosi Maun-Boot
sira-nia hakarak ne’ebé ha’u hanaran demokrasia maun-Boot iha-ne’ebé dalaruma
la la’o tuir espíritu demokrasia no estadu direitu ne’ebé hatuur tuir de’it lei
nia ukun hanesan Gomes Canotilho dehan katak “Estado de Direito cumpria e
cumpre bem as exigências que o constitucionalismo salientou relativamente à
limitação do poder político”. Se Maun-Boot sira hotu deside buat hotu tuir
de’it sira-nia hakarak bele enfrakese Estado de Direito Democrático no bele sai
perigu ba futuru República Democrática de Timor-Leste monu ba situasaun kaos
nia laran. Iha tendénsia ema hotu-hotu bele la respeita lei no lei lakon ninia
autoridade tanba se lei lakon ninia autoridade ha’u bele dehan katak lei ne’e
hanesan de’it poezia furak ida lori haksolok de’it sidadaun sira. Lei iha
autoridade bainhira aplica como deve ser. Dura lex sad lex iha espíritu justisa
nia laran.
Ho nune’e nu’udar akadémiku
simples oan ida ha’u louva tebes Sua Exelénsia Prezidente Repúblika bainhira
foti desizaun lori hakotu polémika formasaun Sétimu Governu Konstitusionál
liuhosi dalan eleisaun antesipada. Katak desizaun Prezidente Repúblika nian
ne’e maka desizaun ne’ebé justu liu ona tuir Konstituisaun nia ukun.
Karik ita bele laran susar uitoan eleisaun antesipada hatudu katak polítiku
na’in sira no liu-liu Maun-Boot sira ne’ebé sira-nia partidu iha asentu
parlamentár la bele koopera ba malu iha parte ida no iha parte seluk maka
Koligasaun Fretilin ho PD la bele halo mudansa signifikativa ruma lori konvense
no hetan apoiu hosi partidu CNRT, PLP no Khunto nian. Ha'u tenke repete lori
dehan tan iha-ne’e katak desizaun la hatama partidu Khunto ba formasaun Sétimu
Governu Konstitusionál hanesan desizaun ne’ebé ladún sábia. Ita hein
durante kampaña polítika partidu koligasaun ba formasaun Sétimu Governu
Konstitusionál ho ho partidu sira iha aliansa maioria parlamentár sei buka
justifika sira-nia an ba povu sira. Sira idak-idak sei buka defende an no lori
fó ba sala ba seluk. No depois povu maka sei julga. Ne’e maka hanaran
demokrasia.
Ha’u hanoin koligasaun Fretilin
ho PD tenke buka oinsá bele konvense povu sira liuhosi esplika klaru ba povu
sira saída maka durante ne’e koligasaun Fretilin ho PD halo. Ho nune’e bele
manan votu ne’ebé sufisiente atu lori bele iha esperansa nafatin kaer ukun iha
Oitavu Governu Konstitusionál. Ha’u nafatin fiar katak Fretilin nia votu sei
sa’e no sei bele aumenta kadeira balu tan iha Parlamentu Nasionál. Iha parte
seluk Prezidente Repúblika tenke konxiente ona katak bainhira iha eleisaun
antesipada ne’e karik koligasaun Fretilin ho PD la manan votu sufisiente lori
asegura estabilidade governativa maka dalan di’ak liu maka fó ona oportunidade
koligasaun maioria parlamentár maka forma governu atu nune’e evita Timor-Leste
la monu ba situasaun hanesan akontese daudaun ne’e. Ha’u sempre fiar katak iha
eleisaun antesipada Fretilin maka sei sai nafatin nu’udar partidu mais votadu.
Ha'u espera katak bainhira
Fretilin sai nu’udar partidu mais votadu, Sua Exelénsia Dr. Marie Alkatiri bele
hatene, liuhosi esperiénsia iha formasaun Sétimu Governu Konstitusionál nian,
atu iha matenek liután oinsá bele halibur partidu sira no buka akomoda interese
hosi partidu sira-ne’ebé maka iha asentu parlamentár, se Sua Exelénsia Dr.
Marie Alkatiri hakarak nafatin sai nu’udar Primeiru-Ministru iha oitavu Governu
Konstitusionál. Sua Exelénsia Primeiru-Ministru tenke hatene ona lider partidu
polítiku se maka nia bele konfia no lider partidu polítiku se maka lae. Ha'u
apenas sujere no fó-hanoin hikas de’it katak aprosimasaun ne’ebé maka di’ak liu
maka ho Partidu Khunto atu nune’e Sua Exelénsia Dr. Marie Alkatiri bele metin
iha ukun Oitavu Governu Konstitusionál. Tanbasá Partidu Khunto? Tanba
partidu Khunto sempre hatudu disponibilidade atu kolabora ho Fretilin iha ukun
governu nian. Se Fretilin maka la hatene uza oportunidade lori akomoda partidu
Khunto entaun ida-ne’e Fretilin rasik maka kria konfuzaun ba ninia ukun iha
governasaun. Hanesan ha’u dehan tiha ona iha artigu sira uluk katak ita bele
ko’alia barak-barak, hotu-hotu bele iha razaun, maibé demokrasia sempre tuir
sasukat maka votu ne’ebé ha’u dehan democracia dos votos.
Iha parte seluk partidu sira
ne’ebé forma aliansa maioria parlamentár moos sei buka atu manan absoluta iha
eleisaun lejizlativa ne’e. Hanesan buat ne’ebé maka Prezidente PLP dehan katak
koligasaun hakarak atu manan ho kadeira 43 iha eleisaun lejizlativa agora atu
nune’e bele forma Oitavu Governu Konstitusionál metin to’o mandatu tinan lima remata.
Ho fiar an tomak Prezidente PLP (Prezidente ne’ebé maka brani, umilde no
matenek moos no liu-liu ha’u apresia tebes Prezidente PLP tanba sempre buka fó
oportunidade ba joven sira. Ha'u sempre louva lideransa ne’ebé maka buka sempre
fó oportunidade ba joven sira hakat ba oin. Ha'u moos iha esperiénsia pesoál
ne’ebé ha'u sempre louva no admira Dra. Maria Ángela Carrascalão, tuir ha’u-nia
haree bele sai nu’udar moos kandidatu potensiál ida ba futura Prezidente
Republika, ne’ebé maka buka moos atu enkoraja joven sira ba oin. Timor-Leste
ne’ebé sei iha joven ne’ebé maka dalaruma la’o sala dalan ou dalaruma dezanima,
presiza inan-aman (ha’u konsidera lideransa sira hanesan inan-aman)
hatudu dalan di’ak no fó korajen lori hakat ba oin la’o iha dalan loos) ne’e
dehan, “Oitavu governu ne’e ita nian”. Ha’u sempre apresia tebes
Prezidente PLP ninia liafuan sira hotu ne’ebé maka sempre buka fó korajen no
sunu povu sira-nia espíritu lori fó kontribuisaun ba Estadu Direitu
Demokrátiku. Maibé dalaruma ha’u, nu’udar povu baibain ida, hakarak moos
haree implementasaun hosi opozisaun ida-ne’ebé edukativu no konstrutivu ne’e
moos.
Bainhira iha karik hanoin atu
partidu CNRT, PLP ho Khunto hamutuk ida de’it nu’udar koligasaun lori tama ba
eleisaun ne’e moos di’ak. Maibé nu’udar akadémiku simples oan ida ha’u sujere
karik di’ak liu iha eleisaun antesipada idak-idak la’o idak-idak nian. Ho
hanoin katak atu nune’e rezultadu hosi eleisaun antesipada kada partidu bele
halo avaliasaun rasik. Ita lori haree took povu ninia konfiansa ba kada partidu
sira-ne’e oinsá. Sa’e, tuun ka nafatin. Bele oinsá moos partidu tolu ne’e
sempre manan kadeira ruma ba Parlamentu Nasionál. Agora partidu ki’ik sira
seluk ne’ebé la hetan asentu parlamentár maka di’ak liu hamutuk sai ida de’it
iha eleisaun atu nune’e bele hetan netik kadeira ida ou rua lori reprezenta
netik interese ne’ebé maka partidu sira-ne’e iha. Maibé se sira hamutuk halo
koligasaun ida de’it ho Partidu CNRT, PLP ho Khunto moos solusaun di’ak ida
soke ita sei la hatene sira iha forsa duni ka lae. Tanba ita sei la hatene sira
sei hetan votu hira. Katak partidu hotu-hotu ne’ebé halo koligasaun
pre-eleisaun nu’udar pakote ida de’it iha desvantajen ida maka públiku sei la
hatene partidu idak-idak sira-nia forsa;votu no kadeira hira maka sira hetan.
La’o idak-idak nian lai depois rezultadu finál maka sira hamutuk halo
koligasaun karik di’ak.
Iha parte seluk moos situasaun
ne’ebé Sétimu Governu Konstitusionál hasoru tiha ona ne’e bele sai nu’udar
referénsia ba Prezidente Repúblika iha eleisaun antesipada agora ne’e. Fretilin
hakarak ukun tenke forma governu ho maioria parlamentár. Se Fretilin la konsege
hari aliansa maioria parlamentár entaun di’ak liu Prezidente Repúblika tenke
ona fó ba aliannsa maioria parlamentár maka forma governu lori garante
estabilidade governativa. Katak formasaun ba Oitavu Governu Konstitusionál maka
tenke ona liuhosi aliansa maioria parlamentár atu nune’e evita Timor-Leste monu
ba krize ne’ebé aat liután. Tanba ne’e em nome do normal funcionamento das
instituições democráticas, Prezidente Repúblika tenke indijita ona
Primeiru-Ministru hosi aliansa maioria parlamentár.
Bele iha hanoin oioin kona-ba atu
Prezidente Repúblika nian lori disolve Parlamentu Nasionál. Maibé bainhira
Prezidente Repúblika disolve Parlamentu Nasionál, la presiza hein rejeisaun ba
dala rua programa governu nian, la hein moos mosaun sensura hosi aliansa
maioria parlamentár pasa, hanesan responsabilidade polítika iha relasaun
interdependénsia entre órgaun soberania sira iha sistema semi-prezidensiál nian
iha sentidu ida-ne’e katak Prezidente Repúblika haree katak la iha ona normál
funsionamentu instituisaun demokrátika tanba ne’e Prezidente Repúblika iha
responsabilidade polítika, ba interese estadu nian, lori disolve Parlamentu
Nasionál atu nune’e governu monu, lori tama ba eleisaun antesipada.
Ita espera situasaun hanesan ita
hasoru hela daudaun ne’e la bele akontese iha Oitavu Governu Konstitusionál.
Tanba se lae haterus povu nia moris de’it ba arrogánsia ukun na’in sira nian.
Tanba ukun na’in sira iha hela kondisaun di’ak lori moris maibé povu maka
terus. Povu nia moris hanesan paradu tiha de’it. Iha preokupasaun boot tebes
iha povu sira lori buka moris iha serbisu, iha estudu, iha negósiu no
seluk-seluk tan. Imajina se situasaun krize ne’e kontinua akontese iha Oitavu
Governu Konstitusionál? Ita bele dehan, ho haraik an tomak, ho sinseridade
tomak, ho deskulpa tomak, ukun na’in sira laran la iha liu!
Ita hotu hatene katak durante ne’e ita hasoru hela buat ida hanaran Governu Jestaun.
Saída maka Governu Jestaun? Governu jestaun, iha fransés dehan gouvernement
d’affaires courantes ou iha inglés dehan caretaker government tanba governu
ne’e seidauk hetan apresiasaun parlamentár ba ninia programa ou governu ninia
programa hetan rejeisaun ba dala rua ou governu hetan mosaun sensura ou governu
monu tanba Prezidente Repúblika disolve Parlamentu Nasionál.
Governu jestaun katak governu
ne’e seidauk iha plenitudo potestatis hanesan atu normál hosi Sistema
Parlamentár ou Sistema Semi-Prezidensiál tanba governu moris hosi eleisaun
lejizlativa. Iha kontestu ida-ne’e iha hanoin oioin. Balu dehan Governu hanesan
ne’e maka Governu hein atu hetan konfiansa ou Crisafulli dehan Governo tra
nomina e fidúcia. Uluk, antes desizaun Prezidente Repúblika nian, ha'u dehan
governu sei iha agonia nia laran ou hanesan Leopoldo Elia nia liafuan dehan
governu hetan capitis deminutio in articulo mortis. Iha Portugal entre 1976 no
1982 balu konsidera nu’udar governu jestaun (tanba programa seidauk aprova iha
Assembleia da Republica) no balu fali dehan governo pleno iure tanba governu
foti desizaun polítika esterna bainhira kontra reasaun invazaun soviétika ba
Afeganistaun.
Ita tenke dehan uluk kedas katak ita-nia Konstituisaun la koñese Governu Jestaun.
La iha artigu ida iha ita-nia Konstituisaun prevee kona-ba Governu Jestaun. Ita
bele dehan katak sei iha buat lubuk ida ne’ebé maka sei falta iha ita-nia
Konstituisaun. Ida maka Governu Jestaun. Ita hein katak membru Parlamentu
Nasionál tuir mai bele iha karik hanoin ruma lori halo revizaun ba ita-nia
Konstituisaun. Ita-nia Konstituisaun hakerek de’it kona-ba mandatu deputadu
nian bainhira Prezidente Repúblika disolve Parlamentu Nasionál hanesan iha
artigu 100 númeru 2. Ne’e katak deputadu sira bele kontinua hala’o sira-nia
funsaun “até à primeira reunião do Parlamento após as subsequentes eleições”.
Mezmu ita-nia Konstituisaun la prevee kona-ba lala'ok governu nian sei sai
oinsá bainhira Prezidente Repúblika disolve Parlamentu Nasionál, maibé tuir doutrina
ne’ebé maka iha ita bele iha garantia katak Sétimu Governu Konstitusionál bele
hala’o nafatin ninia funsaun ezekutiva ho limitasaun ba ninia kompeténsia
hanesan lori halo jestaun de’it.
Tuir loloos ita la bele ko’alia
buat ne’ebé maka la prevee iha Konstituisaun. Maibé tanba iha teoria geral do
estado ou iha teoria geral do direito público iha parte teoria direito
constitucionál nian hanorin moos kona-ba governu jestaun liu-liu hanesan temi
iha Konstituisaun Portugál nian (hanesan referénsia ne’ebé ita Timor-Leste
presiza banati tuir tanba ita nia direitu halo parte nu’udar direitu sivilista
ne’ebé direta ou indiretamente hetan influénsia hosi direitu pozitivu Portugál
nian) iha artigu 186 númeru 5 hateten katak , “Antes da apreciação do seu governo
pela Assembleia da República, ou após a sua demissão, o Governo limitar-se-á à
prática dos actos estritamente necessários para assegurar a gestão dos negócios
públicos.”
Ita buka uza hanoin sira-ne’ebé
maka iha nu’udar doutrina ida-ne’ebé karik bele serbí ba ita-nia interese.
Klaru, nu’udar doutrina no teoria sempre iha hanoin ne’ebé maka lahanesan hosi
matenek na’in ida ho matenek na’in seluk. Matenek na’in ba área ne’e
de’it iha ona hanoin oioin oinsá tan maka ita povu baibain, kuantumais ba polítiku
na’in sira-ne’ebé sempre halo jogo do interesse. Idak-idak interpreta tuir
idak-idak ninia interese. Ho nune’e parte esensiál tebes maka presiza iha
umildade akadémika hanesan ha’u-nia Profesór sira iha Escola de Direito da
Universidade do Minho hanorin. Iha umildade lori aprende, iha umildade lori
haree situasaun hotu-hotu ho di’ak no loos no iha umildade simu situasaun
difísil balu. Tanba ne’e loron ida ha’u ko’alia ho Bispu ida dehan katak nia
dere telefone ba sarani ida no sarani ne’e la atende telefone Bispu nian. Iha
ha’u-nia laran ha’u hanoin como é possivel Bispu ida telefone ba sarani ida no
sarani ne’e bele la atende telefone Bispu nian? maibé ha’u simu nonook ho
umildade tomak. Hanesan ha’u tolan rezokina sanulu, moruk tebes, maibé tolan
de’it ona. Laran moras tebes maibé ita povu ki’ik ema boot ko’alia ita simu
de’it ona. Ita maka kompreende de’it ona. Simu ho nonook la protesta. Hakerek
hela de’it esperiénsia sira-ne’ebé ha’u hasoru iha kadernu hanesan diáriu ida
karik loron ida bele iha karik vantajen ruma lori hatuur lia-loos tanba
lia-loos tuir doutrina ita kristaun nian maka Jesus (Jesus dehan ha’u maka
dalan, lia-loos no moris) no Jesus ne’e Maromak entaun lia-loos ne’e Maromak.
Se ita adora Maromak entaun ita bele dehan katak ita adora Lia-loos. Lia-loos
ho Maromak ne’e ida de’it. Maibé moris ne’e dalaruma ita tenke simu de’it saída
maka ulun boot sira dehan. Ne’e hanesan parte ida hosi umildade lori buka
kompreende situasaun. Hanesan loloos situasaun polítika agora karik moruk ba
parte interesadu balu maibé ita tenke buka kompreende situasaun. Partidu sira
idak-idak sei ba buka lia-loos iha povu no povu maka sei hatuur lia-loos ne’e
tuir votu ne’ebé povu fó. Tanba ita dehan lian povu nian lian Maromak nian, vox
populi vox Dei. Tanba ne’e ita presiza buka halo Istoria ho lia-loos tanba
antes ita moris ema rihun rahun moris uluk tiha ona ita no mate hotu tiha ona
no depois ita moos hanesan loron ida sei mate. Maibé sé maka halo Istória naran
sei moris nafatin maka, ha’u fiar, hirak ne’ebé halo Istória ho lia-loos.
Bainhira ema Judeu sira oho Jesus sira kontente tebes tanba sira hanoin
problema hotu ona. Maibé sira sala boot! Lia-loos la mate. Lia-loos moris hi’as
no moris tinan rihun rua resin to’o agora no sei moris ba nafatin. Lia-loos sei
moris ba nafatin tanba moos ho tulun hosi hakerek. Ema koa’alia rona tilun
sorin sai tilun sorin no depois haluhan. Balu fali hanesan ditadu portuges
dehan quem conta um conto acrescenta um ponto. Ko’alia la hatene lia-loos maka
ne’ebé tanba aumenta bumbu barak demais. Maibé sé ita hakerek ita-nia hakerek
ne’e sei moris iha eternidade nia laran, para sempre, rohan laek. Iha kontestu
eleisaun antesipada agora ita sei haree sé maka iha lia-loos maka sei hetan
votu barak liu hosi povu ou ninia kadeira aumenta.
Profesór Diogo Freitas do Amaral, bazeia ba Konstituisaun Chekoslovaka tinan
1920, ba Konstituisaun franseza tinan 1946, bazeia ba Konstituisaun austríaca
lori define Governu Jestaun nu’udar órgão «ad hoc», de composição variável,
incumbido pelo Chefe do Estado, em caso de crise ministerial, de assegurar a
gestão dos assuntos correntes até à formação do novo Governo. Maibé depois
Profesor Diogo Freitas do Amaral uza esperiénsia Portugal nian lori define
governu jestaun nu’udar Governo Constitucional sujeito a um regime jurídico
especial, e designadamente a uma substancial limitação de competência, em
virtude da sua demissão ou da falta de apreciação parlamentar do seu programa.
Tanba ne’e se iha hanoin ruma katak bainhira Prezidente Repúblika disolve
Parlamentu Nasionál presiza hamosu Governo de transição, hanesan saída maka
Porta Voz Fórum Democracia Nacional (FDN) Hermenegildo Lopes “Kupa”
hateten atu lori prepara ba eleisaun lejizlativa hanesan moos ideia ida ne’ebé
ukun na’in sira hotu bele tetu. Katak lori harii fali Governu foun ida, Governu
ad hoc lori funsiona to’o eleisaun lejizlativa. Maibé Sétimu Governu
Konstitusionál mantein ukun mesak durante preparasaun ba eleisaun antesipada
moos lei la taka dalan. Ita-nia Konstituisaun la dehan buat ida. Maibé Freitas
Amaral dehan katak ba ordenamentu konstitusionál Portugál nian “os Governos de
gestão, e designadamente os Governos demitidos, não são órgãos novos, ad hoc,
diferentes dos Governos pleno iure a respeito dos quais se abriu a crise ministerial:
são os mesmos Governos que protagonizaram a crise, embora com um estatuto
jurídico diferente”.
Ita moos presiza hatene katak
bainhira Prezidente Repúblika disolve Parlamentu Nasionál signifika governu
monu maibé ne’e la signifika katak Parlamentu Nasionál no Governu bubar hotu
kedas ona. Parlamentu Nasionál, liuhosi Komisaun Permanente (hanesan prevee iha
ita-nia Konstituisaun artigu 102 númeru 1) ho Governu sei bele kontinua hala’o
sira-nia funsaun to’o eleisaun lejizlativa foun mai lori iha formasaun ba
governu foun. Tanba ne’e se iha karik asinatura ba fronteira marítima, hanesan
baibain públiku sira moos preokupa, Sétimu Governu Konstitusionál bele trata
hanesan saída maka ha’u ko’alia iha leten referénsia Portugál nian iha relasaun
ho funu Afganistan. Kuantumais ita-nia Konstituisaun la hateten buat ida
kona-ba Governu Jestaun. Tanba se Ita-nia Konstituisaun la dehan buat ida
kona-ba lala’ok saída maka Governu sei hala'o bainhira governu monu maka ita
bele dehan Sétimu Governu Konstitusionál bele trata kualkér asuntu ida-ne’ebé
maka importante no nesesáriu tebes ba interese Estadu nia di'ak hanesan asina
tratadu importante ruma, ezemplu fronteira tasi Timor, ne’ebé afeta ba moris
Estadu Timor-Leste nian. Tanba se ita la assina bele lori kerugian boot ba ita
nia rain ou ho liafuan Freitas do Amaral nian dehan, “a omissão da sua prática
cause um dano significativo ao interesse colectivo”. Iha esperiénsia
nasaun seluk nian moos akontese hanesan. Bainhira sira-nia governu sei sai
nu’udar hela governu jestaun sira foti desizaun balu ne’ebé ultrapasa tiha buat
ida hanaran mera gestão. Ba interese nasionál ita-nia governu jestaun agora
moos bele halo hanesan ou se iha hanoin estremu liu atu Sétimu Governu
Konstitusionál atua hanesan loloos governu baibain moos ita-nia Konstituisaun
la taka dalan. Maibé tanba ita moos la'o tuir doutrina ne'ebé maka iha maka ita
hotu tenke konkorda katak Governu Jestaun tenke duni iha limitasaun ba ninia
ukun nu’udar de’it mera gestão ba negósiu públiku.
Iha hanoin oioin kona-ba lala'ok
Governu Jestaun nian. Tuir Gomes Canotilho ho Vital Morreira hateten
katak “demitido um Governo, está efectivada a sua responsabilidade
política, a qual, portanto, se deve entender que cessou aí para todos os
efeitos”. Bainhira ba Freitas do Amaral hateten oin seluk katak a
responsabilidade política não é apenas a sujeição ao poder de provocar a queda
do Governo: a demissão do Executivo é uma sanção extrema – a ultima ratio do
combate político legal-, mas não esgota em si toda a responsabilidade política.
Freitas do Amaral hateten liutan katak “ A responsabilidade política é, muito
mais do que isso, a obrigação de prestar contas pelos actvos praticados e a
sujeição a todos os meios políticos de fiscalização e garantia previstos na
Constituição relativamente ao Governo”. Ho nune’e maka Freitas do Amaral dehan
, “Assim, sustentamos que qualquer Governo de gestão é politicamente
responsávelperante a Assembleia da República, sendo admissíveis contra ele
todos os meios secundários de fiscalização constitucionalmente estabelecidos,
tais como interpelações, inquéritos, perguntas, ratificações, etc. Mezmu nune’e
ita bele dehan katak iha governu jestaun ita sei bele haree katak iha
interrupsaun ba funsionamentu normál Parlamentu nian. Iha moos kadusidade ba
proposta lei ne’ebé maka pendente hela ho hanoin katak Governu la iha ona
lejitimidade lori bele trata ba asuntu ne’e. Tuir Freitas do Amaral hanoin
katak bainhira iha propostas de lei aprovadas iha jeneralidade la kaduka no
tenke la'o tuir tramitasaun ba normál prosesu lejizlativu iha Parlamentu. Iha
moos kadusidade ba autorizasaun lejizlativa tanba governu ne’ebé lakon ona
lejitimidade la bele tan ona lejizla ba matéria ne’ebé maka kompeténsia
rezervada ba Parlamentu Nasionál. Iha moos konjelamentu ba kompozisaun Governu
nian.
Matenek-na'in sira hanoin katak
iha duni limitasaun ba Governu Jestaun. Balu, hanesan Barbosa de Melo, Cardoso
da Costa no Viera de Andrade, hanoin katak iha limitasaun ba kompeténsia ba
Governu Jestaun iha karakter polítiku. Iha matenek-na'in seluk hanesan Jorge
Miranda, Gomes Canotilho no Vital Morreira hanoin katak limitasaun ba
kompeténsia ba Governu Jestaun iha karakter jurídika. Enkuantu ba Freitas do
Amaral katak “Governos de gestão devem poder procurar todos os actos compreendidos
na função administrativa, excepção feita aos chamados actos de administração ou
de administração extraordinária, que só serão legítimos em caso de urgência.
Nia dehan liután katak “quanto aos actos da função política e da função
legislativa, entendemos que devem, todos eles, considerar-se excluídos da
competência dos Governos de gestão, ressalvada também a hipótese de urgência.
Ho nune’e maka Freitas do Amaral simu lori dehan katak “reconhecemos a
existência de um certo número de limites absolutos à competência dos Governos
de gestão, que em caso algum poderão ser excedidos por esses Governos”.
Ba Freitas do Amaral, Governu
Jestaun soi os actos absolutamente proibidos, actos genericamente permitidos,
actos relativamente proibido. Actos absolutamente proibidos maka hanesan os
actos de execução do programa do Governo, incluindo a apresentação de propostas
de lei nele previstas; os actos contraditórios com os fundamentos de demissão,
no caso de serem determináveis, designadamente se a demissão resultou de
votação parlamentar; os actos que traduzam uma inovação política fundamental ou
comportem uma limitação significativa da liberdade de decisão do Governo
seguinte; os actos de utilização de autorização legislativas, nos termos
anteriormente expostos; por último, compreendem-se ainda de um modo geral neste
primeiro grupo todos os actos praticados por Governos de gestão que não possam
ser qualificados, em face da Constituição, como «actos estritamente necessários
para assegurar a gestão dos negócios públicos».
Kona-ba actos genericamente
permitidos maka actos da função administrativa. Actos relativamente proibido
maka hanesan actos de alta administração ou de administração extraordinária,
actos polítcos e legislativos em geral: ressalvados os actos absolutamente
proibidos, todos os actos da função política e da função legislativa devem, a
nosso ver, reputar-se relativamente proibidos. Ba Freitas do Amaral iha
kondisaun balu atu lori pratika actos relativamente proibidos maka hanesan: A necessidade
do acto a praticar; a urgência da sua prática; e a fundamentação expressa
daquela necessidade e deta urgência.
Agora ba Timor-Leste nia kazu,
eleisaun antesipada hanesan prátika konstitusionál ida-ne’ebé maka foun no di’ak
tebes lori hametin Estadu Direitu Demokrátiku katak foti no hatún
Primeiru-Ministru tenke liuhosi eleisaun lejizlativa lori halo tuir
Konstituisaun haruka iha-ne’ebé hatuur supremasia lei nia ukun iha Estadu
Repúblika Demokrátika Timor-Leste nia moris. Iha parte seluk atu ita moos bele
haree hetan katak ita-nia Konstituisaun sei iha lakuna lubuk balu ne’ebé
presiza ona iha revizaun atu lori evita interpretasaun ne’ebé hamosu konfuzaun
de’it tanba de’it la iha lei ne’ebé maka regula no prevee.
Ita hotu espera katak buat hotu
ne’ebé akontese daudaun ne’e hanesan parte ida atu oinsá hametin liután
maturidade polítiku-na’in sira nian (tanba dalaruma konfuzaun mai hosi
polítiku-na’in ne’ebé ladun maduru depois maka lori sunu povu monu ba
violénsia) , povu hotu-hotu nian no liu-liu supremasia lei nia ukun iha prosesu
konstrusaun Estadu Direitu Demokrátiku ba República Democrática de Timor-Leste
nia di’ak. Obrigadu
* Hercus Pereira dos Santos. Antigo
aluno Direitos Humanos da Escola de Direito da Universidade do Minho. Ha’u-nia
artigu hanesan parte ida atu fó, insentiva no provoka hanoin lori kontribui ba
harii Estado de Direito Democtárico de Timor-Leste. Ha’u la pro no kontra
kualkér polítiku-na’in ida ou kualkér partidu ida. Ha’u pro no kontra hanoin.
Hakerek ba públiku nu’udar dalan ida moos atu ha’u bele fó kontribuisaun
ki’ikoan ida ba Estadu Timor-Leste. Bele kontaktu iha santoshercus@gmail.com ou 76094252
