POLIMIKA NOMEISAUN PTR NO PJR…!!!

Jornal Nacional Diário | editorial

Nomeiasaun Presidente Tribunal Rekursu (PTR) no Prokurador Jeral da Republika (PJR) sai polimika iha Parlamento Nasional, hafoin Presidente Tribunal Rekursu, Guilhermino apresanta karta rezignasaun ba Taur Matan Ruak tamba problema saude.

Nomeiasaun ba Prezidente Tribunal Rekursu no Prokurador Jeral da Republika nee kompetensia Prezidente Republika nian tuir mandatu konstituisaun artigu 86 ( kompetensia kona-ba orgaun seluk iha alena i) foti Prezidente Tribunal Supremo Justisa no fo poses ba Prezidente Tribunal Superior Administrativu, Fiskal no kontas nian,  no alenia k) foti Prokuradór-Jerál Repúblika nian hodi hala’o knaar iha tinan ha’at nia laran; l) Foti no hasai Adjuntu Prokuradór-Jerál Repúblika nian sira tuir termu sira No.6. artigu 133 nian. Los duni, Prezidente Republika, Taur Matan Ruak  iha direitu konstitusional hodi nomeia Prezidente Tribunal Rekursu no Prokurador Jeral da Republika maibe problema mak mandatu Presidente Republika Taur Matan Ruak nee hela deit loron hirak atu husik kadeira numeru um iha Timor Leste nee. Agora laiha lei ida mak bandu Presidente Republika atu labele foti desizaun politika ruma iha tempo hanesan Presdiente Republika sesante, sa tan mandatu Presidente Tribunal Rekursu sei too Marsu tinan 2018.

AJENTE ZEESM AMEASA POVU, HAKARAK DEZENVOLVIMENTU TENKI TUIR PARTIDU

Xefi bankada CNRT, Natalino dos Santos, hateten, nia lamenta tebes tanba ajente balu husi Autoridade Zona Espesial Ekonómia Sosial Merkadu (ZEESM) Oe-cusse, kontinua halo ameasa ba povu Oe-cusse katak, hakarak dezenvolvimentu elektrisidade no estrada tama lalais, tenki tama partidu.

“Ha’u la’o to’o Aldeia ida iha Suku Naimeco, Aldeia Baqui, Aldeia ida naran  Bubune. Aldeia ne’e ita atu ba, ita la’o ain liu de’it husi mota kuaze km 2 resin. Iha Aldeia ne’e iha familia 40 mak hela iha ne’eba, sira nia estrada no elektrisidade mós laiha. Iha informasaun husi povu iha Aldeia ne’e katak, foin dada’uk iha ajente balu ba iha ne’eba hodi hatete ba povu katak, se karik imi hakarak elektrisidade tama, tenki tama partidu ida hanesan ne’e,” informa Natalino dos Santos ba plenária PN, Segunda (24/04).

Taur Matan Ruak Nomeia Juiz Deolindo ba Prezidente Tribunál Rekursu

DILI, (TATOLI) – Prezidente Repúblika, Taur Matan Ruak nomeia ona juiz Deolindo dos Santos ba Prezidente Tribunál Rekursu hodi troka Guilhermino da Silva ne’ebé rejigna-án tanba saúde.

“Tribunál Rekursu hanesan instánsia judisiál boot liu Timor nian ne’ebé kaer kompeténsia importante hodi fiskaliza konstitusionalidade lei sira, foti desizaun kona-ba kazu judisiál ne’ebé importante inklui arguidu detidu ho natureza urjente”, hatete Xefe Estadu liuhosi komunikadu ofisiál ne’ebé Tatoli asesu kuarta ne’e.

Hatutan tan: “Tribunál Rekursu kaer hela kompeténsia lubuk ida ne’ebé fundamentál tebes relasiona ho prosesu eleisaun”.

Liuhosi nota ne’e, Prezidente Repúblika sesante hato’o obrigadu ba serbisu ne’ebé Guilhermino da Silva hala’o durante mandatu hodi defende podér judisiál nia independénsia, promove juiz sira-nia kondisaun profisionál no hasa’e tribunál sira-nia kualidade, liu-liu kualidade desizaun judisiál.

Prezidente TR foun, lisensiadu hosi Fakuldade Direitu Universidade Pattimura, Ambon, lndonézia.

Nia hahú karreira majistradu judisiál iha 2000 no 2011 hetan nomeasaun nu’udar membru juiz ba Tribunál Rekursu.

Tomada pose sei hala’o iha Palásiu Prezidénsia Repúblika, sesta, (28/4) tuku 9.00.

Taur Matan Ruak aprova pedidu rezignasaun ne’ebé maka Guilhermino da Silva aprejenta tanba saúde. (Jornalista: Xisto Freitas | Editora: Rita Almeida)

Foto: Prezidente Tribunál Rekursu foun, juiz Deolindo dos Santos. Foto espesiál

Komisaun Nasionál HIV/SIDA Planeia Matrís

DILI, (TATOLI) – Komisaun Nasionál Human Immunodeficiency Virus and Acquired Immunodeficiency Syndrome (HIV/SIDA) sei planeia halo fali matrís oinsá identifika ema moras, tratamentu no oinsá labele kontazia ba ema seluk.

Ministru Estadu no Koordenadór asuntu Sosiál, António da Conceição ba jornalista sira iha Komisaun Nasionál HIV/SIDA Praias dos Coceiros, kuarta, (26/4) ko’alia planu atu halo fali matrís.

“Tempu badak ita sei enkontru ho tékniku no pontu fokál hosi Komisaun Nasionál HIV/SIDA atu bele dezenvolve matadalan no oinsá instituisaun Estadu bele involve atu halo implementasaun”, dehan.

Enkuantu, komisaun aprezenta kona-ba inventarizasaun rekolla dadus, kampaña oinsá halo prevensaun moras HIV/SIDA no sira ne’ebé mate ona oinsá atu buka estratejia atu kontrola oan sira hanesan parte umanidade.

Impaktu Merkadu Livre, Negosiante Xina Domina Negosiu

DILI - Timor Leste adopta sistema merkadu livre. Ninia impaktu klaru. Tinan hirak nia laran, negosiante Xina hahu domina atividade negosiu railaran.

Maske balu fo servisu ba Timor oan balu maibe sei lagarante fo progresu diak ba ekonomia nasaun. Xefi Suku Bairo Pite, Joao Baptista da Costa Belo informa, iha Suku Bairo Pite ema estranjeiru neebe halo atividade negosiu barak liu husi Xina, restu husi Indonesia, India, no Pakistan. Iha sistema merkadu livre, ema husi rai neebe deit bele tama halo negosiu.

Iha Dili laran, negosiante Xina barak liu. Balu loke ona loja boot, balu loke pompa kombustivel. Husi sira nia komersiu nee, fo duni servisu ba Timor oan balu.

Hau hanoin prezensa ema estranjeriu iha TL, fo benefisiu ba Timor oan tanba sira loke loja boot, bolu timor oan sira mak servisu, sira hatudu duni kontribuisaun hodi redus numeru dezempregu railaran,” hateten Joao Baptista da Costa Belo ba STL iha CCF Comoro, Tersa (21/3/2017).

KM Aprova Kompania Rua Suplai Mina Hera-Betano

DILI – Konsellu Ministru (KM) aprova ona proposta ida husi Ministru Obras Publika Transporte i Telekomunikasaun (MOPTK), konaba kompania rua neebe suplai mina ba jerador eletrisidade Hera no Betano.

Tuir Reprezentante Konsellu Ministru (KM), Nelio Isac Sarmento katak, enkontru KM nian ba loron ohin (orsehik-red) mak aprova kompania rua hanesan Eto no Sacom Fuel.

Prosesu tenderizasaun ba suplai mina ba jerador eletrisidade iha Hera no Betano, kompania eto no sacom fuel mak sai toma konta,” dehan Nelio ba jornalista sira, wafoin remata enkontru iha palasiu governu, Tersa (25/04/2017).

Reprezentante KM, Nelio haktuir, proposta nee mai husi MOPTK hamutuk ho Komisaun Nasaional Aprovizionamentu (CAN) konaba prosesu tenderizasaun ba suplai mina ba jerador eletrisidade iha Hera no Betano.

Iha fatin hanesan, Vise Ministru Obras Publika Transporte i Telekomunikasaun (MOPTK), Januario da Costa Pereirra esplika, MOPTK loke tenderizasaun internasional ba suplai mina ba jerador eletrisidade Hera no Betano, kompania lima mak aplai ikus mai kompania tolu laprense kriateriu balun no kompania rua mak prense hodi mana tenderizasaun nee mak hanesan Eto no Sacom. Raimundo S. Fraga

Suara Timor Lorosae

Prezensa aviaun EUA iha TL presisa esplikasaun, Hernani: La’os tensaun polítika EUA ho CN

Parlamentu Nasionál (PN), ejizi ba Governu atu esplika ba públiku kona ba prezensa aviaun Estados Unidos da América (EUA) iha Timor Leste (TL), tanba aviaun ne’e nia prezensa iha TL halo povu pániku.

Deputadu Cesar Valente ‘Pilotu’, husi bankada CNRT hatete katak, informasaun funu entre EUA ho Corea do Norte nian, halo povu Timor Leste trauma, entaun mosu tan aviaun America nian iha Timor Leste, povu trauma liu tan.

“Tanba ne’e, ita nia Governu presija fó sai ba públiku katak, aviaun ne’e mai tanba iha duni komunikasaun ruma hodi mai halo servisu ka apoiu komunitáriu iha Timor Leste, hanesan iha tinan hira liu ba, sira mai harii eskola balu iha Timor Leste,” afirma Cesar Valente n’udar membru Komisaun B trata asuntu Seguransa, Defeza no Relasoens Externa ba jornalista sira iha PN, Segunda (24/04).

Nia haktuir, EUA tenki hatene katak, Estadu Timor Leste laiha tendensia atu halo funu, tanba importante liu ba povu Timor Leste mak dame no paz iha mundu.

PM HUSU LABARIK SIRA TENKI VASINA

Primeiru Ministru (PM), Rui Maria de Araujo husu ba povu tomak tenki vasina labarik sira, atu proteje labarik sira husi moras.

Rui Araújo dehan vasina ne’e hanesan biru ida atu salva labarik sira nian saude di’ak iha futuru.

“Vasina hanesan biru (aimoruk, red) ne’ebe fo labarik sira, hodi moras tiru karik la tama, ida ne’e importante tebe-tebes, iha mundu laran tomak ema matenek nain sira halo peskiza sientifika, hatudu ona katak se ita  hakarak labarik sira nia futuru di’ak tenki vasina sira, tenki lori sira ba halo imunizasaun,” hatete PM Rui de Araújo, liu husi nia diskursu seremonia lansamentu semana imunizasaun mundial ne’ebe ho tema “hadomi ita nia oan, vasina sira ba” iha sentru saude Becora, Postu Administrativu Cristo Rei, Munisipiu Dili, Segunda (24/04).

Iha Timor-Leste kalendariu imunizasaun vasina ne’e dala lima molok labarik sira tinan ida, ho objetivu atu salva labarik atu labele hetan moras tetanus, mear (TBC), isin manas no seluk tan.

25 Abril Loke Odamatan Ba Kolonial Portugues Hetan Autodeterminasaun

DILI – Vise bankada FRETILIN Francisco Miranda Branco hateten, Ohin Timor Leste nia istoria rezista korenta seis anus, neebe tranformasaun politika iha Portugal nia konsekuansia impede Portugues nakfera I loke odamataan ba kolonia sira Portugues nian atu hetan auto determinasaun independensia hanesan mos Timor Leste.

Los duni ohin ita nia istoria rezista korenta seis anus maka iha tranformasaun politika iha Portugal nia konsekuansia impede Portugues nakfera, I loke odamataan ba kolonia sira Portugues nian, atu hetan autodeterminasaun independensia hanesan mos Timor Leste,” dehan deputadu Branco, liu husi sesaun plenaria, Tersa (25/04/2017).

Nia dehan, Nee laos loron nostalgia ida, maibe loron neebe iha impaktu mos ba TL nia independensia, tanba nee  nafatin lembra katak, iha tempu defisil mos Timor oan sira neebe sei joven determina katak povu maubere mos atu kaer mesak nia kuda talin.

Iha fatin hanesan Xefi bankada Frente Mudansa Jose Luis Guterres hateten diak tebes lembra hikas dia 25 de Abril. Loron 25 Abril iha Portugal nee laos deit loron Portugal, maibe loron mos ba iha uluk kolenial Portugues neebe Timor hola parte I prosesu revolusaun.

Entretantu Prezidente Parlamentu Nasional Aderito Hugo da Costa hateten, Resolusaun de flores iha 2074 istoriku teb tebes, ba propinsia ultramarinu sira hotu Portugal ninian. Carme Ximenes

Suara Timor Lorosae

Sestu Governu Failla Prevene, Kombate Korupsaun

DILI – Sestu Governu konstitusional lidera husi Primeiru Ministru Rui Maria de Araujo failla iha prevensaun no kombate korupsaun iha Timor Leste, tanba oras nee Eis Ministra Finansas (MF), Emilia Pires ses-an husi justisa.

Tuir Observador Politika-UNTL, Camilio Ximenes Almeida katak, maske sestu governu kontinuasaun husi kintu governu konstitusional nia servisu maibe, hareee balun lao no balun mos lalao liliu area korupsaun.

Sestu governu lahatudu prestasaun diak, lakonsege prevene no kombate korupsaun,” dehan Observador Politika-UNTL, Camilio ba STL iha nia knar fatin Kampus lama-UNTL, Caicoli-Dili, Segunda (24/04/2017).

Camilio haktuir, tanba too oras nee sestu Governu lakonsege halo negosiasaun entre Governu Timor Leste ho Governu Portugal hodi haruka Emilia Pires fila fali mai hodi bele kontribui ba justisa.

Iha fatin ketak, Prezidente CNJTL (Konsellu Nasional Juventude Timor Leste), Maria Dadi Magno esplika, sidadaun idaidak iha papel importante atu prevene no kombate korupsaun laos governu deit. Raimundo S. Fraga

Suara Timor Lorosae