Sei Falta Ekipamentus Ba Bombeiros

DILI – Atu asegura diak liu tan knar Bombeiros iha terenu, maka governu tenke kria tan fasilidade no ekipamentu.

Tuir diretur jeral Bombeiros, Domingos Pinto katak durante nee servisu bombeiros sempre hetan kritika husi komunidade sira, durante nee Bombeiros sei hasoru difikulidade hanesan kona ba fasilidade no ekipamentu ba iha terenu nian.

Tanba nee ami tenta nafatin tau iha ami nia planu ba tinan oin,liu-liu ami hato’o ona ba iha governu (Ministru- Interior atu hodi bele responde ami nia situasaun liu-liu kona ba fasilidade no ekipamentu ba iha tereinu nian,” dehan diretur jeral Bombeiros, Domingos ba STL  iha nia knar fatin Bombeiros Caicoli Dili, Kinta (27/10/2016).

Nia hatutan, problema neebe mak sei infrenta hanesan radio repiter iha ida deit, ho nunee estaun labele halo komunikasaun neebe diak bainhira akontese kazu emerjensia ruma iha terenu.

Iha sorin seluk Diretur Nasional DNSPP, Francisco Soares dehan preokupasaun neebe sira hasoru, hatoo ona ba Ministeriu Interior maibe sei iha hela faze konzelamentu tanba orasamentu. Informasaun kompletu iha STL Jornal no STL Web, edisaun Sesta (28/10/2016). Lucia Ximenes/Sonia Ferreira

Suara Timor Lorosae

Prezensa Xineza, Timor Oan Sai Bainaka Ba Nia Rain Rasik

DILI – Iha dekretu lei no 24/2011 mensiona katak kuandu negosiantes estranjeiru mak mai iha Timor Leste, hodi loke fali merkadu tradisional iha rai laran ho orsamentu la liu milaun ida ba leten, lei la fo dalan.

Ba kestaun nee deputadu Manuel Castro katak negosiantes estranjeirus kontinua domina iha rai laran hodi okupa fatin oi-oin, hodi halo negosoiu iha fatin oi-oin, no nia konsekuensia osan iha Timor laos sirkula iha rai laran maibe semo hotu ba iha rai liur.

Ami komisaun E koalia tiha ona Ministru Planeamentu no Dezenvolvimentu no Ministru Asuntus Koordenador Sosial atu Timor Leste labele sai fila fali bainaka ba ita nia rain rasik,” dehan deputadu Manuel ba STL, iha uma fukun Parlamentu Nasional, Kuarta, (26/10/2016).

Nia hateten, dalaruma simu informasaun barak husi emprezariu nasional katak sira mos iha kapasidade atu investe, atu fo lisensa negosiu kleur la halimar. Maibe, governu fo fila fali ba estranjeiru sira hodi halo investimentu iha rai laran.

Iha fatin ketak, tuir dosente UNDIL, Abel da Costa Pereira katak Xineza kontinua domina iha Timor Leste, maibe realidade neebe mak akontese iha Timr Leste mak governu Timor Leste adopta sistema merkadu livre. Informasaun kompletu iha STL Jornal no STL Web, edisaun Sesta (28/10/2016). Domingos Piedade Freitas

Suara Timor Lorosae

António Maher Lopes / Fatuk Mutin, kandidatu ba Eleisaun Presidensial 2017 - biografia

António Maher Lopes / Fatuk Mutin moris iha Dili, loron 1 Dezembru 1965. Tama Eskola “Ensino Primario” iha Escola Colégio das Madres, Balide, Díli, iha tinan 1971 to’o 1974, tanba “Revolução dos Cravos” nebe’e halo monu rejime fasista português iha loron 25 Abril 1974 no mos tanba situasaun rungu-ranga no forsas agresoras Indonesia nian invade Timor Leste iha loron 7 Dezembru 1975 mak la konsegue remata “Escola Primária”.

Liu tiha tinan 3 (tolu), hahu’u hikas fali “Ensino Primário” iha “Escola Colégio S. Fracisco Xavier”, Dare, iha tinan 1977 no remata iha tinan 1979. Hafoin, tuir aspirantadu ho halo exame admisaun ba “Seminário Menor de Nossa Senhora de Fátima”, Lahane no hahu’u “Ensino Pré-Secundário, Secundário no prepedeútico” iha “Escola Externato de S. José”, Balide, Díli iha tinan 1980 to’o 1987.

Tanba valores ema nian, moral no etika, nia deside ba kontinua estudo iha “Seminário Maior Diocesano”, Malang, Jawa Timur, iha 1987 no remata lisensiatura iha “Sekolah Tinggi Filsafat dan Teologi” (Instituto Superior de Filosofia e Teologia), Widya Sasana, Malang, Jawa Timur iha tinan 1992.

António Lopes / Fatuk Mutin, luta na’in ida enerjiku ba libertasaun patria ida ne’e liu hosi envolve a’an tomak iha asaun Frente Klandestina no iha aktividades resistensia armada hanesan membru Brigada Negra (Força Espesial FALINTIL nian iha kontekstu “Guerrilha Urbana”), iha Indonesia no iha Timor Leste.

Ema politiku ida nebe’e matan no neon kro’at no tasak, ko-fundador FECLITIL – “Frente Estudantil Clandestina para a Independência de Timor Leste” (1989), da AST – “Associação Socialista de Timor” (1991) no PST – “Partido Socialista de Timor” (1996), envolve a’an iha atividades barak sidadania nian, no ohin loron hetan respeitu hosi lideres historikus resistensia nian, hosi Igreja no hanesan referensia diak ida ba juventude, tanba entrega moris tomak ho koerensia no abnegasaun ba moral no etika, ba honestidade intelektual, no hosi ligasaun nebe’e kle’an ho kultura povu Timor Leste nian.

Iha ambitu luta libertasaun nasional, nia sa’i hanesan ko-autor ba “Manual Político AST” ho títulu “O Embrião da Libertação”, no partisipa mos iha redasaun livru rua seluk “ “A luta pela Libertação e o Direito Internacional” no “Fragmento Histórico”.

Oras ne’e dau-daun, António Lopes / Fatuk Mutin, candidatu presidensial ba elesoens 2017 didika a’an hanesan konsultor “free lance” Timor oan nian balun no dedika a’an ba atividade edukasaun sosial no polítika.

- Azancot de Menezes, Kordenador – Komisaun Ad hok ba Kandidatura António Lopes / Fatuk Mutin

“Samala-Rua” Deklara Kandidatura Ba Pezidenti Republika 2017-2022

DILI – Tempu too ona atu hatudu envolvimentu ho kualidade iha estadu nia evolusaun. Tempu too ona atu hamriik ho korajen, protidaun no matenek hodi fo kontinuidade.

Deklarasaun nee fo sai husi Kandidatura Independente ba Prezidente Republika 2017-2022, Jose Antonio de Jesus das Neves “Samala-Rua” iha estatua Joao Paulo II, Comoro-Dili, Kuarta (26/10/2016).

Hau aforma hau nia kandidatura nudar kandidatu independente ba Prezidente Republika, iha eleisaun 2017, neebe deklara ona iha altura rezignasaun husi Komisaun Anti Korupsaun iha fulan Jullu liu ba,” dehan Samala-Rua.

Jose Samala-Rua haktuir, Ukun tuir sistema Governasaun neebe adopta presiza iha alternansia lideransa neebe nakonu ho patriotismu, hodi preserva nafatin ezistensia no funsionamentu estadu husi jerasaun ba jerasaun.

Iha fatin hanesan, Joao da Silva hanesan juventude dehan, razaun nia apoiu ba kandidatura Samala-Rua tanba nasaun nee presiza jerasaun foun mak kaer. Informasaun kompletu iha STL Jornal no STL Web, edisaun Sesta (28/10/2016). Raimundo S. Fraga

Suara Timor Lorosae

FA FO BOLSU ESTUDU BA OAN KIAK 200

Kada  tinan  Fundasaun  Alola  fo  bolsa  estudu  ba  labarik  feto  no  mane  ne’ebé  mak   inan  aman  mate   tiha  ona  no  balun  laiha  kbi’it  hodi  suporta  nia  oan  atu  asesu  edukasaun  iha  nivel  pré-primaria  to’o  ensinu  superior.

“Ami  fó  bolsa  estudu  ba  labarik  feto  no  mane  desde  iha  tinan  2005  to’o  agora  nune’e  kada  tinan  ami  fó  ba  ema  nain  200  laos  ami  para  iha  dalan  klaran, maibé  ami  suporta   hahú  husi  pré-primaria  to’o   iha  nivel  ensinu  superior  universidade,”hatete  diretora   Fundasaun  Alola  Alzira  Reis ba  JN-Diário  iha  Centru  Convenções  de  Dili  (CCD), Kuarta  (26/10). Hafoin  partisipa  enseramentu  serimonia  seminariu  internasional  konaba  turismu  nian.

Diretora Fundasaun Alola  Alzira  Reis hatete, orsamentu  hirak  ne’ebé  mak  sira  suporta  ne’e  mai  husi  doadores   sira, maske  iha  eskola  balun  labarik  sira  la  selu  eskola, maibé  sira  fó  apoiu  nafatin  orsamentu   hodi  labarik  sira  utiliza  ba  hola  kadernu, pasta, lapizeira  no  sira  seluk tan.

“Hau  ladun  lembra  numeru  bolsa  estudu  durante  ne’e, maibé   kada  tinan  ami  fó  ba  labarik  nain  200  liu-liu  ba  labarik  sira  ne’ebé   mak  inan  aman  mate  tiha  ona  no  mós   ba  inan  aman  hirak  ne’ebé  laiha  kbi’it  atu  suporta  nia  oan  hodi  asesu  edukasaun, dehan  Alzira.

Nia  dehan, razaun  sira  fó  bolsa  estudu  ba  kiak  oan  sira, tamba  barak  mak  la  asesu  edukasaun  hodi  eskola  ho  razaun  ekonomia  iha  uma  laran  fraku, inan  aman  mate  hotu  ona  inkluindu  balun  aman  laiha.

Atu  kontinua  ou  hapara   programa  ida  ne’e  konforme  apoiu husi  doadores  sira, maibé  fiar  katak, sei  kontinua  nafatin, tamba  futuru  ba  nasaun  ida  ne’e  iha  jerasaun  foun  sira  nia  liman.Tos

Jornal Nacional

Polísia australianu interoga Kardeal hosi Vatikanu tanba akuzasaun sira pedofilia nian

Responsável aas ba Finansa sira hosi Vatikanu, George Pell, hetan interogasaun hosi polísia australianu iha Roma tanba kesar sira kona-ba abuzu seksual ba labarik sira.

Iha fulan-Jullu, emisora australianu ABC fó sai ona suspeitu sira hosi pedofilia relasionadu ho númeru tolu hosi Vatikanu, ne'ebé maka Pell nega ona.

Polísia hosi estadu Victoria hatete ona, iha komunikadu, katak ajente na'in tolu "ba ona Roma iha semana liubá, ne'ebé kardela George Pell partisipa ona tuir nia hakarak iha entrevista ida kona-ba akuzasaun sira abuzu seksual nian".

"Hanesan rezultadu entrevista nian, sei halo tan investigasaun sira. Agora daudaun ami la preparadu hodi halo komentáriu", hatutan hosi komunikadu ne'e.

Kesar sira mai hosi mane na'in rua, agora ho tinan 40 resin, ne'ebé hatete katak Pell kaer sira ho jeitu la adekuadu iha veraun tinan 1978-1979 iha pixina Eurela, iha Ballarat, Austrália, ne'ebé uluk hanesan fatin kresimentu no serbisu kardeal nian.

ABC fó sai mós katak Pell karik molik iha labarik-mane na'in tolu, ho tinan entre ualu no sanulu, nia oin iha balneáriu ida iha veraun tinan 1986-1987 nian.

Tuir emisora australianu, iha mós kesar sira relasionadu ho Pell durante períudu ne'ebé maka nia sai nu'udar arsebispu Melbourne nian no nia asaun ho labarik-mane sira hosi koru ida iha katedral St. Patrick iha tinan sira 1990.

Pell nega na akuzasaun sira ne'e no sujere ona katak nia sai hanesan vítima hosi konspirasaun ida.

Kesar sira ne'e mosu liutiha fulan balun hafoin Pell admiti katak "halo sala ida" bainhira nia serbisu ho padre pedófilu sira iha estadu Victoria iha tinan 1970, bainhira nia halo deklarasaun sira iha ámbitu hosi investigasaun ida kona-ba resposta institusional ba kazu sira abuzu seksual nian hosi labarik sira iha Austrália.

Iha fulan-Agostu, papa Francisco hatete ona: "Ita tenki evita verediktu mediátiku ida, verediktu ida ne'ebé iha baze hosi boatu sira".

Pell ordena tiha ona iha Roma iha tinan 1966 antes fila ba Austrália iha tinan 1971 no sai nu'udar reprezentante prinsipal hosi Igreja Katólika iha nasaun.

Nia muda ba Vatikanu iha tinan 2014, no Papa Francisco hili rasik nia hodi halo finansa sira hosi Vatikanu nian sai liu transparente.

SAPO TL ho Lusa

Maioria hosi ema sira ne’ebé hela iha Dili tauk atu lakon uma no rai - sondajen

Maioria hosi ema sira ne’ebé hela iha Dili, preokupa tanba sir abele lakon uma no rai ne’ebé sira hela ba no besik 40% maka hela ona iha Dili, desde 1999, tuir dadus dahuluk hosi inkéritu ida ne’ebé fó sai ohin. 

59% maka haktuir katak, tauk atu lakon uma ka rai iha tinan lima tuir mai, persentajen ne’ebé tuun ba 5% iha munisipiu seluk.

Tuir dadus ne’ebé fó sai durante debate ida iha Dili, organiza hosi Asia Foundation hatudu katak 20% hosi ema sira ne’ebé hela iha kapitál, foin maka hela desde 2008 no 56% laiha tan rai ka uma seluk.

Sondajen ne’ebé hala’o hosi Asia Foundation nomós hosi Laden University, rona ema hamutuk 384 iha distritu balun hanesan Dili, Ermera no Ainaro kona-ba asesu rai, na’in ba rai nomós rezolusaun kona-ba problema hadau-malu rai.

Iha Timor-Leste, kahur direitu tradisionál nomós kostumi ho uzukapiaun no títulu hosi propriedade ne’ebé husi hela durante administrasaun portugeza ho indonézia.

Violénsia 1999 nian, hafoin referendu ba autodeterminasaun nomós krizi 2006 maka halo timor-oan barak muda mai muda sai hosi sira rain, no buka hadia moris família nian iha Dili, liu hosi buka serbisu, no okupa uma hirak ne’e.

Susan Marx, responsável hosi Asia Foundation nian iha Díli, esplika katak objetivu maka atu fó kontribuisaun hodi “ajuda prosesu atuál hosi definisaun polítika kona-ba rai”.

“Polítika rai nian, kontinua sai hanesan dezafiu prinsipál, no laiha resposta ne’ebé fasil. Ho informasaun no dadus ne’ebé barak, maka ita konsege hetan resposta hirak ne'ebé di’ak hodi proteje família nomós aumenta konfiansa ba investimentu setór privadu nian”, dehan, hodi nota katak sees hosi kuadru legál, “sei sempre iha disputa, presija atu jere nomós rezolve”.

Parlamentu analiza hela diplomata tolu kona-ba setór hitu, inklui titular hosi bens imóvel nomós lei espropriasaun foun.

Prosesu ba rejistu kadastrál iha teritóriu laran la’o daudaun, nu’udar projetu luzu-timorense ne’ebé foti ona rejistu besik rihun 107.

Sondajen loron ohin nian ne’e, hatudu diferensa entre zona urbana Dili ho distritu hirak ne’ebé rurál, hanesan Ermera ho Ainaro.

Kona-ba titularidade, purezemplu, iha Ermera maka ho persentajen bot hetan rai desde administrasaun portugeza (54% hosi totál) no Dili ladun bot (20%). Iha parte seluk, hanesan iha kapitál ne’ebé ema hela barak (41%) maka dehan hetan rai desde okupasaun indonézia (29% iha Ermera).

Iha Dili, 18% dehan katak hetan asesu ba rai hosi kedas 1999 to’o 2007 no 21% desde 2008; 34% maka dehan sira sosa no 32% maka hanesan eransa. Iha Ermera no Ainaro 70% maka haktuir katak nu’udar eransa.

Husu kona-ba karik agora sei iha tan rai, sira hatan katak sim, 44% maka hatan hosi parte Dili, 84% hosi Ermera no 93% hosi Ainaro. Tuir estudu, hosi inkriridu 80% hosi Díli, 89% hosi Ermera no 78% hosi Ainaro dehan katak lafasil atu sosa rai, tanba laiha osan ka merkadu, no la’os ema barak maka hakarak fan.

Tuir esplikasaun hosi Bernardo Almeida, Leiden University nian katak, ema besik 85% hosi distritu tolu maka haktuir katak, maski buat hirak ne’e hotu, maibé sufisiente ba sira atu moris.

Maski hosi kuaze totalidade (ka totalidade hosi kazu Ainaro) karik dehan na’in ba rai, maibé tuir persentajen ne’ebé iha hatudu katak, labele faan ka fó aluga rai ne’ebé sira iha, tanba hakarak husik hanesan eransa.

Hosi ema 45% iha Dili no 81% iha munisipiu Dili, maka dehan katak laiha títulu formál kona-ba na’in ba rai, hanesan dadus hirak ne’ebé autór hosi estudu nian konsidera “otimista”, ho maioria hosi títulu indonézia nian.

Kona-ba hadau malu rai, maioria hakarak hetan intervensaun hosi xefe lokál ka tradisionál sira no minoria de’it maka hakarak lori ba to’o iha tribunál.

Média hosi 10% hosi fatin hothotu dehan katak, sira hadau malu rai ho sira-ninia família ka ho Estadu kona-ba propriedade.

SAPO TL ho Lusa - Foto SAPO TL

HOTEL NOVO TURISMO HETAN PREMIU EXCELENTE HUSI GOVERNU

Hotel Novo Turismo ho Restaurante Novo Turismo, Kuarta (26/10) simu premiu nudar hotel excelente “award” husi governu Timor Leste, tamba Hotel Novo Turismo no Restaurante Novo Turismo tama kategoria Hotel no Restaurante nebe halo atendementu diak liu iha Timor Leste.

Premiu nee entrega husi Ministru Turismo Arte e Cultura, Francisco Kalbuadi Lay iha serimonia enseramentu Konferensia Internasional konaba Turismo nian nebe halao durante loron tolu iha CCD, Caicoli, Dili.

Premiu rua nebe Hotel Novo Turismo no Restaurante Novo Turismo nian simu ho valor 555 nebe tama kategoria A,  premiu ‘ Muito bom’ nebe entrega husi Ministru Francisco Kalbuadi Lay. Ba Jornal Nacional Diario. Francisco Kalbuadi Lay hatete governu entrega premiu kategora A ba Hotel Novo Turismo no Restaurante Novo Turismo tamba hotel ho restaurante nee mos, simu ema ho diak no hamnasa,  rapido no hahan nebe iha mos diak.

Ministru Turismu Arte e Kultura, Francisco Kalbuadi mos hatutan tan katak premiu nee hanesan motivasaun ba hotel ho restaurante sira hodi hasae kualidade para servi, li-liu atu simu ema turista sira.

Nunee mos nain ba Hotel Novo Turismo no Restaurante Novo Turismo, Jorge Serrano hatete premiu nee mai husi MTAC nebe nia rasik lahatene, derepenti bolu nia ba oin simu premiu nee mak nia senti hakfodak.

“Ida nee mai husi MTAC mak halo hau mos lahatene mai iha nee mak hau  hakfodak no supreza, maibe nee la ses hosi servisu makaas no esforsu husi ita nia alin timor oan sira nebe ita forma iha Hotel no resturante  no mos maluk balu nebe mai husi rai liur, Bali no Portugal hodi hetan resultadu diak” dehan Jorge Serrano.

Emprezariu Joven Timor nee mos dehan premiu nee hanesan toda ida ba nia atu hadia diak liu tan no mantein buat diak nebe iha tiha ona. lia

Jornal Nacional

Presiza Polítika Klaru, Atu Dezenvolve Turizmu Iha Timor–Leste

DILI, (ANTIL) – Reitór Dili Institute of Technology (DIT), Manuel Vong hateten, turizmu mak setór ne’ebé estratéjiku ba dezenvolvimentu,liu-liu  Timor-Leste. Tanba, presiza polítika  klaru.

”Vunerabel tebes wainhira ita la dezenvolve ho didi’ak.Komunidades sira mak tenke sai hanesan autór ba dezenvolvimentu ne’e rasik. Bainhira turizmu sai hanesan industria, bele lori benifísiu ba ema tomak,” Manuel Vong hateten ba jornalista sira, foin daaun Dili, bainhira partisipa Konferenrensia Internasional kona-ba turizmu.

Hanesan nasaun ki’ik, Manuel Vong dehan , Timor-Leste presiza aprende husi esperiensia jestaun turizmu nasuan seluk. Husi konferensia ne’e, lori na Timor-Leste ba mundu no loke ona odomatan turistiku ba mundu.

Konferensia durante loron tolu ne’e, mosu perspetiva importante husi peritus sira, kona-ba potensia husi Timor Leste nia turizmu iha futuru. ” Timor-Leste bele kontribui ba dezenvolvimentu turizmu mundial. Nune’e, presiza prepara an atu sai distinu turistiku ne’ebe determinante,” nia dehan tan.

Ministru Turizmu, Arte no Kultura, Francisco Kalbuady Lay hateten, kooperasaun entre Governu ho DIT  hanesan meius ida, atu kontribui ba dezenvolvimentu turizmu.  “Nudar nasaun foun, ita preciza rona husi péritu sira hotu, atu dezenvolve setór turizmu nian”, Francisco Kalbuady Lay ba Jornalista sira iha Sentru Konvensaun Dili, Kuarta (26/10).

DIT, MTAK no Universidade Algarve, sei servisu hamutuk atu produz livru  ida kona-ba rezultadu konferensia, liuliu ideia sira ne’ebe mosu durante konferensia internasional ne’e. ” Ekipa tékniku sira sei prepara atu  sai dokumentu no kontribuisaun ba dezenvolvimentu siensia no investigasaun sentífika iha área turizmu, ne’ebé liga ho área seluk”, nia dehan.  (Jornalista: Julia Chatarina/Editor: Otelio Ote)

Foto: Ministru Turizmu no Arte Kultura, Francisco Kalbuady

Turizmu Bele Subtitui Petróliu ba Reseita Nasionál

DILI, (ANTIL) –  Reitór Dili Institut Technology (DIT) Manuel Vong hatete, bainhira turizmu dezenvolve ho di’ak mak sai rekursu nasionál hodi subtitui petróleu bainhira maran. Tanba ne’e, turizmu sai pilar importante ba dezenvolvimentu ekonómiku sosiál ne’ebé sustentavel ba Timor-Leste.

“Turizmu ho setór agrikultura bele subtitui petróliu bainhira maran”, Manuel Vong hatete iha enseramentu Konferénsia Internasionál Destinu Emerjénsia Turismu: Dezafius no Oportunidades iha Sentru Konvensaun Dili, Kuarta, (26/10).

Iha enserramentu ne’e, partisipa mós Ministru Planeamentu Estratéjiku no Dezenvolvimentu, Xanana Gusmão, Ministru Turismu, Arte no Kultura, Francisco Lay ne’ebé halo mós deskursu iha enserramentu ne’e.

Ba audiénsia, Reitór DIT dehan, Xanana rasik mak lidera planu stratéjiku dezenvolvimentu nasionál 2011 to’o 2030 ne’ebé hatudu turizmu nu’udar pilar importante iha dezenvolvimentu ekonómiku Timor-Leste nian alende setór agrikultura no setór petróliu.

Esperiensia internasionál hatudu katak, governu barak mak konsolida ona dezenvolvimentu turísztiku iha dékade ikus nia nu’udar setór xave ba kriasaun empregu no bem estar komunidade sira nian, liu-liu bainhira turizmu ne’e haree hosi perspetiva dezenvolvimentu turiztiku no baze komunitáriu iha ámbitu distinu turístiku emerjénsia.

“Ne’e sai assuntu ne’ebé ami diskuti iha konferénsia ida ne’e mak lori peritus no investigadores husi nasaun sia, fó komunikasaun hamutuk 50 ne’ebé aprezenta durante loron tolu”, Manuel Vong informa.

Nia esplika tan, iha konferénsia ne’e akadémikus hamutuk ho oradór konvidadus internasionál sira fó sira nia hanoin no esperiensia hamutuk atu dezenvolve setór turizmu iha Timor-Leste. Rezultadu konferénsia ne’e sei públika iha forma livru no sei haruka ba konsiderasaun governu nian, no-mós ba públiku interresadu ou parseiru sira.

Manuel Vong hatutan, rezultadu sira ne’e bele sai kontribuisaun kompleta ba dezenvolve turizmu iha Timor-Leste. (jornalista: Julia Chatarina; editora: Rita Almeida)

Foto: Kristu Rei parte hosi turizmu ne'ebé presiza dezenvolve di'ak liutan. Foto Espesiál

TELEFONE ESTADU BA UZO PRIVADU…!!!

Jornal Nacional, editorial

Kompanhia Timor Telekom (TT) durante nee ejiji governu Timor Leste atu selu tusan kuaze 8 milloens Dollar Amerikanu nebe governu nee iha ho kompanhia telekomunikasaun,Timor Telekom.

Maske Timor Telekom ejiji ona governu atu selu maibe governu rasik, li-liu Ministeriu Finansas sei halo cross chek ba ministeriu sira atu bele konfirma total kustu tuir ministeriu ida idak nian nebe kompanhia telekomunikasaun nee nian nebe apresenta ba governu.

Governu Timor Leste halo kontratu konsensaun ho kompanhia Timor Telekom hodi establese rede telekomunikasaun iha Timor Leste nee iha tinan 2002 nebe durasaun tinan 15 (2002 -2017).

Planu nebe governu uluk iha katak Timor Telekom nee sei sai futuru investementu publiku Timor nian katak depois de tinan 15, kompanhia sosiu, Portugal Telkom, Macau Telkom, governu Timor no kompanhai balu tan nee atu TT nee hela ba estadu Timor Leste.

Maibe iha tempo Governu Aliansa Maioria Parlamentar nia ukun iha tinan hirak liu ba loke liberalizasaun telekomunikasaun hodi loke uportunidade ba kompanhia telekomunikasaun seluk, Telemor no Telkomcel mai halo kompetisaun ho Timor Telekom nebe implika ba prologamentu tranferensia TT ba governu Timor.

Agora duvida mak nee tusan nebe boot nee mai husi nebe? Governu ida nebe ninia responsabilidade? Primeiru governu Konstitusional (governu FRETILIN), governu AMP ka  Bloku Koligasaun? Husi primeiru governu too VI governu konstitusional nee ida nebe mak tusan barak liu? presia auditoria atu halo audit.

“… ami detekta katak eis ministru sira durante tinan lima, tinan nen sira la’os ministru ona, mas sira sei uza nafatin telephone ho rooming internasional, tanba ne’e maka Governu bele selu, maibe tenke identifika katak telefone ne’e sira uza privadu no sira mak tenke selu rasik, labele uza orsamentu Estado ba sira nia nesesidade privadu,” Fernanda Lay

Los duni senhora governu antes selu tusan nee tenki konfirma lolos lai no buka eis ministru sira nebe kontinua uza hela telefone Estadu nian tenki husu responsabilidade ba sira atu nunee labele tau todan hotu ba governu.

Agora eis membru governu sira kontinua uza telefone Estadu nian nee se nia kulpa? Buat sira nee akontese tamba sistema kontrolu governu nian mak ladun diak hodi nunee eis membru governu goza nafatin telefone Estadu nian nebe ikus mai halo tusan bar-barak ba Estadu.

Buat tusan nee hakarak ka lakohi governu tenki selu. Importante mak governu tenki konfirma didiak, konfirma lolos katak total osan nebe TT ejiji los duni ka lae?, nunee mos ministeriu nebe mak tusan barak liu? no oinsa ho eis membru governu sira nebe uza no membru governu sira atual uza nee mos ba saida deit? atu nuee governu komesa kontrola ona.

Nunee mos governu tenki difini ona se se mak bele uza telefone Estadu, laos kliner mos uza telefone Estadu. Telefone Estadu nian nee merese ba Membru Governu too Direktor Geral  nee mos tenki limita rekarga ka pulsa, labele uza too rede mak la aguenta.

“Foin dadaun Konsellu Ministrus hasai tiha ona rezolusaun ida ba hot-hotu para bele husik pospagu, hot-hotu ba prepagu” Santina Cardoso. Nee bele solusaun ida atu evita problema hanesan iha futuru. *

ANTONINHO BIANCO KONSIDERA, GOVERNU PARTIDARIZA MAKINA ESTADU

Membru Parlamentu Nasional (PN) husi Bankada FRETILIN, Antoninho Bianco, konsidera governu partidariza makina Estadu nian.Tamba dekretu lei Governu Numeru 37/2006 iha loron 7 Setembru, nebe promove ema husi Estatal tau iha postu administrativu la liu husi konkursu.

“Governu iha tinan ida ne’e nia laran, Ministeriu hira hira, dun malu, maibe agora hau sita liu kona ba Ministeriu Administrasaun Estatal halo dekreitu lei ida ne’ebe Governu rame-rame, dekreitu lei numeru 37/2006 iha dia 7 de Setembru, dekreitu lei ne’e hau haree hanesan tempu Indonesia nian dehan keputusan Presiden  (Kepres-red) ita bele dehan hanesan agora iha Governu, Konselho Ministru diside hasai dekreitu lei ida ne’ebe promove ema husi pangkat 1 ba 2,3,4,” dehan Deputadu Antoninho Bianco iha plenaria PN, Tersa (25/10/2016).

Nia dehan, klaru deit katak dekreitu lei ida ne’e atu promove ema sira nebe ESTATAL tau iha postu administrativu hodi la tuir konkursu, momentu ne’eba dehan tau provisoriu para atu tuir konkursu, maibe la konsege halo konkursu agora halo dekreitu lei ida atu tau fali iha ne’e legalmente, mantein iha fatin ne’e la tuir konkursu agora dekreitu lei mai fo forsa para atu dehan mantein iha fatin ho naik pangkat istimewa.

“Ita halo violasaun ba lei nebe iha, estatutu funsaun publik  iha, komisaun Funsaun Publiku hato’o nia servisu ida ne’e, ita halo dekreitu lei ida ne’ebe Governu rasik maka viola nia prinsipiu rasik, ne’e labele simu, hau husu Governu tenki responsabiliza ida ne’e i komisaun Funsaun Publiku tenki responsabiliza ida ne’e, mai iha PN ita halo diskusaun tanba dekreitu lei ne’e hatete ema nebe la priense rekezitus maibe dekreitu ne’e tama sira automatikamente promovidu i hela fatin ne’e mesmu nia grau ne’e imprerior, ne’e ita halimar ho Estadu,” afirma Antoninho Bianco.

Nia hatutan, iha tempu Aliansa Maioria Parlamentar (AMP) kria Komisaun Funsaun Publiku, iha neba dehan labele partidariza, labele familiarismu, labele nepotismu, ikus mai iha tinan 2016, Governu halo buat ida sistematikamente hanesan halo destroisaun.

La aseita atu troka eleitoral

Deputadu Antoninho Bianco husi komisaun C nebe trata konaba Finansas Publiku, mos  la konkorda ho desisaun Governu ne’ebe atu troka kartaun eleitoral.

“Se tanba deit direitor maka ita tenki troka entaun Pasporte, BI rekolha hotu, ne’e ita hakarak halimar osan, ne’e projeitu, ne’e labele, diretor STAE ohin sae maka aban bainrua nia sai ita halo fali ne’e la bele, ita halo kartaun ne’e laos tanba ema maibe tanba STAE, instituisaun ne’e maka importante laos tanba ema, hau la konkorda ho Governu nia desisaun ida ne’e,” dehan Deputadu Antoninho Bianco.

Iha fatin hanesan Deputada Ilda Maria husi mos Bankada FRETILIN hateten, karik atu troka tanba deit diretor nia naran laos ba Deputadu deit maibe ba sidadaun hotu – hotu, ne’ebe persiza hare tanba sei gasta osan, maibe kolega sira hare ida ne’e isbanjamentu entaun PN maka diside, la persiza tau osan.

Prezidenti bankada FRETILIN, Aniceto Guterres hatete iha enkontru lideres bankada mos hatete katak sei renova kartaun eleitoral ba Deputadu sira, maibe informsaun ne’e seidauk klaru, wainhira, iha nebe, keta halo balun desloka ba foho entaun la konsege halo. nes

Jornal Nacional

Lalos Dehan Ukun Nain Laiha Vontade Kombate Korupsaun

DILI – Deputadu bankada CNRT Arao Noe hateten, lalos dehan ukun nain sira neebe maka ukun nasaun ida nee laiha vontade para atu kombate korupsaun, tanba iha Governu AMP hari ona istituisaun KAK para hodi halo investigasaun ba aktu korupsaun.

Publiku nia kolia dehan ukun nain sira laiha vontade kombate korupsaun nee lalos, tanba  ita kria KAK, ita kodeku penal kapitulu ida kolia krimi korpsaun ninian, ita halao hela invetigasaun krimi sira ba korupsaun nian, neebe dehan laiha nee hau dehan bosok latuir realidade ,” dehan deputadu Arao, ba STL, iha PN, Dili, Kuarta (26/10/2016).

Nia dehan, agora dadauk Tribunal bolu ona eis Membru Governu balu neebe maka deskonfia komete iha korupsaun ba hatan iha Tribunal, maibe juis ka Tribunal nee halao funsaun netral lolos, hare ba lei no konsiensia labele halo tuir gostu.

Iha fatin hanesan deputadu bankada PD Virgilio Hornai hateten iha kuadru sira hanesan lei ba KAK, agora atu tama ba revizaun nee para atu fo kompetensia ida neebe maximu ba KAK atu bele halao nia knar iha prosesu investigasaun, I akuzasaun ba indisiu korupsaun ruma karik nee sira bele halo.

Entretantu deputadu husi bankada Frente mudansa Jorge Teme dehan, se povu senti hanesan nee eleisaun mai lalika hili sira, hili partidu kiik sira maka ukun, hili nafatin sira tinan-tinan halikar nafatin, mudansa nunka halo. Informasaun kompletu iha STL Jornal no STL Web, edisaun Kinta (27/10/2016). Carme Ximenes

Suara Timor Lorosae

Kazu Emilia Tribunal Laiha Interese, Lori Tempu Tanba Prezuizu Osan Boot

DILI - Ema hotu iha direitu hanesan atu hetan justisa no lialos, tribunal la fihir ba ema boot ka kiik. Julgamentu Emilia lori tempu naruk, tanba kazu kompleksu ho prezuizu osan $811.040,00 dolar Americanu.

Tuir Juiz prosesu kazu Emilia nian hatete, iha prosesu julgamentu kazu arguida Emilia Pires nian neebe lori tempu naruk tanba kazu kompleksu presiza provas barak no sasin mos barak. Alende nee iha mos rekerimentu barak mai husi parte defesa no ministeriu publiku neebe tribunal tenke responde.

Nia hatutan, kona ba arguida la kumpri hodi la entrega pasaporte tuir loron neebe determina sei hasoru fali krime foun. Tribunal fo tan tempu loron lima ba arguida, tanba nia halao servisu estadu nian neemak razaun tribunal fo tan tempu ba nia.

Razaun fundamental ida mak tanba arguida halao misaun estadu nian. Nia servisu ba rai ida nee, maibe hanesan sidadaun tenke hakruk ba lei. Neebe ho prolonga tan loron lima ba nia mak la kumpri nafatin, tribunal sei hasai mandadu kapturasaun ba nia tuir saida mak ministeriu publiku husu.

Juis nee hatutan, juiz prosesu laos kaer deit prosesu ida nee. Iha mos prosesu kolektivu seluk mak juiz halo julgamentu. Ba kazu kiik neebe lalais mak hanesan prosesu sumario, tribunal tenke atende uluk prezu neebe mak halo detensaun 72 iha prizaun. Neebe kazu sumariu no komum nee iha diferensia. Kazu neebe iha fase investigasaun naruk, presiza tempu naruk.

Iha fatin hanesan Juiz Prezidenti Assosiasaun dos Magistradu Judisiais de Timor Leste (AMJTL) Antonio Gonçalves haktuir, tribunal laiha interese ba prosesu neebe tama mai. Iha prinsipiu justisa nee la fihir ba kor ema ida-idak, ema hotu hanesan iha tribunal nia oin. Iha nee so kazu kompleksu mak tenke lori tempu, kazu kompleksu nee katak kazu nee presiza ema testamunha barak, presiza dokumentus barak tanba kona ba osan nian. Kona ba kazu nee lei mos fo fatin bele lori tempu. Informasaun kompletu iha STL Jornal no STL Web, edisaun Kinta (27/10/2016). Domingas Gomes

Suara Timor Lorosae

Eleisaun Zeral 2017, Estadu La fo Osan ba PARPOL Halo Kampaina

DILI - Elisaun Zeral Prezidensial no Parlamentar neebe sei halao iha 2017 kandidatura Prezidente Republika no partidu Politiku (PARPOL), estadu sei la fo osan hodi halo kampaina maibe sei reorsamentu hafoin elisaun tuir votus neebe sira hetan.

Tuir Deputadu Bankada Fretilin Antoninho Bianco hatete bazea ba lei neebe mak iha partidu kiik no boot neebe partisipa ida-idak ba kampaina, uza meus rasik no osan rasik hodi halo kampaina atu halao kampaina nivel nasional no munisipal ho osan rasik.

Partidu politiku sira atu halao kampaina iha nivel nasional, munisipal kuandu lao ida-idak uza osan rasik, orsamentu estadu sei la fo ba partidu ida-idak atu halo kampaina, estadu sei fo osan depois elisaun hotu tuir votus neebe hetan,” dehan Antoninho ba STL kuarta (26/10/2016) iha Parlamentu Nasional.

Nia hatete kuandu remata elisaun partidu sira hetan votus mak governu dekreta hodi bele atribui verba balun ba partidu hetan votus husi elitores sira, estadu bele fo osan atraves votus neebe mak sira hetan.

Iha fatin hanesan Deputadu Bankada PD Adriano Nacimento  hatete partidu politiku sira neebe mak partisipa iha elisaun zeral 2017 iha ona lei hodi regula, orsamentu ba elisaun nian governu mak hatene liu. Informasaun kompletu iha STL Jornal no STL Web, edisaun Kinta (27/10/2016). Timotio Gusmao

Suara Timor Lorosae

OJE 2017 Governu Propoin Bilaun 1.3

DILI - Orsamentu Jeral Estadu ba tinan 2017, Governu propoin kuaze Bilaun 1.3 para Parlamentu Nasional (PN) bele aprova.

Ministra Finansas Santina Cardoso hateten, Orsamentu Jeral Estadu 2017 tuir lei neebe maka tama kuaze un Bilaun trezentus oitenta seis miloens oitsentus vinte seis, ida nee inkuli imprestimu, se lainklui emprestimu total orsamentu jeral un bilaun dozentus ointenta sinku miloens.

Iha prosesu elaborasaun orsamentu jeral estadu 2017 hau hanoin Governu hanesan bain bain neebe ke ita partisipa iha jornadas orsamentais Governu iha kompremisiu ida, atu bele hare debe sira neebe ita kategoria hanesan despeza presplus, redus despeza sira neebe ke husi persplus maibe fokus liu ba programa prioridade Governu nian,” dehan MF Santina, banhira halo audensia ho Komisaun C (PN), Kuarta (25/10/2016).

Nia dehan, Prioridade Governu nian sei iha prioridade haat neebe maka hanesan Agrikultura, Turismu no mos iha parte infraestrutura nian, Agua no saniamentu neebe maka sai hanesan prioridade Governu nia.

Iha fatin eputada Bankada Fretilin Ilda Da Connceicao hateten Orsamentu Jeral estadu 2017 sira hare liu liu ba merenda eskolar iha despezas boot iha fatin rua, ida bens de servisu diza sete pontu seis miloens, mai fali iha tranferensia publik sete pontu sete miloens. Informasaun kompletu iha STL Jornal no STL Web, edisaun Kinta (27/10/2016). Carme Ximenes

Suara Timor Lorosae