AMP Husu Autoridade Kompetente Avalia Kampaña

DILI: Dirijente partidu koligasaun Aliansa Mudansa ba Progresu (AMP) husu ba autoridade kompetente sira atu halo avaliasaun ba kampaña politika eleisaun antesipada, tanba irregularidade barak maka mosu durante tempu ne’e.

Vice Koordenador Juridisaun AMP, Tiago Sarmento hatete, durante loron 14 iha kampaãa lao nota no indika iha iregularidade balun mosu. Informasaun katak, membru governu balun halo ona autorizasaun ba ninia viazem uza kargu publiku ba tuir kampani.

Ne’e duni, husu ba Provedoria Direitus Humanus no Justisa (PDHJ), Ministeriu Publiku (MP) no Polisia Nasional Timor-Leste (PNTL) atu haree asuntu hirak ne’e.

“Uza fali kargu publiku ba halo fali instrumentu kampana eleitoral ne’e halo violasaun ba regra kampana no iha kodigu penal mós koalia klaru bainhira iha abuzu poder ba aktu sira hanesan ne’e”, dehan nia, iha sede CNRT, Bairu Grillos, horisehik.

Informasaun ne’e sira hetan husi Oekusi lider balun rekolla kartaun eleitoral no fahe mós foos ba xefe suku sira ne’e hamosu duvida. Tanba halao iha sitauasaun kampana nia laran.

“Ami konsidera hanesan sosa votus. Ami husu ba PNTL, CNE atu halo investigasaun”, tenik nia.

Iha fatin hanesan, Membru AMP Carmelita Moniz hatete, kona-ba kargu publiku ba membru governu sira hahú husi Primeiru Ministru mai too membru governu tomak iha direitu tomak atu tuir kampana eleitoral, maibé tenke husik kargu, nune’e labele uza fasilidade Estadu nian hodi ba halo atividade partidaria iha tempu kampania eleitoral.

“Ami foin haree fali ida ne’e, iha membru governu ida hasai rasik autorizasaun ba niaaan. Ita haree ne’e la tama regra”, tenik nia.

Nia hatutan, membru governu sira hakarak atu halo supervizaun mezmu laiha knaar atu halo, maibé knaar ne’e CNE nian ona se nia hakarak tuir lalaok kampania hanesan membru governu labele uza atributu kampaña.

Entertantu, Koordenadór Juridisaun AMP, Arão Noe de Jesus hatete, kona-ba asaun sira ne’ebé partidu politiku balun fahe foos ba xefe suku sira ne’ebé la liu husi Ministeriu Solidaridade Sosiál (SS) di’ak liu halo transparante de’it labele lori subar-subar fali, asaun ne’e deskonfia atu sosa votu.

Hakarak asaun ne’e formal tenke halo tuir nia formalidade nune’e mos hamos estrda loron ida $3 iha Oecusse ne’e laos projeitu gasata osan estadu tenke ba ema hotu labele halo de’it ba partidu ia ema no asaun sira ne’ebe deteka sei halo prosesu ba oin hodi keisa ba CNE no iha dalan sei bele ba MP no prosesu legal sei hatoo.

Lígia Noronha | Independente

PEP La Konsege Realiza Kampaña Aberta iha Baukau

DILI, (TATOLI) – Partidu Esperansa Pátria (PEP), ohin la konsege realiza kampaña aberta iha jináziu Baukau ho razaun mosu fallansu hosi estrutura munisipál, maibé tama no sai uma kontinua la’o.

Tuir kalendáriu kampaña eleitorál ne’ebé fó sai hosi Komisaun Nasionál Eleisaun (CNE-sigla portugés) katak PEP halo kampaña aberta iha salaun jináziu Baukau maibé laiha ema ida mak partisipa, fatin mamuk.

Iha fatin kampaña Tatoli koko kofirma ba portavós PEP, Eduardo Magno, maibé la konsege atende hodi klarifika razaun sira.

Fatin kampaña ne’e hetan prezensa hosi komisáriu no observadór CNE sira maibé kampu mamuk no sira deside fila.

Hafoin ema hotu fila, iha tuku 15:00, portavós PEP, Eduardo Magno, telefone hikas jornalista ajénsia Tatoli hodi klarifika katak kampaña aberta la konsege halo tanba problema ka fallansu estrutura munisípiu Baukau nian, enkuantu dor to dor la’o nafatin iha tuku 6:00 too 18:00.

Jornalista: Zezito Silva | Editora: Rita Almeida

Imajen: Fatin kampaña PEP Jinásiu Baukau. Foto Zezito Silva

Deskonfia Militante Parpol Asaltu Malu Iha Laga

DILI - Deskonfia militante partidu politiku balun asalta malu iha Postu Administrativu Laga, Munisipiu Baucau iha loron (25/04/2018), liu ba.

Tuir Segundu Komandante PNTL Munisipiu Baucau, Superintendente Assistente Polisia, Joni Viana hateten, kazu neebe iha laga entre masa ho masa, needuni nia prosesu oras nee lao hela iha eskuadra PNTL Laga.

"Nee ema deskonesidu mak halo, neebe prosesu investigasaun ba mak ita haree,” dehan Joni ba STL liu husi Via telefone Sesta, (27/04/2018.)

Nia dehan, iha momentu neeba polisia halo identiofikasaun no sei bolu atu nunee bele mai fo deklarasaun ba polisia  kona ba kazu asaltu malu nee.

Enkuantu Xefe Estadu Maior Jeneral Falentil-Forsa Defeza Timor Leste (F-FDTL), Jeneral Lere Anan Timur, konsidera kazu asalta malu entre militante husi partidu balun iha Laga neebe akontese iha loron rua liu, nee kazu normal, laos situasaun grave. 

Notisia kompletu lee iha jornal STL edisaun Sabado, (28/04/2018)

Luciana Ximenes | Suara Timor Lorosae

Konsumu-Fan Droga MC Tama Prizaun

DILI - Tribunal Distrital Dili (TDD) iha loron Sesta, (27/04/2018) liu husi primeira interogatoriu, Juiz prosesu aplika pena prizaun preventiva ba arguidu MC, tanba provadu iha indisus forte, katak arguidu konsumu droga, no fan mos droga ba ema seluk.

Arguidu kontra lei numeru 2/2017 de 25 de Fevereru lei konaba, kombate trafiku no elesito ba droga. Iha artigu 7 konaba, trafiku atividade elesito ba droga, neebe nia pena prizaun husi tinan lima, too tinan 15.

Bainhira rona tiha desizaun arguidu lori kedan ba iha prizaun preventiva, hodi hein prosesu investigasaun ba oin.

Arguidu deskonfia konsumu no fan droga, tanba nee polisia hetan mandadu hodi ba halo kapturasaun ba arguidu, iha Becora Becuse.

Audensia nee prezide husi Juiz singular Sribuana da Costa, Ministeriu Publiku reprezenta husi prokurador Rogerio Viegas, arguidu hetan asistensia legal husi defensor publiku Afonso Gomes. 

Notisia kompletu lee iha jornal STL edisaun Sabado, (28/04/2018)

Terezinha De Deus | Suara Timor Lorosae

Mari Alkatiri konfiante iha Fretilin nia vitória iha 12 Maiu

Iha loron-sesta ne'e, sekretáriu-jeral Fretilin, Mari Alkatiri, hatudu konfiante iha vitória partidu nian iha lejislativu antesipadu loron 12 Maiu iha Timor-Leste, hodi refere ba asaun ne'ebé nia hatete hanesan onda joven sira ne'ebé "maka la moris hosi nostaljia".

"Ha'u laiha ona dúvida ba asuntu ne'e. Ami sei manán eleisaun sira ne'e no reasaun hosi parte seluk hatudu tiha ona, ne'ebé hatene ona katak sei lakon", Alkatiri hatete iha komísiu ki'ik ida iha kapital timoroan nian, ne'ebé maka ona hosi forsa prinsipal rua konkorente iha votasaun ne'e, Frente Revolucionária do Timor-Leste Independente (Fretilin) ho Aliansa Mudansa ba Progresu (AMP).

Fretilin nia kampaña, partidu ne'ebé manán ho marjen mínimu iha eleisaun fulan-Jullu tinan liubá, ko'alia nafatin iha programa hosi Governu dahitu, apoia hosi aliansa minoritáriu ida ho Partidu Demokrátiku (PD).

Opozisaun, ne'ebé hamutuk iha bloku, konsege ona ho nia maioria, blokeia orsamentu retifikativu ho programa Governu nian, kria problema polítiku ida ne'ebé halo xefe Estadu, Francisco Guterres Lu-Olo, konvoka eleisaun antesipadu.

Alkatiri hatete katak hafoin eleisaun sira tinan liubá no hafoin akontesimentu sira iha fulan hirak ikus ne'e, apoiu ba partidu aumenta nafatin tanba ema barak "senti kolen ho governasaun ne'ebé ladi'ak, ho governasaun ida ne'ebé laiha rezultadu sira, ho governasaun ida gasta maka'as".

Nia haree liuliu prezensa maka'as hosi joven sira durante kampaña, fator ida ne'ebé, ho baze iha pirámide populasaun iha Timor-Leste - populasaun barak liu seidauk iha tinan 30 - hanesan determinante ba votu.

"Haree de'it katak maioria ne'ebé marka prezensa hanesan joven no hatudu katak juventude, ne'ebé la moris ona hosi nostaljia, hakarak haree ba futuru, no sira ne'ebé maka moris iha nostaljia sei kontinua nafatin ba sira nia oan no sira nia bei-oan", nia hatete.

Alkatiri nia komentáriu sira refere ba tema ida ne'ebé marka nafatin kampaña AMP nian ho referénsia sira ba pasadu hosi luta hasoru okupasaun indonéziu no ba independénsia Timor-Leste nian, ho tentativa hosi dirijente balun hodi politiza frente oioin hosi rezisténsia: armada, klandestina ho diplomátika.

Alkatiri ko'alia ba Lusa durante komísiu ki'ik ida ne'ebé hala'o iha kampu Mascarenhas nian, iha Díli.

Dirijente oioin hosi partidu partisipa ona iha enkontru ne'ebé marka ona prezensa hosi mákina kampaña Fretilin nian ba rejiaun kapital nian, ho asaun oioin ne'ebé hanoin halo iha Díli no iha besik Díli iha etapa ikus kampaña nian.

Aleinde komísiu boot sira iha kapital sira munisípiu nian, Fretilin, hanesan mós partidu sira seluk, aposta iha asaun sira proximidade nian, fahe nia líder prinsipal sira iha nasaun tomak.

Kampaña hotu iha loron 09 Maiu.

SAPO TL ho Lusa

Timor-Leste/Eleisaun: Prezidente CNE verifika boletin sira votu nian ba lejislativu

Iha loron-sesta ne'e, prezidente hosi Komisaun Nasional Eleisaun nian (CNE), Alcino Baris, vizita ona instalasaun sira hosi Gráfika Nasional ne'ebé hakotu ona impresaun ba boletin sira votu nian ba eleisaun lejislativu antesipadu sira, sei hahú fahe iha inísiu fulan-Maiu. 

Iha total maka halo ona impresaun ba livru hamutuk 17.481 hosi boletin votu 50 ida-idak, ne'ebé ekivale loloos ba boletin sira hamutuk 874.050 ne'ebé agora tau hamutuk no marka ho naran hosi munisípiu ida-idak nian no, iha kazu diáspora nian, naran hosi nasaun sira ne'ebé iha sentru sira votasaun nian.

"Timor nia futuru iha livru sira ne'e. Timor nia destinu sei halo iha livru sira ne'e. Impresu ho kualidade, seguransa ho garantia sira. Serbisu di'ak ida", Baris hatete bainhira vizita ona Gráfrika Nasional ne'ebé maka hanesan fatin halo impresaun lalais duké loron previstu.

Partidu ho koligasaun ualu aprezenta ona ba eleisaun sira ne'ebé iha ona eleitor resensiadu hamutuk 787.761, liu 22.903 duké sira ne'ebé maka vota iha eleisaun lejislativu iha loron 22 Jullu tinan liubá, reprezenta nune'e aumentu ida besik 3%.

Aumentu ne'e akontese maka'as iha estranjeiru, ne'ebé númeru eleitor resensiadu sira kuaze triplika, aumenta hosi 2.125 iha eleisaun 2017 nian ba 6.263 iha tinan ne'e.

Maski nune'e, monte haat ne'ebé koresponde ba boletin sira iha estranjeiru hanesan ki'ik liu: ida ki'ik liu ba tasi, Koreia-Súl, Portugal, Austrália ho Reinu Unidu.

Maski aumenta iha sírkulu tomak iha estranjeiru, resensiamentu aumenta maka'as iha Reinu Unidu, ne'ebé hodi de'it na'in 208 aumenta ba 3.414, motivu ne'ebé forsa polítiku boot rua, Fretilin ho AMP, halo ona kampaña hamutuk iha komunidade timoroan ne'ebé maka hela iha nasaun ne'e.

lcino Baris esplika ona katak boletin sira ne'e sei entrega tuir dalan forma ba Sekretariadu Tékniku hosi Administrasaun Eleitoral (STAE) iha loron 04 Maiu, ne'ebé depois sai hanesan responsável hodi halo entrega iha munisípiu sira no, iha tempu hanesan, hodi lori ba estranjeiru.

Kona-ba sentru sira votasaun nian, iha nível nasional sei instala estasaun sira votu nian ho total 1.151 fahe tuir sentru votasaun hamutuk 876 ne'ebé, iha parte seluk, sei instala iha suku hamutuk 452 iha nasaun laran.

Iha votu tinan liubá, instala ona estasaun votu hamutuk 1.121 ne'ebé fahe hosi sentru votasaun hamutuk 859 ba lejislativu loron 22 Jullu, ne'ebé pelumenus iha funsionáriu na'in hitu iha estranjeiru, iha Austrália, Koreia-Súl, Portugal ho Reinu Unidu.

Boletin sira ba estranjeiru sei akompaña hosi funsionáriu sira hosi Ministériu Negósiu Estranjeiru, CNE ho STAE ne'ebé sei fahe ba sentru votasaun sia.

Iha Austrália, ne'ebé iha eleitor resensiadu hamutuk 1.532, sei iha fatin tolu hodi vota - Darwin, Melbourne ho Sydney - no iha Koreia-Súl iha eleitor resensiadu hamutuk 537 no sei iha sentru votasaun ida iha Seul.

Iha Portugal - iha eleitor resensiadu hamutuk 1.286 - sei iha sentru votasaun rua (Lisboa ho Porto) no iha Reinu Unidu iha eleitor resensiadu hamutuk 2.128 no bele vota iha Dungannon, Londres ho Oxford.

Kampaña ba eleisaun hotu iha loron 09 Maiu antes loron rua reflesaun nian ne'ebé, iha kazu barak, permiti atu ema timoroan sira halo viajen ba sira nia fatin resensiamentu.

SAPO TL ho Lusa