Kazal Portugueza rua halai husi justisa, Embaixada Portugal tenki responsabiliza

Parlamentu Nasionál (PN) ejize ba embaixada Portugal iha Timor-Leste atu responsabiliza hodi justifika loloos, kona-ba prosesu kázal Portugueza nain rua, Tiago Guerra ho nia espoza Chang Fong Fong ne’ebé halai sai ona husi Timor-Leste (TL) no oras ne’e iha ona sira-nia rai Portugal.

Antes ne’e kazal Portugues nain rua ne’e halai subar ba Australia ho Ró liu husi Munisipiu Manufahi, ne’ebé deskonfia embaixada Portugal mak fasilita pasaporte ba akuzadu nain rua ne’e hodi sai hosi Timor.

“Tenke halo lalais samada ba embaixador Portugal nian iha Timor-Leste, para bele halo esplikasaun kona-ba natureza hosi situasaun ne’e, governu mós tenke konsulta husi parte Australia nian kona-ba natureza husi kazu ne’e, bainhira sira (kázal) to’o iha Australia, tanba sidadaun nain rua ne’e akuzadu hela iha Timor-Leste  no antes ne’e desizaun mós sai tiha ona, ne’ebé sa’e de’it ró ba Australia,”deklara Fidelis Magalhães ba jornalista sira iha Parlamentu Nasionál, Kinta (30/11/2017).

JSMP Pesimista Governu TL sei Konsege Lori Fila Tiago ho Fong

DILI: Tiago no Fong Fong Guerra ne’ebé halai ba Australia hafoin simu kondenasaun pekulatu husi Tribunal Distrital Dili (TDD) to’o ona iha Lisboa Portugal iha Sabadu (25/11) ne’ebé simu ho ksolok husi ninia familia lubuk ida.

Tuir informasuan ne’ebé jornal INDEPENDENTE sita husi públikasaun tvi24, familia sira ne’ebé simu Tiago ho nia feen lakohi atu fó komentariu ba media no Tiago rasik hatete nia laiha problema atu koalia ho media, maibé nia sei la halo intervista iha aeroportu.

Tuir tvi24, kazu Tiago ho nia feen halai hamosu tensaun diplomatiku entre Timor Leste ho Portugal, asuntu ne’e hamosu kritika husi lider politiku no sosiadade sivil, ne’ebé ezije investigasaun ba embaixada Portugal iha Dili.

Iha semana kotuk, Ministru Negosiu Estranjeiru Portuges, Augusto Santos Silva, garante katak embaixada iha Dili respeita lejislasaun Portuges bainhira atribui pasaporte ba Tiago ho nia feen.

PD Hakarak Fundadór Nasaun Sira Halo Diálogu

DILI, (TATOLI) – Xefe Bankada Partidu Demokrátiku (PD), Maria Terezinha Gusmão, hateten lakohi ko’alia konaba eleisaun antesipada tanba ninia partidu hakarak nafatin fundadór nasaun sira halo diálogu atu hetan rezultadu di’ak ba Nasaun no povu.

“Konaba eleisaun antesipada, Partidu Demokrátiku lakohi atu ko’alia, tanba ami hakarak nafatin diálogu entre maun boot sira hanesan fundadór Nasaun atu túr hamutuk hodi ko’alia”, tenik ba jornalista sira iha Parlamentu Nasionál (PN), ohin.

Eleisaun antesipada ka la’e kompeténsia Prezidente Repúblika (PR), maibé fundadór Nasaun sira iha responsabilidade morál no polítika atu tau buat di’ak ba Nasaun no povu.

“Sira mak responsabilidade másimu no laiha tan ema seluk kria situasaun hakmatek no tau Nasaun iha dame no estabilidade”, dehan tan.

GMN TV | Jornal Nacional

GMN TV

TL Lapresiza Krize Atu Solusiona Problema

 DILI - Timor Leste lapresija krizi atu solusina problema politika iha rai laran. Maibe konstituisaun mak preve ona estadu nee semi-prezidensial tanba nee problema neebe akontese agora sei mosu bebeik iha futuru mai.

Lia fuan hirak nee hatoo husi Fundador Universidade JSU, Joao Mariano Saldanha ba STL iha nia knar fatin Bekora Dili Sesta, (1/12/2017). Nia dehan, Problema politika konserteja determina ekonomia maibe moos situasaun ekonomia determina situasaun politik. Estabilidade governu agora nee tuir lolos nee limita iha orgaun suberanu tolu deit.

“Tuir hau nia haree situasaun lao seluk halao planu lao babain. Laos seguransa maka halao nia funsaun netralidade. Maibe birokrasia governu moos tenki tur metin halo servisu babain nivel menejerial maka karik ema ba husu lisensa tenki atnede,”nia kualia.

Nia dehan orgaun Prezidente Republika liga malu ho Parlamentu Nasional. Parlamentu liga malu ho governu no Parlamentu Nasional liga malu ho Tribunal. Husi orgaun haat neebe maka iha sou laiha problema maka PN, PR no Tribunal.

Reitor Universidade Dili (UNDIL) Estevao da Costa Belo nia haree oras nee seidauk iha sinal krime finanseiru tanba realidade neebe maka iha katak orsamentu estadu remata iha loron 31 Dezembru 2017. Sei iha tan orsamentu duadesiu rejervadu ona maibe, karik orsamentu 2018 sedauk aprova maka beele foti 20 pursentu husi orsamentu 2018. 

Justinho Manuel | Suara Timor Lorosae

Lider Nasional Iha Obrigasaun Solusiona Polemika Politika

DILI - Lider Nasional hanesan Xanana Gusmao, Taur Matan Ruak, Mari Alkatiri iha obrigasaun hodi tur hamutuk fo liman ba malu hodi solusiona polemika politika, neebe dadaun nee lao hodi labele fo impaktu ba povu no nasaun.

"Ami nudar sidadaun  lakohi ukun nian halo senariu politiku oin oin too ikus fo impaktu ba iha ita nia rai neebe dadaun nee iha  ita nian eperensia iha tinan sanulu resin ida liu hodi hamsu krize neebe ita hotu la espera,”dehan Manuel Araujo ba STL Comoro, Sesta (1/12/2017).

Nia dehan dadaun atmosfera politika komesa manas beibeik hafoin iha formasaun governu foun no agora seidauk iha solusaun neebe bele solusiona polemika poltika nee rasik.

Tuir nian ba kestaun nee rasik fo impaktu iha loron ida karik lider nasaun sira ida lakohi kopera ba malu liu husi fo liman ba malu atu solusiona kestaun sira nee otomatikamente povu maka sai alvu ba kestaun nee.

Iha sorin seluk Xefe Suku Bairru Pite Joao Baptista realsa katak mundu agora mundu modern, oinsa maka lider hotu hotu konsiente atu lori nasaun nee dezemvolve neebe diak liu, tantu povu ba moris diak ka hakmatek  maibe laos kria polemika tan deit haksesuk malu poder hodi fo impaktu ba nasaun no povu ida nee laos solusaun ideal. 

Natalino Costa | Suara Timor Lorosae

Somotxo akuza Fidelis espiaun ba EUA, PLP ezije Governu lori kazu ne’e ba MP

Partidu Libertasaun Popular (PLP),  lamenta ho komentáriu Ministru Defeza no seguransa, José Agustinho Sequeira ‘Somotxo’ ne’ebé akuza Vise Prezidenti PLP, Fidelis Magalhães hanesan espiaun Estadu Unidu Amerika (EUA). Tanba ne’e, PLP ezije VII Governu konstitusional atu lori kazu ne’e ba Ministériu Públiku (MP) atu halo investigasaun klean hodi hatene se mak halo espiaun iha Timor Leste.

Vise Prezidenti PLP, Fidelis Magalhães, hateten, nia lamenta ho komentáriu hirak Somotxo nian ne’e,  ne’ebé  akuza eis Governante no deputadu balun husi bankada CNRT fa’an rai Timor Leste, nomós akuza nia hanesan espiaun EUA nian.

“Iha komentáriu ne’ebé Ministru Defeza halo, akuza ha’u nia pesoal hanesan espionajen ba Estadu Unidus Amerika. Iha ne’eba Ministru Defeza mós dehan katak, ha’u servisu atu asegura de’it interese Estadus Unidus nian,”katak Fidelis liu husi konferensia ba imprensa iha Hotel Timor Dili, Kuarta (29/11), hodi la konkorda ho deklarasaun MDS Somotxo nian ne’e.

Fidelis  lamenta ho estatementu Somotxo nian ne’e, liu-liu tanba  agora dadaun nia hala’o kna’ar hanesan deputadu ida, hanesan Vise Prezidenti Partidu Libertasaun Popular, hanesan Prezidenti bankada PLP nian iha Parlamentu Nasional, nomós hanesan Prezidenti Komisaun B ne’ebé tau matan ba asuntu Negosius Estranjeiru, Defeza no Seguransa.

Larekonese 28 Novembru 1975, Mari Konsidera Laos Sidadaun TL

DILI – Relasiona Media Sosial fo sai dehan iha ema balu la rekonese loron proklamasaun independesia unilateral, neebe maka proklama iha 28 Novembu 1975, Primeiru Ministru Mari Alkatri hateten ema sira neebe maka koalia larekonese 28 Novembru,  nee  laos sidadaun Timor-Leste, diak liu ba buka rai seluk atu hela.

"Ema sira nee bainhira sira koalia dehan la rekonese 28 Novembru diak liu sira ba buka rai seluk para sira atu hela porque Timor-Leste laos sira nian rai nee hau hateten kedas,” dehan PM Mari Alkatiri ba Jornalista sira hafoin remata enkontru ho Prezidente Republika Francisco Guterres Lú Olo iha palasiu Prezidensial Bairru Pite, Kinta (30/11/2017).

Tuir Mari katak se maka hela iha Timor-Leste tenke rekonese Indepensia Timor-Leste, tamba prosesu hahu Timor-Leste ohin loron sai nasaun ida nee hahu husi data proklamasaun independensia.

Nia dehan ligadu fila fali ba iha Nasaun Unidas la rekonese nee depende fila fali ba iha tatika idak idak neebe tuir tatika luta nian.

Fundador RDTL nee mos hatutan ba kestaun tatiku husi Frente Diplomasia servisu hamutuk nafatin ho  Portugal, nunee defende nafatin estatutu  Timor-Leste iha Portugal nian okos no estratejia maka atu hetan restaurasaun independensia.

Natalino Costa | Suara Timor Lorosae

Samalarua Husu Graduadu Uza Kapasidade Intelektuál Kria Oportunidade

DÍLI, (TATOLI) – Reprezentante ministru edukasaun, vise-ministru edukasaun, José Neves Samalarua, husu ba graduadu Universidade Nasionál Timor Lorosa’e (UNTL) atu uza kapasidade kria oportunidade ba aan rasik no ema seluk.

“Oportunidade ita mak kria, uza ita-nia kapasidade intelektuál, kapasidade ne’ebé mak aprende atu kria oportunidade, nune’e ita kontribui di’ak liutan ba ita-nia dezenvolvimentu iha setór hotu-hotu”, hateten governante ne’e iha ámbitu graduasaun UNTL ba da-XVIII, iha Sentru Konvensaun Dili, Rotunda Merkadu Antiga, kinta (30/11).

José Neves akresenta graduasaun nu’udar pasu inísiu. Kapitulu ida, tanba kapitulu lubuk ida mak sei mai provoka kapasidade.

Graduadu la signifika la iha ona vontade atu aprende. Maibé aprende nafatin atu bele tau aan iha ezijénzia, dezafiu ne’ebé mai husi sosiedade nomós husi progresu teknolojia ne’ebé tama iha ita-nia país, tama to’o komunidade, husu atu prontu responde.

Jornalista: Rafy Belo | Editora: Rita Almeida

Imajen: Vise-ministru edukasaun, José Neves Samalurua. Foto: Gabinete vise-ministru edukasaun

UNTL Fó De’it Kail La’ós Ikan

DILI, (TATOLI) – Reitór Universidade Nasionál Timor Lorosa’e (UNTL), Francisco Miguel Martins, hateten UNTL fó de’it kail la’ós ikan ba graduadu sira tanba ne’e graduadu sira esforsu nafatin hodi hetan vitória.

“Ikan ne’ebé imi atu han iha refeisaun ida de’it. Maibé, kail ne’ebé UNTL fó hanesan bukae ida oinsá imi buka ikan rasik ho badinas liutan hodi hetan ikan barak liutan”, hatete reitór perante graduadu na’in 503.

Afirmasaun provérbiu ne’e reitór hato’o tan tuir nia, graduasaun ne’ebé halo ba graduadu sira nu’udar loron ikus ba graduadu sira ne’e iha UNTL.

Tuir prosedimentu formál, legál akadémiku ninian halo kumpleta hotu. Nune’e ho serimónia ne’e, UNTL entrega hikas fali ba inan-aman, enkaregadu edukasaun nian nomós ba komunidade.

Dalaruma rona liafuan sira: A luta continua, a vitória é certa. “Ohin imi-nia loron vitória, husi luta ne’ebé iha loron dahuluk kedas imi tama, sama ain iha UNTL, maibé vitória ida ne’e mós sei la buat hotu. Katak dezafiu foun no obstakúlu oi-oin sei mosu no imi sei hasoru, simples liu hanesan imi la hetan serbisu”, akresenta.