IHA VETERANU HALO KOBRANSA ILLEGAL – HAKARAK HETAN 8A14 TENKI SELU US$ 500

Grupu veteranus deskoñesidu durante ne’e halo movimentu hodi halo kobransa illegal ba povu ki’ik sira iha área rurál.

Komunidade Filipe da Graça Araújo, informa katak, povu iha área rural barak mak sai ona vítima no lakon sira nia osan ba grupu veteranu illegal ne’e.

“Ha’u atu husu kona-ba Komisaun Veteranu iha Timor ne’e hira, no iha lei ka atu limite grupu veteranu sira ne’ebé la’o ba povu iha área rural hodi halo kobransa illegal,” dehan Filipe da Graça Araújo liu husi diálogu komunitária ho PR Taur Matan Ruak iha Suku Seloimalere ho Suku Aiserimou, Segunda (18/07).

Filipe da Graça dehan, lei ne’e iha ka la’e ba veteranu atu halo kobransa illegal hanesan ne’e.

“Foin dada’uk iha tan grupu veteranus balu mai iha Suku balu, hodi husu kobransa illegal ho objetivu katak, sé mak hakarak hasa’e nia osan veteranus  ba 8 a 14, tenki fó osan US$ 500,” informa nia.

Tanba ne’e, nia husu ba Prezidenti Repúblika, Taur Matan Ruak katak,  to’o iha ne’ebé ona Governu nia esforsu atu kombate ida ne’e.

“Ami rona ita nia maun ida naran Paul Alves, nia naran ne’e ami foin mak rona iha ukun-an ne’e, nia mak organiza grupu ida ne’e, atu mai dada tan bandeira illegal iha ami Aileu,” Filipe informa.

Maibe Filipe dehan, povu iha Munisípiu Aileu sei la fó ona fatin ba kualker grupu ida atu ba dada bandeira illegal iha sira nia Munisípiu.

Hatan ba preokupasaun ne’e, PR Taur Matan Ruak husu ba povu atu labele fiar kualker grupu ida, tanba grupu ne’e hakarak hais sira nia osan.

“Iha ne’e Komandante PNTL iha, nusa mak imi la fiar imi nia Komandante, ba fiar fali sira nakukun ne’e, halo saida. Sira nia IQ (Intelegen Quality), maka’as liu mai bosok imi nia osan, ema ne’e uluk naran bo’ot, agora nia mai halo fali kobra illegal ne’e, ha’u mo’e,” Taur Matan Ruak dehan.

Xefi Estadu ne’e husu ba grupu veteranus illegal ne’e katak, hakarak kobra osan ne’e, ba kobra Prezidenti Repúblika,  Primeiru Ministru,  Ministru no Ministra  sira.

“Agora mai kobra fali povu ki’ik ne’e, la masuk akal. Ha’u agradese imi tanba imi brani temi ema nia naran iha oin, mas ha’u hakarak hateten ba imi katak, aban bainrua sé mak hakarak mai kobra tan, mesmu nia ne’e Prezidenti, labele fo ulun,” dehan Taur Matan Ruak.

Kona-ba grupu ne’ebé atu ba dada bandeira illegal iha Aileu ne’e, PR Taur Matan Ruak dehan, agora la’os tempu atu dada bandeira bar-barak ona, tanba Timor Leste independenti ona.

“Ha’u mak hanesan imi, husik sira dada tiha lai mak kaer, sira seida’uk dada ita naran kaer de’it ne’e evidénsia laiha,” katak Taur Matan Ruak.cos

Jornal Nacional

ARLINDO KONFESA TUDA JOSE NIA UMA

DILI - Kazu tuda lezadu José Abrão Pereira nia uma iha suku Tibar, postu admistrativu Bazartete, munisipiu Liqiuça hetan estragus.

Fukun hosi problema rai ne’ebé arguidu Arlindo da Cruz muda baliza to’o lezada nia uma-hun, hodi harii uma.

Rai ne’ebé arguidu sukat hodi harii uma, to’o kedas lezada nia uma oin, nune’e halo lezada hirus hodi hasé, nusá halo uma tama to’o nia varanda oin.

La simu palavra lezada ne’ebé ho kondisaun saudé fíziku alejadu iha kabás ,  arguidu lori fatuk tuda ba lezada nia uma, kona kalen dala ida, janela, no rezulta odamatan rahun.

Bainhira lezada nia uma hetan estragus, arguidu hakilar ba lezada ho palavra katak,  hasoru o iha tali-laran, arguidu sei oho o. Rona palavra hosi arguidu, halo lezada trauma no ta’uk atu la’o sai ba to’os, no ba hili fo’er.

“Ha’u rona, arguidu  hakilar sei oho, ha’u trauma tebes hodi la’o ba-mai, ha’u sente liafuan ne’e ameasa, tan ha’u, ho kondisaun físziku alejadu, defisl sei hasoru nia,” deklara lezadu iha Tribunál Distritál Dili, Kinta (21/07).

Tuir akuzasaun hosi Ministériu Públiku katak, iha loron 13, fulan jullu, tinan 2015, tuku 11:00 , iha suku Tibar, postu adminisitrativu Bazartete. 

Arguidu lori fatuk  tuda, lezada nia kalen dala ida, odamata, janela, hodi hetan esragus, hahalok arguidu nian ne’e komete ho livremente.

Nune’e Ministériu Públiku konsidera komete krime danu simples vigora iha artigu 258 kódigu penál.

Hafoin rona akuzasaun, arguidu iha nia depoimentu katak, loos problema ne’e akontese duni, tanba fukun mai hosi fa’an rai. Ne’ebé osan argidu entrega rihun 10 ba lezadu, ikus mai mosu kontratu barak, problema ne’e mosu.

“Loos, ha’u tuda nia uma, janela ho odamatan, mais kona-ba amesa, lezada la’o ba-mai hela, laiha problema. Ami la’o hamutuk hela, mais la ko’alia ba malu, tan ne’e, deklarasaun lezada ho forma inventa atu kondena ha’u,” deklara arguidu.

Nune’e, sasin  Teresa dos Santos  iha nia depoimentu katak, loos altura arguidu mak tuda lezada nia uma. No problema nai hun mai hosi arguidu fa’an rai la fó koñesementu ba lezadu.

“Momentu tuda arguidu nia uma, ha’u iha uma-laran, ha’u haree arguidu mai tuda, hodi estragus kalen, janela ho odamatan, problema nia hun hosi arguidu fa’an tiha lezadu nia rai, sein fó koñesementu,” deklara sasin.

Hafoin rona akuzasaun parte sira, Tribunál kontinua kazu ne’e ba alegasaun hodi Ministériu Públiku Tribunál aplika pena tinan ida ba arguidu no  defeza husu Tribunál aplika pena adekuadu ba arguidu.

Hafoin rona alegasaun, Tribunál adia kazu ne’e ba loron 25, julhu tuku, 11:00, hodi rona leitura sentensa.

Audénsia  julgamentu ne’e prezide hosi Juiza Singulár Jacinta Correia, Ministériu Públiku  reprejenta hosi Prokuradór António Tavares, arguidu hetan asisténsia legál hosi Defensór Públiku, Humberto  Alves. (max)

Timor Post

Ativista sira lansa panfletu kontra rejime Kim Jong-Un Koreia do Norte

Ativista  Koreia do Sul no Estadus Unidus informa  ona  lansamentu panfletu millaun resin ba territóriu norte-koreanu, nakonu ho  krítika ne’ebé dirije ba líder Kim Jong-Un no kontra teste míssil balístiku foin lalais ne’e.

A Free North Korea (FFNK), ho sede iha Seul, no Human Rights Foundation sede iha Nova Iorque lansa balaun boot sanulu -- nakonu ho panfletu 300.000 anti-Koreia do Norte iha fronteira tomak, informa organizasaun ne’e iha komunikadu. 

Iha tinan barak nia-laran maka ativista, inklui dezertór norte-koreanu, lansa panfletu liuhosi  balun éliu boot liu, Asaun ida ne’ebé  halo nervozu  Pyongyang, maka dala barak  nia ameasa ho resposta militar.

SAPO TL ho Lusa

Kuaze refujiadu rihun tolu mate iha Mediteráneu iha inísiu tinan ne'e - IOM

Kuaze migrante rihun tolu mate ona iha Mediteráneu iha inísiu tinan ne'e, númeru aas liu hosi kazu mate sira rejista iha períudu ida badak tebes, haktuir hosi Organizasaun Internasional ba Migrasaun (IOM) iha loron-sesta ne'e.

"Ne'e hanesan tinan tolu konsekutivu maka vítima mortal sira aas liu rihun tlu, maibé nunka rejista antes iha final fulan-Jullu, ne'ebé hanesan preokupante tebes", hatete hosi porta-vós IOM nian iha Jenebra, Joel Millman.

Besik 90% hosi mate sira ne'e akontese iha zona sentral tasi Mediteráneu nian, entre Líbia ho Itália.

Iha kazu barak, migrante sira mai hosi nasaun sira Áfrika subsarianu nian.

Krizi hosi refujiadu sira iha Europa hahú iha tinan haat liubá.

SAPO TL ho Lusa

MNE portugés fó hanoin Giné Ekuatoriál katak pertense ba CPLP "la’ós inkondisionál"

Ministru Negósiu Estranjeiru portugés defende katak pertense ba Komunidade Nasaun Lia-portugés (CPLP) "la’ós inkondisionál" no nia membru sira tenke kumpre devér hanesan respeitu ba direitu umanu no demokrasia. 

Augusto Santos Silva ko’alia ba ajénsia Lusa iha aniversáriu daruak hosi adezaun Giné Ekuatoriál nian ba CPLP, ne’ebé akontese iha simeira iha Dili, iha loron 23 jullu 2014.

"Portugál akompaña ho atensaun maka’as no, liuliu, ho preokupasaun ba roteiru Giné Ekuatoriál, nia rasik, hein bele kumpre", hatete, iha referénsia ba "roteiru adezaun nian", ne’ebé inklui promosaun lia-portugés, dezignadu lian ofisiál iha nasaun (antiga kolónia española), atu halakon pena kapitál no maiór demokratizasaun.

Xefe diplomasia portugeza ne’e subliña katak "pertense ba CPLP la’ós pertense inkondisionál".

"La’ós de’it iha ligasaun istórika ka hatete katak portugés sai lian ka hanesan mós lian ofisiál hodi bele sai membru CPLP nian, tanba estatutu define konjuntu hosi devér, entre sira ne’e iha obediénsia ba Estadu Direitu, respeita direitu umanu, vinkulasaun demokrasia polítika, respeita soberania nasionál membru ida-idak nian no prinsípiu laiha-injerénsia no, evidentemente, empeñu iha kooperasaun multilaterál", nia destaka.

Kestiona mona-ba karik pretense ba CPLP ne’e irreversível, Santos Silva hatán laeziste ida ne’ebé hanesan ho artigu 50.º  hanaran Tratado de Lisboa (ne’ebé define saída voluntária Estadu-membru ida nian hosi Uniaun Europeia) iha tratadu ne’ebé konstitui CPLP, maibé  nia konsidera katak ne’e "organizasaun intergovernamentál ida, ne’ebé funsiona ho konsensu".

"Nasaun sira tama iha CPLP bainhira sira sente di’ak. Maibé ha’u hanoin lakoloka kestaun ne’e", nia hatete.

Kona-ba perkursu Giné Ekuatoriál nian iha tinan rua ikus ne’e, xefe diplomasia portugeza ne’e aponta "kompromisu ne’ebé" nia omólogu equato-gineense asume, durante reuniaun ministru Negósiu Estranjeiru sira CPLP nian, iha marsu liubá, iha Lizboa.

Ih okaziaun ne’e, ministru Agapito Mba Mokuy tranzmite katak nia nasaun iha empeñu iha "diseminasaun lia-portugés iha nia sistema ensinu".

"Hanesan ne’e de’it mak lia-portugés, ne’ebé hanesan mós lian ofisiál Giné Ekuatoriál nian, bele sai mós lian ne’ebé konjuntu populasaun uza no ko’alia", refere Santos Silva.

Iha parte seluk, governante hosi Malabo ne’e afirma katak iha "via atu kumpre kondisaun 'sine qua non' kona-ba pretense ba CPLP", no "iminente" ratifikasaun halakon pena kapitál  hosi Prezidente, Teodoro Obiang Nguema, hafoin parlamentu ho Konsellu Ministru aprova medida ne’e.

Limita mós mandatu prezidensiál ba mandatu rua, iha Konstituisaun, no institui "elementu valorizasaun demokrátika", hanesan Provedór Justisa no Tribunál Kontas.

"Simeira oin mai sei sai mós okaziaun ida atu ita haree buat hotu, hamutuk, oinsá mak kumpre giaun ne’e", defende Santos Silva, refere ba reuniaun xefe Estadu no Governu sira CPLP nian ne’ebé karik Brazil mak sei organiza to’o finál tinan ne’e.

"Importante tebes-- Giné Ekuatoriál iha konsiénsia kona-ba ne’e - katak halo evolusaun iha sentidu demokrasia, iha parte seluk, tanba ida ne’e hanesan kondisaun inerente ba estatutu membru CPLP nian, no mós iha sentidu haabut lia-portugés, tanba ne’e hanesan mós kondisaun evidente atu pretense ba CPLP", salienta ministru portugés ne’e.

Augusto Santos Silva reitera Portugál nia disponibilidade hodi kolabora ho Giné Ekuatoriál iha introdusaun portugés iha sistema ensinu equato-gineense, iha kooperasaun ho Brazil.

Iha parte seluk, ministru ne’e hatete katak nota, "ho satisfasaun", funsionáriu sira Ministériu Negósiu Estranjeiru Giné Ekuatoriál nian realiza, iha fulan kotuk, formasaun lia-portugés, iha Lizboa.

Personalidade polítika, sosiedade sivíl no kultura kontesta nasaun ne’ebé Teodoro Obiang Nguema lidera horikedas 1979, ne’ebé nia rejime hetan akuzasaun hosi organizasaun oioin tanba konstante violasaun direitu umanu no persegisaun ba polítiku opozisaun nian, tama ba CPLP.

SAPO TL ho Lusa

Entrada Giné Ekuatoriál nian ba CPLP hanesan momentu rutura - Domingos Simões Pereira

Entrada Giné Ekuatoriál nian ba Komunidade Nasaun Lia-portugés iha 2014 hanesan momentu rutura, indispensável atu organizasaun avalia  karik ne’e iha sentidu progresu ka la’e, defende eis-sekretáriu-ezekutivo Domingos Simões Pereira.

Sekretáriu ezekutivu organizasaun nian entre 2008 no 2012, Simões Pereira konsidera katak organizasaun hanesan Komunidade Nasaun Lia-portugés (CPLP) "funsiona ba rotura".

"Ita tenke brani halo rutura atu ita bele haree avansu ka rekua", destaka -- no klasifika adezaun Giné-Ekuatoriál nian hanesan mós momentu rutura ida.

"Karik ita nafatin mantein 'status quo' no ita laenfrenta dezafiu hirak ne’ebé obriga ita atu haree hikas ita-nia prinsípiu no konseitu ne’ebé justifika hun hosi ita-nia ezisténsia, ita sei laiha kondisaun hodi bele avalia karik ita iha sentidu progresu ka la’e", nia subliña.

Balansu preliminár hatudu sinál pozitivu, maibé antigu líder CPLP nian refere katak ha de’it "avaliasaun kontínua" hodi hatene karik CPLP hatudu "pasu pozitivu" iha matéria direitu umanu, diseminasaun Portugés no kultura luzófona ho adezaun membru foun ne’e nian.

Iha planu direitu umanu, Simões Pereira refere katak Giné Ekuatoriál rejista "avansu", hafoin tinan rua hanesan membru (CPLP) nian, refere eis-sekretáriu ezekutivu organizasaun nian.

Domingos Simões Pereira, ne’ebé okupa kargu ne’e entre 2008 no 2012, diskute dosié sensível ne’e ho Prezidente ekuato-gineense, Teodoro Obiang.

"Hanesan sekretáriu-ezekutivu CPLP nian, ha’u lori misaun ida ba Giné-Ekuatoriál" no objetivu mak "ko’alia ho Prezidente", Teodoro Obiang, katak "difikuldade ida ne’ebé organizasaun iha hodi aseita nasaun ne’e mak tamnba membrsu sira CPLP hotu sai ona subskritór iha karta Nasoins Unidas nian hodi halakon pena kapitál", nia salienta.

Tuir fali kompromisu hosi parte xefe Estadu equato-gineense no anúnsiu kona-ba halakon pena kapitál fó sai ona iha marsu tinan ne’e.

Domingos Simões Pereira lafila fali ba nasaun ne’e, maibé halo balansu pozitivu ida ne’ebé akompaña hosi iha Bisau.

"Ha’u iha rejistu kona-ba ema sira ne’ebé vizita Giné-Ekuatoriál no ha’u hetan asesu informasaun kona-ba sá mak akontese iha ne’ebá", nia realsa.

Maski konsidera katak "seidauk iha progresu barak", nia fiar katak "iha ona avansu balun iha domíniu oioin, liu-liu kona-ba direitu umanu".

SAPO TL ho Lusa

MATERIAL MUNDU HALO SARANI SAI HUSI RELIJIAUN KATOLIKA

Bispu Dioseze Baucau Dom Basilio do Nascimento informa, sarani sira sai husi relijiaun katolika hodi tama fali ba relijiaun seluk, tanba nesesidade material mundu nian.

“Hau hanoin, presiza estuda hodi haree tanba saida, ita nia katekeje maka la iha ka tanba sa ida hau ladun hatene, ita haree iha fenomena balu tanba nesesidade material sarani sai husi relijiaun katolika ou sarani sira maka ladun iha esklaresimentu ba iha sira nia fiar,”dehan Dom Basilio do Nascimento ba JN-Diário iha seminariu Balide bainhira tuir konferensia episkopal semana liturgia, Kuarta (20/7).

Tuir Dom Basilio katak, buat ida fiar laos lori aidona la bele ba ho kilat labele ba ho tribunal labele ba ho kadeia, tanba ne’e buat ida simu husi Maromak iha vida moris.

“Buat ida fiar ita labele obriga maibe tuir ema ida-idak nia hanoin, tanba agora mundu ne’ebe maka globalizasaun katak, buat ne’ebe maka material sarani sira halai arbiru hodi moris tuir prinsipiu moral ida-idak nian,”dehan nia.

Iha parte seluk, koordenador ekipa padre Arlindo Deonardo Sequeira da Silva informa, episkopal Timor leste realiza semana konferensia liturgia nasional.

“konferensia nasional ida ne’e importante ba uma kreda hodi tur hamutuk hare kestoens ne’ebe relasiona ho liturgia,”hatete padre Arlindo.

Nia informa, liturgia nudar sentru vida uma kreda Timor nian hodi halo reflesaun interdiocesana sobre harmonizasaun patrias liturgias culto ctritão.

Konferensia ne’e partisipa husi kongregasaun husi Diocese Dili, Malianan no Bucau.Eti

Jornal Nacional

Feto ida mate iha Hera seidauk autopsia, iha Suai deskonfia namoradu mak oho

DILI - Mate isin Feto ida ne’ebé la-hó identidade klaru sei rai iha sala mortuáriu  Hospital Nasioanal Guido Valadares (HNGV) tanba seidauk iha ema ruma ba hanesan família  atu hamri’ik  hodi halo autópsia.

Bainhira  diáriu  Timor-Post dada lia hó pesoal saúde balu ne’ebé la-fo ninia identidade hatete, to’o Kinta, 21/07, HNGV seidauk bele halo autópsia ba mate isin feto ida ne’ebé tau hela iha mortuáriu.

Tanba tuir fonte konfirmadu ne’e katak, mate isin laiha identidade, i mos seidauk iha ema ruma ba hasoru HNGV katak mate isin ne’e nia família, tanba ne’e mak HNGV susar atu halo autópsia.

“Mete isin feto ida ne’e kontinua rai iha mortuáriu  tanba ami seidauk hatene lolo’os identidade metebian nian,” dehan fonte ne’e iha HNGV, Kinta, (21/07).

Nia haktuir, HNGV kontinua hein família  matebian mak kompleta ninia identidade antes halo autópsia, i mateisin agora dadaun sai metan ona tanba kuaze semana ida.

Tanba ne’e mak espera liu hosi  informasaun ne’e maluk sira balu ne’ebé mak lakon ema ruma bele ba informa para atu identifika identidade no hala’o prosesu autópsia.

Entretantu iha loron Tersa (20/07), komunidade sira hetan mate isin feto ida ho naran Octania Moniz   tinan 17 latan hela iha rai naruk iha area Suai Villa.

Matebian naran istima Anya hosi  Aldeia Foho Lulik, Suku Beiseuk, Postu Administrativu Tilomar, nu’udar  estudante Sekundariu Númiru 1 Suai.

Matebian sai hosi uma iha Sábadu (16/7), no komunidade sira hetan fali nia mate isin iha rai naruk.

Komandante PNTL Munisípiu  Kovalima, Superintendenti Justino Menezes via-telefone ho Timor Post haktuir, nia parte halo hela investigasaun atu hatene lolo’os motivu akontesimentu.

Tuir informasaun, matebian iha kalan Sábadu (16/07) ho nia doben ba festa, maibé  iha kalan ne’e kedas matebian la fila fali ba uma. Tanba ne’e, tuir komunidade balun deskonfia nia namoradu maka oho.

Tuir kronolojia, iha loron Tersa (19/07) tuku 5 loro-kraik bainhira labarik sira atu ba tá-ai mak horon iis. No labarik sira hakbesik ba haré afinal mate isin feto ida mak latan hela, lalar no nehek hobur ona.

Hafoin hetan mate isin, labarik sira hakilar maka’as hodi ema hotu halai ba haré no kontaktu ba polísia hodi to’o kedas iha fatin akontesementu no halo prosesu evakuasaun.

Matebian durante hela iha Suai Villa ho nia maun hodi ba eskola.

Matebian nia inan Ricardina de Jesus ba Timor Post iha Ospital Referal Covalima, Kinta (21/07) ho mataben hatete, nia lakon boot nia oan feto ne’ebé nia hadomi tebes.

Recardina husu ba polísia tenke buka tuir suspeitu ne’ebé oho nia oan tenke ba kumpri justisa.

Recardina haktuir, durante ne’e laiha sinal ruma kona-ba nia família hetan susar boot ida ne’e. Tanba ne’e, baihira rona informasaun katak nia oan mate hakfodak tebes.

“Rona fali hosi  família  balu mak telefoni ba ha’u katak Octania mate ona,” dehan Recardina.(flo/way/azu)

Timor Post