Dom Virgílio: Ema barak lamenta ho sistema justisa

Bispu Diocese Dili, Dom Virgílio do Carmo da Silva hateten  ema barak lamenta ho sistema justisa iha rai laran, tanba dala ruma adia demais julgamentu ho durasaun tempu naruk.

“Sistema justisa iha rai laran dala barak ema lamenta, dada is tanba preokupasaun povu nian halai liu ba adiamentu ba kazu ruma ho durasaun tempu naruk no balun lamenta ho desizaun balun ne’ebe juiz sira foti, maibe ne’e lao’s area ne’ebe fasil no los dunik katak instituisaun ne’e nia servisu komplikadu tanba ne’e Governu ne’ebe troka malu hakas a’an atu hadia maske sempre iha iregularidade, lamentasoens mosu maibe ho esperansa ida katak wainhira Governu troka malu sei iha mudansa,” informa Dom Virgilio do Carmo da Silva, ba jornalista sira iha Diocese, foin lalais ne’e.

Relasiona ho lamentasoens barak ne’ebe mai husi povu husi parte igreja nia rekomendasaun mak husu ba autoridade ne’ebe servisu iha area justisa atu asumi knar hanesan vokasaun ida.

“Ba ministeriu justisa liu-liu autoridade iha area justisa primeiru knar ne’ebe sira kaer lao’s fasil tanba ne’e hanesan vokasaun ida ne’ebe ejije sira nia sakrifisiu no dedikasuan tanba sira servi nasaun ida ne’e liu husi knar ne’ebe sira halo hodi fo justisa ne’ebe justu ba povu,” dehan Dom Virgilio. Ita

GMN TV | Grupo Média Nacional

PNTL Asegura Ema Nain Haat Defama Lider iha MEDSOS

DILI - Komandante Jeral Polisia Nasional Timor Leste, Julio da Costa Hornai afirma, dadaun nee Polsia Nasional Timor Leste liu husi Unidade Polisia Servisu Investigasaun Kriminal Nasional (SIKN) asegura ona ema nain haat neebe maka defama liderans nasional sira liu husi edit foto iha Media Sosial (MEDSOS).

Haktuir nia ba jornalista sira hafoin remata enkotru semanal ho Prezidente Republika Francisco Guterres Lu Olo iha Palasiu Prezidensial Bairru Pite, Kinta (23/8/2018).

“Ema hamutuk nain haat hanesan nee, no ema nee sidadaun Timor. Tanba ida nee ita ezize para atu halo prosesu sira nee, no ida nee hetan identifika husi ita nia PNTL hasik,” dehan Julio Hornay.

Komandante Jeral PNTL nee husu ba joven sira, atu dignifika no respeita  lider nasional sira.

Iha parte seluk tuir Akademiku UNTL, Emerson Mendonca hateten, nudar akademiku no  hanesan mos sidadaun Timor senti triste, bainhira haree hahalaok neebe la merese, ema Timor oan sira hatudu hodi halo imagem aat no  kontra lider historiku sira.

Notisia kompletu lee iha jornal STL edisaun Segunda (27/08/2018) 

EST. Julia Amaral/ Natalino Costa

SNFEP Prepara Ona Joven 4000 Resin

DILI, (TATOLI) – Diretór Sentru Nasionál Formasaun Empregu no Profisionál (SNFEP), Tibar, Simão Barreto, hatete sentru formasaun ne’e rejistu ona joven rihun haat resin iha área oioin hodi kompete iha li’ur.

Formasaun ne’ebé sentru ne’e oferese mak konstrusaun sívil kobre área eletrisidade, kanalizasaun, karpintária, pedreiru ho soldadura, agrikultura mak haree liu ba oinsá preparasaun rai, produsaun fini, aifuan ho modo.

Seluk mak formasaun kona-ba ospitalidade inklui indústria marítima ho portu, ne’ebé mak bele prepara joven sira ba serbisu iha área marítima ninian, inklui mós instrumentasaun ba eletrisidade; mina ho gás.

“Sentru mós la realiza de’it formasaun maibé halo akompañamentu ita-nia joven sira iha koñesimentu, skills (abilidade) nomós esperiénsia balun iha ona hodi kanaliza sira ba vaga sira ne’ebé mak disponível i promove sira”, dehan Simão Barreto ba jornalista sira iha ninia knaar fatin, ohin.

Tuir nia formasaun profisionál no treinamentu nu’udar xave ida ba joven sira atu hetan koñesimentu no kapasidade di’ak nomós hetan serbisu ida dignu liuhusi kualidade serbisu.

“Ne’e mak ha’u hanoin governu iha orsamentu; planu karik? aposta ida ne’e. Ha’u hanoin ita-nia Na’i  ulun sira afirma bebeik ona  em termos de teknikamente mak ho governasaun ne’ebé mak ita iha aposta dadauk ona, sentru hein atu kolabora, reforsa”, akresenta.

Diretór ne’e informa kada semestre sentru ne’e rejista estudante 300. “Sira hetan sertifikadu formasaun profisionál iha nível um, dois, três, agora dadauk ita prodús ona quarto mil”, revela.

Nia fó sai avaliasaun indepedente ne’ebé sentru ne’e halo ba formandu sira mak pursentu 65 mak imediatamente hetan ona kontratu permanente.

Pursentu 30 formandu sira hetan serbisu fulan rua ka tolu depois hein fali serbisu foun. Pursentu lima, formandu sira kontinua sira-nia estudu ba fali iha área seluk.

“Agora pursentu rua mak sira totalmente tuir tiha, depois sei joven liu, sira seidauk define área ne’ebé sira aprende, sira gosta atu halo ka lae, mezmu ita-nia kompañia sira dalaruma mai ho kontratu hein sira”, tenik.

“Ha’u bele fó sai katak iha tinan 10 primeiru, ita investe iha introdusaun ba formasaun nivel báziku ho fundasaun. Maibé tinan hirak tuir mai, agora dadauk, eleva ona nivel média ho mós atu aposta ba avansadu ninian”.

Ezekutivu ne’e mós relata dezafiu sira ne’ebé mak sentru formasaun Tibar hasoru mak formadór kualifikadu, esperiénsia tinan barak iha indústria.

“Ha’u hanoin ida ne’e, ita-nia nasaun mós foun entaun ho ida ne’e mak dezafiu boot ida. Kursu aprendizajen ne’ebé mak atualizadu ho ejizénsia mundu nian, ha’u hanoin ida ne’e dalaruma ita hetan tarde oituan. Terseiru, investimentu kustu ba ekipamentu; ita-nia ekipamentu dalaruma seidauk atualiza”, katak.

Jornalista: Rafy Belo | Editora: Rita Almeida

Imajen: Diretór SNFEP, Simão Barreto. Foto TATOLI: Egas Cristovão

ADTL Ezije Governu Ratifika Konvensaun Direitu Ema Ho Defisiénsia

DILI, (TATOLI) – Asosiasaun Defisiénsia Timor-Leste (ADTL) ezije no husu ba governu konstitusionál da-ualu atu ratifika konvensaun Organizasaun Nasaun Unida (ONU) ba direitu ema ho defisiénsia ne’ebé mak sei pendente.

“Lalais no labele adia tan ba ratifikasaun konvensaun ONU ba direitu ema ho defisiénsia ne’ebé mak pendente no sai de’it ba materia ba kompromisu sesaun universál periódiku review dahuluk no daruak iha Jenebra”, katak portavós ADTL, Gaspar Afonso, liuhusi konferénsia imprensa iha otel Vila Verde, ohin.

ADTL husu no ezije ba governu daulau no reprejentante povu sira iha uma fukun atu prevee Orsamentu Jerál Estadu (OJE) 2018, pelumenus pursentu 10 aloka ba dezenvolvimentu asuntu defisiénsia iha Timor-Leste, liuliu haree ba nesesidade no hadi’a moris ema ho defisiénsia nian.

Husu ba Komisaun Funsaun Públika (KFP) atu iha kuota pursentu ida ba ema ho defisiénsia iha rekrutamentu funsionáriu públiku.

ADTL husu ba lideransa polítiku sira liuliu Prezidente Repúblika, Primeiru-Ministru, membru parlamentu atu hamutuk hodi hakotu impase polítika, tanba prejudika dezenvolvimentu nune’e mós ba ema ho defisiénsia.

Tuir Gaspar Afonso tanba Timo-Leste adota Objetivu Dezenvolvimentu Sustentável (ODS) ho slogan katak “Leave Noone Behind” ka la husik ema ida iha kotuk, Inchen Strategy(Make the Rights Real) ka halo direitu sai reál nomós selseluk tan.

Jornalista: Rafy Belo | Editora: Rita Almeida

Imajen: Asosiasaun Defisiensia Timor-Leste (ADTL) hala'o konferensia imprensa iha otel Vila Verde, ohin. Foto Rafy Belo

Prezidente RAEOA Rekoñese Hadi’a Prosesu Pagamentu ZEESM

OEKUSI, (TATOLI) – Prezidente Autoridade Rejiaun Administrativa Espesiál Oekusi Ambenu (RAEOA) no Zona Espesiál Ekonomia Sosiál Merkadu (ZEESM), Marí Alkatiri, rekoñese auditória hosi Tribunál Kontas atu hadi’a prosesu pagamentu iha projetu ZEEMS.

“Laiha osan ida mak lakon maibé iha rekomendasaun atu hadi’a buat ruma mak iha prosesu pagamentu nian”, Prezidente RAEOA ba jornalista sira iha aeroportu Oekusi, ohin.

Informasaun ne’ebé espalladu katak milliaun $20 mak lakon iha ZEEMS, nia hatan ne’e bosok. “Sira nia avo mak lori karik, tanba ne’e hakarak klarifika katak laiha osan ida mak lakon iha ZEEMS”.

Nune’e mós aviaun ZEEMS ne’ebé dehan “segunda mão,” Jestór ZEEMS dehan ida ne’e la loos no prova ona la loos.

“Maibé iha públiku ema ko’alia nafatin, karik keta “terseira mão” ida ne’e la loos hotu no prova ona la loos”, hatan nia ho hamnasa.

Prezidente RAEOA katak auditória hosi tribunál kontas nian durante fulan neen hotu ona. Sira sei aprezenta relatóriu hodi rekomenda atu hadi’a.

Enkuantu, durante konstrusaun obra ZEEMS nian dalaruma iha ajudikasaun direita ba empreza sira hodi halo fiskalizasaun. “Hakarak obra ida kualidade tenke hetan fiskalizasaun di’ak”, katak.

Entretantu, ZEEMS TL foin mak hahú monta administrasaun ema hotu konsentra ba auditoria ZEEMS TL, maibé auditoria ba ministériu sira seluk la ko’alia, katak tan.

Jornalista: Zezito Silva | Editora: Rita Almeida

Imajen: Prezidente Autoridade Rejiaun Administrativa Espesiál Oekusi Ambenu (RAEOA) no Zona Espesiál Ekonomia Sosiál Merkadu (ZEESM), Mari Alkatiri. Dokumentasaun Tatoli

Lakonkorda Prezidente ZEESM Sai, Branco: Realidade Lian Povu Nian

DILI – Relasiona ho suku balu iha Oecusse ZEESM (Zona Espesial Ekonomia Sosial Merkadu),   lakonkorda Prezidente ZEESM Mari Alkatiri sai husi nia kargu, ida nee mak realidade lian povu, tanba nee lalikan manipula.

Kestaun nee hatoo Husi Vice Bankada Fretilin Francisco Branco hatete, apoiu neebe mak husi suku balu iha Oe-Cusse nee tanba sira iha vontade i manifesta povu nia vontade.

“Suku balu neebe  lakonkorda atu hasai Prezidente ZEESM Mari Alkatiri hau hanoin iha suku seluk mos sei apoiu hotu,  ida nee reflete lian povu, tanba suku sira reprezenta povu nudar lider komunidade neebe sira nia lian nudar povu nia lian nee mak realidade lalikan  manipula tun sae,” katak Branco ba STL Kinta (23/08/2018) iha PN.

Nia dehan, vontade povu iha manifesta  nee iha realidade Oe-Cusse neebe ema hotu haree, maske iha tinan barak buat ruma iha ona kapital Oe-Cusse nian iha munisipiu seluk seidauk iha.

Nunee mos Vice Prezidente PN Luis Roberto da Silva, haree ba komunidade sira husi  Oe-Cusse koalia ba mandatu  ba Prezidente ZEESM. Atu hasai kalae nee tenke haree ba lei ka regulamentu, neebe kuandu hasai ho legalidade nee bele, maibe kuandu laiha legalidade fiar katak sei bele mantein. 

Notisia kompletu lee iha jornal STL edisaun Segunda (27/08/2018)

Guilhermina Franco | Suara Timor Lorosae

1974-1975 Pozisaun Portugal Integrasaun, Pe.Martinho: Nicolau-Xavier-Borja, Alkatiri-Horta Kontra

DILI - Pe.Martinho Gusmao hateten, iha tinan 1974-1975 posizaun ofisial husi Portugal integrasaun laos independensia, tanba nee kuandu Xavier do Amaral, Nicolau Lobato, Borja da Costa, Mari Alkatiri, Ramos Horta no Justino Mota. ema hirak nee importante purke sira kontra korenti integrasaun nee.

Dokumentu neebe hau lee iha Portugal pozisaun ofisial Portugal nian rua Federalismu ou integrasialismu, federalismu ba Afrika Integrasaun ba Asia, neebe Goa, Macao no Timor Leste tama mai iha pakote integrasaun, entaun ema bulak sira hanesan Nicolau Lobato, Xavier do Amaral, Borja da Costa,Mari Alkatiri, Ramos Horta, ita bele dehan katak sira nia pensamentu bahasa karik melawan arus, menabrak tembok, I menabrak tembok too tinan 24 maka foin maka tembok nee hancur ,” dehan Pe. Martinho ba jornalista sira hafoin remata enkontru ho Prezidente da Republika Fransisco Guterres Luolo iha Palasio Prezidensial Bairu Pite, Sesta (24/08/2018).

Iha biban nee Pe. Martinho haktuir tan, ohin hasoru malu ho Prezidente da Republika kolia konaba tinan ida nee Nicolau Lobato halo korenta anus a morte, fatin Palasiu ida nee fatin Nicolau Lobato nian oinsa maka komemorasaun korenta anus nee halo selebrasaun ida signifikativu ida ke atu husik hela ba jerasaun foun, konaba fundamentu filojofiku oinsa maka ema hirak nee harii nasaun ida nee, nee duni kestaun laos fundador du estadu maibe fundamentu du Estadu.

Notisia kompletu lee iha jornal STL edisaun Segunda (27/08/2018)

Carme Ximenes | Suara Timor Lorosae