Prezidente Repúblika apela ba kampaña lahó ódiu no lahó insultu

Prezidente timoroan apela, iha loron-tersa ne'e, atu kampaña ba eleisaun antesipadu iha loron 12 Maiu halo iha ambiente ida kordialidade no unidade nian, evita insultu ho atake sira, divizaun sira iha sosiedade no asaun sira ódiu nian no vingansa nian.

Iha mensajen ida ba nasaun, Francisco Guterres Lu-Olo husu ona partisipasaun maka'as hosi eleitor sira, iha momentu ida ne'ebé iha oportunidade, liuhosi urna sira, hodi husik mensajen polítika ida, no haruka ona rekadu sira ba partidu sira no ba nia militante sira.

"Ita labele permiti atu períudu kampaña nian uza hanesan pretestu hodi troka ofensa sira no diskórdia sira ne'ebé iha baze iha ideolojia sira (autonomista hasoru nasionalista), relijiaun, rasa, frente klandestina hasoru frente armadu hasoru frente diplomátika", Lu-Olo hatete iha mensajen ida ne'ebé divulga hosi nia gabinete.

Xefe Estadu hatutan katak nasaun Timor-Leste hanesan "família ida de'it".

"Sira ne'ebé maka la hadomi Povu Timor-Leste maka sei aproveita kampaña hodi fahe Povu, hodi hamosu sentimentu sira ódiu nian ka promove vingansa", nia hatutan mós.

Mensajen mosu iha momentu ida ne'ebé pré-kampaña marka hela, iha rede sosial sira, ho atake sira, krítika sira ho insultu pesoal sira no polítiku sira, ho tentativa muda kampaña iha luta ida entre frente oioin ne'ebé iha pasadu kombate ona hasoru okupasaun indonézia.

Maski líder timoroan sira defende nafatin katak luta hasoru ema indonéziu sira akontese ho kolaborasaun hosi frente tolu - armada, klandestina ho diplomátika -, pré-kampaña buka halo pilar sira ne'e iha konfrontu laran.

Militante balun ne'ebé iha ligasaun ba partidu sira opozisaun nian no to'o artigu balun iha imprensa timoroan sujere atu eleisaun antesipadu, ne'ebé previstu ba fulan-Maiu, tau hamutuk mane sira hosi frente armada, hanesan Xanana Gusmão ho Taur Matan Ruak - líder sira hosi partidu boot opozisaun nian, CNRT [Congresso Nacional da Reconstrução Timorense] ho PLP [Partidu Libertasaun Popular] -, no líder sira hosi frente diplomátiku, hanesan Mari Alkatiri ho José Ramos-Horta, hamutuk iha Governu.

Lu-Olo hatudu konviksaun katak eleisaun sira sei iha "taxa partisipasaun ne'ebé maka'as, transmiti nune'e mensajen loloos ida ba polítiku sira".

Nia adianta ona katak agora hakbesik ona momentu ne'ebé partidu sira ho koligasaun sira sei halo nia kampaña, fó koñese nia programa sira hodi hametin kualidade edukasaun, dinamiza ekonomia nasional no hadi'a populasaun nia moris.

"Prezidente Repúblika, nu'udar Nasaun nia aman, hanoin ho husu ba imi tomak hodi respeita Povu Timor-Leste. Joven sira, mane sira ho feto sira tenki hakru'uk ba sira ne'ebé maka katuas liu no ba sira hanesan", Lu-Olo insisti.

Prezidente timoroan hatutan ona katak "labele uza kampaña hanesan momentu ida hodi haketak Povu".

"Kampaña tenki hametin unidade entre Povu liuhosi programa ne'ebé serve di'ak Povu nia nesesidade sira", nia konsidera.

Lu-Olo nia mensajen, ne'ebé inklui deklarasaun ida iha vídeo hodi transmiti iha loron-tersa ne'e iha televizaun sira iha nasaun, akontese iha momentu hanesan ho inísiu hosi kalendáriu prosesu eleitoral nian ba eleisaun antesipadu sira iha loron 12 Maiu, aprova hosi Sekretariadu Tékniku Administrasaun Eleitoral nian.

Iha nia mensajen, xefe Estadu hatete ona katak povu timoroan fó ona ba mundu "ezemplu ida maturidade, komprende ho aseita ona desizaun hosi Prezidente Repúblika hodi konvoka eleisaun antesipadu sira".

Lu-Olo agradese mós kolaborasaun hosi Igreja Katólika no relijiaun sira seluk tanba nia knaar hodi "tulun esplika situasaun" no ba líder sira hosi sosiedade sivil, joven sira, veteranu sira, akadémiku sira no partidu polítiku sira tanba simu ona desizaun.

"Ita nia kultura ho demokrasia la hanorin mai ita atu insulta malu! Ita nia Povu la tolera komportamentu ida hanesan ne'e no la tolera falta respeitu ba nasaun, ba governante sira. To'o ona momentu hodi fó liman ba malu", nia apela.

Hodi konsidera katak ema tomak "serbisu hodi hetan Dame no dezenvolvimentu, estabilidade no progresu", Lu-Olo hatutan ona katak "to'o ona momentu" hodi ba urna sira hodi defende "povu no nasaun nia interese sira".

Kampaña ba eleisaun sira sei dura fulan ida no hotu ho loron rua antes votu, marka ba loron 12 Maiu.

SAPO TL ho Lusa

Simeira CPLP ba dala XII marka ba loron 17 ho 18 Jullu iha Cabo Verde

Simeira ba dala 12 hosi Komunidade Nasaun sira Lian Portugeza (CPLP) nian sei hala'o entre loron 17 ho 18 Jullu iha illa Sal, iha Cabo Verde, hatete hosi fonte organizasaun nian ba Lusa.

Konferénsia ba dala 12 hosi xefe sira Estadu no Governu nian, iha Vila Santa Maria, illa Sal, sei marka tranzisaun hosi prezidénsia "pro tempore" komunidade luzófonu nian hosi Brazil ba Cabo Verde.

Antes enkontru hosi xefe Estadu no Governu sira hosi nasaun luzófonu nian, sei hala'o reuniaun sira hosi konsellu ministru sira, hosi komité konsentrasaun permanente no hosi pontu importante sira koperasaun nian, adianta hosi fonte hanesan.

Realizasaun hosi konferénsia xefe Estadu no Governu nian halo iha tempu hanesan ho aniversáriu CPLP nian, iha loron 17 Jullu kumpri ezisténsia tinan 22.

Simeira ikus hala'o iha Brazília, kapital Brazil nian, iha loron 31 Outubru ho 01 Novembru 2016, bainhira prezidénsia brazileiru kaer hanesan prioridade implementasaun hosi Objetivu sira Dezenvolvimentu Sustentável nian (Ajenda 2030 ne'ebé defini hosi ONU).

Iha okaziaun ne'e, nasaun sira aprova mós vizaun estratéjiku foun ne'ebé defini dalan CPLP iha dékada tuirmai, aponta aposta prinsipal sira ba "koperasaun ekonómiku ho emprezarial, seguransa alimentar ho nutrisional, enerjia, turizmu, ambiente, oseanu sira no plataforma kontinental sira, kultura, edukasaun ho siénsia, teknolojia no ensinu superior".

Dokumentu haree mós ba reforsu hosi mekanizmu sira hodi fasilita sirkulasaun hosi ema sira iha espasu luzófonu nian, proposta ne'ebé iha inisiativu hosi Portugal ho Cabo Verde.

Aleinde ne'e, CPLP sei reforsa mós koperasaun ho nasaun sira ne'ebé iha estatutu hanesan observador asosiadu ba organizasaun (Hungria, Repúblika Xeka, Eslovákia, uruguai, illa Maurísia, Namíbia, Senegal, Turkia, Japaun ho Jeórjia).

CPLP kompostu hosi Angola, Brazil, Cabo Verde, Guiné-Bissau, Guiné Ekuatorial, Mosambike, Portugal, São Tomé & Prínsipe ho Timor-Leste.

SAPO TL ho Lusa

TL Iha Negosiasaun Fronteira Terrestrial-Marítima

DILI, (TATOLI) – Iha loron 6 Marsu, ekipa negosiasaun lidera husi Xefe negosiadór prinsipál delimitasaun fronteira Marítima, Kay Rala Xanana Gusmão sei asina tratadu konaba fronteira Marítima iha Nova Iorke, hafoin ba oin Timor-Leste (TL) halo negosiasaun fronteira terrestrial no Marítima ho Indonézia.

Lia ne’e fó sai hosi Ministru Estadu no Konselleiru ba Seguransa Nasionál, José Ramos Horta, iha Palásiu Governu, ohin.

Tuir Ramos Horta, negosiasaun ne’ebé sei akontese iha futuru kona-bá terestre no marítimu ho nasaun viziñu Indonézia bele han tempu.

“Bainhira iha Nova Iorke asina ona tratadu fronteira Marítima iha loron 6 Marsu, hakat ba oin tenke kompleta negosiasaun fronteira terestre ne’ebé falta pontu balun no hahú negosiasaun fronteira Marítima ho indonézia, ne’ebé bele lori tempu naruk,” Eis-Prezidente Repúblika ne’e fó hanoin.

Alende ida ne’e, problema seluk ne’ebé governu presiza fó prioridade oinsá atu rezolve kestaun dezenvolvimentu greater sunrise. Kona-bá kestaun ne’e governu fó prioridade nafatin Xefe negosiadór prinsipál (Xanana Gusmão) atu rezolve.

“Kestaun dezenvolvimentu greater sunrise, Timor-Leste tenke hetan akordu ho investor sira atu iha benefísiu ba tasi timor,” Horta fó sai nia esperansa.

Entretantu, negosiasaun fronteira terestre entre Timor-Leste ho Indonézia ne’ebé sidauk rezolve mak iha Noel Besi-Citrana no Bijael Sunan-Oben. Fronteira Noel Besi-Citrana iha parte Kupang, Nusa Tenggara Timor (NTT) no Ambeno ne’ebé iha Timor-Leste.

Enkuantu Bijael Sunan-Oben hanesan fronteira iha área Timor sentru no súl (Tengah-Utara-lian Indonézia) ne’ebé hanesan parte husi Indonézia ho Oekusi hanesan parte husi Timor-Leste. Area ne’ebé laiha komunidade ne’e  ho medida hectare 142,7.

Jornalista: Julia Chatarina | Editór: Manuel Pinto

Imajen: José Ramos Horta bainhira dadalia ho jornalista sira iha Palásiu Governu. Foto António Goncalves

HAK Entrega Relatóriu “Istória Nakukun” Militár Japaun ba UNTL

DILI, (TATOLI) - Asosiasaun HAK entrega relatóriu finál peskiza konjunta Asosiasaun HAK ho koligasaun japones sira ba Timor-Leste kona-ba eskravidaun (atan) seksuál militár japones iha Timor, iha 1942-1945.

Títulu husi relatóriu ne´e mak Luta ba Lialoos no Justisa, entrega diretamente husi diretór HAK, Manuel Monteiro ba dekanu Fakuldade Siénsia Sosiál (FSS), Eurico de Araújo, iha kampus FSS, Caicoli-Díli, ohin, iha ámbitu komemora loron Japaun tama iha Timor-Leste.

“Loron ida ne´e ita merese dignifika, loron ida ne´e merese ita foti aas, halo lian vítima ninian sai lian maka´as liutan tanba iha tinan 75 resin liubá avó sira lubuk mak sai vítima militár Japaun ninian iha tempu funu mundiál daruak ninian,” akresenta diretór Manuel Monteiru iha nia aprezentasaun.

Iha ita-nia otas ita só hatene katak ita hasoru funu boot rua de´it; hasoru kolonializmu portugés nomós okupasaun ilegál militár Soeharto nian, durante tinan 24. Koloniál portugés iha tinan 450 nia laran. Militár Japaun nian mak, hahú 20 fevereiru, 1942-1945.

Tinan hirak ne´e, vítima barak (avó sira), tantu mane nomós feto. “Ami entrega lembransa ida, livru ne´ebé Asosiasaun HAK, primeiru halo husi jurista timoroan sira, iha 2003. Depois la konsege remata Asosiasaun HAK kontinua tan ho FOKUPERS kontinua halo peskiza maibé la konsege remata,” dehan Monteiro.

Depois istória ida ne´e nafatin HAK ho Universidade Osaka, Japaun i ami konsege formula ba livru ida, ne´ebé mak mais akadémiku duni i livru ne´e primeravez hakerek ho lian tetun i tuir ortografia tetun duni, INL (Institutu Nasionál Linguístika). Ne´e duni livru ne´e merese ami entrega ba instituisaun hotu-hotu.

Tinan kotuk lori tiha ona ba rai iha Arkivu no Múzeu Rezisténia Timor-Leste (AMRT). Manuel Monteiro relembra, diretór AMRT, Antoninho Baptista “Hamar” kontente ho livru ne´e no akresenta katak la iha referénsia barak kona-ba istória funu mundiál daruak ninian.

“Ho livru ida ne´e bele tulun atu esklarese ba ita-nia bainaka sira ne´ebé mak mai, hodi sira mós bele hatene liutan istória Timor-Leste nia luta ba ukun rasik aan,” nia garante.

Dekanu FSS, Eurico Araújo hateten katak istória la’ós haktuir de’it buat ne’ebé mak di’ak maibé mós buat ne’ebé mak ladi’ak.

“Tanbasá ita tenke hanoin fali faktu sira ne’ebé mak ladi’ak? Ha’u haree komemorasaun ida ne’e hanesan retroespetiva ida-hateke fali ba kotuk atu haree konsekuénsia sira funu nian, tantu funu primeira guerra mundial, segunda guerra mundial ka funu ne’ebé de’it,” dehan dekanu FSS.

“Ne’e hanesan mehi aat ba povu ida. Tanba bainhira funu buat di’ak oituan de’it, aat mak barak tebes. Aat hirak ne’e mak ita komemora ohin haree buat aat sira para relembra, la’ós atu mout iha ne’ebá maibé atu sai reflesaun ba ita atu hakribi funu, hakribi violénsia,” nia reforsa tan.

Dekanu Eurico Araújo mós apresia ho inisitiva di’ak husi Asosiasaun HAK no sosiedade sívil envolvidu sira kona-ba rezultadu peskiza ne’ebé sira aprezenta no entrega ba FSS, UNTL ne’e.

Entretantu, rezultadu peskiza ne’e elabora ho maneira sientífika no hakerek ho padraun ortografia padronizada, kompostu husi pájina 171.

Peskiza ne’e akresenta rekomendasaun sira hanesan, Governu Japaun tenke responsabiliza, tantu legalmente nomós moralmente ba sofrimentu vítima eskravidaun seksuál militár japones, rekoñese sira-nia sala no dskobre lialoos kona-ba problema ne’e ho kumpletu, purezemplu liuhusi komisaun buka lialoos ho kooperasaun ho governu Timor-Leste.

Governu Japaun tenke hato’o deskulpa ofisialmente ba sobrevivente eskravidaun seksuál militár japones.

Governu Japaun tenke respeita no valoriza direitu sobrevivente atu ezije reparasaun ka kompensasaun no halo polítika no lei foun ne’ebé bele fó posibilidade ba sobrevivente sira simu reparasaun ka kompensasaun.

Governu Japaun tenke halo eduakasaun ba públiku no jerasaun foun hodi istória eskravidaun seksuál militár Japones la haluha nomós nu’udar meius aprendizajen atu kazu hanesan labele repete fila fali iha futuru.

Governu Timor-Leste tenke garante direitu sobrevivente ne’ebé protejidu husi lei internasionál atu ejize direitu seluk no iha nível diplomasia, ejizénsia sobrevivente sira ne’e tenke hetan reprezentasaun nu’udar ejizénsia povu ne’ebé legál tuir lei internasionál.

Governu Timor-Leste tenke peskiza kle’an kona-ba eskraviadaun seksuál iha tempu okupasaun japoneza no fó atensaun espesiál ba kondisaun sovbrevivente sira nomós garante katak sofrimentu povu ne’e hetan espasu ne’ebé adekuadu iha edukasaun istória nasaun japones.

Ikus liu mak rekomenda ba komunidade internasionál sira iha dever atu dezenvolve no apoia advokásia hodi aselera realizasaun polítika foun atu hametin justisa ba problema eskravidaun seksuál militár japones. Violasaun direitu umanu nu’udar problema internasionál no komunidade internasionál iha dever atu foti asaun hodi direitu umanu bele tane aas iha ne’ebé de’it no bainhira de’it. Kestaun ne’e tanba violénsia ba feto iha situasaun konflitu sei kontinua akontese no la iha medida adekuada solusiona. Solusaun ba eskravidaun seksuál militár japones sei sai presendente ne’ebé di’ak, se karik bele rezolve tuir prinsípiu sira iha lei internasionál.

Tuir kronolojia, haktuir iha relatóriu ne’e katak forsa Japaun tuun iha illa Timor iha 20 fevereiru 1942 mak rezimentu 228 husi divizaun 38 ezersítu terestre. Rezimentu ne’e iha Koronel Sadashichi Doi nia okos. Alende nu’udar komandante rejimentu 228, Sadashichi mós hala’o kna’ar nu’udar komandante forsa iha operasaun invazaun mai Timor Portugés.

Iha inísiu setembru 1942, divizaun 38 substituidu tiha husi divizaun 48. Divizaun ne’e lidera husi tenente jerál Yuitsu Tsuchihashi, entretantu komandante divizaun infantária mak majór jenerál Koichi Abe. Unidade ne’ebé substitui forsa Sadashichi Doi iha Timor Portugés mak batalliaun 2 husi rezimentu infantária 47 iha komandu Koronél Isamu Yanagi nia okos ne’ebé to’o iha Díli ha loron 5 setembru 1942.

Tuir fali Rezimentu Infantária Formoza 2, Rezimentu Infantária Formoza 1, Rezimentu Buska 48, Rezimentu Artillária Foho Formoza 48, Rezimentu Enjeñária (Zeni) 48 no seluk-seluk tan.

Ekipa peskiza ba relatóriu ne’e konjunta Asosiasaun HAK mak José Oliveira Sampaio, Amado Rosentino Hei, Rinto Trihasworo, Rogério Viegas Vicente, Manuel Monteiro Fernandes, Edio Saldanha, Sisto dos Santos, Angelina de Araújo, Rita Barros, Francisca Assis, João Bosco Fernandes, Victória Lopes Fernandes, Luduvina Fernandes, Carlito da Costa, Lena Marques nomós pesoál seluk.

Enkuantu husi Japaun mak Kiyoko Furusawa, Akihisa Matsuno, Monica Nakamura, Mikio Monju, Eriko Toku no seluk tan.

Jornalista: Rafy Belo | Editór: Manuel Pinto

Imajen: Diretór Asosiasaun HAK, Manuel Monteiro

ZEESM Afeita Komunidade, Alkatiri: Komunidade Bele Keixa Iha Tribunal

DILI – Primeiru Ministru Mari Alkatiri hateten, bainhira atu halo konstruksaun edefisiu ZEESM-Oecusse Ambeno, iha neeba ailaran no duut maka boot, maibe agora komunidade komesa dehan afeita ona, tanba nee sira bele hatama keixa iha Tribunal.

“Komunidade bele hatama keixa iha Tribunal katak nee afeita ba komunidade, tanba hau tama iha nee ba nee dut maka boot deit, ema Oecusse rasik hakfodak halo nusa maka ita boot hili fali fatin ida be ailaran ida nee, agora furak ona komunidade nia tos ona,” dehan PM Mari, ba jornalista sira, hafoin remata lansamentu pedra ba konstruksaun edefisiu UNTL, Hera, Dili, Tersa (20/02/2018).

Xefi Governu dehan, Rai laos komunidade nian, rai estadu nian, komunidade ida rua maka kolia dehan komunidade, saida maka signifika komunidade, hare besik eleisaun ona komesa problema ona eleisaun liu ona problema laiha ona.

“Besik eleisaun agora problema fali nee politika, hau lapreokupa se maka iha rajaun Tribunal iha ba aprezenta iha Tribunal,” dehan Xefi Governu. 

Carme Ximenes/Maria lay | Suara Timor Lorosae

CNRT Avansa Pakote, Oportunidade PD Avansa

DILI - Partidu CNRT avansa pakote iha AMP (Aliansa Mudansa ba Progresu), fo oportunidade ba PD atu avansa ba oin, tanba tuun ba kampana laos ona CNRT, maibe AMP.

Lia hirak nee hatoo husi Deputadu husi Bankada PD Luis Mendes Ribeiro hatete, iha momentu 2007, situasaun neebe difisil enkontru entre PD ho Xanana, sempre husu PD atu apoiu maun boot para harii partidu CNRT hodi nunee bele hasoru situasaun difisil.

“Ohin sai realidade katak segundu no terseiru periodu CNTR sei laiha, i realidade agora akontese ona, tanba bainhira AMP hamriik CNRT laiha ona. Ida nee komprimisiu maun boot hatete ona, neebe ami fiar katak agora maun boot atu entrega ba jerasaun foun,” katak Luis ba jornalista Tersa (20/02/2018) iha Bankada PD PN.

Deputadu nee agradese ba maun boot nia konsistente politika neebe hahu ona nia komprimisiu ho PD, bainhira tama ba harii CNRT.

Nunee mos Xefe Bankada PD Maria Teresa da Silva hatete, situasaun inserteza politika mosu mak halai ba EA, iha EA nee partidu politika hotu sempre enkoraza nia militante sira hotu atu bele manan iha, maibe PD mos iha mehi no esperansa boot atu bele manan iha EA.

Hatan ba kestaun nee Deputadu CNRT Dionisio Babo hatete, ema balu dehan, Bandeira CNRT agora lakon ona, tanba EA hasae bandeira AMP, nia dehan,  nee propaganda oin-oin  mosu, maiibe seilahafahe AMP. 

Guilhermina Franco | Suara Timor Lorosae