DILI, 18 maiu 2021 (TATOLI)—Vise-Ministru Administrasaun Estatál, Lino de Jesus Torrezão, tersa ne’e informa Governu liuhosi Ministériu Administrasaun Estatál (MAE) deside kansela selebrasaun loron restaurasaun independénsia 20 maiu ba dala-19, tanba serka sanitaria no númeru kazu pozitivu COVID-19 ne’ebé aumenta loron ba loron.
“Ita kansela totál selebrasaun loron restaurasaun independésia 20 maiu ba tinan ne’e, tanba iha hela situasaun serka sanitaria nia laran no kazu poztivu COVID-19 aumenta sa’e makaas. Iha situasaun serka sanitária ne’e labele halibur ema barak entaun ita-nia Prezidente Repúblika.
Francisco Guterres Lú Olo deside fali katak selebrasaun restaurasaun ne’e kansela totál,” Lino de Jesus Torrezão hateten ba Agência TATOLI iha nia knaar fatin Colmera, Dili, tersa ne’e.
Membru Governu ne’e hatutan, Estadu no Governu kansela tanba tauk karik halibur ema barak sei aumenta moras COVID-19 iha Timor-Leste, entaun iha loron 20 maiu ne’e sei realiza de’it misa agradesimentu liuhosi virtuál no Prezidente Repúblika sei hato’o ninia diskursu.
“Ita só iha de’it mak diskursu Prezidente Repúblika Francisco Guterres Lú Olo nian no misa agradementu maibé liuhosi virtual,” nia dehan.
Lino Torrezão hateten, ba corpo içar bandeira hosi munisípiu sira-ne’ebé kosentra ona iha Dili no halo ona preparasaun másimu ne’e, Governu sei lori-fila sira ida-idak ba sira-nia mnisípiu, maske antes ne’e sira tuir teste swab no rezultadu hatudu sira na’in-neen (6) mak pozitivu no daudaun ne’e iha hela fatin izolamentu Gólgota, Comoro, Dili.
“Na’in-neen ne’’e ida hosi munisípiu Baucau, Liquiça ida no Maliana ida, no na’in tolu seluk ne’e maihosi ema ne’ebé tein inklui inspetór ne’ebé akompañia corpo içar bandeira ne’e,” nia dehan.
Jornalista: Osória Marques Editór: Cancio Ximenes
