ELEISAUN DIRETA LIDERANSA FRETILIN…!!

Jornal Nacional, editorial

Partido Frente Revolusionario Timor Leste Independente (FRETILIN) iha Sabado liu ba halo eleisaun direta hodi hili lideransa maximu Partido nian, Presidente no Sekretario Jeral hodi komanda partido historiku nee ba tinan lima oin mai (2016 -2021).

Eleisaun direta FRETILIN nian nee laos foin primeira vez. Partido historiku nee halao ona eleisaun direta iha tinan 2011 ho pakote uniku, Presidente Partido, Francisco Guterres ‘ Lu-Olo no Sekretario Jeral, Mari Alkatiri.

Eleisaun direta partido FRETILIN ho pakote uniku, Mari – Lu-Olo (MarLu) nee nudar problema uma laran partido FRETILIN nian, demokrasia internal partido nian maibe publiku, li-liu militantes partido seluk mak preokupa fali, senti ‘cacin kepanasan’ no halo sai polimika ba demokrasia nebe partido nee adopta.

Los duni, kandidatu pakote uniku nee la presiza tan eleisaun para atu gasta deit osan, energia no gasta tempo maibe halao deit kongresu nasional atu nunee halo votasaun aklamasaun hodi legaliza kandidatu nebe iha.

Maibe mos eleisaun direta nee,  nudar inovativu ida no dinamiku foun nebe partido FRETILIN halo hodi intrepreta pratika demokrasia iha país nee. Normalmente  eleisaun halo kuandu iha kandidatu barak, minimu liu  kandidatu rua.

Agora duvida mak oinsa atu valida ba kandidatu pakote uniku?  Oinsa prosesu nee kontinua  prienze rekezitus demokratiku? klaru tenki loke dalan ba eleisaun, nunee mos eleisaun laos deit atu hili opsaun, A, B ka C ka kandidatu A, B ka kandidatu C,  maibe eleisaun mos nudar meus ida atu justifika no valida ba apoiu kandidatura ‘ uniku’.

Eleisaun direta ba pakote uniku iha FRETILIN  hamosu pensamento balu katak Mar – Lu- Olo kria ona estatus Quo iha partido hodi taka dalan ba lideransa foun atu mosu nunee bele kompete ba lidera partido.

Maibe eleisaun direta lideransa partido nian nebe FRETILIN halo nee mos nudar lisaun ida nebe partido politiku sira seluk bele banati tamba lidera partido ida nebe eleitu liu husi eleisaun nebe involve militantes tomak, nee iha poder boot liu duke eleitu liu husi kongresu.

Eleisaun direta ba lideransa partido nian nee laos foin primeira veza akontese iha mundo politiku partidaria maibe eleisaun direta FRETILIN nian referensia husi Partido Sosialista (PS) Portugal.

Publiku hakarak ka lakohi, simu ka la simu eleisaun direta lideransa partido nian nee, kestaun publiku nian rasik, FRETILIN la preokupa tamba preve ona iha rejimentu interna partido nian rasik.

Eleisaun direita mee sai nudar parometro ida ka , FRETILIN hakarak sukat ninia forsa politika antes tama ba eleisaun boot rua, eleisaun Presidensial no eleisaun Parlamentra iha 2017 mai.

Agora baseia ba resultadu eleisaun direta lideransa FRETILIN pakote uniku, Mari-Lu-Olo iha 2011 nian. Militante 147.064 mak fo votus a favor, kuaze 6.338 kontra, lakohi lideransa MarLu.

Eleisaun direta iha tinan 2016, bele dehan forsa politika FRETILIN nian tun. Militantes rejistradu loron rua antes tama eleisaun, 108 mil militantes. Dadus nee hatudu katak reduzaun militantes FRETILIN nee boot teb-tebes. Ne’ebe publiku dadaun nee hein hela oinsa resultadu eleisaun direta 2016 nian nee?.*

PRIMEIRA DAMA LANSA PROGRAMA DOLAR 1 BA FUTURU IHA MANUFAHI

Primeira Dama, Isabel Ferreira, Sesta (02/09), lansa programa  ‘Dolar 1 (ida) Ba Futuru’ ba labarik kiik  oan kbiit laek sira  hamutuk atus ida tolu nulu (130), iha Munisípiu Manufahi.

Iha  Primeira Dama nia diskursu ba lansamentu programa 1 Dolar ba Futuru ne’e hatete, programa ne’e  primeiru lansa iha Munisípiu Baucau loron 01 Juñu tanba numeru Aldeia ne’ebé barak liu iha Baucau, maibe  depois lansa iha ne’eba, senti triste tanba numeru la hanesan saida mak eskolha, sira la aprezenta kandidatus tuir numeru ne’ebé merese atu hetan apoiu programa ida ne’e.

“Same la’os primeiraves halo no hahú husi Same. Antes ne’e hahú ona husi Baucau. Programa ne’e ba labarik sira teritoriu Timor-Leste tomak,  kada Aldeia iha labarik kbiit laek nain rua maka sei hetan benefisiu ba programa ida ne’e,”dehan Isabel Ferreira.

“Ha’u mai lansa idea ne’e ho hanoin ida katak,  Same bele halo preparasaun ida diak liu  ho numeru ne’ebé responde ba ita nia sidadaun sira tuir Aldeia ne’ebé ita iha. Mas triste tanba ita la iha atinji numeru ita hakarak. Iha Manufahi  iha  Suku 29, Aldeia 137 tuir los nia benefisiariu ba programa ne’e labarik iha  274 katak ita bele rai osan iha banku BNCTL  husi labarik nain hirak ne’e ita bele halo poupansa ka rai osan ba banku hamutuk $ 3288, maibe realidade ami labele deposito osan ida ne’e ba banku BNCTL maibe so bele depositu deit osan 130 kandidatus no ha’u hein kandidatus ne’e los duni. Labele  esperiensia hanesan iha Munisipiu seluk  halo aprezenta numeru ida no iha BNCTL numeru ida, entaun ita bele depositu ba BNCTL  osan hamutuk  $ 1560 ba labarik sira hamutuk 130,”dehan nia.

Isabel Ferreira dehan, prgorama ida ne’e kriteria ba ema kiak tanba dehan Timor ne’e maioria ema kiak.

Tuir nia, Banku Sentral iha politika  ho hanoin ida katak programa ne’e bele ajuda Timor oan hotu hodi halo poupansa, tanba Timor abitua  ladiak, nia bele kiak maibe lia mate lia moris nia hasai hanesan ema riku ida, hotu tiha nia uma hahan la iha, nia uma at, nia oan atu ba eskola osan la iha, entaun tenki hanoin ona espiritu poupansa.

“Osan ne’e rai ba ajuda oan sira kuandu to’o tinan 17 ba leten, sira atu ba eskola, sira iha osan ruma hodi ba eskola, entaun ita tenki hatene aproveita oportunidade diak ne’e tanba oportunidade ne’e sei la mai dala rua,” Isabel Ferreira hatete.

Isabel Ferreira hatutan, programa ne’e la’os Estadu ka Governu nian, maibe programa ne’e mai husi ema laran diak, ema riku ida, Avo Jape Kong Chu nain ba Timor Plaza, nia mak sai patrosinador.

“Ha’u nia mehi maka programa ne’e tenki to’o labarik sira tinan 17, maibe lahatene sei bele to’o ne’eba ka lae? tanba ema ida fo apoiu avo Jape agora idade tinan 90 resin ona ne’ebé lahetene wainhira nia kuandu mate ona nia familia sira sei hanoin atu fo ajuda nafatin ba programa poupansa ne’e ka lae? Ne’e mak wainhira kuandu halo programa ne’e ha’u  fila ba sempre ba koalia ho Avo Jape ho nia familia sira hodi konvense nafatin  sira nian hanoin kona ba programa ne’e,”dehan Isabele Ferreira.

“Riku ka kiak, ema hotu moris mai hanesan ema kiak, agora fila ba hotu hotu nia esforsu, badinas no disiplina  hodi muda nia moris atu sai ema riku no bo’ot  la’os moris mai bo’ot no riku kedas, riku ne’e depende ba ema nia badinas, bo’ot ne’e depende ba ema nia fuan,”dehan Isabel Ferreira.

Isabel Ferreira mos husu ba inan-aman no oan sira atu uza didiak oportunidade ida ne’e hodi rai osan ba oan sira nian futuru. “Osan ne’e la’os rai ba haree atu halo lia, osan ne’e la’os atu ba foti fali lae, osan ne’e so bele foti wainhira sira nia tinan to’o ona 17 mak foin bele ba foti,”dehan Isabele Ferreira.

Nune’e mos Adjuntu Administrador Munisípiu Manufahi,  Arantes Isaac Sarmento,  ne’ebé partisipa mos iha seremonia ne’e hatete, inisiativa ne’ebé halo husi Primeira Dama atu eduka oan sira, oinsa sira rasik rai osan hodi haree ba futuru sira nian.

“Programa dolar 1 ba Futuru ne’e ita hotu tenki agradese. Ha’u hanoin katak ita bele muda pensamentu ida tanba durante ne’e ita hanoin katak oinsa haree oan sira ba future, maibe kuandu ho programa ida oinsa sira atu jere, oinsa sira tau osan ho didiak,” Adjuntu Administrador ne’e hatete.

Nune’e mos  Manajer Operasional Banco Nacional do Comersio de Timor-Leste (BNCTL), Manuel Rangel da Costa, hatete,  programa Dolar 1 ba futuru ne’e diak, tanba bele ajuda labarik sira oinsa aprende rai  osan hodi  haree sira nian future tanba labarik sira mak sai hanesan fondase ba nasaun nian.

Manuel Rangel da Costa dehan,  agora dadauk iha teritoriu Timor laran tomak, labarik sira besik ona  rihun hat (4000) no osan ne’ebé rai maka  hamutuk  $ 700 e tal mil.

“Ida ne’e hatudu katak ita komesa hanoin investe ba oan sira hodi haree ba futuru sira nian ba aban bainrua ninian,”dehan Manuel Rangel da Costa.

Nune’e mos, Manuel de Jesus  reprezenta inan aman labarik sira nian hatete, nia agradese no senti kontenti ho programa  Dolar 1 ba future ne’ebé  hala’o husi Primeira Dama ninian ne’e, tanba bele   fo hanoin ba inan aman sira  a atu tau osan uitoan-uitoan  ba oan sira nia futuru aban bainrua nian.

Partisipa iha seremonia lansamentu ne’e, Primeira Dama akompaña husi Adjuntu Administrador Munisípiu Manufahi, Manajer Operasional BNCTL ho nia staff sira hotu, inan aman husi labarik 130 ne’ebé sai hanesan benefisiariu ba programa Dolar 1 ba Futuru iha Munisipiu Manufahi nian.Des

Jornal Nacional

DUN MILITANTE PD PRODUS OSAN FALSU, INTELEKTUAL LABELE ESPLORA POVU

Sekretariu Jeral Partidu Demokratiku (PD), Mariano Assanami Sabino, husu ba intelektual sira atu la bele esplora povu, maibe oinsa buka hanoin hadia povu nia moris no kore povu husi kiak ho mukit.

Mariano Assanami saran lia hirak ne’e hodi responde Jornalista iha salaun CNE, Domingu (4/9/2016), relasiona akuzasaun balun ne’ebe kondena dehan, militante PD produs osan falsu iha Posto Administrativu Loro, Munisipiu Lautem, foin lalais ne’e.

Autor sira ba produs osan falsu ne’e tama tiha ona detensaun polisia nian no hetan ona TIR (temos identidade residençia).

“Hau atu husu deit se mak koalia, mais hau atu dehan katak se kriminozu ida halo sala depois dehan PD, ka kriminozu ida tama tiha komarka lakon ona dereito atu vota ne’e mos atu dehan militante PD nian ka? Nudar intelektual labele esplora povu, tidak akan mungkin PD atu monu ba manobra ne’e,” hateten Assanami Sabino.

Assanami husu katak, razoavel ka lae dehan povu iha area rural bele produs osan, kuandu ne’e los kontra Nasaun Amerika, tanba hamonu ekonomia Amerika nian, produs osan ne’e hanoin kala fasil ka, nudar ema intelektual labele koalia arbiru.

“Mas atu dehan katak, labele politiza sasan ne’ebe mak lapresija, tenke debate programa, planu no presija buat barak atu koalia, tanba dezenvolvimentu la’o hela, nusa mak tenke koalia buat ne’ebe la inportante, tidak akan mungkin PD atu monu ba manobra ne’e,” dehan Assanami.

Mariano  Assanami esklarese katak, rona tiha problema ne’e PD forma kedas ekipa ida hodi halo investigasaun, ne’ebe tuir relatorio provizorio ne’ebe mak nia rasik simu katak, joventude PD nian fo formasaun ba militantes PD nian kona ba oinsa fotokopia, skan no hanorin komputador, ne’ebe sira fotokopia fali osan ida asli ne’e hodi sai exemplu.

“Kuandu iha kontestu produs tenke iha makina, maibe laiha makina oinsa bele produs, labele politiza povu liu husi deklarasaun falsu sira hanesan ne’e. Ami seidauk estabelse sede iha suku sira, municipiu deit mos seidauk iha hanusa tan mak ba suku, PD mos seidauk fo laptop ida ba municipiu, mais atu klarifika lolos deit katak, ema sira fo treinamentu ne’e mai husi militante PD nian duni, maibe ema ida fotokopia osan ne’e populasaun bai-bain,”  hateten Mariano Assanami.

Iha biban ne’e, Sekjen PD ne’e husu ba partidu balu ne’ebe hakarak fo osan ba povu, fo kedas agora, labele iha eleisaun mak fahe.

“Se mak hakarak fo osan ba povu diak liu fo agora, labele iha eleisaun mak fo, kuandu hanesan ne’e atu sosa kiak povu nian hodi hetan votu, bainhira nia ukun para atu halo kiak povu nia nafatin,” dehan Assanami.mia

Jornal Nacional

FUNDADOR PSD AFILIA BA CNRT • EIS MAIJOR TARA MOS BA ONA CNRT

Fundador no militantes husi Partidu Sosial Demokrata (PSD) barak maka afilia ona ba partidu CNRT, inklui eis Maijor Augosto de Araujo “Tara”.

Liu husi inkontru internal partidu CNRT nian ne’ebe halao iha Centro Concenções Dili (CCD), foin lalais ne’e, eis Maijor Tara mos hola parte hodi hatais atributu (kamiza) CNRT nian. nune’e, nia belun balum Lolina Celeste de Deus hamutuk ho membru PSD nian nain 300 mos deside afilia hotu ba CNRT.

Afiliasaun fundador no militantes PSD nian ne’e simu direitamente ho ‘ondra’ husi Sekretariu Jeral (Sekjer) CNRT, Dionisio da Costa Babo, iha Sede CNRT, Dili, Sabadu (03/9/2016).

“Ami husi PSD afilia ba CNRT tanba partidu CNRT hetan konfiansa boot no asegura duni aspirasaun povu nian. Ami mos tau konfiansa boot ba figura karismatiku maun boot Kay Rala Xanana Gusmão,”  hateten  Celeste Lolina.

Nia hatutan partidu CNRT ho prinsipiu nakloke hodi simu ema hotu lahare ba kor, suku, etnia, relijiaun, hanesan kontinuasaun husi tempo luta ba ukun an hodi involve ema hotu nebe iha hanoin diak atu dezemvolve rai doben ida ne’e hamutuk ho lideransa masimu nebe iha.

“Ami nebe halo afiliasaun ne’e ba oin ami tenki tane no deposita votus nebe iha ami nia liman ba partidu nebe merese ami votu maka partidu CNRT,” hateten Celeste Lolina.

Eis Deputada ne’e mos la haluha hato’o ogradese ba partidu PSD nebe durante ne’e hamrik lori mos povu nia aspirasaun,  maibe desisaun atu afiliasaun ne’e independemente sai husi ida – ida nia konsensia.

Iha fatin hanesan Sekertaria Jeral partidu CNRT, Deonisio Babo hatete militantes sira nebe afilia ne’e hamutuk 300, sira hakarak mai hamutuk ho CNRT tanba permeiru hare ba posisaun politika CNRT nian nebe iha duni komitmentu, kompromisiu atu liberta duni povu ne’e.

Nia dehan, razaun seluk PSD hakarak hamutuk ho CNRT tanba hare ba figura, lideransa maun Xanana hanesan ema nebe konsistensi no luta ba libertasaun povu no hare ba programa no lalaok partidu CNRT nian durante ne’e nebe hakoak ema hotu nebe la halo diskriminasaun i hanoin tebes ba dezemvolvimentu nasional.

“Hau agredese tebes, lori Presidente partidu nia naran, strutura tomak hakarak fo agradese ba iha inisiativa husi ema seluk mai partidu CNRT, i hau husu ba jerasaun foun nebe moris iha 1999 mai leten atu iha elisaun 2017 hili CNRT, tanba hili CNRT laos hili ba sira nebe atu ukun deit maibe ba mos foinsae sira nia futuru tanba CNRT hamutuk ho partidu seluk halo ona planu estratejiku dezemvolvimentu nasional nebe subliña ona fase dezemvolvimentu ba ita Timor atu bele tinan 2030 ita sai hanesan pais ordenamentu mediu alto,” dehan Dionisio Babo.nes

Jornal Nacional

CIRÍLO CRISTÓVÃO: F-FDTL HUSU TAKA MÚZIKA, LA’OS ASALTA REZIDENSIA L-7

Ministru Defeza (MD), Cirílo Cristóvão klarifika katak, iha komemorasaun loron FALINTIL 20 Agostu ba dala 41, membru FALINTIL-Forsa Defeza Timor Leste (F-FDTL) la’os ba asalta rezidensia eis komandante rejiaun III, Cornelio Gama “L-7”, maibe ba husu atu taka muzika ne’ebe loke ho lian maka’as.

“Tuir informasaun preleminaria ne’ebe mak ha’u rona katak membru F-FDTL ne’e halo seguransa iha Quartel General nia sor-sorin ne’e mak rona iha komandante L-7 nia residensia toka muzika ho lian maka’as, entaun membru F-FDTL sira ne’e tama ba L-7 nia residensia hodi hateten ba familia L-7 nian taka tiha muzika tanba serimonia 20 agostu ne’e kontinua hela kanta Hino Nasional Patria-patria ne’ebe taka lai muzika,”afirma Cirílo Cristóvão, ba Jornalista sira iha Metinaro, Sesta (02/09/2016).

Ho terminologi ida ne’ebe mak dehan asalta L-7 ninia residensia, tanba ne’e nia parte halos informasaun ne’ebe mak espalha iha publiku nia leet katak, membru F-FDTL ba asalta rezidensia eis komandante L-7 ninia ne’e lalos.

 “Ha’u hanoin komandante FALINTIL Cornelio Gama alias L-7 ne’e eis-Falintil hanesan mos ema veteranus ida ne’ebe kompriende situasaun, tanba ne’e mak hanesan Ministru Defeza hakarak halo los opiniaun publiku la’os asalta L-7 nia rezidensia,”esklarese governante ne’e.

Maske nune’e Ministru Defeza,  konkorda ho Komandante L-7 nia hanoin tenke eduka membru F-FDTL para hala’ao knar sai professional liu tan.

“Ita nia forsa sira ne’e mos iha prosesu ne’ebe aprende hodi kapasita liu-liu ba Forsa atu bele servisu ho profesional atu labele asalta kualker se deit tantu ema ne’e la komete iha krimi ruma. Ita buka meus ida atu bele hadia instituisaun forsa nian ho sira nia displina iha militar nian, ita hotu hakarak hodi bele hetan forsa ne’ebe mak profesional atu bele asegura soberania pais ida ne’e”haklean Cirílo.eus

Jornal Nacional

ORSAMENTU VETERANUS TINAN 2017 U$ 101 MILLOENS

Vise Ministru Solidariedade Sosial (MSS), Miguel Manetelo, hatete, orsamentu ba pensaun Veteranus tinan 2017 nian ho montante U$ 101 milloens.

“Proposta orsamentu ne’ebé mak foin lalais ne’e debate iha komite revizaun orsamentu ba Pensaun Veteranus ho montante $ 101 milloens, Orsamentu $ 101 milloens ne’e ba deit orsamentu Veteranus,”dehan Miguel Manetelo ba jornalista sira, iha MSS, Caicoli-Dili, Sesta (02/09).

Nia haktuir,  orsamentu ne’e ba total 29 benefisiarius  ne’ebé maka sira baibain simu tiha ona no balun ne’ebé tinan kotuk hahú simu ona.

“Ita hatene katak sira ne’ebé maka rejistu iha 2009 to’o agora seidauk verifika, agora ida sira simu dadaun ne’ebé mak ha’u temi ne’e mai husi rejistu 2003 to’o 2005,”esplika Miguel Manetelo.

Alende ne’e nia  dehan,  kona ba orsamentu idozus nian iha U$ 34 Milloens ital no ba bolsa da mãe 9 Milloens.

Nia dehan, total tranferensia iha MSS ba tinan 2017 ne’e tuir pakote ou envelope ne’ebé fo ba Ministeriu iha 142, maibe tuir lolos osan ne’e seidauk to’o. Tanba iha pedidu adisional ida atu aumenta tan ninia tranferensia publiku 11 Milloens. Maibe desizaun ida ba U$ 11 Milloens,  atu kompleta orsamentu ba Ministeriu nian ne’e, sei desidi ikus iha komite revizaun orsamentu no pedidu adisional seidauk iha desizaun.

“Sekarik maka komite revizaun orsamentu sei la tau karik, ba tinan oin idozus no bolsa da mãe sei selu fulan ne’en deit no fulan neen seluk sei la selu tanba la iha osan,”tenik Manetelo.

Nia realsa katak,  Ministeriu kontinua tuir deit envelope fiskal ne’ebé maka fo husi Ministeriu Finansas.

“Ami ba ho justifikasaun ida katak se mak la autoriza ou asina pedidu adisional ne’e,  signifika ba 2017 pagamentu ba idozus sira ne’e selu fulan neen deit, maibe veteranus nian la iha problema ida,” haktuir Miguel Manetelo.avi

Jornal Nacional