Investimentu tenke aselera kresimentu ekonómika iha Timor-Leste ba tinan 2016 - BAD

Aumentu hosi investimentu públiku ho privadu sei bele sai hanesan aselerasaun ba kresimentu ekonómika iha Timor-Leste ho 4,5% tinan ne’e no 2017 ho 5,5%, tuir relatóriu hosi Banko Aziátika ba Dezenvolvimentu (BAD).

Tuir relatóriu Perspetiva ba Dezenvolvimentu Aziátika ne’ebé BAD fó sai mos kona-ba inflasaun iha Timor-Leste ne’ebé sei mantén moderada ba to’o tinan rua oin mai, ronda 2% durante 2016 no sei sai ba 3% iha tinan oin, tanba efeitu deflasionáriu hosi folin krude ne’ebé tun nomós dolár ne’ebé bot tebes.

Maski iha sinál pozitivu nomós “perspetiva ekonómika ne’ebé di’ak”, maibé Shane Rosenthal, responsável BAD iha Timor-Leste haktuir kona-ba Timór ninia nesesidade hodi “hatan ba folin mina ne’ebé tuun, hanesan buat ida ne’ebé hametin nesesidade hodi diversifika ekonomia” timor-oan nian.

“Populasaun Timor-Leste ne’ebé aumenta, sai hanesan oportunidade reál hodi hasa’e tan perspetiva kresimentu ba prazu naruk liu hosi investimentu ba iha kapitál umanu nomós insentiva sira atu halo parte barak liu tan ba iha merkadu serbisu nian”, konsidera Shane Rosenthal, no sita iha komunikadu BAD nian ida.

Iha ninia relatóriu, BAD ko’alia kona-ba motór investimentu públiku no privadu, hateten kona-ba projetu hirak ne’ebé hanesan parseria públiku-privada ba portu foun Dili nian ne’ebé sei investe ho osan besik milloens 290, “ekivale ba 19,8%, hosi PIB” valór metade hosi privadu nian.

Ezekutivu sira mos sei harii infraestrutura bot seluk, ho projetu investimentu privadu, inklui fábrika simente foun ida ho valór besik to’o dolár milloens 400.

Iha parte negativu, hanesan impaktu iha finál 2015 no inisiu 2016 hosi fenómenu klimatériku El Niño, ne’ebé afeta kolleita sereais, tanba ne’e maka tenke aumenta tan importasaun.

Maski nune’e kolleita kafé ba tinan ne’e sei bot liu fali tinan 2015.

Haree ba nivel reseita, BAD haktuir katak Orsamentu Estadu hamenus previzaun ba volume produsaun mina. Tanba ne’e maka ko’a tiha reseita mina entre 2016 to’o 2022 ba 56,4% lahanesan ho 2015. 

“Ida ne’e hamenus estimativa hosi rendimentu anuál sustentável hosi Fundu Petrolífera, ba milloens 544,8 ka ho valór milloens 638,65 iha 2015”, tuir dokumentu fó sai, no valór refere kalkula ho “folin médiu mina nian ho dolár 71,2 kada barril, lakonta ho folin mina ne’ebé tuun desde meadu 2015”. 

Maski sei atu halo reforma no hala’o daudaun, BAD konfirma katak sei laantesipa reseita la’os petrolófera siknifikativa ba prazu badak, tanba kontinua hatudu ho media menus hosi 11% PIB nasionál iha 2016 no 2017.

Iha relatóriu ne’e, ezisti mos referénsia kona-ba “dividendu demográfiku”, tanba timor-oan 42% maka joven liu fali hosi ninia nasaun, tanba ho idade 16.

“Bainhira jovens sira barak maka populasaun laborál Timor-Leste nian mos kontinua aumenta, kada tinan hosi 2015 to’o 2050 bele to’o 2,8%”, tuir dokumentu fó sai, hodi hatutan mos kona-ba dezafiu no potensiál hosi dezenvolvimentu kapitál umanu.

Asesu bot ba kuidadu saúde no edukasaun hetan ona susesu desde ukun-aan, tanba mortalidade infantile hahú menus hosi 2003 to’o 2009 no matríkula ba eskola primária hahú sa’e hosi 65,6% iha 2007 sa’e ba 91,9% iha 2013.

"Problema nutrisaun ba labarik sira kontinua aumenta no avaliasaun hosi rezultadu aprendizajen hatudu katak presija atu hametin liu tan ensinu pré-eskolár no báziku", tuir nota BAD.

Relatóriu ne’e mos konsidera katak dezenvolvimentu hosi setór privadu tenke kontinua sai hanesan prioridade ba Governu Timor-Leste, ho “reforma ambisiozu hodi hadia ambiente ne’ebé di’ak ba área negósiu no estimula dezenvolvimentu setór finanseira molok tama ba eleisaun nasaun, iha meadu 2017”.

Desde Timor-Leste sai membru BAD iha 2002, simu ona subvensaun hosi Fundu Fidusionária ba Timor-Leste (dolár milloens 52,8(, lima hosi FAD, Fundu Aziátika ba Dezenvolvimentu (milloens 85); no projetu asisténsia téknika 41 (milloens 35,82).

Simu mos empréstimu lima ho valór milloens 101,78, hamutuk ho doasaun FAD haat (milloens 75) no projetu asisténsia téknika sanulu (milloens 24,64) ne’ebé oras ne’e daudaun ativu.

SAPO TL ho Lusa 

PD Sofre, CNRT Mós Sofre

Partidu CNRT (Congresso Nacional da Reconstrução de Timor) rejeita Bloku Koligasaun entre Partidu Demokrátiku (PD) no CNRT kotu dezde iha mudansa governasaun Kintu Governu.

Tuir deputadu bankada CNRT iha Parlamentu Nasionál (PN), Arão Noe de Jesus informa CNRT konsidera bloku matein nafatin. Maibé, nia dehan, ho maneira no atuasaun hosi parte balun bloku nian ne’ebé halo án fali hanesan opozisaun ida ne’e maka lamentável teb-tebes tanba la komunga ona objetivu prinsipál ida ne’ebé konsidera estadu  hanesan interese ás liu.

“Iha tinan 2015 depois de remodelasaun akontese, konsidera bloku hotu ona ne’e lae, tanba iha momentu remodelasaun ne’e akontesse la’os de’it PD maka sofre, maibé CNRT mós ninia membru Governu barak maka sai, no sira lamenta kona-ba ida ne’e tanba postura polítika ne’e hakarak muda oinsá para infrenta situasaun polítika foun ida,” Arão dehan ba Matadalan iha Parlamentu Nasionál, foin lalais ne’e, relasiona ho deklarasaun hosi kuadru PD nian balun katak Bloku Koligasaun entre CNRT no PD la ezisti dezde tinan 2015 liu-ba.

Nia haktuir, hafoin konvida FRETILIN nia membru balun tama hanesan independente iha Sestu Governu ne’e membru balun hosi bloku nian hanoin katak kebra tiha ona, maibé antes atu konvida ne’e hotu-hotu maka konvida hodi fortifika Governu.

“Interpretasaun ho buat sira ne’e hotu hanoin katak CNRT hakarak tebe sai sira. Ne’e la loos. CNRT matein nafatin, no tanba ne’e maka tau sira nafatin iha pozisaun sira seluk. PD okupa Ministériu Edukasaun, Obras Públikas no Ministériu Ekonomia ne’ebé ministériu sira ne’ebé ke mesak boot ,” deputadu ne’e tenik.

Nia mós afirma katak, karta ne’ebé sira manda ba PD to’o ohin loron seidauk hetan resposta hosi PD rasik. Maibé, foin lalais Sekretáriu Jerál PD, Mariano “Assanami” Sabino haktuir katak PD sei mantein ho Bloku Koligasaun to’o tinan lima (5).

Deputadu bankada CNRT hatutan katak bloku mantein ninia postura komesa iha tinan 2012 bainhira forma bloku ne’ebé iha akordu formál ida entre partidu tolu (3) hanesan CNRT, PD no Frenti-Mudança.

Haree ba kestaun ne’e, hosi parte akadémika, Dekana Fakuldade Siénsia Sosiais Universidade de Dili (UNDIL), Cesaltina Angela Soares konsidera katak bainhira mosu remodalasaun iha V Governu ba VI ne’e bloku koligasaun la ezisti tiha ona.

“Yah… Ami nia haree katak dezde remodelasaun bloku ne’e la ezisti ona. Tuir loloos partidu sira iha bloku laran ne’e tenki sente ona, haree no análiza ona tanba saida mosu remodelasaun. Minístru lubuk ida hosi PD troka no satan Primeiru Ministru la mai hosi partidu vensedór no bloku nia ema,” dehan Dekana ne’e iha nia serbisu fatin, UNDIL, Maskarinhas, Dili, Segunda (21/03/2016).

Nia hateten tuir loolos iha ne’e sira (PD) hatene ona katak situasaun ne’e bele iha mudansa polítika ona. Nia afirma iha bloku laran ne’e sira tenki ezije atu rekore sira nia direitu katak Primeiru Minístru tenki mai hosi Bloku Koligasaun, labele mai hosi partidu seluk. Agora, sé Primeiru Minístru mai hosi partidu seluk, konfiansa polítika ne’ebé hamutuk ne’e ladun iha ona.

Dalan saida maka PD bele hili? Dekana ne’e dehan, PD nu’udar partidu polítiku ne’ebé sólidu, no iha ninia rekursu ne’ebé natón, sé la konsistente ona iha koligasaun dalan di’ak liu maka sai ba konsolida án, minístru sira bele sai atu ba prepara án. PD lalika tauk no laran susar, tanba governasaun ne’e mós falta de’it tinan ida (1).

Kona-ba karta ne’ebé CNRT hasai hodi hakotu bloku koligasaun ho PD, Cesaltina hateten katak ne’e normalmente nasaun barak iha mundu ne’e ema la interese, só iha Timor tanba ita nia situasaun polítika seidauk maduru no sei naton hela. “Ita nia populasaun mós seidauk toman di’ak ho situasaun polítika, maibé ne’e normál,” nia tenik.

Cesaltina esplika Governu minoria bele ukun nafatin tanba hetan konfiansa polítika mós hosi partidu boot FRETILIN. Ne’eduni, laiha impaktu ba CNRT nia governasaun no realidade ne’ebé ita akompaña sira hamutuk iha desizaun no mós profesionais balun hosi FRETILIN hamutuk hela ho CNRT.

Iha parte seluk, Deputadu Bankada FRETILIN, Francisco Miranda Branco afirma, maske FRETILIN nia kuadrus superior sira hola parte iha Governu ho idependente hosi partidu, maibé sira iha sentidu estadu—sempre rezerva ninia pozisaun atu estabilidade ne’e fundamentál iha prosesu konstrusaun no hametin estadu ida ne’e.

“Iha postura foun, klaru liu tan. Ami haree katak presiza duni tanba ita nia nasaun ne’e iha frajilidade oi-oin. Ita nia tratamentu labele sukat ho nasaun sira seluk ne’ebé kleur ona, tan ne’e tenki kuidadu didi’ak ita nia nasaun no ami kuidadu duni to’o agora,” Branco dehan.

Nia salienta FRETILIN suporta estabilidade governativa no labele iha presedénsia iha ita nia istória katak Governu to’o de’it iha dalan klaran monu. Ida ne’e sira nia prinsípiu labele akontese.

Bloku la ezisti tiha ona hafoin remodelasaun? Branco hatán katak seidauk. Bainhira iha ona anúnsiu hosi partidu maioritáriu hanesan foin lalais reprezentante partidu maioritáriu nian deklara sai iha PN katak bloku laiha ona ne’e maka ita foin konsidera hanesan ofisialmente bloku ne’e la eziste ona.

Iha fatin hanesan, Matadalan tenta atu halo konfirmasaun ho parte PD nian, maibé sira lakohi fó komentáriu. “Ida ne’e matéria ne’ebé ke durante ne’e ami labele halo komentáriu. Imi hein oituan de’it,” katak Deputadu Bankada PD, Virgílio Hornai. (Jon/Efrem)

Matadalan

Ezonerasaun Nia Prazu Liu Ona

Desizaun ezonerasaun ba Maijór Jenerál Lere Anan Timur  liu tiha ona. Normalmente, desizaun ida labele liu fulan ida.

“Tuir Dekretu Lei,  ita haree legalidade ba kazu ne’e, kazu ne’e nia prazu liu ona tanba fulan ida liu ona,” Deputadu Komisaun B Parlamentu Nasionál trata asuntu Defeza no Seguransa, Cesar Valente ba Matadalan iha Parlamentu Nasionál, foin lalais ne’e.

Maibé, tuir nia, ho konsensu ne’ebé maka iha,  ita labele obriga órgaun ida ba órgaun seluk, maibé hosi parte ida ita tenki haree mós ita nia entidade sira ne’ebé maka responsável ba asuntu ne’e.

“Konsensu ona katak prezidenti fila hosi Japaun mai maka foin bele haree kontinua ba prosesu ne’e,” Cesar esklarese.

Tanba ne’e, deputadu ne’e dehan, ita labele la’o dook hosi nia legalidade kona-ba lei sira, sé lae aban bainrua fó presidénsia ida ne’ebé maka pior liu ba jerasaun sira tuir mai ne’ebé maka asumi kargu sira ne’e.

“Sira bele uza de’it argumentu sira ne’e dehan katak uluk prezidenti sira uluk sira halo hela buat ida ne’e hanesan ne’e,  entaun argumentu sira ne’e moris nafatin ba oin,” nia hato’o.

Nia dehan hanesan reprezentante povu iha Komisaun B, hanoin katak loloos governu ezije de’it maka dekretu ne’e, tanba hodi bainhira haruka ona kontestasaun ne’e ba iha Tribunál maibé Tribunál haruka fila tanba Dekretu Prezidensia nian ne’e seidauk públika iha Jornál Repúblika.

Entretantu, organizasaun naun governamentál hosi Judicial System Monitoring Programme (JSMP), seidauk bele fó sai avaliasaun rezultadu ba validade ba kazu ezonerasaun Xefi  Estadu Maiór Jenerál, Lere Anan Timur ninian, tanba desizaun ne’e to’o agora  seidauk klaru.

“Kazu ne’e ita lahatene loloos tanba prezidenti anúnsia de’it hanesan ne’e iha fulan sira liu-ba kotuk, maibé desizaun ba ezonerasaun ne’e to’o agora seidauk hatama ba iha Jornál Repúblika, tanba ne’e maka ita atu dehan desizaun ne’e vale ka la vale to’o agora la klaru,” Diretór Ezekutivu JSMP, Luis de Oliveira Sampaio ba Matadalan iha nia kna’ar fatin Kolmera, Dili (21/03/2016).

Luis hateten, bazeia ba informasaun ne’ebé maka mídia nasionál sira fó sai katak Tribunál rejeita rekursu ne’ebé maka governu aprezenta, tanba razaun desizaun prezidenti nian seidauk tau iha Jornál Repúblika. Ne’e signifika katak prezidenti nia aktu ne’e seidauk formaliza. Maibé, tuir informasaun ne’ebé maka diretór ne’e lee hosi Mídia Lusa katak Tribunál Rekursu konsidera prezidenti nia desizaun ne’e pertense ba prezidenti nia kompeténsia.

“Ha’u lahatene ida ne’ebé maka loos. Ami seidauk husu tuir ba Tribunál Rekursu,”  Luis hato’o. Nia konsidera kazu ne’e sei konfuzaun hela, maibé nia hanoin iha ona kontaktu entre Prezidénsia Repúblika ho Primeiru Ministru atu halo ona aprosimasaun ba kazu ne’e.

“Ita atu halo avaliasaun ba desizaun ne’e kuandu ita la haree desizaun eskrita ne’e, ita hatene nia kontiudu para halo avaliasaun,” Luis esklarese. Diretór ne’e akresenta, nia labele halo nia konkluzaun rasik katak ezonerasaun ne’e la vale ona. Maibé, nia rekoñese katak kazu ezonerasaun ne’e durante sai preokupasaun ema hotu nian maibé seidauk tau iha Jornál Repúblika. Ne’e konsidera laiha sintidu ruma ba desizaun ne’e.

Nia hein katak Prezidénsia Repúblika ho governu ko’alia ba malu ona prontu atu halo díalogu fila fali ba kazu ne’e. “Ita hein katak bele iha solusaun ba asuntu ne’e, no mós hetan dalan ne’ebé maka reprezenta povu Timor,” Luis informa.

Tanba ne’e, JSMP husu ba Governu ho prezidenti atu halo kontaktu ba malu, hodi halo komunikasaun intensivu atu bele buka solusaun ida ne’ebé maka efetivu liu, no fó solusaun ida ne’ebé maka labele prejudika ba ita nia estabilidade nasionál. (Arif)

Matadalan

ME Hasoru Estudantes Kursu Preparativu

Minístru Edukasaun (ME), Antonio da Conceição hasoru malu ho estudante kursu preparativu iha 2014 iha lian Ingles no Portugues iha dia (17/03/16) iha salaun enkontru Ministériu Edukasaun, Vila-verde, Dili.

Iha sorumutu ne’e hodi deskute kona-ba futuru bolseiru sira ne’ebé iha tinan 2014 liu ona ezame atu ba kontinua estudu iha rai liur maibé na realidade to’o ohin loron seidauk implementa.

“Ministériu hola mós responsabilidade halo uluk preparasaun, kursu preparatóriu iha ne’e, estudantes hamutuk atus -ida-resin no sira ne’e iha altura ne’eba tuir tiha ona formasaun i tanba iha vagas bolsu estudu ne’ebé maka existe  ha’u hola inisiativa ida ne’e atu halo tiha kedas reiñaun ho sira hodi hatene sira nia interese se sira sei nafatin interesadu atu kontinua hetan bolsu do estudu ida ne’e maka ohin ha’u hasoru malu ho sira,” Antonio haktuir.

António esplika defísil oituan ba estudante hirak ne’e atu foti desizaun tanba agora dadaun sira kontinua hela kursu iha Universidade Nasional Timor Lorosa’e, balun to’o ona semester VII no balun foin inísiu semester III.

Antonio da Conceição esklarese, nia mós fó konselhu ba estudantes sira atu tetu tanba balu besik ona atu ramata, posivelmente se ba fali kotu gasta tempu ida mós ba sira portantu sira bele tetu molok halo sira nia aplikasaun.

“Ha’u husik hela de’it mezagen ba sira, haree dehan katak, karik sira sei iha nafatin interese atu nafatin halo aplika ba bolsa estudu sertamente sira iha liberdade tomak i Ministériu tau sira nu’udar prioridade no ministériu mós hola responsabilidade tanba dezisaun ida ne’e foti tiha ona, sei konsidera sira hanesan prioridade,” nia tenik.

Iha parte seluk estudante hosi kursu preparativu lian Portugues, hanesan mós kandidatu atu ba kontinua nia estudu iha Moçambique, Aquelino Freitas hateten, nia sente haksolok tebes, tanba durante ne’e planu ba bolsa estudu  kanseladu tanba ho avaliasaun dezempeñu ba ministériu hotu-hotu iha tinan 2014-2015, maibé iha tinan 2016 maka foin Minístru Edukasaun tau prioridade ba bolsa estudu.

“Minístru ohin marka prezensa atu halo enkontru ho ami, ha’u sente haksolok tanba esplikasaun Minístru ninian fó sai katak iha ona solusaun pozitivu ba planu ida ne’e, Minístru mós ko’alia katak sei kontinua de’it planu ne’ebé maka ministériu anteriór  halo tiha ona hosi kursu preparatóriu, agora sira sei valoriza estudante hirak ne’e no planu ba oin sei haruka estudante sira ne’e ba estudu iha rai liur,” nia dehan.

Relasiona ho Ministériu Edukasaun nia planu atu haruka estudantes sira ne’ebé iha interese ba bolsa estudu ne’e sei hatama dokumentu sira hosi munisípiu.

Aquelino hatete Ministériu Edukasaun iha polítika ne’ebé furak atu nune’e bele balansu ba munisípiu hotu-hotu, se karik munisípiu ida simu rua, seluk mós iha rua atu nune’e iha balansu, bainhira fila mai karik la bele hamutuk de’it iha Díli pois dezenvolve Díli de’it.

“Ha’u sente haksolok bainhira sira iha kontaktu ida mai ha’u atu ba hala’o ha’u nia estudu iha Moçambique maibé  iha ne’e mós ha’u hala’o hela ha’u nia kursu iha Universidade maibé ha’u sente ida ne’e seidauk favoravel ba ha’u, seidauk atu forma ha’u didi’ak oinsa atu dezenvolve nasaun ida ne’e tanba ha’u sei ba aprende buat barak iha ne’eba no fila mai sei kontribui ba nasaun ida ne’e,” nia informa.

Alein de ne’e, Fernando da Costa Ximenes hateten sira sente orgullu tanba Ministériu Edukasaun sei tau prioridade  ba sira ne’ebé maka ministériu rasik maka preparadu tiha ona maibé triste oituan tanba sira tenki tuir fila-fali planu no polítika  ministériu ida ne’e nian katak sira hanoin atu rezolve problema estadu nian tan ne’e maka fó liu prioridade ba professores ba vaga ida agora dadaun sira taka sai ne’e .

“Ita mós tenki akompaña dezenvolvimentu ida ne’e hodi ita bele haree katak bainhira problema nasaun ida ne’e ninian ministériu haree katak, ita tenki foti tuir dezisaun ida ne’ebé maka iha, ne’e duni ba responsabilidade ministériu nian katak la’o ho di’ak. Sira toma responsabilidade ho sira nia liafuan hotu ne’e fó oportunidade nafatin ba ami no ami sente kontente tanba ministériu sei tau prioridade nafatin mai ami,” nia dehan. (Júlia)

Matadalan

Austrália buka hela ekipa televizaun nian ne’ebé hetan ka’er iha Líbano

Austrália ohin fó sai katak buka daudaun konfirmasaun kona-ba paradeiru hosi sira-ninia ekipa TV ida ne’ebé hetan ka’er iha Líbano, tuir informasaun hosi kanál ne’ebé sira serbisu ba.

Deskunfia grupu refere halo filmajen ba operasaun privada ida hosi ajénsia rekuperasaun labarik, ne’ebé envolve labarik Austrália rua iha Líbano hamutuk ho sira-ninia aman.

“Ami hakarak halo konfirmasaun lalais kona-ba paradeiru nomós seguransa hosi ekipa refere nomós sei fó tulun consular ho di’ak”, tenik ministra Negósiu Estranjeiru, Julie Bishop iha komunikadu.

Nine Network haktuir katak ekipa ne’ebé inklui jornalista ho operadór kámara ne’ebé serbisu iha programa "60 Minutos", hetan ka’er iha Beirute.

"Ami sei ko’alia barak tan. Ami bele hateten de’it katak, ami kopera ona ho autoridade sira hodi bele husik nomós haruka sira fila bá uma ho lalais", dehan.

Deskunfia labarik sira-ninia inan (australiana) ne’ebé envolve iha filmajen ne’e hateten katak aban (libanés) lori sira bá férias maibé lakohi haruka sira fila hikas bá Austrália, tuir grupu Fairfax Media fó sai.

Ida ne’e hanesan ekipa TV daruak hosi Austrália ne’ebé hetan ka’er iha nasaun seluk ho de’it semana ida.

Jornalista rua hosi ABC hetan ka’er iha Malázia, fulan kotuk bainhira koko atu husu primeiru ministru, Najib Razak kona-ba eskándalu ne’ebé envolve mos nia, maski nune’e lakleur husik no deporta sira ba sira-ninia nasaun.

SAPO TL ho Lusa 

Brazil hanesan luzófonu ho númeru empreza referensiadu boot liu

Brazil hanesan nasaun universu luzofonia nian ho  númeru empreza referensiadu boot liu iha dokumentu investigasaun millaun 11,5 "Papéis do Panamá" kona-ba 'offshores', tuir dadus ne’ebé fó sai  hosi jornál Irish Times.

Brazil mosu ho kompañia referensiadu 1.399  dokumentu empreza panamiana Mossack Fonseca nian, espesializadu iha jestaun kapitál no patrimóniu, ne’ebé maka sai hanesan baze investigasaun jornalístika nian no iha moos  informasaun kona-ba 'offshores  liu' rihun 214 iha nasaun no teritóriu 200 liu.

Tuir  dokumentu hanesan empreza Panamá iha kliente 40 iha Brazil, iha moos nasaun ne’e  "benefisiáriu" 292  no "asionista" 1.659.

Tuir kedas  maka Portugál, ho  empreza 244, benefisiáriu 34, kliente 23 no asionista 255, no Angola, iha empreza sanulu, kliente ida, benefisiáriu 18 no asionista 40.

Mosambiké  refere ba empreza tolu, kliente tolu, benefisiáriu sanulu no asionista 18, enkuantu Kabuverde  iha deit asionista (27) no Giné-Bisau iha benefisiáriu ida no asionista ida, hanesan moos ho Giné Ekuatorial.

Saun Tomé  Prínsipe no Timor-Leste lasai  referensiadu iha mapa-mundu interativu Irish Times nian, ne’ebé  aprezenta deit númeru sira maibé ladetallu.

Makau mosu ho  empreza 25, kliente haat, benefisiáriu 22 no asionista 233 iha dadus neebé  divulga hosi Irish Times, jornál ne’ebé  integra iha  Konsórsiu Internasionál Jornalista ba Investigasaun (ICIJ, iha sigla ingleza), ho nia  sede iha Washington.

"Papéis do Panamá" hanesan rezultadu investigasaun jornalístika boot liu iha  istória no divulga ona iha domingu ne’e, hosi membru ICIJ .

Iha  investigasaun destakadu  polítiku sira hamutuk 140 iha mundu tomak, entre sira ne’e  antigu sira 12 no líder sira seluk  iha  mundu áktual nian.

Investigasaun ne’e hetan duni informasaun maka namkari no halibur hamutuk besik  dokumentu 11,5  ne’ebé ligadu ba dékada haat atividade empreza panamiana Mossack Fonseca nian, espesializadu iha jestaun kapitál no patrimóniu, ho moos informasaun sira kona-ba empreza "offshore" liu rihun 214 iha nasaun no territóriu liu 200.

Liuhosi  Papél Panamá nian(Panama Papers, iha inglés) hanesan hatene ona, iha investigasaun  ne’e  refere katak empreza rihun resin kria 'offshores' no paraízu fiskál atu ema atus resin jere sira nia patrimóniu, entre sira ne’e liurai Arábia Saudita, elementu besik liu Prezidente russu Vladimir Putin, prezidente UEFA, Michel Platini, no bin  hosi liurai Juan Carlos no tia liurai Felipe VI  España nian, Pilar de Borbón.

Primeiru-ministru Izlándia, Sigmundur Gunnlaugsson, hetan alegasaun  envolve iha kazu "Papéis do Panamá", resigna-an iha tersa-feira ne’e, tuir ninia partidu,maibé Prezidente, Olafur Ragnar Grimsson, rekuza atu disolve parlamentu.

SAPO TL ho Lusa

Hamutuk ema 120.500 iha Guiné-Bissau ladún iha hahán - boletin nasional

Hamutuk ema 120.500 iha Guiné-Bissau ne'ebé maka ladún iha hahán no iha dieta nutrisional adekuadu, fó sai hosi boletin dahuluk hosi sistema seguimentu hosi situasaun alimentar iha nasaun, fó sai iha loron-kuarta ne'e iha rede sosial sira iha Internet.

Tuir boletin, "10,5% hosi família guiniense sira (ema 120.500) iha inseguransa hahán no nutrisional, liuliu iha rejiaun sira Tombali no Oio".

Tombali situa iha súl nasaun nian no hanesan zona ida izoladu liu iha Guiné-Bissau no Oio okupa zona sentru hosi teritóriu.

Informasaun ne'e halo hahú iha fulan-Fevereiru no alerta ba situasaun inseguransa hahán ida ne'ebé maka'as iha illa Caravela, arkipélagu Bijagos, ne'ebé família balun hasoru problema ne'e - ema na'in 1.150 iha falta hahán maka'as.

Iha total nasional, boletin haree katak 1% hosi agregadu família tomak (ema 11.540) hasoru inseguransa hahán ne'ebé maka'as.

Tuir Organizasaun ONU nian ba Hahán no Agrikultura (FAO), iha seguransa hahán iha agregadu ida bainhira ema tomak iha nafatin asesu fíziku no ekonómiku ba alimentasaun nutritivu ida, saudável no iha kuantidade sufisiente hodi hatán ba nesesidade sira no preferénsia sira ba moris ativu ida.

Sistema Seguimentu hosi Seguransa Hahán no Nutrisional (SiSSAN) iha Guiné-Bissau funsiona hamutuk ho Governu guiniense, hosi Programa Alimentar Mundial no hosi programa UE-AINDA Asaun Integradu sira iha Nutrisaun no Dezenvolvimentu Agríkola.

SAPO TL ho Lusa

Sekretáriu-ezekutivu CPLP nian konsidera pedidu ajuda hanesan "normal"

Sekretáriu-ezekutivu hosi Komunidade Nasaun sira ho Lian Portugeza (CPLP) konsidera ona hanesan "normal" no "pontual" pedidu ajuda hosi Angola ba Fundu Monetáriu Internasional, hodi justifika apelau ho "diminuisaun" ba presu petróleu no "krizi jeral" ida.

Iha loron-kinta ne'e, iha deklarasaun sira ba ajénsia Lusa, bainhira hakotu semináriu ida dedikadu ba projesaun internasiona lian portugés nian, iha Guimarães, Murade Murargy hatutan mós katak "nasaun barak" husu mós ajuda ba fundu ne'e, maski nia rekoñese "situasaun espesífiku" hosi Angola.

Iha loron-kuarta, Fundu Monetáriu Internasional (FMI) fó sai katak Angola husu programa ida asisténsia nian ba tinan tolu oinmai, pedidu ne'ebé justifika hosi Ministériu Finansa angolanu nain ho nesesidade aplika polítiku makroekonómiku sira no reforma estrutural sira ne'ebé diversifika ekonomia no hatán ba nesesidade finanseiru sira nasaun nian.

"Hanesan normal, no natural tebes akontese. Akontese tanba folin petróleu nian tuun. La'ós iha de'it Angola, nasaun sira seluk mós hetan terus", afirma hosi responsável CPLP nian.

Tuir Murargy, "Angola iha nia situasaun espesífiku" maibé tulun ne'ebé husu ba FMI hanesan "pontual tebes" no halo iha "momentu loloos".

Sekretáriu-ezekutivu ko'alia mós katak repúblika angolanu "la'ós hanesan úniku husu tulun, nasaun barak halo tiha ona" tanba, nia hatete, "ne'e la'ós hanesan krizi ida iha de'it Angola, maibé hanesan jeral".

Kona-bá CPLP, dirijente aponta ona "konstrusaun hosi polár ekonómiku" hosi komunidade ne'e hanesan "realidade ida ne'ebé halo daudaun" maibé nia rekoñese difikuldade sira.

"Harii daudaun [pilar ekonómiku], klase emprezarial hosi lian portugés hetan daudaun dinamizmu boot ida, ne'e [globalizasaun ekonómiku hosi CPLP] akontese daudaun maibé la'ós fasil, la'ós CPLP maka sei halo negósiu sira, maibé loos, harii kondisaun nesesáriu sira hodi nune'e mundu emprezarial hosi komunidade bele atua", nia hatete.

SAPO TL ho Lusa