Deskonfia Patraun Oho Nia-Traballadora

DILI: Traballadora restaurante Food L­Do, iha Timor Plaza CBD 3, Judite da Costa Silva, ne’ebé mate, iha Sesta (7/4), deskonfia hetan oho husi ninia patraun rasik.

Tuir informasaun husi Polisia Nasionál Timor­Leste (PNTL), Judite ezije ba patraun atu labele ko'a ninia saláriu, maibé tanba la kontente ho preokupasaun ne’e, entaun ikus mai deskonfia empregadór fó venenu ba vítima.

“Kazu ne’e akontese entre patraun ho traballadora. Informasaun ami rekolla katak patraun lakohi hasa'e vítima nia saláriu, tanba ne’e maka patraun halo venenu ba nia traballadora,” dehan Segundu Komandante PNTL Munisípiu Dili, Superintendente Asistente Euclides Belo, iha Kristu Rei, horisehik.

Tuir kronolojia husi PNTL nian, vítima levanta problema ne’e to’o iha patraun nia uma, maibé la hetan solusaun. Entaun empregada ne’e fila­fali ba servisu fatin, to’o iha ne’e maka derrepente nia monu. Nune’e, konsege lori ‘halai’ ba ospitál maibé la konsege salva.

KAK Kontra PN Kompara Produtividade Servisu

DILI: Komisaun Anti Korrupsaun (KAK) rejeita total ho deklarasaun deputadu parlamentu nasionál nian hodi halo komparasaun servisu ho instituisaun sira seluk.

Komisáriu KAK, Adérito Tilman la aseita ho deklarasaun membru parlamentu katak tinan ne’e KAK la produtivu, tanba investigasaun ne'ebé KAK halo menus liu kompara ho servisu Polisia Servisu Investigasaun Kriminál(PSIK).

“Haree ba tinan ida ne’e produtividade servisu KAK nian la aumenta, la hamenus, iha balansu. Saida mak deputadu sira hato’o, ha’u haree la loos”, dehan nia, iha Uma Fukun PN, horisehik.

Tuir nia, deputadu sira haree produtividade KAK nian la atinji investigasaun kazu 100 ne’e. Maibé labele kompara ho PSIK ne’e diferensa, tanba kompeténsia servisu KAK nian akontese iha servisu ezersísiu funsaun publika de’it.

Faan Konbustivel, Domina Estranjeiru

DILI – Reprezentante povu iha uma fukun Parlamentu Nasional PN, preokupa tebes ho lisensa negosiu neebe maka Governu fo ba kompania Nasional no Internasional loke pertamina ou faan konbustivel iha rai laran, realidade kompania Internasional maka Domina faan konvustivel.

Ami preokupa tanba pertamina ou faan mina konbustivel rai laran nee, barak liu maka kompania Internasional no Timor oan laiha, governu tenke haree hodi fo oportunidade ba Timor oan tanba ema rai liur kuandu problema ruma sira halai sai ba sira nia rai ona maibe Timor oan lae, tan nee governu tenke haree,” dehan Deputadu Francisco Miranda Branco liu husi, Sesasun plenaria Tersa (11/04/2017) iha PN.

Nia mos informa liu tan katak, pertamina ou fatin faan mina konbustivel sira nee, kuaze ema estranjeiru nian deit tanba nee, sira halo manipulasaun mos, Timor oan la halo buat ida, dala ruma mina la too letru ida, ho problema sira hanesan nee presiza atensaun tebes husi governu.

Situasaun Seguransa Munisipiu Liquisa Kontroladu

ULMERA - Hafoin elisaun prezidensial, situasaun seguransa iha area Munisipiu Liquica, ema jeral, lao kontroladu. Komesa Janeiru too Abril nee, buat hotu lao hanesan babain. Nunee informa Adjuntu Komandante Polisia Munisipiu Liquica, Superintidente Asistente Polisia, Eduardo Campos hafoin remata kuada ai oan parapa iha tasi ibun, Suku Ulmera, Postu Administrativu Bazartete, Tersa (11/4/2017).

Too oras nee dadaun laiha problema neebe mosu.  So iha deit problema kiik oan sira hanesan hemu lanu, baku malu, no violensia domestika maibe problema sira nee polisia konsege resolve,” hateten Eduardo Campos.

Konaba kazu asidenti, nia dehan, durante fulan tolu nia laran nee, numeru kazu asidente aas, kuaze 19, maibe lakonsege rezulta ema mate. Nunee mos konaba relasaun servisu. Autoridade seguransa ho entidade hotu, inklui komunidade, durante nee lao diak. Linha kordenasaun lao diak.

Faila Kontrola, Ema Uza Vistu Rugranga Buka Moris Iha TL

DILI – Sestu Governu Kostitusional durante tinan rua nia laran faila kontrola ema estranjeiru sira, needuni sira utiliza vistu arbiru hodi buka moris, liu-liu  halo negosiu iha Timor Leste (TL).

Lia hirak nee hatoo husi Ekonomista Sipriano de Olivera, ba STL iha nia serbisu fatin, Becora, Dili, tersa (11/04/2017).

Ami durante nee hare katak ema estranjeiru sira uza vistu rungranga signifika katak balun uza vistu turista hodi halo negosiu no hadau povu TL nia serbisu, nee fraku mai husi ita nia imigrasaun,” hateten Cipriano.

Ekonomista nee aumenta tan katak mesmu TL adopta sistema merkadu livre, maibe imigrasaun serbisu hamutuk ho alfandega hodi kontrola froteira,atu evita ema sira neebe uza vistu turista.

Iha parte seluk Ativista Otavio Concencao kestiona ema estranjeriu balun uza vistu turista mai iha TL hodi halao serbisu seluk, nee hatudu katak TL seidauk bele atu kontrola ema sira nee.  Reportajen Joao Anibal

Suara Timor Lorosae

Inan Aman Tenke Akompana Oan

DILI – Ministeriu Edukasaun (ME), rekomenda ba inan aman estudante ida-idak atu akompana oan sira ba eskola, preokupasaun nee relasiona ho konfrontasaun entre estudante husi Nobel da Paz no 4 de Setembru.

Tuir Direitor Jeral husi ME, Antoninho Pires katak, ME nia rekomendasaun ba estudante sira, mai eskola atu estuda laos buka problema, oinsa mak estudante sira bele kumpri regulamentu interna neebe mak iha eskola, no rekomenda ba inan-aman estudante sira tenke akompana oan sira ba eskola.

Ami nia rekomendasaun ba ita nia estudante sira katak, mai iha eskola  para atu estuda, no laos atu buka problema ba malu, oinsa mak estudante sira atu bele kumpri regulamentu interna neebe mak iha eskola, no husu rekomendasaun ba inan aman estudante sira tenke halo akompanamentu oan sira ba iha eskola, no fo hanoin ba estudante sira katak, ba iha eskola nee  para atu aprende buat ruma, maibe laos atu provoka malu,” dehan DJ  Antoninho ba STL iha edifisiu ME Vila-Verde, Dili, Tersa (11/04/2017).

CAC Identifika FP Utiliza Kareta Estadu Halo Kampania MP Investiga

DILI - Komisaun Anti Korupsaun (CAC) sei haruka kazu involvimentu Funsionariu Publiku (FP) nian ba Ministeriu Publiku (MP) hodi loke investigasaun.

Tuir Komisariu Komisaun Anti Korupsaun (CAC), Aderito Tilman hatete katak, durante Kampania Prezidensial (Kanprez), CAC identifika katak iha funsionariu balun utiliza kareta estadu hodi halo kampania.

Ami (CAC) identifika iha funsionariu balun utiliza kareta estadu hodi halo kampania, ami sei haruka ba Ministeriu Publiku (MP) atu loke investigasaun,” dehan Komisariu CAC, Aderito ba jornalista sira iha PN-Dili, Tersa (11/04/2017).

Komisariu CAC, Aderito haktuir, ba Funsionariu Publiku (FP) sira balun neebe mak abandona servisu hodi partisipa atividade kampania prezidensial sei haruka mos ba KFP hodi prosesa. Aderito afirma, konaba ekivalensia entre CAC ho PDHJ nee lahanesan tanba PDHJ kobre 13 distritu hotu CAC lae tanba CAC iha difikuldade limitasaun rekursu umanus, limitasaun orsamentu labele kobre hotu.

Iha fatin ketak, Prezidente Komisaun Funsaun Publika (PKFP), Faustino Cardoso dehan, too agora KFP rasik seidauk simu relatoriu husi instituisaun sira konaba FP nia involvimentu ba iha atividade Kanprez. Raimundo S. Fraga

Suara Timor Lorosae

LEE LIU IHA SUARA TIMOR LOROSAE

Governu Hahù Diskute Destinu Tubaraun

DILI, (TATOLI) – Governu liuhosi enkontru Konsellu Ministru, tersa, (11/4) hahù diskute distinu tubaraun nomòs halo despasu atu proteje espesie sira seluk.

Entretantu, kompañia Hong-Long hosi nasaun Xina ne’ebé lansa rede hodi ka’er tubaraun, Primeiru Ministru sei halo despasu kona-ba lelaun, fa’an ou oinsà, desizaun sei akontese semana ne’e.

Ministru Agrikultura no Peskas (MAP), Estanislau Aleixo da Silva dehan ninia parte hamutuk ho Ministèriu Komersiu Industria no Ambiente (MKIA) halo despasu atu minimiza ka’er espesie protejida.

“Ha’u ho ministru Constâncio Pinto asina despasu konjuntu ida para haree espesie protejida tubaraun, rekomendasaun iha ona agora formaliza de’it ho eskrita”, Estanislau ba jornalista sira iha Palásiu Governu.

Estadu Sei Harii Kompañia Mineira

DILI, (TATOLI) – Estadu Timor-Leste liuhosi reuniaun Konsellu Ministru foin lalais ne’e aprova dekretu lei ida hodi harii kompañia nasionál mineira ida ne’ebé hola parte ba planu estratéjiku dezenvolvimentu nasionál ho naran “Murak Rai Timor-Leste, SA”.

Faze dahuluk Governu tau orsamentu U$400 mil hodi ajuda dezenvolvimentu iha prosesu diversifika fundu reseita ba futuru.

Dekretu ne’ebè governu aprova iha loron 14 fulan-marsu 2017 sei haruka ba Prezidente Repúblika atu promulga hafoin implementa.

Murak-rai sei sai hanesan sosiedade komersiál direitu privadu nian no kapitál integrál públiku. Medida ne’e tama iha estratéjia Governu nian kona-ba harii instituisaun sira ne’ebé presiza atu garante dezenvolvimentu setór ekonómiku ho poténsia kontribui ba diversifikasaun ekonomia nian, ne’ebé maka fundamentál ba país ne’e.

Ministru Petróleo no Rekursu Minerál, Alfredo Pires ba Tatoli informa, atu ativa kompañia ida ne’e, faze dahuluk Governu tau ona orsamentu ho montante ne’ebé mensiona atu hahú empreza ne’e.

“Ne’e sei ki’ikoan atu komesa de’it, depois tinan mai mak ita haree sé mak sei lidera Murak Rai Timor, halo planu negósiu, regra interna para depois haree implementasaun molok iha business plan tiha ona mak ita bele haree ba orsamentu saida loos mak ita presiza”, katak.

Sobre rekursu umanu ne’ebé mak sei hala’o knaar iha kompañia refere, ministru esklama katak iha Autoridade Nasionál Petróleo no Minerá (ANPM) no Timor Gap, iha  joven sira ne’ebé preparadu kleur ona atu komesa.

Aleinde ne’e, tenke nomeia ema sira ne’ebé apropriadu. Murak Rai Timor sei iha ministériu tolu nia okos mak Ministériu Petróleo no Rekursu Minerál (MPRM), Ministériu Finansa no Ministru Estadu Koordenadór Asuntu Ekonómiku (MEKAE).

“Iha nivel Governu, ami mak sei reprezenta no asuntu barak ami tenke lori ba Konsellu Ministru para husu diresaun atu la’o oinsá”, katak tan. (Jornalista: Maria Auxiliadora - Editora: Rita Almeida)

Foto: Primeiru Ministru, Rui Maria de Araùjo ho Ministru Alfredo Pires bainhira partisipa seriomia ida iha otel Novo Turizmu foin lalais ne'e. Foto Tatoli/Antònio Goncalves

LEE LIU IHA TATOLI

Tinan Ne’e, Hahú Esplora Mina iha Same-Suai

DILI: Governu Timor­Leste asina ona kontratu ho kompañia esploradór minerais husi Timor­Leste no Austrália hodi hahú fura mina matan rai­maran, iha Same no Suai, tinan ne’e nia laran.

Governu Timor­Leste ofisialmente liu hosi Austeridade Nasionál Petróleu no Minerais (ANPM) fó fiar Kompañia TIMOR GAP Onshore Block, Unipessoal, Lda, (empreza subsidiária TIMOR GAP, EP), ho Kompañia TIMOR RESOURCES PTY LTD (empreza inkorporada iha Austrália), hahú halo estudu esplorasaun ba petrolíferu gás naturál iha Same no Suai.

Prosesu kontratu fahe produsaun ka peskiza ba esplorasaun petróleu iha rai leten (onshore) ho bloku A TL­OT­17­08 (Suai) no bloku B TL­OT­17­09 (Same).

Dokumentu ne’e, asina diretamente husi Prezidente ANPM, Gualdino da Silva no Diretór Kompañia TIMOR RESOURCES, David Fuller, asiste husi Primeiru Ministru, Rui Maria de Araújo, Ministru Alfredo Pires, Diretór Ezekutivu Timor GAP, Francisco Monteiro no Embaixadór Austrália ba TL.

Emília La Hetan Pensaun Vitalisia

DILI: Eis­ Ministra Finansas, Emília Pires, seidauk hetan pensaun mensál vitalisia tanba Sekratariu Estadu Konsellu Ministru (SEKM), seidauk haruka pedidu ba Ministériu Finansas.

Eis membru governu sira ne’ebé prienxe rekizitu atu hetan pensaun vitalisia, ba dahuluk tenke hetan pedidu husi SEKM hodi haruka ba Ministériu Finansas atu halo pagamentu ka transferénsia.

Maibé ba kazu Emília Pires nian, Vise Ministra Finansas (MF), Hélder Lopes hatete, la hetan pensaun vitalisia tanba laiha pedidu ruma husi SEKM.

“Maibé laiha pedidu ami labele selu”, dehan nia, iha ninia servisu fatin, Palasiu Governu, horisehik.

Hélder realsa, durante ne’e Ministériu Finansas la selu, tanba bainhira nia mandatu hotu sei kontinua servisu nafatin iha Governu. Kuandu ema servisu ba governu tuir Lei, tenke simu saláriu ida de’it, labele simu saláriu iha fatin rua.

“Tanba ne’e mak husi ne’ebá ita la selu to’o agora”, tenik nia. Nia afirma, informasaun ne’ebé mai husi diresaun ministériu finansas labele fó direitu ba eis­titulár Emília Pires.

Kazu eis ­ministra finansas hetan pensaun sai polémika iha públiku, tanba Emília Pires oras ne’e daudaun ninia prosesu kazu seidauk remata, nune’e, nia mós agora daudaun domisíliu ba estranjeiru iha momentu Tribunál Distritál Dili atu foti desizaun finál.

Domingos da Costa – Independente

LEE LIU HIA INDEPENDENTE

Xanana Gusmão: Konsiliasaun ONU kona-ba fronteira iha Tasi Timor sei mosu iha akordu ka relatóriu

Prosesu konsiliasaun iha ONU kona-ba diverjénsia fronteira iha Tasi Timor nian entre Timor-Leste ho Austrália sei hamosu, to'o fulan-Setembru, akordu ida entre nasaun rua ka relatóriu ida ho rekomendasaun sira, fó sai hosi fonte timoroan iha loron-kinta.

"Komisaun iha fulan-Setembru sei to'o konkluzaun ida: sei iha akordu ida entre nasaun rua ka sei halo relatóriu ida hosi komisaun ho rekomendasaun sira ba sekretáriu-jeral ONU nian (António Guterres)”, hatete hosi Xanana Gusmão, ministru ba Planeamentu no Investimentu Estratéjiku Timor-Leste nian ne'ebé halo parte hosi komisaun konsiliatóriu.

Xanana Gusmão ko'alia ba jornalista sira hafoin hasoru malu ho prezidente Asembleia Repúblika Portugal nian, Ferro Rodrigues, no ho prezidente hosi grupu parlamentar hosi Portugal-Timor-Leste, José Soeiro, iha Asembleia Repúblika portugeza, iha Lisboa.

"Ami tenki uza mekanizmu ne'ebé hanoin hosi Konvensaun ONU nian kona-ba Direitu Tasi nian, ne'ebé loke dalan hodi harii komisaun konsiliatóriu ida" entre Timor-Leste ho Austrália, hatutan hosi eis-primeiru-ministru no antigu Prezidente timoroan nian.

Investigador indonéziu ida antikorupsaun nian hetan atake ásidu iha Jakarta

Investigador indonéziu ida antikorupsaun hetan atake iha Jakarta hosi ema agresór na'in rua ne'ebé tuda ásidu ba nia oin, agresaun ida ne'ebé iha ligasaun ba kazu ida ne'ebé envolve dirijente polítiku importante sira.

Investigador, Novel Baswedan, membru hosi Komisaun hodi Halakon Korupsaun (KPK), lori ona ba ospital hafoin atake, ne'ebé akontese bainhira nia diriji ba meskita ida hodi halo orasaun dadeer nian iha nasaun ida ne'ebé maioria musulmanu.

"Hanesan asaun aat ida ne'ebé ha'u kondena maka'as", afirma hosi prezidente indonéziu, Joko Widodo, hodi apela ba polísia hodi hetan agresór sira.

Vítima hetan kanek iha reen-toos no haree ladún mós, deklara hosi porta-vós prezidénsia nian, Jonan Budi, ne'ebé vizita ona Basdewan iha ospital ba ajénsia France Presse.

Tuir ONG Indonesia Corruption Watch, atake ne'e karik iha ligasaun ho Basdewan nia serbisu sira iha kuadru hosi eskándalu importante korupsaun nian ne'ebé envolve osan hamutuk euro millaun 160 ne'ebé lakon hosi kofre Estadu nian.

Indonesia Corruption Watch hanesan instituisaun ida ne'ebé respeitadu no responsável ba investigasaun sira ne'ebé halo ona demisaun hosi ministru oioin no responsável importante sira seluk.

Iha nia relatóriu ikus, organizasaun Transparénsia Internasional tau Indonézia iha pozisaun 90 hosi ranking nasaun sira ne'ebé koruptu liu, entre nasaun 176.

SAPO TL Lusa

Portugal ho Cabo Verde aprezenta iha CPLP proposta hamutuk mobilidade nian

Prezidente portugés, Marcelo Rebelo de Sousa, fó sai iha loron-segunda ne'e katak Portugal ho Cabo Verde foin lalais ne'e aprezenta ona iha Komunidade hosi Nasaun sira Lian Portugés nian (CPLP) proposta hamutuk ida ba mobilidade iha luzofonia nia laran. 

"Hanesan dokumentu konjuntu ida, hanesan proposta hamutuk hosi Estadu rua, aprezenta ba sekretária ezekutivu CPLP nian, hodi bele hala'o debate, dahuluk iha termu tékniku sira no, hafoin ne'e, iha termu polítiku sira, debate ne'ebé bele sai importante iha simeira Praia nian iha tinan oinmai", Marcelo Rebelo de Sousa hatete bainhira hatán ba jornalista sira.

Xefe Estadu portugés ko'alia iha sidade Praia, iha konferénsia imprensa hamutuk ida ho Prezidente Cabo Verde nian, Jorge Carlos Fonseca, ne'ebé adianta ona katak dokumentu nia títulu maka "Fatin rezidénsia nian iha CPLP" no oferese "katak bele iha estatutu ida hosi sidadaun sira CPLP nian ne'ebé hela iha nasaun ida ka nasaun seluk, liuhosi prosesu ida ho faze".

Moras rabies halo ema na'in sia mate iha de'it ospital angolanu ida iha Marsu

Moras rabies halo ona pasiente na'in sia mate hosi na'in sanulu ne'ebé internadu hela iha Ospital Provinsial Zaire iha fulan-Marsu, situasaun ne'ebé preokupa autoridade sanitáriu lokal sira, ne'ebé hasoru falta vasina sira hasoru moras ne'e.

Informasaun ne'e hato'o hosi médiku hosi unidade hospitalar ne'e iha norte Angola nian, Pedro Almeida Gomes, ne'ebé adianta ona katak korpu klíniku akompaña hela kazu suspeitu sira seluk hosi moras rabies, lahó avansa kuantidade.

Responsável konsidera ona "hanesan alarmante" aumentu hosi kazu suspeitu sira ba moras rabies ne'ebé maka tama iha ospital.

Ema sira ne'ebé moras simu nafatin soru antirábiku, ne'ebé hatudu katak laiha susesu ba tratamentu.

Tuir Pedro Almeida Gomes, ospital laiha vasina antirábiku ba ema sira, ne'ebé maka hamosu aumentu hosi númeru ema sira ne'ebé mate.

Pedro Almeida Gomes, ne'ebé haktuir hosi ajénsia notísia angolanu, Angop, iha loron-segunda ne'e, konsidera katak vasinasaun animal hanesan imperativu, hodi kombate kazu aas hosi tata no mate tanba moras rabies.

Hasoru situasaun ne'e, vasina tiha ona, iha semana ikus fulan-Marsu nian, iha Mbanza Kongo, animal hamutuk 1.700 resin hasoru moras rabies, hodi hamenus konsekuénsia hosi epidemia ne'ebé maka rejista hahú hosi inísiu fulan liubá iha kapital provínsia Zaire.

Iha tempu hanesan, halo hela mós kampaña ida hosi rekolla animal vadiu sira hosi estrada sira iha sidade, hanesan medida preventivu ida ne'ebé maka halo hosi autoridade sira, hodi hamenus preokupasaun hosi populasaun.

SAPO TL ho Lusa

ONU alerta katak ema barak bele mate tanba hamlaha iha Áfrika no iha Iémen

Komisariadu Aas hosi ONU ba Refujiadu sira (UNHCR) alerta ona iha loron-tersa ne'e ba risku hosi ema mate barak tanba hamlaha iha Horn of Africa, iha Nijéria no iha Iémen.

ONU lansa avizu ne'e hodi "haree ba rai-maran ne'ebé afeta mós ba nasaun viziñu sira (hosi Horn of Africa no Nijéria) no falta finansiamentu, ne'ebé halo sai todan hanesan mós krizi humanitáriu ida ne'ebé bele evita (…) maibé sai hanesan inevitável", deklara hosi porta-vós ida UNHCR nian, Adrian Edwards, iha kontaktu ida ho imprensa iha Jenebra.

"Aumenta ona risku hosi mate barak ne'ebé provoka hosi hamlaha entre populasaun sira iha Horn of Africa, Iémen no Nijéria", nia adianta.

ONU tauk katak situasaun bele sai aat liu duké durante hamlaha tinan 2011 nian ne'ebé oho ona ema liu 260.000 iha Horn of Africa.