PR Lú Olo Mantein Konfiansa Ba Maria Ângela iha KSMJ

DILI, (TATOLI) - Prezidenti Repúblika (PR), Dr. Francisco Guterres Lú Olo konkorda atu Dra. Maria Ângela Carrascalão kontinua ninia kna’ar hanesan membru Konsellu Superiór Majistratura Judisiál (KSMJ) iha Ministériu Justisa nia mahon.

Ângela Carrascalão nomeia hosi eis Prezidenti Repúblika, Taur Matan Ruak, iha tinan kotuk ho mandatu tinan haat maibé atuál Prezidenti Repúblika kontinua fó konfiansa ba nia.

“Ha’u membru Konsellu Superiór Majistratura Judisiál, indikadu hosi Eis Prezidenti Repúblika, Taur Matan Ruak, ba mandatu tinan haat. Ha’u hanoin katak ho Prezidenti foun, ha’u tenki husu nia opiniaun katak ha’u bele kontinua nafatin ka sai. Kna’ar ida ne’e nu’udar konfiansa polítika. Maibé Prezidenti husu atu ha’u kontinua serbisu ida ne’e,” Ângela dehan kestaun ne’e ba jornalista sira iha Palásiu Prezidénsia Repúblika, Bairu-Pité, Dili, sesta ne’e, hafoin ramata inkontru ho Xefi Estadu Lú Olo.

Kna’ar hosi Konsellu Superiór Majistratura Judisiál tau matan ba juiz sira nia problema, haree juiz sira nia promosaun no kareira. Nia haktuir katak normalmente serbisu ruma sempre hasoru problema maibé Konsellu konsidera ida ne’e la’ós problema boot.

Mari Alkatiri sei tenta manán iha Oecusse, rejiaun ne'ebé nia governa

Hosi António Sampaio

Grupu ida hosi joven sira no feto sira hosi Fretilin simu ho ksolok sekretáriu-jeral Fretilin nian, Mari Alkatiri, iha loron-sesta ne'e bainhira to'o iha enklave Oecusse-Ambeno tanba iha ona previzaun atu halo komísiu ida iha ne'e iha loron-sábadu.

Iha parte ikus hosi kampaña ba lejislativu sira loron 22 Jullu, Fretilin konsentra nia atensaun sira iha loron-sesta ne'e no iha loron-sábadu iha enklave ne'ebé, iha tinan hirak ikus ne'e, Mari Alkatiri lidera nafatin projetu importante sira hosi Estadu timoroan nian.

Kriasaun hosi Rejiaun Administrativu Espesial Oecusse-Ambeno (RAEOA) no projetu hosi Zona Espesial ba Ekonomia Sosial Merkadu nian (ZEESM) sai ona, ba apoiante sira no ba krítiku sira, hanesan projetu ida ne'ebé polémiku tebes.

Iha parte orsamentu nian rejiaun simu ona, entre tinan 2014 no 2017, besik dolar millaun 544, no avansa ona ho planu boot ida dezenvolvimentu hosi infraestrutura báziku sira, ne'ebé maka destaka sentral elétriku ida, estrada sira, sistema sira irigasaun nian, klínika ida, ponte ida ho aeroportu.

KONFEDERASAUN AZIÁTIKA FUTEBOL NIAN HASAI ANTIGU DIRETÓR TIMOR-LESTE NIAN

Iha loron-kinta ne'e, Konfederasaun Aziátiku Futebol nian (AFC) suspende ona, ba moris tomak, antigu diretór tékniku hosi Asosiasaun Futebol Timor-Leste nian Orlando Marques Henriques hosi atividade sira ne'ebé iha ligasaun ho futebol. 

Desizaun ne'e mosu hafoin hatudu tiha katak Orlando Henriques aseita ona osan hamutuk dolar rihun 15 hodi oferese ba jogador sira hosi ekipa futebol Timor-Leste nian, hodi sira lakon jogu ho Malázia, ne'ebé halo iha loron 20 Maiu, iha Jogu sira Sudeste Aziátiku nian iha tinan 2015, iha Singapura.

Orlando Henriques no responsável timoroan seluk, Moisés Natalino de Jesus, deklara ona kulpadu no hetan kondenasaun iha fulan-Novembru 2015 ba kadeia fulan 20 no fulan 24 tanba partisipasaun iha "konspirasaun kriminoza".

Maibé antigu diretór tékniku timoroan ne'e hetan libertasaun hosi kadeia iha Singapura.

Xina: Atribuisaun Nobel Dame 2010 nian hanesan blasfémia

Iha loron-sesta ne'e Pekin afirma ona katak atribuisaun Nobel Dame iha tinan 2010 ba Liu Xiaobo, opozitor xinés ne'ebé mate iha loron-sesta, vítimu kankru nian no ho vijilánsia hosi polísia, hanesan blasfémia ida.

"Fó distinsaun ba ema ida hanesan ne'e kontraria ideia hosi prémiu ne'e. Insulta ona Nobel Dame nian", akuza hosi porta-vós hosi ministériu xinés ba Negósiu Estranjeiru, Geng Shuang, iha konferénsia imprensa nian.

Nasaun oioin kritika ona Pekin tanba opozitor nia mate, hafoin oferese tiha tratamentu médiku ba Liu.

Ativista xinés ne'ebé koñesidu liu tanba hakarak demokrasia mate ona ho tinan 61, bainhira kumpri hela kastigu kadeia tinan 11 tanba revolta hasoru Estadu.

Geng fó sai ona katak Pekin protesta ona ba Estadus Unidus ho Komisariadu Aas ba Direitu Ema nian hosi ONU, tanba "komentáriu sira ne'ebé la responsável" kona-ba opozitor nia mate.

Estadu TL Kontinua Hakiak Lei Korupto

DILI – Sosiedade sivil iha Timor Leste konsidera, estadu Timor Leste oras nee kontinua hakiak lei korupto iha Timor Leste hanesan lei pensaun vitalisia. Maske lei refere sosiedade sivil, akdemika no ema hotu hakilar hakarak halakon, maibe ukun nain kontinua finjidularona tanba sira mos benefisia.

Tuir Reprezentante Programa Oficer AJAR, Inocencio Xavier hatete katak, lei pensaun vitalisia nee korupsaun legal neebe estadu Timor Leste hakiak hela, tanba nee uluk kedas sosiedade sivil no akademika hakilar maibe lahalakon.

“Exatamente, lei nee korupto boot ka korupsaun legal neebe ida neebe mak eziste iha Timor Leste, estadu lahalakon,” dehan Inocencio ba jornalista sira iha ninia knar fatin, Farol-Dili, Kinta (13/07/2017).

Inocencio haktuir, maske Parlamentu Nasional halo ona revizaun be lei pensaun vitalisia ida nee maibe lahatudu rezultadu signifikadu no sustentabilidade orsamentu jeral estadu, sira hatene gasta deit maibe lahatene atu buka osan liliu deputadu sira.

Iha fatin ketak, Observador Politika-UNTL, Camilio Ximenes Almeida hatete katak, Partidu Politik (Parpol) hamutuk 21 nee barak mak lakoalia Pensaun Vitalisia iha atividade kampania tanba sira iha interese.

Entertantu, Portavoz Movimentu Universitariu Timor Leste (MUTL), Faustino Soares afirma, pensaun vitalisia nudar korupsaun legal tanba nee lider partidu politik tenke hatudu komitmentu politika hodi kombate. Raimundo S. Fraga

Suara Timor Lorosae

Governu Preve 4 Miloens Realizasaun Elpar

DILI – Governu liu husi Ministeriu Administrasaun Estatal (MAE) aloka ona osan 4 miloens ba orgaun eleitoral hanesan Komisaun Nasional Eleisaun (CNE) mos Sekretariadu Tekniku Administrasaun Eleitoral (STAE), realizasaun Eleisaun Parlamentar (Elpar).

Tuir Ministeru Administrasaun Estatal (MAE), Dionisio Babo Soares hatete, eleisaun parlamentar nee governu aloka 4 miloens tanba aumenta sentru votasaun.

Osan ba eleisaun parlamentar nee porvolta 4 miloens ita preve, tanba aumenta sentru votasaun nee sae ba 790,” dehan Dionisio ba jornalista sira iha edifisiu STAE, Caicoli-Dili, Sesta (14/07/2017).

Dionisio haktuir, razaun aumenta osan 4 miloens nee tanba aumenta mos estasaun votus nee mos aumenta mil ital, sentru votasaun iha rai liur mos aumenta tan. Dionisio salenta, statal hein deit rekerimentu husi STAE ba Primeiru Ministru, depois Primeiru Ministru aprova tiha haruka ba Ministra Finansas hasai osan husi todu Governu no.

Iha fatin hanesan, Diretor Jeral STAE, Acilino Manuel Branco esplika, osan neebe mak Governu liu husi MAE aloka ona ba STAE, hodi halo servisu ba atividade operasionais rai laran no mos rai liur. Raimundo S. Fraga

Suara Timor Lorosae

Lixu Namkari Iha Lahane Oriental

Dili - Area balu husi Suku Lahane Oriental, Postu Administrative Nain- Feto, Munisipiu Dili  lixu kontinua namkari, tanba komunidade laiha konsensia  tau lixu iha fatin.

Tuir Sekretariu Suku Lahane Oriental Leonor da Costa katak, husi area Lahane Oriental fatin balu foer kontinua namkari, tanba kauza husi komunidade sira soe lixu arbiru. Governu prepara ona fatin halibur lixu hodi fasilita komunidade sira tau lixu iha laran iha laran. Maibe komunidade rasik mak laiha konzensia soe foer iha laran gosta soe fali foer iha liur.

"Hau nuudar Sekretaris Suku Lahane Oriental sente lixu barak teb- tebes iha area ida nee, liuliu iha Merkadu laran katak,” Leonor ba STL iha Sede Sucu Lahane Oriental, Segunda (10/7/2017).

Parte seluk Leonor mos rekuinese katak, lixu neebe kontinua namkari iha are Lahanes Oriental, laos deit komunidade sira Lahane mesak mak soe. Maibe dalaruma komunidade sira husi fatin seluk mos lori foer mai soe hotu iha fatin nee liuliu iha fatin lixu neebe governu prepara, tanba nee mak rezulta lixu fatin sira nee foer nakonu lalais deit.

Alemanha Apoia 7.5 Euro Ba Konstrusaun Roo Nakroma II

Governu Alemanha apoia orsamentu 7.5 euro ba Ministeriu Obras Publiku, Transportes e Komunikasaun (MOPTK) ba konstrusaun roo Berlin Nakroma II ne’ebe sei halo operasaun Dili–Atauro no Oe-Cusse.

Segundu Vise Ministru MOPTK Inasio Morreira, hatete sira loke ona tenderizasaun hodi rekolha kompanha ne’ebe iha interese atu konstrui roo refere.

“Ita hein katak impreza sira ne’ebe mak intresadu, sira bele mai konkore atu nune’e bele konstrui roo ne’e,” nia hatete, iha Dili.

Orsamentu husi Alemanha ne’e, nia dehan sei utiliza deit ba konstrui roo, enkuantu ba dezenhu, ne’e governu Timor-Leste nia responsabilidade.

Tuir planu ne’ebe iha, konstrusaun ba roo ne’e tenke remata iha 2018, tanba ne’e iha tempu badak governu tenke deside ona kompanha ida hodi halo servisu ne’e.

Iha parte seluk Prezidente Komisaun E (infra-estruturas, transportes e komunikasaun), Pedro Martires da Costa rekonese kestaun ne’e, maibe husu ba governu atu rigorozu iha prosesu tenderizasaun hodi hetan kompanha ne’ebe kualidade.

Tanba nia dehan, orsamentu ba konstrui roo ne’e kategoria bo’ot, entaun tenke hetan rezultadu ne’ebe kualidade duni.

“Urgulhu tanba ita iha tan roo rasik, maibe governu presiza haree didiak nia prosesu, atu nune’e buat hotu bele la’o ho diak,” nia dehan.

Venidora Oliveira | The Dili Weekly

Portugues Sai Obstaklu Bo’ot Ba MP Halo Intervensaun

Membrus Parlamentu (MP) nain lima retira no la konsege halo intervensaun iha sesaun plenaria ho lian Portugues, tanba deit lahatene lian ofisial ida ne’e no organizasaun Judicial System Monitoring Program (JSMP) konsidera situasaun ne’e grave.

Tuir Diretor Ezekutivu JSMP, Luis Oliveira Sampaio katak regras koalia lian Portugues iha sesaun plenaria kada loron Tersa-feira ne’e diak, maibe MP barak mak lakon sira nia direitu atu koalia, tanba lahatene lian ne’e.

“Parlamentu fatin atu sira diskute kona ba politiku social ekonomiku estadu nian, ne’ebe lingua labele sai impedementu ba sira atu halo sira nia intervensaun,” nia kestiona, iha Dili.

Tuir nia, lolos koalia lian Portugues labele sai obrigatoriu iha sesaun plenaria maske lian Portugues sai mos lian ofisial alende Tetun tuir konstituisaun, tanba povu hili sira tuur iha Parlamentu ne’e atu reprezenta no hato’o povu nia preokupasoens.

Enkuantu tuir observasaun JSMP nian ba servisus MP nian iha tinan 2011, deputadu/a sira bainhira halo diskusaun kona ba lei kodigu sivil, sira maioria la diskute klean ba kontiudu lei ne’e tanba lahatene lian Portugues.

RTTL | MEIO-DIA | REPORTAGEM

RTTL | 12:53

Timor-Leste presiza iha Planu Nasionál Formasaun nian ida ba Kuadru Sira | Azancot de Menezes

Governu Timor-Leste ne’ebé atu mai tenke harii Planu Nasionál Formasaun nian ida ba Kuadru Sira

Iha loron 22 Jullu oin-mai sei hala’o eleisaun lejislativa iha Timor-Leste no sei forma VII Governu Konstitusionál. La haree ba governu ida-ne’ebé loos mak atu kaer, maibé nasaun ne’e iha tiha ona ninia Planu Estratéjiku Dezenvolvimentu ne’ebé projeta ba tinan 2030 ne’ebé importante tebetebes atu ezekutivu foun mai tau nafatin iha konsiderasaun.

Kona-ba kestaun ne’e, Jornal Tornado, deside halo tiha entrevista ida ho Dr. Azancot de Menezes, espesialista ida iha edukasaun no formasaun nian, no konsidera nia hanesan mós kuadru superiór ida ne’ebé ema rekoñese liu iha Timor-Leste.

Entrevista

Jornal Tornado: Dr. Azancot de Menezes, bondia, ba dalauluk ami hakarak atu agradese ba Ita-Boot ne’ebé fó nia tempu ba entrevista ida-ne’ebé ami sente importante tebetebes ba ema ne’ebé mak hakarak komprende didi’ak situasaun iha Timor-Leste. Iha tempu ida-ne’ebé atu harii daudauk ona governu foun, ami hakarak atu hatene Ita-Boot nia hanoin kona-ba implementasaun no ninia hala’ok tuir Planu Estratéjiku Dezenvolvimentu Timor-Leste nian.

Azancot de Menezes: Planu Estratéjiku Dezenvolvimentu Timor-Leste (2011 – 2030) aprezenta rezumu ida hosi estratéjia sira, asaun no meta sira ba 2020 nian, hodi tau prioridade boot tebes katak sistema edukasaun no formasaun profisional nian mak sei harii rekursu umanu ida ho kualidade ne’ebé Timor-Leste presiza hodi bele kontinua nafatin harii Nasaun.

Dokumentu estratéjiku ida-ne’e, temi mós katak iha 2030 povu Timor-Leste sei hetan edukasaun no formasaun di’ak, ho esperansa moris naruk no produtivu, no mós sei asesu ba edukasaun ho kualidade hodi bele partisipa iha dezenvolvimentu ekonómiku, sosiál no polítiku ami-nia Rain nian.

Tuir planu governu nian, sei iha servisu saúde ida ne’ebé boot tebes ho kualidade aas, ba timoroan tomak bele asesu, no ida-ne’e sei hamenus kiak tanba sei hetan rendimentu boot no hadi’a di’akliu produtividade nasionál, ho rekursu naturál no meiu ambiente ne’ebé sei halo jestaun ida sustentavel atu nune’e ema hotu bele hetan benefísiu, hamosu setór indústria kriativa sira hodi kontribui ba ami-nia ekonomia no ami-nia sentidu identidade nasionál nian.

Dokumentu hanesan ida aprezenta daudauk ne’e ambisiozu no ita hotu hatene katak hosi teoria ba prátika ne’e iha dalan naruk ida mak tenke liu, liuliu tanba realidade Timor-Leste nia kuadru sira mak sei kuran tebes. Ita-Boot konkorda ho ha’u? 2

Ha’u konkorda totál! Ami-nia rain hasoru problema ida-ne’e, iha parte konjunturál no estrutural nian. Ami la iha kuadru sira médiu no superiór ho númeru ida natoon no kualifikadu! Tanba ne’e, edukasaun no aposta iha rekursu umanu ho kualidade mak tenke hala’o duni atu bele haktuir ba Planu Estratéjiku Dezenvolvimentu Timor-Leste nian.

Kuadru sira médiu no superiór nian

Iha Maiu 2017, hala’o tiha 3º Kongresu Nasionál Edukasaun nian iha Dili. Ita hatene katak espesialista sira mós partisipa iha-ne’ebá nune’e mós hosi governu…

Sorumutu ida-ne’e, la iha dúvida, inisiativa ida di’ak tebetebes hosi Ministériu Edukasaun, maibé, atu ko’alia kona-ba edukasaun no formasaun, iha prátika, ami sei kontinua nafatin la hetan ninia resposta kona-ba perfíl profesor sira nian ida-ne’ebé ami hakarak ba Timor-Leste, informasaun hirak-ne’ebé importante tebetebes ba mudansa kualitativa edukasaun nian no mós ami-nia rain nia futuru.

Baibain saida-saida maka halo kona-ba formasaun ba profesór sira no kuadru tékniku sira la satisfás?

Iha kestaun fundamentál lubuk ida mak tenke halo análize ida ho didi’ak no presiza iha diskusaun hosi espesialista sira no mós desizór sira-ne’ebé mak define polítika rai- laran nian.

Iha parte edukasaun nian, purezemplu, la hatene loos formasaun inisiál no kontínua profesór sira-nian la’o hanusá ona. To’o daudauk ne’e seidauk hala’o avaliasaun ida ne’ebé kredivel kona-ba formasaun ba profesór sira iha Timor-Leste.

Sasá Kustu, rekursu umanu, materiál no ekipamentu ne’ebé presiza hodi haktuir polítika edukativu ida ho kualidade ne’ebé Planu Estratéjiku Dezenvolvimentu hakarak hametin? Husu pergunta sira hanesan ne’e no hetan sira-nia resposta ne’e dezafiu importantete ida atu bele rezolve naksalak sira iha formasaun no edukasaun nian.

Prioridade hafoin eleisaun?

Hafoin hala’o tiha eleisaun lejislativa oin-mai sei harii VII Governu Konstitusionál. Ita-Boot nia hanoin, saida mak governu tenke halo nu’udar prioridade iha área formasaun ba kuadru sira nian tuir planu Estratéjiku Dezenvolvimentu Timor-Leste nian?

Ezekutivu nasionál foun ne’ebé mai, atu mai hosi ne’ebé de’it, tenke tau importánsia nafatin hodi asume katak hatama Planu Nasional ida ba Formasaun Kuadru Sira (2018-2028) iha ajenda polítika nasionál nian ne’e nu’udar obrigatóriu ida no ida-ne’e estratéjiku boot tebetebes.

Nasaun ne’e iha instituisaun Ensinu Superiór públika no privada hamutuk sanulu resin-rua. Atu kalkula de’it kala iha dosente na’in 1222 ho grau lisensiatura, na’in 750 ho grau mestradu no na’in 50 ho grau doutoramentu.

Maibé, ha’u husu, iha duni ka lae nesesidade ba formasaun graduada no pós-graduada? Iha estudu ruma mak hala’o ona kona-ba ida-ne’e hodi orienta universidade no eskola superiór sira? 3

Prioridade no programa asaun formasaun saida-saida mak halo ba kuadru médiu no superiór nian iha administrasaun públika no setór sira seluk? Rezultadu saida-saida mak ami hein no estimativa kustu hira ba programa formasaun kuadru sira-nian? Iha dokumentu orientadór ruma kona-ba polítika formasaun profisionál iha administrasaun públika ka lae? Iha balansu ida ka lae kona-ba nesesidade formasaun oferta edukativa iha rai-laran ba área sira estratéjiku ba formasaun médiu no superiór nian?

Planu Estratéjiku Dezenvolvimentu Timor-Leste (2011 – 2030)

Timor-Leste presiza ka lae dokumentu orientadór ida ba formasaun kuadru sira ne’ebé Timor-Leste presiza ka lae dokumentu orientadór ida-ne’ebé haree duni ba nesesidade efetivu sira? Ida-ne’e mak atu defende?

Ne’e klaru! Atu ita hatán ho dalan ida efikás ba kesatun ida ho natureza ida hanesan ne’e importante tebetebes Timor-Leste elabora dokumentu orientadór kona-ba kapasidade tékniku no sientífiku hodi apár ho Planu Estratéjiku Dezenvolvimentu Timor-Leste (2011 – 2030), ne’ebé sustentavel hamutuk ho planu implementasaun nian hodi espesifika aspetu operasionalizasaun nian, asaun sira, kronograma no investimentu sira.

Governu Timor-Leste oin-mai ne’e, bainhira iha duni interese ba dezenvolvimentu sosiál no ekonómiku nasaun nian, hanesan Planu Estratéjiku Dezenvolvimentu Timor-Leste (2011 – 2030) hatudu hela ne’e, tenke asume kompromisu hodi garante estratéjia nasionál ba formasaun kuadru sira haktuir ba Planu Nasionál Formasaun Kuadru no ida-ne’e atu sai dokumentu estratéjiku ida, tuir ninia asaun ho rigór sientífiku no ho projesaun kona-ba nesesidade sira formasaun nian, bele dehan, to’o 2028.

Dr. Azancot de Menezes ami agradese tebes ba Ita-Boot nia kontribuisaun hodi ajuda ami komprende didi’ak situasaun iha Timor-Leste. Ami dezeja susesu ida di’akliu ba governu oin-mai no mós ba timoroan sira.

Ha’u mak agradese! Halo diskusaun no análize ho hanoin krítika hanesan ne’e sei susar iha ami-nia rain, tanba ne’e, ha’u sempre haksolok no iha obrigasaun atu deskute no kestiona kona-ba kestaun hirak-ne’ebé importante no estratéjika ba dezenvolvimentu nian.

Tradusaun portugez-tetum M. Azancot de Menezes

*M. Azancot de Meneses Secretário-Geral do PST – Partido Socialista de Timor-Leste

Lee português iha TA

Timor-Leste precisa de um Plano Nacional de Formação de Quadros | M. Azancot de Meneses

MNEK Gasta Ona Osan Millaun 15 Resin

DILI, (TATOLI) - Ministru Ministériu Negósiu Estranjéiru no Kooperasaun (MNEK), Hernáni Coelho relata,  Ministériu Negósiu Estranjéiru no Kooperasaun (MNEK) nia ejekusaun orsamentu jerál estadu (OJE) ba tinan ne’e iha segundu trimestre hamutuk prosentu 74 ho valór 15,739,874,37  husi totál OJE milloens 22,227,246.

“Husi orsamentu ne’e prosentu 50 gastu barak liu ba misaun sira iha liur hanesan selu salariu, selu uma no subsidiu ba Timor nian embaixador sira,ʺ Ministru Hernáni relata ba jornalista sira foin lalais ne’e.

Tuir publikasaun portal tranparansia husi  Governu Timor Leste ne’ebé ajensia  Tatoli asesu nota Ezekusaun atual husi MNEK hamutuk millaun $ 15,739,874,37 husi totál Millaun $ 22,227,246. Enkauntu, komitmentu millaun $ 2,883,991,27, obrigasaun millaun $ 780,794,62 no balansu hamutuk millaun $ 2,822,585,74.

Hernáni dehan, husi gastu ne’e prosentu 50 aloka ba salariu, subsidiu no alojamentu ba servisu diplomata 30 resin ne’ebé deskata iha rai liur no restu ezekuta ba salariu no servisu operasional Ministériu Negósiu Estranjéiru no Kooperasaun iha Dili.

Ho ida ne’e Nia garante MNEK sei gastu OJE ne’e tuir nesesidades no planu ministériu nian to’o fin de Dezembru 2017.

Entretantu, Total orsamentu ne’ebé aloka ba MNEK iha tinan 2016 ho montante Millaun $ 26 resin.

Jornalista: Agapito dos Santos | Editór: Manuel Pinto

Foto: Hernáni Coelho

Aeroportu Sai Obstaklu Internasionáliza Produtu TL

DILI, (TATOLI) - Ministru Komérsiu Indústria no Ambiente (MKIA), Constâncio da Conceição Pinto, rekuñese katak kondisaun aeroportu Timor-Leste (TL) sei difikulta transpórtasaun produtu Timor-Leste ba merkadu Xina no Indonézia ne’ebé MKIA identifika iha nia mandatu VI Governu Konstitusionál.

“Ita asesu ona ba buat sira ne’e mas ita-nia kondisaun infraestrutura mak seidauk permite liuliu Aeroportu. Ita hein katak bainhira Aeroportu di’ak ita bele komesa ona prodús halo barak ba konsumu internu nune’e mós bele esporta ba liur,” Constâncio hatete iha Palásiu Governu foin lalais ne’e.

Aleinde ne’e TL mós diskuite namanas hela kona-b’a merkadu iha nivel Komunidade País Língua Portugeza (CPLP) tanba Timor-Leste mós konsege hatama pilár foun ida iha polítika CPLP nian iha área komérsiu.

No iha rai laran MKIA estabelese ona sentru prosesamentu ida iha Natarbora liu-liu halo ba transformasaun ai-han, sai keripik no agora dauduan sirkula iha merkadu.

Iha parte Indústria nia mós MKIA promove ona Tais Timor to’o Portugál no ema kontente tebes no hakarak atu sosa iha merkadu. Indústria ki’ik seluk ne’ebé la’o ona no susesu mak kafé Timor, ida ne’e bele subtitui ona kafe tugu buaya nune’e mós masin.

“Ita substitui ona no ita-nia masin sufisiente ba konsumu internu no esporta bá rai-liur,” Constâncio da Conceição Pinto informa tan.

Hodi dehan tan, parte Ministériu iha tempu badak halo kontinuisaun ba programa balun mak hala’o tiha ona no kria programa foun balun liuliu produsaun masin nian ne’ebé sei halo lansamentu iha Atabae no resiklajen ba óleo fo’er nian ne’ebé la’o tiha ona no resiklajen ba plástiku nian ne’ebé hahú no hein atu halo mós lansamentu iha Manleuna.

Jornalista: Maria Auxiliadora | Editór: Manuel Pinto

Foto: Ministru Komérsiu, Indústria no Ambiente (MKIA), Constâncio Pinto. Foto, TATOLI/Egas Cristovão.

Haree Nain Internasionál 170 Sei Observa Eleisaun Lejislativa

DILI, (TATOLI) – Haree nain (observadór) internasionál hamutuk 170 sei observa direta eleisaun lejislativa ne’ebé sei realiza iha 22 jullu 2017.

“Sekretariadu Tékniku Administrasaun Eleitorál (STAE) fó ona akreditasaun ba observadór internasionál eh haree nain hamutuk 170 ba eleisaun parlamentár, sira ne’e mai hosi Europa, Amerika, Azean, Kontinente Austrália”, hatete diretór jerál STAE, Alicino Manuel Branco ba jornalista sira iha Kaikoli, ohin.

STAE fó akreditasaun ba observadór nasionál hamutuk 328 resin ne’ebé destakadu iha Timor laran tomak hodi halo observasaun ba prosesu eleisaun lejislativa inklui observadór internasionál.

“Lei fó kompeténsia ba STAE atu fó akreditasaun ba observadór nasionál no internasionál, tantu mídia no fiskais partidu polútiku sira nian”, afirma.

Nune’e, mídia nasionál hamutuk 210 no mídia internasionál 15 ne’ebé hetan ona akreditasaun hosi orgaun eleitorál.

Biar nune’e, akreditasaun ba fiskais partidu polítiku sira, kada partidu aprezenta ema nain tolu atu bele desloka ba sentru votasaun hotu.

Enkuantu, durante ne’e, fiskais partidu polítiku hamutuk rihun haat rua nolu resin sia (4029), hosi sira ne’e sei fiskaliza prosesu preparasaun eleisaun, kontazen, apuramentu finál.

Tuir rezultadu resensiamentu no atualizasaun baze dadus iha rai laran no rai liur hamutuk 764.858, enkuantu eleitor feto hamutuk 369.695 no mane 395.163, nune’e mós, sentru votasaun rai liur no rai laran  hamutuk 843.

Jornalista: Zezito Silva | Editora: Rita Almeida

Foto: Acilino Manuel Branco. Foto STAE