Xanana Sei Asumi Kargu Prezidente Alta Autoridade Negosiasaun Fronteira

DILI - Primeiru Ministru Mari Alkateri hateten nia parte hatoo ona proposta ba iha Kay Rala Xanana Gusmao, ba kargu nudar Prezidente Alta autoridade negosiadaun fronteira Timor-Leste no Dezemvolvimentu ba Tasi mane.

“Hau la  halo nomeiasaun, maibe hau halo ona  proposta hodi hatoo ba irmaun Xanana, hodi husu ba nia atu asumi kargu nudar Prezidente Alta autoridade ba iha negosiasaun fronteira Timor-Leste, nunee mos ba iha Dezemvolvimentu Tasi mane,” dehan Primeiru Ministru Mari  Alkatiri ba Jornalista sira iha palasiu Prezidensial Bairo Pite, Kinta (5/10/2017).

Nia dehan nudar xefe governu nia parte foin hatoo proposta ba Xanana Gusmao hodi asumi kargu ba Prezidente Alta autoridade ba iha negosiadaun fronteira Timor-Leste nomos Dezemvolvimentu ba Tasi mane, oinsa maka atu dezevolve Timor-Leste ba oin diak liu tan iha futuru.

“Se Irmaun Xanana simu duni proposta nee, entaun hau sei propoin ba Prezidente Republika Francisco Guterres Lú Olo maka fo pose ba Prezidente alta autoridade fronteira Timor-Leste nian tantu mos dezemvolvimentu tasi mane,” dehan Mari.

Primeiru Ministru Mari hateten relasiona ho kestaun nee ohin Ministru Agio Pereira Sai ona ba iha rai liur hodi hasoru malu ho Xanana. 

Natalino Costa | Suara Timor Lorosae

Tenke Konsidera Loron Mundial Kafe

DILI – Kafe Timor naran morin iha Mundu Internasional, tanba nee husu ba governu TL hamutuk ho povu agrikultores iha rai laran atu konsidera loron mundial kafe nian neebe mak monu iha loron 1 fulan Outubru.

Tuir Reprezentante povu iha uma fukun Parlamentu Nasional, Deputadu Mericio Akara, Kafe Timor naran morin iha Mundu Internasional, tan nee husu ba governu TL, ho povu agrikultores iha rai laran atu konsideira loron mundial ba kafe, neebe monu iha loron 1 fulan Outubru maibe haree ba realidade, TL nunka atu tau loron nee importansia hodi halo komemorasaun.

“Ami ezize atu selebra loron nee, hanesan parte ida atu fo hanoin ba povu agrikultor sira, oinsa atu hasae produsaun kafe iha rai laran, no oinsa ita bele halo promosaun ida neebe diak iha mundu kona ba kualidade kafe Timor,” informa Mericio liu husi Sesaun Plenaria Segunda (02/10/2017) iha PN.

Kompania Balun Abandona Projetu Estrada

DILI – Povu presiza dezenvolvementu infraestrutura neebe diak no kualidade, maibe tanba lakon kontrola husi governu mak kompania balun abandona projetu hanesan loke estrada iha Postu Administrativa Tilomar, Munisipiu Covalima.

Tuir Reprezentante Povu iha uma fukun Parlamentu Nasional Deputadu, Alexandrino Cardoso, governu ladun tau importansia hodi kontrola obra neebe mak iha baze, ho kestaun nee kompania balun gosta abandona projetu neebe sira kaer hanesan loke luan Estrada iha Munisipiu Covalima, Postu Administrativu Tilomar Suku Lalawa, liga mai too iha Postu Zumalai.

Hau hakarak hatoo ba Parlamentu konaba kestaun projetu loke estrada iha Covalima Postu Tilomar nian, nee sai Problema boot ba povu tanba kompania neebe kaer obra nee abandona total projetu nee no agora udan mos besik monu rai ona,” Kestaun nee fo sai husi Deputadu Alexsandrino liu husi Sesaun Plenaria, Segunda (02/10/2017) iha PN.

Nia hatutan, projetu nee hahu iha tinan rua liu ba maibe too agora laiha kontinuasaun no kompania neebe kaer obra nee mos agora lakon los no la iha responsabiliza ba ida nee. Tan nee husu nafatin ba governu atu toma medidas ba kompania refere, oinsa bele finaliza lalais obra sira nee. Tanba projetu nee lao kleur tiha ona.

Prezidente Repúblika Estende Mandatu Superior F-FDTL

DILI, (TATOLI) – Prezidente Repúblika, Francisco Guterres Lú Olo nomeia hikas Lere Anan Timur nu’udar Xefe Estadu Maior Jenerál F-FDTL, Brigadeiru Jenerál Filomeno Paixão nu’udar Vise Xefe Estadu Maior no Koronél Falur Rate Laek hanesan Xefe Estadu Maior F-FDTL.

Tuir informasaun ofisiál ne’ebé ajénsia TATOLI asesu hosi mídia Palásiu Prezidénsia Repúblika, lorokraik ne’e haktuir proposta nomeiasaun ba superior F-FDTL na’in tolu ne’e mai hosi Governu, hafoin rona Konsellu Superior Defeza no Seguransa.

Majór Jenerál Lere Anan Timur nomeiadu nu’udar Xefe Estadu Maior Jenerál F-FDTL, liuhusi dekretu Prezidente Repúblika númeru 65/2017, Brigadeiru-Jenerál Filomeno Paixão nu’udar Vise Xefe Estadu Maior liuhusi dekretu Prezidente Repúblika númeru 66/2017 no Koronél Falur Rate Laek, nu’udar Xefe Estadu Maior F-FDTL, liuhusi dekretu Prezidente Repúblika númeru 67/2017.

Fó Lisensa Ba Hong Long Sein Kontratu Investimentu

DILI, (TATOLI) - Prezidente Komisaun D Asuntu Ekonomia no Dezenvolvimentu, Demétrio Amaral konsidera, kontratu ne’ebé Ministériu Agrikultura e Peskas (MAP) atribui ba kompañia Hong Long sein iha kontratu Investimentu ida ne’e lá seguru.

“Ha’u hakarak husu tansá la hahú kedan ho mós kontratu ba investimentu ida, tanba fó lisensa de’it, ba ha’u ladún seguru,” Deputadu Partidu Libertasaun Popular (PLP) Demétrio Amaral husu iha audiénsia ho Ministru Estadu no Ministru Agrikultura no Peska (MAP), Estanislau Aleixo da Silva iha plenária, ohin.

Tuir nia rede ne’ebé atu hakail ikan tuir konvensaun mar (tasi) internasionál autoriza 10.5 kilo metru enkuantu rede ne’ebé kompañia Hong Long uza ne’e nia  porsentu 90 kaptasaun ikan Tubaraun.

Nune’e mós iha lista espésie iha aneksu espésie protejida sira  ita tau tamañu ikan ne’ebé sira bele kaer. Maibé realidade nota katak Tubaraun bebé (ki’ik) sira mós kaer hotu, tanba laiha kondisaun ruma atu halo limitasaun tamañu sira atu kaer.

Kazu Hong Long, Ha’u Deside Ho Onestu

DILI, (TATOLI) - Ministru Estadu no Ministru Agrikultura no Peska (MAP), Estanislau Aleixo da Silva, deklara abertamente perante Deputadu/a Parlamentu Nasionál katak, desizaun ne’ebé nia hola ba kompañia Hong Long ho laran mós alias onestu, la iha intensaun, tanba ne’e nia lata’uk buat ruma relasiona ho kazu ne’e.

“Ha’u laiha buat ida mak ha’u subar, ha’u subar mak ha’u ta’uk, ha’u lata’uk buat ida, ha’u halo ho laran moos ba rai ida ne’e, ho laran moos tomak hanesan horiuluk no hori ua’in hanesan estudante (luta) iha tempu ne’ebá,” Estanislau Aleixo fó sai iha plenária, Kinta (05/10).

Atu serve estadu timor-leste, ba nia (Esatanislau) ne’ebé iha tempu luta habelun ho saudozu sira hanesan Vicente Sahe, António Carvarinho, Cesar Maulaka, Inácio Fonseca “Solan”, Tchay, Bere Malailaka, ka’er metin prinsípiu ida katak sei la trai Timor-leste iha situasaun saida de’it.

KFP Disemina Rezultadu Sondajen ba MSS

DILI, (TATOLI) – Komisaun Funsaun Públika (KFP), disemina rezultadu sondajen persepasaun públiku kona-ba funsaun públika Timor-Leste (TL) ba funsionáriu Ministériu Solidariedade Sosiál (MSS) iha salaun MSS, Kaikoli Dili, kinta (5/10).

Komisáriu KFP, José Teles Cristovão informa rezultadu diagnóstika halo bazea ba sondajen ida hodi hateten katak rekursu umanu kada instituisaun, oras ne’e iha ne’ebé no atu ba iha ne’ebé.

“Iha rezultadu ne’e haree ba onze área ne’ebé mak define ona iha kestionáriu ne’ebé halo ho instituisaun ida-idak”, informa komisáriu José Teles ba mídia sira iha salaun MSS, ohin.

Bainhira ajénsia Tatoli husu kona-ba rezultadu diagnóstika nia utilizasaun ba futuru, nia hatan katak iha segmentu lubuk ida mak KFP sei haree bazea ba rezultadu sondajen.

Timor-Leste ho Austrália tenta hakotu akordu kona-ba fronteira tasi nian

Timor-Leste sei konklui iha fulan ne'e negosiasaun sira ho Austrália kona-ba fronteira sira tasi nian iha zona ida iha Tasi Timor ne'ebé maka sai hanesan konflitu iha dékada barak nia laran no ne'ebé nia rekursu sira sei defini futuru hosi ema timoroan sira nian iha prazu médiu.

Entre loron 09 no 13 Outubru, delegasaun sira hosi nasaun rua sei hasoru malu iha Haia (Holanda), ho protesaun hosi komisaun konsiliasaun ida hosi ONU, kriadu ho baze iha Lei Tasi nian, no ne'ebé aleinde defini fronteira tasi permanente sei hametin kondisaun sira dezenvolvimentu nian hosi posu importante Greater Sunrise.

Momentu istóriku ida ne'ebé akontese liutiha kuaze tinan 28 hafoin ida seluk, iha Dezembru 1989, sai hanesan símbolu hosi rekoñesimentu australianu nian hosi okupasaun indonéziu: iha tempu ne'ebá ministru Negósiu Estranjeiru hosi Austrália no Indonézia nian, Gareth Evans ho Ali Alatas selebra ona, ho xampañe, asinatura ba tratadu Timor Gap, ne'ebé fahe rekursu sira Tasi Timor nian.

PM: Governu timoroan sei kompletu iha semana oinmai

Primeiru-ministru timoroan, Mari Alkatiri, hatete ona katak Governu konstitusional timoroan dahitu sei kompletu iha semana oinmai ho tomada pose ba elementu sira ne'ebé falta, entre sira maka ministru Justisa ho Turizmu.

"Ha'u hakarak hili feto sira ba kargu Justisa ho Turizmu. Sei hanesan faze ikus nomeasaun nian", Mari Alkatiri hatete no esplika katak hein atu membru sira seluk hosi ezekutivu bele simu pose iha semana oinmai.

Fonte hosi Governu esplika ona ba Lusa katak aleinde kargu sira ministru sira Justia ho Turizmu nian sei nomeia mós visi-ministru ida ba turizmu, visi-ministru ida Finansa no sekretáriu Estadu ida, karik ba Eletrisidade.

Ezekutivu timoroan analiza Programa Governu nian

Programa hosi Governu konstitusional timoroan dahitu nian, ne'ebé karik sei aprova iha loron-sesta, iha prioridade sira iha área sosial, dezenvolvimentu ba infraestrutura sira, área ekonómiku no governasaun di'ak no reforma institusional, informa hosi ezekutivu.

Planu ida hosi dokumentu, ne'ebé akompaña ho Matadalan ida Implementasaun nian, analiza ona iha loron-kuarta ne'e durante reuniaun semanal hosi Konsellu Ministru sira nian karik sei hakotu no aprova iha reuniaun estraordináriu ida iha loron-sesta antes haruka ba parlamentu.

Iha komunikadu, ezekutivu esplika katak Programa Governu nain, ne'ebé maka prepara hela dezde governante dahuluk sira ne'ebé simu pose iha loron 15 Setembru, "kumpri Planu Estratéjiku Dezenvolvimentu (PED) tinan 2011-2030 nian no ba Objetivu sira Dezenvolvimentu Sustentável nian iha tinan lima oinmai".

Durante reuniaun loron-kuarta nian, ministru iha Prezidénsia hosi Konsellu Ministru sira nian, Adriano do Nascimento, ne'ebé kordena ona ekipa téknika iha elaborasaun projetu nian, halo ona aprezentasaun hosi serbisu sira ne'ebé dezenvolvidu no konteúdu dokumentu nian.

Ezekusaun orsamental real iha Timor-Leste maka 51,7% de'it iha final Setembru

Ezekusaun orsamental real (pagamentu ne'ebé hala'o duni) hosi konta públika timoroan nian maka, to'o trimestre datoluk nia rohan, maka 51,7% de'it hosi total orsamentadu, hatete hosi informasaun hosi Portal Transparénsia Ministériu Finansa nian ne'ebé maka observa hosi Lusa.

Informasaun sira hatudu impaktu ne'ebé períudu eleitoral, iha Marsu hala'o ona prezidensial sira no iha Jullu hala'o lejislativu sira, hamosu iha ezekusaun orsamental nasaun nian, iha tempu ne'ebé Governu foun prepara Orsamentu retifikativu ida ne'ebé labele aumenta total orsamentadu ba tinan ne'e.

Iha konkretu no hafoin fulan sia governasaun nain Estadu selu ona total ida dolar millaun 717,12, hosi total orsamentadu ida ba tinan tomak ho folin dolar millaun 1.386,8.

Ezekusaun total, ne'ebé tau hamutuk ho pagamentu sira ne'ebé halo ona no obrigasaun sira, kontratadu maibé seidauk seluk, maka dolar millaun 837,81 ka 60,4% de'it, haktuir hosi informasaun hanesan.