Fronteira Marítima, Alkatiri Apresia Xanana

DILI, (TATOLI) – Primeiru Ministru, Mari Alkatiri apresia tebes susesu Xefe Negosiador Delimitasaun Fronteira Marítima (FM), Xanana Gusmão. Alkatiri konsidera Xanana nia esforsu bele marka tan istória foun hodi define loloos fronteira Marítima entre Timor-Leste ho Australia.

“Foin lalais ita manan tan luta foun ida, luta importante ida. Dala ida tan Xanana Gusmão lidera negosiasaun lori ita ba manan soberania iha tasi. Ita nia tasi boot liu ita nia rai maran ne’e signifika ita tenke hanoin ona oinsá atu fó seguransa no defende ita nia soberania iha tasi. Ita tenke iha konsensu ida ba oinsá atu dezenvolve ita rikusoin iha ita nia fronteira marítima,” Mari Alkatiri realsa iha  Kongresu RENETIL ba da-hituk iha Sentru Konvensaun Dili, Kinta, (15/03).

Nia dehan, seguransa importante tebes, bainhira la iha seguransa, la konsege proteje no defende tasi ikus mai Timor sai fatin ba tránzitu ba droga.

Tanba ne’e, hakarak garante seguransa tenke aumenta kapasidade Falintíl-Forsa Defeza Timor-Leste (F-FDTL) no Polisia Nasionál Timor-Leste (PNTL) no tenke hamutuk ho konsensu nasionál ida atu trata kestaun dezenvolvimentu rikusoin iha fronteira.

Ba jerasaun Mari Alkatiri nian, sekretáriu jerál partidu Fretilín ne’e dehan, “Ami bele la’o hamutuk maibé dalan klaran ami bele fahe malu no to’o rohan ami sei hamutuk fila fali.”

Lideransa tuan sira nia hakarak mak atu hasai povu hosi kiak no mukit no hasai povu hosi nakukun laran. Baze atu lori dezenvolvimentu mak Organizasaun Juventude Rezisténsia ho joven sira post rezisténsia nian.

Jornalista: Zezito Silva | Editór: Manuel Pinto

Imajen: Xanana Gusmão akompaña presta deklarasaun ba jornalista sira sobre formasaun governu hafoin hasoru malu iha Hotel Novo Turizmu, ohin. Foto Tatoli/Antonio Gonçalves

GMN TV | Jornal Nacional Kalan

Fidelis: “Ami Tabele, Oinsa Hafahe Lider”

DILI - Relasiona ho Xefe Estadu Maior Jeneral F-FDTL Major Lere Anan Timur neebe husu jerasaun foun labele fahe lideransa nasional, Xefe Bankada PLP, Fidelis Magalhaes hatete, ema dehan sira tabele, oinsa atu hafahe lideransa sira.

Ema barak dehan ami nee programa laiha i ami tabele tuir lider sira deit, maibe dehan fali ami mak atu hafahe fali lider sira. Se ami tabele tiha oinsa mak atu hafahe lider, sa tan atu hafahe lideransa nasional,” katak Fidelis iha sesaun husu no hatan liu husi komferensia imprensa, iha bankada CNRT, PN, Kuarta, (15/03/2018).

Xefe Bankada PLP nee hatete, maun boot Taur nia intelijensia, sabodaria tanba nee sira sai militante PLP nian, i sira hatene katak lider iha matenek, iha vizaun boot ba futuru, tanba nee mak harii PLP, ho nunee sira iha lealidade tomak ba lideransa partidu nian.

Entretantu Xefe Bankada PD, Maria Teresa da Silva hatete, PD apresia maun Lere nia mensajen, ida nee mak reponsabilidade maun boot sira hatoo ba jerasaun foun, atu bele komperende katak prosesu ukun aan mai too ohin loron i manan ukun nee, tanba iha Frenti armada, diplomasia no klandestina. 

Notisia kompletu lee iha jornal edisaun Sesta, (16/03/2018)

Guilhermina Franco | Suara Timor Lorosae

Lideransa Tuan Tenke Lori Jerasaun Foun Ba Futuru Nabilan

DILI, (TATOLI) – Eis lider rezisténsia no ulun boot FALINTIL-FDTL, Lere Anan Timur, husu ba lideransa tuan sira atu lori jerasaun foun ba futuru ne’ebé di’ak ba dezenvolvimentu nasaun no povu.

“Ha’u husu ba Primeiru-Ministru nu’udar mós Prezidente Partidu FRETILIN, Marí Alkatiri, Prezidente Partidu CNRT, Xanana Gusmão, Ministru Estadu no Konselleiru ba Seguransa Nasionál, Ramos Horta no sira seluk tenke iha dever morál no polítika atu lori jerasaun foun sira ba moris di’ak iha futuru”, Lere iha nia diskursu iha kongresu RENETIL (Rezisténsia Nasionál Estudante Timor-Leste) ba da-hituk iha Sentru Konvensaun Dili, kinta, (15/3).

Átual Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur, realsa nu’udar aman ba nasaun tenke preokupa oan sira nia futuru tanba kuandu katuas ona, sé mak atu haree oan sira.

“Se ohin ha’u mate karik ha’u nia oan sira nia futuru oinsá, ami idade tuan ona entaun ami la preokupa ona ami nia futuru maibé ami futuru mak jerasaun foun sira”, afirma.

Kuandu jerasaun foun nia futuru garantidu, signifika ita nia nasaun mós sei garantidu tanba poténsia barak atu dezenvolve ba moris povu nian liliu ba jerasaun foun sira.

“Ami nia esperansa mak imi sei lori nasaun ne’e ba oin, imi bele moris hakmatek no haksolok iha ambiente patria ba dezenvolvimentu”, katak.

Lere hatutan tan: “Polítiku sira dehan  prefere liu ba maun boot Xanana Gusmão ho Taur Matan Ruak maibé ha’u prefere sira hotu hanesan tanba ne’e sira tenke hamutuk”.

“Ita boot sira tenke hanoin imi nia oan sira eh jerasaun foun hodi halo buat ruma eh buat di’ak atu lori nasaun ne’e ba oin tanba jerasaun foun sira di’ak tebes no matenek”, afirma tan.

Nia haktuir uluk dehan lakon títulu duke lakon pátria, ohin loron kuandu dehan lakon títulu signifika lakon duni ona tanba konsekuénsia mak atu buka servisu dasa rai mós sei la hetan.

Nia husu ba loriku aswain, Renetil no juventude hotu ne’ebé uluk fó nia kontribuisaun ba funu libertasaun nasionál, tenke fó liman ba malu hodi lori nasaun ne’e ba dezenvolvimentu.

Jornalista: Zezito Silva | Editora: Rita Almeida

Imajen: Xefe Estadu Maiór FALINTIL-Forsa Defeza Timor-Leste (F-FDTL), Major Jenerál Lere Anan Timur

Bele Partidu Ketak, RENETIL Tenke Unidade

DILI, (TATOLI) – Primeiru Ministru, Mari Alkatiri membru organizasaun RENETIL (Resistencia Nacional dos Estudante de Timor-Leste) atu mantein nafatin unidade hodi hametin soberania liuhosi dalan demokrátiku, maski ohin loron ida iha nia partidu.

“Daudaun ne’e, membru RENETIL sira ho partidu ketak-ketak, maibé unidade Organizasaun Juventude Rezisténsia mantein nafatin hodi hametin país no soberania liuhosi dalan demokrátiku,” Xefe Governu, Mari Alkatiri hato’o iha nia Diskursu bainhira partisipa Kongresu RENETIL ba da-hituk iha Sentru Konvensaun Dili, Kinta, (15/03).

Alkatiri realsa katak membru RENETIL sira agora namkari hotu signifika membru ida-idak ho nia opsaun polítika, maibé fatin RENETIL mak hamahon sira ida de’it.

Tanba ne’e, iha tempu demokrasia, ida-idak la’o ninian, maibé la iha inimigu, nune’e ohin loron la’ós halo asaun hasoru inimigu, maibé halo asaun hamutuk hodi halo dezenvolvimentu ba rai no ba povu nia moris di’ak.

Alkatiri husu atu RENETIL oan sira mantein prinsípiu “Sem Títulu duké Sem Pátria” atu defende Timor-Leste nia independénsia.

“Jerasaun foun sira liuliu RENETIL tenke prepara-an didi’ak tanba uluk luta ho prinsípiu ida katak mezmu atu lakon estudu, maibé lakohi lakon pátria,” Alkatiri hameno e sente kontente tanba Kongresu RENETIL ba da-hituk monu los iha Governu da-hituk.

Jornalista: Zezito Silva | Editór: Manuel Pinto

Imajen: Primeiru Ministru Mari Alkatiri wainhira kualia iha konferensia loron Maritima Mundial nian iha Hotel Timor hodi halao enseramentu ba konferensian nee, Seste 10 Novembru 2017. Foto TATOLI/Antonio Gonçalves

AKTU DISKRIMINASAUN HASORU EMA HO DEFISIENSIA IHA UNTL

Discrimination faced by student with a disability at UNTL

Komunikadu Imprensa

Dili, 12 Marcu 2018

Ho laran triste hakarak informa ba publiku katak ohin iha historia Timor-Leste nian, liuliu iha ambiente akademiku nebe atu tane aas valor umano halo hela aktu diskriminasaun hasoru ema ho defisiensia. Ita hotu louva hela Universidade Nacional Timor Lorosa’e (UNTL) tanba nia hatudu ezemplu diak hodi simu estudante ema ho defisiensia ba eskola iha Curso Inclusaun Comunitaria e Social, iha parte seluk rezeita estudante ida tanba ninia defisiensia fiziku. 

Alito Pinto, hanesan estudante ida ne’ebé nia naran passa iha UNTL iha Departementu Enfermagen, Faculdade de Medicina e Ciensia Saude ho Numeru 46 hosi lista Ministeriu Edukasaun nian. 

Alito Pinto kontente loos atu hahu nia estudu iha area ida nebe nia mehi kleur ona. Alito Pinto mós tuir ona prosesu orientasaun durante loron tolu iha Lahane Dili, no mos partisipa ona iha aula durante semana rua. Atu tama ba prosesu prienxe KRS, wainhira detekta katak Alito Pinto hanesan ema ho defisiénsia fisiku ida, dekanu fakuldade ho nia vise husu kedas estudante refere atu transfere obrigatoriu ba departementu seluk ho razaun tamba Alito Pinto ne’e defisiente ida. Alito Pinto rezeita transferensia tanba nia hakarak tebtebes atu halo nia estudu iha area ida ne’e. Hatene katak Alito Pinto rezeita transferensia, dekanu ho nia vise husu atu hasoru ho Alito nia inan-aman. Nune’e inan-aman hosi Alito hasoru ona dekanu dala 4, dahuluk iha loron 19 Fevereiru no 22 Fevereiru. 

Iha loron 25 Fevereiru 2018 ADTL simu informasaun kona-ba aktus diskriminativu hasoru ema ho defisiensia ida ne’e. Iha dia 27 Fevereiru ekipa ADTL akompanha Alito Pinto ho nia inan-aman hodi ba hasoru dekano iha nia serbisu fatin iha UNTL. Simplesmente dekano rezeita atu enkontru ho razaun okupadu, maiske nia mak husu atu hasoru nia iha loron refere. 

Alito Pinto kontinua tama aula, maibe nia naran ko’a sai tiha ona hosi lista prezensa la hanesan semana rua antes. 

Ohin loron 12 Marsu 2018 ekipa ADTL ho reprezentante inan-aman hosi Alito Pinto halo esforsu dala ida tan hodi hasoru ho dekano. Maibe laiha rezultadu positivu ba Alito Pinto atu kontinua estuda iha Departementu Enfermagen, Faculdade de Medicina e Ciensia Saude UNTL. 

Ho nune’e, ami reprezentante inan-aman hamutuk ho ADTL konsidera aktu ida ne’e hanesan aktu diskriminativu hasoru ema ho defisiensia nia hakarak, no sei lori keixa ida ne’e ba aprezenta iha Provedoria dos Direitos Humanos e Justisa (PDHJ) hanesan instituisaun Estado ba defeza direitos humanos sidadania nian, no ami mós husu atu PDHJ reprezenta Alito Pinto hanesan keixa nain atu foti medidas urgencia hasoru aktus diskriminativu ida ne’e. ADTL reprezenta lian ema ho defisiensia nian, husu atu PDHJ ho UNTL buka solusaun lalais ba kazu ida ne’e.

Obrigadu ba atensaun.

Ratifika FM Konserteza XG Partisipa

DILI – Atu ratifika ba Fronteira Maritima (FM), konserteza sei bolu Xefe Negosiador  Xanana Gusmao (XG), maibe governu sei rona mos prosesu tomak husi Xefe Negosiador.

"Karik atu ratifika FM, konserteza sei bolu XG, maibe sei hein governu iha Konsellu Ministru atu halo apresia no rona prosesu tomak husi Xefe Negosiador XG depois mak aprezenta mai iha PN i PN mos tenke estuda no haree didiak prosesu tomak atu nunee bele ratifika,” katak Branco ba iha Bankada Fretilin, PN, Kinta, (15/03/2018).

Branco katak liu tan, governu liu husi Konsellu Ministru sei reuni depois aprezanta mai iha PN halo ratifikasaun.

Entretantu Xefe Bankada Khunto, Luis Roberto da Silva hatete, kona ba FM ekipa negosiasaun ho maun XG hakotu  ona hodi susesu ba TL, ida nee hanesan istoria boot ba Timor oan hotu. 

Notisia kompletu lee iha jornal edisaun Sesta, (16/03/2018)

Guilhermina Franco | Suara Timor Lorosae

Alkatiri: FM Boot Liu Duke Rai Maran

DILI - Nasaun Timor Leste manan ona fronteira maritima ho Australia, nunee halo Timor Leste nia fronteira boot liu duke rai maran.

Primeiru Ministru Mari Alkatiri hateten, fooin lalais Timor Leste manan tan fronteira maritima, dala ida tan Xanana Gusmao lidera negosiasaun I lori Fronteira maritima mai.

Se FM ita lakonsege proteze toO aban bainrua ita maka sala, bainhira trafiku oin oin hanesan droga, ka kilat liu husi ita nia rai ita maka sala, tanba nee ita tenke aumenta kapasidade F-FDTL no PNTl ninian para atu halo kontrolasaun,” dehan PM Mari, iha nia diskursu, bainhira partisipa iha konggresu Renetil ba Dala VII, iha CCD, Kinta, (15/03/2018).

Maske nunee Xefi Governu dehan, tenke mos hamosu ho konsensu nasional ida, atu trata kestaun de dezenvolvimentu riku soi iha Timor Leste nia fronteira maritime.

Iha fatin hanesan Xefi Estadu Maior Jeneral F-FDTL, Jeneral Lere Anan Timur hateten, ohin loron ema hotu iha responsabilidade foun ba fronteira maritime. 

Notisia kompletu lee iha jornal edisaun Sesta,(16/03/2018)

Carme Ximenes/Maria Lay | Suara Timor Lorosae