DILI
- Ministru Estadu Koordenador Assuntu Administrasaun Estadu, Justisa no
Ministru Administrasaun Estatal, Dionisio Babo Soares, hatete, governu laiha
osan atu sosa kareta ho motor hodi fahe ba xefe suku no xefe aldeia foun sira.
“Ita
sosa tiha kareta sé maka atu sosa tan gajolina. Depois sira (xefe suku
sira red) dehan governu fo tiha kareta mai ami, la fo ho mina mai.
Tanba ne’e maka governu laiha osan,” Dionisio ba jornalista sira iha
MNEK, Segunda (07/11), relasiona ho informasaun ne’ebé espalla katak xefe suku
no xefe aldeia foun sira sei simu kareta no motor.
Governante
ne’e hatutan, kona-ba fasilidade xefe suku sira nian, sei hein governu
foun iha 2017 foin tau iha lei foun maka desidi, atu tau farda foun,
motor foun no fasilidade sira seluk.
Entretantu
totál kandidatu xefe suku ba periodu ida ne’e hamutuk 2.071, maka partisipa iha
eleisaun liu ba iha loron 29 Outubru. Hosi númeru ne’e kompostu hosi feto 319
no mane 1.752 hosi suku 442 iha teritóriu Timor Leste.
Hosi
rejultadu eleisaun primeira ronde, suku hamutuk 313 iha teritóriu Timor laran
maka sei hala’o fali eleisaun ba segundu ronde iha loron Domingu semana oin
(13/11), tanba rejultadu votus la atinji 50% + 1.
Tuir
dadus hosi Sekretaria Estadu Muillher (SEM), hosi total feto hamutuk 319 ne’ebé
kandidata a’an ba xefe suku, nain 13 maka manan eleisaun iha primeira ronde,
nain 16 maka avansa ba segundu ronde kompete ho mane sira.
Eleisaun
dahuluk ka primeira ronde ba kandidatu xefe suku sira uza sistema atribuisaun
mandatu maioria absoluta (50% totál votu válidu + votu 1). Entretantu eleisaun
ba daruak uza atribuisaun mandatu maioria simples (kandidatu/a ne’ebé hetan
totál votu válidu barak liu mak manan iha eleisaun ne’e).
Iha
entrevista horiseik, Ministru Administrasaun Estatal, Dionisio Babo, husu ba
povu tomak atu partisipa iha eleisaun daruak hodi hili xefe suku ne’ebé bele
reprejenta suku no halo dezenvolvimentu ba suku ho servisu hamutuk ne’ebé
di’ak.
“Ita
fo tempu iha loron Domingu atu ema hotu bele ba partisipa,” subliña Dionisio
Babo.
Iha
parte seluk, hatan ba preokupasaun kona-ba iha eleisaun dahuluk laiha tinta
ne’ebé fó sinal ba eleitór sira, Dionisio Babo hatete, la uza tinta tanba
iha lei hatete ona katak, iha elisaun suku ne’e sei halo de’it iha
aldeias, aldeia ne’e ema hotu koñese malu hela.
“Iha
partidu polítiku maka o hili fali partidu ida depois ba fali partidu seluk atu
nune’e bele hili iha ne’ebé de’it, iha suku laran ka bele ba hili fatin
rua ne’e ita bele uza tinta, maibé elisaun suku ita nia kartau hakerek
kedas ita nia kartaun eleitoral ita ba iha ne’ebé hakerek dala ida de’it
la persija ona tina,” Dionisio Babo esplika.
Iha
sikun seluk, Sekretária Estadu Muilher, Veneranda Lemos, hatete, hosi rejultadu
partisipasaun feto iha eleisaun suku nian, hatudu katak feto mos iha kbi’it
maka’as partisipa prosesu dezenvolvimentu nasionál.
“Haú
atu informa de’it katak, ba feto maluk sira ne’ebé maka
eleitu ona hamutuk ema nain 13, no ba sira ne’ebé maka iha segundu
volta iha 16, ita espera katak, maske sira la liu hotu maibé ita
fi’ar katak, feto iha pozisaun, feto brani atu lori dezemvolvimentu lokal
ba to’o iha nivel nasionál,” Veneranda hatete ba jornalista sira hafoin
partisipa semeináriu nasionál feto iha MNEK, Segunda (07/11).
Sosiedade
Sivíl Preokupa
Iha
parte seluk, ssiedade sivíl sira kontinua hato’o sira nia preokupasaun kona-ba
eleisaun primeira ronde ne’ebé la’o sabraut. Povu barak la kompriende prosesu
eleisaun, laiha tinta ba eleitor sira, laiha edukasaun votantes, buletin votus
tolu kedas halo konfuzaun, eleisaun segundu volta gasta osan de’it.
Diretór
Ezekutivu Asosiasaun HAK, Manuel Monteiro ba Timor Post, Segunda, (07/11), iha
Palásio Governu, katak, governu tenke iha seriedade halo avaliasaun ba fallansu
hotu atu labele akontese tan.
Tuir
Manuel, autoridade lokal sira maka xave ba dezenvolvimentu iha baze, tanba ne’e
governu tenke sériu atu sidadaun sira bele eskolla sira nia lideransa ho
lolo’os.
Iha
fatin hanesan Diretór FONGTIL, Arcenio Pereira hatete, eleisaun suku liu ba la’o
sabarut i governu mos rekoñese. Tanba ne’e, orgaun kompetente tenke
sosializa lei no hadi’a fallansu sira ne’ebé liu ona.
“Tenke
halo avalisaun ba ida, depois ba kualker eleisaun ne’e CNE maka tenke toma
responsabilidade. Iha momentu ida ne’e la’ós CNE maibé só STAE
de’it,” Arsenio preokupa.
Nia
dehan, STAE la’ós instituisaun indepedente maibé iha governu
nia okos entau nia so iha ekipamentus tékniku atu fo apoiu de’it
maibé so CNE maka tenke toma responsabilidade, tanba ne’e mak ba
oin tenke koordena didi’ak para labele akontese tan. (res/mj1)
Timor
Post
