Lere: Ángela Hakarak Hatún Xanana, Horta no Mari

Tempotimor (Dili) -- Liga ba asaun Ángela Freitas nian ne'ebé hakarak hatún Lú-Olo no Taur Matan Ruak, Jenerál Lere Anan Timur konsidera Ángela hakarak hatún Xanana, Mari no Horta.

Tuir xefe estadu maiór F-FDTL Maijór Jenerál Lere Anan Timur katak, Ángela Freitas hakarak hatún Prezidente Repúblika (PR) Francisco Guterres Lú-Olo no Primeiru Ministru (PM) Taur Matan Ruak ne'e signifika nia hakarak hatún Xanana, Mari no Ramos Horta.

"Ha'u-nia pozisaun, ha'u defende nafatin ha'u-nia maun sira ne'ebé uluk lori nasaun ne'e to'o ne'ebé de'it, la barak ona, sira na'in lima ka neen de'it ona," dehan Jenerál Lere iha Kuartel Jerál Fatuhada Dili, Sesta (4/9).

Lere afirma, Ángela tenke iha morál, tanba hatún Lú-Olo no Taur Matan Ruak, signifika hatún Xanana no Mari.

"Ángela, o iha morál, hatún Lú-Olo no Taur Matan Ruak signifika o hatun Xanana, hatun Ramos Horta no Marí, tanba sira ne'e mak uma na'in, be uluk funu ne'e o iha ne'ebé? O ne'e metade husi Australianu, barak liu mak Australianu, oituan de'it mak timoroan," katak Lere.

Fitun rua ne'e akresenta, se-se de'it mak hakarak hatún orgaun soberanu sira, forsa armada iha parta proteje sira.

Deputadu PLP Konsidera Ângela Freitas ‘Bandida’

Tempotimor (Dili) -- Deputadu Bankada PLP, Francisco Vasconcelos, konsidera deklarasaun portavós grupu Rezisténsia Nasionál Defende Justisa no Konstituisaun (RNDJK), Ângela Freitas, hanesan ema bandidu.

Tuir nia, planu grupu Ângela Cs fofoun dehan atu defende justisa no buka buat ne'ebé loos ba povu, maibé realidade atu soran fali Estadu ida ne'e.

Nia hatutan, iha deklarasaun Ângela hatete sei mobiliza forsa no seguransa atu kontra Xefe Estadu rezigna-aan, ida ne'e de'it kontra ona konstituisaun.

"Deklarasaun Ângela Freitas ne'e hanesan ema bandidu ka ema vandalizmu sira, Ko’alia dehan defende justisa no konstituisaun mas afinál sira maka kontra fali konstituisaun," dehan Deputadu Francisco, iha Parlamentu Nasionál, Tersa (1/9).

Nia afirma, karik tuir planu loron 4 Setembru, Ângela Freitas ho António Ai-tahan Matak sei mobiliza massa hodi manifesta hasoru Prezidente Repúblika, Francisco Guterres Lu-olo, lei fó dalan maibé la’ós uza fali kilat ka sasán kro'at hanesan temi iha deklarasaun Ângela nian. 

Iha fatin hanesan, Deputada KHUNTO, Olinda Guterres hatete, atitude ne'ebé Ângela Freitas halo ne'e nu’udar asaun ne'ebé atu sobu nasaun no la’ós atu defende justisa ka konstituisaun.

Maski nune’e, deputada ne’e la fiar saida maka Ângela ko’alia tanba sira laiha massa atu hatún hodi halo manifestasaun.

"Ângela ninia massa mak ida sé loos. Nia dehan atu mobiliza organizasaun arte marsiál, nia membru organizasaun maka sé loos, ha'u hakarak hatene. Nia partidu de'it ema la hili, agora nia kontinua uza nia partidu ne'ebé kontra tiha ona lei," dehan nia. (*)

Líbanu/Esplozaun: Sekretáriu Estadu Vatikanu nian vizita Beirute hafoin apelu

Sekretáriu Estadu Vatikanu nian, kardeanl Pietro Parolin, afirma ona iha loron-sesta ne'e, iha Beirute, katak "Líbanu la mesak", durante loron ida orasaun nian ne'ebé dekreta hosi papa ba nasaun ne'e no liutiha fulan ida hafoin esplozaun iha portu kapital nian.

Mensajen mosu liutiha loron rua hafoin apelu ida hosi papa ba fiar-na'in sira iha mundu tomak tomak ba "loron universal ida orasaun nian ho jejun ba Líbanu", nasaun multirelijiozu ida ne'ebé hasoru hela krizi maka'as.

Bainhira fó sai apelu, ne'ebé konkretiza iha loron-sesta, papa Francisco konsidera ona katak Líbanu hasoru "perigu maka'as ida" no labele "husik iha nia solidaun".

Iha sekuénsia hosi enkontru ida iha loron-sesta ho Prezidente libanés Michel Aoun, kardeal Parolin asinala ona katak "Santa Sé fó importánsia boot ida ba Líbanu. Líbanu la mesak".

Iha aluzaun ida ba komunidade relijiozu oioin iha nasaun multiétniku ne'e, nia hatutan ona katak Líbanu "tenki prezerva nia komponente sira" ne'ebé harii "identidade" nasaun nian.

COVID-19: Nova Zelándia rejista vítima mortal dahuluk liutiha fulan tolu resin

Iha loron-sesta ne'e, Nova Zelándia rejista vítima mortal dahuluk ne'ebé maka halo hosi koronavírus foun liutiha fulan tolu resin, anunsia hosi Ministériu Saúde neozelandés.

Vítima, ne'ebé mate iha loron-sesta ne'e iha hospital, maka hanesan "mane ida iha tinan 50 resin" ne'ebé halo parte hosi família responsável hosi moras foun COVID-19 nian ne'ebé maka mosu iha fulan-Agostu nia laran, iha Auckland, haktuir hosi komunikadu Ministériu nian.

Nasaun laiha rejistu ba vítima mortal ida ho ligasaun ba COVID-19 dezde loron 24 Maiu.  

     

Nova Zelándia diagnostika ona, aleinde ne'e, kazu lima foun hosi moras ne'e iha oras 24 ikus, na'in tolu transmiti lokalmente, aumenta total ba infesaun ba ema na'in 1.413 ne'ebé iha ona vítima mortal na'in 23.