Timor-Leste no Austrália Hasoru Malu ho Komisaun Konsiliasaun no Joint Venture

DILI, (TATOLI) – Timor-Leste no Austrália hasoru malu ho Komisaun Konsiliasaun no Joint Venture ba Greater Sunrise nian iha Singapura husi 18 to’o 20 novembru hodi kontinua diskusaun kona-ba tratadu fronteira marítima no konseitu dezenvolvimentu ba Greater Sunrise nian.

Tuir nota komunikadu ne’ebé Tatoli asesu katak Nasaun rua ne’e hetan ona akordu ida iha 30 agostu, no halo ona tratadu esbosu ida hodi finaliza fronteira marítima, koalia kona-ba estatutu legal kampu Greater Sunrise nian, estabelese Rejime Espesial ida ba Greater Sunrise, dalan ida ba dezenvolvimentu rekursu ne’e, no aranjus sira hodi fahe reseita ne’e.

Tratadu ne’e nia detallu sira sei konfidensial hela. Komisaun sei organiza sorumutuk seluk tan ho Parte sira iha Dezembru hodi haree fila fali progresu diskursaun sira kona-ba konseitu dezenvolvimentu ba Greater Sunrise nian.

Komisaun oras ne’e daudauk finaliza hela nia relatóriu kona-ba prosesu konsiliasaun nian, ne’ebé sira sei fó sai ba públiku iha hahú tinan oin nian. (ki)

Haree informasaun kompletu iha ne’e: https://pcacases.com/web/sendAttach/2255

Ema Barak Antuziasmu Lé Konstituisaun iha Espozisaun PN

DILI, (TATOLI) – Grupu Feto Parlamentár Timor-Leste (GMPTL-sigla portugés) taka espozisaun ba selebrasaun tinan 10 iha Parlamentu Nasionál. Hosi enseramentu ne’e hatudu ema barak vízita espozisaun ne’e hakarak foti Konstituisaun Repúblika Demokrátika Timor-Leste (K-RDTL) hodi loke no lé.

“Iha loron haat nia laran, hahú iha 19 to’o 24 novembru vizitante barak mai haree espozisaun ho antuziasmadu, liliu ema barak hakarak lé konstituisaun tanba relasaun ho situasaun polítika Timor-Leste nian”, haktuir Prezidente GMPTL, Brigida Correia, ba jornalista sira iha PN, ohin.

Nia realsa ema barak mai foti lei inan hodi loke no lé nomós lori ba uma ho versaun Tetum no Portugés tanba barak iha vontade lé lei inan.

Estudante sira no públiku hakat mai iha PN signifika sira fó importánsia ba espozisaun atu haree direitamente saida mak GMPTL halo durante tinan 10 nia laran.

Enkuantu, GMPTL konsidera ohin no ba oin tau iha planu atu bele realiza espozisaun iha universidade hotu inklui eskola sekúndariu atu sira komprende servisu GMPTL nian ho asaun konkreta ho lei ne’ebé iha relasaun ho igualdade jéneru, diskriminasaun kona-ba feto ho mane no ba ema vulneravél sira.

Entretantu, GMPTL harii iha 2006 liuhosi rezolusaun PN atu oinsá bele integra iha rede feto parlamentár komunidade nasaun ne’ebé ko’alia dalen portugés.

“Kuandu ita la halo rezolusaun ida susar atu reuniaun deputada rede CPLP nian. Ezisténsia GMPTL importante atu defende igualdade jeneru iha PN no sai portavoz povu liliu ba feto sira iha PN”, tenik nia.

Jornalista: Zezito Silva | Editora: Rita Almeida

MUTL Husu BOP Atu Hametin Estabilidade Iha TL

DILI - Ejejensia husi Movementu Universitariu Timor Leste (MUTL) ba membru deputadu husi Bloku Opozisaun Parlamentar (BOP) no Partidu koligasaun Fretilin no PD iha PN, atu tau atensaun ba estabilidade no pas iha Timor Leste.

Lia fuan hirak nee hatoo husi Portavos Jones Chege ba jornalista sira liu husi konfrensia inprensa neebe halao iha Kampus UNTL Dili Sesta, (24/11/2017). Jones Chege reforsa tan katak  relasaun ho deklarasaun husi Ministru Defeza no Seguransa (MDS) Jose Agostinho Somotxo neebe dehan PNTL no F-FDTL sei la atua problema relasiona ho politika neebe mosu agora.

Relasiona ho Tendensia situasaun politika iha Estadu de Direitu Demokratiku TL ida neebe dadauk nee akontese, laos sai deit preokupasaun elite politiku sira nian. Maibe situasaun politika iha VII governu konstitusional tinan 2017 sai hanesan preokupasaun povu iha teritoriu Timor laran tomak, tamba nee MUTL marka audensia hodi halo dialogu ho Fundador RDTL kona ba interese nasional.

“Ami MUTL sei organiza Povu tomak hodi halao komboiu Marxa da Paz iha Kapital Dili durante Loron ida no sei konsentra Iha Parlamentu Nasional nia oin iha tempu badak nia laran,”nia reforsa tan.

MUTL nia ejejensia maka ba fundador RDTL no lideransa Nasional atu bele tetu no analiza situasan politika aktual nee hodi nasaun nee la bele hetan ka monu ba krizei. Husu ba partidu opozisaun no Koligasaun katak labele halimar povu nia votus. Relasiona ho tendensia politika dadaun nee la beele halo povu paniku.

Relasiona ho deklarasaun Ministerio Defeza no Seguransa Sr. Agustino Somotxo neebe deklara ba publiku katak sei la fo ordem ba Parte PNTL no FFDTL hodi atua Problema neebe mak atu akontese relasiona ho situasaun Politika aktual dadaun nee tan nee mak ami Husu ba Deputadu iha IV Legislatura tantu Opozisaun no Koligasaun tenke toma responsalvel bainhira problema akontese. 

Justinho Manuel | Suara Timor Lorosae

Laiha Boa Fe, OMP Komesa Blokea Funsionamentu Komisaun PN

DILI – Oposizaun Maioria Parlamentar laiha ona boa fe, tanba sira komesa blokea ona funsionamentu aktividade komisaun iha Parlamentu Nasional.

Kestaun nee hatoo husi Sekretariu Jeral Partidu Fretilin Jose Reis katak, kestaun neebe maka akontese iha PN, oposizaun komesa blokia funsinamentu komisaun sira nian bele paraliza Parlamentu ida nee.

Ita hare katak laiha voa fe atu kontribui prosesu nee lao ba oin, ita hotu hatene siklu nee lao servisu ida ke partidu hotu hotu halao tarballu ida nee atu hametin paz no establidade iha ita nia rai,” dehan Adjuntu Sekjer Fretilin Jose ba jornalista sira, hafoin remata enkontru ho delegasaun Uniaun Eropia, iha Hotel Timor, Dili, Sesta (24/11/2017).

Adjuntu Sekjer Fretilin JR hateten, Uluk mos iha rezistensia nia laran balu halo servisu iha liur, maibe servisu iha liur mos desizaun iha nafatin rai laran, tanba nee agora rai independente ona laiha problema, hanoin lideransa sira iha boa fe nafatin atu bele tur hamutuk rejolve problema ida nee.

Iha fatin hanesan Prezidente Partidu Demokratiku Mariano Assanami Sabino hateten, nia apresia ba Uniaun Europea nia partisipasaun ba iha prosesu demokratiku eleisaun. Tanba bainhira Timor luta ba ukun rasik aan mos bolu membru nasaun balu. 

Carme Ximenes/Maria Lay | Suara Timor Lorosae

GMN TV | Jornal Nacional

GMN TV

Alemaña halo komitmentu foun ho montante 7.45 Milloins Euros ba Timor-Leste

Komunikadu Imprensa

Kooperasaun Husi Alemaña

Señora Jutta Kranz-Plote, Xefe Divizaun ba Assuntus Pulítikus no Kooperasaun, husi Ministériu Kooperasaun Ekonómika no Dezenvolvimentu Alemaña nian remata nia vizita loron-lima iha Timor liu husi enkontru ida ho Sua Eselénsia Ministru Negósius Estranjeirus Timor-Leste nian, Doutor Aurélio Guterres iha ninia servisu fatin iha Segunda-Feira dia 20 de Novembru.  

Iha ninia enkontru ho Señor Ministru Aurélio, reprezentante Governu Alemaña  ne’e mos entrega hotu Nota Verbal ida ba Doutor Aurélio kona ba komitmentu foun husi Kooperasaun Alemaña nian ba Timor ho montante 7.45 Milloins Euros.

Durante sorumutuk ne’e Señora Kranz-Plote hateten katak “Alemaña louva tebes saida maka Timor-Leste konsege atinji ona iha ninia esforsu tomak ba dezenvolvimentu no Alemaña prontu nafatin hodi servisu hamutuk ho Timor-Leste atu kontribui liu-tan ba proseseu dezenvolvimentu ne’e rasik”.

Iha parte seluk, Doutor Aurélio mos subliña “importansia husi kooperasaun Alemaña nian ba dezenvolvimentu iha rai-laran” no realsa katak “komitmentu ne’ebé maka fó sei reforsa liu-tan relasaun bilateral ne’ebé maka eziste entre nasaun rua”.

Alein de enkontru ho Ministru Negósius Estranjeirus no Kooperasaun, Señora Kranz-Plote mos halao diálogu ho Ministérius relevantes hirak ne’ebé maka koopera besik ho Alemaña liu husi sorumutuk ida-idak ho Sua Eselénsia Ministru Agrikultura no Peskas, Enjeñeiru Estanislau da Silva, Sua Eselénsia Vise-Ministru Transporte no Komunikasaun, Enjeñeiru Inásiu Moreira no Sua Eselénsia Sekretariu Estadu ba Juventude no Traballu Doutor Nívio Magalhães.

Alein de halo enkontrus iha nível pulítiku, durante vizita ne’e, delegasaun husi Alemaña ne’e mos halao  viajen ba distritus   sira hodi haré rasik, projetus sira ne’ebé maka durante ne’e Alemaña halo iha terrenu liu husi GIZ, hanesan plantasaun kakau iha Natarbora, Adaptasaun ba Mudansa Klimátika no Klinika Saude nian iha Baukau nomós atividade promosaun no kapasitasaun ba juventude sira iha Vikeke. 

Timor-oan Tenke Hakruk Ba Eroi Sira

DILI, (TATOLI) – Fundadór Nasaun Timor-Leste, José Ramos Horta, hato’o mensajen ba povu tomak katak Timor-oan tenke hakruk ba eroi sira tanba sira nia sakrifísiu mak determina ba ukun rasik-án.

Relasiona ho proklamasaun independénsia 28 Novembru ba dala 42 ne’ebé sei selebra iha Suai, atuál Ministru Estadu Konselleiru Seguransa Nasionál, ba jornalista sira iha Palásiu Governu ohin, katak eroi sira nia sakrifísiu mak ohin loron Nasaun ukun rasik-án no Timor-Leste bele ko’alia krize polítika ida tanba iha demokrásia, se demokrásia mak la iha, la iha krize polítika.

Entretantu, tinan 40 resin ona, hahú luta iha tempu portugés kedas maibé komesa mehi hodi hanoin ba ukun-án.

Diplomata seniór ne’e haktuir uluk Nicolau Lobato, Marí Alkatiri no joven barak esperiénsia la iha liu maibé hahú mehi ba ukun-án.

Momentu ne’eba ema barak hateten ba ami dehan mehi ne’e ikus no lalika mehi tanba imi sei la hetan independénsia, konta Horta.

Kontamina Formalin, Bakso Jumbo Fatuhada Taka Provizóriu

DILI, (TATOLI) – Autoridade Inspesaun no Fiskalizasaun ba Atividade Ekonómika no Sanitária (AIFAESA) hatún despaixu hodi taka provizóriu restaurante (warung–read),  Bakso Jumbo iha Fatuhada  tanba ai-han hanesan mie ayam (iha lian indonézia) kontaminadu ho formalin.

Koordenadór AIFAESA, Abílio Oliveira Sereno, hatete servisu AIFAESA nian bainhira halo inspesaun iha fatin ne’e no foti amostra mie ayam hodi submete ba laboratóriu no rezulta katak iha formalin.

“Aleinde formalin situasaun ijiene ladi’ak no fatin ne’e entidade ne’ebé fó lisensa para loke buat rua mak lisensa fa’an mina-morin no restaurante, ne’e labele, nia tenke hili ida. Hakarak estabelesimentu atu fa’an de’it perfume ou restaurante, ne’e situasaun ida ne’ebé ami foti para hodi hanorin operadór ekonómiku sira atubele aprende no labele kontinua halo tan”, Abílio hatete bainhira ekipa bá taka estabelesimentu ne’ebé ema sempre vizita barak ne’e iha Fatuhada, ohin.

Nune’e koodenadór foti desizaun tuir lei no fó tempu fulan tolu atu hadi’a estabelesimentu ne’e no na’in ba empreza tenke bá ko’alia ho entidade sira atu loke de’it restaurante ka fa’an perfume.

FRETILIN preokupa estratejia polítika lider AMP "CNRT konsidera ne’e normal"

Prezidenti bankada FRETILIN, Francisco Branco, preokupa, ho estratejia polítika husi líder partidu CNRT, PLP, no KHUNTO, ne’ebé hala’o konferensia imprensa iha rai liur Singapura hodi hametin no ofisializa ezistensia Aliansa Maioria Parlamentar (AMP).

Tuir Branco, laiha lójika, bainhira nasaun ne’e la’o hakmatek ba ko’alia polítika ka kestoens nasionál iha ema nia nasaun.

“Hau ladun kontente, kuandu ko’alia problema nasionál iha ema nia rain, nusa mak lako’alia iha ita nia rain, laiha lójika, tanba nasaun ne’e hakmatek hela,”hateten Prezidenti bankada FRETILIN, Francisco Branco ba jornalista iha Parlamentu, Kuarta(22/11/2017).

Líder bankada FRETILIN ne’e subliña, polítika atual ne’ebé líder bo’ot sira agora dadaun halo, sei la rai eransa polítika diak ba jerasaun foun iha poresu konstrusaun Estadu.

Misaun Polísia Mak Halo Seguransa

DILI, (TATOLI) – Komandante Jerál Polísia Nasionál Timor-Leste (PNTL), Komisáriu Júlio da Costa Hornay, hateten PNTL nia misaun atu halo seguransa la’ós halo polítika.

Júlio hato’o kestaun ne’e ba jornalista sira iha Palásiu Prezidente Nicolau Lobato, Bairru Pité, Dili, kinta ne’e.

Hornay esplika PNTL nia misaun iha Konstituisaun, Lei Orgánika PNTL no Regulamentu Disiplinár ko’alia klaru ona katak PNTL nia dever maka asegura pás no estabilidade iha rai laran.

“Ami mantein ka firmeza ba ami nia misaun. Tan ne’e, ami prontu asegura estabilidade no pás iha rai laran. Kestaun polítika ami la mete. Kestaun polítika ne’e polítiku sira nian ka maun-boot sira nian. Sira hatene oinsá atu rezolve kestaun polítika ninian iha ita nia rai laran”, afirma.

Kualker situasaun ne’ebé akontese iha teritóriu Timor laran tomak, forsa seguransa koordenadu ho defeza prontidaun atu halo prevensaun no atuasaun.

“La’ós mosu tiha problema maka halo prevensaun. Ami halo atividade patrollamentu la’o ain, kareta no halo sosializasaun liuhusi Ofisiál Polísia Suku iha suku, Eskuadra no iha munisípiu sira. Tanba ne’e, bainhira mosu konflitu, ami sei atua”, katak tan.

Jornalista: Xisto Freitas | Editora: Rita Almeida

Foto: Komandante Jerál Polísia Nasionál Timor-Leste (PNTL), Komisáriu Júlio da Costa Hornay. FOTO MEDIA PR

Opozisaun ho sosiedade sivil timoroan kritika deklarasaun hosi ministru kona-ba forsa seguransa

Partidu prinsipal sira hosi opozisaun ho organizasaun sira hosi sosiedade sivil timoroan kritika, iha loron-kinta ne'e, komentáriu sira hosi ministru Defeza ho Seguransa ne'ebé sira akuza katak tenta politiza forsa sira seguransa nasaun nian, iha momentu ida ho tensaun polítika maka'as.

Iha kauza maka deklarasaun sira ne'ebé José Somotxo halo iha loron-tersa ba jornalista sira hafoin hasoru malu ho Prezidente Repúblika, Francisco Guterres Lu-Olo. "Bainhira akontese problema boot iha ita nia nasaun tanba situasaun polítika, militar sira ho polísia sei la halo intervensaun, hodi nune'e membru na'in 35 sira hosi Parlamentu [opozisaun] sira rasik bele rezolve asuntu sira", nia afirma.

Komentáriu sira ne'e hetan ona krítika, iha loron-kinta ne'e, hosi Congresso Nacional da Reconstrução Timorense (CNRT), partidu boot opozisaun nian, ne'ebé iha komentáriu badak ida ne'ebé publika iha iha nia pájina Facebook hodi konsidera katak ministru "la entende nia kompeténsia sira no nia responsabilidade sira".