Prezidente Lú-Olo Preokupa Krime Organizadu-Tráfiku Úmanu

DILI, (TATOLI) – Ministru Interior, Longuinhos Monteiro hatete Prezidente Repúblika, Francisco Guterres Lú-Olo preokupa ho krime organizadu nomos tráfiku úmanu tanba bele buras bainhira autoridade seguransa la-kontrola ema estranjeiru sira nian movimentu tama sai rai laran.

“Prezidente husu atu halo fiskalizasaun ba sidadaun estranjeiru sira tenke efektivu liu tan para ita bele kontrola ida másimu, li-liu karik ba potensia de organizadu, trafiku pessoa iha ita nia rai”, dehan ministru ne’e ba jornalista sira hafoin hasoru malu ho Xefe Estadu iha Palásiu Prezidensiál, ohin.

Atu evita  ezisténsia grupu organizadu no tráfiku úmanu ho krime seluk maka polísia imigrasaun durante ne’e kontinua halo operasaun ba sidadaun estrangeiru ne’ebé estadia iha rai laran.

“Ne’e mak ita halo operasaun ida sidadaun estranjeiru sira iha ita nia rai”, tenik. Em jerál, Xefe Estadu apresia servisu ministériu interior ho ninia diresaun sira hanesan PNTL, Polísia Migrasaun no seluktan.

Asegura Seguransa iha Eleisaun Parlamentár

Hasoru malu ne’e, Xefe Estadu husu ba parte PNTL atu hametin seguransa durante kampaña to’o eleisaun.

“Prezidente Repúblika husu polísia atu iha ninia planu de operasaun tenke firme, rigorozu tau matan para bele garante festa demokrasia la’o ho di’ak”, dehan Longuinhos Monteiro.

Iha fatin hanesan, Komandante PNTL, Komisáriu Júlio Hornay hateten PNTL no Falintil-FDTL sei asegura seguransa durante kampaña to’o eleisaun atu povu bele vota ho livre.

Komadante ne’e hatutan sei koloka membru sira hodi fó seguransa durante kampaña to’o eleisaun remata.

Dadaun ne’e partidu 23 maka rejistu ona iha Tribunál Rekursu.

Jornalista: Agapito dos Santos | Editora: Rita Almeida

NOTÍCIAS RTTL | ÀS 20 HORAS TL | TELEJORNAL - HOJE E TODOS OS DIAS

Incluído e atualizado permanentemente às 12 e às 20 horas TL, na barra lateral do Timor Agora. Emissão em direto com notícias em tetum e em português, passando posteriormente a diferido, oferecendo sempre a possibilidade de se informar via RTTL.

Acompanhe na RTTL a atualidade timorense. Aceda à barra lateral do TA e regule a dimensão de ecrã.

NOTÍCIAS EM TÉTUM E DEPOIS EM PORTUGUÊS

Kualidade Edukasaun Sei Muda Salariu Minimu

DILI - Vise Ministru Edukasaun (ME) Abel Ximenes dehan tambasa maka salariu minimu akontese iha Timor diferente makas liu ho nasaun seluk, ida nee tamba kualidade edukasaun maka sei muda salariu minimu.

Timor Leste restaura ona nia indepedensia tinan 15 nia laran maibe kuandu hare ba kotuk iha buat balun neebe lao, iha balun mos nebe ladun lao. Maibe tambasa maka Timor nia salariu minimu liu nasaun sira seluk, hanesan Indonezia, Portugal, no Korea, ida nee tamba hare ba kualidade edukasaun maka sei muda salariu minimu iha Timor Leste,” dehan Abel Ximenes liu husi nia deskursu iha inagurasaun Sentru Rekursu ba edukasaun Inkluzivu neebe halao iha Taibesi Has-Laran Dili, Kuarta (7/6/2017).

 Nia hatutan katak, povu Koreanu iha dejenvolvimentu ekonomia nebe boot no as tebes. Salariu minimu 2600.000, Portugal 600 Euro no Indonezia Rp. 2.400 maibe iha Timor salariu minimu $ 1.15. Povu Timor mos iha liman, ain rua. Labele fo sala ba ema idak-idak nia fiar no fo sala mos ba maromak.

Diretor Koica iha Timor Leste Park Keysoo dehan tempu nee sai hanesan onra ida ba nia atu partisipa iha programa inagurasaun sentru rekursu ba edukasaun inkluzivu iha Timor. Tamba nee parte Koica nian fo apoiu ema volontariu hamutuk nain 35 nebe servisu iha areia oin-oin atu hare ba edukasaun nian. Justinho Manuel

Suara Timor Lorosae

NOTÍCIAS RTTL | ÀS 12 HORAS TL - HOJE E TODOS OS DIAS

Incluído e atualizado permanentemente na barra lateral do Timor Agora. Emissão em direto com notícias em tetum e em português, passando posteriormente a diferido.

Acompanhe na RTTL a atualidade timorense. Aceda à barra lateral do TA e regule a dimensão de ecrã.

Parpol 23 Asina Paktu Unidade Nasional Garante Estabilidade

DILI – Partidu Politik (Parpol) neebe rejista iha Tribunal Rekursu (TR), konsege asina ona paktu unidade nasional ho objetivu atu garante paz no estabilidade iha Eleisaun Parlamentar 2017.

Iha eventu nee organiza husi Ministeriu Interior hamutuk ho Rede Nasional ba Prevensaun Konflitu (RNPK). Partisipa husi partidu politiku hamutuk 23 hanesan ASDT, BUP, CNRT, CASDT, FRETILIN, FRENTI-MUDANSA, KHUNTO, PD, PDN,PEP, PLP, PST, PUDD, UDT, PSD, UNDERTIM, PDL, APMT, PTD, PR, MLPM, PDP, Asosiasaun Popular.

Hetan partisipasaun mos husi Komisaun Nasional Eleisaun (CNE), sosiedade sivil, relijiozu, PNTL no mos korpus diplomatiku sira balun mak oras nee iha Timor Leste.

Iha biban nee, Ministeriu Interior (MI), Longuinhos Monteiro hatete, eleisaun parlamentar besik ona, potensialidade konflitu sei makas, tanba nee partidu politik iha obrigasaun atu garante estabilidade nasional.

Paz no estabilidade nasional importante, partidu politiku tenke garante iha eleisaun parlamentar,” dehan Longuinhos liu husi diskursu iha abertura serimonia enkontru entre partidu politiku sira iha salaun MNEK, Pantai Kelapa-Dili, Kuarta (07/06/2017).

Longuinhos haktuir, estabilidade nasional laos responsabilidade deit, iha seguransa nia liman, maibe iha sidadaun hothotu nia liman inklui partidu politiku sira.

Iha fatin hanesan, Prezidente Komisaun Organizador, Martinho Bragança hatete, tema jeral ba sorumutu nee mak muda o nia fuan, muda Timor, subtema mak prevensaun violensia eleitoral. Raimundo S. Fraga

Suara Timor Lorosae

Lista Antigu Domina, Demokrasia Partidu Laran Mate

DILI – Lista kandidatura neebe mak partidu politiku sira aprezenta ba Tribunal Rekursu, partidu balun domina nafatin husi lista antigu. Sosiedade sivil konsidera demokrasia iha partidu laran mate.

Tuir Reprezentante Programa Oficer AJAR, Inocencio Xavier katak, ho lista kandidatura neebe mak iha nafatin domina husi lista antigu sira, ida nee hatudu momos katak demokrasia partidu lalao.

Lista kandidatura nafatin domina, pontu devista ema seluk katak, demokrasia no kaderizasaun laiha ka mate,” dehan Inocencio ba jornalista sira iha MNEK, Pantai Kelapa-Dili, Kuarta (07/06/2017).

Inocencio salenta, partidu politik hanesan instrument politik ba demokrasia neebe promove demokrasia iha partidu nia laran, labele deputadu sira neebe durante tinan 15 nia mandatu sira nafatin deit, nee labele.

Iha fatin ketak, Deputadu Bankada CNRT, Arao Noe dehan, husi parte partidu CNRT nian katak, antigun nafatin domina iha lista kandidatura tanba hakarak defende memoris institusional.

Entertantu, Observador Politika-UNTL, Camilio Ximenes Almeida dehan, lista antigun nafatin domina ida nee hatudu katak partidu sira lahalo kaderizasaun ba rekursu neebe mak partidu nian iha. Raimundo Sarmento Fraga

Suara Timor Lorosae

Parlamentu Hahú Diskute Lei Protesaun ba Labarik hosi Tráfiku Úmanu

DILI, (TATOLI) – Parlamentu Nasionál (PN), ohin aprova jeneralidade ba proposta lei kona-ba proteje labarik hosi risku tráfiku úmanu, esforsu ne’e komisaun F sei tenta aselera prosesu diskusaun iha semana ne’e hodi hetan aprovasaun finál globál.

“Ami sei esforsu atu finaliza iha semana ida ne’e bele tama iha espesialidade no semana oin haruka ba plenária atu aprova finál globálʺ, dehan deputada Ilda Maria da Conceição.

Deputada Komisaun F PN hateten lei ne’e aprezenta husi Ministériu Solidaridade Sosiál (MSS) ho artigu 83 hodi proteje direitu labarik hodi partisipa ba prosesu dezenvolvimentu.

“Artigu sira ne’e defini ona kna’ar ida-idak nian hanesan familia, komunidade no Estadu oinsá atu tau matan ba labarik sira hodi proteje direitu labarik siraʺ, dehan nia ba ajénsia Tatoli iha uma fukun.

Tuir nia, labarik barak sai vítima ba atitivdade tráfiku úmanu, ho lei ne’e mós tribunál no ministériu públiku sei kriminaliza autór sira ne’ebé uza labarik hodi hetan osan.

“Lei ne’e defini hotu buat hirak ne’e, atu ema labele uza labarik inosente sai objetu para hetan osanʺ, afirma deputada hosi bankada FRETILIN ne’e.

Entretantu, Nasaun ne’e hahú iha  2013 adopta konvensaun direitu labarik ne’ebé Nasoens Unidas adopta  iha 1989 hodi fó protesaun ba labarik.

Jornalista: Agapito dos Santos | Editora: Rita Almeida

PADRE JOSÉ CARLOS SIMPLÍCIO – Misionáriu hosi Açores iha Timor-Leste

PORTO (TATOLI)–Neneik Uma-Kreda iha Timor-Leste lakon nia misionáriu sira ne’ebé serbisu iha tempu malae mutin portugés ukun Timor.

Ita nia rai, iha de’it amo lulik rai-na’in hahú 1936, ho padre Jorge de Barros Duarte (inan ema Same), no padre Martinho da Costa Lopes (laleia) no padre Jacob Ximenes (Laleia), iha tinan 1947.

Padre José Carlos Simplício nia moris iha illa, naran Pico, iha loron 4 fulan agostu 1937. Sei moris karik, loron haat fulan agostu mai ne’e, sei halo tinan 80. Nia to’o iha Timor Portugés iha tinan 1965. Serbisu iha Lecidere, hanesan Sekretáriu amo Bispo Dom Jaime Garcia Goulart nian. Iha loron 18 fulan janeiru tinan 1966, Dioseze Dili, halo tinan 25. Iha tinan ne’ebá amo Bispo hafoun revista SEARA, ne’ebé hahú publika iha 1949. Fou-foun sai hanesan revista, no fulan ida, sai dala ida; ikus mai, fulan rua ka fulan tolu sai dala ida. Iha tina 1964 no 1965, la publika.

Iha tinan 1966, SEARA nafilak ba jornal semanal. Diretór mak Padre António Jacinto de Campos; xefi redasaun mak Padre José Carlos Simplício. Iha loron 1 fulan fevereiro tinan 1967, nia sai Diretór, hodi ka’er jornal to’o 1968.

Kódigu Sivíl Artigu 1475 Rekuñese Kazamentu Sivíl Hosi Relijiaun Seluk

DILI, (TATOLI) – Primeiru Ministru, Rui Maria de Araújo hateten lei kódigu sivíl artigu 1475 kona-ba kazamentu sivíl, katóliku tradisionál no monogamia rekuñese kazamentu husi relijiaun seluk hanesan protestante, islámiku, hindu no budha.

Líder governu hato’o asuntu ne’e relasiona ho preokupasaun relijiaun seluk ba kódigu sivíl ne’ebé konsidera diskrimina sira.

“Durante ida ne’e ita nia servisu notariadu halo interpretasaun sala, tanba ne’e nu’udar xefe governu halo ona por eskritu ba ministériu justisa atu kurize”, esplika Xefe Governu ne’e hafoin simu preokupasaun hosi Prezidente Repúblika, Francisco Guterres Lú-Olo iha Palásiu Governu, ohin.

Nia hatutan: “Ha’u aproveita oportunidade hato’o ba públiku katak sertidaun kazamentu la’ós katóliku, bele ba servisu notariadu hodi rejista atu sai dokumentu ofisiál”.

Artigu balun husi kódigu sivíl ne’e rekoñese konvensoen husi relijiaun seluk atu rejistu iha servisu notariadu.

“Iha intrepretasaun ne’ebé sala ba kódigu sivíl, iha kódigu sivíl hateten kazamentu ne’ebé rekoñesidu husi pontu de vista sivíl kazamentu katóliku ou kazamentu barlakiadu, ne’e la signifika katak kazamentu husi konvensoen seluk labele rekoñese, tanba kódigu sivíl iha artigu balun hateten husi konvensaun seluk bele rejista atu sira nia sertidaun ne’e rekoñese ofisialmente”, katak.

Jornalista: Agapito dos Santos | Editora: Rita Almeida

Foto: Xefe Governu hato'o votu selebrasaun kmanek loron Eid Al-Fitr ba komunidade musulmanu iha Timor-Leste. Foto dokumentasaun GPM

Refleksaun Badak. Hakarak hatan no kombate propaganda ka issu sira nebe mak iha

Konis Maubere, opiniaun

Tuir Borza Da Costa dehan nune nundar maubere oan tenke fo tulun nia maluk maubere sira tuir saida deit mak nia iha.

Komadante Nicolau Lobato fo hanoin mai ita katak, kritika no auto-kritika atu kurizi hodi bele sai forca liu tan.

Ita quando atu halo kritika tenke ho fuan no laran, no mos tenke iha Ciencia basiku no referencia hodi sai sasukat ba ita nia kritika nebe atu halo kurizi ba ema ka entidades sira inclui mos partidos politikos nia sistema.

Fretilin komesa hatudu ona liu husi ninia natureza Frentista ho ninia prinsipio camaradazen no esperito Revolucionario hodi hametin Democracia no kuda Democracia iha rain ida ne. Hakarak hatene lolos prosesu democracia iha Fretilin nia laran " mai ita hamutuk hodi bele hatene no dezemvolve diak liu tan. Se ita iha liur deit dala ruma persepsaun deit.

Agora konaba prosesu nivel partidu no quase mai husi sistema confecial Democratico nebe eziste iha mundu tomak nebe ema hakarak aplika ba nia instituisaun ka ita nia partido.

Enquanto Fretilin atu sai Lideranca ka quadros ba partido liu husi Conferencia, Aldeia, Sucu, Sub-Distrito, Distrito to'o Nasional.

Kongresso mak orgaun ida nebe mak as liu iha Fretilin nia laran , katak ita tenke tuir prosesu legal.

Ne'e laos fahe ba malu deit hanesan partido seluk halo ida ne'e sistema ladiak.

Ita iha estatutu , iha regimento no regulamento , estatutu mos fo dalan atu militante sira se deit maka iha kapacidade, hatene servisu no prense kriteria nebe mak regulamentu no estatutu haruka nia bele bele tama. ita fahe deit ba malu ita kontra ita nia estatutu no kontra Lei.

Lere: Forsa PNTL Laos Bulak Tiru Ema Arbiru

DILI – Xefe Estadu Maior Jeneral Falintil Forsa Defeza Timor-Leste (F-FDTL) Maijor Jeneral Lere Anan Timur konsidera Forsa ho PNTL laos ema bulak neebe maka bele tiru ema arbiru, maibe tiru nee bazeia ba lejitimu defeza.

Forsa no PNTL Tiru neee ema ida la bandu oho ema ida mais la bandu baku ema, nee lei labandu nia ema ida mos la bandu, bandu so kuandu nia nee la tuir regra,” dehan Maior Jeneral F-FDTL, Maijor Jeneral Lere Anan Timur hafoin remata enkontru semanal ho Prezidente Republika Francisco Guterres Lu-Olo, iha Palasiu Presidensial Aitarak Laran, Kuarta (7/6/2017).

Xefe Estadu Maior Jeneral F-FDTL nee mos hatutan bai-bain ba kestaun nee parlamentu hakilar hela deit, dehan komandu maka laiha kapasidade tenke troka nia lideransa.

Nia dehan nia sempre koalia ba Militar sira labele tauk se enkuantu kumpri orden kuandu iha buat balun maka sei responsabliza. Natalino T.da Costa

Suara Timor Lorosae

Lere Alerta Lider Parpol Sukat Liafuan iha Elpar

DILI – Xefe Estadu Maior Jeneral Falintil Forsa Defeza Timor-Leste (F-FDTL) Maijor Jeneral Lere Anan Timur alerta ba lideransa partidu politiku hotu, tenke suskat liafuan iha eleisaun parlamentar neebe maka mai, atu nunee labele fo impaktu ba sosiadade iha eleisaun parlamentar.

Apelu nee Maijor Jeneral Lere Anan Timur hatoo ba jornalista sira hafoin remata enkontru semenal ho Prezidente Republika Francisco Guterres Lu-Olo, iha Palasiu Presidensial Aitarak Laran, Kuarta (7/6/2017).

Ita nian lider sira tenke trava sira nian liafuan sira neebe maka iha elisaun parlamentar hodi nunee labele fo impaktu ba iha eleisaun, tamba ita hatene katak eleisaun parlamentar nee nudar momentu neebe krusial tebes ba povu Timor-Leste, alem ida nee Timor-Leste mos foin maka primeira vez organiza eleisaun nee, tamba nee presiza lider sira tenke sukat liafuan iha eleisaun parlamentar, nunee perante periodu eleisaun bele lao diak no susesu,” dehan Lere.

Maijor Jeneral Lere husu lider partidu labele hatun malu iha eleisaun parlamentar liu husi kampania ho liafuan sira neebe lakonduz ho relidade, maibe iha kampania partidaria nee oinsa maka lider partidu politiku sira bele koalia progama politika sira.

Lere dehan ba forsa rasik numeru seidauk sufisiente, maibe ida nee nia parte garantia sei fo susesu ba eleisaun nee no husi forsa enjeneria no forsa infantaria. Natalino T.da Costa

Suara Timor Lorosae

Provoka Situasaun, Arao: “Joven Tenke Sente Timor Ita Nian”

DILI – Oras nee ema balu komesa provoka situasaun, tanba nee Deputadu iha parlamentu nasional husu joven sira tenke sente nasaun nee sira nian hodi labele hamosu dezastabilidade.

Kestaun nee hatoo husi Deputadu CNRT Arao Noe hatete, ho akontesementu sira hanesan nee bele mos iha intensaun balu husi liur atu dezastabiliza situasaun, tanba nee husu ba polisia sira tenke pro-ativu.

Aleinde nee intelijensia polisia no F-FDTL nian atu ativu hodi identifika ema kriminozu sira atu nunee labele dezastabiliza situasaun iha nasaun nee. Neebe seguransa sira tenke asegura situasaun sira atu nunee povu sira bele halao eleisaun parlamentar ho hakmatek.

Hau husu ba joven sira tenke sente estadu nee ita nia, hodi labele hanoin atu estraga situasaun iha rai laran. Tanba haree ba krize 2006 too 2008 Timor oan hotu sente, se mak hela iha kalen okos, se mak uma ema sunu, maibe nee laos ema rai liur mak halo Timor oan sira mak halo ba malu,” katak Deputadu Arao ba STL Kuarta (07/06/2017) iha Parlamentu Nasional.

Entretantu Deputadu Bancada PD Virgilio Hornai, husu mos ba joven sira atu kria estabilidade iha bairu neebe mak hela ba, atu nunee labele inpoin fali situasaun ida lahakmatek ba komunidade sira iha bairu-bairu.

Iha parte seluk, Deputada husi komisaun B Ana Ribeiro da Conceicao hatete, sira sempre bolu atensaun bei-beik ba iha parte seguransa, halo patrolia bei-beik, mezmu iha tempu kalan no loron tenke marka nafatin prezensa, liu-liu fatin sira neebe mak risku ba problema. Guilhermina Franco

Suara Timor Lorosae

Elpar Fretilin Sei Investe Rekursu Espesifiku Ba Fiskais

SAME – Fiskais mak sai fator determinante ba Eleisaun, tanba nee partidu Fretilin sei investe barak liu ba rekursu umanus no rekursu finanseiru kualifikadus, iha Eleisaun Parlamentar (Elpar) neebe sei akontese iha Jullu mai.

Tuir Vice Prezidente Partidu Fretilin Francisco Miranda Branco hatete, haree ba eleisaun prezidensial neebe mak liu ona, nee fokus liu ba iha enerjia kampana massa, tanba nee agora atu tama ba Elpar sei uza estratejia foun atu nunee lori povu sir aba vota ba Fretilin hodi ukun.

Estratejia neebe mak sei halao ba oin iha Elpar, nee mak muda ona stretejia, tanba bain-bain fokus liu ba enerjia tomak iha kamapana massa, maibe haree ba rezultadu ikus-ikus nee, partidu sente katak ita uza fila fali stratejia foun, hanesan stratejia kampana door to door, neebe partidu sei investe barak liu rekursu umanus, no rekursu finanseirus kualifikadus,” katak Branco, ba STL Domingu Semana Kotuk, iha postu Administrativu Same, munisipiu Manufahi.

Vice prezidente partidu nee sujere rekrutamentu fiskais mai husi joventude Fretilin, no OPMT atu halo servisu ida nee, tanba nee sei iha rekursu espesifiku ba sira. Tanba hatene katak prosesu eleisaun nee fator determinante mak fiskais sira.

Iha fatin hanesan, Antoninho Sarmento hanesan Vice Koordenador Komisaun Politika Munisipiu Manufahi hatete, ohin nee strutura kompletu husi Nivel munisipiu, postu administrativu, same nian hamutuk ho nia obejetivu atu halo reuniaun konsolidasaun atu hodi haree organizasaun filiada sira, no organizasaun tekniku sira neebe afilia ba Fretilin para atu halo servisu makas ba eleisaun leijislativa neebe mak sei akontese iha dia 22 de Jullu. Guilhermina Franco

Suara Timor Lorosae