ME Sei Selu Retroativu Rejime Espesiál Ba Profesór Sira

DILI, (TATOLI) – Ministra Edukasaun Juventude no Desportu, Dulce de Jesus Soares, hateten ministériu sei halo pagamentu retroativu ba profesór rihun haat resin ne’ebé kompleta ona formasaun mínimu baxarelatu hodi enkaixa  ba  rejime espesiál iha 2014.

ME sei selu retroativu komesa 2014 to’o 2018 ho orsamentu milliaun dolar amerikanu tolu resin hosi  OJE 2018.

Dulce dehan komesa 2014 ministériu ne’e hatama ona iha planu orsamentu anuál maibé la hetan aprovasaun hosi parlamentu.

ʺProfesór sira ne’e ita diretu atu hetan hotu retroativu, tanba ne’e iha oitavu governu sai prioridade importante ba ministériu edukasaun selu profesór sira nia progresaun eskalaun nomós retroativu hosi rejime tranzitóriu ba rejime espesiálʺ, hateten ba jornalista sira iha uma fukun Parlamentu Nasionál, ohin.

Alende ne’e sei selu mós profesór rihun ida resin ne’ebé hetan ona mudansa eskalaun.

ʺTotál OJE ba ministériu edukasaun hosi janeiru to’o dezembru sesenta sete milloen maibé hosi janeiru to’o jullu uza ona provolta miliaun haat nulu resin no restu ne’e ita sei uza to’o fin anuʺ, subliña.

Hosi OJE 2018, ministériu ne’e sei uza hodi selu saláriu no vensimentu, bens servisu, divida ba projetu konstrusaun eskola no moru eskola, pagamentu ba saláriu profesór portugés, manutensaun kareta no seluk tan.

Jornalista: Agapito dos Santos | Editora: Rita Almeida

Imajen: Ministra Edukasaun Juventude no Desportu, Dulce de Jesus Soares.

Projetu Kategoria Emerjénsia Loloos Prevee Antes

DILI, (TATOLI) – Analista hosi Core Group Transparency Timor-Leste (CGT-TL), Juvinal Diaz, hateten projetu sira ne’ebé kategoriza nu’udar emerjénsia ne’e loloos bele prevee hela antes, ka loloos labele konsidera nu’udar kategoria “necessidades urgentes e imprevistas” hanesan deskreve iha artigu 37 hosi Lei Orsamentu no Jestaun Finanseiru.

Tuir nia bainhira Governu labele kontrola ona nia despeza sira ne’e tuir regra loloos ba kategoria sira ne’ebé iha, Timor-Leste sei lakon valór osan barak tan, tanba gasta osan lahó avaliasaun sira ne’ebé transparente no kontável.

“Dalan ida ne’ebé prudente liu ba parlamentu atu halo molok aprova osan ba selu projetu sira ne’e maka tenke halo verifikasaun ba projetu sira ne’e hodi hatene merese ka la’e projetu ne’ebé implementa ona ne’e tama kategoria necessidades urgentes e imprevistas, nune’e ita bele salva povu nia osan ka uza osan povu nian atu fó benefísiu duni ba povu sira duké benefisia ema elite no kompañia na’in sira de’it,” dehan Juvinal liuhusi ninia pontu devista ne’ebé Ajénsia Tatoli asesu iha nia kna’ar fatin, Fatumeta, sesta ne’e.

Nia hatutan avaliasaun ida ne’ebé kle’an ba projetu sira ne’e sei asegura kualidade despeza sira, espesialmente iha tinan oin mai kuandu Governu prepara hela atu aloka tan maizumenus millaun $278.3 hodi ba selu projetu “naun orsamentál” sira ne’e, ne’ebé sei halo orsamentu 2019 iha sa’e ba iha nivel biliaun $1.772.9 no posível bele liu tan.

“Preambulu Lei Fundu Petrolíferu hatuur hela prinsípiu fundamentál ida katak presiza iha planeamentu ne’ebé efisiente no presiza ezekusaun orsamentu Estadu ida ne’ebé loloos nu’udar parte ida hosi boa governasaun ba riku soin petrolíferu”, subliña.

Hanesan deskreve antes, projetu emerjénsia hamutuk 142 ne’ebé Governu ajudika ba kompañia sira iha tinan sira liu-ba, ho valór orsamentu $87.229.633 no iha proposta Orsamentu Jerál Estadu (OJE) 2018 ne’e Governu aloka milliaun $19.079 no milliaun balun tan atu gasta iha tinan sira oin mai, maske nune’e, iha milliaun balun maka gasta ona iha tinan sira pasadu.

Jornalista: Xisto Freitas | Editora: Rita Almeida

Imajen: Analista hosi Core Group Transparency (CGT), Juvinal Diaz

TDD Menus Ona Juiz Nain Rua

DILI - Tribunal Distrital Dili (TDD) menus ona Juiz nain rua, tanba atu halao servisu iha Tribunal Rekursu.

Tuir Juiz Administrador Tribunal Distrital Dili, Jose Maria katak, depois de deliberasaun husi konselu nian, deside hodi muda ona Juis nain rua, husi Tribunal Distrital Dili, ba apoiu servisu iha Tribunal De Rekursu.

Depois de deliberasaun konselu nian, hodi kolega nain rua durante nee halo servisu iha Tribunal Distrital Dili, muda no ba fali halao servisu iha Tribunal Rekursu, entaun klaru iha nee TDD menus tan Juis nain rua, “dehan Juis Administrador Ba STL iha nia knar fatin TDD Kinta, (29/08/2018).

Juis Administrador nee hatutan, juiz nain rua neebe mak muda ba Tribunal Rekursu hanesan, Juiza  Jacinta da Costa Correa no Juis Duarte Tilman.

Antes nee iha Juiz nain sanulu resin neen mak halao servisu iha TDD, depois Juis Antonino Gonçalves mos muda tiha ba iha Sentru Formasaun Juridiku hanesan Direktor, no agora Juis nain rua ba apoiu tiha servisu iha Tribunal Rekursu, entaun Juis iha TDD hela deit, nain sanulu resin tolu.

Iha fatin ketak, Prezidente Majislatura Judisial Timor Leste, Antonino Gonçalves hateten, presija Juiz kualidade ba iha Tribunal Rekursu, tanba sira iha neeba deside fali desizaun husi kolega Juis sira nian. 

Notisia kompletu lee iha jornal STL edisaun Segunda (3/09/2018)

Terezinha De Deus | Suara Timor Lorosae

Opozisaun Duvida ho Dívida Ba Projetu 142

DILI: Partidu opozisaun iha Uma Fukun Parlamentu Nasionál duvida makaas deve boot ne'ebé governu halo. Ne'e duni, husu atu esklarese projetu hamutuk 142 ne’ebé hamosu dívida boot ba Governu.

Vise-Prezidente Bankada Partidu Demokrátiku (PD) Adriano do Nascimento hatete, nasaun presiza duni osan atu halo dezenvolvimentu nasionál liu husi investimentu públiku, atu bele garante sirkulasaun osan iha baze hodi povu sira bele hetan benefísiu ba moris.

Nia dehan, polítika orsamentál governu nian ne’ebé propoin atu foti osan hodi selu tusan ne’e sei liga ba prosesu aprovizionamentu. Tanba ne’e, iha buat barak presiza atu diskute ho kle'an tuir regra orsamentál nian.

“Ita hotu hatene iha prosesu kampaña 2017 ho projetu 142 ne’ebé fahe de’it sem aprovasaun husi Parlamentu Nasionál, kualkér orsamentu ba projetu ne’ebé governu atu implementa ne’e tenke tuir korredór aprovasaun orsamentu iha PN”, dehan Adriano, iha Uma Fukun PN, horisehik.

Nia hatete, projetu 142 ne’ebé implementa ona ne’e governu la prevé tanba la tama iha faze planeamentu orsamentu nian, tanba ne’e sei husu ba governu atu esklarese halo didi'ak.

Iha VII Governu, momentu ne'ebá la halo pagamentu tanba halo investigasaun ba projetu hirak ne’e, maibé iha VIII Governu ne’e oinsá sira atu selu ka la selu. Karik atu selu entaun selu projetu ne’ebé.

Adriano hatete, sistema utilizasaun finansas governu PN tenke aprova no Prezidente Repúblika halo promulgasaun hafoin bele implementa projetu, la'ós halo implementa uluk projetu mak ba debate osan no aprova hodi selu emprezáriu implementadór sira.

Nia hatete, pozisaun ne’e sei haree no rona esplikasaun governu nian ba selu dívida ne’e, karik selu projetu ne’ebé ho kontratu ne’e la buat ida.

Jacinto Xavier | independente