PM Rui La aprova Projetu Hari Hospital Andar 5

Tempo Timor : planu Governu hodi hari andar lima  (5) iha  Hospital Nasional Guidu Valadares (HNGV) hetan konselamentu tanba la aprova husi Primeiru Ministru (PM), Rui Maria de Araujo.  

Bazeia ba kanselamentu obra refere, husi Diretor Ezekutivo(HNDV), Jose Antonio Guteres hateten, nia sente triste uituan ba projeitu ne’ebe  seidauk aprova husi PM.  

“Planu Governu nian ho projetu atu halo HNGV Andar lima sei la realiza tanba PM la aprova projetu refere. Hare ba tinan oin laiha konstrusaun, maibe so iha deit rehabilitasaun, ne’ebe projetu konstrusaun foun ne’e laiha, no  andar lima ne’e hein fali tinan seluk mai,” Jose Antonio dehan ba jornalista sira, sigunda (17/08) iha knar fatin HNGV-Dili.

Tuir nia, HNGV presiza aumenta numeru kama, tan ne’e infrastrutura tenke diak no modernu.  Ezemplu de’it  mak hanesan efisiente ne’e pretense ba departamentu sirusia, maibe agora ne’e sirusia nakonu.

Jose relata, iha HNGV la sufsiente  ba enfermaria  sira iha deparametnu hira ne’e,  ne’ebe dala ruma ita hanoin labele tau hamutuk sira  mane no feto, maske  HNGV notifika iha infermaria nain lima maka iha kuatru ida.

Agora daudauk iha ona planu atu muda infermaria sira nia naran, la tau ona infermaria, maibe tau deit Departementu sirusia, ne’e para  bele halo tiha liafuan ida homen ho mulher  sai ida de’it.

Ho  konstrusaun ne’ebe mak husi governu sira la realiza mak agora dadauk sai kestaun  bo’ot ida ba HNGV. Tanba infrestrutura ne’ebe numeru kama menus tebes. 

Entre tantuDiretor Ezekutivu  Hospital Nasional Guidu Valadares (HNGV), Jose Antonio Guteres  esplika,  kona ba kompania KEKUDI ne’ebe mak kaer projeitu rehabilitasaun ba HNGV besik finaliza ona. 

“Hau hare rehabilitasaun  ba HNGV   diak tebes, tanba atinji ona  70% , hau  kontenti. Tanba pelumenus sira hadia‘setin up ruangan’ ne’e ho kapas tebes no hare  ba mos furak loos. Ne’e duni  agora daudaun  iha ona prosesu remata nia laran,” tenik director ne’e.

Jose Antonio afirma, projetu ba rehablitasaun Hospital kontinua lao oras nee daudaun hein deit atu finaliza obra ne’e.  aleinde ne’e  husi Ajensia Dezenvolvimentu Nasional (ADN) mos halao kontrola makas ba obra refere. 

Nune’e mos kona ba  tender ba projeitu ne’e nia ladun hatene, maibe kompania SEKUDI mak ka’er projetu rehablitasaun ba hospital ne’e, no tender ne’ebe halo  husi ADN.

Tuir nia, hanesan diretor, so hare deit ba buat ne’ebe mak iha Hospital  presiza hadia, ne’e duni haruka proposta ba Ministeriu Saude mak enkaminha fali ba ADN. Hafoin ADN sira mai  hare halo levanatamentu, hodi fo tender ba kompania sira. (**)

Tempo Semanal

Governu Hapara Operasaun Hanita, Rui: PNTL Kontinua Buka Membru MM

DILI - VI governu liu husi Konseilu Ministru hapara ona Operasaun Hanita nebe Kompostu husi Membru Falintil Forsa Defeza Timor Leste (F-FDTL) no Polisia Nasional Timor Leste (PNTL), maibe Kontinua buka Membru Mauk Moruk nebe tama iha lista Mandatu kapturasaun.

Tuir Primeiru Ministru Rui Maria de Araujo katak nia parte hasoru malu ho Prezidente Republika Taur Matan Ruak hodi koalia kona ba situasaun rai laran, inkliu informa Operasaun Konjunta Hanita nebe governu hapara ona.

Hau koalia ho prezidente kona ba situasaun Seguransa ninian no mos Desizaun kona ba Konseilu Ministru ninian nebe hapara ona Operasaun Hanina,” dehan Rui ba Jornalista Kuarta (19/08/2015) iha Palasiu Prezidensial Nicolao Lobato.

Rui hatete sira nebe pretense ba grupu Ilegais iha mandadu kapturasaun husi tribunal, nebe seidauk konsege kaptura depois operasaun Polisial sei halao nafatin hodi buka tuir sira atu lori ba dalan Justisa.

Desizaun hapara operasaun Hanita tuir Rui Katak Governu desidi liu husi Konseilu Ministru nebe halao iha loron 18 Agostu, tan nee hasoru Prezidente hodi Informa ba Prezidente maibe membru Konseilu Revolusionariu nebe seidauk kaptura Polisia Kontinua buka tuir Nafatin.

Jornalista sira kontinua tenta atu konfima Konsiderasaun Governu nian ba Mauk Moruk, maibe Primeiru Ministru Rui Maria Araoju lakohi fo komentariu no husik media sira hodi hakat sai husi Palasiu Prezidensial. Informasaun kompletu iha STL Jornal no STL Web, edisaun Kinta (20/8/2015). Timotio Gusmao

Suara Timor Lorosae

Governu Hasai Ona Rejulusaun Hapara EOK

DILI - Governu Timor Leste liu hosi Konselho Ministru hasai ona Rejulusaun atu hapara Empeniamentu Operasaun Konjuta, ba Krupu Konselho revolusaun Maubere (KRM).

Tuir Ministru Defeza Cirilo Cristovao katak, iha loron 18 Agostus Liu hosi Konselho Ministru Governu hasai ona rejulusaun atu hapara empeniamentu Operasaun konjunta (EOK), tamba Paulino Gama Alias Mauk Moruk ho nia elementus nain 3 mate ona.

Hau hanoin Operasaun nee tenke hapara duni ona tamba ema neebe maka autor ba kaju nee laiha ona, maske sei iha elementus importante Mauk Moruk nian, nain rua hanesan Lorai ho Jose Sunardi neebe maka sei subar iha ailaran, maibe ida nee knar Polisia nian atu buka tuir paraderu sira nain rua nian,” informa Ministru Defeza Cirilo Cristovao ba Jornalista sira Kuarta (19/08/2015) iha nia knar fatin Kuartel Jeneral F-FDTL Fatuhada Dili.

Nia informa liu tan katak Rejulusaun nee konselho Ministru aprova ona no lori ba Prezidente Republika atu promulga, atu nunee hapara operasaun, no sira neebe maka seidauk kaer maka nee, knar Polisia nian atu buka tuir, no labele prosesu tuir Justisa neebe maka iha, tan nee sira neebe sei subar nee Polisia maka bele kaer mandadu kapturasaun hodi kaer ema sira nee.

Iha fatin hanesan Xefi Estadu Maior F-FDTL Maijor Jeneral Lere Anan Timur hatutan katak, Empeniamentu Operasaun konjuta, nee atu hapara nee kestaun Governu nian, tamba Governu maka hasai rejulusaun hodi operasaun nee lao, no atu hapara fali nee desizaun Governu nian. Informasaun kompletu iha STL Jornal no STL Web, edisaun Kinta (20/8/2015). Madalena Hora/Lucia Ximenes

Suara Timor Lorosae

Eis-komandante Falintil rekoñese sala tempu uluk nian, no defende timor-oan ninia unidade

Eis-komandante Falintil, brasu armada hosi rezisténsia timor-oan, Rogério Lobato ohin rekoñese katak iha luta ba libertasaun Timor-Leste “sira komete erru balun” no liu hosi timor-oan ninia unidade, maka konsege alkansa objetivu ne’e. 

“Dala barak revolusaun hamate ninia oan rasik”, dehan Rogério Lobato, iha konferénsia ida ne’ebé hala’o hodi komemora tinan 40.º hosi fundasaun Forsa Armada Libertasaun Timor-Leste (Falintil), hanesan pilár rezisténsia timor-oan nian ida mós no luta ba Timór ninia ukun-aan.

“Ami luta hodi defende povu. Maibé ita hotu halo sala, no dala barak, ita rasik maka oho ita-ninia maun-alin rasik. Ita tenke rekoñese ida ne’e. No ha’u hein katak loron ida líder Fretilin nian, bele ko’alia kona-ba ne’e”, dehan.

Konferénsia ne’ebé hala’o ohin, halo parte mós ba iha atividade ne’ebé realiza desde semana kotuk hodi komemora tinan Falintil ba dala hat-nulu (40), no aban maka sei sai hanesan pontu altu ba komemorasaun ofisiál ne’e iha Tasi Tolu.

Harii hanesan brasu armada Fretilin nian (Frente Revolucionária do Timor-Leste Independente), no Fretilin hahú marka sira-ninia papel ba istória timor-oan, iha loron 15-agostu-1975, bainhira lee “Deklarasaun Insureisaun Armada” iha Aisirimou, besik Aileu, parte sul Dili.

Hanoin hikas momentu ne’ebá liu hosi serimónia omenajen ne’ebé hala’o semana ne’e no ne’ebé hetan partisipasaun hosi dirijente timor-oan prinsipál sira.

Iha 1987, Falintil sai apartidária no konsolida hanesan brasu armada rezisténsia ba okupasaun indonézia. Hafoin Timor-Leste hetan indepedénsia, Falintil transforma ba Forsa Defeza Timor-Leste (F-FDTL), tanba ne’e maka iha serimónia 20-agostu sei hala’o mós parada militár, um minutu de silénsiu, fó kondekorasaun, promosaun no halo pasajen ba reforma kuadru F-FDTL nian.

Iha ninia intervensaun, Lobato haktuir hikas kona-ba momentu bainhira sira harii Falintil, kaptura hosi soldadu portugés sira iha Aileu no Dili, funu sivil ho UDT nomós ho membru istória seluk hosi movimentu pró-independénsia iha Timor-Leste.

“Iha momentu di’ak, nomós ladun di’ak. Ami luta kontra malu. Buat balun maka larezolve ho lolos. Ami labele simu bainhira revolusaun ne’e hamate ninia oan rasik”, haktuir hikas.

“Ita manan luta. Agora ita tenke hamutuk, maski akontese ona buat hirak ne’e, ho nune’e maka ita bele dezenvolve nasaun ne’e. Ita tenke luta ba Timór, atu nune’e labarik sira bele moris iha nasaun ne’ebé di’ak no lasofre hanesan saida maka ita sofre ona”, dehan.

Iha reta finál hodi hetan ukun-aan, nia dehan, liu-liu kona-ba papel importante hosi frente diplomátika, hodi temin “papel no apoiu importante hosi Portugal” nomós figura hanesan Jorge Sampaio no Antonio Guterres.

"Ida ne’e hanesan luta koletiva ida, hosi frente armada, frente klandestina, frente diplomátika, no hosi igreja. Ita manan tanba forsa koletiva ne’e", hateten.

"Agora ami serbisu hamutuk. Ami hanesan belun. Ami la’os tenke iha hanoin hanesan, maibé ami hotu iha hanoin ba buat ida, maka dezenvolvimentu nasaun nian ", defende.

António da Conceição, ministru Edukasaun nomós moderadór debate, haktuir hikas katak momentu hanesan ne’e importante tebes, tanba “konta hikas istória ne’ebé importante tebes, liu-liu ba jerasaun foun sira”.

"Ajuda kuda hikas ita-ninia nasionalismu, ita-ninia koñesimentu hanesan nasaun. Iha ne’e, ita la’os iha tribunál, maibé ita hotu hamutuk hodi fahe informasaun, no rona istória", konsidera.

SAPO TL ho Lusa 

Indonézia hamout ró estranjeiru 34 tanba halo peska ilegál

Governu Indonézia horisehik fó sai katak sira hamout ona ró estranjeiru 34 ne’ebé sira prende tanba halo peska ilegál iha tasi Indonézia. 

Ró hosi Tailándia, Vietname, Filipina no Malázia, mout iha fatin ketaketak hosi arkipélagu Indonézia nian.

Tuir autoridade sira, peska ilegál iha tasi Indonézia tinan-tinan lakon dolár tokon ba tokon iha reseita nasaun.

“Ami tenke hatudu katak ita mós konsege hetan vitória iha parte tasi nian, tanba tasi maka futuru hosi ita-ninia nasaun”, dehan ministra Peskas, Susi Pudjiastuti, iha komunikadu ne’ebé fó sai kona-ba medida ne’e.

SAPO TL ho Lusa 

Idade 40 FALINTIL Nia Moris: FALINTIL-FDTL Hakat Dadaun Ba Forsa Modernu Nian

Fundasaun Mahein (FM) kongratula loron FALINTIL nian aniversariu ba dala-40 sira nia dedikasaun ba nasaun Timor-Leste. FALINTIL mai ho nia istoria rasik ne’ebé asume responsabilidade ba luta armada no gerilia durante prosesu luta ba libertasaun independensia Repúblika Demokrátika Timor-Leste (RDTL). Hafoin indepedensia transforma FALINTIL husi forsa gerila ba forsa konvensional tuir evolusaun forsa armada ne’ebé modernu no professional nian hodi muda naran ba FALINTIL-FDTL.

Instituisaun FALINTIL-FDTL ne’ebé moris iha faze ukun-an ne’ebé orienta nia an lolos tuir forsa modernu nian. Forsa defeza ida ne’ebé professional no bele hasoru funu iha vila laran nian. Funu iha eskritoriu ne’ebé FALINTIL-FDTL sira tenki hakruk ba lei no regulamentu oin-oin, ejize sira nia profesionalizmu, disiplina no respeitu ba direitus umanus.

Pratika lubun ne’ebé hatudu FALINTIL-FDTL sai duni forsa konvensional ida ne’ebé modernu hanesan forsa nasaun seluk nian. Forsa ida ne’ebé laos deit hasoru funu konvensional nian maibe oinsa bele kontribui ba paz no dezenvolvimentu nasaun. Atraves husi atividade sira serbisu kooperasaun Sivil-Militar nian liu husi hadia eskola, estrada, ponte nst. Inklui fo apoiu Polisia ba asegura siguransa interna iha ne’ebé dala balu hahoris kestaun publiku no konfuzaun ba tarefa serbisu FALINTIL-FDTL nian.

Sorin seluk instituisaun FALINTIL-FDTL muda dadaun nia an tuir paradigma foun no independesia kona-bá forsa defeza nasional nian. Hakat tan ona ho pasu kona-bá reforma membru FALINTIL-FDTL balu ne’ebé pasa ba idade reforma. Fundasaun Mahein hare reforma ida ne’e pasu positivu ne’ebé instituisaun militar liu atu lori FALINTIL-FDTL sai husi pardigma uluk nian. Hanesan mos ho prosesu rekonesimentu veteranu sira ne’ebé kontinua lao. Maske atetude veteranizmu sei maka’as iha aspeitu politika Timor-Leste nian ne’ebé bele fo influensia maka’as mos iha prosesu dezenvolvimentu FALINTIL-FDTL nian.

Ikus liu, Fundasaun Mahein fo parabens ba selebrasaun loron FALINTIL ba dala-40. Hein katak instituisaun FALINTIL-FDTL sei sai duni forsa defeza modernu no professional ida. Maske FALINTIL no F-FDTL defisil atu haketak malu tanba husi abut FALINTIL mak hahoris FALINTIL-FDTL, maibé prinsipiu FALINTIL nia konsidera hanesan osan mean ne’ebé tenki aplika husi instituisaun militar.

Fundasaun Mahein - Foto: Logo Fundasaun Mahein

SELEBRA TINAN 40 FALINTIL, ESTADU LIMAN RAN?

Selebrasaun aniversáriu tinan 40 ezisténsia Forsas Armadas Libertasaun Nasionál Timor-Leste (FALINTIL) iha tinan ida ne’e, konsideradu Estadu Timor-Leste liman ran no hatudu imajen la di’ak iha mundu internasionál nia matan.

“Tinan 40 tuir loloos ita manifesta atu promove demokrásia no direitus umanus ida, maibé iha tinan 40 ita hatudu estadu ida liman ran. Ohin ita bele di’ak iha Timor maibé ita nia imajen iha mundu internasionál ladi’ak, tanba ita halo violasaun direitus umanus ba ema sivíl sira,” Reprezentativu Programa Officer Asia Justice And Right’s (AJAR), Inocêncio de Jesusu Xavier dehan kestaun ne’e ba Jornál Matadalan iha nia kna’ar fatin, Segunda (17/08/2015), hatan kona-ba komemorasaun aniversáriu tinan 40 FALINTIL.

Nia dehan durante operasaun ba Konsellu Revolusionáriu Maubere (KRM) ne’ebé lidera hosi matebian Mauk Moruk, forsa hatudu tramentu ladi’ak ba povu ki’ik sira. Halo violasaun direitus umanus hasoru povu hanesan baku, tuku, tebe, no estraga povu nia sasán hodi halo povu barak maka sai vítima ba operasaun ida ne’e.

“Ita tenke hakribi ran. Ita halo rekonsialiasaun ho koronel sira, ho sira ne’ebé uluk oho ita, ita badinas halo. Maibé tanbasa ho Timor-oan rasik ita lakohi halo rekonsiliasaun no diálogu,” Inocêncio dehan.

Selebrasaun tinan 40 FALINTIL sei realiza iha 20 Agostu 2015 iha Tasi Tolu, Díli, ne’ebé Prezidente Repúblika maka sei hato’o diskursu de estadu. (Efrem)

Matadalan

TL-Cavo Verde Hametin Relasaun Iha Area Justisa, Coelho: KM Aprova Resolusaun Kopersaun

DILI - Konsellu Ministru (KM) aprova ona rezolusaun kopersaun entre Timor Leste (TL), Cavo Verde ho Moçambique, hodi hametin kopersaun iha area justisa.

Lia hirak nee hatoo husi Sekertariu Estadu Konsellu Ministru Avelino Coelho, ba Jornalista sira, hafoin remata Konsellu Ministru iha Palasiu Governu, tersa (18/08/2015).

Rezolusaun Governu aprova konba protokolu kopersaun entre Timor Leste ho Republika Cavo Verde iha area Justica nia proposta husi Ministru Justica aprovadu tamba rezolusaun nee mai hodi fo oportunidade. Depois proposta mai husi tan Ministru Justica konba protokolu ordem Publika Musanbuique husi area justice nee akordu halao tiha ona durante enkontru CPLP,” hateten Coelho.

Alende ida nee Konsellu Ministru diskute mos dekretu lei konaba estatutu administrasaun municipal, atu hare oinsa dezenvolve sistema municipal iha nivel administrasaun, maibee proposta nee adia ba sema oin foin diskute fali hodi halo aprovasaun.

Iha parte seluk Observador Justica Andre da Costa Ribeiro hateten iha tinan kotuk liu ba Governu inklui Parlamentu Nasional hasai rezolusaun hodi duni sai Juiz, Ministeru Publiku no Defensor Publiku internasional sai husi Timor Leste. Informasaun kompletu iha STL Jornal no STL Web, edisaun Kuarta (19/8/2015). Joao Anibal

Suara Timor Lorosae

Bispu Macau Vijita Institusaun Cristal

DILI – Bispu Diocese Macau Don Jose Lay halo vijita ba iha Institusaun Edukativu Cristal.

Tuir Amu Bispu Diocese Macau Don, Jose Lay, ba jornalista sira iha edifisu Institusaun Cristal depois remata vijita Tersa, (18/8/2015) hatete objetivu hosi vijita nee  hodi hare institusaun Cristal neebe mak hari hosi antigus alunus Don Bosco sira tanba eduksaun importante tebes.

Hau mai atu hare obra neebe mak hanesan moris hosi espiritu Don Bosco Salesianu nian neebe mak hari eskola nee hosi antigus alunus Don Bosco tanba importante tebes atu hari nasaun ida tenke iha matenek no kuinesementu ida neebe mak diak hodi hari no servisu povu no nasaun ida nee sai diak liu tan,” hatete D. Jose lay.

Iha ninia vijita nee Amu Bispu Jose Lay mos fo mensajen ba Timor oan sira katak atu perpara an ho diak, tanba Timor Leste hanesan nasaun ida neebe mak foun tanba nee Timor oan hotu tenke hakas an hodi estuda no aprende matenek neebe mak iha hosi ema matenek bot sira, atu nunee bele dezenvolve nasaun nee sai diak liu tan nomos hadia povu tomak nia moris, tanba tuir Amu Bispu Don Jose Lay katak laiha tan dalan seluk atu dezenvolve nasaun ida kuandu la liu hosi eskola no matenek.

Iha fatin hanesan Diretor Ezekutivu Fundasaun Cristal, Agustino do Santos Gonsalves, hatete katak Amu Bispu Don Jose Lay halo vijita ba iha Cristal, hodi enkoraja no fo mensagen ba profesores nomos estudante tomak konaba matenek. Informasaun kompletu iha STL Jornal no STL Web, edisaun Kuarta (19/8/2015). Thomas Sanches

Suara Timor Lorosae

Esplozaun foun rua iha Bangkok no laiha vítima ruma

Iha loron-tersa ne'e kapitál Tailándia sai fali hanesan palku ba atentadu rua terorista nian.

Bomba ida lansa ona hosi ponte Taksin, besik iha terminál ida ferry nian, no karik nakfera iha mota, la halo vítima ruma. Bomba ida seluk lansa iha estasaun metro aéreu ida, iha sentru Bangkok nian, la dook hosi santuáriu hindu nebe iha loron-segunda ne'e sai hanesan fatin akontesimentu ba bomba dahuluk nian.

Iha atake ida nebe akontese iha loron-segunda ne'e, mate ona ema na'in 22, inklui ema estranjeiru na'in sia, no ema na'in 120 resin hetan kanek.

Primeiru-ministru tailandés garante katak halo ona investigasaun ba ema barak, hafoin kapta hosi kámara sira vijilánsia nian iha momentu atentadu.

Polísia tailandés fó sai ona fotografia rua hosi suspeitu ida, joven ida ho kamizola amarelu nebe mosu, iha momentu dahuluk ida ho moxila no, ikusmai mosu lahó bagajen - autoridade sira hanoin katak moxila ne'e iha bomba nebe nakfera iha fatin turístiku iha kapitál tailandés.

SAPO TL ho SIC Notícias - Foto © Athit Perawongmetha 

Hong Kong alerta hasoru viajen ba Bangkok, governu sira seluk husu kuidadu

Iha loron-tersa ne'e Hong Kong alerta ona nia rezidente sira hodi evita halo viajen ba Bangkok, bainhira governu aziátiku sira seluk husu aumenta vijilánsia ba nia sidadaun sira, hafoin atentadu ida nebe halo pelumenus ema na'in 20 mate iha kapitál Tailándia.

Hong Kong fó sai ona alerta maka'as ba Bangkok, nível daruak aas hosi nível tolu iha sistema governu nian.

Pekin kondena ona atake bomba ne'e no husu ba Tailándia hodi investiga no fó "kastigu maka'as" ba autór sira.

Entre vítima na'in 20 nebe konfirmadu iha esplozaun, nebe halo ema na'in 100 resin kanek, inklui pelumenus ema xinés na'in 28, iha sidadaun xinés na'in tolu, na'in rua hosi Hong Kong, na'in haat ema malaiu, na'in ida ema indonéziu no na'in ida hosi Singapura.

Responsável sira hosi Austrália, hosi Filipina no hosi Singapura husu ona ba sira nia sidadaun hodi iha atensaun.

Maski atake ne'e seidauk hetan reivindikasaun, líder sira hosi junta Tailándia nian hatete katak bomba ne'e hakarak halo kona indústria turístiku nasaun nian no halo foer reputasaun governu nian.

Autoridade Turizmu Tailándia nian fó sai ona katak seguransa aumenta ona iha fatin oioin iha kapitál tailandés no polísia husu nafatin ba rezidente no turista sira atu iha kuidadu.

Iha loron-tersa ne'e bomba ki'ik ida so'e ba besik estasaun metro ida iha sentru Bangkok nian, iha zona turístiku ida, maibé la halo vítima ruma.

SAPO TL ho Lusa – AFP PHOTO/Christophe Archambault

Governu Makau apela reforsu seguransa nian ba rezidente sira nebe iha Tailándia

Sekretáriu ba Seguransa hosi Governu Makau "apela ona ba grupu sira nebe halo vizita" iha Tailándia hodi "fó atensaun ba seguransa no regula deskrisaun viajen nian", hafoin esplozaun hosi bomba ida iha loron-segunda iha kapitál Tailándia nian.

Wong Sio Chak, nebe kaer funsaun nu'udar xefe Governu interinu, refere ona, iha nota ofisiál, katak Gabinete ba Jestaun Krizi sira Turizmu nian simu ona pedidu informasaun hamutuk 19, maibé laiha pedidu auzíliu ruma.

Ema sira nebe halo viajen rasik "tenki fó atensaun mós ba sira nia seguransa no ba ambiente nebe sira hasoru", hatutan hosi nota ne'e.

Sekretáriu lamenta mós atentadu ne'e no aprezenta ona kondolénsia ba família sira hosi vítima mortal no ema sira nebe hetan kanek.

Tailándia hanesan fatin ida férias nian ba ema rezidente sira hosi Makau.

Polísia tailandés informa ona iha loron-tersa katak ema estranjeiru na'in ualu mate iha esplozaun loron-segunda ne'e iha sentru Bangkok nian, nune'e númeru totál vítima sira nebe mate hamutuk na'in 20 no antes aponta ba na'in 21.

Entre vítima estranjeiru sira nebe mate na'in rua hosi Xina, na'in rua hosi Hong Kong, na'in rua hosi Malázia, na'in ida hosi Indonézia no na'in ida hosi Singapura.

Konfirma mós identidade hosi ema tailandés na'in lima.

Entre ema sira nebe kanek, na'in 42 ho nasionalidade tailandés no na'in 28 hanesan ema xinés. Autoridade sira hatete mós katak ema sira nebe hetan kanek balun hosi Japaun, Hong Kong, Indonézia, Malázia, Omã, Filipina ho Singapura, maibé la hatete na'in hira.

Iha loron-segunda, tuku 18:30 (oras lokál), bomba ida nakfera iha templu Erawan nebe situa iha sentru kapitál tailandés, besik iha hotel Grand Hyatt Erawan, nebe iha mós hotel sira selu no loja sira nebe loron-loron dada vizitante millaun resin.

SAPO TL ho Lusa – Foto: EPA@ Narong Sangnak