Vota Livre Risku Ba Manipulasaun

DILI: Comissão Nacional de Eleições (CNE) preokupa tebes bainhira sidadaun timoroan vota livre. Tanba, sistema ne’e bele fó risku boot mosu manipulasaun iha prosesu votasaun, inklui kontajen votu iha rezultadu ikus kada sentru votasaun.

Komisáriu CNE, Alcino Barris dehan, bainhira sidadaun sira atu konkorre iha eleisaun antesipada tenke aprezenta dadus loloos, bainhira fó livre de'it sidadaun sira vota livre mosu manipulasaun.

Nia hateten, kuandu dadus la loos bele akontese partidu balun sei manan ho dadus falsu. Ikus mai sei akontese kazu boot bainhira halo kontajen votu, nune’e mós rekolla dadus iha prosesu eleisaun.

“Ita kuandu livre halo ema ida vota dala haat-lima estraga tiha eleisaun no ita hakarak ema ida vota dala ida”, tenik Alcino, iha knaar fatin, Kaikoli-Dili, horisehik.

Nia dehan, polítika no lei orgánika eleitorál tuan ne’e mak oinsá atu kontrola sidadaun ida tenke vota iha unidade jeografia tuir ida-idak nia kartaun eleitorál, nune’e fasil atu kontrola iha prosesu eleisaun bazeia ba lista.

Maibé, komisáriu ne’e mós preokupa ba tinta ho lista, tanba tinta bele hamoos iha oras ida nia laran, nune’e lista mós bele fó oportunidade ba ema balun vota dala haat-lima iha kualkér fatin.

Alcino dehan, atu evita manipulasaun ba dadus no vota, di'ak liu ema ida-idak tenke vota tuir ida-idak nia unidade jeografia.Daudaun ne’e, STAE mós hahú halo resenseamentu ba sidadaun sira atu muda kartaun eleitorál hodi tuir vota iha sentru votasaun ne’ebé besik.

Tanba ne’e, lei orgánika tuan válidu ona tenke kumpre, laiha rezolusaun Governu no dekretu Governu mak intervein, maibé kompeténsia boot iha Parlamentu Nasionál mak halo rezolusaun. Maibé, infelizmente, PN disolve ona, laiha podér ba deputadu sira halo aprovasaun lei ruma.

Antes ne’e, Primeiru Ministru, Mari Alkatiri, sujere atu halo dekretu lei, nune’e husu ba CNE ho STAE atu rekolla dadus hodi fó livre ba sidadaun timoroan sira bainhira vota iha kualkér fatin. 

Artur da Luz | Independente

CNE Husu FDD Hamoos Símbolu Relijiozu

DILI: Comissão Nacional de Eleições (CNE) husu ba koligasaun partidu Frente Dezenvolvimentu Demokrátiku (FDD) hodi hasai emblema relijiozu hanesan ai-krús ne’ebé uza iha bandeira koligasaun durante ne’e.

Komisáriu CNE, Alcino Barris, xama atensaun ba partidu koligasaun FDD ne’ebé kompostu Frente Mudansa, ASDT, PUDD, UDT, PDN atu labele uza símbolu relijioza ba lema partidu nian.

Nia dehan, FDD nia símbolu ne’e ho imajen ida atu interpreta katak imajen konfisaun relijioza nian ne’ebé uza krús iha símbolu koligasaun nian. Ne’e duni, CNE bolu FDD halo klarifikasaun ba símbolu ne’e.

“Bainhira sira hatama sira nia estatutu koligasaun nia hamosu imajen ida, ami interpreta katak imajen konfisaun relijioza no presiza halo klarifikasaun tan”, tenik Alcino, iha edifísiu CNE, Kaikoli-Dili, horisehik.

Nia dehan, tuir lei, símbolu ne’e soke malu.Tanba ne’e, partidu sira iha koligasaun FDD tenke kumpre no hamoos símbolu ne’ebé iha.Lei orgánika 2/2016, iha artigu 12 deklara, labele uza símbolu relijioza no símbolu rezisténsia.

Nune’e, nia dehan, bainhira halo koligasaun tenke liu husi CNE halo revizaun hodi rekolla dadus sira ne’e kompleta mak pasa hodi hakat ba Tribunál Rekursu.

Nune’e, portavós FDD, José Luis Guterres dehan, CNE bolu FDD atu klarifika loloos símbolu koligasaun ne’ebé uza krús, tanba ne’e mak CNE husu ba FDD atu hamoos símbolu ne’e.

Nia dehan, FDD uza krús ne’e tanba antes relijiaun tama, bei'ala sira uza ona ai-krús. Tanba ne’e, FDD uza ne’e nu’udar símbolu, maibé CNE hakarak intervein entaun FDD tenke hamoos ai-krús ne’e.

Tanba ne’e, koligasaun FDD sei enkontru hamutuk hodi hili símbolu ida atu troka fali símbolu ida ba koligasaun nian. Nune’e, uza atu aprezenta ba Tribunál Rekursu hodi konkorre ba kampaña iha eleisaun antesipada.

Artur da Luz | Independente

Governu Kongratula Veteranu Sira

DILI, (TATOLI) – Ministru Adjuntu Primeiru-Ministru ba Asuntu Governasaun (MAPMAG), José Reis, fó parabens ba veternu sira tanba sei selebra loron nasionál veteranu sira nian ne’ebé sei monu iha 3 marsu.

“Parabens ba veteranu hotu tanba sira nia dedikasaun eh entrega-án tomak ohin loron ita bele hetan liberdade no demokrásia iha Estadu Direitu Demokrátiku”, José Reis ba Tatoli iha Palásiu Governu, kinta (1/3).

Nune’e nia haktuir hakuak bo’ot ba veteranu hotu, esforsu ne’ebé mak sira halo mak ohin loron Timor-Leste bele hetan auto-determinasaun ba independénsia totál.

Maske nune’e ema kestiona veteranu sira balun falsu eh falsifika domentu atu sai veternu maibé governu aprova ona dekretu lei atu harii konsellu veteranu sira nian no sei promulga hosi Prezidente Repúblika, Francisco Guterres Lú Olo atu bele solusiona.

“Atu harii Konsellu Veteranu sira nian ho intensaun atu bele re-identifika hirak ne’ebé falsu nune’e bele iha veteranu sira ho loloos no momos”, afirma.

Parte seluk, Sekretariu Estadu Asuntu Veteranu sira, Andre da Costa L4, akresenta veteranu sira nia sakrifisiu ba rai ida ne’e maka’as tebes, balun mate no balun sei moris, nune’e labele bolu sira hanesan veteranu sira falsu.

“Veteranu sira la’ós falsu, ita labele halo foer fali veteranu sira nia naran iha públiku tanba sira nia dedikasaun no sakrifisiu durante tinan 24 nia laran mak ita bele ukun-án”, afirma.

Enkuantu, ema ne’ebé lori veternu sira nia naran mak falsifika dokumentu mak konsidera la di’ak maibé veternu hirak ne’e konsideradu la iha manipulasaun dokumentu ruma.

Atu regulariza veternu sira ho loloos mak governu aprova ona dekretu lei kona-ba Konsellu Veteranu sira nian, nune’e sei haruka ba Xefe Estadu atu promulga hafoin veternu sira halo kongresu nasionál no tuir mai sei harii konsellu veteranu.

Enkuantu, Loron Nasionál Veteranu sira nian sei monu iha 3 marsu ho atividade semináriu hodi ko’alia kona-ba moris veteranu sira nian ne’ebé sei toka hosi atuál Primeiru-Ministru, Marí  Alkatiri, no Eis Komandante Xefe Falintil, Taur Matan Ruak, sei ko’alia kona-ba razaun saida mak 3 Marsu sai loron nasionál veteranu sira nian. Semináriu ne’e sei hala’o iha Sentru Konvensaun Dili (CCD).

Nune’e mós programa sira seluk ne’ebé sei realiza iha ámbitu selebrasaun.

Jornalista: Zezito Silva | Editora: Rita Almeida

Imajen: Veteranu sira, bainhira partisipa loron desmobilizasaun iha komemorasaun loron FALINTIL iha 2011. Foto Antonio Goncalves

Relatóriu Nu’udar Indikadór baTransparénsia

DILI, (TATOLI) –  Ministru Planu no Finansa, Rui Gomes, apela ba ministériu tomak bainhira atu halo adiantamentu osan ruma no gasta ona tenke halo relatóriu tanba ne’e hanesan indikadór transparénsia ida.

“Ha’u apela ba ministériu tomak se bele karik kuandu husu adiantamentu osan no gasta tenke fó relatóriu, tanba ne’e indikadór transparénsia ba bens públiku ne’ebé ita tenke tau matan no responsabiliza”, tenik ba jornalista sira iha salaun auditória Ministériu Planu no Finansas (MPF) iha ámbitu semináriu ba Funsionáriu Públiku, ohin.

Hodi dehan relatóriu finansa nian, ministériu balun la tama tanba dalabarak hatene gasta osan de’it maibé lahatene halo ninia responsabilidade atu relata fila fali osan ne’ebé uza ona.

Governante ne’e argumenta dalabarak problema ida mosu la’ós tanba hakarak halo violasaun ruma maibé laiha koñesementu ba matéria ka lei ruma.

“Ita nia frakeza mak hatene uitoan de’it no lakohi aprende barak tanba tauk ita ninia fuk mutin no monu lalais ne’e mak lakohi hatene barak, kuandu ita lahatene barak sei halo fallansu barak mós”, katak.

Entretantu, MPF realiza semináriu ida ba Funsionáriu Públiku ho objetivu sensibiliza funsionáriu tomak tanba kna’ar ida iha leten mak jere finasas públika no responsabilidade ho di’ak.

Semináriu ho tema: “Prevene No Kombate Korupsaun Hodi Promove Governasaun Di’ak no Proteje Direitu Umanu iha Servisu Administrasaun Públika Nian” halo loron tomak atu fó hanoin fali ba elementu sira ne’ebé mak importante bainhira halo jestaun ba governasaun di’ak.

Oradór husi semináriu ne’e mai husi Provedoria Direitu Umanu no Justisa (PDHJ-sigla portugés), Komisaun Anti Korupsaun (KAK), no inspetór Jerál Estadu (IJE).

Jornalista: Julia Chatarina ! Editora: Rita Almeida

Imajen: Ministru Planu no Finansa, Rui Augusto Gomes. Foto/Egas Cristovão

Ohin, Veteranu Hosi Munisípiu no Diaspora To’o Dili

DILI, (TATOLI) – Veteranu sira husi munisípiu 13 no konvidadu husi diaspora (rai-liur) ohin to’o iha Dili hodi komemora loron Nasionál Veteranu nian ne’ebé sei hala’o durante loron tolu hahú ohin (1-3 fulan ne’e).

Atividade ba loron tolu tuir programa husi Komisaun Organizadora ne’ebé TATOLI asesu katak ohin viajen veteranu sira husi munisípiu to’o mai Dili no konvidadu sira husi diaspora.

Iha loron daruak, sei iha palestra veteranu sira; diskursu husi Prezidente Repúblika, Francisco Guterres Lú Olo no abertura ofisiál semináriu.

Aleinde ne’e aprezentasaun tema: “A Estrategia Nacional de Protecção Social e Sustentabilidade na economia dos Veteranos” husi Primeiru-Ministru, Marí Bim Amude Alkatiri.

Seluk mak aprezentasaun tema “Espirito e Valores da Resistência na Consolidação do Estado e Degnificação dos Veteranos, Combatentes e suas Gerações Vindouras” husi Eis-vise Komandante Xefe FALINTIL no Eis-Prezidente Repúblika, Taur Matan Ruak, hahú tuku 9.00.

Iha tuku 14.00 misa iha Katedrál Dili, tuku 16.00 sei dezloka ba Jardim Eroi Metinaro no fila hikas mai Dili tuku 18.00 no ensera.

Iha loron ikus tuku 8.00 veteranu no konvidadu sira mai iha Palásiu Governu no halo lansamentu: “Praça da Proclamação da Independência” iha Palásiu Governu.

Tuir mai isár Bandeira FALINTIL no isár Bandeira Nasionál, tuku 9.15.

Iha tuku 9.30, leitura diskursu abertura: 1a Conferéncia da Reorganização da     Resisténcia de 1981, leitura akta no aprezentasaun Estrutura da Rezisténsia. Tuir mai, diskursu Prezidente Repúblika.

Iha tuku 11.00, veteranu sira halo marsa hahú husi Palásiu governu ba Sentru Konvensaun Dili (CCD-sigla iha portugés), pois dansa no divertimentu (múzika oferese no kanta husi veteranu sira) no ensera iha 17.00.

Iha 4 marsu, veteranu sira sei dezloka fali ba ida-idak nia munisípiu.

Entretantu, Komisaun Organizadora ba komemorasaun ne’e, koordenadór jerál kompostu husi prezidente Virgílio Smith, koronél Domingos Raul Falur Rate Laek, Eugénio João, ofisiál ligasaun Gabinete Primeiru-Ministru, Inês Almeida no sekretáriu jerál Task Force, Jorge Alves.

Enkuantu Konselleiru sira kompostu husi Ministra Solidariedade Sosiál, Florentina Smith, Sekretáriu Estadu Asuntu Veteranu, André da Costa Belo L4 no Majór-Jenerál, Tito da Costa Lere Anan Timur.

Jornalista: Rafy Belo

PN Hatoo Sentidu Kondelensia Familia Natalina

DILI - Timor Leste lakon ona inan diak Natalina Horta, neebe aman Maromak fo mai iha mundu hakiak Jose Ramos Horta, hanesan fundador prosesu luta ba libertasaun. Tanba nee deputadu sira iha Parlamentu Nasional (PN) hatoo sentidu kondelensia ba familia Matebian.

Deputadu Bankada Fretilin, Antoninho Bianco, sira bankada Fretilin hatoo sentidu kondelensia ba familia matebian, no hsu atu aman maromak haraik grasa wain ba matebian Natalina iha reinu lalehan.

Ita lakon ona inan diak ida neebe maromak husik hela iha mundu hodi hakiak oan sira hanesan maun boot Ramos Horta, neebe fundador mos ba prosesu luta libertasaun nian,” katak Bianco ba jornalista iha Bankada Fretilin, PN, Kuarta, (28/02/2018).

Entretantu Deputada CNRT// Virginia Ana Belo, hodi bankada CNRT nia naran, hatoo sentidu kondelensia ba maun boot Ramos Horta ho nia familia tomak, tanba lakon ona sira nia inan neebe durante nee akompana sira. 

Notisia kompletu lee iha jornal edisaun Kinta, (01/03/2018).

Guilhermina Franco | Suara Timor Lorosae | Foto iha Facebook

Programa PEDN Laos CNRT Nian Deit

DILI - Programa PEDN neebe iha tinan uluk liu ba eis Primeiru Ministru Xanana Gusmao, sosializa ba povu tomak iha Munisipiu sanuluh resin tolu laos partidu CNRT nina deit.

Xefi bankada PD, Maria Teresa Gusmao hateten, programa prioridade PD nian maka programa VII Governu Konstitusional nian neebe lori ba aprezenta iha Parlamentu Nasional lakonsege pasa.

Nunee mos programa PEDN, tanba programa PEDN nee laos deit CNRT ninia konsentu ka ninia ideias, maibe hamutuk ho PD maka trasa progama sira nee.

"Governu nee laos unipesoal, nunee estadu mos laos unipesoal, tanba nee se haree programa ida governu anterior halo tuir relevante povu no nasaun, governu ida mai fali kontinua,” dehan deputada Maria Gusmao ba STL iha sala bankada PD, Dili, Kuarta, (28/02/2018).

Iha parte ketak Xefi bankada CNRT, Arao Noe hateten, PEDN nee planu CNRT nian, aprovadu iha 2010 tama iha 2011vigor ba to 2030, tanba nee maka CNRT nia programa maka nee, nee laos programa foun ida aseves balu kopia fali hodi ba aprezenta fali dehan fali sira nia programa.

Notisia kompletu lee iha jornal edisaun Kinta, (01/03/2018).

Carme Ximenes/ Maria Lay | Suara Timor Lorosae

Camões: Portugal sei mantén koperasaun ho Timor-Leste ne'ebé sei defini ho Governu foun

Portugal sei mantén nia koperasaun ho Timor-Leste, liuliu ho destake espesial ba lian no formasaun, hein Governu foun tuirmai hodi defini Programa Estratéjiku Koperasaun foun, hatete hosi visi-prezidente Camões nian ba Lusa.

"Ami respeita períudu eleitoral no ami hein. Programa Estratéjiku Koperasaun (PEC) hotu ona iha fulan-Dezembru no tuir loloos ami tenki halo negósiu programa foun ida ba tinan ne'e ne'ebé tanba situasaun polítika tenki hein", hatete hosi Gonçalo Teles Gomes ba Lusa, iha Díli, bainhira hakotu vizita ida serbisu nian.

"Laiha dúvida katak koperasaun sei mantén no ami sei hetan dalan sira hodi hametin aspetu balun. Maibé buat hotu depende hosi futuru Governu timoroan nian no hosi nia planu sira", nia esplika.

Iha fulan barak nia laran maka Timor-Leste hasoru situasaun ida hosi problema polítiku ne'ebé halo Prezidente Repúblika sobu Parlamentu no konvoka ona eleisaun antesipadu ne'ebé sei hala'o iha loron 12 Maiu.

Gonçalo Teles Gomes esplika ona katak to'o loron halo negosiasaun ho Governu foun ba PEC, sei mantén programa sira ne'ebé hala'o daudaun, inklui programa formasaun ba profesor sira "Formar +" (ne'ebé hotu tinan ne'e) no programa ida ne'ebé hala'o daudaun iha Universidade Nasional Timor Lorosa'e.

"Ha'u nia hakarak maka hahú hosi momentu ne'ebé iha governu timoroan, ami defini PEC foun no projetu foun sira hodi bele implementa hahú fulan-Janeiru 2019", nia esplika.

Vizita serbisu nian ba Timor-Leste serve ona hanesan pontu situasaun ba projetu oioin no ba kontaktu balun ho responsável timoroan sira, ne'ebé iha mensajen "klaru ona", ho pedidu sira hosi manutensaun no reforsu koperasaun nian.

"Prioridade boot maka iha ligasaun ho lian no pedidu atu koperasaun portugeza kontinua apoia nafatin Timor iha ámbitu hosi implementasaun lian portugeza nian", nia esplika.

Lakohi antesipa konteúdu sira hosi PEC foun, responsável hosi Camões rekorda katak sei tuir nafatin "lójika foun hodi aposta iha konsentrasaun setorial", hodi buka "iha programa oituan maibé ho rekursu maka'as no volume barak".

Projetu sira sei iha indikador sira akompañamentu nian, ne'ebé sei iha ligasaun ba Objetivu sira Dezenvolvimentu Sustentável nian no tenki iha estratéjia sira saída nian.

"Buat ne'ebé maka nesesáriu iha koperasaun maka tenki hanesan sustentável. Tanba ne'e ami tenki fó formasaun ba formador sira, ami lakohi eterniza prezensa hosi profesor portugés sira iha ne'e, tanba sei sai hanesan falla ida hosi programa sira", nia hatete.

"Kestaun la'ós de'it hanesan barak ka oituan, maibé kualidade hosi produsaun no hosi númeru formador timoroan sira nian ne'ebé maka simu formasaun tanba sira sei aumenta esperiénsia", nia hatete.

Parte hosi projetu sira halo parte iha liña foun isra koperasaun nian ne'ebé delegadu hosi Uniaun Europeia, modelu ne'ebé aumenta maka'as tebes - Portugal pasa ona projetu sira ho folin euro millaun 36 to'o tinan 2016 ba millaun 200 resin.

"Hanesan dezafiu boot ida ba koperasaun portugeza maibé hanesan fundamental no importante. Permiti mai ami tama iha jeografia foun sira maibé liuliu fó volume boot ida ba ami nia koperasaun iha jeografia sira ne'ebé ami iha ona prezensa iha tempu barak no ami iha reputasaun ida", nia refere.

Nia subliña, iha tempu hanesan, katak projetu sira ne'e permiti envolve entidade sira seluk, hosi instituisaun públika portugeza sira, universidade sira, ONG no to'o empreza sira.

"Hanesan dezafiu boot ida jere volume finanseiru ne'e, maibé mós oportunidade ida hodi serbisu hamutuk ho parseiru sira ne'e uza osan ne'ebé ikusmai hanesan mós ami nian. Hanesan fundu europeu sira ne'ebé ami kontribui mós", nia hatete.

SAPO TL ho Lusa

Ema na'in 40 resin mate tanba vaga malirin iha Eropa

Vaga malirin siberianu nian ne'ebé atinji Eropa, iha loron hirak ne'e, halo ona ema na'in 40 resin mate, barak liu maka ema sira ne'ebé laiha uma, aleinde hamosu nafatin problema sira iha transporte sira.

Vaga malirin nian ne'e halo ona pelumenus ema na'in 41 mate dezde loron-sesta, na'in 18 iha Polónia; na'in neen iha Repúblika Xeka, na'in lima iha Lituánia; na'in haat iha Fransa no iha Eslovákia no na'in rua iha Itália ho Roménia.

Iha Estónia, malirin halo ona ema na'in hitu mate iha fulan-Fevereiru.

Meiu komunikasaun britániku sira bolu vaga malirin ne'e hanesan 'Beast from the East' no iha Holanda sira hanaran "Ursu Siberianu", nune'e mós ema sueku sira bolu hanesan "Kañaun Neve nian" no ema fransés sira hanaran "Moskovo-Paris".

Iha loron-tersa ba loron-kuarta, temperatura tuun to'o -21°C iha rejiaun foho sira iha Kroásia no Bósnia; -20°C iha Lübeck, iha norte Alemaña nian; -19°C iha súl Polónia nian; -18°C besik Liège, iha Béljika; no -10°C iha besik Londres.

Iha Suisa, máximu negativu maka -36°C rejista iha Glattalp, metru 1.850 hosi tasi leten, fatin ida ne'ebé laiha ema ida hela no toman ona ho temperatura estremu hanesan ne'e.

Iha Fransa, loron-tersa kalan ba loron-kuarta hanesan kalan invernu ne'ebé malirin liu iha nordeste, ho -12°C iha Metz.

Temperatura sira ki'ik liu, ne'ebé karik sei dura to'o loron-kinta, afeta liuliu ema sira ne'ebé laiha uma.

Na'in tolu mate iha Fransa no iha Repúblika Xeka dezde loron-sesta, na'in rua iha Itália, inklui na'in ida ne'ebé maka lakohi husik nia fatin ne'ebé nia uza hodi toba iha besik Milaun.

SAPO TL ho Lusa