Ema rihun halo protestu iha Jakarta

Musulmanu konservador sira rihun protesta iha loron-sesta ne'e iha kapital Indonezia nian, hafoin sunu bandeira ida organizasaun islámika proibidu hosi membru sira hosi grupu rival.

Ho bandeira metan ho deklarasaun ba fé islámika, barak hosi manifestante sira rihun ne'e hatais traje islámiku mutin, no halo nakonu dalan publiku ida importante iha Jakarta hafoin orasaun sira loron-sesta nian.

Video ida ne'ebé divulga iha fulan kotuk hosi membru sira milisia organizasaun musulmana nian ida sunu bandeira Hizbut Tahrir provoka akuzasuan sira blasfémia tanba iha bandeira ne'e hakerek deklarasaun sira fé islámika nian.

Hizbut Tahrir, ne'ebé maka defende kalifadu global, bandu tiha hosi governu indoneziu.

Imajen Indonezia nian prejudikadu iha tinan kotuk, bainhira detein governador minoria kristã iha Jakarta, ne'ebé akuzadu ho blasfémia, hafoin protestu iha estrada ne'ebé maka atrai ema rihun.

SAPO TL ho Lusa

Arão Noe: La Preokupa Asaun MUTL Lori Kaixaun no Lilin

Díli – SMI | Prezidente Parlamentu Nasional – PPN, Arão Noe Amaral, hateten, nia ho ninia Vise Maria Angelina Sarmento, la preokupa ho Movimentu Universitariu Timor-Leste – MUTL ne’ebé tau sira nia foto iha kaixaun no sunu lilin durante asaun demonstrasaun.

Tuir PPN, Aão Noe, distinu ema hotu-hotu iha maromak nia liman maibe importante mak desizaun atu sosa prado ba membru V lejizlatura nu’udar desizaun koletiva, la’os sira na’in nia desizaun mesak.

“Ba hau ho vise ami nein sente preokupa kona-ba lilin ka kaisaun ne’e, ami entrega ba distinu maromak nia liman, ita hotu depende ba iha leten ás ba, importante mak desizaun ne’e koletivu ba parlamentu nian, la’os ba ami nain rua nia interese”, dehan Arão Noe, iha PN, Segunda, (29/10).

Iha parte ketak, deputada hosi bankada KHUNTO, Olinda Guterres, sente la hakfodak ho asaun MUTL ne’ebé lori kaixaun, sunu lilin no tanis durante asaun demonstrasaun iha loron Sesta, (26/10) foin lalais ne’e.

Tuir Olinda, MUTL labele lori de’it kaixaun Prezidente PN ho nia Vise Prezidente maibe diak liu lori kaixaun 65 tanba sosa kareta prado ne’e desizaun polítika hosi deputadu no deputada hamutuk ema na’in 65 iha PN.

“Hau hakarak ko’alia kona-ba sunu lilin, kaixaun ne’ebé tau Prezidente Parlamentu ninia foto no Vise Prezidente Parlamentu nia foto iha ne’eba, hau hanoin sira na’in rua mesak ne’e laloos, tamba ida ne’e desizaun polítiku husi deputados 65”, dehan deputada ne’e.

Haree hosi asaun MUTL, deputada feto hosi bankada KHUNTO ne’e sadik MUTL atu sosa kaixaun 65 hodi taka fotográfia membru PN tomak hodi sunu lilin.

“Se karik ida ne’ebé mak organiza ida ne’e, hau hakarak ko’alia mos katak alin oan sira ne’ebé ko’alia katak ami prontu fakar-ran ami prontu mate, ida ne’e ba ita deputadu na’in 65 ne’e lalika hakfodak, tamba ran fakar ne’e liu tiha ona, bele karik hola kaisaun 65 ho ita 65 nia foto para sira sunu lilin”, dehan nia.

Maske nune’e, deputadu hosi bankada partidu Demokrátiku – PD, Antonio da Conçeicão, kontra ho deputada bankada KHUNTO no lakohi tahu nia fotográfia iha kaixaun wainhira MUTL halo asaun.

Eis Ministru Edukasaun ne’e mós konsidera MUTL ne’ebé lori kaixaun no sunu lilin durante asaun demonstrasaun nu’udar aktu la-respeitu ema no laiha étika morál.

“Hau sei la aseita hanesan deputada Olinda husi bankada KHUNTO hodi dehan katak tau ita na’in 65 nia kaixaun, hau nian hasai no labele, mais hau mós kontra aktus sira hanesan ne’e desrespeita pessoa humanu, ida ne’e estudante tenke buka hatene saida mak morál étika la’os liberdade de abuzu, hau solidariza tebes ba hahalok hanesan ne’e”, dehan nia.

Eis kandidatu Prezidente-da-Repúblika ne’e mós argumenta, la’os ona tempu atu halo kondenasaun abuzivu ba ema seluk nia integridade pesoál maibe oinsa rezolve problema ho aprosimasaun ne’ebé ho umanizmu.

Durante asaun MUTL iha loron Sexta, (26/10) semana kotuk, demonstrante sira lori kaixaun ida hodi taka fotográfia PPN, Arão Noe, Vise PPN, Maria Angela Sarmento, hamutuk ho kruz ne’ebé hakerek naran no liafuan Rest in Peace – RIP. (Editor, Mateus Barros)

Gasparina de Sousa | SMI – Sentru Midia Investigativu