GMN TV - Jornal Semanário

BNCTL sei Muda Sistema Pagamentu Idozu

DILI: Hafoin burokrasia pagamentu ba idozu sira halo ema ida mate, Banku Nasionál Komérsiu Timor-Leste (BNCTL) hanoin atu muda fali sistema pagamentu ba ferikkatuas sira.

Tuir Planu, BNCTL sei koordena ho autoridade lokál suku hodi rekolla dadus idozu no inválidu sira ne’ebé kondisaun grave hodi bele halo pagamentu direta ida-idak nia fatin atu bele evita asidente.

Konselleiru Diretór BNCTL, sira sempre iha liña koordenasaun ho Ministériu Solidariedade Sosiál (MSS) ho Autoridade lokál, nune'e prontu halo pagamentu movel ba ferik ho katuas sira ne’ebé iha kondisaun grave.

"Ami prontu ba selu ba inan-aman sira ne'ebé kondisaun ladún di'ak iha sira nia uma, tanba ami iha banku movel. Maibé, ami tenke iha informasaun klaru husi xefe suku sira tanba ami laiha dadus", dehan nia, iha Palasiu Governu, Sesta (14/9).

Nia hatutan, BNCTL simu lista halo pagamentu de'it, kona-ba ferik ho katuas sira ne'ebé kondisaun grave BNCTL hakarak liña komunikasaun di'ak ho MSS ho xefe suku hodi aselera pagamentu movel ba idozu sira kondisaun grave.

Públiku barak preokupa ho sistema pagamentu ba inan-aman sira la’o la di'ak, rezulta katuas ida hakotu iis iha Munisípiu Kovalima, nune'e iha fatin seluk sempre mosu fallansu iha atendimentu ba pagamentu.

Tuir sira, BNCTL sempre hasoru difikuldade bainhira atendimentu ba pagamentu idozu sira, tanba loron ida atendimentu ba ema rihun ida, hanesan banku Estadu prontu simu krítiku.

Artur da Luz | Independente

Joven ida Mate Hafoin Salva Labarik Feto husi Violasaun Seksual

DILI: Joven ida ho idade tinan 17 mate hafoin hetan sona husi ema dezkoñesidu iha Hera, Munisipiu Dili, Domingu (16/09) madrugada.

Tuir informasaun joven ne’ebé identifika ho naran Carlos da Costa ne’e hetan sona iha kabun hafoin koko salva labarik feto ida ho idade tinan 12 ho inisial BMPT husi violasaun seksual.

Iha Domingu maizumenus tuku 03:00 madrugada, Carlos ne’ebé foin fila husi festa kazamentu ida haree mane ida halo agresaun fiziku hasoru labarik feto no koko atu halo violasaun seksual hasoru labarik ne’e.

La hanoin barak, Carlos halai ba hodi koko atu salva labarik feto ne’e, maibé mane dezkoñesidu losu tudik husi nia kanotak no sona Carlos nia kabun.

Hafoin hetan sona Carlos kaer nia kabun hodi tahan raan ne’ebé sulin. Vitima BMPT hakilar maka’as liu tan hodi bolu ema atu mai ajuda.

“Ha’u hakilar atu komunidade bele mai ajuda. Maibé ema to’o mai Carlos husik iis tiha ona,” dehan vitima BMPT ne’ebé hasaran husi polisia.

Vitima BMPT daudauk ne’e hala’o hela tratamentu iha ospital nasionál Guido Valadares hodi observa ninia kondisaun saúde.

Komandante Daruak Polisia Nasionál Timor Leste (PNTL) Munisipiu Dili, Susperintendente Asistente Euclidis Belo informa, hafoin sona vitima suspeitu halai husi fatin akontesimentu.

Nia hatutan, daudauk ne’e Servisu Investigasaun Kriminal PNTL Dili seidauk bele rekola informasaun detallu kona-ba suspeitu. Maibé Komando garante katak tempu badak sei kaptura.

“Agora dadaun ita seidauk identifika suspeitu tanba ita presiza informasaun husi alin-feto ne’ebé sai vitima. Nia sei halo hela tratamentu (iha ospital), kuandu parte ospital garante ona ninia kondisaun, ita sei rekola informasaun husi nia,” dehan Euclidis.

Daudauk ne’e mate isin iha hela mortuariu ospital nasionál no PNTL Dili hato’o ona pedidiu ba Ministériu Públiku (MP) hodi husu autorizasaun atu hetan lisensa ba autopsia.

Tomé Amado | Independente

Seguransa Polisiál Seidauk Di’ak

DILI, (TATOLI) – Membru Komisaun B iha Parlamentu Nasionál ne’ebé trata asuntu seguransa no defeza, David Dias Ximenes, konsidera instituisaun Polisia Nasionál Timor-Leste seidauk iha tátika kolokasaun déspozitivu ba membru polisia atu fó seguransa di’ak ba sosiedade.

“Membru polisia sira nia atuasaun ba problema ruma iha Timor-Leste seidauk los tanba tátika kolokasaun dáspozitivu polisia sira mak seidauk los,” David Dias Ximenes levanta kestaun ne’e iha Parlamentu Nasionál, ohin.

Observasaun membru parlamentu nian durante ne’e hatudu katak kolokasaun despozitivu (kolokasaun-red) membru polisia sira atu fó seguransa ba sosiedade iha tempu kalan la iha, maibé loloos polisia sira tenke halo seguransa durante oras 24 nia laran ka polisia tenke la’o tun sa’e durante loron tomak atu fó seguransa ba povu.

Tanba ne’e, atu garante estabilidade ka evita problema, loron ho kalan polisia tenke iha li’ur nafatin, tuir motto instituisaun PNTL nian katak iha vizibilidade, envolvimentu no profisionalizmu.

“Ita observa loron kalan, liuliu kalan polisia la iha atu fó seguransa ba povu iha dalan. Ha’u la’ós kontra polisia maibé dehan de’it polisia atu susesu ka rezultadu di’ak kuandu nia halo operasaun preventiva,”  nia observa.

Maibé realidade hatudu katak kuandu ema baku malu ona iha fatin ruma foin bolu polisia to’o, pior liu sira (polisia) mai baku ema arbiru de’it, tanba sira la iha fatin hodi hatene loloos sé mak baku malu, hanesan kazu polisia baku membru RENETIL ida iha Delta Nova nian no seluk tan, liuliu kazu omisídiu ka alin feto ne’ebé ema soe iha Subaun.

“Ida ne’e mak sira ábitu baku ema, maibé loloos polisia sira la’ós atu baku ema, tanba polisia sira nia lei orgánika iha artigu 4 so sira bele uza forsa kuandu ema seluk halo rezisténsia hasoru sira nia servisu,” nia fó hanoin.

Entretantu, Parlamentu Nasionál sempre haree kondisaun vida polisia nian, maibé parte seguransa interna mós tenke servisu ho loloos, la’ós baku ema.

Jornalista: Zezito Silva | Editór: Manuel Pinto

Imajen: Deputadu bankada FRETILIN, David Dias Ximenes Mandati. Imajen António Goncalves

PN La Autoriza Dezlokasaun PR Ba Estranjeiru

DILI, (TATOLI) – Parlamentu Nasionál (PN) liuhosi sesaun plenária Tersa, deside kansela dezlokasaun Prezidente Repúblika (PR), Francisco Guterres Lú-Olo, ba estranjeiru ho razaun pedidu asentimentu ne’ebé aprezenta hosi PR mai ho karater pakote.

Ho ida ne’e PN deside kansela dezlokasaun PR ba estranjeiru, Estadus Unidos Amerika ho votu kontra hosi deputadu na’in 33, no na’in 25 mak afavór e abstensaun zero, ho rezultadu votu refere PR la bele halo vizita ba estranjeiru.

Projetu Rezolusaun no. 11/v/1a konaba dezlokasaun PR, Francisco Guterres Lú-Olo, bazeia ba pedidu asentimentu auzénsia Xefe Estadu, husi territóriu nasionál iha loron 21 Setembru to’o 3 Outubru, tanba  hetan konvite husi Sekretáriu Jerál Organizasaun Nasoens Unidas (ONU), António Guterres hodi partisipa iha 73a  sesaun Asembleia Jerál ONU nó mós atividade oin-oin husi sesaun ne’e, hanesan Simeira Dame Nelson Mandela no enkontru bilateral oin-oin.

Prezidente Parlamentu Nasionál (PPN), Arão Noe informa pedidu husi PR mai pakote ho viajen estadu no trabalhu seluk husi Setembru to’o Dezembru, maibé PN tenke aprova rezolusaun ba kada dezlokasaun bazeia ba pedidu.

“Ida ne’e akontese antes ona iha tinan barak nia laran, kada dezlokasaun, Parlamentu tenke aprova rezolusaun ida bazeia ba pedidu PR. Tanba  ne’e pedidu bele mai hamutuk, maibé asentimentu ba kada dezlokasaun”, Arão esplika.

Deputada Carmelita Moniz husi bankada CNRT hateten ida ne’e hanesan pedidu daruak husi PR, atu PN bele fó asentimentu ba vizita estranjeiru hanesan polítika diplomasia internasionál.

“Prinsipálmente vizita ne’e importante, maibé ita mós presiza hanoin orsamentu ne’e, tanba  até ohin loron PR seidauk promulga OJE 2018, entaun ho osan husi ne’ebé mak PR atu halo viajen? Ha’u ho kolega balun mós halo proposta ba viajen PR”, tenik.

Deputada Maria Angelina Sarmento husi bankada PLP  konsidera viajen PR ne’e importante, mas seidauk oportunu atu PN halo asentimentu, tanba sei iha asuntu balun mak importante kabe ba responsabilidade Xefe Estadu.

“Fó pose ba restu kandidatu membru governu no promulgasaun OJE 2018, ita hotu hatene katak iha final fulan Setembru ne’e saldu iha tezouru mós la kabe para sustenta mákina estadu inklui kobre viajen PR. Ita tenke hatene pozisaun PR relativamente aprovasaun OJE 2018,” Nia argumenta.

Nune’e nia hanoin, kooperasaun bilaterál no multilateral ho instituisaun internasionál sira importante, maibé iha momentu ne’e seidauk oportunu, tanba  orsamentu viajen PR mós inklui iha OJE 2018.

Parte seluk Deputadu Joaquim dos Santos husi bankada Fretilín konsidera vizita PR hanesan vizita estadu, importante ba nasaun tanba ne’e nia husu labele impede PR atu ezerse ninia funsaun iha termu konstituisaun.

“Sei Parlamentu la-autoriza vizita ne’e, ita sei iha problema ho despeza ba viajen ne’e tanba  antes ne’e ita iha faktu ida ne’ebé la-autoriza PR halo vizita ba Portugal, ita lakon ona $100.000 resin. Agora daudauk PR iha ona planu ne’ebé programadu ona ba viajen ne’e, sei ita impede pakote vizita ne’e, ita sei lakon tan osan,” nia lamenta.

Nune’e nia husu lalika hanoin PR atu promulga ou lae OJE 2018, maibé impedimentu vizita estadu ne’e sei kria marjen atu lakon tan osan barak, tanba  servisu protokolár PR prepara ona servisu hirak ne’e.

Deputadu Adriano do Nascimento husi bankada PD hateten hare husi pozisaun bankada governu (CNRT, PLP, no KHUNTO), sira hakarak halo negosiasaun no sira hakarak hatene pozisaun PR konaba fó pose kandidatu membru governu no promulgasaun OJE 2018.

“Ita iha pozisaun la hanesan, entre bankada governu no opozisaun, ha’u la aseita deputadu sira halo presaun ba Prezidente Repúblika no hakarak hatene pozisaun konaba fó pose ba restu kandidatu governu no promulgasaun orsamentu”, katak.

Hatutan: “Ha’u hanoin ita aprova ona millaun $140, ha’u hanoin PR iha ona planu para orsamentu ne’e, ita labele kestiona konaba promulgasaun, iha osan ou la’e. Ha’u hanoin PR bele uza orsamentu ne’ebé promulga ona hodi halo viajen ba estranjeiru”.

Entretantu, pedidu PR ne’e mai pakote vizita estadu no trabalhu husi fulan Setembru to’o Dezembru, ne’ebé entre loron 7 to’o 10 Outubru.

Vizita hirak ne’e, PR halo tanba hetan konvite husi Governadór Jerál Komunidade Austrália, Peter Cosgrove atu hala’o vizita hodi hametin lasu amizade entre nasaun no povu Austrália no Timor-Leste.

Iha loron 11 to’o 14 Outubru hetan konvite husi PR Guinea Equatorial, hanesan vizita estadu ba nasaun irmaun no iha tempu hanesan partisipa selebrasaun tinan 50 proklamasaun independénsia nasaun ne’e.

Enkuantu iha  final fulan Outubru entre loron 28 to’o 1 Novembru, hetan konvite husi PR Indonézia, Jokowi, atu partisipa iha bali forum.

Nune’e mós iha 17 to’o 26 Novembru , via diplomátiku atu responde disponibilidade konvite santidade Papa Francisco, hodi agradese papél igreja katólika halo ba luta libertasaun povu Timor-Leste no ikus liu iha Dezembru, hetan konvite husi Sekretáriu Jerál ONU, António Guterres, atu partisipa iha enkontru altu nivel global compact ne’ebé sei realize iha Maroco iha loron 7 to’o 14 Dezembru.

Antes ne’e, iha loron 9 Jullu PN la aprova vizita PR ba Portugal hodi hametin lasu amizade entre nasaun Portugal no Timor-Leste, ho razaun Xefe Estadu tenke hare uluk situasaun rai laran.

Jornalista: Julia Chatarina | Editór: Manuel Pinto

Imajen: Prezidente Parlamentu Nasionál, Arão Noe, simu Prezidente Repúblika, Francisco Guterres Lú Olo, iha uma fukun hodi loke abertura kinta lejislatura. Imajen António Goncalves

Ezame Nasionál Sei Akontese 15 Outubru

DILI, (TATOLI) – Diretór Jerál Planu no Parseria, Ministériu Edukasaun Juventude no Desportu (MEJD), Antoninho Pires, hatete tuir kalendáriu ministériu nian ezame nasionál sei akontese iha 15 outubru.

“Ezame semana ida, depois tama iha koresaun”, diretór ba jornalista sira iha salaun Institutu Nasionál Formasaun ba Dosente no Profesionál Edukasaun (INFORDEPE) iha Balide.

Nia hatutan: “Husi ensinu báziku to’o ensinu sekundáriu; nonu ano to’o désimu segundu ano, ita iha kuaze trinta à cinquenta mil alunos”. Maibé ninia parte seidauk iha data fiksa kona-ba númeru estudante sira ne’ebé atu tuir ezame nasionál.

Antoninho Pires hatutan tan profesór timoroan mak sei sai koretór ba matéria ezame. “Ita uza makina koresaun, ita la uza manuál, makina mak sei halo tabulasaun”.

Nia mós afirma ho polítika inkluzaun, eskola sei fó oportunidade ba estudante tuir ezame (susulan).

“Ema hotu iha direitu. A não ser, kondisaun ninian la permite, ne’e buat ketak ida maibé iha oportunidade nafatin, ita fó para sira hotu bele hakotu sira-nia estudu”.

Jornalista: Rafy Belo | Editora: Rita Almeida

Imajen: Diretór Jerál Ministériu Edukasaun, Antoninho Pires

PM Taur Hirus Alfandega

DILI - Primeiru Ministru (PM) Taur Matan Ruak hirus Alfandega, tanba la partisipa iha enkontru neebe nia parte preside.

Ohin hau husu ba hau nia funsionariu sira, tanba sa Alfandega la partisipa iha enkotru ida neebe hau rasik prezide, no tanba saida maka sira la partisipa iha loron primeiru, segundu no terseiru. Hau nee Primeiru Ministru, kuandu hau nian ordem nee husi Kolonel tun ba kraik tenke kumpri, sira la partisipa nee tanba saida,” dehan PM Taur bainhira halo enkotru ho membru governu, diretores no  kargus  Xefia  hodi define planu jornada orsamenta 2019 iha salaun Ministeriu Finansas, Aitarak Laran, Tersa  (18/9/2018).

Nia dehan, Alfadega sira ohin atu partisipa iha enkotru ida nee, hodi koalia kona ba Airo Portu Suai nian, kona ba kompania neebe maka atu fo asistesia ba aeroportu nian nee, para oinsa  buka solusaun, maibe nudar Primeiru Minsistru sira la partisipa ladun konkorda kestaun nee. 

Notisia kompletu lee iha jornal STL edisaun Kuarta (19092018)

Natalino Costa | Suara Timor Lorosae

Kazu Kilat Manu Taibesi, RCA Hetan Pena Prizaun Tinan 13

DILI - Tribunal Distrital Dili Segunda, (18/09/2018) liu husi leitura akordaun, aplika pena prizaun tinan sanulu resin tolu (13) ba arguidu ho inisial RCA, tanba provadu komete krime arma proebidu neebe previstu iha artigu 211 numeru 3 husi Kodigu Penal.

Iha leitura akordaun nee, arguidu nain rua, Simiao Magno De Jesus, no arguidu Frederico Quintao da Crus, Tribunal absolve husi krime nee. No arguidu nain tolu, Natalino Flora Pereira, arguidu Cristovao Dos Reis, arguidu Benvindo Soares, Tribunal aplika pena prizaun tinan tolu, suspende ba tinan lima.

No arguidu Rudy inisial RCA hetan pena prizaun tinan sanulu resin tolu, tanba sai hanesan autor ba krime nee.

Audensia Julgamentu nee preside husi Juis Kolektivu, Jacinta Cabral, Ana Paula, Euzebio Xavier, Ministeriu Publiku reprezenta husi Prokurador Antonio Tavares, arguidu sira hetan asistensia legal husi Advogadu Privadu Manuel Gonsalves. 

Notisia kompletu lee iha jornal STL edisaun Kuarta (19092018) 

Terezinha De Deus | Suara Timor Lorosae