Laiha Provas, MP-DP Husu Absolve Membru PNTL 3 Husi Krime Ameasas

DILI - Ministeriu Publiku no Defensor Publiku husu ba tribunal atu absolve arguidu Antonio de Araujo, Marsiana do Carmo no Bendito Mariano nudar membru PNTL husi krime ameasa hasoru lezada Ana Paula ho Ines, tanba laiha provas.

Liu husi audensua julgamentu tribunal lee sai akuzasaun husi MP katak arguidu sira atu ba halo uma iha rai neebe mak partensia ba iha lezada Ana Paula ho Ines nian. Iha loron Domingo, 10 de Augostu 2014 depois sai misa iha Lahane Osidental arguidu sira hemu tua ho kondisaun lanu oituan hakat ba rai iha Ainitas hun neebe partensia ba lezada Ines ho Paula nian hodi hasai liafuan at no kroat dehan “imi labele impede ami atu halo uma iha nee, arguidu sira hatudu liman ba vitima hodi ameasa atu tiru bainhira lezada sira impede”.

Hatan ba akuzasaun nee arguidu Bendito hatete, faktus neebe iha nee lalos hotu. Tanba nia parte laiha problema ho lezada sira. Sira hela hanesan vizinu deit, nia alin feto ida mak halo uma besik iha rai neebe lezada sira hela ba. Maibe nia parte la hatene kona ba ida nee, I momentu nee nia iha nia uma. Nia uma ho lezada sira dok malu. Neebe tempu nee nia la lanu hodi ameasa lezada sira.

Liafuan hanesan informa mos husi arguida Marsiana katak, nia mos momentu nee iha uma ho nia oan sira. Neebe nia rasik la hatene problema nee, tanba nia la hakat ba iha lezada sira nia uma oin.

Nunee mos ho arguidu Antonio katak, iha momentu nee nia ba Com, munisipio Lautem nian. Lori hela mina ba polisia maritima sira iha neeba, neeba nia la hatene kona ba problema nee. Nia la hemu no ameasa lezada sira.

Iha parte seluk lezada Ines deklara, arguidu sira iha momentu nee lori besi ba tau iha neeba duni. Arguidu Antonio ho Marsiana hamrik iha neeba hotu maibe la koalia buat ida.

Entertantu lezada Paula deklara katak, momentu nee arguidu sira ba laos ameasa maibe ho liafuan insulta deit. Informasaun kompletu iha STL Jornal no STL Web, edisaun Sabado (4/7/2015). Domingas Gomes

Suara Timor Lorosae

Portugál ho Timor-Leste negosia protokolu kooperasaun foun iha Justisa - Machete

Portugál ho Timor-Leste negosia protokolu foun ba kooperasaun judisiál, ne’ebé sei inklui "presupostu foun" hodi garante katak espulsaun ba majistradu portugés sira "sei la repete tan", tenik ministru Rui Machete.

"Justisa importante iha kuadru relasaun entre nasaun rua no ami nia esforsu maka, hamutuk, retoma kooperasaun iha área Justisa, ne’ebé presiza haree ba presupostu foun, tenik ministru Negósiu Estranjeiru Portugál nian, Rui Machete.

"Situasaun hanesan sira ne’ebé akontese iha tinan 2014 la bele repete tan ona no klaru katak sei la repete tan, no ida ne’e sei protokoladu iha dokumentu-akordu ida iha preparasaun entre ministériu Justisa Portugál no Timor-Leste nian", hatutan governante ne’e iha konferénsia imprensa ne’ebé ensera reuniaun servisu nian ho nia omólogu timoroan, Hernâni Coelho.

Kestiona hosi Lusa kona-ba sá maka sei muda realmente iha protokolu foun, ministru timoroan esplika katak "prinsipál kestaun maka papel juís sira ne’ebé sei partisipa iha kooperasaun iha Timor-Leste, ámbitu kooperasaun, papel sá maka sira sei halo, ne’e maka parte fundamentál liu hosi revizaun ba akordu ne’e".

Protokolu foun ne’e tenki prontu iha semana oin, hatete fonte diplomátika ida ba Lusa, presiza "iha semana oin sei aseita termu akordu ne’e, hafoin ne’e iha prosedimentu tuir mai molok asinatura".

Governu Timor-Leste fó orden iha novembru kotuk ba servisu migrasaun, espulsaun ba funsionáriu judisiál internasionál iha oras 48, inklui juís na’in lima, prokuradór ida no ofisiál PSP portugés na’in ida.

Iha loron 24 outubru, parlamentu, "invoka motivu forsa maior no nesesidade hodi proteje ho forma intransijente interese nasionál", aprova rezolusaun ida ne’ebé suspende kontratu ho funsionáriu judisiál internasionál sira -- besik 50, sira barak ema portugál.

Desizaun Parlamentu nian iha momentu ne’ebá hamosu krítika oi-oin hosi organizasaun la’os-governamentál no advogadu sira hodi eziji respeitu ba separasaun poder.

Hafoin rezolusaun parlamentár, Governu timoroan haruka karta ba Prezidente no ba primeiru-ministru Portugál nian hodi esplika katk situasaun ne’e "la relasiona ho relasaun ne’ebé eziste entre nasaun rua ne’e, nein ho tipu kooperasaun ne’ebé iha to’o oras ne’e", afirma ministru Justisa timoroan iha altura ne’ebá, Dionísio Babo.

SAPO TL ho Lusa