MANIFESTASAUN KONTRA PENSAUN VITALISIA

DILI - Estudante hosi Movimentu Universitariu Timor-Leste (MUTIL) ho instituto superior públiku no privadu durante loron tolu, hahú Segunda, (28/9) to’o Kuarta, (30/9) halo manifestasaun iha kampu eis 744 Bekora hasoru Parlamentu Nasionál tanba de’it seidauk halo alterasaun ba lei pensaun vitalisa.

Tanba de’it laiha alterasaun ba lei numeru 1/2007 kona-ba pensaun vitalísia, portavos Universidade Nasionál Timor-Leste (UNTL) Faustino Soares hatete, organiza manifestasaun hasoru estadu ida ne’e.

“Ami halo manifestasaun ida ne’e bazeia ba artigu 48 konstituisaun RDTL. Artigu ne’e loke dalan ba sidadaun hotu atu hato’o sira nia preokupasaun ka reklamasaun ba orgaun soberanu sira hodi defende sira nia direitu i iha mós artigu 42 ko’alia liberdade reniaun ka halo manifestasaun ne’ebé mak klarifika ona iha lei No1/2006”, Faustinho hatete ba jornalista sira iha kampus UNTL, foin lalais ne’e.

Nia dehan, manifestasaun ne’e hala’o hetan apoiu seguransa hosi Polísia Nasionál Timor-Leste (PNTL), tanba haruka ona karta ba komadante jéral PNTL ho komandante distritu Dili iha dia 21 fulan-Setembru, no hetan resposta iha loron 22 fulan-Setembru.(vas/fer)

Timor Post