MEMBRU KONSELLU SUCO MAK HILI XEFI SUCO NE’E HAMORIS SISTEMA MONARKIA

Hakerek Na’in: Moisés Vicente

“Governu liu-husi KM (Konsellu Minístru) aprova ona proposta lei kona-bá eleisaun lideres komunitáriu. Iha proposta lei ne’e hateten katak, eleisaun xefi do suco sei hili husi membrus Konsellu Suco nian. Eleisaun indireta. La’os hili direita husi populasaun sira”. (Jornál Matadalan SEMANÁL, 05-11 Agostu 2015).

        

Iha planu kalendariu CNE (Comissão Nasional Eleisões) ho STAE (Secretariado Técnico de Administração Eleitoral) dehan katak iha fulan Outubru tinan 2015 sei hala’o eleisaun xefi do suco. Maibé Konsellu Minístru mak muda no eleisaun komunitáriu ne’e sei realiza iha tinan oin fulan Outubru 2016. Ho razaun tanba governu introduz ona modelu ba eleisaun suku nian ne’ebé pasa ona iha Konsellu Minístru no Konsellu Minístru haruka ona ba PN (Parlamentu Nasional). Nune’e governu hein de’it bainhira mak PN bele agenda hodi deskuti kona-bá modellu eleisaun suku nian ne’e.

RDTL (Repúblika Demokrátika Timor-Leste) nu’udar nasaun foun, hahu’u nia polítika administrativa transitóriu iha misaun Nasoens Unidas UNTAET (United Nations Transitional Administration in East Timor) nia okos durante tinan rua ho balun nia laran no ikus mai iha loron 20 fulan Maio tinan 2002, Timor-Leste hetan  soberania total liu husi Polítika Restaurasaun Independensia.

Tuir hau nia observasaun nudar sidadaun babain, hau la konkorda proposta lei eleisaun xefi suco ne’ebé mai husi governo liu husi Konsellu Minístru hodi aprova lei ne’e. Iha ne’ebé iha lei ne’e hili Xefi Suku ho modalidade foun. Povu sei hili halo votasaun ba Xefi Aldeia, depois Konsellu Suco maka hili Xefi Suco. Husu ba orgaun Parlamentu Nasional labele aprova proposta lei eleisaun Xefi Suco nian ne’e.

Eleisaun xefe suku tenke hili liu husi pakote mak diak liu, laos uja fali sistema hili indireita. Ne’e orsida serbisu Administrasaun Públiku lori ba dezastre nian. Entretantu, nasaun barak iha mundu to’o ohin loron sei halo funu maka’as atu bele hetan direitu no liberdade ka demokrásia, maibé iha Timor-Leste polítika na’in sira komesa halo ona desijaun balun hodi dudu ses tiha valor demokrásia ba fatin seluk.

Sistema eleisaun foun ne’e hakarak konjuga ho sistema kultural Timor-Leste, maibé ninia defikulidade mós ita lahatene agora ne’e se los mak bele reprezenta xefi suco. Seraque ita ba fali kotuk uitoan, tanba ita nia luta ba libertasaun ita kontra mós buat balun ne’ebé ita sente sai hanesan defikuldade ba ita, liu-liu ita kontra sistema monarkia, ita kontra mós hanesan konseitu kona-bá liurai.

Saida mak sistema monarkia? Monarkia dalen ho Bahasa Indonesia hatete nune’e “Monarki merupakan sistem pemerintahan atau sejenis pemerintahan tertua yang ada di muka bumi ini yang telah dan sampai sekarang masih diaplikasikan dibeberapa negara tertentu. Monarki secara terminologi, dilihat dari bahasa Yunani yaitu monos yang berarti satu dan archein yang berarti pemerintah. Dalam bahasa Inggris, Monarki berasal dari kata monarch yaitu raja. Secara singkat sistem pemerintahan Monarki adalah kekuasaan politik dimana raja atau ratu sebagai pemegang kekuasaan dominan Negara”. 

  

Iha sanak seluk, Diretur Ezekutivu AJAR (Asia Justice and Right’s), José Luis Oliveira hatete katak “Agora lei eleisaun ida ne’e mai limita fali povu nia direitu atu ejerse ba rai soberania ne’e, limita fali husi xefe aldeia sira. Ida ne’e derotasaun ida. Ita durante periodu lobuk ida hakat ba oin ona em termus demokrásia, povu mak hili ninia lider komunitáriu rasik, agora ita hakiduk fali ba kotuk. Ita hili de’it mak xefe aldeia no xefe suku ita lahili”. (Diariu Timor Post, loron Kinta, 27/08/2015).

Rekomendasaun ba orgaun soberanu Parlamentu Nasional husu ba deputadu bankada balu ou bankada oposisaun FRETILIN tenke vota kontra lei ne’e. Diak liu implementa sistema ne’ebé uluk implementa liu husi pakote ne’e diak liu la liu husi partidu politika, bainhira liu husi membru konsellu suku mak hili fali xefi suku ne’e hatudu katak xefi suco laiha poder ou laiha kompentensia.

Ikus liu, husu ba orgaun soberanu Prezidente da República, maibé karik lei eleisaun xefi suco ne’e pasa nafatin husu ba Prezidente da República la bele aprova lei eleisaun xefi do suco ne’e. ****

Referénsia:

Comissão Nacional das Eleisões (CNE) Preokupa ho Proposta Lei Eleisaun Suku. http://www.jndiario.com/2015/07/29/cne-preokupa-lei-eleisaun-suku/. Asesu iha loron 16 Agostu 2015.

Proposta Lei ba Eleisaun Sukus Seidauk Hetan Aprova. http://www.jndiario.com/2015/07/16/proposta-lei-eleisaun-suku-seidauk-aprova/. Asesu iha loron 18 Agostu 2015.  

Proposta Lei Eleisaun Suku Fó Biban ba Liurai. http://matadalan.com/proposta-lei-eleisaun-suku-fo-biban-ba-liurai/. Asesu iha loron 18 Agostu 2015.

Governu Muda Sistema Eleisaun Xefe Suku. Asesu iha Jornál Timor Post, 27 Agostu 2015.

Governu Sei Implementa Eleisaun Indeita ba Xefe Suku. Asesu iha loron 27 Agostu 2015.

Governu muda sistema eleisaun ba xefe suku. http://www.diariutimorpost.tl/berita-governu-muda-sistema-eleisaun-xefe-suku.html. Asesu iha loron 27 Agostu 2015.

Eleisaun Indeita Governu Halo Traisaun ba Demokrásia. Asesu iha Jornál Timor Post, 28 Agostu 2015.

Muda Sistema Eleisaun Xefe Suku?. Asesu iha loron 28 Agostu 2015.

FRETILIN Konsidera Proposta Lei Xefe Suku Anti Demokrasia. http://timoragora.blogspot.pt/2015/09/fretilin-konsidera-proposta-lei-xefe.html. Asesu iha TIMOR AGORA, 3 Setembru 2015.        

Parlamentu Nasional Adia Eleisaun ba Xefe Suku. Asesu iha Jornál Suara Timor Lorosae, 4 Setembru 2015.

Lei Eleisaun Suku Deputadu ‘Curhat’ Ba Povu. Asesu iha Jornál Timor Post, 7 Setembru 2015.

Akademista Husu FRETILIN Tenke Veta Lei Eleisaun Indereita. http://www.diariutimorpost.tl/berita-akademista-husu-fretilin-tenke-veta-lei-eleisaun-indireita.html. Asesu iha Jornál Timor Post, 8 Setembru 2015.

Intervista pesoal ho Dos Santos, Bendito. Iha loron 8 Setembru 2015.

Parlamentu Nasional Adia Eleisaun Xefe Suku. Asesu iha Jornál INDEPENDENTE, 8 Setembru 2015.

Komunidade la Simu Membru Konsello Suku Caikoli. Asesu iha Jornál Suara Timor Lorosae, 10 Setembru 2015.