Dezempregu TL Sa’e Ba Pursentu 11

Bazeia ba survey ne’ebé maka Sekertaria Estadu Polítika Formasaun Profesionál no Empregu (SEPFOPE) halo ba forsa traballu katak dezempregu iha Timor-Leste sa’e ona  ba pursentu 11.

Tuir Diretór Jerál SEPFOPE, Jacinto Barros hateten, bazeia ba survey ne’ebé SEPFOPE halo ba forsa traballu katak dezempregu iha Timor-Leste hamutuk rihun 24, ne’ebe sa’e ba pursentu 11. “Ita hakarak hatete katak ne’e sira ne’ebé maka buka serbisu la hetan ne’e maka rihun 24 ne’e. Ida ne’ebé maka la buka serbisu túr de’it iha uma, ne’e ita bolu indezempregu tanba lakohi buka serbisu,” Jacinto dehan ba Matadalan iha Edifísiu Ministériu Komérsiu, Indústria no Ambiente (MKIA), Fomento, Díli (18/09/2015).

Nia hatete, ita nia forsa traballu iha Timor-Leste agora dadauk ne’e ema rihun atus rua tolu nolu ne’ebé servisu, balun funsionáriu, balun iha ONG, balun iha indústria no balun iha agrikultura. Totál komunidade ne’ebé maka eziste bazeia ba sensu uma kain katak 1,2 pursentu. Tuir Diretór Jerál ne’e, hosi númeru ne’e to’o agora barak maka seidauk serbisu.

“Ita buka oinsá para bele fasilita sira liu-hosi programa sira, no mós bele fasilita sira liu-hosi setór privadu sira para bele fó serbisu ba ita nia traballadór ne’ebé maka tinan ba tinan sa’e ba bebeik,” Jacinto hatete.

Nia esplika, papel SEPFOPE nian maka treina ema, depois oferese ba maluk sira ne’ebé maka iha turizmu ninian para  bele fó serbisu ba traballadór sira, tanba ita nia ema treinu ona depois ita tenki haruka tuir indústria nia hakarak. Ho númeru dezempregu ne’ebé maka barak, agora dadauk SEPFOPE serbisu hamutuk ho sentru treinamentu sira atu fó abilidade ba ita nia oan sira, ita nia alin sira para sira mós iha abilidade hodi kompete serbisu ema hosi rai seluk.

“Ita tenki ho sentru sira ho di’ak para prepara, fó abilidade ka skill ba ita nia alin ka ita nia oan  sira. Agora dadauk ita hatene katak área indústria maka sei menus liu,” Jacinto hato’o.  Aleinde ne’e, Diretór Jerál SEPFOPE ne’e subliña, SEPFOPE mós serbisu hamutuk ho Ministériu Komérsiu Indústria para atu haree setór ekonomia informál ne’ebé absorve traballadór barak.

Tanba ne’e, nia husu,  ita tenki tau kestaun ba ekonomia informál, investor sira la  mai, maibé timor oan halo bisnis ki’ik-oan ne’ebé fó rendimentu di’ak ba sira nia uma laran rasik.

Entretantu, Ministru Komérsiu Indústria no Ambiente (MKIA), Constâncio Pinto subliña, atu halo redusaun ba dezempregu iha ita nia rai, ne’e la’os papel MKIA nia de’it maibé MKIA halo nia parte ida para hamenus dezempergu.

“Ida ne’e maka liu-hosi kriasaun kooperativa, indústria pekenas, media no grande sira ne’e,” Constâncio hatete. Nia dehan, ministériu sira seluk mós bele halo kna’ar ida ne’e hanesan Ministériu Agrikultura, Obras Públikas inklui setór privadu sira nia papel importante hotu atu halo redusaun ba dezempregu ne’e.

“Setór privadu tenki forte nune’e bele absorve tiha ita nia dezempregu ne’e,” Constâncio sujere. Nia afirma, klaru katak nasaun ida ne’ebé foin dezenvolve án, dezempregu sempre boot.  “Ha’u mós hakarak hato’o mensajen ba ita nia sidadaun sira para labele hein de’it governu maka kria serbisu, maibé sira mós tenki kria serbisu ba sira nia an rasik,” ministru ne’e hato’o.

Nia esplika, buat ida dezempregu ne’e sei latun ba iha jero, tanba esperiénsia hanesan Estadu Unidus Amérika  ne’ebé riku tebe-tebes to’o agora sira nia dezempregu sei pursentu 5. Pinto haklaken, pursentu 5 ne’e normál ona. Sé Timor-Leste maka tun ona ba pursentu 5, ne’e di’ak ona.(Arif)

Matadalan