Fo-fila osan inan, BNU prontu perdua kliente kreditu

DILI - Tusan Banku Nasional Ultramarino (BNU) ba timoroan ne’ebé halo kreditu iha tinan 2002 too mai iha tinan 2008 hamutuk millaun $38. Oras ne’e dadaun timoroan barak mak la selu hetan akumulasaun jurus ka funan ne’ebé maka’as tebes, balun to’o $600 mill dollar. BNU prontu atu perdua kliente kreditu sira ne’ebe durante nee halo kreditu maibe to’o oras ne’e seidauk selu fali osan inan, tanba ne’e husu ba kliente sira atu bele selu fali osan inan ne’ebe iha.

Tuir Vise Prezidente Camara Comersio Industria Timor Leste Joao Alves, kuarta  feira (14/10)  hatete Administrador Caixa Geral Depositu husi Portugal realiza enkontru ida hodi kolia kona-ba problema refere.

“Ohin dader inkontru ho Caixa Geral Deposito BNU, Administrador Caixa Deposito husi Portugal ninian mai iha Timor-Leste, entaun jerente banku telefone hau atu hasoru malu ho administrador caixa geral, pontu principal ne’ebé ami dibursa ohin maka prekupasaun boot CCI-TL ninian liu-liu ba timoroan sira ne’ebé mak hetan kreditu hahu husi tinan 2002 to’o 2008 kreditu ne’ebe barak la komprende saida mak sira halo ba kreditu ida ne’e ne’ebé afeita ba ema ne’ebé kreditu nomos sai hanesan ema ne’ebe fiardor, hetan jurus boot bele koalia fila ho banku atu bele fo perdaun ba jurus balun ne’ebe mak boot,” dehan Vise Prezidente CCI- Joao Alves ba BT iha Zella Restorante Metiaut Kuarta (14/10).

Tan ne’e iha enkotru refere CCI husu ba iha administrador caixa jeral deposito atu bele iha konsiderasaun kona-ba kreditu ne’ebé hetan faillansu boot tebes, oras ne’e dadaun timoroan barak mak hetan jurus ida ne’ebé maka’as tebes , balu to’o $600 mill dollar. Ho problema refere nia afirma katak Caixa Geral Deposito iha disponivel atu bele kolia ho se deit mak hetan kreditu  no hetan jurus makas liu ona atu bele kolia fila fali ho Caixa jeral depositu asenta fila fali kona-ba jurus ne’ebé iha.

“Caixa jeral depozitu bele fó perdaun ba jurus ne’ebé mak iha maibe importante liu ne’e mak  osan inan tenke fila ho negosiasaun atu fó perdua ba jurus balun ne’ebe mak a’as liu ona no sira laiha liu kapasidade atu selu,” dehan nia. Tan ne’e CCI-TL sei halo esforsu tomak atu bele kolia ho Caixa geral depositu hodi bele konsidera ba jurus ne’ebe halo iha 2002 to’o iha tinan 2008 ka liu hodi bele iha perdaun husi ema ne’ebe mak halo kreditu.

“Caixa jeral depositu mos hanoin katak ema ne’ebé kreditu balun faluk ona no iha oan responsabilidade barak ne’ebe aumta jurus makas liu tan no sira prontu atu kolia ho kreditor  hirak ne’e hodi bele foti solusaun ba iha kreditor sira,” katak nia. Nia informa katak bazeia ba informasaun ne’ebé mak fó sai husi diretor jeral Caixa depositu katak kapital kreditu ne’ebé seidauk selu hamutuk $38 milloes dollar  no sidauk konta ho jurus kreditu.

Nia mos dehan katak iha inkontru ne’e mos laos deit kolia kona-ba problema kreditu maibe mos kolia asuntu seluk kona kontribuisaun nomos servisu hamutuk ho Camara Comersio Industria – Timor-Leste hodi kontribui mos ba iha dezenvolvimentu. “Enkontru ne’e ami kolia barak liu kona-ba kontribuisaun no servisu hamutuk ho Camara Comersio Industria Timor Leste (CCI-TL) hamutuk ho Caixa Geral Deposito nomos kolia kona-ba treinamentu ne’ebé fó ba iha membru Camara Comersio ninian iha munisipiu,” afirma nia.

Iha inkontru ne’e mos Caixa Geral deposito halo akordu ida ho CCI-TL atu realiza  enkontru ho seitor privadu atu esplika kona-ba sistema kreditu hodi bele fó apoiu kreditu ba empreza timoroan sira ne’ebe kaer projetu ou empreza timoroan sira ne’ebe iha servisu tanba BNU prontu atu apoiu setor privadu sira hodi dezenvolve Timor Leste. (BT)

Business Timor