Besik estudante 4.000 hosi nasaun 80 resin maka estuda iha Universidade Coimbra

Universidade Coimbra (UC) agora daudaun iha estudante 3.769 hosi nasionalidade 80 resin iha rejimi mobilidade nian no liuhosi estatutu estudante internasionál, no nia objetivu maka to'o iha rihun neen.

Nasionalidade ida nebe iha liu reprezentante maka Brazil ho alunu na'in 2.023 (na'in 1.727 iha rejimi mobilidade no na'in 296 liuhosi estatutu estudante internasionál), hatete ba ajénsia Lusa.

Iha rejimi mobilidade nian, iha estudante na'in 3.297 hosi nasionalidade 86: Brazil iha fatin dahuluk ho na'in 1.727, Itália iha fatin daruak ho na'in 228, tuir España ho na'in 225, Xina iha fatin dahaat ho estudante na'in 145 no Angola iha fatin dalima ho estudante na'in 128.

Liuhosi estatutu estudante internasionál, nebe alunu sira tama iha Universidade Coimbra no selu proprina tinan-tinan euro 7.000, iha estudante hamutuk na'in 472.

Hosi estudante sira ne'e, na'in 101 tama iha 2014/2015, no na'in 245 iha tinan letivu ida ne'e, tau hamutuk mós estudante internasionál sira nebe tama liuhosi "transferénsia sira, kandidatura diretu sira ba mestradu", no dalan sira seluk.

UC iha mós investigadór estranjeiru sira hamutuk na'in 300 iha rejimi mobilidade, tuir informasaun sira iha fulan-Dezembru 2014.

Visi-reitór Joaquim Ramos de Carvalho hatete ba ajénsia Lusa katak objetivu maka ema estranjeiru sira reprezenta "20% hosi estudante sira nebe hetan nia grau iha UC", nune'e "sei implika besik estudante na'in 6.000".

Tuir visi-reitór, foku iha futuru liuhosi kaptasaun maka'as estudante sira nian iha estatutu estudante internasionál (EEI), tanba iha ne'e maka "iha kapasidade maka'as ba kresimentu nian".

Nia refere katak aposta maka iha estudante sira nebe mai hosi Brazil, hosi Nasaun Afrikanu sira ho Lian Ofisiál Portugeza no hosi Xina.

"Importante liu maka UC hetan diversidade no hakbesik liu ba mundu. Universidade ida hosi sékulu XXI nebe forma ema sira hodi sai hanesan sidadaun mundu nian no bele halo de'it bainhira tama iha dimensaun internasionál ida iha buat sira nebe nia halo, hahú hosi konteúdu sira nebe hanorin ba estudante sira, funsionáriu sira no profesór sira nebe atrai", nia hatete.

Ba Joaquim Ramos de Carvalho, iha ensinu superiór portugés "kapasidade boot iha área sira exelénsia nian maka kria oportunidade hodi internasionaliza".

SAPO TL ho Lusa