Povu Laiha Kapasidade Sae Aviaun, ZEESM Prepara ba Ema Elite

DILI - Kustu Aviaun neebe mak governu prepara liu husi Zona Ekonomia Especial Social Merkadu (ZEESM) povu kiik laiha kapasidade atu sae, tan nee aviaun neebe maka iha ba deit ema boot no ema neebe iha kapasidade ekonomia.

Tuir Xefi Bankada Frente-Mudansa Benvinda Catarina Rodrigues katak, Aviaun neebe mak Timor sosa ninia vantazen mak naran, tanba TL mos bele sosa ona aviaun, liu husi Aviaun neebe mak Timor sosa bele aumenta tan reseitas liu husi pasajeiros.

Hau rona Ministru koalia katak kada ema ida ninia kustu $ 45, hau seidauk hatene lolos katak nia bele fo retornu neebe mak boot ba ZEEMS ou kiik, ita koalia kona ba ekonomia finanseiru hau hanoin aviaun ne’e ba ema bot deit, mais ba povu kiik sira Oecusse hau hanoin sira labele sae,” dehan Bemvinda ba Jornalista Kinta (05/11/2015) iha Parlamentu Nasional.

Nia hatutan, TL sosa aviaun atu hatudu katak TL mos iha aviaun ida, maibe seidauk iha konfiansa total  atu hatama reseitas ba kofre Estadu, TL deside sosa aviaun diak, tanba aviaun neebe iha asuntu inportante balun neebe mak dala barak Governu no emprezaria sira ba Oecusse sae ona.

Nunee mos Xefi Bankada CNRT Natalino dos Santos hatete Estadu hodi foti desizaun hodi sosa aviaun ida ba rejiaun espesial administrativa Oecusse no ZEEMS, tanba Estadu investe atu bele hare ba sustentabilidade ekonomi ba futuru.

Nunee mos Deputado Bankada Fretilin Manuel Castro hatete TL ukun an ona neebe tenke hahu ona buat ruma, labele hein deit ba ema seluk tan nee tenke hahu ona buat ruma atu labele hein deit. Informasaun kompletu iha STL Jornal no STL Web, edisaun Sesta (6/11/2015). Timotio Gusmao

Suara Timor Lorosae - Foto: Presidensia Republika Timor-Leste iha SAPO TL